գործ No ԵԱՔԴ 0177/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Ա. Աղայանի
ամբաստանյալներ` Ա.Սարգսյանի, Ա.Չալաբյանի, Հ.Ալեքսանյանի
Ա.Սարգսյանի պաշտպան` Ռ.Սիրեկանյանի

2010թ. մարտի 22-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի`
1. Արմեն Հակոբջանի Սարգսյանի, ծնված 16.05.1966թ., Գորիս քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, խնամքին մեկ անձ, չի աշխատել, նախկինում չդատված, հաշվառված և բնակվել է Գորիս քաղաքի Գ.Նժդեհի փողոցի թիվ 18 տանը:
Մեղադրվում է ՀՀ քրեական օրենսգրքի 266 հոդվածի 3-րդ մասի 2-րդ կետով և 268 հոդվածի 3-րդ մասով:
2. Աշոտ Յուրայի Չալաբյանի, ծնված 27.11.1971թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուսնալուծված, նախկինում դատված` 1.Երևանի Կենտրոն և Նորք-Մարաշ համայնքների առաջին ատյանի դատարանի 14.02.1999թ. դատավճռով ՀՀ քրեական օրենսգրքի 86 հոդվածի 2-րդ մասով դատապարտվել է ազատազրկման 1 տարի ժամկետով, ազատվել է 23.06.1999թ. պայմանական վաղաժամկետ` 5 ամիս 10 օր, 2.Երևանի Կենտրոն և Նորք-Մարաշ համայնքների առաջին ատյանի դատարանի 05.07.2002թ. դատավճռով ՀՀ քրեական օրենսգրքի 86 հոդվածի 2-րդ մասով դատապարտվել է ազատազրկման 3 տարի ժամկետով, 3. Երևանի Կենտրոն և Նորք-Մարաշ համայնքների առաջին ատյանի դատարանի 07.01.2003թ. դատավճռով ՀՀ քրեական օրենսգրքի 229 հոդվածի 3-րդ մասով դատապարտվել է ազատազրկման 2 տարի ժամկետով, 4.Երևանի Կենտրոն և Նորք-Մարաշ համայնքների առաջին ատյանի դատարանի 25.09.2004թ. դատավճռով ՀՀ քրեական օրենսգրքի 268 հոդվածի 2-րդ մասով դատապարտվել է ազատազրկման 9 ամիս ժամկետով, ազատվել է 04.10.2004թ. պայմանական վաղաժամկետ` 4 ամիս 23 օր, 5.Երևանի Կենտրոն և Նորք-Մարաշ համայնքների առաջին ատյանի դատարանի 29.03.2005թ. դատավճռով ՀՀ քրեական օրենսգրքի 177 հոդվածի 3-րդ մասի 3-րդ կետով, 67 հոդվածի հիման վրա դատապարտվել է ազատազրկման 4 տարի 3 ամիս ժամկետով, ազատվել է 30.03.2009թ., դատվածությունը չմարված, չի աշխատել, հաշվառված և բնակվել է Երևան քաղաքի Թումանյան փողոցի 19 շենքի թիվ 9 բնակարանում:
Մեղադրվում է ՀՀ քրեական օրենսգրքի 268 հոդվածի 3-րդ մասով:
3. Համբարձում Ռոբերտի Ալեքսանյանի, ծնված 08.06.1975թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես վատառողջ, ամուրի, նախկինում դատված` 1.Արարատի մարզի առաջին ատյանի դատարանի 12.10.2000թ. դատավճռով ՀՀ քրեական օրենսգրքի 229 հոդվածի 4-րդ մասով դատապարտվել է ազատազրկման 2 տարի 6 ամիս ժամկետով 2. Երևանի Կենտրոն և Նորք-Մարաշ համայնքների առաջին ատյանի դատարանի 10.05.2004թ. դատավճռով ՀՀ քրեական օրենսգրքի 268 հոդվածի 2-րդ մասով դատապարտվել է ազատազրկման 6 ամիս ժամկետով, 3. Երևանի Կենտրոն և Նորք-Մարաշ համայնքների առաջին ատյանի դատարանի 17.02.2006թ. դատավճռով ՀՀ քրեական օրենսգրքի 177 հոդվածի 3-րդ մասի 1-ին կետով, 324 հոդվածի 1-ին մասով, 34-38-178 հոդվածի 2-րդ մասի 1, 3 կետերով, 66 հոդվածի հիման վրա դատապարտվել է ազատազրկման 4 տարի 6 ամիս ժամկետով և տուգանքի 300.000 դրամի չափով, ազատվել է 27.12.2007թ. պայմանական վաղաժամկետ` 2 տարի 1 ամիս 5 օր, դատվածությունը չմարված, չի աշխատում, հաշվառված է Երևան քաղաքի Կ.Ուլնեցու փողոցի 51 շենքի թիվ 12 բնակարանում, բնակվում է Երևան քաղաքի Նոր-Նորքի 7-րդ զանգվածի 30 շենքի թիվ 44 բնակարանում:
Մեղադրվում է ՀՀ քրեական օրենսգրքի 268 հոդվածի 1-ին մասով:

Պ Ա Ր Զ Ե Ց
1.Գործի դատավարական նախապատմությունը.
2009թ. հուլիսի 26-ին ՀՀ ոստիկանության ՔԳՎ Երևան քաղաքի քննչական վարչության Քանաքեռ-Զեյթուն քննչական բաժնում ՀՀ քրեական օրենսգրքի 268 հոդվածի 3-րդ մասի և 268 հոդվածի 1-ին մասի հատկանիշներով հարուցվել է թիվ 09112409 քրեական գործը:
2009թ. հուլիսի 28-ին Աշոտ Յուրայի Չալաբյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 3-րդ մասով:
2009թ. հուլիսի 28-ին Համբարձում Ռոբերտի Ալեքսանյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 1-ին մասով և նրա նկատմամբ որպես խափանման միջոց ընտրվել է ստորագրություն չհեռանալու մասին:
2009թ. հուլիսի 29-ին Աշոտ Յուրայի Չալաբյանի նկատմամբ որպես խափանման միջոց ընտրվել է կալանավորումը:
2009թ. օգոստոսի 01-ին Արմեն Հակոբջանի Սարգսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 266 հոդվածի 3-րդ մասով և նրա նկատմամբ որպես խափանման միջոց ընտրվել է կալանավորումը:
2009թ. սեպտեմբերի 08-ին Արմեն Հակոբջանի Սարգսյանին առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 266 հոդվածի 3-րդ մասի 2-րդ կետով և 268 հոդվածի 3-րդ մասով:
2009թ. նոյեմբերի 12-ին նախաքննական մարմնի որոշմամբ թիվ 09112409 քրեական գործի նյութերով անհայտ անձանց կողմից Արմեն Սարգսյանին ապօրինի առանձնապես խոշոր չափի ափիոն տեսակի թմրամիջոց իրացնելու վերաբերյալ ՀՀ քրեական օրենսգրքի 266 հոդվածի 3-րդ մասի 2-րդ կետով հարուցվել է նոր քրեական գործ` շնորհելով 09121709 համարը:
2009թ. դեկտեմբերի 08-ին Աշոտ Յուրայի Չալաբյանին առաջադրված մեղադրանքը փոփոխվել, լրացվել և նրան նոր մեղադրանք է առաջադրվել ՀՀ քրեական օրենսգրքի 268 հոդվածի 3-րդ մասով:
2009թ. դեկտեմբերի 14-ին թիվ 09112409 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2009թ. դեկտեմբերի 14-ին քրեական գործն ընդունվել է վարույթ և նշանակվել դատաքննության 2009թ. դեկտեմբերի 29-ին:
2.Գործի փաստական հանգամանքները.
Նախաքննության մարմինն ամբաստանյալներ Արմեն Հակոբջանի Սարգսյանին, Աշոտ Յուրայի Չալաբյանին և Համբարձում Ռոբերտի Ալեքսանյանին մեղադրանքներ է առաջադրել հետևյալ արարքների համար.
Արմեն Սարգսյանը 2009թ. հուլիսի 10-ին, քննությամբ չպարզված անձից ապօրինի ձեռք է բերել առանձնապես խոշոր չափի հասնող` 31.1 գրամ հաստատուն քաշով ափիոն տեսակի թմրամիջոց, որից 19 գրամը` 2009թ. հուլիսի 26-ին, Գորիս քաղաքի ՙԶանգեր՚ հուշարձանի մոտ 150.000 ՀՀ դրամով վաճառելու եղանակով, ապօրինի իրացրել է Աշոտ Յուրայի Չալաբյանին, որը նույն օրը հայտնաբերվել է ոստիկանության Քանաքեռ-Զեյթունի բաժնում` վերջինիս անձնական խուզարկությամբ: Մնացած առանձնապես խոշոր չափի` 12.1 գրամ ափիոն տեսակի թմրամիջոցն, առանց իրացնելու նպատակի, ապօրինի պահել է իր` Գորիս քաղաքի Գ.Նժդեհի փողոցի 18 տանը, որը հայտնաբերվել է նրա տան խուզարկությամբ:
Աշոտ Չալաբյանը 2009թ. հուլիսի 26-ին, առանց իրացնելու նպատակի, Գորիս քաղաքի ՙԶանգեր՚ հուշարձանի մոտ Արմեն Սարգսյանից 150.000 ՀՀ դրամով ապօրինի ձեռք է բերել առանձնապես խոշոր չափի հասնող 19 գրամ հաստատուն քաշով ափիոն տեսակի թմրամիջոց և ապօրինի պահել իր մոտ, որն էլ նույն օրը հայտնաբերվել է ոստիկանության Քանաքեռ-Զեյթունի բաժնում նրա անձնական խուզարկությամբ:
Համբարձում Ալեքսանյանը 2009թ. հուլիսի 24-ին, Երևան քաղաքի Էրեբունի թաղամաս տանող ճանապարհին հարակից տարածքից, առանց իրացնելու նպատակի, իր օգտագործման համար, քաղել և ապօրինի պահել է զգալի չափերի հասնող` 1.1 գրամ մարիխուաննա տեսակի թմրամիջոց, որը 2009թ. հուլիսի 26-ին հայտնաբերվել է նրան պատկանող ՙՎազ-2107՚ մակնիշի 13 ՏԼ 469 պետհամարանիշի ավտոմեքենայի մեջ` ոստիկանության Քանաքեռ-Զեյթուն բաժնի աշխատակիցների կողմից:
3.Ապացույցների հետազոտում.
Առաջադրված մեղադրանքում նախաքննության ընթացքում ամբաստանյալ Արմեն Հակոբջանի Սարգսյանն իրեն լիովին մեղավոր է ճանաչել և խոստովանական ցուցմունք է տվել այն մասին, որ շուրջ 5-6 ամիս է ինչ թմրանյութ է օգտագործում: 2009թ. հուլիսի 10-ին կովերին հերթական արոտ տանելու ժամանակ, Գորիս քաղաքի ճանապարհին նկատել է անծանոթ ՙՎԱԶ 2106՚ մակնիշի ավտոմեքենա, որի մեջից պոլիէթիլենային տոպրակով ինչ որ բան են դրել ճանապարհի եզրին և հեռացել: Մոտենալով, վերցրել է այն և նկատել, որ տոպրակի մեջ ափիոն տեսակի թմրանյութ է, որը պահել է իր մոտ` հետագայում իրացնելու և օգտագործելու նպատակով: 2009 թվականի հուլիսի 26-ին ժամը 2000-ի սահմաններում իրեն է զանգահարել Աշոտ Չալաբյանը և պայմանավորվել են հանդիպել Գորիս քաղաքի ՙԶանգեր՚ հուշարձանի մոտ, որպեսզի ափիոն տեսակի թմրանյութը հանձնի նրան: Նույն օրը, ժամը 2100-ի սահմաններում ինքը հանդիպել է Աշոտ Չալաբյանին և նրան տվել մոտ 20 գրամ ափիոն տեսակի թմրանյութը, իսկ վերջինս 150.000 ՀՀ դրամ գումարը դրել է մեքենայի նստարանին և հեռացել: Իր մոտ մնացած 13 գրամ ափիոն տեսակի թմրանյութը, պահել իր օգտագործման համար, որը 2009թ. հուլիսի 30-ին ոստիկանության աշխատակիցները խուզարկության ժամանակ հայտնաբերել են իրենց տանից:
Դատաքննության ժամանակ Արմեն Սարգսյանը ցուցմունք է տվել այն մասին, որ Աշոտ Չալաբյանի հետ ծանոթացել է ութ ամիս առաջ Երևան քաղաքում, իսկ Համբարձում Ալեքսանյանին չի ճանաչել: Աշոտ Չալաբյանը զանագահարել է իրեն և հանդիպել են Գորիսի ճանապարհին: Աշոտն ասել է, որ իր վիճակը լավ չի և ուզում է թմրանյութ օգտագործել: Ինքն էլ իր ձեռքի եղածը հյուրասիրել է, սակայն փողի մասին ոչ մի պայմանավորվածություն չի եղել: Նրա գնալուց հետո, երբ տեսել է, որ Աշոտը փող է թողել մեքենայի նստատեղի վրա, զանգահարել է նրան, որպեսզի գա և փողը տանի: Աշոտը գնացել և փողը տարել է: Երկու օր անց եկել են ոստիկանության աշխատակիցները և իրեն տարել Երևան քաղաք: Ոստիկանության աշխատակիցներն իր տանից ափիոն տեսակի թմրանյութ են գտել, որը եղել է 10 գրամ: Թմրանյութն ինքը գտել է Գորիսի ճանապարհին: Երկու հոգի եկել դրել են քարի տակ, ինքն էլ գնացել ու վերցրել է այն:
Առաջադրված մեղադրանքում ամբաստանյալ Աշոտ Յուրայի Չալաբյանն իրեն լիովին մեղավոր է ճանաչել և հրաժարվելով ցուցմունք տալուց հայտարարել է, որ պնդում է նախաքննության ընթացքում տված խոստովանական ցուցմունքը:
Համաձայն այդ ցուցմունքի, ինքը շուրջ 18 տարի թմրանյութ է օգտագործում: 2009թ. հուլիս ամսին ծանոթանալով Արմեն Սարգսյանին, փոխանակել են հեռախոսահամարները, որպեսզի պայմանավորվեն թմրանյութ գնելու համար: 2009թ. հուլիսի 25-ին զանգահարել է Արմենին և պայմանավորվել հանդիպել Գորիս քաղաքի ՙԶանգեր՚ հուշարձանի մոտ` թմրանյութ գնելու նպատակով: Հուլիսի 26-ին ինքն, իր ծանոթ Մարիա Ոսկանյանը և իր ընկեր Համբարձում Ալեքսանյանը վերջինիս ՙՎԱԶ 2107՚ մակնիշի 13 ՏԼ 469 պետհամարանիշի ավտոմեքենայով գնացել են Գորիս քաղաք Աշոտ Չալաբյանի բարեկամի տուն` հիվանդատեսության: Ճանապարհին` ՙԶանգեր՚ հուշարձանի մոտ կանգնել են, որտեղ ինքը մի պահ առանձնացել է: Այդ ժամանակ իրեն է մոտեցել Արմենն ու տվել 19 գրամ ափիոն տեսակի թմրանյութը, որի դիմաց ինքը վճարել է 150.000 ՀՀ դրամ գումար և հեռացել: Երևան քաղաք վերադառնալիս ճանապարհին իրենց կանգնեցրել են ոստիկանության աշխատակիցները և տարել ոստիկանության Քանաքեռ-Զեյթուն բաժին, որտեղ իր անձնական խուզարկությամբ հայտնաբերվել է Արմեն Սարգսյանի կողմից իրեն տրված թմրամիջոցը:
Աշոտ Չալաբյանը հայտնել է, որ Արմեն Սարգսյանը գումարը վերադարձրել է: Համբարձում Ալեքսանյանին: Ինքը նրան թմրանյութ չի տվել: Նա չի իմացել, թե ինչ նպատակով են գնում Գորիս: Ինքը Համբարձումին ասել է, որ գնում են մորաքրոջ տուն:
Առաջադրված մեղադրանքում ամբաստանյալ Համբարձում Ռոբերտի Ալեքսանյանն իրեն լիովին մեղավոր է ճանաչել և հրաժարվելով ցուցմունք տալուց պնդել է նախաքննության ընթացքում տված խոստովանական ցուցմունքը:
Համաձայն այդ ցուցմունքի 2009 թվականի հուլիսի 26-ին իրեն զանգահարել է Աշոտ Չալաբյանը և խնդրել, որ նրան և նրա ընկերուհուն` Մարիա Ոսկանյանին տանի Գորիս քաղաք` բարեկամի տուն: Ինքը համաձայնել է: Նույն օրը Աշոտ Չալաբյանի և Մարիա Ոսկանյանի հետ ՙՎԱԶ 2107՚ մակնիշի 13 ՏԼ 469 պետհամարանիշի ավտոմեքենայով գնացել են Գորիս քաղաք: Հասնելով Գորիս քաղաքի ՙԶանգեր՚ հուշարձանի մոտ, կանգնել են, որպիսզի հաց ուտեն: Ինքն այդ ժամանակ չի նկատել, թե Աշոտն ում հետ է հանդիպել: Այնուհետև նրանք գնացել են Աշոտի բարեկամի տուն: Այնտեղ իրենց հյուրասիրել են, որից հետո նրանք հետ են վերադարձել Երևան քաղաք: Ճանապարհին իրենց կանգնեցրել են ոստիկանության աշխատակիցները և տարել ոստիկանության Քանաքեռ-Զեյթունի բաժին, որտեղ Աշոտ Չալաբյանի մոտից հայտնաբերվել է ափիոն տեսակի թմրանյութ: Իր ՙՎԱԶ 2107՚ մակնիշի ավտոմեքենայից հայտնաբերվել է 1.1 գրամ մարիխուանա տեսակի թմրանյութ: Թմրանյութն ինքը ձեռք է բերել 2009թ. հուլիսի 24-ին Էրեբունի գնացող ճանապարհին, որտեղ նկատելով աճած կանեփանման թուփ, իր օգտագործման համար քաղել և պահել է իր մեքենայի մեջ:
Համբարձում Ալեքսանյանը հայտնել է, որ Արմեն Սարգսյանի հետ Աշոտ Չալաբյանը հանդիպել է մինչև Գորիս հասնելը, ՙզանգերի՚ մոտ: Ինքը չի տեսել, թե նրանք ինչ որ բան փոխանակել են, թե` ոչ: Աշոտն իրեն ափիոն չի հյուրասիրել: Ինքն ուժեղ ցավազրկողներ է օգտագործում: Փորձագետի եզրակացության համաձայն, իր արյան և մեզի մեջ եղած թմրանյութի առկայությունը հնարավոր է դրանից առաջացած լինի:
Ամբաստանյալներին առաջադրված մեղադրանքը, բացի նրանց ցուցմունքներից հիմնավորվել է գործով ձեռք բերված հետևյալ ապացույցներով.
Վկա Մարիա Ալեքսանդրի Ոսկանյանի նախաքննության ընթացքում տված և դատաքննության ընթացքում հետազոտված ցուցմունքով այն մասին, որ 2009թ. հուլիսի 26-ին իրեն է զանգահարել Աշոտ Չալաբյանը և ասել, որ ինքը նրա հետ գնա Գորիս քաղաք` բարեկամին հիվանդատեսության: Ինքը համաձայնել է և նույն օրը ժամը 1700-ի սահմաններում Աշոտի ընկերոջ` Համբարձում Ալեքսանյանի ավտոմեքենայով Երևանից մեկնել են դեպի Գորիս: Գորիս գնացող ճանապարհին կանգնել են հաց ուտելու նպատակով, սակայն ինքը մեքենայից դուրս չի եկել և չի նկատել, թե Աշոտն ում հետ է հանդիպել և ինչ նպատակով: Գորիս քաղաքում Աշոտ Չալաբյանի բարեկամի տանը հյուրասիրվելուց հետո վերադարձել են Երևան: Երևան քաղաքում իրենց կանգնեցրել են ոստիկանության աշխատակիցները և տարել Քանաքեռ-Զեյթունի ոստիկանության բաժին, որտեղ Աշոտ Չալաբյանի անձնական խուզարկությամբ հայտնաբերվել է ափիոն տեսակի թմրանյութ, իսկ Համբարձում Ալեքսանյանի ՙՎԱԶ 2107՚ մակնիշի ավտոմեքենայի միջից` մարիխուաննա տեսակի թմրանյութ:
Ամբաստանյալներ Արմեն Սարգսյանի, Աշոտ Չալաբյանի և Համբարձում Ալեքսանյանի կատարած հանցանքը հիմնավորվել է նաև.
Դատաքիմիական փորձաքննության թիվ 286ք եզրակացությամբ, համաձայն որի փորձաքննությանը ներկայացված 19 գրամ հաստատուն քաշով նյութը հանդիսանում է ափիոն տեսակի թմրամիջոց:
Դատաքիմիական փորձաքննության թիվ 287ք եզրակացությամբ, համաձայն որի փորձաքննությանը ներկայացված 1.1 գրամ հաստատուն քաշով նյութը հանդիսանում է չորացված մարիխուաննա տեսակի թմրամիջոց:
Դատաքիմիական փորձաքննության թիվ 304ք եզրակացությամբ, համաձայն որի փորձաքննությանը ներկայացված 12.1 գրամ հաստատուն քաշով նյութը հանդիսանում է ափիոն տեսակի թմրամիջոց:
Տոկսիկոքիմիական փորձաքննության թիվ 0553, 0554, 0555 եզրակացությամբ, համաձայն որի Աշոտ Չալաբյանի և Համբարձում Ալեքսանյանի մեզի փորձանմուշում հայտնաբերվել են ափիոնի խմբի թմրամիջոցի թմրալկալոիդներ:
Տոկսիկոքիմիական փորձաքննության թիվ 0561 եզրակացությամբ, համաձայն որի Արմեն Սարգսյանի մեզի փորձանմուշում հայտնաբերվել է ափիոնի խմբի թմրամիջոցի թմրալկալոիդներ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Հակոբջանի Սարգսյանին առաջադրված մեղադրանքը ՀՀ քրեական օրենսգրքի 266 հոդվածի 3-րդ մասի 2 կետով և 268 հոդվածի 3-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 266 հոդվածի 3-րդ մասի 2-րդ կետի և 268 հոդվածի 3-րդ մասի հատկանիշներին և արարքների որակումը ճիշտ է:
Ամբաստանյալ Աշոտ Յուրայի Չալաբյանին առաջադրված մեղադրանքը ՀՀ քրեական օրենսգրքի 268 հոդվածի 3-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 268 հոդվածի 3-րդ մասի հատկանիշներին և արարքի որակումը ճիշտ է:
Ամբաստանյալ Համբարձում Ռոբերտի Ալեքսանյանին առաջադրված մեղադրանքը ՀՀ քրեական օրենսգրքի 268 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 268 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալներ Արմեն Սարգսյանի, Աշոտ Չալաբյանի և Համբարձում Ալեքսանյանի նկատմամբ պատիժ նշանակելիս, դատարանը հաշվի է առնում նրանց կատարած արարքի հանրության համար վտանգավորության աստիճանը, ինչպես նաև հանցավորների անձը:
Որպես ամբաստանյալ Արմեն Սարգսյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարած արարքի համար, նախկինում դատված չի եղել, խնամքին է գտնվում յոթ տարեկան երեխան, 1990-1992թթ. մասնակցել է ՀՀ և ԼՂՀ սահմանների պաշտպանության մարտական գործողություններին, բնութագրվում է դրական:
Ամբաստանյալ Արմեն Սարգսյանի պատասխանատվությունը և պատիժը ծանրացնող հանգամանքներ չկան:
Որպես ամբաստանյալ Աշոտ Չալաբյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար, տառապում է երիկամների հիվանդությամբ:
Որպես ամբաստանյալ Աշոտ Չալաբյանի պատասխանատվությունը և պատիժը ծանրացնող հանգամանք, դատարանը դիտում է հանցանքը կատարելու ռեցիդիվը:
Որպես ամբաստանյալ Համբարձում Ալեքսանյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար, տառապում է ՙհեպատիտ Ց՚ և ՙստորին վերջույթների հետթրոմբիկ՚ հիվանդություններով:
Որպես ամբաստանյալ Համբարձում Ալեքսանյանի պատասխանատվությունը և պատիժը ծանրացնող հանգամանք, դատարանը դիտում է հանցանքը կատարելու ռեցիդիվը:
Կատարած արարքների համար ամբաստանյալներ Արմեն Հակոբջանի Սարգսյանը, Աշոտ Յուրայի Չալաբյանը և Համբարձում Ռոբերտի Ալեքսանյանը ենթակա են քրեական պատասխանատվության և պատժի:
Դատարանը քննության առնելով ամբաստանյալ Արմեն Հակոբջանի Սարգսյանի նկատմամբ լրացուցիչ պատիժ կիրառելու հարցը, գտնում է, որ նպատակահարմար չէ ՀՀ քրեական օրենսգրքի 266 հոդվածի 3-րդ մասի 2-րդ կետի սանկցիայով նախատեսված լրացուցիչ պատիժը` գույքի բռնագրավում կիրառելը:
Դատարանը նկատի ունենալով, որ ամբաստանյալ Արմեն Հակոբջանի Սարգսյանն, ըստ դատանարկոլոգիական փորձաքննության թիվ 208-09 եզրակացության, տառապում է ափիոնային թմրամոլությամբ և հրակադիր բուժման կարիք ունի, որի համար հակացուցումներ չկան, ղեկավարվելով ՀՀ քրեական օրենսգրքի 97 հոդվածի 1-ին մասի 4-րդ կետով, 98 և 103 հոդվածներով, գտնում է, որ նրա նկատմամբ պատիժ նշանակելիս պետք է նշանակել բժշկական բնույթի հարկադրանքի միջոց թմրամոլության դեմ:
Դատարանը նկատի ունենալով, որ ամբաստանյալ Համբարձում Ռոբերտի Ալեքսանյանն, ըստ դատանարկոլոգիական փորձաքննության թիվ 208-09 եզրակացության, տառապում է ափիոնային թմրամոլությամբ և հրակադիր բուժման կարիք ունի, որի համար հակացուցումներ չկան, ղեկավարվելով ՀՀ քրեական օրենսգրքի 97 հոդվածի 1-ին մասի 4-րդ կետով, 98 և 103 հոդվածներով, գտնում է, որ նրա նկատմամբ պատիժ նշանակելիս պետք է նշանակել բժշկական բնույթի հարկադրանքի միջոց թմրամոլության դեմ:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված` Աշոտ Չալաբյանի մոտ հայտնաբերված 19 գրամ ափիոն տեսակի թմրամիջոցը, Արմեն Սարգսյանի տանից հայտնաբերված 12,1 գրամ ափիոն տեսակի թմրամիջոցը և թվով 7 ներարկիչները, որոնք պահվում են Քանաքեռ-Զեյթուն քննչական բաժնի իրեղեն ապացույցների սենյակում, պետք է պահել անջատված թիվ 09121709 քրեական գործի հետ միասին, մինչև նշված քրեական գործի վերջնական ընթացքի լուծումը:
Համբարձում Ալեքսանյանի ավտոմեքենայի միջից հայտնաբերված 1,1 գրամ մարիխուանա տեսակի թմրամիջոցը պետք է ոչնչացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով դատարանը

Վ Ճ Ռ Ե Ց

Արմեն Հակոբջանի Սարգսյանին մեղավոր ճանաչել ՀՀ քրեական օրենսգրքի 266 հոդվածի 3-րդ մասի 2 կետով, 268 հոդվածի 3-րդ մասով և նրան դատապարտել.
ՀՀ քրեական օրենսգրքի 266 հոդվածի 3-րդ մասի 2 կետով` ազատազրկման յոթ (7) տարի ժամկետով` առանց գույքի բռնագրավման, ՀՀ քրեական օրենսգրքի 268 հոդվածի 3-րդ մասով` ազատազրկման երկու (2) տարի ժամկետով:
ՀՀ քրեական օրենսգրքի 66 հոդվածի հիման վրա` նշանակված պատիժները մասնակի գումարելու սկզբունքով, Արմեն Հակոբջանի Սարգսյանի նկատմամբ վերջնական պատիժ նշանակել ազատազրկում ութ (8) տարի ժամկետով` առանց գույքի բռնագրավման:
Պատժի սկիզբը հաշվել 2009թ. հուլիսի 30-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արմեն Հակոբջանի Սարգսյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Արմեն Հակոբջանի Սարգսյանի նկատմամբ պատիժը կրելու ընթացքում նշանակել հարկադիր բուժում` թմրամոլության դեմ:
Աշոտ Յուրայի Չալաբյանին մեղավոր ճանաչել ՀՀ քրեական օրենսգրքի 268 հոդվածի 3-րդ մասով և նրան դատապարտել ազատազրկման հինգ (5) տարի ժամկետով:
Պատժի սկիզբը հաշվել 2009թ. հուլիսի 26-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Աշոտ Յուրայի Չալաբյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Համբարձում Ռոբերտի Ալեքսանյանին մեղավոր ճանաչել ՀՀ քրեական օրենսգրքի 268 հոդվածի 1-ին մասով և նրան դատապարտել ազատազրկման տաս (10) ամիս ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Համբարձում Ռոբերտի Ալեքսանյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Պատժի սկիզբը հաշվել դատավճռի կատարման օրվանից:
Համբարձում Ռոբերտի Ալեքսանյանի նկատմամբ պատիժը կրելու ընթացքում նշանակել հարկադիր բուժում` թմրամոլության դեմ:
Իրեղեն ապացույց ճանաչված, Քանաքեռ-Զեյթուն քննչական բաժնի իրեղեն ապացույցների սենյակում պահվող Աշոտ Չալաբյանի մոտ հայտնաբերված 19 գրամ ափիոն տեսակի թմրամիջոցը, Արմեն Սարգսյանի տանից հայտնաբերված 12,1 գրամ ափիոն տեսակի թմրամիջոցը և թվով 7 ներարկիչները պահել Քանաքեռ-Զեյթուն քննչական բաժնի կողմից անջատված թիվ 09121709 քրեական գործի հետ միասին, մինչև նշված գործի վերջնական ընթացքի լուծումը:
Համբարձում Ալեքսանյանի ավտոմեքենայի միջից հայտնաբերված 1,1 գրամ մարիխուանա տեսակի թմրամիջոցը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ