ԵԱՔԴ/0152/01/09





ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՎԱՐՉԱԿԱՆ ՇՐՋԱՆՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«17» նոյեմբերի 2009թ. ք.Երևան

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Հ.Սարգսյան
տուժող Մ.Քեյան
պաշտպան Մ.Սարգսյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Եփրեմ Ալեքսանդրի Լաչինյանի` ծնված 1989 թվականի հունիսի 8-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում դատապարտված, հաշվառված է Երևան քաղաքի Կոմիտասի պողոտայի 36գ շենքի 63-րդ բնակարանում: Մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով, արգելանքի տակ է 2009 թվականի փետրվարի 25-ից:
1. Գործի դատավարական նախապատմությունը.
2008 թվականի դեկտեմբերի 23-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ ՀՀ քրեական օրենսգրքի 112-րդ հոդվածի 1-ին մասով և 113-րդ հոդվածի 1-ին մասով նախատեսված հանցագործությունների հատկանիշներով հարուցվել և վարույթ է ընդունվել թիվ 14803008 քրեական գործը:
2008 թվականի դեկտեմբերի 23-ին ՀՀ ոստիկանության Արաբկիրի քննչական բաժնի պետ Վ.Վարդանյանի որոշմամբ թիվ 14803008 քրեական գործի նախաքննության կատարումը հանձնարարվել է քննչական խմբին, որի կազմում ընդգրկվել են ՀՀ ոստիկանության Արաբկիրի քննչական բաժնի քննիչներ Հ.Անանյանը, Մ.Դուրյանը և Վ.Մկրտչյանը, քննչական խմբի ղեկավար է նշանակվել Հ.Անանյանը:
2008 թվականի դեկտեմբերի 27-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ Եփրեմ Ալեքսանդրի Լաչինյանին մեղադրանք է առաջադրվել ՀՀ քրեական օրենսգրքի 112-րդ հոդվածի 2-րդ մասի 9-րդ կետով և 113-րդ հոդվածի 2-րդ մասի 6-րդ կետով:
2009 թվականի մարտի 1-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ Ռոբերտ Կարենի Ավետիսյանին մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով:
2009 թվականի մայիսի 25-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ Հ.Հարությունյանի, Հ.Հովհաննիսյանի, Հ.Մինասյանի և Ն.Խոսրոֆյանի նկատմամբ քրեական հետապնդում չի իրականացվել նրանց արարքներում հանցակազմի բացակայության հիմքով:
2009 թվականի մայիսի 25-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ Եփրեմ Ալեքսանդրի Լաչինյանին առաջադրված մեղադրանքը փոփոխվել է և նոր մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և 258-րդ հոդվածի 4-րդ մասով:
2009 թվականի մայիսի 25-ին ՀՀ ոստիկանության Արաբկիրի քննչական բաժնի քննիչ Հ.Անանյանի որոշմամբ Ռոբերտ Կարենի Ավետիսյանին առաջադրված մեղադրանքը փոփոխվել է և նոր մեղադրանք է առաջադրվել ՀՀ քրեական օրենսգրքի 258-րդ հոդվածի 4-րդ մասով:
2009 թվականի հունիսի 1-ին Երևան քաղաքի Արաբկիր և Քանաքեռ-Զեյթուն համայնքների դատախազության ավագ դատախազ Ա.Ավետիսյանի որոշմամբ մեղադրական եզարակացությունը չի հաստատվել, Հ.Հարությունյանի, Հ.Հովհաննիսյանի, Հ.Մինասյանի և Ն.Խոսրոֆյանի նկատմամբ քրեական հետապնդում չիրականացնելու, ինչպես նաև Եփրեմ Լաչինյանին և Ռոբերտ Ավետիսյանին առաջադրված մեղադրանքնները փոփոխելու և նրանց նոր մեղադրանք առաջադրելու մասին ՀՀ ոստիկանության Արաբկիրի քննչական բաժնի քննիչ Հ.Անանյանի 2009 թվականի մայիսի 25-ի որոշումները վերացվել են և լրացուցիչ քննություն կատարելու համար գործը վերադարձվել է քննիչին:
2009 թվականի հունիսի 29-ին ՀՀ Ազգային անվտանգության ծառայության քննչական վարչության ավագ քննիչ Մ.Համբարձումյանի որոշմամբ թիվ 14803008 քրեական գործն ընդունվել է վարույթ:
2009 թվականի հուլիսի 2-ին ՀՀ Ազգային անվտանգության ծառայության քննչական վարչության պետ Վ.Սարգսյանի որոշմամբ թիվ 14803008 քրեական գործի նախաքննության կատարումը հանձնարարվել է քննչական խմբին, որի կազմում ընդգրկվել են ՀՀ Ազգային անվտանգության ծառայության քննչական վարչության ավագ քննիչ Մ.Համբարձումյանը և քննիչ Կ.Հովհաննիսյանը, քննչական խմբի ղեկավար է նշանակվել Մ.Համբարձումյանը:
2009 թվականի հունիսի 29-ին ՀՀ Ազգային անվտանգության ծառայության քննչական վարչության ավագ քննիչ Մ.Համբարձումյանի որոշմամբ Հովհաննես Հովհաննիսյանի, Նարեկ Խոսրոֆյանի, Հակոբ Մինասյանի, Հրանտ Հարությունյանի, Արտյոմ Խաչատրյանի, Արթուր Խաչատրյանի և Մուշեղ Քեյանի նկատմամբ քրեական գործի մասը` խուլիգանության հանցակազմի հատկանիշներով, կարճվել է և քրեական հետապնդում չի իրականացվել ապացույցների անբավարարության հիմքով, իսկ Արտյոմ և Արթուր Խաչատրյանների վերաբերյալ քրեական գործի` Ռոբերտ Ավետիսյանի առողջությանը դիտավորությամբ թեթև վնաս պատճառելու և նրան ծեծի ենթարկելու մասը, կարճվել է տուժողի բողոքի բացակայության հիմքով:
2009 թվականի հոկտեմբերի 20-ին ՀՀ Ազգային անվտանգության ծառայության քննչական վարչության ավագ քննիչ Մ.Համբարձումյանի որոշմամբ Ռոբերտ Կարենի Ավետիսյանին առաջադրված մեղադրանքը փոփոխվել է և նոր մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով:
2009 թվականի հոկտեմբերի 20-ին ՀՀ Ազգային անվտանգության ծառայության քննչական վարչության ավագ քննիչ Մ.Համբարձումյանի որոշմամբ Եփրեմ Ալեքսանդրի Լաչինյանին առաջադրված մեղադրանքը փոփոխվել է և նոր մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով:
2009 թվականի հոկտեմբերի 20-ին ՀՀ Ազգային անվտանգության ծառայության քննչական վարչության ավագ քննիչ Մ.Համբարձումյանի որոշմամբ Ռոբերտ Կարենի Ավետիսյանի վերաբերյալ քրեական գործի մասը կարճվել է և նրա նկատմամբ քրեական հետապնդումը դադարեցվել է տուժողի բողոքի բացակայության հիմքով:
2009 թվականի հոկտեմբերի 26-ին Եփրեմ Ալեքսանդրի Լաչինյանի վերաբերյալ քրեական գործը մեղադրական եզրակացությամբ ուղարկվել է Դատարան:
Եփրեմ Ալեքսանդրի Լաչինյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով այն արարքի համար, որ նա 2008 թվականի դեկտեմբերի 23-ին` ժամը 18:30-ի սահմաններում, Երևան քաղաքի Կոմիտասի պողոտա 45 հասցեում գտնվող բազմաբնակարան շենքի բակում իր ընկերների` Ռոբերտ Կարենի Ավետիսյանի, Հովհաննես Սերոբի Հովհաննիսյանի, Նարեկ Արմենի Խոսրոֆյանի, Հակոբ Եղիշեի Մինասյանի, Հրանտ Մարտունի Հարությունյանին հետ միասին անձնական փոխհարաբերությունների շուրջ ծագած տարաձայնությունների պարզաբանման նպատակով հանդիպել են Մուշեղ Սարգսի Քեյանի, Արթուր և Արտյում Աշոտի Խաչատրյանների հետ, որն ինքնաբուխ վերածվել է վիճաբանության, կռվի և ծեծկռտուքի: Այդ ընթացքում նա մարմնական վնասվածքներ հասցնելու նպատակով սուր, կտրող-ծակող առարկայով հարվածել է Մուշեղ Քեյանին` դիտավորությամբ պատճառելով կյանքին վտանգ սպառնացող առողջության ծանր վնաս, որն արտահայտվել է վերջինի ձախ ազդրի, կրծքավանդակի հետին մակերեսի` չթափանցող, որովայնի ձախ կեսի թափանցող կտրած-ծակած վերքերի ձևով, իսկ Ռոբերտ Ավետիսյանը նույն վիճաբանության ընթացքում սուր, կտրող-ծակող առարկայով հարվածել է Արթուր Խաչատրյանին և դիտավորությամբ պատճառել առողջությանը միջին ծանրության վնաս, որն արտահայտվել է վերջինի կրծքավանդակի ձախ կեսի շրջանի ծակած-կտրած, չթափանցող վերքի ձևով:
2. Արագացված դատական քննություն.
Մինչ դատաքննությունն սկսելն ամբաստանյալ Եփրեմ Ալեքսանդրի Լաչինյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Եփրեմ Ալեքսանդրի Լաչինյանը կատարել է արարք` նախատեսված ՀՀ քրեական օրենսգրքի 112-րդ հոդվածի 1-ին մասով:

3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնակամ ներկայանալու արձանագրությունը, ինքնախոստովանական ցուցմունքները, բնութագիրը և ՀՀ ոստիկանության ինֆորմացիոն կենտրոնի պահանջագիրը, եկավ հետևյալ եզրահանգման.
Եփրեմ Լաչինյանի անձը դրականորեն բնութագրող հանգամանքներ են` ինքնակամ ներկայանալը և ինքնախոստովանական ցուցմունքներ տալը:
Եփրեմ Լաչինյանի պատասխանատվությունն ու պատիժը մեղմացնող հանգամանք է դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ- 124/07 որոշմամբ):
Եփրեմ Լաչինյանի պատասխանատվությունն ու պատիժը ծանրացնող հանգամանք է հանցանքները կատարելու ռեցիդիվը, քանի որ նա 2006 թվականի նոյեմբերի 7-ին Երևան քաղաքի Արաբկիր և Քանաքեռ-Զեյթուն համայնքնների առաջին ատյանի դատարանի դատավճռով դատապարտվել է ՀՀ քրեական օրենսգրքի 112-րդ հոդվածի 1-ին մասով նախատեսված դիտավորյալ հանցագործություն կատարելու համար, որի դատվածությունը մարված չէ:
Կատարած արարքի համար ամբաստանյալ Եփրեմ Լաչինյանը ենթակա է քրեական պատասխանատվության և պատժի:
Դատարանը, հաշվի առնելով Եփրեմ Լաչինյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող և ծանրացնող հանգամանքները, ինչպես նաև այն, որ Եփրեմ Լաչինյանի կողմից կատարած արարքի համար ՀՀ քրեական օրենսգրքի համապատասխան հոդվածի սանկցիայով նախատեսված է պատիժ ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Քանի որ Եփրեմ Լաչինյանը, գտնվելով հետախուզման մեջ, 2009 թվականի փետրվարի 25-ին ինքնակամ ներկայացել է և արգելանքի վերցվել, հետևաբար Եփրեմ Լաչինյանի պատժի կրման սկիզբը պետք է հաշվել 2009 թվականի փետրվարի 25-ից:
Դատարանը գտնում է, որ Եփրեմ Լաչինյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցն ենթակա է արդյոք բավարարման, ում օգտին և ինչ չափով։
2009 թվականի փետրվարի 21-ի որոշմամբ տուժող Մուշեղ Քեյանը ճանաչվել է քաղաքացիական հայցվոր: ՀՀ քրեական դատավարության օրենսգրքի 161-րդ հոդվածի 2-րդ մասի համաձայն` քաղաքացիական հայցից հրաժարվելն ընդունելը հանգեցնում է քրեական դատավարությունում քաղաքացիական հայցով վարույթի կարճման: Սույն գործով քաղաքացիական հայցվոր Մուշեղ Քեյանը դատական նիստի ժամանակ հրաժարվել է իր կողմից հարուցած քաղաքացիական հայցից, ուստի Դատարանը գտնում է, որ քաղաքացիական հայցից հրաժարումը պետք է ընդունել և Մուշեղ Քեյանի կողմից հարուցած քաղաքացիական հայցի վարույթը կարճել:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո, 2009 թվականի մայիսի 21-ի որոշմամբ իրեղեն ապացույց ճանաչված Արթուր Խաչատրյանին և Մուշեղ Քեյանին պատկանող հագուստները պետք է համապատասխանաբար վերադարձնել Արթուր Խաչատրյանին և Մուշեղ Քեյանին:
ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալ Եփրեմ Լաչինյանից ենթակա չեն բռնագանձման, քանի որ հանցագործությամբ պատճառված վնասի հատուցման համար հարուցված քաղաքացիական հայցի վարույթը վերը նշված հիմնավորմամբ պետք է կարճել (ավելին, գործի դատական քննության ընթացքում սույն քրեական գործով տուժող Մուշեղ Քեյանը հայտնեց, որ Եփրեմ Լաչինյանից որևէ պահանջ չունի): Ինչ վերաբերում է նույն մասի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 138-րդ, 168-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը

ՎՃՌԵՑ

Եփրեմ Ալեքսանդրի Լաչինյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով և պատիժ նշանակել ազատազրկում` 4 (չորս) տարի ժամկետով` պատժի կրման սկիզբը հաշվելով 2009 թվականի փետվարի 25-ից:
Եփրեմ Ալեքսանդրի Լաչինյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2009 թվականի մայիսի 21-ի որոշմամբ իրեղեն ապացույց ճանաչված Արթուր Խաչատրյանին և Մուշեղ Քեյանին պատկանող հագուստները վերադարձնել համապատասխանաբար նրանց:
Մուշեղ Քեյանի քաղաքացիական հայցի վարույթը կարճել:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ