Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Հ. Մարտիրոսյանի
ամբաստանյալ` Ս. Միրզոյանի
տուժողի ներկայացուցիչ` Տ. Պետրոսյանի

2010թ. հունվարի 14-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Սերգեյ Ժիրայրի Միրզոյանի, ծնված 18.12.1975թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես առողջ, ամուսնացած, խնամքին երկու անձ, նախկինում չդատված, չի աշխատում, հաշվառված և բնակվում է Երևան քաղաքի Զ.Սարկավագի 3-րդ փակուղու 6-րդ տանը:
Մեղադրվում է ՀՀ քրեական օրենսգրքի 34-177 հոդվածի 2-րդ մասի 3-րդ կետով:

Պ Ա Ր Զ Ե Ց
1.Գործի դատավարական նախապատմությունը.
2009թ. նոյեմբերի 20-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 34-177 հոդվածի 2-րդ մասի 3-րդ կետի հատկանիշներով հարուցվել է թիվ 09122109 քրեական գործը:
2009թ. նոյեմբերի 26-ին Սերգեյ Ժիրայրի Միրզոյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 34-177 հոդվածի 2-րդ մասի 3-րդ կետով և նրա նկատմամբ որպես խափանման միջոց ընտրվել է ստորագրություն չհեռանալու մասին:
2009թ. դեկտեմբերի 21-ին թիվ 09122109 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2009թ. դեկտեմբերի 21-ին քրեական գործը վարույթ է ընդունվել և նշանակվել դատաքննության 2010թ. հունվարի 13-ին:
2.Գործի փաստական հանգամանքները.
Նախաքննության մարմինն ամբաստանյալ Սերգեյ Ժիրայրի Միրզոյանին մեղադրանք է առաջադրել հետևյալ արարքի համար.
Սերգեյ Միրզոյանը գույքի գաղտնի հափշտակություն կատարելու դիտավորությամբ 2009թ. նոյեմբերի 20-ին, ժամը 0500-ի սահմաններում, տեխնիկական միջոցների գործադրմամբ բացել է Երևան քաղաքի Ազատության պողոտայի 12 հասցեւոմ գտնվող ՙԱդամիում՚ ՍՊԸ-ին պատկանող ՙԽորտիցա Սանդորա՚ ֆիրմային խանութի մուտքի դռան փականը, ապօրինի մուտք է գործել խանութ, փորձել է գողանալ զգալի չափերի գույք, սակայն նույն պահին աշխատել է անվտանգության ձայնային ազդանշանը, որի պատճառով Սերգեյ Միրզոյանն իր կամքից անկախ պատճառներով հանցագործությունն ավարտին չի հասցրել և դիմել է փախուստի: Հետագայում նա բռնվել է ոստիկանության աշխատակիցների կողմից:
3.Ապացույցների հետազոտում.
Առաջադրված մեղադրանքում ամբաստանյալ Սերգեյ Միրզոյանն իրեն մեղավոր է ճանաչել լիովին և ցուցմունք տվել այն մասին, որ 2009թ. նոյեմբերի 19-ի երեկոյան վիճաբանելով կնոջ հետ, այն բանի համար, որ չի կարողանում հոգալ ընտանեկան առօրյա նվազագույն ծախսերը, որոշել է գողություն կատարել: Տանից դուրս գալուց վերցրել է կնոջ զուգագուլպաներից մեկը, մեկ հատ դուր և հին կտորե ձեռնոցներ ու դուրս եկել փողոց: Հիշել է, որ Ազատության պողոտայի վրա ՙԽորտիցա Սանդորա՚ խանութ կա, ուր նա նախկինում օղի է առաքել և որոշել է այդ խանութից էլ գողություն կատարել ընտանիքի մի քանի օրվա ծախսերը հոգալու համար: Ժամը 0500-ի սահմաններում հասել է Ազատության 12 հասցեում գտնվող ՙԽորտիցա Սանդորա՚ խանութ, հագել է ձեռնոցները և գլխին քաշել զուգագուլպան այնուհետև, իր մոտ եղած դուրը մտցրել է խանութի դռան և շրջանակի արանքը ու բացել դուռը, որից հետո մի 2-3 քայլ առաջացել է դեպի խանութի ներս, սակայն այդ պահին աշխատել է խանութի անվտանգության ձայնազդանշանային համակարգը, որից վախեցած շտապ դիմել է փախուստի դեպի Հաղթանակ զբոսայգու կողմ: Ճանապարհին գլխից հանել է զուգագուլպան, ձեռքերից` ձեռնոցներն ու դրել գրպանը: Մոտ 50 մետր խանութից հեռանալուց հետո ճանապարհին կանգնած ՎԱԶ 2106 մակնիշի մեքենայից իջել են 2 երիտասարդ և ձայն են տվել իրեն, սակայն ինքը չի կանգնել և դիմել է փախուստի, իսկ այդ երիտասարդները վազել են իր հետևից: Մի քանի մետր վազելուց հետո ինքը սայթաքել և վայր է ընկել, իսկ հետապնդողները հասել ու բռնել են իրեն: Չիմանալով, թե ովքեր են փորձել է ազատվել նրանցից և փախչել, որից հետո այդ երիտասարդները ներկայացել են որպես ոստիկանության աշխատակիցներ: Ինքը ենթարկվել է և իրեն տարել են ոստիկանության բաժին:
Ամբաստանյալի կատարած հանցանքը, բացի նրա ցուցմունքից հիմնավորվել է նաև գործով ձեռք բերված հետևյալ ապացույցներով.
Տուժողի ներկայացուցիչ Տիգրան Բալասանի Պետրոսյանի ցուցմունքով այն մասին, որ 2009թ. նոյեմբերի 20-ին ՙԱդամիում՚ ՍՊԸ-ին պատկանող Ազատության 12 հասցեում գտնվող ՙԽորտիցա Սանդորա՚ խանութի տնօրեն Կարինե Մուշեղյանից տեղեկացել է, որ նույն գիշեր խանութից գողության փորձ է կատարվել, որի ժամանակ աշխատել է խանութի անվտանգության ձայնային ազդանշանը, հանցագործությունը չի հասցվել ավարտին և ՍՊԸ-ին վնաս չի պատճառվել: Հետագայում իմացել է, որ գողության փորձը կատարել է Սերգեյ Միրզոյանը, որը նախկինում աշխատել է ՙԱդամիում՚ ՍՊԸ-ում որպես առաքիչ: Նշել է նաև, որ որևէ քաղաքացիական հայցի պահանջ չունեն:
Վկա Կարինե Արտավազդի Մուշեղյանի նախաքննության ընթացքում տված և դատաքննության ժամանակ հետազոտված ցուցմունքով այն մասին, որ հանդիսանում է Ազատության 12 հասցեում գտնվող ՙԱդամիում՚ ՍՊԸ-ին պատկանող ՙԽորտիցա Սանդորա՚ խանութի տնօրենը: 2009թ. նոյեմբերի 20-ին, ժամը 0430-ի սահմաններում իր բջջային հեռախոսին է զանգ է ստացվել խանութի ձայնաազդանշանային համակարգից, քանի որ այն միացված է բջջային հեռախոսին և աշխատելուն պես զանգահարում է: Դրանից հետո ինքը գնացել է խանութ, որի դիմաց արդեն կանգնած են եղել ոստիկանության աշխատակիցները: Միասին զննել են խանութի դուռը և նկատել են, որ փականը բացված է: Այնուհետև զննել են խանութը ու պարզել, որ խանութից ոչինչ չի գողացվել: Հետագայում իմացել է, որ գողությունը կատարել է Սերգեյ Միրզոյանը:
Վկա Ռուզաննա Դավիթի Եղիազարյանի ցուցմունքով այն մասին, որ աշխատում է Ազատության 12 հասցեում գտնվող ՙԽորտիցա Սանդորա՚ ֆիրմային խանութում: 2009թ. նոյեմբերի 20-ին, ժամը 0500-ի սահմաններում իրեն է զանգահարել խանութի տնօրեն Կարինե Մուշեղյանը և խնդրել, որպեսզի գնա խանութ և միասին փակեն խանութի դուռը, քանի որ խանութից գողության փորձ է կատարվել և դռան փականը բաց վիճակում է: Ժամը 0520-ի սահմաններում հասել է խանութ, որի դռների դիմաց կանգնած են եղել ոստիկանության աշխատակիցներ և խանութի տնօրեն Կարինե Մուշեղյանը: Մտել են խանութ, զննել այն և պարզել, որ խանութից ոչինչ գողացված չի եղել: Այնուհետև միասին փակել են խանութի դուռը և գնացել տուն: Հետագայում տեղեկացել է, որ խանութից գողության փորձ կատարվել է Սերգեյ Միրզոյանի կողմից:
Վկա Անի Սուրենի Արսենյանի նախաքննության ընթացքում տված և դատաքննության ժամանակ հետազոտված ցուցմունքով այն մասին, որ աշխատում է Ազատության 12 հասցեում գտնվող ՙԽորտիցա Սանդորա՚ ֆիրմային խանութում: 2009թ. նոյեմբերի 20-ին, ժամը 0500-ի սահմաններում իրեն զանգահարել է խանութի տնօրեն Կարինե Մուշեղյանը և հայտնել, որ խանութից փորձել են գողություն կատարել և հարցրել է, թե իր մոտ է խանութի բանալին, ինչին ինքը պատասխանել է, որ մյուս վաճառողուհու` Ռուզաննայի մոտ է: Երբ հաջորդ օրը գնացել է խանութ, իմացել է, որ այնտեղից ոչինչ չեն կարողացել գողանալ, քանի որ աշխատել է խանութի ձայնաազդանշանային համակարգը: Իմացել է նաև, որ գողության փորձ կատարողը հանդիսացել է Սերգեյ Միրզոյանը:
Վկա Լուսինե Սարգիսի Սանթուրյանի ցուցմունքով այն մասին, որ հանդիսանում է Սերգեյ Միրզոյանի կինը: 2009թ. նոյեմբերի 19-ին ժամը 2300-ից 2400-ն ընկած ժամանակահատվածում կենցաղային հարցերի շուրջ վիճաբանել է ամուսնու հետ, որից հետո ամուսինը բարկացած դուրս է եկել տանից և ամբողջ գիշեր չի վերադարձել: Հաջորդ օրը տեղեկացել է, որ ամուսնուն գողություն կատարելու կասկածանքով տարել են ոստիկանության Քանաքեռ-Զեյթուն բաժին: Երբ ամուսինը տուն է վերադարձել, պատմել է որ բարկացած, չհասկանալով թե ինչ է անում գիշերը փորձել է Ազատության պողոտայի վրա գտնվող ՙԽորտիցա Սանդորա՚ ֆիրմայն խանութից գողություն կատարել և բռնվել է ոստիկանության աշխատակիցների կողմից:
Վկա Ժիրայր Սարիբեկի Միրզոյանի նախաքննության ընթացքում տված և դատաքննության ժամանակ հետազոտված ցուցմունքով այն մասին, որ հանդիսանում է Սերգեյ Միրզոյանի հայրը: 2009թ. նոյեմբերի 20-ին կեսօրվա ժամերին տեղեկացել է, որ որդուն` Սերգեյ Միրզոյանին գողություն կատարելու կասկածանքով տարել են ոստիկանության Քանաքեռ-Զեյթուն բաժին: Երբ հանդիպել է որդուն, վերջինս պատմել է, որ նույն օրը, գիշերը ժամը 0500-ի սահմաններում Ազատության 12 հասցեում գտնվող ՙԽորտիցա Սանդորա՚ ֆիրմային խանութից փորձել է գողություն կատարել:
Ամբաստանյալին առաջադրված մեղադրանքը հիմնավորվել է նաև գործով ձեռք բերված և հետազոտված հետևյալ ապացույցներով.
Քննչական փորձարարություն կատարելու արձանագրությամբ, համաձայն որի Սերգեյ Միրզոյանը մատնացույց է արել և հայտարարել, թե ինչպես է մուտք գործել Ազատության 12 հասցեում գտնվող ՙԽորտիցա Սանդորա՚ ֆիրմային խանութ և փորձել գողություն կատարել, սակայն միացել է խանութի անվտանգության ձայնանշանային համակարգը, որի հետևանքով դիմել է փախուստի` գողությունն ավարտին չհասցնելով:
Սերգեյ Միրզոյանի անձնական խուզարկությամբ մեկ զույգ ձեռնոցները, կանացի զուգագուլպան, երկաթե դուրը և գլխարկը հայտնաբերելու և առգրավելու, դրանք զննելու արձանագրություններով և իրեղեն ապացույց ճանաչելու մասին որոշմամբ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սերգեյ Ժիրայրի Միրզոյանին առաջադրված մեղադրանքը ՀՀ քրեական օրենսգրքի 34-177 հոդվածի 2-րդ մասի 3-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 34-177 հոդվածի 2-րդ մասի 3-րդ կետի հատկանիշներին և արարքի որակումը ճիշտ է:
Ամբաստանյալ Սերգեյ Միրզոյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Սերգեյ Միրզոյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա նախկինում դատված չի եղել, զղջում է կատարած արարքի համար, նրա խնամքին են գտնվում 12 և 13 տարեկան երեխաները, բնութագրվում է դրական, ինչպես նաև տուժողի ներկայացուցչի խնդրանքը ամբաստանյալի նկատմամբ մեղմ պատիժ նշանակելու վերաբերյալ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված` մեկ զույգ ձեռնոցները, կանացի զուգագուլպան, գլխարկը և երկաթե դուրը պետք է ոչնչացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Սերգեյ Ժիրայրի Միրզոյանին մեղավոր ճանաչել ՀՀ քրեական օրենսգրքի 34-177 հոդվածի 2-րդ մասի 3-րդ կետով և նրան դատապարտել ազատազրկման երկու (2) տարի ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվել դատավճռի կատարման օրվանից:
Սերգեյ Ժիրայրի Միրզոյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված` մեկ զույգ ձեռնոցները, կանացի զուգագուլպան, գլխարկը և երկաթե դուրը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ