Գործ ԵԱՔԴ / 0169/01/09







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

18.12.2009թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը

Նախագահությամբ դատավոր` Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ
Մեղադրող` Գ.Հովհաննիսյան
Տուժող` Կ.Սարգսյանի


2009 թվականի դեկտեմբերի 18-ին դռնբաց դատական նիստում քննության առավ քրեական գործն ըստ մեղադրանքի Սամվել Սուրենի Կարապետյանի` ծնված 1978 թվականի հոկտեմբերի 24-ին Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ամուրի, նախկինում դատված,
1. Ենթարկվել է քրեական պատասխանատվության 03.02.1994 թվականին, ՀՀ քրեական օրենսգրքի 86-րդ հոդվածի 2-րդ մասով Սովետականի քննչական բաժնի կողմից.
2. Կոտայքի քննչական բաժնի կողմից 27.05.1996 թվականին ՀՀ քրեական օրենսգրքի 86-րդ հոդվածի 3-րդ մասով ենթարկվել է քրեական պատասխանատվության.
3. Սովետականի ժող. դատարանի 12.08.1996 թվականի դատավճռով ՀՀ քրեական օրենսգրքի 86-րդ հոդվածի 3-րդ և 4-րդ մասերով դատապարտվել է ազատազրկման 7 /յոթ/ տարի ժամանակով:
4. Երևանի Շենգավիթի ժող. դատարանի 09.07.1999 թվականի դատավճռով ՀՀ քրեական օրենսգրքի 86-րդ հոդվածի 3-րդ մասով դատապարտվել է ազատազրկման 6 /վեց/ տարի ժամանակով, պատժի կրումից ազատվել է 01.09.2004 թվականին վաղաժամկետ պայմանական 2 ամիս 18 օր ժամկետից շուտ, դատվածությունը մարված, չի աշխատել, հաշվառված է Ծարավ Աղբյուրի փողոց 32 շենք 2 բնակարանում, մշտական բնակության վայր չունի, կալանքի տակ է 2009 թվականի հոկտեմբերի 31-ից, մեղադրվում է ՀՀ քրեական օրենսգրքի 177-րդ հոդվածի 2-րդ մասի 3-րդ կետով:
Դատաքննությամբ դատարանն ապացուցված համարեց հետևյալը.
Նախաքննության մարմինը Սամվել Սուրենի Կարապետյանին ՀՀ քրեական օրենսգրքի 177-րդ հոդվածի 2-րդ մասի 3-րդ կետով մեղադրանք է առաջադրել հետևյալ արարքի համար. ՙ Սամվել Կարապետյանը 2009թ. սեպտեմբերի 14-ին , կեսօրի սահմաններում, տանիքի նախասրահի դռնակը հրել բացելու եղանակով, ապօրինի մուտք է գործել Կ.Սարգսյանի պատկանող, Զ.Սարկավագի 4 նրբ. 12 տուն և այնտեղից գաղտնի հափշտակել 3000 ՀՀ դրամ և 9000 ՀՀ դրամ ընդհանուր արժողությամբ 3 հատ եփած հավ, 2 տուփ ՙՆոյ՚ սիգարետ, կտրտած խմորեղեն, մեկ շիշ օղի, երշիկի ու բաստուրմայի կտորներ և 2 հատ վերնաշապիկ` Կ.Սարգսյանին պատճառելով զգալի չափերի հասնող` 12 000 ՀՀ դրամ ընդհանուր գումարի գույքային վնաս:
Առաջադրված մեղադրանքում Սամվել Կարապետյանը նախաքննության ժամանակ տվել է խոստովանական ցուցմունք և նշել է, որ 2009թ. սեպտեմբերի կեսերին, կոնկրետ օրը չի հիշում, կեսօրին հերթական անգամ գնացել է իր մանկական ընկեր լաերտի ծնողներին` Կատյային և Հակոբին, այցելության: Հասնելով նրանց` Զ.Սարկավագի 4-րդ նրբանցք 12 հասցեում գտնվող տուն, մի քանի անգամ սեղմել է տան դռան զանգը և պարզել, որ տանը մարդ չկա: Այդ ժամանակ որոշել է վերը նշված տանից գողություն կատարել: Նախապես ծանոթ լինելով տանը ու իմանալով, որ տանիքով կարելի է մտնել տուն, պատին հենած աստիճանով բարձրացել է տանիք, որտեղից դեպի տան նախասրահ տանող առաստաղի բացվածքից իջել տան նախասրահ, այնուհետև գնացել է խոհանոց և սառնարանից գողացել եփած հավի կտորներ, սեղանի վրայից վերցրել է պոլիէթիլենային տոպրակ և այդ ամենը լցրել մեջը:
Դրանից հետո, գնացել է հյուրասենյակ և սեղանի վրայից գողացել է կտրտած խմորեղեն ու նույնպես լցրել նույն տոպրակի մեջ:
Այնուհետև, գնացել է ննջասենյակ, բացել է պահարանի դուռը ու տեսել, որ պահարանում կաշվե դրամապանակ կա, գողացել է դրանում եղած 3000 ՀՀ դրամը, նույն պահարանից գողացել է նաև օգտագործված 2 հատ վերնաշապիկ, ինչպես նաև նույն ննջարանի զարդասեղանի վրայից գողացել է 2 տուփ ՙՆոյ՚ տեսակի սիգարետ: Այդ ամենը գողանալուց հետո հյուրասենյակի պատուհանով դուրս է եկել տանից ու հեռացել: /Գ.թ. 43-44, 58-59, 75/
Դատաքննության ժամանակ ամբաստանյալ Սամվել Կարապետյանը հաստատելով նախաքննական ցուցմունքները, նշեց, որ ընդունում է առաջադրված մեղադրանքը և նշված գողությունը կատարել է ինքը:
Բացի ամբաստանյալի խոստովանական ցուցմունքներից նրան առաջադրված մեղադրանքն ապացուցված է գործով հավաքված և դատաքննությամբ հետազոտված հետևյալ ապացույցներով:
Գործով տուժող` Կատյա Աղաբեկի Սարգսյանի նախաքննական ցուցմունքով այն մասին, որ 2009թ. սեպտեմբերի 14-ին, ժամը 13:00-ի սահմաններում դուրս է եկել տանից և գնացել է որդու գերեզման: Ժամը 16:00-ի սահմաններում գերեզմանատնից տուն վերադառնալով` միջանցքի հատակին նկատել է փոշու հետքեր, որոնք մինչ տանից դուրս գալը չեն եղել, իսկ հյուրասենյակի վարագույրը պոկված է եղել: Զննելով տունը հասկացել է, որ կատարվել է գողություն: Պարզել է, որ ննջասենյակի պահարանում դրված իր դրամապանակը բացված է, իսկ դրամապանակից գողացել են 3000 ՀՀ դրամ գումար: Ավելի ուշադիր տունը զննելուց հետո պարզել է, որ խոհանոցի սառնարանից գողացվել են 3 հատ եփած հավ, մեկ շիշ օղի, կտրտած երշիկի, բաստուրմայի կտորներ, հյուրասենյակի գրասեղանի վրայից կտրտած խմորեղենի կտորներ, ննջասենյակի պահարանից նաև 2 հատ օգտագործված վերնաշապիկ, իսկ զարդասեղանի վրայից 2 տուփ ՙՆոյ՚ սիգարետ:
Կ.Սարգսյանը հայտնել է, որ իրեն պատճառվել է 12 000 ՀՀ դրամի ընդհանուր գումարի գույքային վնաս, սակայն քաղաքացիական հայցի պահանջ չունի: /Գ.թ. 12-13, 49, 91/
Տուժող Կատյա Սարգսյանը դատաքննությամբ նորից կրկնեց վերը նշված նախաքննական ցուցմունքը և նշեց, որ քաղաքացիական հայցի պահանջ չունի:
Գործով վկա` Հակոբ Օնիկի Սարգսյանի նախաքննական ցուցմունքով այն մասին, որ հանդիսանում է տուժող Կ.Սարգսյանի ամուսինը: 2009թ. սեպտեմբերի 14-ին, ժամը 09:00-ին դուրս է եկել տանից և վերադարձել է սեպտեմբերի 15-ին ժամը 09:00-ին: Երբ եկել է տուն, կինը ` Կ.Սարգսյանը, հայտնել է, որ իրենց տանից գողացել են 3000 ՀՀ դրամ, 3 հատ եփած հավ, մեկ շիշ օղի, կտրտած երշիկի, բաստուրմայի կտորներ, կտրտած խմորեղենի կտորներ, 2 հատ օգտագործված վերնաշապիկ, 2 տուփ ՙՆոյ՚ տեսակի սիգարետ: /Գ.թ. 18,87/:
Դատական նիստում վկան նորից տվեց նույնաբովանդակ ցուցմունք:
Քննչական փորձարարություն կատարելու արձանագրությամբ, համաձայն որի Ս.Կարապետյանը մատնացույց է արել և հայտարարել, թե ինչպես է մուտք գործել Զ.Սարկավագի 4-րդ նրբնացքի 12 տուն, որտեղից, ինչպես և ինչ է գողացել, ինչպես նաև այն վայրը ուր տարել է գողացված ապրանքները: Միաժամանակ Ս.Կարապետյանը ներկայացրել է նաև գողացված 2 վերնաշապիկները: /Գ.թ. 50-57/:
Ապրանքագիտական փորձաքննության 18.11.2009թ. ստացված թիվ 962-ապ եզրակացությամբ, համաձայն որի փորձաքննությանը ներկայացված տղամարդու կարճաթև ՙՍաբեկ՚ տեսակի, սպիտակ հիմնագույնի, սև գույնի երկայնական գծանախշերով վերնաշապիկի միջին շուկայական գինը, 2009թ. սեպտեմբերի 14-ի դրությամբ, գնահատվում է 300 ՀՀ դրամ: /Գ.թ. 88-89/;
Առարկաները ճանաչման ներկայացնելու արձանագրություններով, համաձայն որի տուժող Կ.Սարգսյանը ճանաչել է այն 2 վերնաշապիկները, որոնք քննչական փորձարարության ժամանակ ներկայացրել է Ս.Կարապետյանը և հայտարարել, որ ս/թ սեպտեմբերի 14-ին հենց այդ վերնաշապիկներն են գողացվել իր տանից:
Քննչական փորձարարության ժամանակ Ս.Կարապետյանի կողմից ներկայացված 2 հատ տղամարդու վերնաշապիկները զննելու արձանագրությունով և դրանք իրեղեն ապացույց ճանաչելու մասին որոշումով: /Գ.թ. 64,92/:
Վերոգրյալների հիման վրա դատարանը գտնում է, որ առաջադրված մեղադրանքը դատաքննությամբ հիմնավորվեց:
Պատիժ նշանակելիս դատարանը հաշվի է առնում կատարված հանցագործության հանրության վտանգավորության աստիճանը և ամբաստանյալի անձը բնութագրող տվյալները: Պատիժը և պատասխանատվությունը մեղմացնող հանգամանք է դիտվում, որ ամբաստանյալ Ս.Կարապետյանը ինչպես նախաքննության ժամանակ, այնպես էլ դատարանում ընդունել է իր մեղքը:
Անդրադառնալով տուժողին պատճառված վնասին, այն պետք է համարել լուծված, քանի որ տուժող Կ.Սարգսյանը նշեց, որ գույքային որևէ պահանջ չունի:
Նախաքննության ժամանակ իրեղեն ապացույց հանդիսացող 2 վերնաշապիկը ի պահ է հանձնվել տուժողին, հետևաբար այդ հարցը նույնպես պետք է համարել լուծված:
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 357-359-րդ, 361-րդ, 365-րդ, 369- 373-րդ, հոդվածներով դատարանը

ՎՃՌԵՑ

Սամվել Սուրենի Կարապետյանին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 3-րդ կետով և դատապարտել ազատազրկման 3 /երեք/ տարի ժամկետով: Պատժի կրման սկիզբը հաշվել 2009թ. հոկտեմբերի 31-ից:
Ընտրված խափանման միջոց կալանքը թողնել անփոփոխ` մինչև սույն դատավճռի օրինական ուժի մեջ մտնելը:
Պատիժը պետք է կրի ՀՀ ԱՆ քրեակատարողական համապատասխան հիմնարկում:
Քաղաքացիական հայցի և իրեղեն ապացույց հանդիսացող 2 վերնաշապիկի հարցը համարել լուծված, քանի որ տուժողը քաղհայցի պահանջ չներկայացրեց և իրեղեն ապացույցներն արդեն իսկ հանձնված են տուժողին:
Դատավճիռը դատավարության մասնակիցների կողմից 1 /մեկ/ ամսվա ընթացքում, վերաքննության կարգով, կարող է բողոքարկվել ՀՀ վերաքննիչ քրեական դատարան: