ԵԱՔԴ/0159/01/09







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«28» դեկտեմբերի 2009թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրողներ Ա.Ավետիսյան
Լ.Մանուկյան
տուժողներ Ս.Մկրտումյան
Վ.Ստեփանյան
պաշտպան Ա.Ղազարյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Արսեն Պողոսի Ղարիբյանի` ծնված 1979 թվականի օգոստոսի 15-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, նախկինում հափշտակություն կատարելու համար դատապարտված, չի աշխատում, բնակվել է Երևան քաղաքի Քանաքեռի 5-րդ փողոցի 16-րդ տանը: Մեղադրանք է առաջադրվել ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով և 177-րդ հոդվածի 2-րդ մասի 3-րդ և 4-րդ կետերով, արգելանքի տակ է 2009 թվականի սեպտեմբերի 24-ից:
1. Գործի դատավարական նախապատմությունը.
2009 թվականի սեպտեմբերի 4-ին ՀՀ ոստիկանության Մալաթիայի քննչական բաժնի քննիչ Վ.Բալդրյանի որոշմամբ ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով նախատեսված հանցագործության հատկանիշներով հարուցվել և վարույթ է ընդունվել թիվ 16123809 քրեական գործը:
2009 թվականի սեպտեմբերի 7-ին ՀՀ ոստիկանության Մալաթիայի քննչական բաժնի քննիչ Վ.Բալդրյանի որոշմամբ Արսեն Պողոսի Ղարիբյանին մեղադրանք է առաջադրվել ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով:
2009 թվականի սեպտեմբերի 25-ին ՀՀ ոստիկանության Արաբկիրի քննչական բաժնի քննիչ Ա.Արամյանի որոշմամբ ՀՀ քրեական օրենսգրքի 177-րդ հոդվածի 2-րդ մասի 3-րդ և 4-րդ կետերով նախատեսված հանցագործության հատկանիշներով հարուցվել և վարույթ է ընդունվել թիվ 14130909 քրեական գործը:
2009 թվականի սեպտեմբերի 26-ին ՀՀ ոստիկանության Արաբկիրի քննչական բաժնի քննիչ Ա.Արամյանի որոշմամբ Արսեն Պողոսի Ղարիբյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 3-րդ և 4-րդ կետերով:
2009 թվականի սեպտեմբերի 26-ին ՀՀ ոստիկանության Արաբկիրի քննչական բաժնի քննիչ Ա.Արամյանի որոշմամբ թիվ 16123809 քրեական գործն ընդունվել է վարույթ, միացվել թիվ 14130909 քրեական գործին և նախաքննությունը շարունակվել թիվ 14130909 համարով:
2009 թվականի հոկտեմբերի 30-ին ՀՀ ոստիկանության Արաբկիրի քննչական բաժնի քննիչ Ա.Արամյանի որոշմամբ Արսեն Պողոսի Ղարիբյանին առաջադրված մեղադրանքը փոփոխվել, լրացվել է և նոր մեղադրանք է առաջադրվել ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով և 177-րդ հոդվածի 2-րդ մասի 3-րդ և 4-րդ կետերով:
2009 թվականի նոյեմբերի 6-ին Արսեն Պողոսի Ղարիբյանի վերաբերյալ քրեական գործը մեղադրական եզրակացությամբ ուղարկվել է Դատարան:
Արսեն Պողոսի Ղարիբյանին մեղադրանք է առաջադրվել ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով և 177-րդ հոդվածի 2-րդ մասի 3-րդ և 4-րդ կետերով` այն արարքների համար, որ նա 2004 թվականի հոկտեմբերի 15-ին Արաբկիր և Քանաքեռ-Զեյթուն համայնքների առաջին ատյանի դատարանի դատավճռով ՀՀ քրեական օրենսգրքի 177-րդ հոդվածի 2-րդ մասի 3-րդ կետով նախատեսված հանցագործություն կատարելու համար դատապարտված լինելով 2 (երկու) տարի 6 (վեց) ամիս ժամկետով ազատազրկման, դատվածությունը չմարված, կրկին անգամ կատարել է ուրիշի գույքի հափշտակություն:
Այսպես, 2009 թվականի սեպտեմբերի 4-ին` ժամը 13:00-ի սահմաններում, Երևան քաղաքի Սեբաստիա փողոցի 78 հասցեում գտնվող «Հայփոստի» թիվ 32 մասնաճուղում գաղտնի հափշտակել է Վահան Աշոտի Ստեփանյանի զգալի չափի գույքային արժեք ներկայացնող 9.000 ՀՀ դրամ արժողության «Սամսունգ» մոդելի բջջային հեռախոսը, սակայն բռնվել է վերջինի կողմից և իրենից անկախ հանգամանքներում չի կարողացել հանցագործություն ավարտին հասցնել:
Բացի այդ, 2009 թվականի սեպտեմբերի 24-ին, կրկին անգամ ուրիշի գույքի գաղտնի հափշակություն կատարելու դիտավորությամբ, ապօրինի մուտք է գործել Սամվել Լազարի Մկրտումյանին պատկանող Երևան քաղաքի Բակունցի փողոցի 4-րդ շենքի բակում գտնվող ցանկապատված տարածք և հափշտակել հեծանիվի դողերի համար նախատեսված երկու օդախուցեր, ներդրովի փականի կոմպլեկտավորող հինգ դետալներ, հինգ բանալիներ, ամրալարի կցաշուրթ, ջրի հոսքի կարգավորչ փական, երկու գայլիկոնիչներ, խորովածի ինը շշեր, խորովածի դաշտային սարքերի կոմպլեկտ, սպիտակ գույնի պոլիէթիլենային դույլ` Սամվել Մկրտումյանին պատճառելով զգալի չափի հասնող 12.800 ՀՀ դրամի գույքային վնաս:
2. Արագացված դատական քննություն.
Մինչ դատաքննությունն սկսելն ամբաստանյալ Արսեն Պողոսի Ղարիբյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արսեն Պողոսի Ղարիբյանը կատարել է արարքներ` նախատեսված ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով և 177-րդ հոդվածի 2-րդ մասի 3-րդ և 4-րդ կետերով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ՀՀ ոստիկանության ինֆորմացիոն կենտրոնի պահանջագիրը, բնութագիրը, Երևանի թիվ 5 բժշկասոցիալական փորձաքննական հանձնաժողովի նախագահի գրությունը, եկավ հետևյալ եզրահանգման.
Արսեն Ղարիբյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Արսեն Ղարիբյանի պատասխանատվությունը և պատիժը մեղմացնող հանգամանք է դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Ինչ վերաբերում է ամբաստանյալի այն հայտարարությանը, որ ինքը երկրորդ խմբի հաշմանդամ է, ապա Դատարանը այդ կապակցությամբ հարցում է կատարել Երևանի թիվ 5 բժշկասոցիալական փորձաքննական հանձնաժողովի նախագահին և ստացել պատասխան գրություն` համաձայն որի Արսեն Պողոսի Ղարիբյանը Երևանի թիվ 5 բժշկասոցիալական փորձաքննական հանձնաժողովի կողմից չի փորձաքննվել և հաշմանդամության խումբ չի սահմանվել: Հետևաբար Դատարանը գտնում է, որ հաստատված չէ այն հանգամանքը, որ Արսեն Պողոսի Ղարիբյանը երկրորդ խմբի հաշմանդամ է:
Դատարանը միաժամանակ արձանագրում է, որ Արսեն Ղարիբյանի պատասխանատվությունն ու պատիժը ծանրացնող հանգամանքներ չկան:
Կատարած արարքների համար ամբաստանյալ Արսեն Ղարիբյանը ենթակա է քրեական պատասխանատվության և պատժի:
Դատարանը, հաշվի առնելով ամբաստանյալ Արսեն Ղարիբյանի կատարած հանցանքների` հանրության համար վտանգավորության աստիճանը և բնույթը, այդ թվում նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Արսեն Ղարիբյանի կողմից կատարված արարքների համար ՀՀ քրեական օրենսգրքի 177-րդ հոդվածի 2-րդ մասի սանկցիայով նախատեսված է պատիժ ազատազրկման ձևով, գտնում է, որ նրա նկատմամբ ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով և 177-րդ հոդվածի 2-րդ մասի 3-րդ և 4-րդ կետերով կատարած արարքների համար պատիժներ պետք է նշանակել ազատազրկման ձևով: Ընդ որում, Արսեն Ղարիբյանի նկատմամբ վերջնական պատիժ պետք է նշանակել ՀՀ քրեական օրենսգրքի 66-րդ հոդվածով սահմանված` պատիժները մասնակի գումարելու կանոնի կիրառմամբ:
Դատարանը միաժամանակ հարկ է համարում անդրադառնալ ամբաստանյալ Արսեն Ղարիբյանի կողմից ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով կատարված արարքի պատժի չափի հարցին: Ամբաստանյալին մեղսագրվող հանցանքի համար ՀՀ քրեական օրենսգրքի 177-րդ հոդվածի 2-րդ մասի սանկցիայով նախատեսված է պատիժ ազատազրկում` երկուսից վեց տարի ժամկետով: ՀՀ քրեական օրենսգրքի 65-րդ հոդվածի 3-րդ մասի համաձայն` հանցափորձի համար ազատազրկման ձևով պատժի ժամկետը չի կարող գերազանցել ՀՀ քրեական օրենսգրքի հատուկ մասի համապատասխան հոդվածի մասով որոշակի ժամկետով ազատազրկման ձևով նախատեսված պատժի առավելագույն ժամկետի երեք քառորդը: Այսինքն, ՀՀ քրեական օրենսգրքի ուժով տվյալ հանցագործության համար նախատեսված պատժի առավելագույն ժամկետը չորս տարի վեց ամիս ժամկետով ազատազրկումն է: ՀՀ քրեական դատավարության օրենսգրքի 3753-րդ հադվածի 6-րդ մասի համաձայն` դատարանը արագացված կարգով դատական քննության արդյունքում մեղադրական դատավճիռ կայացնելիս նշանակում է պատիժ, որը չի կարող գերազանցել կատարված հանցագործության համար նախատեսված առավել խիստ պատժի երկու երրորդը, իսկ եթե առավել խիստ պատժի երկու երրորդը փոքր է տվյալ հանցագործության համար նախատեսված առավել մեղմ պատժից, ապա առավել մեղմ պատիժը: Քանի որ տվյալ չավարտված հանցագործության համար նախատեսված պատժի առավելագույն ժամկետը ՀՀ քրեական օրենսգրքի ուժով չորս տարի վեց ամիս ժամկետով ազատազրկումն է, հետևաբար արագացված կարգ կիրառելու պայմաններում՝ ամբաստանյալի նկատմամբ նշանակվող պատիժը չի կարող գերազանցել երեք տարի ժամկետով ազատազրկումը: Դատարանի նման եզրահանգումը պայմանավորված է նրանով, որ ոչ քրեական, ոչ քրեադատավարական օրենսդրությամբ արգելված կամ սահմանափակված չէ վկայակոչված քրեաիրավական և քրեադատավարական նորմերի միաժամանակյա կիրառությանը, ավելին` դրանց միջև չկա որևէ հակասություն: Այսինքն, երկու ինստիտուտներն էլ տվյալ իրավահարաբերությունում կիրառելի են: Հակառակ մեկնաբանության պարագայում չավարտված հանցագործություններով վկայակոչված ինստիտուտներից մեկը պետք է չգործի, ինչը չի բխում նաև ամբաստանյալի շահերից:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Արսեն Ղարիբյանի պատժի կրման սկիզբը պետք է հաշվել 2009 թվականի սեպտեմբերի 24-ից, քանի որ նա փաստացի արգելանքի է վերցվել այդ օրը, որից հետո` 2009 թվականի սեպտեմբերի 25-ին, կազմվել է ձերբակալման արձանագրություն, իսկ 2009 թվականի սեպտեմբերի 26-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Արսեն Ղարիբյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2009 թվականի սեպտեմբերի 25-ի որոշմամբ իրեղեն ապացույց ճանաչված և տուժող Սամվել Մկրտումյանին ի պահ հանձնված հեծանիվի դողերի համար նախատեսված երկու օդախուցերը, ներդրովի փականը կոմպլեկտավորող հինգ դետալները, հինգ բանալիները, ամրալարի կցաշուրթը, ջրի հոսքի կարգավորիչ փականը, երկու գայլիկոնիչները, խորովածի ինը շշերը, խորովածի դաշտային սարքերի կոմպլեկտը, սպիտակ պլաստմասե դույլը պետք է վերադարձնել Սամվել Մկրտումյանին` տվյալ դեպքում թողնել նրա տնօրինությանը, իսկ 2009 թվականի հոկտեմբերի 31-ի որոշմամբ իրեղեն ապացույց ճանաչված և տուժող Վահան Ստեփանյանին ի պահ հանձնված «Սամսունգ» մոդելի բջջային հեռախոսը պետք է վերադարձնել Վահան Ստեփանյանին` տվյալ դեպքում թողնել նրա տնօրինությանը:
Դատարանը գտնում է, որ դատական ծախսերն ամբաստանյալ Արսեն Ղարիբյանից ենթակա չեն բռնագանձման, քանի որ տուժող Սամվել Մկրտումյանը դատական նիստի ժամանակ հայտարարել է, որ ամբաստանյալից որևէ պահանջ չունի, ավելին` տուժողներ Սամվել Մկրտումյանին և Վահան Ստեփանյանին պատկանող և իրեղեն ապացույց ճանաչված ապրանքները վերոգրյալ հիմնավորմամբ պետք է վերադարձվեն նրանց: Իսկ ՀՀ քրեական դատավարության օրենսգրքի 168-րդ հոդվածի առաջին մաuի 2-8-րդ կետերով նախատեuված դատական ծախuերն արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի` ամբաuտանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը
ՎՃՌԵՑ

Արսեն Պողոսի Ղարիբյանին մեղավոր ճանաչել ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով և 177-րդ հոդվածի 2-րդ մասի 3-րդ և 4-րդ կետերով։
ՀՀ քրեական օրենսգրքի 34-177-րդ հոդվածի 2-րդ մասի 4-րդ կետով Արսեն Պողոսի Ղարիբյանի նկատմամբ պատիժ նշանակել ազատազրկում` 2 (երկու) տարի ժամկետով։
ՀՀ քրեական օրենսգրքի 177-րդ հոդվածի 2-րդ մասի 3-րդ և 4-րդ կետերով Արսեն Պողոսի Ղարիբյանի նկատմամբ պատիժ նշանակել ազատազրկում` 2 (երկու) տարի 6 (վեց) ամիս ժամկետով։
ՀՀ քրեական օրենսգրքի 66-րդ հոդվածով սահմանված կարգով` պատիժները մասնակիորեն գումարելու միջոցով Արսեն Պողոսի Ղարիբյանի նկատմամբ վերջնական պատիժ նշանակել ազատազրկում` 3 (երեք) տարի ժամկետով պատժի կրման սկիզբը հաշվելով 2009 թվականի սեպտեմբերի 24-ից:
Արսեն Պողոսի Ղարիբյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո` 2009 թվականի սեպտեմբերի 25-ի որոշմամբ իրեղեն ապացույց ճանաչված և տուժող Սամվել Մկրտումյանին ի պահ հանձնված հեծանիվի դողերի համար նախատեսված երկու օդախուցերը, ներդրովի փականը կոմպլեկտավորող հինգ դետալները, հինգ բանալիները, ամրալարի կցաշուրթը, ջրի հոսքի կարգավորիչ փականը, երկու գայլիկոնիչները, խորովածի ինը շշերը, խորովածի դաշտային սարքերի կոմպլեկտը, սպիտակ պլաստմասե դույլը թողնել Սամվել Մկրտումյանի տնօրինությանը, իսկ 2009 թվականի հոկտեմբերի 31-ի որոշմամբ իրեղեն ապացույց ճանաչված և տուժող Վահան Ստեփանյանին ի պահ հանձնված «Սամսունգ» մոդելի բջջային հեռախոսը թողնել Վահան Ստեփանյանի տնօրինությանը:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ