գործ No ԵԱՔԴ 0158/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Գ. Հովհաննիսյանի
ամբաստանյալ` Գ. Մանուկյանի

2009թ. դեկտեմբերի 15-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Գոռ Հարությունի Մանուկյանի, ծնված 28.11.1988թ. Երևան քաղաքում, ազգությամբ հայ, ՀՀ քաղաքացի, ութամյա կրթությամբ, ֆիզիկապես առողջ, ամուրի, խնամքին ոչ ոք, նախկինում չդատված, չի աշխատում, հաշվառված և բնակվում է Երևան քաղաքի Սունդուկյան փողոցի 90 շենքի թիվ 27 բնակարանում:
Մեղադրվում է ՀՀ քրեական օրենսգրքի 268 հոդվածի 1-ին մասով:

Պ Ա Ր Զ Ե Ց

1.Գործի դատավարական նախապատմությունը.
2009թ. սեպտեմբերի 07-ին ՀՀ ոստիկանության Երևան քաղաքի Արաբկիրի քննչական բաժնում ՀՀ քրեական օրենսգրքի 268 հոդվածի 1-ին մասի հատկանիշներով հարուցվել է թիվ 14128609 քրեական գործը:
2009թ. հոկտեմբերի 22-ին Գոռ Հարությունի Մանուկյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 1-ին մասով և նրա նկատմամբ որպես խափանման միջոց ընտրվել է ստորագրություն չհեռանալու մասին:
2009թ. նոյեմբերի 09-ին թիվ 14128609 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան:
2009թ. նոյեմբերի 09-ին քրեական գործը վարույթ է ընդունվել և նշանակվել դատաքննության 2009թ. դեկտեմբերի 08-ին:
2.Գործի փաստական հանգամանքները.
Նախաքննության մարմինն ամբաստանյալ Գոռ Հարությունի Մանուկյանին մեղադրանք է առաջադրել հետևյալ արարքի համար.
Գոռ Մանուկյանը 2009թ. օգոստոս ամսին առանց իրացնելու նպատակի Երևան քաղաքի Փափազյան փողոցի թիվ 11/3 շենքի դիմաց գտնվող հողատարածքից` անձնական օգտագործման նպատակով, քաղելու միջոցով ձեռք է բերել, պահել և փոխադրել զգալի չափ հանդիսացող` 0,62 գրամ ընդհանուր քաշով ՙՄարիխուանա՚ տեսակի թմրամիջոց, որը 2009թ. օգոստոսի 20-ին հայտնաբերվել և առգրավվել է Արաբկիրի ոստիկանության աշխատակիցների կողմից:
3.Ապացույցների հետազոտում.
Առաջադրված մեղադրանքում ամբաստանյալ Գոռ Մանուկյանն իրեն մեղավոր է ճանաչել լիովին և տվել ցուցմունքներ այն մասին, որ 2009թ. օգոստոս ամսվա սկզբներին Երևան քաղաքի Փափազյան փողոցի թիվ 11/3 շենքի դիմացի հատվածից քաղել է կանեփի կանաչավուն թուփ հետագայում օգտագործելու համար, որից հետո կանաչավուն թուփը` փաթաթելով թղթի մեջ, իր հետ տեղափոխել իրենց տուն: Որոշ ժամանակ տանը պահելուց հետո, 2009թ. օգոստոսի 20-ին արդեն չորացված կանեփի թուփը վերցրել է իր հետ` ծխելու միջոցով օգտագործելու համար: Այդ օրն ինքը Երևան քաղաքի Ա.Սերոբի փողոցում հանդիպել է իր ընկերներ Հարություն Ղարիբյանին, Հայկ Ղարագյոզյանին և Արթուր Նալբանդյանին: Բոլորը միասին նստել են Արթուրին պատկանող ՙՌենո-Լագունա՚ մակնիշի ավտոմեքենա: Այդ ժամանակ ինքն ընկերներին պատմել է, որ իր մոտ կանեփի թուփ կա, իսկ ընկերները ցանկություն են հայտնել այն օգտագործելու, սակայն այդ պահին իրենց են մոտեցել ոստիկանության աշխատակիցները և պահանջել դուրս գալ մեքենայից: Երբ բոլորը դուրս են եկել մեքենայից, ինքն իր մոտ գտնվող, թղթի մեջ փաթաթված կանեփը գցել է մեքենայի մեջ, որը ոստիկանության աշխատակիցների կողմից մեքենան զննելուց հետո հայտնաբերվել և առգրավվել է, իսկ իրենց տարել են ոստիկանության Արաբկիրի բաժին:
Վկա Հայկ Մեսրոպի Ղարագյոզյանի ցուցմունքով այն մասին, որ 2009թ. օգոստոսի 20-ին, ժամը 22-ի սահմաններում Ա.Սերոբի փողոցում հանդիպել է իր ընկեր Գոռ Մանուկյանին և իրենք նստել են իրենց մոտեցած, իրենց ընկեր Արթուրի ավտոմեքենան: Այդ ժամանակ Գոռն ասել է, որ իր մոտ կանեփ կա, իսկ իրենք ցանկություն են հայտնել այն ծխելու միջոցով օգտագործելու, սակայն այդ պահին իրենց մոտեցած ոստիկանության աշխատակիցները պահանջել են դուրս գալ ավտոմեքենայից: Ավտոմեքենայի սրահի զննությամբ ոստիկանության աշխատակիցները հայտնաբերել են Գոռի կողմից մեքենայի մեջ գցված, թղթի մեջ փաթաթված կանեփի զանգվածը: Այնուհետև իրենց տարել են ոստիկանության Արաբկիրի բաժին:
Վկա Արթուր Միհրանի Նալբանդյանի ցուցմունքով այն մասին, որ 2009թ. օգոստոսի 20-ին, ժամը 22-ի սահմաններում իր` ՙՌենո-Լագունա՚ մակնիշի ավտոմեքենայով հանդիպել է իր ընկերներ Հայկին, Գոռին և Հարութին, որոնք նստել են իր մեքենան, այդ ժամանակ Գոռն ասել է, որ իր մոտ կանեփի թուփ կա, որը հավաքել է իրենց բակից: Ինքը ցանկություն է հայտնել այն օգտագործելու, սակայն այդ պահին իրենց մոտեցած ոստիկանության աշխատակիցները պահանջել են դուրս գալ մեքենայից: Այդ ժամանակ Գոռն իր մոտ գտնվող, թղթի մեջ փաթաթված կանեփը գցել է իր մեքենայի մեջ, որը հայտնաբերել և առգրավվել է ոստիկանության աշխատակիցների կողմից: Այնուհետև իրենց տարել են ոստիկանության Արաբկիրի բաժին:
Վկա Հարություն Լևոնի Ղարիբյանի ցուցմունքով այն մասին, որ 2009թ. օգոստոսի 20-ին Ա.Սերոբի փողոցում հանդիպել է Գոռ Մանուկյանին և իր ընկեր Հայկին: Այդ ժամանակ ավտոմեքենայով իրենց է մոտեցել Արթուրը և իրենք նստել են Արթուրի մեքենան: Այնուհետև Գոռն իրենց ասել է, որ իր մոտ կանեփ կա, որը հավաքել է Երևան քաղաքի Փափազյան փողոցի թիվ 11/3 շենքի բակից: Իրենք հետաքրքրությունից ելնելով ցանկություն են հայտնել այն օգտագործելու, սակայն իրենց մոտեցած ոստիկանության աշխատակիցները պահանջել են դուրս գալ ավտոմեքենայից: Իրենք դուրս են եկել ավտոմեքենայից, իսկ Գոռն իր մոտ գտնվող, թղթի մեջ փաթաթված կանեփը գցել է ավտոմեքենայի մեջ, որը հայտնաբերվել և առգրավվել է ոստիկանության աշխատակիցների կողմից: Այնուհետև իրենց տարել են ոստիկանության Արաբկիրի բաժին:
Արթուր Նալբանդյանի կողմից վարվող ՙՌենո-Լագունա՚ մակնիշի ավտոմեքենայի զննության ենթարկելու արձանագրությամբ այն մասին, որ մեքենայի սրահից հայտնաբերվել և առգրավվել է սպիտակ թղթի մեջ փաթաթված կանեփանման կանաչավուն զանգված, որը փաթեթավորվել և վերցվել է հետագա ստուգումների համար:
Դատաքիմիական փորձաքննության 02.09.2009թ. թիվ 362 Ք եզրակացությամբ, համաձայն որի ներկայացված 0,74 գրամ հաստատուն չոր քաշով նյութը հանդիսանում է 0,62 գրամ քաշով չորացված մարիխուանա տեսակի թմրամիջոցի և 0,12 գրամ քաշով թութունի մասնիկների խառնուրդ:
Դատաքիմիական փորձաքննության 19.10.2009թ. թիվ 447 Ք եզրակացությամբ, համաձայն որի քննչական փորձարարությամբ առգրավված 24,4 գրամ ընդհանուր քաշով բույսերը հանդիսանում են կանեփի թուփ, որոնք պարունակում են թմրաալկալոիդ` տետրահիդրոկանաբինոլ, ուստի հանդիսանում են թմրամիջոց պատրաստելու համար /մարիխուանա, հաշիշ, հաշիշի յուղ/:
Քննչական փորձարարություն կատարելու արձանագրությամբ, համաձայն որի Գոռ Մանուկյանը մատնացույց է արել Երևան քաղաքի Փափազյան փողոցի թիվ 11/3 շենքի դիմացի հատվածում գտնվող կանաչապատ հողատարածքը և հայտարարել, որ նշված տարածքից է քաղել կանեփի թուփը, որը հետագայում չորացրել և պահել է իր մոտ: Գոռ Մանուկյանի մատնացույց արած վայրից` Երևան քաղաքի Փափազյան փողոցի թիվ 11/3 շենքի դիմացի հատվածում գտնվող հողատարածքի զննությամբ հայտնաբերվել և առգրավվել է կանեփանման թուփ, որը փաթեթավորվել, կնիքվել և վերցվել է` դատաքիմիական փորձաքննությու նշանակելու նպատակով:
Իրեղեն ապացույց ճանաչված` Գոռ Մանուկյանի կողմից Արթուր Նալբանդյանի ավտոմեքենայի սրահում գցված, ոստիկանության աշխատակիցների կողմից առգրավված 0,62 գրամ քաշով չորացված մարիխուանա տեսակի թմրամիջոցի առկայությամբ:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գոռ Հարությունի Մանուկյանին առաջադրված մեղադրանքը ՀՀ քրեական օրենսգրքի 268 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 268 հոդվածի 1-ին մասի հատկանիշներին և արարքի որակումը ճիշտ է:
Գոռ Հարությունի Մանուկյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար:
Ամբաստանյալի պատասխանատվությունը և պատիժը ծանրացնող հանգամանքներ չկան:
Դատարանն անդրադառնալով իրեղեն ապացույցների տնօրինման հարցին, գտնում է, որ գործով իրեղեն ապացույց ճանաչված` 0,62 գրամ քաշով չորացված մարիխուանա տեսակի թմրամիջոցը պետք է ոչնչացնել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Գոռ Հարությունի Մանուկյանին մեղավոր ճանաչել ՀՀ քրեական օրենսգրքի 268 հոդվածի 1-ին մասով և նրան դատապարտել կալանքի երկու (2) ամիս ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատիժը կրելու սկիզբը հաշվել դատավճռի կատարման օրվանից:
Գոռ Հարությունի Մանուկյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված` 0,62 գրամ քաշով չորացված մարիխուանա տեսակի թմրամիջոցը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ