ԵԱՔԴ/0161/01/09






ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«3» փետրվարի 2010թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրողներ Ա.Շահազիզյան
Ռ.Խաչատրյան
տուժող Ա.Վարդանյան
պաշտպան Ա.Հովհաննիսյան

դռնբաց դատական նիստում քննեց քրեական գործն ըստ մեղադրանքի`
Կարինե Աղասու Իսահակյանի` ծնված 1962 թվականի հուլիսի 19-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չի աշխատում, նախկինում չդատապարտված, բնակվում է Երևան քաղաքի Լեփսիուսի փողոցի 17-րդ շենքի 46-րդ բնակարանում: Մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով, խափանման միջոց է ընտրվել ստորագրություն չհեռանալու մասին:
1. Գործի դատավարական նախապատմությունը.
2009 թվականի սեպտեմբերի 15-ին ՀՀ ոստիկանության Արաբկիրի քննչական բաժնի քննիչ Դ.Թովմասյանի որոշմամբ ՀՀ քրեական օրենսգրքի 258-րդ հոդվածի 2-րդ մասով նախատեսված հանցագործության հատկանիշներով հարուցվել և վարույթ է ընդունվել թիվ 14130009 քրեական գործը:
2009 թվականի սեպտեմբերի 25-ին ՀՀ ոստիկանության Արաբկիրի քննչական բաժնի քննիչ Դ.Թովմասյանի որոշմամբ թիվ 14130009 քրեական գործով Կարինե Աղասու Իսահակյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով:
2009 թվականի նոյեմբերի 6-ին Կարինե Աղասու Իսահակյանի վերաբերյալ քրեական գործը մեղադրական եզրակացությամբ ուղարկվել է Դատարան:
Կարինե Աղասու Իսահակյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով` այն արաքի համար, որ նա 2009 թվականի օգոստոսի 7-ին` ժամը 21:00-ի սահմաններում, ամուսնու` Մանվել Հաբեթի Մուդիրյանի հետ ալկոհոլ օգտագործած վիճակում բնակարանը զբաղեցնելու համար գնացել է Երևան քաղաքի Շիրվանզադե փողոցի 3-րդ նրբանցքի 18-րդ շենքի 24-րդ բնակարան, որտեղ արդեն իսկ բնակվող Անահիտ Գեորգիի Վարդանյանից առանց որևէ օրինական հիմքի պահանջել է ազատել բնակարանը, որի շուրջ ծագած վիճաբանության ընթացքում Կարինե Իսահակյանը Անահիտ Վարդանյանի հասցեին տվել է սեռական բնույթի հայհոյանքներ, ձեռքերով և ոտքերով հարվածներ հասցրել վերջինի մարմնի տարբեր մասերին, ինչպես նաև կոտրել նրա գույքը:
2. Ապացույցների հետազոտում և գնահատում.
Դատական քննության ընթացքում ամբաստանյալ Կարինե Իսահակյանը առաջադրված մեղադրանքում իրեն մեղավոր չճանաչեց և հրաժարվեց ցուցմունք տալուց: Սակայն իրեն առաջադրված հարցերին պատասխանեց, որ անձամբ զրուցել է Անահիտենց շենքի առաջին հարկի բնակիչ Արգինեի հետ, ով իրենց ասել է, որ այդ բնակարանն ազատ է և ոչ ոքի չի պատկանում: Իրենք բարձրացել են շենքի այն հարկը, որտեղ գտնվել է Արգինեի նշած բնակարանը: Այդ հարկում կողք-կողքի եղել են երեք դռներ: Իրենք հերթով թակել են այդ դռները, սակայն ոչ ոք չի բացել: Դրանից հետո թակել են Անահիտի բնակարանի դուռը, որը նույնպես բացող չի եղել և իրենք հրելով բացել են դուռը ու մտել ներս: Բնակարանում առկա է եղել գույք, ինչից ելնելով իրենք ենթադրել են, որ այն բնակեցված է: Այնուհետև ինքը թակել է բնակարանի ներսում գտնվող մեկ այլ դուռ, որտեղից դուրս է եկել Անահիտը և հարցրել, թե իրենք ինչ են անում այդտեղ: Ինքը պատասխանել է, որ իրենք եկել են այդ բնակարանը զբաղեցնելու, քանի որ Արգինեն իրենց ասել է, որ այդ բնակարանն ազատ է: Անահիտը պատասխանել է, որ այդ բնակարանը նրանն է և պահանջել որպեսզի իրենք դուրս գան: Դրանից հետո իր և Անահիտի միջև սովորական վեճ է ծագել, որի ընթացքում գոռգոռոց և հրմշտոց չի եղել: Այդ ընթացքում իր ամուսինը ոչինչ չի արել, այլ նստած է եղել բազմոցին: Վեճի ընթացքում ոչ թե ինքը, այլ Անահիտն է հայհոյաքներ տվել: Ինքը որևէ իր չի կոտրել, պարզապես իր ոտքը պատահաբար դիպել է հեռախոսի լարին, ինչի պատճառով հեռախոսն ընկել է և կոտրվել: Դրանից հետո Անահիտը զանգահարել է ոստիկանություն: Ոստիկանություն զանգահարելուց հետո էլ իրենք դուրս չեն եկել այդ բնակարանից, քանի որ ցանկացել են պարզել` իրականում այդ բնակարանը պատկանում է Անահիտին, թե ոչ: Եվ եթե պարզվեր, որ Անահիտն ապօրինի է զբաղեցնում այդ բնակարանը, ապա իրենք պետք է զբաղեցնեին այն: Իրենք գիտակցել են, որ այդ բնակարանը պետք է ապօրինի զբաղեցնեն և հետագայում օգտվելով իր ամուսնու` Մանվել Մուդիրյանի ազատամարտիկ լինելու հանգամանքից` այն սահմանված կարգով ձևակերպեն: Այդ օրն ինքը ոգելից խմիչք չի օգտագործել: Իրենք ցանկացել են բնակվել այդ բնակարանում, այլ նպատակ ու դիտավորություն չեն ունեցել: Իսկ ինչ վերաբերում է մուրճին, ապա այն վերցրել են, որպեսզի առկայության դեպքում կոտրեն կախովի կողպեքը: Մինչև բնակարան մտնելն իրենք մուտքի մոտ ոչ ոքի չեն տեսել:
Նախնական քննության ընթացքում Կարինե Իսահակյանը առաջադրված մեղադրանքում իրեն մեղավոր չի ճանաչել և ցուցմունք է տվել այն մասին, որ 2009 թվականի օգոստոսի 7-ին` ժամը 21:00-ի սահմաններում, ինքն ու իր ամուսինը` Մանվելը Մուդիրյանը գնացել են Երևան քաղաքի Շիրվանզադե փողոցի 3-րդ նրբանցքի 18-րդ շենքի 24-րդ բնակարան, քանի որ Մանվելի ծանոթ Արգինեն Մանվելին ասել էր, որ նշված բնակարանը ազատ է: Այդ պատճառով իրենք գնացել են, որպեսզի բնակեցնեն այդ բնակարանը: Իրենք գնացել են Արգինեի մոտ, ով իրենց տվել է փոքր մուրճ, որպեսզի իրենք կարողանան բացել այդ բնակարանի դուռը: Դրանից հետո իրենք գնացել են նշված բնակարան, թակել դուռը, սակայն ոչ ոք այն չի բացել: Այդ ժամանակ ինքը բացել դուռը, և իրենք մտել են ներս: Այդ պահին բնակարանի սենյակներից մեկից դուրս է եկել Անահիտ Վարդանյանը, ում ինքը մինչ այդ չի ճանաչել: Իրենց մեջ վեճ է ծագել, քանի որ Անահիտը իրենց դուրս է հարավիրել, իսկ իրենք ասել են, որ այդ բնակարանն ազատ է: Վիճաբանության ընթացքում իրենց միջև քաշքշուկ չի եղել, ինքը Անահիտին հայհոյանք չեն տվել: Ինքը Անահիտի սպասքը չի կոտրել, պարզապես իր ոտքը դիպել է հեռախոսալարին և հեռախոսը ընկել է գետին: Ինքը Անահիտին մուրճով չի հարվածել և չի սպառնացել:
Տուժող Անահիտ Վարդանյանը ցուցմունք տվեց այն մասին, որ այն բնակարանը, որտեղ իրենք ապրում են, սեփականաշնորհված չէ, սակայն ինքը հաշվառված է այդ բնակարանում և առկա է այն իրեն հատկացված լինելու վերաբերյալ համապատասխան փաստաթուղթ: 2009 թվականի օգոստոսի 7-ին` ժամը 21:00 սահմաններում, ինքն ու իր թոռ Սոնան եղել են տանը և դիտել են հեռուստացույց: Այդ ժամանակ ինքը լսել է աղմուկ, որից հետո իր բնակարանի դուռը բացվել է: Ինքը գնացել է ճաշասենյակ և սենյակի մեջտեղում տեսել Կարինեին և նրա ամուսնուն, ովքեր եղել են հարբած: Կարինեի ձեռքին եղել է մուրճ: Այդ պահին Կարինեն իրենից պահանջել է ազատել բնակարանը և սկսել է հայհոյանքներ տալ: Ինքը փորձել է սաստել նրանց և հարցրել է, թե ովքեր են և ինչի համար են եկել: Նրանք պատասխանել են, որ բնակարանը նրանցն է, իսկ ինքը ցույց է տվել իր անձնագիրն ու բնակարանն իրեն հատկացնելու վերաբերյալ փաստաթուղթը և նրանցից պահանջել ազատել իր բնակարանը: Սակայն նրանք չեն հանգստացրել, և Կարինեն հարձակվել է իր վրա: Իր թոռը սկսել է լացել և փախել է դուրս: Կարինեն եղել է շատ ագրեսիվ, իսկ նրա ամուսինը կանգնած է եղել սենյակի մի անկյունում և իրենից պահանջել է դուրս գալ բնակարանից: Ամուսինը նաև օգնել է Կարինեին` իր իրերը բնակարանից դուրս նետել: Տղամարդը իրեն չի հայհոյել և չի հարվածել, իսկ Կարինեն հարձակվել է իր վրա, պատռել իր հագուստը, հարվածել իրեն, և մուրճով կոտրել իր տան իրերը: Կարինեն մի կողմ նետելով կոտրել է իր տան սպասքը և հեռախոսը: Նա նույնիսկ էլեկտրական թեյնիկը նետել է իր թոռան ետևից: Կարինեի հարվածներից ինքը ստացել է քերծվածքներ: Ինքը փորձել է զանգահարել ոստիկանություն, սակայն չի ստացվել, իսկ այդ ընթացքում Կարինեն պնդել է, որպեսզի ինքը զանգահարի ոստիկանություն: Ոստիկանները եկել են և նրանց տարել ոստիկանություն: Այդ գործողությունները տևել են մոտ 30 րոպե: Կարինեի գործողությունների արդյունքում խանգարվել է շենքի բնականոն հանգիստը: Նա հայհոյել է նաև շենքի երկրորդ հարկում կանգնած երկու կնոջ, ովքեր փորձել են կարգի հրավիրել նրան: Դրանից մի քանի օր հետո Կարինեն հաբած վիճակում կրկին եկել է իր տուն: Կարինեն կոտրել է պահարանի ապակին, սեղանին դրված ծաղկամանը, ճաշի սպասքը, սուրճի և հյութի բաժակներ, իսկ ամուսինը` ափսե և բաժակ, որոնց քանակը ինքը չի հիշում: Ինքը պնդում է իր քաղաքացիական հայցի պահանջը, որը կազմում է 52.300 ՀՀ դրամ:
Վկա Աննա Համբարձումյանը դատական քննության ընթացքում ցուցմունք տվեց այն մասին, որ դեպքի օրն ինքն ու իր հարևանուհի Մելանյան երեխաների հետ նստած են եղել միջանցքում: Այդ ժամանակ իրենք տեսել են, որ Կարինեն և նրա ամուսինը բարձրացել են աստիճաններով ու ուժգին թակել Անահիտի բնակարանի դուռը: Այնուհետև Կարինեն ընդհանուր միջանցքից հայհոյանքներ տալով մտել է Անահիտի բնակարան: Այդ ամենից վախեցած իրենք գնացել են տուն, սակայն իր բնակարանի ներսից լսվել են Կարինեի հայհոյանքները, սպասքի կոտրվելու ձայներ, ինչպես նաև Անահիտի ձայնը, ով պահանջել է դուրս գալ բնակարանից: Այնուհետև եկել են ոստիկանները և նրանց տարել ոստիկանություն: Ոստիկանների գալուց հետո է միայն ինքը համարձակվել դուրս գալ բնակարանից: Ինքն ու Մելանյան մտել են վերջինի տուն, որը գտնվում է Անահիտի բնակարանի դիմաց: Այդ ժամանակ իրենք միջանցքում տեսել են Անահիտի կոտրված իրերը: Անահիտի թոռը` Սոնան եղել է վախեցած: Վերջինը իրեն պատմել է, որ Կարինեն ցանկացել է հարվածել նաև նրան (Սոնային), սակայն նա փախել է դուրս:
Վկա Մելանյա Միքայելյանը ցուցմունք տվեց այն մասին, որ դեպքի օրն ինքն ու հարևանուհին երեխաների հետ նստած են եղել միջանցքում: Կարինեն ամուսնու հետ աստիճաններով բարձրացել են վերև և գնացել դեպի Անահիտենց տուն: Այդ ժամանակ Կարինեն եղել է հանգիստ, բարևել է ու գնացել: Դրանից մոտ 10 րոպե հետո լսվել են բարձրաձայն հայհոյանքներ, գոռգոռոցներ և սպասքի կոտրվելու ձայներ: Այդ հայհոյանքնները լսվել են նաև դիմացի շենքում: Ինքը համոզված է, որ հայհոյանքններ տվողը եղել է Կարինեն: Կարինեն Անահիտից պահանջել են դուրս գալ բնակարանից, իսկ Անահիտը ասել է, որ կզանգահարի ոստիկանություն: Այնուհետև եկել են ոստիկանները և Կարինեին տարել ոստիկանություն: Դրանից հետո իրենք դուրս են եկել բնակարանից և միջանցքում տեսել կոտրված իրեր:
Վկա Սոնա Վարդանյանը ցուցմունք տվեց այն մասին, որ դեպքի օրն ինքն ու իր տատը հեռուստացույց դիտելիս են եղել, երբ լսել են դռան ձայնը: Երկու անձ հարբած վիճակում մտել են իրենց բնակարան և պահանջել ազատել բնակարանը: Նրանք սկսել են հայհոյել: Այնուհետև նրանք և իր տատը հարվածել են միմյանց: Կարինեն ցանկացել է հարվածել նաև իրեն, սակայն տատը չի թողել, իսկ ինքը փախել է տնից, գնացել մոտակա խանութ և զանգահարել տատի եղբորը: Նրանց հայհոյանքնները լսվել է նաև դրսից: Կարինեն թեյնիկը և ինչ-որ այլ իրեր է նետել իր ետևից:
Վկա Մանվել Մուդիրյանը դատական քննության ընթացքում ցուցմունք տվեց այն մասին, որ իրեն գիշերելու համար տուն է անհրաժեշտ եղել, որի համար այդ շենքի բնակիչներից մեկը ցույց է տվել այդ բնակարանը և ասել, որ այն ազատ է: Ինքը և Կարինեն գնացել են այդ բնակարան, որի դռան վրա առկա է եղել կողպեք: Բնակարնում ոչ ոք չի եղել, իսկ Անահիտին հանդիպել են միջանցքում: Անահիտի և իրենց միջև որևէ վիճաբանություն չի եղել, այլ զրույցի ժամանակ Անահիտից տեղեկացել են, որ դա նրա բնակարանն է, որից հետո հեռացել են այդտեղից: Իրենք նրա բնակարանը չեն մտել և ոչ մի իր չեն կոտրել: Նախանական քննության ընթացքում իր տված ցուցմունքները ճիշտ են և համապատասխանում են իրականությանը:
Վկա Մանվել Մուդիրյանը նախնական քննության ընթացքում ցուցմունք է տվել այն մասին, որ 2009 թվականի օգոստոսի սկզբին իր ծանոթ Արգինեից իմացել է, որ Երևան քաղաքի Շիրվանզադե փողոցի 3-րդ նրբանցքի 18-րդ շենքի 24-րդ բնակարանը ազատ է: 2009 թվականի օգոստոսի 7-ին` ժամը 21:00-ի սահմաններում, ինքն ու իր կինը` Կարինեն Իսահակյանը, գնացել են նշված բնակարան, որպեսզի բնակվեն այդտեղ: Իրենք հրելով բացել են բնակարանի դուռը և բնակարնում հանդիպել Անահիտին: Նա իրենց հարցրել է, թե ովքեր են և ինչ են ցանականում: Իսկ ինքը նրան պատասխանել է, որ իրենք եկել են բնակվելու այդ բնակարանում, քանի որ իրենց տեղեկացրել են, որ այն ազատ է: Դրանից հետո Անահիտը բորբոքված ձայնով իրենց դուրս է հրավիրել բնակարանից, որի պատճառով Անահիտի և Կարինեի միջև վիճաբանություն է սկսվել: Վիճաբանության ընթացքում Կարինեն և Անահիտը միմյանց հայոյանքններ չեն տվել, նրանց միջև քաշքշուկ չի եղել, ինչպես նաև Կարինեն չի կոտրել Անահիտի բնակարանի սպասքը: Վիճաբանությունը տևել մոտ 10 րոպե որից հետո եկել են ոստիկանության աշխատակիցնները և իրենց տարել ոստիկանություն:
2009 թվականի հոկտեմբերի 16-ի առերես հարցաքննության արձանագրության համաձայն` Անահիտ Վարդանյանը հայտնել է, որ ճանանչում է իր հետ առերես հարցաքննվող Կարինե Իսահակյանին: Նա 2009 թվականի օգոստոսի 7-ին` ժամը 21:00-ի սահմաններում, հարբած վիճակում, ամուսնու` Մանվել Մադիրյանի հետ եկել է իր` Շիրվանզադե փողոցի 3-րդ նրբանցքի 18-րդ շենքի 24-րդ բնակարան, անհիմն պահանջել ազատել բնակարանը, այնուհետև հարձակվել իր վրա, ձեռքերով ու ոտքերով հարվածել մարմնի տարբեր մասերին, հայհոյել իրեն և ձեռքում եղած մուրճով կոտրել իր սպասքը, հեռախոսը, ինչպես նաև այլ գույք: Իսկ Կարինե Իսահակյանը հայտնել է, որ Անահիտ Վարդանյանի ցուցմունքը չի համապատասխանում իրականությանը, ինքը նման արաքներ չի կատարել:
2009 թվականի հոկտեմբերի 20-ի առերես հարցաքննության արձանագրության համաձայն` Կարինե Իսահակյանը հայտնել է, որ ճանանչում է իր հետ առերեսվող Արգինե Գևորգյանին, ով իր ամուսնու` Մանվել Մուդիրյանի ծանոթն է: Վերջին անգամ նրան տեսել է 2009 թվականի օգոստգոսի 7-ին: Այդ օրն ինքն ու իր ամուսինը գնացել են նրա տուն, որտեղ նա իրենց տեղեկացրել է, որ այդ շենքի 24-րդ բնակարանը ազատ է և ասել, որպեսզի իրենք գնան և բնակավեն այնտեղ: Արգինեն իրենց տվել է փոքր մուրճ և ասել, որպեսզի իրենք դրանով կոտրեն նշված բնակարանի մուտքի դուռը և բնակվեն այնտեղ: Իսկ Արգինե Գևորգյանը հայտնել է, որ իր հետ առերես հարցաքննվող կինը ստում է, ինքը նրան չի ճանանչում և տեսնում է առաջին անգամ: Իսկ 2009 թվականի օգոստոսի 7-ին ինքը գտնվել է իր մոր` Մ.Մելիքյան փողոցի 30-րդ տանը: Ինքը ճանաչում է Մանվել Մադիրյանին, ում հետ ծանոթացել է մոտ հինգ տարի առաջ «ՀԱԲ»-ի շտաբում:
Դեպքի վայրի զննության մասին 2009 թվականի օգոստոսի 8-ի արձանագրության համաձայն` դեպքի վայրը հանդիսանում է Շիրվանզադե փողոցի 3-րդ նրբանցքի 18-րդ շենքի 24-րդ բնակարանը: Նշված շենքը հանրակացարան է և ունի մեկ մուտք: Թիվ 24 բնակարանը գտնվում է 3-րդ հարկում` աստիճաններից դեպի ձախ: Հարկում առկա է երկու բնակարան: Թիվ 24 բնակարանի զննությամբ պարզել է, որ մուտքի դիմաց գտնվում է հյուրասենյակը, իսկ դեպի աջ գտնվում է ննջարանը, ննջարան է առկա նաև մուտքի դռնից դեպի աջ: Հյուրասենյակի զննությամբ պարզվել է, որ դռնից դեպի աջ գտնվում է պահարան, որի մեջ գտնվում են հյութի բաժակներ: Հյուրասենյակի մոտ գտնվում է մեկ բազմոց և առնաց թիկնակի երկու բազմոցներ, որոնց դիմաց դրված է փոքրիկ սեղան: Բազմոցի կողքին գտնվում է ճաշասեղան, որի վրա դրված է ծաղկաման: Ննջարանի մուտքի դռան մոտ նույնպես առկա է ճաշասեղան, որի վրա դրված է ինքնաեռ, դույլ և սրճեփ: Ընդհանուր միջանցքի զննությամբ հատակից հայտնաբերվել է կոտրված հեռախոս, իսկ հյուրասենյակի փոքր սեղանի վրայից` երկաթյա մուրճ: Անահիտ Վարդանյանը հայտարարել է, որ 2009 թվականի օգոստոսի 7-ին` ժամը 21:00-ի սահմաններում, իր տուն մտած Կարինեն կոտրել է հեռախոսը, իսկ ձեռքին եղած մուրճը` թողել սեղանին: Բացի այդ Անահիտ Վարդանյանը նշել է, որ Կարինեն կոտրել է նաև սուրճի 4 բաժակ և հյութի 5 բաժակ: Անահիտ Վարդանյանը ներկայացրել է սուրճի կոտրված բաժականերից մեկի բռնակը և կոտրված հյութի բաժականերից մեկը:
Առարկաները ճանաչման ներկայացնելու մասին 2009 թվականի հոկտեմբերի 24-ի արձանագրության համաձայն` տուժող Անահիտ Վարդանյանին ճանաչման են ներկայացվել 4 նույնանման մուրճեր, որոնք համարակալվել են ձախից աջ 1-4 թվերով: Անահիտ Վարդանյանը, զննելով իրեն ճանաչման ներկայացված առարկաները, մատնացույց է արել ձախից աջ երրորդ համարի տակ դրված մուրճը և նշել, որ այն ճանաչել է արտաքին տեսքից, արծաթագույն գույնից, հարվածող մասի տեղ-տեղ ժանգոտված լինելու հանգամանքից և մետաղյա իրանից: Դա այն մուրճն է, որով Կարինե Իսահակյանը 2009 թվականի օգոստոսի 7-ին կոտրել է իր տան գույքը: Նա հայհոյել և ծեծի է ենթարկել իրեն:
ՀՀ ոստիկանության Արաբկիրի քննչական բաժնի քննիչ Դ.Թովմասյանի կողմից 2009 թվականի հոկտեմբերի 24-ին կազմված տեղեկանքի համաձայն` թիվ 14130009 քրեական գործով հանցագործության գործիք հանդիսացող մուրճը տուժող Անահիտ Վարդանյանին ճանաչման ներկայացնելուց առաջ դրվել է երրորդ համարի տակ:
Իրեղեն ապացույց ճանաչելու մասին 2009 թվականի հոկտեմբերի 24-ի որոշման համաձայն` թիվ 14130009 քրեական գործով դեպքի վայրից հայտնաբերված մուրճը ճանաչվել է իրեղեն ապացույց:
Անձին ոստիկանության բաժին բերման ենթարկելու մասին 2009 թվականի օգոստոսի 7-ի արձանագրության համաձայն` 2009 թվականի օգոստոսի 7-ին` ժամը 22:20-ին, Մանվել Հաբեթի Մուդիրյանը մարմնական վնասվածք պատճառելու կասկածանքով բերման է ենթարկվել ՀՀ ոստիկանության Արաբկիրի բաժին:
Սթափության վիճակի զննության թիվ 434 արձանագրության համաձայն` 2009 թվականի օգոստոսի 7-ին` ժամը 23:30-ին, կատարված զննությամբ Մանվել Հաբեթի Մուդիրյանը գտնվել է ալկոհոլային հարբածության վիճակում:
Անձին ոստիկանության բաժին բերման ենթարկելու մասին 2009 թվականի օգոստոսի 7-ի արձանագրության համաձայն` 2009 թվականի օգոստոսի 7-ին` ժամը 22:20-ին, Կարինե Աղասու Իսահակյանը մարմնական վնասվածք պատճառելու կասկածանքով բերման է ենթարկվել ՀՀ ոստիկանության Արաբկիրի բաժին:
Սթափության վիճակի զննության թիվ 435 արձանագրության համաձայն` 2009 թվականի օգոստոսի 7-ին` ժամը 23:45-ին, կատարված զննությամբ Կարինե Աղասու Իսահակյանը գտնվել է ալկոհոլային հարբածության վիճակում:
Փորձագետի 2009 թվականի օգոստոսի 10-ի թիվ 1820 եզրակացության համաձայն` Անահիտ Վարդանյանի ստացած մարմնական վնասվածքները` ձախ բազկի շրջանի, ձախ նախաբազկի շրջանի, պարանոցի շրջանի քերծվածքների, ձախ ազդրի շրջանի արյունազեղումների ձևով, հասցվել են բութ, կոշտ առարկաներով, հնարավոր է նշված ժամկետում, որոնք առողջության թեթև վնասի հատկանիշներ չեն պարունակում:
Փորձագետի 2009 թվականի օգոստոսի 20-ի թիվ 693-ԱՊ եզրակացության համաձայն` Կարինե Իսահակյանի կողմից կոտրած ապրանքտեսակների (5 հատ թափանցիկ անգույն ապակուց հյութի բաժակ, 5 հատ հաղճապակյա սուրճի բաժակ, 1 հատ «Kingtel» (Քինգթել) տեսակի հեռախոս) ընդհանուր շուկայական գինը 2009 թվականի օգոստոսի 7-ի դրությամբ գնահատվել է 1.550 (մեկ հազար հինգ հարյուր) ՀՀ դրամ:
Տուժող ճանաչելու մասին 2009 թվականի սեպտեմբերի 23-ի որոշման համաձայն` թիվ 14130009 քրեական գործով Անահիտ Գեորգիի Վարդանյանը ճանաչվել է տուժող:
Քաղաքացիական հայցվոր ճանաչելու մասին 2009 թվականի հոկտեմբերի 2-ի որոշման համաձայն` թիվ 14130009 քրեական գործով Անահիտ Գեորգիի Վարդանյանը ճանաչվել է քաղաքացիական հայցվոր և նրա քաղաքացիական հայցի պահանջը կազմել է 52.350 ՀՀ դրամ:
Ծննդյան թիվ 320150 վկայականի պատճենի համաձայն` 1990 թվականի ապրիլի 28-ին ծնված Մերի Գագիկի Նահապետյանի մայրը Կարինե Աղասու Իսահակյանն է:
Ծննդյան թիվ 479724 վկայականի պատճենի համաձայն` 1988 թվականի հունվարի 15-ին ծնված Էդգար Գագիկի Նահապետյանի մայրը Կարինե Աղասու Իսահակյանն է:
ՀՀ ոստիկանության ինֆորմացիոն կենտրոնի պահանջագրի համաձայն` Կարինե Աղասու Իսահակյանը նախկինում դատապարտված չի եղել:
«Ազատամարտի վետերանների միսնություն» հասարակական կազմակերպության նախագահի կողմից տրված բնութագրի համաձայն` Կարինե Աղասու Իսահակյանը բնութագրվում է դրականորեն:
«Ղարս» համատիրության նախագահի կողմից 2009 թվականի դեկտեմբերի 22-ին տրված տեղեկանքի համաձայն` Կարինե Աղասու Իսահակյանը բնակվում է Երևան քաղաքի Լեփսիուսի փողոցի 17-րդ շենքի 46բ բնակարանում:
Այսպիսով, Դատարանը, գնահատելով վերոգրյալ ապացույցները, գտնում է, որ ամբաստանյալ Կարինե Իսահակյանի ցուցմունքններն այն մասին, որ իր և Անահիտի միջև ծագած վեճի ընթացքում ոչ թե ինքը, այլ Անահիտն է հայհոյաքներ տվել, ինքը որևէ իր չի կոտրել, պարզապես իր ոտքը պատահաբար դիպել է հեռախոսի լարին, ինչի պատճառով հեռախոսն ընկել է և կոտրվել, մտացածին են և չեն հաստատվում սույն գործով ձեռք բերված որևէ օբյեկտիվ տվյալով:
Ինչ վերաբերում է վկա Մանվել Մուդիրյանի ցուցմունքներին, ապա Դատարանը գտնում է, որ դրանք արժանահավատ չեն և գործի լուծման համար էական նշանակություն ունենալ չեն կարող, քանի որ հերքվում են սույն գործով ձեռք բերված օբյեկտիվ տվյալներով: Բացի այդ Մանվել Մուդիրյանը, ամբաստանյալ Կարինե Իսահակյանի հետ գտնվելով փաստական ամուսնական հարաբերությունների մեջ, շահագրգռված է քրեական գործի լուծման` ամբաստանյալի համար բարենպաստ ելքով:
Դատարանը, քննարկելով դեպքի վայրի զննության մասին 2009 թվականի օգոստոսի 8-ի արձանագրությունը և դրանից բխող փորձագետի 2009 թվականի օգոստոսի 20-ի թիվ 693-ԱՊ եզրակացությունն անթույլատրելի ապացույցներ ճանաչելու վերաբերյալ պաշտպանի միջնորդությունը, գտնում է, որ նշված ապացույցներն անթույլատրելի ճանաչելու հիմքերը բացակայում են, քանի որ դեպքի վայրի զննույթունը դեպքի հաջորդ օրը կատարելով, տվյալ քննչական գործողության կատարման կարգի որևէ էական խախտում թույլ չի տրվել, իսկ փորձագետի եզրակացությունն ինքնին անթույլատրելի ապացույց ճանաչելու հիմքեր առկա չեն:
3. Դատարանի իրավական վերլուծությունները.
Վերոգրյալ ապացույցների հիման վրա Դատարանը գալիս է այն եզրահանգման, որ Կարինե Աղասու Իսահակյանը 2009 թվականի օգոստոսի 7-ին` ժամը 21:00-ի սահմաններում, ալկոհոլ օգտագործած վիճակում, Երևան քաղաքի Շիրվանզադե փողոցի 3-րդ նրբանցքի 18-րդ շենքի երրորդ հարկում և նույն շենքի 24-րդ բնակարանում տվել է բարձրաձայն հայհոյանքներ, հարվածել նշված բնակարանի բնակիչ Անահիտ Վարդանյանին, մուրճով կոտրել նրա գույքը, ինչպես նաև էլեկտրական թեյնիկը նետել Անահիտ Վարդանյանի թոռան` Սոնա Վարդանյանի ուղղությամբ: Այսինքն` Կարինե Աղասու Իսահակյանը, հասարակության նկատմամբ բացահայտ անհարգալից վերաբերմունք դրսևորելով` դիտավորությամբ կոպիտ կերպով խախտել է հասարակական կարգը, որը զուգորդվել է բռնությամբ, ինչպես նաև ուրիշի գույքը վնասելով և ոչնչացնելով, ինչը համապատասխանում է ՀՀ քրեական օրենսգրքի 258-րդ հոդվածի 2-րդ մասի հատկանիշներին:
Ապացուցված է Կարինե Աղասու Իսահակյանի մեղավորությունը ՀՀ քրեական օրենսգրքի 258-րդ հոդվածի 2-րդ մասով նախատեսված հանցանքը կատարելու մեջ:
Կարինե Իսահակյանի պատասխանատվությունն ու պատիժը մեղմացնող հանգամանքներ են նախկինում արատավորված` դատապարտված չլինելը և դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը, քննարկելով պատասխանատվությունն ու պատիժը ծանրացնող հանգամանքների առկայության հարցը, գտնում է, որ գործում առկա է նաև ամբաստանյալի պատասխանատվությունն ու պատիժը ծանրացնող հանգամանք:
ՀՀ քրեական օրենսգրքի 63-րդ հոդվածի 1-ին մասի 14-րդ կետի համաձայն` պատասխանատվությունը և պատիժը ծանրացնող հանգամանք է` հանցանքն ալկոհոլի ազդեցության տակ կատարելը:
Դատարանը, նկատի ունենալով, որ ամբաստանյալը քրեական օրենսգրքով նախատեսված արարքը կատարելիս գտնվել է ալկոհոլային հարբածության վիճակում, գտնում է, որ պատասխանատվությունն ու պատիժը ծանրացնող հանգամանք է հանցանքն ալկոհոլի ազդեցության տակ կատարելը:
Կատարած արարքի համար ամբաստանյալ Կարինե Իսահակյանը ենթակա է քրեական պատասխանատվության և պատժի:
ՀՀ քրեական օրենսգրքի 61-րդ հոդվածի 3-րդ մասի համաձայն` հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Դատարանը, հաշվի առնելով Կարինե Իսահակյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ ՀՀ քրեական օրենսգրքի 48-րդ հոդվածով սահմանված պատժի նպատակներն ապահովելու համար առավել խիստ պատիժ նշանակելու անհրաժեշտությունը բացակայում է, գտնում է, որ նրա նկատմամբ պատիժ պետք է նշանակել տուգանքի ձևով:
Դատարանը գտնում է, որ Կարինե Իսահակյանի նկատմամբ ընտրված խափանման միջոցը` չհեռանալու մասին ստորագրությունը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2009 թվականի հոկտեմբերի 24-ի որոշմամբ իրեղեն ապացույց ճանաչված հանցագործության գործիք հանդիսացող մուրճը պետք է ոչնչացնել:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցը ենթակա է արդյոք բավարարման, ում օգտին և ինչ չափով։
Սույն քրեական գործով տուժող Անահիտ Վարդանյանը ներկայացրել է քաղաքացիական հայց` ամբաստանյալ Կարինե Իսահակյանից պահանջելով հանցագործությամբ իրեն պատճառված վնասը` 52.350 ՀՀ դրամը, սակայն գործով ձեռք բերված ապացույցներով հաստատվում է, որ Անահիտ Վարդանյանին հանցագործությամբ պատճառվել է ոչ թե 52.350 ՀՀ դրամի, այլ 1.550 ՀՀ դրամի վնաս: Ելնելով նշվածից` Դատարանը գտնում է, որ Կարինե Իսահակյանի դեմ ներկայացված Անահիտ Վարդանյանի քաղաքացիական հայցի պահանջը պետք է բավարարել մասնակի և Կարինե Իսահակյանից հօգուտ Անահիտ Վարդանյանի, որպես հանցագործությամբ պատճառված վնաս, պետք է բռնագանձել 1.550 ՀՀ դրամ:
ՀՀ քրեական դատավարության օրենսգրքի 360-րդ հոդվածի 1-ին մասի 14-րդ կետի համաձայն` դատավճիռ կայացնելիս դատարանը լուծում է այն հարցը, թե դատական ծախսերն ում վրա և ինչ չափով պետք է դրվեն։
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Կարինե Իսահակյանից դատարանի նախաձեռնությամբ ենթակա չեն բռնագանձման, քանի որ հանցագործությամբ պատճառված վնասի հատուցման համար ներկայացված քաղաքացիական հայցը վերոնշյալ հիմնավորմամբ պետք է բավարարել մասնակի: Բռնագանձման ենթակա չեն նաև վկայակոչված հոդվածի նույն մասի 2-6-րդ կետերով նախատեսված դատական ծախսերը, քանի որ 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են, ավելին` նման պահանջ Դատարան չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը
ՎՃՌԵՑ

Կարինե Աղասու Իսահակյանին մեղավոր ճանաչել ՀՀ քրեական օրենսգրքի 258-րդ հոդվածի 2-րդ մասով և պատիժ նշանակել տուգանք` նվազագույն աշխատավաձի հարյուրհիսնապատիկի չափով:
Կարինե Աղասու Իսահակյանի նկատմամբ ընտրված խափանման միջոցը` չհեռանալու մասին ստորագրությունը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2009 թվականի հոկտեմբերի 24-ի որոշմամբ իրեղեն ապացույց մուրճը ոչնչացնել:
Անահիտ Գեորգիի Վարդանյանի քաղաքացիական հայցը բավարարել մասնակի. Կարինե Աղասու Իսահակյանից հօգուտ Անահիտ Գեորգիի Վարդանյանի, որպես հանցագործությամբ պատճառված վնաս, բռնագանձել 1.550 ՀՀ դրամ:
Դատական ծախսերի հարցը համարել լուծված։
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ