գործ No ԵԱՔԴ 0174/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Ռ. Խաչատրյանի
ամբաստանյալ` Մ. Ստեփանյանի
պաշտպան` Հ.Մաղաքյանի

2010թ. փետրվարի 10-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Մհեր Յուրիի Ստեփանյանի, ծնված 22.01.1963թ. Սևան քաղաքում, ազգությամբ հայ, ՀՀ քաղաքացի, բարձրագույն կրթությամբ, ֆիզիկապես վատառողջ, երկրորդ խմբի հաշմանդամ, ամուսնացած, խնամքին երեք անձ, նախկինում դատված, դատվածությունը մարված, չի աշխատել, հաշվառված է Երևան քաղաքի Երզնկյան փողոցի 44ա տանը, բնակվում է Զովունի Այգեգործական ընկերության թիվ 20 տանը:
Մեղադրվում է ՀՀ քրեական օրենսգրքի 266 հոդվածի 1-ին և 268 հոդվածի 1-ին մասերով:

Պ Ա Ր Զ Ե Ց
1.Գործի դատավարական նախապատմությունը.
2009թ. սեպտեմբերի 18-ին ՀՀ ոստիկանության ՔԳՎ Երևան քաղաքի քննչական վարչության Արաբկիրի քննչական բաժնում ՀՀ քրեական օրենսգրքի 266 հոդվածի 1-ին մասի և 268 հոդվածի 1-ին մասի հատկանիշներով հարուցվել է թիվ 14130109 քրեական գործը:
2009թ. սեպտեմբերի 19-ին Մհեր Յուրիի Ստեփանյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 266 հոդվածի 1-ին մասով և 268 հոդվածի 1-ին մասով և նրա նկատմամբ որպես խափանման միջոց ընտրվել է կալանքը:
2009թ. նոյեմբերի 11-ին նախաքննության մարմնի կողմից որոշում է կայացվել թիվ 14130109 քրեական գործով վկաներ Գևորգ Հարությունի Գևորգյանի, Արտակ Էմինի Աղաբաբյանի և Մանվել Բախշիկի Խուդոյանի նկատմամբ քրեական հետապնդում չիրականացնել` հանցակազմի բացակայության հիմքով:
2009թ. նոյեմբերի 12-ին նախաքննության մարմնի կողմից որոշում է կայացվել թիվ 14130109 քրեական գործի նյութերով ՙԶուբ Համո՚ մականունով անձի կողմից Մհեր Յուրիի Ստեփանյանին թմրամիջոց իրացնելու փաստի առթիվ հարուցել քրեական գործ ՀՀ քրեական օրենսգրքի 266 հոդվածի 1-ին մասի հատկանիշներով և շնորհվել է 14135509 համարը:
2009թ. նոյեմբերի 24-ին Մհեր Յուրիի Ստեփանյանին առաջադրված մեղադրանքը լրացվել և նրան մեղադրանք է առաջադրվել ՀՀ քրեական օրենսգրքի 266 հոդվածի 1-ին մասով և 268 հոդվածի 1-ին մասով:
2009թ. դեկտեմբերի 08-ին թիվ 14130109 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
2009թ. դեկտեմբերի 08-ին քրեական գործը վարույթ է ընդունվել և նշանակվել դատաքննության 2009թ. դեկտեմբերի 23-ին:
2.Գործի փաստական հանգամանքները.
Նախաքննության մարմինն ամբաստանյալ Մհեր Յուրիի Ստեփանյանին մեղադրանք է առաջադրել հետևյալ արարքի համար.
Մհեր Ստեփանյանը չպարզված հանգամանքներում ՙԶուբ Համո՚ մականունով անձից, իրացնելու նպատակով ապօրինի ձեռք է բերել ընդհանուր 0.0118 գրամ քաշով ՙԲուպրենորֆին՚ տեսակի թմրամիջոց, որից 0,0015 գրամը 2009թ. սեպտեմբերի 17-ին, ժամը 1900-ի սահմաններում, Երևան քաղաքի Մերգելյանի անվան զբոսայգու մոտ ապօրինի իրացրել է Գևորգ Հարությունի Գևորգյանին, 0,0014 գրամը` Արտակ Էմինի Աղաբաբյանին, 0,0002 գրամը` Մանվել Բախշիկի Խուդոյանին, որոնց դիմաց նրանցից յուրաքանչյուրից պետք է ստանար 7000-ական դրամ գումար, իսկ նույն թմրամիջոցից մնացած` ընդհանուր 0.0087 գրամ քաշով թմրամիջոցը պահել է իր մոտ` անձնական օգտագործման համար:
3.Ապացույցների հետազոտում.
Նախաքննության ընթացքում առաջադրված մեղադրանքում ամբաստանյալ Մհեր Ստեփանյանն իրեն մեղավոր է ճանաչել մասնակի: Մհեր Ստեփանյանը որպես կասկածյալ հարցաքննվելիս ցուցմունք է տվել այն մասին, որ 2009թ. սեպտեմբերի 17-ին իրեն է զանգահարել Գևորգ անունով ծանոթը և հետաքրքրվել ՙսուբոտեքս՚ դեղահաբի առկայությունից: Դրական պատասխան տալով, պայմանավորվել է նույն օրը ժամը 1900-ին հանդիպել նրա հետ Մերգելյանի անվան զբոսայգու մոտ: Նշված վայրում հանդիպելով Գևորգ Գևորգյանին, նստել է վերջինիս ՙՎազ-2121՚ մակնիշի ավտոմեքենան, որտեղ հանդիպել է Մանվել Խուդոյանին և Արտակ Աղաբաբյանին: Ավտոմեքենայի սրահում, ջրի մեջ լուծելով կես դեղահաբ ՙսուբոտեքս՚ դեղամիջոցը, այն լիցքավորել է 4 ներարկիչների մեջ և հանձնել սրահում գտնվող անձանց: Այդ պահին մեքենային են մոտեցել ոստիկանության աշխատակիցներ և իրեն ու մյուս անձանց տարել են ոստիկանության Արաբկիրի բաժին: Ոստիկանության բաժնում կատարված անձնական խուզարկությամբ իր մոտ հայտնաբերվել և առգրավվել է թմրամիջոցը:
Դատաքննության ժամանակ Մհեր Ստեփանյանն իրեն մեղավոր է ճանաչել մասնակի և հայտնել, որ պատերազմի ժամանակ տարած կոնտուզիայի հետևանքով բժշկի նշանակմամբ հոգեմետ դեղեր է օգտագործել: Դեպքից երկու օր առաջ Մերգելյանի անվան զբոսայգում իրեն վատ է զգացել և մոտը դեղ չի ունեցել: Այդ ժամանակ իրեն է մոտեցել մի անծանոթ երիտասարդ զույգ և դեղահաբ առաջարկել: Չիմանալով, թե դա ինչ դեղահաբ է ինքն ընդունել է դրա կեսը, որն իրեն օգնել է:
Իր ծանոթ Գևորգը տեղյակ լինելով, որ ինքը դեղեր է օգտագործում 2009թ. սեպտեմբերի 17-ին զանգահարել է իրեն և ասելով, որ վատ է զգում, իրենից դեղ է խնդրել: Ցանկանալով օգնել նրան առաջարկել է այդ դեղահաբի մնացած կեսը: Նույն օրը Մերգելյանի անվան զբոսայգու մոտ հանդիպելով Գևորգ Գևորգյանին, նստել է վերջինիս ՙՎազ-2121՚ մակնիշի ավտոմեքենան և սրահում կես դեղահաբը հանձնել նրան: Այնտեղ են եղել նաև Մանվել Խուդոյանը և Արտակ Աղաբաբյանը, որոնց նախկինում չի ճանաչել: Այդ ժամանակ իրենց են մոտեցել ոստիկանության աշխատակիցները և տարել ոստիկանության Արաբկիրի բաժին, որտեղ կատարված անձնական խուզարկությամբ իր մոտ հայտնաբերվել է մնացած թմրամիջոցը:
Մհեր Ստեփանյանը հայտնել է նաև, որ ինքը Գևորգ Գևորգյանից և մյուսներից դրամ չի պահանջել և չի ստացել: Ինքը տեղյակ չէ, թե թմրանյութերով առկա ներարկիչները նրանց մոտ որտեղից է եղել:
Ամբաստանյալ Մհեր Ստեփանյանի պատճառաբանություններն անհիմն են, հետապնդում են պատիժը մեղմացնելու նպատակ: Նրա կատարած հանցանքը հիմնավորվել է գործով ձեռք բերված հետևյալ ապացույցներով.
Վկա Գևորգ Հարությունի Գևորգյանի նախաքննության ընթացքում տված և դատաքննության ընթացքում հետազոտված ցուցմունքով, Մհեր Ստեփանյանի հետ առերես հարցաքննության ընթացքում տված ցուցմունքով այն մասին, որ դեռևս մանուկ հասակից ճանաչել է Արտակ Աղաբաբյանին և գտնվել մտերիմ հարաբերությունների մեջ: Ճանաչել է նաև իր հետ նույն թաղամասում բնակվող Մանվել Խուդոյանին: 2009թ. օգոստոս ամսին պատահաբար ծանոթացել է Մհեր Ստեփանյանին և տեղեկացել, որ վերջինս թմրադեղեր է օգտագործում: 2009թ. սեպտեմբերի 17-ին, ժամը 1400-ի սահմաններում հանդիպել է Արտակ Աղաբաբյանին և օգտագործելու համար թմրամիջոց հայթայթելու նպատակով որոշել է զանգահարել Մհեր Ստեփանյանին: Ժամը 1840-ի սահմաններում զանգահարելով Մհեր Ստեփանյանին, հետաքրքրվել է ՙսուբոտեքս՚ թմրադեղի հնարավոր առկայության մասին և ստանալով դրական պատասխան, նրա հետ պայմանավորվել է հանդիպել Երևանի Մերգելյանի անվան զբոսայգու մոտ` թմրանյութը ձեռք բերելու նպատակով, յուրաքանչյուր չափաբաժնի դիմաց 7000-ական դրամ գումար վճարելու պայմանով: Ժամը 1900-ի սահմաններում նշված վայր է եկել Մհեր Ստեփանյանը, ով նստելով իր ավտոմեքենան, ներարկիչների մեջ լիցքավորել է թմրանյութը: Այդ պահին մեքենայի մեջ է նստել նաև Մանվել Խուդոյանը, ում նախապես կանչել էր Արտակ Աղաբաբյանը: Մհեր Ստեփանյանը թմրանյութը լիցքավորել է ընդհանուր թվով 4 ներարկիչների մեջ, որոնցից 1-ը պետք է օգտագործեր Մհեր Ստեփանյանը: Նույն պահին իրենց են մոտեցել ոստիկանության աշխատակիցներ և մեքենայի սրահում գտնվող բոլոր անձանց տարել են ոստիկանության Արաբկիրի բաժին, որտեղ կատարված անձնական խուզարկություններով հայտնաբերել և առգրավել են թմրամիջոցները:
Դատաքննության ժամանակ Գևորգ Գևորգյանը հայտնել է, որ Մհեր Ստեփանյանն իրենց հետ գումարի վերաբերյալ չի պայմանավորվել: Իրենք են որոշել տալ յուրաքանչյուրը 7000-ական դրամ:
Վկա Արտակ Էմինի Աղաբաբյանի նախաքննության ընթացքում տված ցուցմունքով և Մհեր Ստեփանյանի հետ առերես հարցաքննության ընթացքում տված ցուցմունքով այն մասին, որ մանուկ հասակից նույն թաղամասում բնակվել է Գևորգ Գևորգյանի և Մանվել Խուդոյանի հետ: Նրանցից Գևորգ Գևորգյանի հետ ունեցել է ավելի մտերիմ փոխհարաբերություններ: 2009թ. սեպտեմբերի 17-ին հանդիպելով Գևորգին, ցանկացել են թմրանյութ օգտագործել, որը հայթայթելու նպատակով վերջինս զանգահարել է Մհեր անունով մի անձի: Գևորգ Գևորգյանը Մհեր Ստեփանյանի հետ պայմանավորվել է հանդիպել Մերգելյանի անվան զբոսայգու մոտ, որտեղ Մհերը պետք է բերեր թմրանյութը, որի մեկ չափաբաժնի դիմաց ըստ պայմանավորվածության պետք է յուրաքանչյուրը վճարեր 7000-ական դրամ գումար: Նախքան Մհեր Ստեփանյանի հետ հանդիպելը, ինքը զանգահարել է Մանվել Խուդոյանին, ում տեղեկացնելով սպասվելիք թմրանյութի մասին, հայտնել է, որ ցանկության դեպքում կարող է միանալ իրենց: Ժամը 1900-ի սահմաններում, պայմանավորվածության համաձայն եկել է Մհեր Ստեփանյանը, ապա նաև Մանվել Խուդոյանը: Նստելով Գևորգ Գևորգյանի ավտոմեքենան, Մհեր Ստեփանյանը ՙսուբոտեքս՚ տեսակի դեղամիջոցը ջրի մեջ լուծելու եղանակով, պատրաստել է թմրանյութ, որը լիցքավորել է ներարկիչների մեջ և հանձնել իրենց: Այդ պահին մոտեցել են ոստիկանության աշխատակիցները և իրենց տարել ոստիկանության Արաբկիրի բաժին, որտեղ անձնական խուզարկությունների արդյունքում հայտնաբերվել և առգրավվել է թմրանյութը:
Դատաքննության ժամանակ Արտակ Աղաբաբյանը հայտնել է, որ ներարկիչներն ու ջրով ամպուլներն ինքն է բերել իր հետ, որոնք գնել է դեղատնից: Թմրանյութի դիմաց վճարելու վերաբերյալ նախնական պայմանավորվածութուն չի եղել: Իրենք Մհերին գումար չեն տվել, քանի որ ոստիկանության աշխատակիցների կողմից բռնվել ու տարվել են ոստիկանության Արաբկիրի բաժին: Այնտեղ իրենց անձնական խուզարկությունների ընթացքում հայտնաբերվել և առգրավվել է թմրանյութը:
Վկա Մանվել Բախշիկի Խուդոյանի նախաքննության ընթացքում տված ցուցմունքով և Մհեր Ստեփանյանի հետ առերես հարցաքննության ընթացքում տված ցուցմունքով այն մասին, որ Արտակ Աղաբաբյանին և Գևորգ Գևորգյանին ճանաչել է վաղուց: 2009թ. սեպտեմբերի 17-ին, երեկոյան ժամը 1800-ի սահմաններում, իրեն զանգահարել է Արտակ Աղաբաբյանը և հայտնել, որ Մերգելյանի անվան զբոսայգու մոտ սպասում է մի անձի, որը ՙսուբոտեքս՚ տեսակի թմրամիջոց պետք է վաճառի ու գնելու ցանկության դեպքում կարող է հանդիպել իրենց: Թմրամիջոց օգտագործելու ցանկություն ունենալով, գնացել և հանդիպել է Արտակ Աղաբաբյանին: Նստելով Գևորգ Գևորգյանի ավտոմեքենան, բացի վերջինիցս տեսել է մի անձի և կռահել, որ նա է թմրանյութ վաճառողը: Ներարկիչի մեջ պատրաստված թմրամիջոցը վերցնելով, ցանկացել է ամբողջն օգտագործել, սակայն ընդհատել է, քանի որ այդ պահին մոտեցել են ոստիկանության աշխատակիցները և տարել ոստիկանության Արաբկիրի բաժին: Կատարված անձնական խուզարկություններով թմրանյութը հայտնաբերվել և առգրավվել է:
Ամբաստանյալին առաջադրված մեղադրանքը հիմնավորվել է նաև քրեական գործով ձեռք բերված հետևյալ ապացույցներով.
անձնական խուզարկություններ կատարելու արձանագրություններով այն մասին, որ ոստիկանության բաժին բերման ենթարկված` Մհեր Ստեփանյանի բաճկոնի վերին գրպանից հայտնաբերվել և առգրավվել է ձվաձև դեղահաբ, B 8 գրառմամբ, 0,45 գր մոտավոր քաշով և 0,05 գր մոտավոր քաշով սպիտակ գույնի փոշենման զանգված, Արտակ Աղաբաբյանի անդրավարտիքի ձախ գրպանից հայտնաբերվել և առգրավել է 1 մլ տարողությամբ ներարկիչի մեջ, մոտ 0,8 մլ ծավալով լիցքավորված անգույն հեղուկ, որն ըստ վերջինիս հայտարարության հանդիսանում է թմրանյութ, ինչը գնել է Մհեր Ստեփանյանից: Մանվել Խուդոյանի մոտ հայտնաբերվել և առգրավել է 1 մլ տարողությամբ ներարկիչի մեջ, մոտ 1,5 մլ ծավալով լիցքավորված արնանման հեղուկ, Գևորգ Գևորգյանի տաբատի աջ գրպանից հայտնաբերվել և առգրավել է 1 մլ տարողությամբ ներարկիչի մեջ, մոտ 0,8 մլ ծավալով լիցքավորված անգույն հեղուկ, որն ըստ վերջինիս հայտարարության հանդիսանում է ՙսուբոտեքս՚ տեսակի թմրամիջոց, որը ձեռք է բերել Մհեր Ստեփանյանից:
Դատաքիմիական փորձաքննության թիվ 33320905 եզրակացությամբ այն մասին, որ Մհեր Ստեփանյանի մոտից առգրաված, փորձաքննությանը ներկայացված 1 հատ սպիտակ գույնի, օվալաձև, ՙB 8՚ դաջվածքով, 0,4 գրամ մաքուր քաշով դեղահաբն իր բաղադրության մեջ պարունակում է 0,008 գրամ քաշով ՙբուպրենորֆին՚ տեսակի թմրամիջոց: Փորձաքննությանը ներկայացված 0,035 գրամ մաքուր քաշով, սպիտակ գույնի փոշենման զանգվածն իր բաղադրության մեջ պարունակում է 0,0007 գրամ քաշով ՙբուպրենորֆին՚ տեսակի թմրամիջոց:
Դատաքիմիական փորձաքննության թիվ 33340905 եզրակացությամբ այն մասին, որ Գևորգ Գևորգյանի մոտից առգրաված, փորձաքննությանը ներկայացված 1 մլ-ի համար նախատեսված ներարկիչում առկա 0,82 մլ ծավալով թափանցիկ պղտոր հեղուկն իր բաղադրության մեջ պարունակում է 0,0015 գրամ քաշով ՙբուպրենորֆին՚ տեսակի թմրամիջոց:
Դատաքիմիական փորձաքննության թիվ 33330905 եզրակացությամբ այն մասին, որ Արտակ Աղաբաբյանի մոտից առգրաված, փորձաքննությանը ներկայացված 1 մլ-ի համար նախատեսված ներարկիչում առկա 0,8 մլ ծավալով թափանցիկ պղտոր հեղուկն իր բաղադրության մեջ պարունակում է 0,0014 գրամ քաշով ՙբուպրենորֆին՚ տեսակի թմրամիջոց:
Դատաքիմիական փորձաքննության թիվ 33350905 եզրակացությամբ այն մասին, որ Մանվել Խուդոյանի մոտից առգրաված, փորձաքննությանը ներկայացված 1 մլ-ի համար նախատեսված ներարկիչում առկա 0,16 մլ արնանման պղտոր հեղուկն իր բաղադրության մեջ պարունակում է 0,0002 գրամ ՙբուպրենորֆին՚ տեսակի թմրամիջոց:
Տոքսիկոքիմիական փորձաքննության թիվ 0767 եզրակացությամբ, համաձայն որի 17.09.2009թ. Մհեր Ստեփանյանի մեզի փորձանմուշում հայտնաբերվել են ափիոիդային շարքի թմրանյութի` բուպրենորֆինի հետքեր:
Իրեղեն ապացույցներ ճանաչված` Մհեր Ստեփանյանի մոտից անձնական խուզարկությամբ հայտնաբերված և առգրաված, իր բաղադրության մեջ թմրամիջոց պարունակող 1 հատ սպիտակ գույնի, օվալաձև, ՙB 8՚ դաջվածքով, 0,4 գրամ մաքուր քաշի դեղահաբով և 0,035 գրամ մաքուր քաշի սպիտակ գույնի փոշենման զանգվածով:
Արտակ Աղաբաբյանի մոտից անձնական խուզարկությամբ հայտնաբերված և առգրաված 1 մլ-ի համար նախատեսված ներարկիչում առկա 0,8 մլ ծավալով թափանցիկ պղտոր հեղուկով, որն իր մեջ պարունակում է 0,0014 գրամ քաշով ՙբուպրենորֆին՚ տեսակի թմրամիջոց:
Գևորգ Գևորգյանի մոտից անձնական խուզարկությամբ հայտնաբերված և առգրաված 1 մլ-ի համար նախատեսված ներարկիչում առկա 0,82 մլ ծավալով թափանցիկ պղտոր հեղուկով, որն իր մեջ պարունակում է 0,0015 գրամ քաշով ՙբուպրենորֆին՚ տեսակի քմրամիջոց:
Մհեր Խուդոյանի մոտից անձնական խուզարկությամբ հայտնաբերված և առգրաված 1 մլ-ի համար նախատեսված ներարկիչում առկա 0,16 մլ արնանման պղտոր հեղուկով, որն իր բաղադրության մեջ պարունակում է 0,0002 գրամ ՙբուպրենորֆին՚ տեսակի թմրամիջոց:
Դատանարկոլոգիական ամբուլատոր փորձաքննության թիվ 250-09 եզրակացությամբ այն մասին, որ Մհեր Յուրիի Ստեփանյանը տառապում է ափիոնային թմրամոլությամբ, ուստի հարկադիր բուժման կարիք ունի, որի համար հակացուցումներ չկան:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Մհեր Յուրիի Ստեփանյանին առաջադրված մեղադրանքը ՀՀ քրեական օրենսգրքի 266 հոդվածի 1-ին մասով և 268 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 266 հոդվածի 1-ին մասի և 268 հոդվածի 1-ին մասի հատկանիշներին և արարքի որակումը ճիշտ է:
Մհեր Ստեփանյանի նկատմամբ պատիժ նշանակելիս դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա զղջում է կատարածի համար, մասնակցել է ՀՀ սահմանների պաշտպանության մարտական գործողություններին, որի ընթացքում 1992թ. վիրավորվել է և դարձել անժամկետ երկրորդ խմբի հաշմանդամ, համաձայն ՀՀ պաշտպանության նախարարի 1996թ. դեկտեմբերի 20-ի հրամանի պարգևատրվել է ՙ1992-1994թթ. Մարտական Գործողությունների Մասնակից՚ կրծքանշանով, ՀՀ Նախագահի 2006թ. հունվարի 27-ի հրամանագրով պարգևատրվել է ՙՄարտական Ծառայության՚ մեդալով, խնամքին են գտնվում կինը և ծնողները:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Մհեր Ստեփանյանը ենթակա է քրեական պատասխանատվության և պատժի:
Դատարանը նկատի ունենալով, որ ամբաստանյալ Մհեր Ստեփանյանն, ըստ դատանարկոլոգիական ամբուլատոր փորձաքննության թիվ 250-09 եզրակացության, տառապում է ափիոնային թմրամոլությամբ և հրակադիր բուժման կարիք ունի, որի համար հակացուցումներ չկան, ղեկավարվելով ՀՀ քրեական օրենսգրքի 97 հոդվածի 1-ին մասի 4-րդ կետով, 98 և 103 հոդվածներով, գտնում է, որ նրա նկատմամբ պատիժ նշանակելիս պետք է նշանակել բժշկական բնույթի հարկադրանքի միջոց թմրամոլության դեմ:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված` Ա.Աղաբաբյանի, Գ.Գևորգյանի և Մ.Խուդոյանի անձնական խուզարկությամբ հայտնաբերված ներարկիչներում առկա թմրամիջոցները, ինչպես նաև Մ.Ստեփանյանի անձնական խուզարկությամբ հայտնաբերված մեկ հատ դեղահաբը և փոշենման զանգվածը պետք է ոչնչացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Մհեր Յուրիի Ստեփանյանին մեղավոր ճանաչել ՀՀ քրեական օրենսգրքի 266 հոդվածի 1-ին մասով, 268 հոդվածի 1-ին մասով և նրան դատապարտել.
ՀՀ քրեական օրենսգրքի 266 հոդվածի 1-ին մասով ազատազրկման երեք (3) տարի ժամկետով:
ՀՀ քրեական օրենսգրքի 268 հոդվածի 1-ին մասով ազատազրկման վեց (6) ամիս ժամկետով:
ՀՀ քրեական օրենսգրքի 66 հոդվածով սահմանված` նշանակված պատիժները լրիվ գումարելու սկզբունքով, Մհեր Յուրիի Ստեփանյանի նկատմամբ վերջնական պատիժ նշանակել ազատազրկում երեք (3) տարի վեց (6) ամիս ժամկետով:
Պատժի սկիզբը հաշվել 2009թ. սեպտեմբերի 18-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Մհեր Յուրիի Ստեփանյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Մհեր Յուրիի Ստեփանյանի նկատմամբ պատիժը կրելու ընթացքում նշանակել հարկադիր բուժում` թմրամոլության դեմ:
Իրեղեն ապացույց ճանաչված` ներարկիչներում առկա թմրամիջոցները, մեկ հատ դեղահաբը և փոշենման զանգվածը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ