ԵԱՔԴ/0178/01/09







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


«23» մարտի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Աղայան
տուժողներ Գ.Հարությունյան
Ա.Համբարձումյան
պաշտպան Է.Վարդանյան


դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Ռոմիկ Վարուժանի Գրիգորյանի` ծնված 1981 թվականի սեպտեմբերի 17-ին Կոտայքի մարզի Ջրվեժ գյուղում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում երեք անգամ դատապարտված, չի աշխատում, բնակվել է Կոտայքի մարզի Ջրվեժ գյուղի 4-րդ փողոցի 8-րդ տանը: Մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 3-րդ կետով, արգելանքի տակ է 2009 թվականի օգոստոսի 21-ից:
1. Գործի դատավարական նախապատմությունը.
2009 թվականի հունիսի 27-ին ՀՀ ոստիկանության Արաբկիրի քննչական բաժնի քննիչ Ս.Հարությունյանի որոշմամբ ՀՀ քրեական օրենսգրքի 177-րդ հոդվածի 2-րդ մասի 3-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 14118709 քրեական գործը:
2009 թվականի օգոստոսի 24-ին ՀՀ ոստիկանության Արաբկիրի քննչական բաժնի քննիչ Ս.Հարությունյանի որոշմամբ Ռոմիկ Վարուժանի Գրիգորյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ, 3-րդ և 4-րդ կետերով:
2009 թվականի օգոստոսի 12-ին ՀՀ ոստիկանության Մալաթիայի քննչական բաժնի քննիչ Ս.Միքայելյանի որոշմամբ ՀՀ քրեական օրենսգրքի 177-րդ հոդվածի 2-րդ մասի 2-րդ և 3-րդ կետերով նախատեսված հանցագործության հատկանիշներով հարուցվել և վարույթ է ընդունվել թիվ 16121409 քրեական գործը:
2009 թվականի սեպտեմբերի 2-ին ՀՀ ոստիկանության Մալաթիայի քննչական բաժնի քննիչ Ս.Միքայելյանի որոշմամբ թիվ 16121409 քրեական գործն ըստ քննչական ենթակայության ուղարկվել է ՀՀ ոստիկանության Արաբկիրի քննչական բաժին:
2009 թվականի սեպտեմբերի 3-ին ՀՀ ոստիկանության Արաբկիրի քննչական բաժնի քննիչ Ս.Հարությունյանի որոշմամբ թիվ 16121409 քրեական գործն ընդունվել է վարույթ, միացվել թիվ 14118709 քրեական գործին, և նախաքննությունը շարունակվել է թիվ 14118709 համարով:
2009 թվականի հոկտեմբերի 12-ին ՀՀ ոստիկանության Արաբկիրի քննչական բաժնի քննիչ Ս.Հարությունյանի որոշմամբ Ռոմիկ Վարուժանի Գրիգորյանին առաջադրված մեղադրանքը փոփոխվել, լրացվել է և նոր մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 3-րդ կետով:
2009 թվականի հոկտեմբերի 19-ին ՀՀ ոստիկանության Արաբկիրի քննչական բաժնի քննիչ Ս.Հարությունյանը թիվ 14118709 քրեական գործով կազմել է մեղադրական եզրակացություն:
2009 թվականի հոկտեմբերի 23-ին Երևան քաղաքի Արաբկիր և Քանաքեռ-Զեյթուն համայնքների դատախազության դատախազ Ա.Աղայանի որոշմամբ մեղադրական եզրակացությունը չի հաստատվել և լրացուցիչ քննություն կատարելու համար գործը վերադարձվել է քննիչին:
2009 թվականի նոյեմբերի 20-ին ՀՀ ոստիկանության Արաբկիրի քննչական բաժնի քննիչ Ս.Հարությունյանի որոշմամբ թիվ 14118709 քրեական գործով Աննա Սերյոժայի Էլոյանի և Արմեն Համլետի Ալեքսանյանի նկատմամբ քրեական հետապնդում չի իրականացվել` վերջինների արարքներում հանցակազմի բացակայության հիմքով:
2009 թվականի դեկտեմբերի 16-ին Ռոմիկ Վարուժանի Գրիգորյանի վերաբերյալ քրեական գործը մեղադրական եզրակացությամբ ուղարկվել է Դատարան:
Ռոմիկ Վարուժանի Գրիգորյանին մեղադրանք է առաջադրվել ՀՀ քրեական օրենսգրքի 177-րդ հոդվածի 3-րդ մասի 3-րդ կետով` այն արարքների համար, որ նա 2005 թվականի հոկտեմբերի 25-ին Երևան քաղաքի Կենտրոն և Նորք-Մարաշ համայնքների առաջին ատյանի դատարանի դատավճռով ՀՀ քրեական օրենսգրքի 177-րդ հոդվածի 3-րդ մասի 3-րդ կետով դատապարտված լինելով 4 տարի 6 ամիս ժամկետով ազատազրկման, 2008 թվականի ապրիլի 29-ին 1 տարի 5 ամիս 4 օր ժամկետով պայմանական վաղակետ ազատված լինելով, պատիժը կրելու ընթացքում կրկին անգամ կատարել է նոր դիտավորյալ հանցագործություններ:
Այն է` 2009 թվականի հունիսի 24-ին` ժամը 03:00-ի սահմաններում, Երևան քաղաքի Կիևյան 1բ շենքի 3-րդ բնակարանի պատուհանի վանդակաճաղերը տեխնիկական միջոցների գործադրմամբ վնասելու և եվրոպական արտադրության պատուհանը բացելու եղանակով ապօրինի մուտք է գործել Գագիկ Ժորայի Հարությունյանին պատկանող բնակարան և գողացել հագուստներ, խմիչքներ, սպասքի պարագաներ և կենցաղային իրեր` Գագիկ Հարությունյանին պատճառելով խոշոր չափերի հասնող 1.061.200 ՀՀ դրամի գույքային վնաս:
Բացի այդ Ռոմիկ Վարուժանի Գրիգորյանը 2009 թվականի օգոստոսի 12-ին` ժամը 03:00-ի սահմաններում, Երևան քաղաքի Անդրանիկի փողոցի 59-րդ շենքի 4-րդ բնակարանի պատուհանի վանդակաճաղի կողպեքը տեխնիկական միջոցների գործադրմամբ կտրելու և եվրոպական արտադրության պատուհանը բացելու միջոցով ապօրինի մուտք է գործել Արման Աշոտի Համբարձումյանին պատկանող բնակարան և գողացել 152.000 ՀՀ դրամ գումար, ոսկյա և արծաթյա զարդեր, հագուստեր, սպասքի պարագաներ, օծանելիքներ և կենցաղային իրեր` Արման Համբարձումյանին պատճառելով խոշոր չափերի հասնող 2.363.150 ՀՀ դրամի գույքային վնաս:
2. Արագացված դատական քննություն.
Մինչ դատաքննությունն սկսելն ամբաստանյալ Ռոմիկ Վարուժանի Գրիգորյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Ռոմիկ Վարուժանի Գրիգորյանը կատարել է արարքներ` նախատեսված ՀՀ քրեական օրենսգրքի 177-րդ հոդվածի 3-րդ մասի 3-րդ կետով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, էպիկրիզի պատճենը, եկավ հետևյալ եզրահանգման.
Ռոմիկ Գրիգորյանի անձը դրականորեն բնութագրող հանգամանքներ են` ինքնախոստովանական ցուցմունքներ տալը և կատարածի համար զղջալը:
Դատարանը գտնում է, որ Ռոմիկ Գրիգորյանի պատասխանատվությունն ու պատիժը մեղմացնող հանգամանք պետք է դիտել վատառողջ լինելը:
Ռոմիկ Գրիգորյանի պատասխանատվությունն ու պատիժը ծանրացնող հանգամանք է հանցանքները կատարելու ռեցիդիվը, քանի որ բացի հափշտակություններ կատարելու համար երեք դատվածություններ ունենալուց, նա դատվածություն ունի նաև այլ դիտավորյալ հանցագործության` դասալքության համար:
Կատարած արարքների համար ամբաստանյալ Ռոմիկ Գրիգորյանը ենթակա է քրեական պատասխանատվության և պատժի:
Դատարանը, հաշվի առնելով Ռոմիկ Գրիգորյանի կատարած արարքների` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ Ռոմիկ Գրիգորյանի կողմից կատարված արարքների համար ՀՀ քրեական օրենսգրքի 177-րդ հոդվածի 3-րդ մասի սանկցիայով նախատեսված է պատիժ ազատազրկման ձևով, գտնում է, որ ՀՀ քրեական օրենսգրքի 48-րդ հոդվածով սահմանված պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով: Ընդ որում` կատարված արարքների համար չպետք է նշանակել 177-րդ հոդվածի 3-րդ մասի սանկցիայով նախատեսված լրացուցիչ պատիժը` գույքի բռնագրավումը:
ՀՀ ոստիկանության ինֆորմացիոն կենտրոնի պահանջագրի համաձայն` Երևան քաղաքի Կենտրոն և Նորք-Մարաշ համայնքների առաջին ատյանի դատարանի 2005 թվականի հոկտեմբերի 25-ի դատավճռով Ռոմիկ Վարուժանի Գրիգորյանը մեղավոր է ճանաչվել ՀՀ քրեական օրենսգրքի 177-րդ հոդվածի 3-րդ մասի 3-րդ կետով և նրա նկատմամբ պատիժ է նշանակվել ազատազրկում 4 տարի 6 ամիս ժամանակով: 2008 թվականի ապրիլի 29-ին Ռոմիկ Գրիգորյանը պայմանական վաղաժամկետ ազատվել է պատժի մնացած մասը` 1 (մեկ) տարի 5 (հինգ) ամիս 4 (չորս) օրը, կրելուց: Նշվածից հետևում է, որ Ռոմիկ Գրիգորյանի պատժի չկրած մասի ժամկետը կավարտվեր 2009 թվականի հոկտեմբերին, մինչդեռ մեղսագրվող արարքները նա կատարել է 2009 թվականի հունիսին և օգոստոսին: ՀՀ քրեական օրենսգրքի 76-րդ հոդվածի 6-րդ մասի 3-րդ կետի համաձայն` եթե պատժի չկրած մասի ընթացքում դատապարտյալը կատարում է դիտավորյալ հանցանք, ապա դատարանը նրա նկատմամբ պատիժ է նշանակում ՀՀ քրեական օրենսգրքի 67-րդ հոդվածով նախատեսված կանոններով: Հետևապես, Դատարանը գտնում է, որ ամբաստանյալ Ռոմիկ Գրիգորյանի նկատմամբ վերջնական պատիժ պետք է նշանակվի ՀՀ քրեական օրենսգրքի 67-րդ հոդվածով սահմանված կարգով` սույն դատավճռով նշանակված պատժին Երևան քաղաքի Կենտրոն և Նորք-Մարաշ համայնքների առաջին ատյանի դատարանի 2005 թվականի հոկտեմբերի 25-ի դատավճռով նշանակված պատժի չկրած մասը` 1 (մեկ) տարի 5 (հինգ) ամիս 4 (չորս) օր ժամկետով ազատազրկումը, մասնակիորեն գումարելու կանոնով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Ռոմիկ Գրիգորյանի պատժի կրման սկիզբը պետք է հաշվել 2009 թվականի օգոստոսի 21-ից, քանի որ նա փաստացի արգելանքի է վերցվել այդ օրը, որից հետո` 2009 թվականի օգոստոսի 22-ին, կազմվել է ձերբակալման արձանագրություն, իսկ 2009 թվականի օգոստոսի 24-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Ռոմիկ Գրիգորյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2009 թվականի հոկտեմբերի 6-ի որոշմամբ իրեղեն ապացույց ճանաչված և տուժող Արման Համբարձումյանին ի պահ հանձնված հինգ ափսեներից բաղկացած սպասքի կոմպլեկտը, օծանելիքը, բլենդեր-հարիչը, ֆոտոալբոմը, երշիկեղեն կտրելու սարքավորումը, երեք զույգ ականջօղերը, կախազարդը, կախազարդով վզնոցը պետք է թողնել Արման Համբարձումյանի տնօրինությանը, 2009 թվականի հոկտեմբերի 6-ի որոշմամբ իրեղեն ապացույց ճանաչված և տուժող Գագիկ Հարությունյանին ի պահ հանձնված տղամարդու կիսաբաճկոնը, կանացի մուշտակը, տղամարդու պիջակը, երկու փողկապները, տղամարդու վերնաշապիկը, վեց բաժակներից և սափորից բաղկացած սպասքի կոմպլեկտը, արևային ակնոցը, ծաղկամանը և երկու ճամպրուկները պետք է թողնել Գագիկ Հարությունյանի տնօրինությանը, իսկ 2010 թվականի հոկտեմբերի 10-ի որոշմամբ իրեղեն ապացույց ճանաչված ավտոմեքենայի ամբարձիչը պետք է բռնագրավել և հանձնել ՀՀ ոստիկանությանը:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցն ենթակա է արդյոք բավարարման, ում օգտին և ինչ չափով:
Սույն քրեական գործով տուժող Արման Աշոտի Համբարձումյանը ներկայացրել է քաղաքացիական հայց` ամբաստանյալ Ռոմիկ Գրիգորյանից պահանջելով հանցագործությամբ իրեն պատճառված վնասը` 2.385.000 ՀՀ դրամը: Սակայն գործով ձեռք բերված ապացույցներով հաստատվում է, որ Արման Աշոտի Համբարձումյանին հանցագործությամբ անմիջականորեն պատճառվել է ոչ թե 2.385.000 ՀՀ դրամի վնաս, այլ 2.363.150 ՀՀ դրամի վնաս: Ամբաստանյալ Ռոմիկ Գրիգորյանի կողմից քաղաքացիական հայցը կամավոր ընդունելու պայմաններում Դատարանը գտնում է, որ վերջինի դեմ ներկայացված Արման Համբարձումյանի քաղաքացիական հայցի պահանջը պետք է բավարարել մասնակի և Ռոմիկ Գրիգորյանից հօգուտ Արման Աշոտի Համբարձումյան, որպես հանցագործությամբ պատճառված վնաս, պետք է բռնագանձել 2.363.150 ՀՀ դրամ, քանի որ դա չի հակասում օրենքին և չի վերաբերվում այլ անձանց իրավունքներին: Դատարանը, նկատի ունենալով, որ Արման Համբարձումյանին պատճառված վնասի մի մասը համապատասխանաբար 15.000, 10.000, 10.000, 150, 9.000, 3.000, 1.500 և 11.000 ՀՀ դրամ արժողության հինգ ափսեներից բաղկացած սպասքի կոմպլեկտը, օծանելիքը, բլենդեր-հարիչը, ֆոտոալբոմը, երշիկեղեն կտրելու սարքավորումը, երեք զույգ ականջօղերը, կախազարդը և կախազարդով վզնոցը պետք է վերադարձվի նրան` ելնելով սոցիալական արդարության ապահովման անհրաժեշտությունից, գտնում է, որ Արման Համբարձումյանի օգտին բռնագանձվելիք գումարից` 2.363.150 ՀՀ դրամից, պետք է հանել (հաշվանցել) նրան վերադարձման ենթակա իրերի արժեքը` 59.650 ՀՀ դրամը (2.363.150-59.650 =2.303.500):
Սույն քրեական գործով քաղաքացիական հայց է ներկայացրել նաև տուժող Գագիկ Ժորայի Հարությունյանը ամբաստանյալ Ռոմիկ Գրիգորյանից պահանջելով հանցագործությամբ իրեն պատճառված վնասը` 1.409.000 ՀՀ դրամը: Սակայն Գագիկ Ժորայի Հարությունյանը դատական նիստի ժամանակ` իր ճառում հրաժարվել է իր կողմից հարուցված քաղաքացիական հայցից, ուստի Դատարանը գտնում է, որ քաղաքացիական հայցից հրաժարումը պետք է ընդունել և Գագիկ Ժորայի Հարությունյանի կողմից հարուցված քաղաքացիական հայցի վարույթը կարճել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Ռոմիկ Գրիգորյանից ենթակա չեն բռնագանձման, քանի որ հանցագործությամբ պատճառված վնասի հատուցման համար ներկայացված քաղաքացիական հայցերից մեկը վերոնշյալ հիմնավորումներով պետք է բավարարել մասնակի, իսկ մյուսը պետք է կարճել: Ինչ վերաբերում է ՀՀ քրեական դատավարության օրենսգրքի 168-րդ հոդվածի 1-ին մասի 2-8-րդ կետերով նախատեuված դատական ծախuերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի, ամբաuտանյալից ենթակա չեն բռնագանձման:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև հանցագործությամբ պատճառված գույքային վնասի հատուցումը կամ գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը:
2009 թվականի հոկտեմբերի 15-ի որոշմամբ Ռոմիկ Գրիգորյանին պատկանող գույքի` 100 ԱՄՆ դոլարի, 25.000 ՀՀ դրամի և «Նոկիա 6080» բջջային հեռախոսի վրա դրվել է կալանք: ՀՀ քրեական դատավարության օրենսգրքի 238-րդ հոդվածի համաձայն` գույքը քրեական վարույթն իրականացնող մարմնի որոշմամբ ազատվում է կալանքից, եթե քաղաքացիական հայցը հետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը: Դատարանը, նկատի ունենալով, որ սույն քրեական գործով ներկայացված քաղաքացիական հայցերից մեկը մասնակի բավարավել է, գտնում է, որ Ռոմիկ Գրիգորյանի գույքի վրա դրված կալանքը պետք է թողնել անփոփոխ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 161-րդ, 168-րդ, 238-րդ, 308-րդ, 309-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը

ՎՃՌԵՑ

Ռոմիկ Վարուժանի Գրիգորյանին մեղավոր ճանաչել ՀՀ քրեական օրենսգրքի 177-րդ հոդվածի 3-րդ մասի 3-րդ կետով և պատիժ նշանակել ազատազրկում` 5 (հինգ) տարի ժամկետով:
ՀՀ քրեական օրենսգրքի 67-րդ հոդվածով սահմանված կարգով` սույն դատավճռով նշանակված պատժին մասնակիորեն գումարել Երևան քաղաքի Կենտրոն և Նորք-Մարաշ համայնքների առաջին ատյանի դատարանի 2005 թվականի հոկտեմբերի 25-ի դատավճռով նշանակված պատժի չկրած մասը` 1 (մեկ) տարի 5 (հինգ) ամիս 4 (չորս) օր ժամկետով ազատազրկումը, և Ռոմիկ Վարուժանի Գրիգորյանի նկատմամբ վերջնական պատիժ նշանակել ազատազրկում` 5 (հինգ) տարի 6 (վեց) ամիս ժամկետով` պատժի կրման սկիզբը հաշվելով 2009 թվականի օգոստոսի 21-ից:
Ռոմիկ Վարուժանի Գրիգորյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո` 2009 թվականի հոկտեմբերի 6-ի որոշմամբ իրեղեն ապացույց ճանաչված և տուժող Արման Համբարձումյանին ի պահ հանձնված հինգ ափսեներից բաղկացած սպասքի կոմպլեկտը, օծանելիքը, բլենդեր-հարիչը, ֆոտոալբոմը, երշիկեղեն կտրելու սարքավորումը, երեք զույգ ականջօղերը, կախազարդը, կախազարդով վզնոցը թողնել Արման Համբարձումյանի տնօրինությանը, 2009 թվականի հոկտեմբերի 6-ի որոշմամբ իրեղեն ապացույց ճանաչված և տուժող Գագիկ Հարությունյանին ի պահ հանձնված տղամարդու կիսաբաճկոնը, կանացի մուշտակը, տղամարդու պիջակը, երկու փողկապները, տղամարդու վերնաշապիկը, վեց բաժակներից և սափորից բաղկացած սպասքի կոմպլեկտը, արևային ակնոցը, ծաղկամանը և երկու ճամպրուկները թողնել Գագիկ Հարությունյանի տնօրինությանը, իսկ 2010 թվականի հոկտեմբերի 10-ի որոշմամբ իրեղեն ապացույց ճանաչված ավտոմեքենայի ամբարձիչը` բռնագրավել և հանձնել ՀՀ ոստիկանությանը:
Արման Աշոտի Համբարձումյանի քաղաքացիական հայցը բավարարել մասնակի. Ռոմիկ Վարուժանի Գրիգորյանից հօգուտ Արման Աշոտի Համբարձումյանի, որպես հանցագործությամբ պատճառված վնաս, բռնագանձել 2.303.500 ՀՀ դրամ (2.363.150 ՀՀ դրամին հաշվանցելով 59.650 ՀՀ դրամը):
Գագիկ Ժորայի Հարությունյանի քաղաքացիական հայցի վարույթը կարճել:
Ռոմիկ Վարուժանի Գրիգորյանի գույքի վրա դրված կալանքը թողնել անփոփոխ:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ