ԵԱՔԴ/0166/01/09





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«13» մայիսի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրողներ Գ.Հովհաննիսյան
Ն.Թոփուզյան
Ռ.Խաչատրյան
տուժող Ա.Հաջյան
տուժողի ներկայացուցիչ Ա.Սաֆարյան

դռնբաց դատական նիստում քննեց քրեական գործն ըստ մեղադրանքի`
Կարապետ Ջանիբեկի Հաջիյանի` ծնված 1960 թվականի օգոստոսի 8-ին Երևան քաղաքում, ազգությամբ հայ, ՌԴ քաղաքացի, բարձրագույն կրթությամբ, չամուսնացած, չի աշխատում, նախկինում չդատապարտված, բնակվում է Երևան քաղաքի Վ.Փափազյան 2-րդ նրբանցքի 119-րդ տանը: Մեղադրանք է առաջադրվել ՀՀ քրեական օրենսգրքի 117-րդ հոդվածով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2009 թվականի սեպտեմբերի 25-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ ՀՀ քրեական օրենսգրքի 117-րդ հոդվածով նախատեսված հանցագործության հատկանիշներով հարուցվել և վարույթ է ընդունվել թիվ 14130709 քրեական գործը:
2009 թվականի սեպտեմբերի 30-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ թիվ 14130709 քրեական գործով Կարապետ Ջանիբեկի Հաջիյանին մեղադրանք է առաջադրվել ՀՀ քրեական օրենսգրքի 117-րդ հոդվածով:
2009 թվականի նոյեմբերի 6-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ թիվ 14130709 քրեական գործով Աբրահամ Հաջյանի նկատմամբ քրեական հետապնդում չի իրականացվել հանցակազմի բացակայության հիմքով:
2009 թվականի նոյեմբերի 13-ին Կարապետ Ջանիբեկի Հաջիյանի վերաբերյալ քրեական գործը մեղադրական եզրակացությամբ ուղարկվել է Դատարան:
Կարապետ Ջանիբեկի Հաջիյանին մեղադրանք է առաջադրվել ՀՀ քրեական օրենսգրքի 117-րդ հոդվածով` այն արարքի համար, որ նա 2009 թվականի օգոստոսի 18-ին` ժամը 14:00-ի սահմաններում, Երևան քաղաքի Վ.Փափազյան 2-րդ նրբանցքի և Վ.Փափազյան փողոցների հատման խաչմերուկի մոտ վիճաբանության է բռնվել հորեղբոր` Աբրահամ Հարությունի Հաջիյանի հետ, որի ընթացքում մարմնական վնասվածք հասցնելու նպատակով ձեռքին եղած պայուսակով մեկ անգամ հարվածել է Աբրահամ Հաջյանի դեմքի և գլխի շրջանում և դիտավորությամբ վերջինի առողջությանը պատճառել թեթև վնաս:
2. Ապացույցների հետազոտում և գնահատում.
Ամբաստանյալ Կարապետ Հաջիյանը առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ բնակվում է Երևան քաղաքի Վ.Փափազյան փողոցի 2-րդ նրբանցքի 119-րդ տանը: 2007 թվականի օգոստոսից իր և Երևան քաղաքի Վ.Փափազյան փողոցի 2-րդ նրբանցքի 117-րդ տան բնակիչ Աբրահամ Հաջյանի միջև գույքային վեճի կապակցությամբ սկսվել են դատական գործընթացներ: 2009 թվականի օգոստոսի 18-ին` ժամը 14:00-ի սահմաններում, տուն վերադառնալու ճանապարհին իրենց փողոցի սկզբնամասում` մոտ 10-15 մետր հեռավորության վրա, տեսել է Աբրահամին, ով եղել է զայրացած: Ինքը փորձել շրջանցել նրան, սակայն նա մոտեցել է իրեն և անսպասելի թքել է իր վերնաշապիկին, որից հետո ցանկացել է հարվածել: Այդ ժամանակ Աբրահամի հետագա գործողությունները կանխելու համար ինքը բարձրացրել է իր ձեռքին եղած թղթապայուսակը («դիպլոմատը») և պահել իր ու Աբրահամի միջև, սակայն նրան չի հարվածել: Աբրահամը պայուսակին նույնպես չի հարվածել, և պայուսակի վրա թքի հետքեր չեն եղել: Դրանից հետո Աբրահամը զայրույթից սկսել է հայհոյել և գետնին ինչ-որ բան փնտրել: Ինքն, օգտվելով դրանից, վազել է դեպի տուն: Մինչ տուն մտնելը Աբրահամը քարը ձեռքին մոտ 100 մետր վազել է իր ետևից, ինչը նկատել են նաև հարևանները: Այդ ժամանակ իրենց տան դուռը բացել է իր եղբայր Սամվել Հաջիյանը: Տուն մտնելուց հետո ինքը լսել է իրենց տան դարպասին քարի հարվածի ձայն, որից հետո տեսել է, թե ինչպես է քարն ընկել իրենց բակ: Ինքն անմիջապես զանգահարել է ՀՀ ոստիկանության Արաբկիրի բաժին, խոսել ինչ-որ անձի հետ, սակայն իր զանգը չի արձանագրվել, այլ դրա փոխարեն ոստիկանությունում արձանագրված է Աբրահամի ահազանգը: Դրանից հետո եկել են ոստիկանները, և ինքը վերցրել է վերնաշապիկը, քարն ու թղթապայուսակը և նրանց հետ գնացել ՀՀ ոստիկանության Արաբկիրի բաժին: Մեքենայի մեջ ինքը Աբրահամի քթից դեպի շուրթն ընկած հատվածում նկատել է արյուն, սակայն չի կարող ասել դրա պատճառը: 2009 թվականի օգոստոսի 18-ին տեղի ունեցած դեպքի իրական շարժառիթը եղել է ոչ թե գազի և էլեկտրաէներգիայի մատակարարման դադարեցումը, այլ քրեական գործ հարուցելու միջոցով իրեն և իր եղբորը քաղաքացիական գործերից մեկուսացնելը: Իրականությանը չի համապատասխանում դատական քննության ընթացքում Աբրահամ Հաջյանի տված այն ցուցմունքը, որ դեպքից հետո տուն չի գնացել, այլ գնացել է պոլիկլինիկա: Ինչ վերաբերում է թղթապայուսակին, ապա ոստիկանությունում իրեն ասել են, որ դա գործի համար էական նշանակություն չունի, որից հետո ինքն այն դեն է նետել:
Տուժող Աբրահամ Հաջյանը դատական քննության ընթացքում ցուցմունք տվեց այն մասին, որ ամբաստանյալ Կարապետ Հաջիյանը իր եղբոր որդին է: Իր տան գազի և էլեկտրաէներգիայի մատակարարումը եղբոր որդիների դիմումի հիման վրա օրինական կերպով դադարեցվել է: Նշվածի կապակցությամբ 2009 թվականի օգոստոսին ինքը ցանկացել է գնալ գազամատակարարման ծառայության Արաբկիրի մասնաճյուղ: Ճանապարհին հանդիպել է Կարապետին և նրան ամոթանք տվել իր բնակարանի գազի ու էլեկտրաէներգիայի մատակարարումը դադարեցնելու վերաբերյալ դիմում տալու համար: Այդ ժամանակ Կարապետն ասել է, որ ճիշտ է վարվել և թղթապայուսակով դիտավորյալ հարվածել է իր գլխին, որի հետևանքով վնասվել է իր քթի ձախ մասը: Հարվածելուց հետո Կարապետը դիմել է փախուստի: Իրեն հարվածելու ժամանակ ոչ-ոք դեպքի վայրում չի եղել: Ինքը Կարապետի ետևից չի վազել, ինչպես նաև իր ձեռքին քար չի եղել: Դրանից հետո ինքը մտել է տուն, որպեսզի զանգահարի ոստիկանություն, սակայն հեռախոսահամարը չի գտել, և այդ ժամանակ իր կինն ասել է, որ ոստիկաններն արդեն եկել են: Հարվածից հետո իր մոտ սկսվել է գլխացավ, վատթարացել է տեսողությունը, ինչպես նաև ականջներում առաջացել է խշշոց: Դեպքի օրն ինքը ոստիկանությանը հայտարարություն չի տվել, այլ ոստիկանները եկել են և կազմել արձանագրություն:
Տուժող Աբրահամ Հաջյանը նախնական քննության ընթացքում ցուցմունք է տվել այն մասին, որ Կարապետ և Սամվել Հաջիյանները իր եղբոր որդիներն են, ովքեր տարիներ շարունակ տարբեր ատյաներ իր դեմ բողոքներ են ներկայացրել` կապված իրենց տների միջև ընկած հողատարածքի հետ: 2009 թվականի օգոստոսի 18-ին` ժամը 14:00-ի սահմաններում, ինքը Կարապետի և Սամվելի հերթական բողոքի կապակցությամբ ցանկացել է գնալ գազի վարչություն: Վ.Փափազյան 2-րդ նրբանցքի և Վ.Փափազյան փողոցների խաչմերուկում` իր տնից մոտ 100 մետր հեռավորության վրա, ինքը պատահաբար հանդիպել Կարապետին, ով եղել է միայնակ: Այդ ժամանակ ինքը ամոթանք է տվել նրան, քանի որ նրա բողոքների պատճառով իր տան գազամատակարարումը դադարեցվել է: Այդ ժամանակ Կարապետը ձեռքին եղած թղթապայուսակով հարվածել է իր գլխի և դեմքի շրջանին: Ինքը սկսել է ցավից բղավել, և այդ ժամանակ Կարպետը փախել է տուն և արագ փակել դարպասները: Դեպքը տևել է մի քանի րոպե, որի ընթացքում հայհոյանքներ չեն եղել, ինքը Կարապետին չի հարվածել և նրա վրա չի թքել: Դրանից հետո ինքը գնացել է տուն և զանգահարել ոստիկանություն, որից հետո եկել են ոստիկանները և իրենց հրավիրել են ոստիկանության Արաբկիրի բաժին, որտեղ ինքը տվել է հաղորդում: Դեպքի պահին շրջակայքում մարդիկ չեն եղել, սակայն դեպքի մասին ինքը պատմել է իր ընտանիքի անդամններին: Ինքը պնդում է իր բողոքը և ցանկանում է, որպեսզի Կարապետը ենթարկվի քրեական պատասխանատվության: Քթի կոտրվածքնների և գլխացավերի պատճառով ինքը դեպքից մոտ 3-4 օր անց դիմել է բուժօգնության, որի համար վճարել է 50.000 ՀՀ դրամ:
Վկա Սամվել Հաջիյանը ցուցմուք տվեց այն մասին, որ 2009 թվականի օգոստոսի 14-ին` դեպքից 4 օր առաջ, ինքը խանութ գնալու ճանապարհին հանդիպել է Աբրահամ Հաջյանին, ով այդ ժամանակ թքել է իր ուղղությամբ և իրեն անվանել «գործ տվող»: Նույն թվականի օգոստոսի 18-ին ինքը եղել է տանը, երբ իր եղբայր Կարապետ Հաջիյանը վրդովված թակել է իրենց տան դուռը: Ինքը բացել է դուռը և Կարապետի հագուստի վրա` կրծքավանդակի շրջանում, նկատել թքի հետք, իսկ Կարապետն ասել է, որ նրա վրա թքել է Աբրահամը: Այդ պահին Կարապետի ձեռքին եղել է պլաստմասե թղթապայուսակ: Կարապետի վրա վնասվածք չի նկատել, սակայն նրա շալվարը պատռված է եղել: Այդ ժամանակ Կարապետը զանգահարել է ոստիկանություն: Դրանից մի քանի վայրկյան անց դուռը փակելիս ինքը տեսել, որ քարով հարվածել են դռանը, և պատուհանից տեսել է, որ Աբրահամը քարը նետել է իրենց բակ և հեռացել: Այդ պահին Աբրահամի քթի շրջանում առկա է եղել կարմիր հետք: Մի քանի րոպե անց եկել են ոստիկանները և իրենց բերման ենթարկել ոստիկանություն: Ոստիկանների գալու պահին ինքն ու իր եղբայրը եղել են տանը: Ոստիկանություն բերման ենթարկելու պահին` մեքենայի մեջ, ինքը Աբրահամի քթի մոտ տեսել է արյան հետք:
Վկա Խորեն Կասյանը ցուցմունք տվեց այն մասին, որ 2009 թվականի օգոստոսին Կարապետ Հաջիյանը զանգահարել է ոստիկանություն և հայտնել է, որ բակում տեղի է ունեցել վիճաբանություն: Իրենք խմբով մեկնել են դեպքի վայր, որտեղ եղել են Կարապետը, նրա եղբայր Սամվելը, Աբրահամ Հաջյանը և ևս մի քանի անձ: Այդ ժամանակ Աբրահամի դեմքը եղել է արյունոտ է: Աբրահամն իրեն ասել է, որ Կարապետը փողոցում թղթապայուսակով հարվածել է և նրան նման վնասվածք պատճառել: Այդ ժամանակ ինքը Կարապետի ձեռքին տեսել է թղթապայուսակ: Դրանից հետո իրենք մտել են բակ, որտեղ Կարապետն իրեն ցույց է տվել քար, այնուհետև իրեն ասել է, որ Աբրահամը թքել է նրա վրա և ցույց է տվել այդ տեղը, սակայն ինքը թքի հետք չի նկատել: Դեպքի հանգամանքները պարզելու համար վիճաբանության կողմերին տարել են ոստիկանության բաժին:
Վկա Մելանյա Հաջյանը դատական քննության ընթացքում ցուցմունք տվել այն մասին, որ Աբրահամ Հաջյանը իր պապն է: Իր պապի և Կարապետ ու Սամվել Հաջիյանների միջև առկա է գույքային վեճ: Իր հիշելով դեպքը տեղի է ունեցել 2009 թվականի օգոստոսի 18-ին` ժամը 15:00-16:00-ի սահմաններում, սակայն ինքը դրան ականատես չի եղել, քանի որ այդ ժամանակ բացակայել է Երևան քաղաքից: Ինքը տուն է վերադարձել նույն օրը` ժամը 20:00-ից 21:00-ի սահմաններում, և տեսել, որ իր պապի դեմքն արյունոտ է և դեմքին առկա են կապտուկներ: Կարապետ և Սամվել Հաջիյանների բողոքների արդյունքում իրենց տան գազամատակարարումը դադարեցվել է: Պապը պատմել է, որ այդ օրը ցանկացել է գնալ գազի վարչություն, սակայն ճանապարհին հանդիպել է Կարապետին և բողոք ներկայացնելու համար ամոթանք տվել նրան: Այդ ժամանակ Կարապետը ձեռքին եղած թղթապայուսակով հարվածել է իր պապի դեմքին: Պապն իրեն չի ասել, որ թքել է Կարապետի վրա: Դեպքից հետո իր պապի մոտ սկսվել են գլխացավեր, տեսողությունը և լսողությունը վատթարացել է, որի համար նա մի քանի անգամ դիմել է բուժօգնության: Մինչ այդ պապի մոտ նման երևույթներ չեն եղել, իսկ բժիշկն ասել է, որ դրանք հարվածի հետևանք են:
Վկա Մելանյա Հաջյանը նախնական քննության ընթացքում ցուցմունք է տվել այն մասին, որ ինքն Աբրահամ Հաջյանի թոռնուհին է: 2009 թվականի օգոստոսի 19-ին Սամվել և Կարապետ Հաջիյանների ներկայացրած բողոքնների պատճառով իրենց տան գազի և էլեկտրաէներգիայի մատակարարումը դադարեցվել է: Ինքն անձնական հարցերով դուրս է եկել տնից, իսկ իր պապը պատրաստվել է գնալ գազի վարչություն` գազամատակարարումը վերականգնելու նպատակով: Երեկոյան ինքը վերադարձել է տուն և տեսել, որ պապի դեմքի շրջանում վնասվածքներ կան: Ինքը հարցրել է, թե ինչ է պատահել, պապն իրեն պատմել է, որ նույն օրը Փափազյան 2-րդ նրբանցքի խաչմերուկի մոտ պատահաբար հանդիպել է Կարապետին և գազմատակարարումը դադարեցնելու կապակցությամբ ամոթանք տվել նրան, իսկ վերջինն էլ դիտավորությամբ հարվածել է պապի դեմքին: Դրանից հետո եկել են ոստիկանները: Իր պապը չի թքել Կարապետի վրա:
2009 թվականի սեպտեմբերի 30-ի առերես հարցաքննության արձանագրության համաձայն` Աբրահամ Հաջյանը հայտնել է, որ ճանաչում է իր հետ առերես հարցաննվող Կարապետ Հաջիյանին: 2009 թվականի օգոստոսի 18-ին` ժամը 14:00-ի սահամաններում, ինքը դուրս է եկել իր տնից և ցանակցել է գնալ գազի վարչություն, քանի որ Կարապետ և Սամվել Հաջիյանների դիմումի հիման վրա դադարեցվել է իր տան գազամատակարարումը: Վ.Փափազյան փողոցի և Վ.Փափազյան 2-րդ նրաբացքի խաչմերուկում պատահաբար հանդիպել է Կարապետին և գազմատակարարումը դադարեցնելու համար ամոթանք տվել նրան: Այդ ժամանակ Կարապետը, առանց որևէ բան ասելու, ձեռքին եղած թղթապայուսակով դիտավորությամբ մեկ անգամ հարվածել է իր դեմքի և գլխի շրջանին, ինչի պատճառով ինքն ստացել է մարմնական վնասվածքներ: Դրանից հետո Կարապետը վազելով գնացել է տան ուղղությամբ, իսկ ինքը գնացել է իր տուն: Ինքը չի թքել Կարապետի վրա, նրան չի հայհոյել և քարով չի հարվածել: Իսկ Կարապետ Հաջիյանը հայտնել է, որ իր հետ առերես հարցաքննվող Աբրահամ Հաջյանը իր հորեղբայրն է: Նրա ցուցմունքները չեն համապատասխանում իրականությանը: 2009 թվականի օգոստոսի 18-ին` ժամը 14:00-ի սահամաններում, ինքը միայնակ վերադառնալիս է եղել տուն և խաչմերուկում տեսել է Աբրահամին, ով եղել է վրդովված: Ինքը փորձել է շրջանցել նրան, սակայն Աբրահամը մոտեցել է իրեն և թքել իր կրծքվանդակի աջ կրծքային մասին: Աբրահամի հետագա գործողություները կանխելու նպատակով ինքը ձեռքին եղած թղթապայուսակը պահել է իր և նրա միջև: Այնուհետև Աբրահամը կռացել է, և իրեն թվացել է, թե նա քար է փնտրում, որպեսզի հարվածի իրեն: Այդ ընթացքում Աբրահամը խուլիգանական բնույթի հայհոյանքներ է տվել իր հասցեին: Ինքը վախեցած փախել է դեպի տուն, իսկ Աբրահամը քարը ձեռքին շարժվել է իր ետևից: Ինքը մտել է իր տան բակ և դուռը կողպել: Այդ ընթացքում լսել է, որ քար է նետվել իր հողատարածք: Աբրահամն իրեն չի հարվածել և գույքային վնաս չի պատճառել:
Այլ փաստաթղթերն ապացույց ճանաչելու մասին 2009 թվականի նոյեմբերի 4-ի որոշման համաձայն` ոստիկանության Արաբկիրի բաժնում Կարապետ Հաջիյանի և Սամվել Հաջիյանի տված բացատրությունների արձանագրությունները ճանաչվել են ապացույց:
Բացատրություն վերցնելու մասին 2009 թվականի օգոստոսի 18-ի արձանագրության համաձայն` Կարապետ Հաջիյանը հայտնել է, որ իր և Աբրահամ Հաջյանի միջև առկա է գույքային վեճ, որը կապակցությամբ քաղաքացիական գործ է քննվում դատարանում: 2009 թվականի օգոստոսի 18-ին` ժամը 14:00-ի սահմաններում, Վ.Փափազյան փողոցի և Վ.Փափազյան 2-րդ նրբանցքի խաչմերուկում ինքը պատահաբար հանդիպել է Աբրահամին, ով վրդովված մոտեցել է իրեն և առանց որևէ խոսք ասելու` թքել իր վրա: Ինքը իր ձեռքին եղած պլաստմասե թղթապայուսակն անմիջապես բարձրացրել է վերև, որի ընթացքում հարվածել է Աբրահամի դեմքին: Այնուհետև Աբրահամը փորձել է ձեռքով բռնել իր հագուստից, սակայն ինքը թղթապայուսակը բարձրացրել է և պահել իր կրծքավանդակին, որպեսզի կանխի Աբրահամի գործողությունները: Դրանից հետո ինքը հեռացել է, սակայն Աբրահամն իր ետևից քար է նետել, որն իրեն չի դիպել: Նա քարը ձեռքին վազել է իր ետևից, իսկ ինքը մտել է տուն: Վիճաբանությունը տևել է 2-3 րոպե, որի ընթացքում ինքը և Աբրահամը միմյանց չեն հայհոյել: Աբրահամն իրեն չի հարվածել, և ինքը մարմնական վնասվասք չի ստացել:
Բացատրություն վերցնելու մասին 2009 թվականիի օգոստոսի 18-ի արձանագրության համաձայն` Սամվել Հաջիյանը հայտնել է, որ 2009 թվականի օգոստոսի 14-ին փողոցում ինքը հանդիպել Աբրահամին, ով իր ուղղությամբ թքել է գետնին և իրեն անվանել «գործ տվող»: Ինքն ուշադրություն չի դարձրել նրա ասածին և շարունակել է ճանապարհը: 2009 թվականի օգոստոսի 18-ին` ժամը 14:00-ի սահմաններում, վրդովված տուն է վերադարձել իր եղբայր Կարապետ Հաջիյանը: Ինքը բացել է տան դարպասները, և նա ներս է մտել: Տան դարպասները փակելու պահին Աբրահամ Հաջյանը քար է նետել իրենց բակ: Այդ ամենը ինքը նկատել է տան պատուհանից: Այնուհետև Կարապետը զանգահարել է ոստիկանություն, որից հետո եկել են ոստիկանները և իրենց բերման ենթարկել ոստիկանության բաժին: Մինչ ոստիկանների գալը, Կարապետն իրեն ասել է, որ փողոցում հանդիպել է Աբրահամին, ով թքել է նրա վրա, իսկ նա ձեռքին եղած թղթապայուսակով հարվածել է Աբրահամի դեմքին:
Փորձագետի 2009 թվականի օգոստոսի 31-ի թիվ 1905 եզրակացության համաձայն` Աբրահամ Հաջյանի ստացած մարմնական վնասվածքները` զույգ ակնակապիճների շրջանների փափուկ հյուսվածքների արյունահավաքների, քթի շրջանի փափուկ հյուսվածքների արյունազեղման և քերծվածների, քթի ոսկրերի առանց տեղաշարժի փակ կոտրվածքի ձևով, հասցվել են բութ, կոշտ առարկայով (ներով), հնարավոր է նշված ժամկետում, որոնք պատճառել են առողջությանը թեթև վնաս` առողջության կարճատև քայքայումով: Նկատի ունենալով վնասվածքների հետ անմիջական պատճառական կապի մեջ եղած հետևանքների տևողությունը` ոչ պակաս 6 օրից և ոչ ավելի 21 օրից:
Փորձագետի 2009 թվականի հոկտեմբերի 8-ի թիվ 542 եզրակացության համաձայն` փորձաքննության ներակայցված վերնաշապիկի` որոշման մեջ նշված մասից` աջ կրծքային հատվածից` գրպանի և կոճակների միջև ընկած մասից կտրված կտորներում թքի առկայություն չի հաստատվել:
Դեպքի վայրի զննության մասին 2009 թվականի սեպտեմբերի 26-ի արձանագրության համաձայն` զննությամբ պարզվել է, որ դեպքի վայրը գտնվում է Երևան քաղաքի Վ.Փափազյան 2-րդ նրաբանցքի և Վ.Փափազյան փողոցի հատման խաչմերուկում` մի փոքր դեպի Վ.Փափազյան 2-րդ նրաբանցքը` խաչմերկուկից դիտարկումով փողոցի երթևեկելի ձախ հատվածում: Նշված վայրում տուժող Աբրահամ Հաջյանը մատնացույց է արել տեղանքը և հայտարարել, որ 2009 թվականի օգոստոսի 18-ին` ժամը 14:00-ի սահմաններում, այդ վայրում հանդիպել է Կարապետ Հաջիյանին և նրան ամոթանք տվել: Այդ ժամանակ Կարապետը պայուսակով հարվածել է իր գլխին և դեմքին: Այնուհետև Աբրահամ Հաջյանը մատնացույց է արել այն ուղղությունը, որով իրեն մարմնական վնասվածք հասցնելուց հետո Կարապետ Հաջիյանը դիմել է փախուստի: Նշված տեղանքի զննությամբ արնանման հետքեր, պայուսակ և քարի կտորներ չեն հայտնաբերվել:
Տուժող ճանաչելու մասին 2009 թվականի սեպտեմբերի 26-ի որոշման համաձայն` թիվ 14130709 քրեական գործով Աբրահամ Հարությունի Հաջյանը ճանաչվել է տուժող:
Քաղաքացիական հայցվոր ճանաչելու մասին 2009 թվականի օգոստոսի 3-ի որոշման համաձայն` թիվ 14130709 քրեական գործով Աբրահամ Հարությունի Հաջյանը ճանաչվել է քաղաքացիական հայցվոր և նրա քաղաքացիական հայցի պահանջը կազմել է 50.000 ՀՀ դրամ:
2009 թվականի նոյեմբերի 26-ին Դատարան ստացված միջնորդությամբ տուժող և քաղաքացիական հայցվոր Աբրահամ Հաջյանի ներկայացուցիչ Աշոտ Սաֆարյանը խնդրել է վերջնական դատական ակտով անդրադառնալ նաև Աբրահամ Հաջյանի կողմից կատարված դատական ծախսերին` իրավաբանական ծառայությունների մատուցման համար վճարված 800 ԱՄՆ դոլարին (կից ներկայացվել է վճարովի ծառայությունների մատուցման թիվ 08/01 պայմանագրի, լիազորագրի և 800 ԱՄՆ դոլարը ստանալու վերաբերյալ ստացականի պատճենները):
ՀՀ ոստիկանության ինֆորմացիոն կենտրոնի պահանջագրի համաձայն` Կարապետ Ջանիբեկի Հաջիյանը նախկինում դատապարտված չի եղել:
Այսպիսով, Դատարանը գտնում է, որ մտացածին են և գործով ձեռք բերված օբյեկտիվ տվյալներով հերքվում են ամբաստանյալ Կարապետ Հաջիյանի ցուցմունքներն այն մասին, որ Արբրահամ Հաջիյանը թքել է իր վրա, ինքը չի հարվածել Աբրահամ Հաջիյանին, այլ միայն իր ձեռքին եղած թղթապայուսակը պահել է իր և Աբրահամ Հաջիյանի միջև, որպեսզի կանխի նրա գործողությունները:
Վերոգրյալ ապացույցների հիման վրա Դատարանը հաստատված է համարում գործի լուծման համար նշանակություն ունեցող հետևյալ փաստերը.
-Աբրահամ Հաջյանը Կարապետ Հաջիյանի հորեղբայրն է,
-Աբրահամ Հաջյանի և Կարապետ Հաջիյանի միջև առկա է գույքային վեճ,
-2009 թվականի օգոստոսի 18-ին` ժամը 14:00-ի սահմաններում, Երևան քաղաքի Վ.Փափազյան փողոցի և Վ.Փափազյան 2-րդ նրաբանցքի խաչմերուկում Կարապետ Հաջիյանը հանդիպել է Աբրահամ Հաջիյանին,
-նշված վայրում Կարապետ Հաջիյանը և Աբրահամ Հաջյանը սկսել են վիճաբանել,
-վիճաբանության ընթացքում Կարապետ Հաջիյանը ձեռքին եղած թղթապայուսակով հարվածել է Աբրահամ Հաջյանի դեմքին,
-հարվածի արդյունքում Աբրահամ Հաջյանի առողջությանը պատճառվել է թեթև վնաս` առողջության կարճատև քայքայումով,
-Կարապետ Հաջիյանը նախկինում դատապարտված չի եղել:
3. Դատարանի իրավական վերլուծությունները.
Վերը նշված փաստերի հիման վրա Դատարանը գալիս է այն եզրահանգման, որ 2009 թվականի օգոստոսի 18-ին` ժամը 14:00-ի սահմաններում, Երևան քաղաքի Վ.Փափազյան փողոցի և Վ.Փափազյան 2-րդ նրաբանցքի խաչմերուկում, վիճաբանության ընթացքում Կարապետ Ջանիբեկի Հաջիյանը ձեռքին եղած թղթապայուսակով դիտավորությամբ հարվածել է Աբրահամ Հարությունի Հաջյանի դեմքին` վերջինի առողջությանը պատճառելով թեթև վնաս` առողջության կարճատև քայքայումով: Այսինքն` Կարապետ Ջանիբեկի Հաջիյանը դիտավորությամբ մեկ ուրիշի առողջությանը պատճառել է թեթև վնաս, ինչը համապատասխանում է ՀՀ քրեական օրենսգրքի 117-րդ հոդվածի հատկանիշներին:
Ապացուցված է Կարապետ Ջանիբեկի Հաջիյանի մեղավորությունը ՀՀ քրեական օրենսգրքի 117-րդ հոդվածսով նախատեսված արարքը կատարելու մեջ:
Կարապետ Հաջիյանի անձը դրականորեն բնութագրող հանգամանք է բարձրագույն կրթություն ունենալը:
Կարապետ Հաջիյանի պատասխանատվությունն ու պատիժը մեղմացնող հանգամանք է նախկինում արատավորված` դատապարտված չլինելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը միաժամանակ արձանագրում է, որ Կարապետ Հաջիյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Կարապետ Հաջիյանը ենթակա է քրեական պատասխանատվության և պատժի:
ՀՀ քրեական օրենսգրքի 61-րդ հոդվածի 3-րդ մասի համաձայն` հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Դատարանը, հաշվի առնելով Կարապետ Հաջիյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորոն բնութագրող տվյալը, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Կարապետ Հաջիյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը գտնում է, որ դատավճիռն օրինական ուժի մեջ մտնելուց հետո Կարապետ Հաջիյանի կողմից Դատարան ներկայացված քարը և վերնաշապիկը պետք է վերադարձնել նրան:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցն ենթակա է արդյոք բավարարման, ում օգտին և ինչ չափով:
Սույն քրեական գործով քաղաքացիական հայց է ներկայացրել տուժող Աբրահամ Հաջյանը` ամբաստանյալ Կարապետ Հաջիյանից պահանջելով հանցագործությամբ իրեն պատճառված վնասը` 50.000 ՀՀ դրամը: Սակայն դատական նիստի ժամանակ տուժողի և քաղաքացիական հայցվորի ներկայացուցիչը հրաժարվել է ներկայացված քաղաքացիական հայցից` նշելով, որ ցանկանում են քաղաքացիական հայցը ներկայացնել քաղաքացիական դատավարության կարգով: ՀՀ քրեական դատավարության 161-րդ հոդվածի 2-րդ մասի համաձայն` քաղաքացիական հայցից հրաժարվելն ընդունելը հանգեցնում է քրեական դատավարությունում քաղաքացիական հայցով վարույթի կարճման: Նշվածը հիմք ընդունելով` Դատարանը գտնում է, որ քաղաքացիական հայցից հրաժարումը պետք է ընդունել և Աբրահամ Հաջյանի կողմից հարուցված քաղաքացիական հայցի վարույթը կարճել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերը ամբաստանյալից ենթակա չեն բռնագանձման, քանի որ քաղաքացիական հայցի վարույթը վերոգրյալ հիմնավորմամբ պետք է կարճել: Բռնագանձման ենթակա չեն նաև վկայակոչված հոդվածի նույն մասի 2-6-րդ կետերով նախատեսված դատական ծախսերը, քանի որ 4-6-րդ կետերով նախատեսված դատական ծախսեր ընդհանրապես չկան, իսկ 2-րդ և 3-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել: Ինչ վերաբերում է Աբրահամ Հաջյանի կողմից իրեն իրավաբանական ծառայություններ մատուցելու համար վճարված 800 ԱՄՆ դոլարին, ապա դատական քննության ընթացքում վերջինի ներկայացուցիչ Աշոտ Սաֆարյանը հայտնել է, որ վճարված 800 ԱՄՆ դոլարը վերադարձրել է Աբրահամ Հաջյանին, ուստի Դատարանը գտնում է, որ այդ հարցը պետք է համարել լուծված:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 161-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Կարապետ Ջանիբեկի Հաջիյանին մեղավոր ճանաչել ՀՀ քրեական օրենսգրքի 117-րդ հոդվածով և պատիժ նշանակել տուգանք` նվազագույն աշխատավաձի յոթանասունապատիկի չափով:
Կարապետ Ջանիբեկի Հաջիյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելու հետո Կարապետ Ջանիբեկի Հաջիյանի կողմից Դատարան ներկայացված քարը և վերնաշապիկը վերադարձնել նրան:
Աբրահամ Հարությունի Հաջյանի քաղաքացիական հայցի վարույթը կարճել:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության վերաքննիչ քրեական դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ