գործ No ԵԱՔԴ 0138/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ն.Ղազարյանի
մասնակցությամբ`
մեղադրող` Ա. Աղայանի
ամբաստանյալ` Գ. Թադևոսյանի
պաշտպան` Վ. Նիկողոսյանի
տուժողներ` Վ.Բաբայանի, Հ.Տոնոյանի, Հ.Մինասյանի

2010թ. ապրիլի 15-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Գոռ Սամվելի Թադևոսյանի, ծնված 06.11.1981թ. Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, գտնվում է փաստական ամուսնական հարաբերությունների մեջ, խնամքին երկու անձ, նախկինում չդատված, չի աշխատել, հաշվառված է Երևան քաղաքի Ֆանարջյան փողոցի 3-րդ տանը:
Մեղադրվում է ՀՀ քրեական օրենսգրքի 178 հոդվածի 3-րդ մասի 1-ին կետով, 235 հոդվածի 4-րդ մասով:
Պ Ա Ր Զ Ե Ց

1.Գործի դատավարական նախապատմությունը.
2008թ. նոյեմբերի 13-ին ՀՀ ոստիկանության ՔԳՎ Երևանի քննչական վարչության Արաբկիրի քննչական բաժնում ՀՀ քրեական օրենսգրքի 178 հոդվածի 3-րդ մասի 1-ին կետի հատկանիշներով հարուցվել է թիվ 14148108 քրեական գործը:
2009թ. ապրիլի 29-ին Գոռ Սամվելի Թադևոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 178 հոդվածի 2-րդ մասի 2-րդ և 3-րդ կետերով, նրա նկատմամբ որպես խափանման միջոց ընտրվել է կալանքը և հայտարարվել հետախուզում:
2009թ. հունիսի 18-ին Գոռ Թադևոսյանը հայտնաբերվել և կալանավորվել է:
2009թ. սեպտեմբերի 25-ին Գոռ Սամվելի Թադևոսյանին առաջադրված մեղադրանքը փոփոխվել և նրան նոր մեղադրանք է առաջադրվել ՀՀ քրեական օրենսգրքի 178 հոդվածի 3-րդ մասի 1-ին կետով և 235 հոդվածի 4-րդ մասով:
2009թ. հոկտեմբերի 07-ին թիվ 14148108 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարան:
2009թ. հոկտեմբերի 07-ին քրեական գործն ընդունվել է վարույթ և նշանակվել դատաքննության 2009թ. հոկտեմբերի 28-ին:
2.Գործի փաստական հանգամանքները.
Նախաքննության մարմինն ամբաստանյալ Գոռ Սամվելի Թադևոսյանին մեղադրանք է առաջադրել հետևյալ արարքի համար.
Գոռ Թադևոսյանը, 2007թ. սեպտեմբերից մինչև 2008թ. հունիսն ընկած ժամանակահատվածում Անուշ Գուլքանյանի, Վալյա Բաբայանի, Հռիփսիկ Մինասյանի և Հայկանուշ Տոնոյանի վստահությունը չարաշահելու եղանակով և խաբեությամբ հափշտակել է նրանց պատկանող առանձնապես խոշոր չափերի հասնող 5.432.000 ՀՀ դրամ ընդհանուր գումարով կանխիկ դրամ£
Գոռ Թադևոսյանը 2007թ. ամռանն ինտերնետ կայքից տեղեկանալով երիկամների անբավարարությամբ տառապող հիվանդ երեխաների մասին, որոշել է նշված երեխաների բուժումը կազմակերպելու պատրվակով կազմակերպել գումարների հանգանակում և դրանք հափշտակել: Այսպես.
Գոռ Թադևոսյանը, Երևան քաղաքի Մամիկոնյանց փողոցի 30 հասցեում գտնվող Արաբկիր բժշկական համալիրում բուժօգնություն ստացող երիկամների անբավարարությամբ տառապող հիվանդների և նրանց ազգականների շրջապատում վստահություն ձեռք բերելու և հետագայում հափշտակություններ կատարելու նպատակով, 2007թ. ամռանը երիկամների անբավարարությամբ տառապող Հասմիկ Կարապետյանի վիրահատության համար ինտերնետի, հեռուստատեսության և հայտարարություններ տարածելու, տարբեր անձանց և կազմակերպությունների նամակներ ուղարկելու միջոցով կազմակերպել է հանգանակություն և մինչև 2007թ. հոկտեմբեր ամիսը հավաքել է անհրաժեշտ` 3.700.000 ՀՀ դրամ գումար, որն ամբողջությամբ տրամադրել է Հասմիկ Կարապետյանի վիրահատության համար£
Այդ եղանակով ձեռք բերելով Արաբկիր բժշկական համալիրում բուժվող` երիկամների անբավարարությամբ տառապող հիվանդների և նրանց ազգականների վստահությունը, Գոռ Թադևոսյանը հափշտակություն կատարելու նպատակով ներկայանալով որպես բարեգործ և հեռուստամարաթոնի կազմակերպիչ, 2007թ. սեպտեմբերին ծանոթացել և երեխայի վիրահատության համար գումարներ հանգանակելու գործընթացը կազմակերպելու հարցում իր ծառայություններն է առաջարկել Արաբկիր բժշկական կենտրոնում բուժում ստացողª երիկամների անբավարարությամբ տառապող անչափահաս Նինա Եղիշյանի մորը` Անուշ Գուլքանյանին, վկայակոչելով Հ.Կարապետյանին մատուցած ծառայությունը:
Իրականացնելով իր հանցավոր դիտավորությունը, Գոռ Թադևոսյանը, որպես կանխավճար, Անուշ Գուլքանյանից պահանջել և ստացել է 80.000 ՀՀ դրամ գումար: Պայմանագրի համաձայն իր ծառայությունների համար Թադևոսյանը պետք է ստանար հավաքվելիք գումարի 19 տոկոսը:
Մինչև 2008թ. նոյեմբեր ամիսն ընկած ժամանակահատվածում Գոռ Թադևոսյանը հանգանակությունների արդյունքում ՙՎՏԲ-Հայաստան՚ բանկում նախապես Նինա Եղիշյանի անվամբ բացված հաշվին փոխանցված և առձեռն ստացված 4.000.000 ՀՀ դրամ գումարից Անուշ Գուլքանյանի վստահությունը չարաշահելու եղանակով և խաբեությամբ, հետագայում նոր հանգանակություններ կազմակերպելու ու լրացուցիչ գումարներ հավաքելու պատրվակով, նրանից մաս-մաս ստացել և հափշտակել է 2.600.000 ՀՀ դրամ ընդհանուր գումարով կանխիկ դրամ£
Բացի այդ, Գոռ Թադևոսյանը, կրկին անգամ հափշտակություն կատարելու նպատակով 2008թ. փետրվարին, նույն եղանակով` երիկամի փոխպատվաստման վիրահատությունը կազմակերպելու, հեռուստամարաթոն իրականացնելու, տարբեր անձանցից և կազմակերպություններից երեխայի բուժման համար գումարներ հավաքագրելու համար իր ծառայություններն է առաջարկել երիկամների անբավարարությամբ տառապող անչափահաս Գագիկ Բաբայանի մորը` Վալյա Բաբայանին£
Իրականացնելով իր հանցավոր դիտավորությունը, Վալյա Բաբայանի մոտ վստահություն ձեռք բերելով, Գոռ Թադևոսյանը, որպես կանխավճար, նրանից պահանջել և ստացել է 120.000 ՀՀ դրամ գումար: Պայմանագրի համաձայն հետագայում պետք է ստանար հավաքվելիք գումարի 19 տոկոսը` իր մատուցած ծառայությունների դիմաց£
Գոռ Թադևոսյանը մինչև 2008թ. հունիսն ընկած ժամանակահատվածում, հանգանակությունների արդյունքում ՙՎՏԲ-Հայաստան՚ բանկում Գագիկ Բաբայանի անվամբ նախապես բացված հաշվին փոխանցված և առձեռն ստացված 4.000.000 ՀՀ դրամ գումարից Վալյա Բաբայանի վստահությունը չարաշահելու եղանակով և խաբեությամբ, հետագայում նոր հանգանակություններ կազմակերպելու ու լրացուցիչ գումարներ հավաքելու պատրվակով, նրանից մաս-մաս ստացել և հափշտակել է ընդհանուրª 2.592.000 ՀՀ դրամ կանխիկ գումար£
Գոռ Թադևոսյանը շարունակելով իր հանցավոր դիտավորությունը, կրկին անգամ, հափշտակություններ կատարելու նպատակով, ծանոթացել է երիկամների անբավարարությամբ տառապող անչափահաս Գրիգոր Մինասյանի մոր` Հռիփսիկ Մինասայանի հետ և վերջինիս որդու երիկամների փոխպատվաստման վիրահատությունը և բուժումը կազմակերպելու համար հանգանակությունների միջոցով անհրաժեշտ գումարների հավաքագրումը կազմակերպելու պատրվակով 2008թ. մարտի 8-ից մինչև մարտի 11-ն ընկած ժամանակահատվածում Հռիփսիկ Մինասայանից պահանջել և ստացել է 120.000 ՀՀ դրամ գումար, սակայն գումարը վերցնելուց հետո Գոռ Թադևոսյանը հանգանակությունների կամակերպման ուղղությամբ գործողութնուններ չի կատարել և Հ.Մինասյանի վստահությունը չարաշահելու եղանակով և խաբեությամբ հափշտակել է վերջինիս 120.000 ՀՀ դրամ գումարը£
Բացի այդ, Գոռ Թադևսյանը, շարունակելով իր հանցավոր դիտավորությունը, կրկին անգամ հափշտակություններ կատարելու նպատակով, ծանոթացել է երիկամների անբավարարությամբ տառապող անչափահաս Վրեժ Գալստյանի մոր` Հայկանուշ Տոնոյանի հետ և նույն եղանակովª վերջինիս որդու երիկամների փոխպատվաստման վիրահատությունը և բուժումը կազմակերպելու համար հանգանակությունների միջոցով անհրաժեշտ գումարների հավաքագրումը կազմակերպելու պատրվակով, 2008թ. մայիս-հունիս ամիսներն ընկած ժամանակահատվածում, Հայկանուշ Տոնոյանի վստահությունը չարաշահելու եղանակով և խաբեությամբ նրանից պահանջել և ստացել 120.000 ՀՀ դրամ կանխիկ գումար, սակայն գումարը վերցնելուց հետո Գոռ Թադևոսյանը հանգանակությունների կամակերպման ուղղությամբ գործողութնուններ չի կատարել և հափշտակել է Հ.Տոնոյանից ստացած 120.000 ՀՀ դրամ գումարը£
Այնուհետև, Գոռ Թադևոսյանը 2009թ. մայիսի 22-ին Թուրքիայի Հանրապետության Տրապիզոն քաղաքում ձեռք է բերել և հունիսի 16-ին Հայաստանի Հանրապետություն է տեղափոխել ու ապօրինի կերպով կրել է ՀՀ ոստիկանության ՀԿԱ վարչության հաշվառումներով չանցնող 9մմ տրամաչափի ՙEKOL P-29՚ մոդելի ՙEP-930201՚ համարի ձայնագազային ատրճանակ, որը 2009թ. հունիսի 18-ին ՀՀ ոստիկանության Երևանի Կենտրոնի բաժին բերման ենթարկելու ժամանակ հայտնաբերվել է նրա մոտ:
3.Ապացույցների հետազոտում.
Առաջադրված մեղադրանքում մեղադրյալ Գոռ Թադևոսյանն իրեն մեղավոր չի ճանաչել, պատճառաբանելով, որ իր գործունեությամբ ցանկացել է օգնել երիկամների անբավարարությամբ տառապող երեխաներին և հանգանակած գումարները ծախսել է ոչ թե իր անձնական կարիքների համար, այլ հիվանդ երեխաների վիրահատության համար ավելի շատ գումար հանգանակելու նպատակով£
Գոռ Թադևոսյանը պնդել է իր նախաքննության ընթացքում տված ցուցմունքն այն մասին, որ 2007թ. ամռանն ինտերնետ կայքից տեղեկանալով երիկամների անբավարարությամբ տառապող երեխաների մասին, որոշել է օգնել նրանց: Արաբկիրի բժշկական կենտրոնում ծանոթացել է երիկամների անբավարարությամբ տառապող Հասմիկ Կարապետյանին և առաջարկել նրան իր ծառայությունները` երիկամների փոխպատվաստման վիրահատության համար անհրաժեշտ գումար հանգանակելու հարցում: Ստանալով Հասմիկ Կարապետյանի համաձայնությունը, ձեռնամուխ է եղել այդ գործընթացին և մի քանի ամսվա ընթացքում հանգանակել վիրահատության համար նախատեսված գումարը, որի արդյունքում կատարվել է վիրահատությունը: Նույն բժշկական կենտրոնում Հասմիկ Կարապետյանի միջոցով ծանոթացել է Անուշ Գուլքանյանի հետ, տեղեկացել, որ վերջինիս դուստրը` Նինա Եղիշյանը նույնպես տառապում է երիկամների անբավարարության հիվանդությամբ և առաջարկել է նրան իր ծառայությունները` Նինա Եղիշյանի վիրահատության համար անհրաժեշտ գումարներ հանգանակելու հարցում: Ստանալով Անուշ Գուլքանյանի համաձայնությունը, պայմանագիր է կնքել նրա հետ, պարտավորվելով շուրջ երեք ամսվա ընթացքում հավաքագրել պահանջվող գումարը, իսկ Անուշ Գուլքանյանը պարտավորվել է առանց իր գիտության որևէ գումար չծախսել և իրեն տրամադրել հավաքվելիք ընդհանուր գումարի 19 տոկոսը, որպես իր կատարած ծախսերի փոխհատուցում: Այնուհետև, ձեռնամուխ լինելով գումարների հանգանակման գործընթացին, հավաքագրել է 3.000.000 ՀՀ դրամ գումար և Անուշ Գուլքանյանից ստացել է այդ գումարի 19 տոկոսը` 540.000 ՀՀ դրամ£ Գործընթացը կազմակերպելու ընթացքում Անուշ Գուլքանյանից պահանջել և ստացել է մոտ 700.000 ՀՀ դրամ գումար, որը ծախսել է ավտոմեքենայի վարորդին, համակարգչային օպերատորին վճարումներ կատարելու և այլ ծախսերի համար:
Այնուհետև, 2008թ. փետրվար ամսից մինչև հունիս ամիսն ընկած ժամանակահատվածում Վալյա Բաբայանի խնդրանքով սկսել է գումարներ հանգանակել նրա որդու` Գագիկ Բաբայանի երիկամների վիրահատության համար: Վալյա Բաբայանի համար գումարներ հանգանակելու գործընթացն սկսելուց առաջ, նրա հետ նույնպես նույնաբովանդակ պայմանագիր է կնքել: Գագիկ Բաբայանի համար կատարած հանգանակությունների արդյունքում հավաքել է մոտ 4.000.000 ՀՀ դրամ, որից 600.000 ՀՀ դրամը ծախսել է գործընթացի կազմակերպան համար: Վալյա Բաբայանից ստացել է նաև հավաքված գումարի 19 տոկոսը` 540.000 ՀՀ դրամ կանխիկ գումար: Այնուհետև, Վալյա Բաբայանի խնդրանքով մեկնել է Իրանի Թեհրան քաղաք` հայ համայնքի շրջանում հանգանակություն կատարելու համար£ Վալյա Բաբայանը որպես ճանապարհածախս իրեն տվել է 400.000 ՀՀ դրամ և իր անունից հանդես գալու լիազորագիր, սակայն Թեհրան քաղաքում հանգանակությունը չի ստացվել և ինքը դատարկաձեռն վերադարձել է Երևան: Հանգանակված գումարներից անձնական կարիքների համար ծախսել է չնչին գումարներ:
Հայկանուշ Տոնոյանից և Հռիփսիկ Մինասյանից հանգանակության գործընթացը սկսելու համար որպես կանխավճար վերցրած 120.000-ական ՀՀ դրամ գումարները չի հափշտակել, այլ ուղղակի չի հասցրել հանգանակությունների գործընթացն սկսել, քանի որ 2008թ. հուլիսի 28-ին անձնական հարցերով մեկնել է Հայաստանի Հանրապետությունից և վերադարձել 2009թ. հունիսի 16-ին:
2009թ. հունիսի 17-ին իր մոտից հայտնաբերված ձայնագազային ատրճանակը գնել է Թուրքիայի Հանրապետության Տրապիզոն քաղաքում գտնվող խանութից, ստացել համապատասխան անդորրագիր և այն տեղափոխել Հայաստանի Հանրապետություն: Տեղյակ է եղել այն մասին, որ ՀՀ-ի տարածքում առանց ձևակերպելու այն կրելու իրավունք չի ունեցել, սակայն չի հասցրել ձևակերպել և ապօրինի կրել է այն` ցանկանալով հետագայում կատարել համապատասխան ձևակերպումներ:
Դատաքննության ընթացքում Գոռ Թադևոսյանը հայտնել է, որ պայմանագիր կնքելով տուժողների հետ ձեռնամուխ է եղել հանգանակությունների կազմակերպման գործընթացին: Բարեգործական ծրագրի իրականացման համար հայ առաքելական եկեղեցին տրամադրել է 30 կամավորների, որոնք տարածել են նամակները: Նրանց տեղաշարժման համար ինքը վարձել է մեքենաներ և ապահովել նրանց սնունդը: Գովազդների կազմակերպման և համակարգչային օպերատորին վճարումներ կատարելուց հետո, իրեն չնչին գումարներ են մնացել:
Գործընթացը կազմակերպելու ընթացքում Անուշ Գուլքանյանից ստացել է 300.000 ՀՀ դրամ և պայամանագրով սահմանված 19 տոկոսը` 540.000 ՀՀ դրամ£
Վալյա Բաբայանից ստացել է 19 տոկոսը` 540.000 ՀՀ դրամ և 600.000 ՀՀ դրամ, որը ծախսել է գործընթացի կազմակերպան համար: Այնուհետև, բարեգործության շրջանակներն ընդլայնելու նպատակով, Վալյա Բաբայանի խնդրանքով մեկնել է Իրան` հայ համայնքի շրջանում հանգանակություն կատարելու համար£ Վալյա Բաբայանը որպես ճանապարհածախս իրեն տվել է 400.000 ՀՀ դրամ և իր անունից հանդես գալու լիազորագիր, սակայն Թեհրան քաղաքում հանգանակություն կազմակերպել չի հաջողվել:
Հայկանուշ Տոնոյանից և Հռիփսիկ Մինասյանից հանգանակության գործընթացն սկսելու համար որպես կանխավճար վերցրած 120.000-ական ՀՀ դրամները փոխանցված են եղել իր մտերիմներից մեկի հաշվեհամարին:
Դատաքննության ընթացքում այդ գումարներն ամբողջությամբ վերադարձվել են տուժողներ Հ.Տոնոյանին և Հ.Մինասյանին:
Ամբաստանյալին առաջադրված մեղադրանքը, բացի նրա ցուցմունքից հիմնավորվել և նրա կողմից բերված պատճառաբանությունները հերքվել են գործով ձեռք բերված հետևյալ ապացույցներով.
Երիկամների անբավարարությամբ տառապող անչափահաս Նինա Եղիշյանի մոր` գործով տուժող Անուշ Գուլքանյանի նախաքննության ընթացքում տված և դատաքննության ընթացքում հետազոտված ցուցմունքով այն մասին, որ 2007 թվականից դուստրը համապատասխան բուժում է ստացել Երևան քաղաքի Մամիկոնյանց փողոցի 30 հասցեում գտնվող Արաբկիր բժշկական կենտրոնում: Նշված ժամանակահատվածում Արաբկիր բժշկական կենտրոնում ծանոթացել է բարեգործ և հեռուստամարաթոնի կազմակերպիչ ներկայացած Գոռ Թադևոսյանի հետ£ Վերջինս առաջարկել է իր ծառայությունները երեխայի վիրահատության համար գումարներ հանգանակելու հարցում, հավաստիացնելով, որ գործողությունները կատարվելու են անշահախնդիր և բարեգործական նպատակներով և դրանցից ինքը որևէ եկամուտ չի ունենալու: Նա մատնանշել է նաև իր ծանոթ, նույն հիվանդանոցում բուժվող Հասմիկ Կարապետյանին, որի համար գումարներ է հանգանակել: Ինքը գիտակցելով, որ վիրահատությունն անհրաժեշտ է, հավատացել է Գոռ Թադևոսյանին և տվել իր համաձայնությունը: Այնուհետև, Գոռ Թադևոսյանի առաջարկով ՙՎՏԲ՚ բանկում դստեր անվամբ բացել է հաշվեհամար և Գոռ Թադևոսյանը սկսել է հեռուստատեսությամբ գովազդային հոլովակներ ցուցադրել և գումարներ հավաքագրել: Գոռ Թադևոսյանի առաջարկով նրա հետ կնքել է պայմանագիր` ապագայում հանգանակված գումարների 19-ը տոկոսը նրան վճարելու մասին, որպես նրա կողմից կատարվելիք ծախսերի հատուցում: Նինա Եղիշյանի անվամբ բացված հաշվեհամարին փոխանցված և առձեռն ստացված գումարներից, Գոռ Թադևոսյանն, իբր ավելի մեծ գումարներ հանգանակելու համար և այլ պատճառաբանություններով, հավաքագրված գումարից և իր անձնական գումարներից մաս մաս վերցրել է 2.600.000 ՀՀ դրամ գումար և հափշտակել այն: Գոռ Թադևոսյանի գործունեության հետևանքով իրեն պատճառվել է 2.600.000 ՀՀ դրամի նյութական վնաս:
Երիկամների անբավարարությամբ տառապող անչափահաս Գագիկ Բաբայանի մոր, գործով տուժող Վալյա Բաբայանի ցուցմունքով այն մասին, որ 2006թ. սեպտեմբեր ամսից որդին բուժում է ստացել Արաբկիր բժշկական կենտրոնում£ Որդու բուժումը և վիրահատությունը կազմակերպելու համար անհրաժեշտ է եղել մոտ 7.000.000 ՀՀ դրամ գումար: Նշված բժշկական կենտրոնում ծանոթացել է Գոռ Թադևոսյանի հետ, ով իրեն ներկայանալով որպես բարեգործ, հեռուստամարաթոնի կազմակերպիչ առաջարկել է իր ծառայությունները` որդու երիկամների վիրահատության համար անհրաժեշտ գումար հանգանակելու հարցում: Գոռ Թադևոսյանը հայտնել է, որ արդեն կազմակերպել և իրականացրել է նույն հիվանդանոցում բուժվող Հասմիկ Կարապետյանի վիրահատության համար գումարների հանգանակության գործը: Երեխայի բուժման համար գումար հավաքելու այլ տարբերակ չունենալով, հավատացել և համաձայնել է Գոռ Թադևոսյանի առաջարկին£ Իր համաձայնությունն ստանալուց հետո, Գոռ Թադևոսյանը հեռուստամարաթոն սկսելու համար, որպես կանխավճար, իրենից պահանջել և ստացել է 120.000 ՀՀ դրամ: 2008թ. փետրվար ամսից Գոռ Թադևոսյանի կողմից կազմակերպած գործողությունների` հեռուստատեսությամբ ցուցադրված և այլ գովազդների միջոցով, որդու անվամբ ՙՎՏԲ՚ բանկում բացված հաշվեհամարին գումարներ են փոխանցվել: Դրանից հետո Գոռ Թադևոսյանն իրենից պահանջել և ստացել է նշված հաշվեհամարին փոխանցված 4.000.000 ՀՀ դրամի 19 տոկոսը£ Այնուհետև, լրացուցիչ գումարներ հանգանակելու պատրվակով մաս-մաս իրենից պահանջել և ստացել է նաև այլ գումարներ` ընդհանուր 2.592.000 ՀՀ դրամ ու հափշտակել այն: Կատարված հանցագործությամբ իրեն պատճառվել է 2.592.000 ՀՀ դրամի նյութական վնաս:
Տուժող Վ.Բաբայանն իր ցուցմունքնը պնդել է նաև ամբաստանյալ Գ.Թադևոսյանին առերես:
Տուժող Հռիփսիկ Գևորգի Մինասյանի ցուցմունքով այն մասին, որ որ որդին` Գրիգոր Մինասյանը մանկուց տառապել է երիկամների խրոնիկ անբավարարություն հիվանդությամբ և համապատասխան բուժում է ստացել Երևան քաղաքի Արաբկիր բժշկական կենտրոնում: 2007թ. վերջերին նշված բժշկական կենտրոնում տեղեկացել է Գոռ Թադևոսյան անունով մի երիտասարդի մասին, ով հիվանդ երեխաների վիրահատությունը կազմակերպելու համար համապատասխան գովազդների միջոցով գումարներ է հանգանակել: Արաբկիր բժշկական կենտրոնում բուժում ստացող մեկ այլ հիվանդ երեխայի մոր` Վալյա Բաբայանի միջոցով 2008թ. մարտի 8-ին ծանոթացել է Գոռ Թադևոսյանին£ Վերջինս հայտնել է, որ հանգանակությունը կազմակերպելու համար անհրաժեշտ է կնքել պայմանագիր իր հետ և երեխայի անունով հաշվեհամար բացել£ Այնուհետև ներկայացրել է հանգանակության ամբողջ գործընթացը (տարբեր վայրերում հիվանդ երեխայի նկարներ տեղադրելը, գովազդային տեսահոլովակներ պատրաստելը և այլն): Նշել է նաև, որ իր կողմից կատարված և դեռևս ընթացքում գտնվող հանգանակությունների միջոցով օգնել է շատ քաղաքացիների, այդ թվում նաև Վալյա Բաբայանի որդուն: Այդ եղանակով վստահություն է ստեղծել իր մոտ: Գոռ Թադևոսյանը նշել է նաև, որ հանգանակությունների արդյունքում հավաքագրված գումարների 19 տոկոսը պետք է վճարվի իրեն, որպես կատարած ծախսերի փոխհատուցում: Հանգանակությունների գործընթացը սկսելու համար Գոռ Թադևոսյանն իրենից պահանջել է 120.000 ՀՀ դրամ գումար: 2008թ. մարտի 8-ից մինչև մարտի 11-ն ընկած ժամանակահատվածում Երևանի քաղաքի Ռոստովյան փողոցի 27 շենքի 8 բնակարանում ինքը մաս-մաս Գոռ Թադևոսյանին է տվել 120.000 ՀՀ դրամ: Վերջինս նշված գումարն ստանալուց հետո որևէ գործողություն չի կատարել և խարդախությամբ տիրացել է նշված գումարին: Հետագայում տեղեկացել է, որ Գոռ Թադևոսյանը Վալյա Բաբայանի վստահությունը չարաշահելու եղանակով նրանից վերցրել է հանգանակությունների արդյունքում հավաքված գումարը և հափշտակել այն: Կատարված հանցագործությամբ իրեն պատճառվել է 120.000 ՀՀ դրամի նյութական վնաս:
Հ.Մինասյանը իր ցուցմունքնը պնդել է նաև ամբաստանյալ Գ.Թադևոսյանին առերես£
Տուժող Հայկանուշ Տոնոյանի ցուցմունքով այն մասին, որ որդին` Վրեժ Գալստյանը տարիներ շարունակ տառապել է ՙերիկամների անբավարարություն՚ հիվանդությամբ և համապատասխան բուժում է ստացել Երևան քաղաքի Արաբկիր բժշկական կենտրոնում: 2007թ. նոյեմբեր-դեկտեմբեր ամիսներին նշված բժշկական կենտրոնում ծանոթացել է Գոռ Թադևոսյանին: Վերջինս ներկայացել է որպես բարեգործ և առաջարկել իր ծառայությունները երեխայի վիրահատության համար անհրաժեշտ գումարը հանգանակելու հարցում և մի շարք օրինակներ է բերել իր կողմից հիվանդ երեխաների բուժման նպատակով հանգանակություններ կազմակերպելու վերաբերյալ: Այդ ժամանակ ինքը չի հավատացել և մերժել է Գոռ Թադևոսյանի առաջարկը: Նշված խոսակցությունից մի քանի ամիս անց` 2008թ. մայիս կամ հունիս ամիսներին Գոռ Թադևոսյանը կրկին հանդիպել և առաջարկել է իր ծառայությունները` երեխայի վիրահատության համար գումարներ հանգանակելու հարցում` կրկին օրինակներ ներկայացրել նույն բուժկենտրոնում բուժում ստացող երեխաների համար հանգանակություններ իրականացնելու հարցում իր մատուցած ծառայությունների վերաբերյալ: Ելնելով երեխայի վատթարացող առողջական վիճակից և հավատալով Գոռ Թադևոսյանի խոսքերին, համաձայնել և ընդունել է վերջինիս առաջարկը: Այնուհետև, Գոռ Թադևոսյանի առաջարկով, նրա հետ պայմանագիր է կնքել և ՙՎՏԲ՚ բանկում երեխայի անունով բացել է հաշվեհամար: Հանգանակություններն սկսելու համար Գոռ Թադևոսյանն իրենից պահանջել և ստացել է 120.000 ՀՀ դրամ: Որոշ ժամանակ անց, համոզվելով, որ Գոռ Թադևոսյանը գումարը ստանալուց հետո որևէ գործողություն չի կատարել, փնտրել է նրան, սակայն երբ չի հաջողվել հայտնաբերել, հասկացել է, որ նա խարդախությամբ տիրացել է իր գումարին: Կատարված հանցագործությամբ իրեն պատճառվել է 120.000 ՀՀ դրամի նյութական վնաս:
Հ.Տոնոյանը իր ցուցմունքը պնդել է նաև ամբաստանյալ Գ.Թադևոսյանին առերես£
Վկա Հովհաննես Թաթուլյանի ցուցմունքով այն մասին, որ իր կինը` Հասմիկ Կարապետյանը տարիներ շարունակ տառապել է երիկամների անբավարարություն հիվանդությամբ և բուժում է ստացել Արաբկիր բժշկական կենտրոնում: 2007թ. ամռանը հիվանդանոց է գնացել Գոռ Թադևոսյանը և առաջարկել իր ծառայությունները Հասմիկ Կարապետյանի վիրահատության համար անհրաժեշտ գումարներ հանգանակելու հարցում: Ստանալով իրենց համաձայնությունը, Գոռ Թադևոսյանը սկսել է վերը նշված գործընթացը: Մինչև 2007թ. հոկտեմբեր ամիսն ընկած ժամանակահատվածը նա հանգանակել է մոտ 3.000.000 ՀՀ դրամ գումար: Մինչ Գոռի հետ ծանոթանալը իրենք փորձել են գումարներ հավաքագրել, բայց շատ չնչին գումար է հավաքագրվել: Գոռ Թադևոսյանը հավաքագրված գումարներից ոչինչ չի հափշտակել: Պայմանավորվածություն է եղել, որ Հասմիկ Կարապետյանի համար հավաքագրված գումարները լրիվ փոխանցվելու էին իրեն: Գումարները փոխանցվել են և կանխիկ, և հաշվեհամարին: Գոռը որևէ գումար չի պահանջել, իսկ կատարած ծախսերի համար գումարներն ինքը Գոռին տվել է իր միջոցներից: Հետագայում տեղեկացել է, որ Գոռ Թադևոսյանը երիկամների անբավարարությամբ տառապող երեխաների վիրահատության և բուժման պատրվակով հանգանակած գումարները հափշտակել է նրանց ծնողներից` Անուշ Գուլքանյանից, Վալյա Բաբայանից և այլ անձանցից£
Արաբկիր բժշկական կենտրոնի հեմոդիալեզի և երիկամի փոխպատվաստման բաժանմունքի ավագ բժիշկ, գործով վկա Հելեն Նազարյանի ցուցմունքով այն մասին, որ 2007թ. ամռանը հիվանդանոցում ծանոթացել է Գոռ Թադևոսյանին: Վերջինս ներկայանալով որպես բարեգործ, հայտնել է, որ հիվանդ երեխաների բուժման նպատակով գումարներ է հավաքագրում: Մի քանի անգամ Գոռ Թադևոսյանը դիմել է իրեն` համապատասխան տեղեկանք տալու համար այն մասին, որ հիվանդանոցում բուժվող երեխաների համար բարերարություն է իրականացնում, սակայն Գոռ Թադևոսյանն իր մոտ վստահություն չի ներշնչել և ինքը տեղեկանք չի տրամադրել: Հետագայում տեղեկացել է, որ Գոռ Թադևոսյանը հիվանդ երեխաների համար հավաքագրված գումարները հափշտակել և փախել է:
Վկա Արմեն Կարապետյանի ցուցմունքով այն մասին, որ 2009թ. հունիսի սկզբից մինչև օգոստոսի վերջը վարել է ՙԶոլոտոյ դյուկ՚ տաքսի ծառայությանը պատկանող ՎԱԶ 2107 մակնիշի Տ 5351 պետհամարանիշի ավտոմեքենան: 2009թ. հունիսի 17-ին, ժամը 0100-ի սահմաններում պատվեր է ստացել և ուղևորվել Երևան քաղաքի Հանրապետության փողոց, որտեղ ավտոմեքենան նստել է իրեն անծանոթ երիտասարդ և պատվիրել իրեն տանել Երևան քաղաքի Իսահակյան փողոց: Ճանապարհին ուղևորը պահանջել է փոխել ուղղությունը և պատվիրել իրեն տանել Ալավերդյան փողոց: Հանրապետության և Վարդանանց փողոցների խաչմերուկում ուղևորը տեսնելով հարևանությամբ ընթացող ոստիկանական ավտոմեքենան սկսել է անհանգիստ շարժումներ անել` գլխարկը իջեցրել է դեմքին և փորձել թաքնվել: Ոստիկանները կանգնեցրել են ավտոմեքենան և ուղևորը, որը նստած է եղել ավտոմեքենայի դիմացի նստատեղին, ձախ ձեռքը տարել է դեպի վարորդի նստատեղի հետևի հատվածը: Ոստիկանության աշխատակիցները մոտենալով ավտոմեքենային, իրենց առաջարկել են դուրս գալ մեքենայից£ Այդ ժամանակ տեղեկացել է, որ ուղևորը հանդիսանում է Գոռ Թադևոսյանը£ Այնուհետև, զննելով ավտոմեքենայի սրահը, ոստիկանները վարորդի նստատեղի հետևի հատվածից հայտնաբերել են գազային ատրճանակ: Ինքը հասկացել է, որ Գոռ Թադևոսյանը ձեռքը դեպի նստատեղի հետևի հատված տանելով, այնտեղ թաքցրել է ատրճանակը: Գոռ Թադևոսյանը հայտարարել է, որ նշված գազային ատրճանակը պատկանում է իրեն և այն ձեռք է բերել Թուրքիայի Հանրապետությունում:
ՀՀ ոստիկանության Երևան քաղաքի վարչության Կենտրոնական բաժնին կից պահպանության բաժնի ոստիկան, գործով վկա Արմեն Բաղրամյանի ցուցմունքով այն մասին, որ 2009թ. հունիսի 17-ին ժամը 02-ի սահմաններում ծառայություն է իրականացրել Երևան քաղաքի Վարդանանց փողոցում: Շրջագայելու ընթացքումª Հանրապետության և Վարդանանց փողոցների խաչմերուկում տեսել է Վազ 2107 մակնիշի տաքսի ավտոմեքենան և նկատել, որ ավտոմեքենայի առջևի աջ նստատեղին նստած ուղևորը ոստիկանական ավտոմեքենան տեսնելով գլխարկը իջեցրել է դեմքին և փորձել թաքնվել: ՈՒղևորի նմանատիպ պահվածքն իր մոտ կասկած է հարուցել և ինքը կանգնեցրել է նշված տաքսի ավտոմեքենան: Մոտենալով ուղևորին, որը հետագայում պարզվել է հանդիսանում է Գոռ Թադևոսյանը, նկատել է, որ նա ձախ ձեռքով ինչ որ բան է թաքցնում ավտոմեքենայի սրահի վարորդի նստատեղի հետևի հատվածում: Զննելով ավտոմեքենայի սրահը տեսել է, որ Գոռ Թադևոսյանի գցած իրը հանդիսանում է ձայնագազային ատրճանակ: Իր հարցին, թե որտեղից ատրճանակը Գոռ Թադևոսյանը պատասխանել է, որ այն գնել է Թուրքիայի Հանրապետությունում, պատկանում է իրեն և որպեսզի ոստիկանները չհայտնաբերեն այն գցել է ավտոմեքենայի սրահի վարորդի նստատեղի հետևում:
Վկա Լուսինե Մկրտչյանի նախաքննության ընթացքում տված և դատաքննության ընթացքում հետազոտված ցուցմունքով այն մասին, որ Գոռ Թադևոսյանի հետ գտնվել է փաստական ամուսնական հարաբերությունների մեջ: 2008թ. հունիս ամսին Գոռ Թադևոսյանը մեկնել է Արաբական Էմիրություններ: 2008թ. հուլիս ամսին Գոռ Թադևոսյանը Արաբական Էմիրություններից զանգահարել է իրեն և հայտնել, որ Հայաստանի Հանրապետությունում մի քանի անձանցից գումարներ է վերցրել, ունի պարտքեր և չի կարող վերադառնալ, մինչև գումար չվաստակի, որպեսզի կարողանա փակել պարտքերը:
Գործով որպես լրացուցիչ վկա հարցաքննված Արսեն Ալիխանյանի ցուցմունքով այն մասին, որ հանդիսանում է Գոռ Թադևոսյանի ընկերը: Վերջինս խնդրել է իրեն էլեկտրոնային հասցեներով նամակներ ուղարկել` երեխաների համար օգնության նպատակով գումարներ հավաքագրելու համար: Ինքը 3000-4000 նամակներ է ուղարկել տարբեր կազմակերպությունների կայքերին, որպեսզի գովազդ տեղադրվի: Օգտվել է ինտերնետ ակումբների ծառայություններից: Աշխատել է մոտ երկու ամիս, որի համար Գոռն իրեն վճարել է 150.000-160.000 ՀՀ դրամ:
Գործով որպես լրացուցիչ վկա հարցաքննված Լիլիթ Պողոսյանի ցուցմունքով այն մասին, որ ինքը Գոռ Թադևոսյանին ծանոթացել է 2007թ. օգոստոսին` իր հարևան Հասմիկ Կարապետյանի միջոցով: Այդ ժամանակ Գոռը հանգանակություններ է կազմակերպել Հասմիկի համար: Հասմիկի խնդրանքով, որպես նրա ներկայացուցիչ, ինքը մասնակցել է հանգանակությունների կազմակերպմանը մինչև 2007թ. հոկտեմբեր ամիսը: 2008թ. հունիսին Վալյա Բաբայանի խնդրանքով և նրա կողմից տրված լիազորագրով ինքը Գոռ Թադևոսյանի հետ գնացել է Իրանի հանրապետություն` հայկական համայնքներում հանգանակություններ կազմակերպելու համար: Իրանում Գոռը դիմել է հայկական դեսպանատուն` հանգանակությունների կազմակերպման հարցում աջակցություն ստանալու համար, սակայն դեսպանատունը մերժել է նրան: Առաջնորդարանում թողնելով Գագիկ Բաբայանի հաշվեհամարը, վերադարձել են Հայաստան: Դրանից հետո, երբ պատահաբար հանդիպել է Գոռին, վերջինս իրեն ասել է, որ բոլոր հարցերը կարգավորել են և Իրանից շուտով 10-12 հազար դոլար գումար կստացվի Գագիկ Բաբայանի հաշվեհամարին: Դրանից հետո այլևս Գոռին չի հանդիպել: Գոռ Թադևոսյանն իրեն որևէ գումար չի տվել: Հետագայում Վալյա Բաբայանից է իմացել, որ Գոռը նրանից գումարներ է վերցրել և չի վերադարձրել:
Գործով որպես լրացուցիչ վկա հարցաքննված Մարիետա Գազարյանի ցուցմունքով այն մասին, որ հանդիսանում է Հասմիկ Կարապետյանի մայրը: 2006թ. դեկտեմբեր ամսից Հասմիկը տառապել է երիկամների անբավարարություն հիվանդությամբ և բուժում է ստացել Արաբկիր բժշկական կենտրոնում: Փոխպատվաստման վիրահատությունն արժեր 5 մլն դրամ, որից 2.5 մլն դրամը պետությունն էր հատկացնում, իսկ 2.5-ից 3 մլն դրամն իրենք պետք է վճարեին: Նախքան Գոռի հետ ծանոթանանալն ինքը հաշվեհամար էր բացել, սակայն գումար չի հավաքագրվել: 2007թ. ամռանը հիվանդանոցում ծանոթացել են Գոռ Թադևոսյանին: Սկզբում ինքը կասկածել է, որ նա ինչ որ բան կարող է անել, սակայն Գոռի շնորհիվ գումարներ սկսել են հավաքագրվել: Այնուհետև բացվել է բանկային հաշվեհամար Հասմիկի անունով: Մինչև 2007թ. հոկտեմբեր ամիսը հավաքվել է մոտ 3.000.000 ՀՀ դրամ գումար: Դա բավարար էր և վիրահատությունը նորմալ կատարվել է: Հետագայում այլ հիվանդության բարդացման հետևանքով Հասմիկը մահացել է: Գոռ Թադևոսյանի հետ պայմանագիր չի կնքվել, Գոռն իրենից գումար չի պահանջել:
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Անձին լուսանկարով ճանաչման ներկայացնելու արձանագրությամբ, համաձայան, որի տուժող Վալյա Բաբայանը ճանաչել է իր վստահությունը չարաշահելու եղանակով իրենից գումարներ հափշտակած Գոռ Թադևոսյանին:
Գործով ապացույց ճանաչված Գոռ Թադևոսյանի կողմից օգտագործված ՙհեռուստամարաթոնի կազմակերպիչ՚ գրառմամբ այցեքարտով, տուժողների հետ կնքած պայմանագրերով և ոստիկանության թիվ 19/3-912 գրությամբ այն մասին, որ Գոռ Սամվելի Թադևոսյանը և ՙԷԿՕԼ 29՚ մոդելի 9մմ տրամաչափի ԵՊ–930201 համարի գազային ատրճանակը ոստիկանության հաշվառումներով չեն անցնում:
Իրեղեն ապացույց ճանաչված Գ.Թադևոսյանի մոտից հայտնաբերված ՙԷԿՕԼ 29՚ մոդելի 9մմ տրամաչափի ԵՊ – 930201 համարի ձայնագազային ատրճանակով:
Դատահոգեբուժական փորձագետի թիվ 119 եզրակացությամբ, համաձայն որի Գոռ Սամվելի Թադևոսյանը հոգեկան հիվանդությամբ չի տառապել և չի տառապում, այլ նրա մոտ հայտնաբերվել է ՙԱնձի օրգանական խանգարում՚: Հոգեկան գործունեության վերը նշված վիճակը փորձաքննվողի մոտ արտահայտված չէ այն աստիճանի և չի ուղեկցվում հոգեախտաբանական ախտանիշներով, մտավոր հիշողական կոպիտ խանգարումներով, որ ինչպես իրավախախտումը կատարելիս, այնպես էլ ներկայումս զրկեր և զրկի նրան իր գործողությունների վտանգավորությունը գիտակցելու և դրանք ղեկավարելու հնարավորությունից: Իրեն մեղսագրվող արարքի նկատմամբ Գոռ Սամվելի Թադևոսյանին հարկ է ճանաչել մեղսունակ:
Դատաձգաբանական փորձագետի թիվ 1870 եզրակացությամբ, համաձայն որի փորձաքննությանը ներկայացված ատրճանակը հանդիսանում է գործարանային արտադրության 9մմ տրամաչափի ՙԷԿՕԼ Պ-29՚ մոդելի ՙԵՊ-930201՚ համարի ձայնագազային ատրճանակ, պիտանի է նպատակային օգտագործման համար, հրազեն չի հանդիսանում:
Գոռ Թադևոսյանին բերման և նրան անձնական խուզարկության ենթարկելու արձանագրություններով:
Արթուր Ռուդոլֆի Բաղրամյանի կողմից Գոռ Թադևոսյանին պատկանող ՙԷԿՕԼ Պ-29՚ մոդելի ՙԵՊ-930201՚ համարի ձայնագազային ատրճանակը ներկայացնելու արձանագրությամբ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Գործի դատական քննության ընթացքում մեղադրող Ա.Աղայանը հայտարարել է, որ դատաքննության ընթացքում ձեռք բերված ապացույցներով հիմնավորվել է, որ Գոռ Թադևոսյանին ՀՀ քրեական օրենսգրքի 178-րդ հոդվածի 3-րդ մասի 1-ին կետով առաջադրված մեղադրանքը ենթակա է փոփոխման, հետևյալ պատճառաբանությամբ.
դատաքննության ընթացքում հիմնավորվել է, որ Գոռ Թադևոսյանը տուժողներ Վալյա Բաբայանի և Անուշ Գուլքանյանի հետ կնքել է պայմանագրեր, համաձայն որոնց վերջիններս երեխաների երիկամների փոխպատվաստման վիրահատությունը կազմակերպելու, հեռուստամարաթոն իրականացնելու, տարբեր անձանցից և կազմակերպություններից երեխաների բուժման նպատակով գումարներ հավաքագրելու համար պարտավորվել են Գ.Թադևոսյանին վճարել հավաքվելիք գումարի 19 տոկոսը£
Նինա Եղիշյանի վիրահատության համար Գ.Թադևոսյանի ծավալած գործունեությանª կազմակերպած հանգանակությունների արդյունքում ՙՎՏԲ-Հայաստան՚ բանկում Նինա Եղիշյանի անվամբ բացված հաշվին փոխանցվել և առձեռն ստացվել է 4.000.000 ՀՀ դրամ գումար£ Նշված գումարի 19 տոկոսը կազմել է 760.000 ՀՀ դրամ, որը հանդիսացել է պայմանագրով նախատեսված գումար£ Բացի այդ, Գոռ Թադևոսյանը Նինա Եղիշյանի վիրահատության համար հանգանակության կազմակերպման ընթացքում վարձատրել է վարորդ Դավիթ Աղաջանյանին երկու ամիս` ամիսը 150.000 ՀՀ դրամ և հոգացել է ավտոմեքենային վերանորոգման և վառելիքի ծախսերը, որոնք վարորդի աշխատավարձի հետ միասին կազմել են 600.000 ՀՀ դրամ£
Գագիկ Բաբայանի վիրահատության համար Գոռ Թադևոսյանի ծավալած գործունեությանª կազմակերպած հանգանակությունների արդյունքում ՙՎՏԲ-Հայաստան՚ բանկում Գագիկ Բաբայանի անվամբ բացված հաշվին փոխանցվել և առձեռն ստացվել է 4.000.000 ՀՀ դրամ գումար£ Նշված գումարի 19 տոկոսը կազմել է 760.000 ՀՀ դրամ, որը հանդիսացել է պայմանագրով նախատեսված գումար£ Բացի այդ, Գ.Թադևոսյանը Գագիկ Բաբայանի վիրահատության համար հանգանակության կազմակերպման ընթացքում Վալյա Բաբայանի խնդրանքով, վերջինից ստացված գումարից 400.000 ՀՀ դրամը ծախսել է իր և Լիլիթ Պողոսյանի ԻԻՀ մեկնելու և այնտեղ Վ.Բաբայանի որդի` Գ.Բաբայանի վիրահատության համար հանգանակություն կազմակերպելու նպատակով: Բացի այդ, Գ.Թադևոսյանը 160.000 վճարել է համակարգչային օպերատոր Արսեն Ալիխանյանին£
Այսպիսով դատաքննության ընթացքում հիմնավորվել է, որ գործով տուժողներ Վ.Բաբայանից, Ա.Գուլքանյանից, Հ.Մինասյանից և Հ.Տոնոյանից Գոռ Թադևոսյանը հափշտակել է ոչ թե 5.432.000 ՀՀ դրամ, այլ ընդհանուր 2.752.000 ՀՀ դրամ գումար£
Նման պայմաններում Գոռ Թադևոսյանին ՀՀ քրեական օրենսգրքի 178 հոդվածի 3-րդ մասի 1-ին կետով, 235 հոդվածի 4-րդ մասով առաջադրված մեղադրանքն անհրաժեշտ է փոփոխել և նրան նոր մեղադրանք առաջադրել ՀՀ քրեական օրենսգրքի 178 հոդվածի 2-րդ մասի 2-րդ, 3-րդ կետերով և 235 հոդվածի 4-րդ մասով` նշելով Գ.Թադևոսյանի կողմից հափշտակված ընդհանուր 2.752.000 ՀՀ դրամ գումարը:
Վերոգրյալի հիման վրա մեղադրողը միջնորդեց Գոռ Թադևոսյանին ՀՀ քրեական օրենսգրքի 178 հոդվածի 3-րդ մասի 1-ին կետով և 235 հոդվածի 4-րդ մասով առաջադրված մեղադրանքը փոփոխել և նրան նոր մեղադրանք առաջադրել ՀՀ քրեական օրենսգրքի 178 հոդվածի 2-րդ մասի 2-րդ, 3-րդ կետերով և 235 հոդվածի 4-րդ մասով:
Դատարանը գտնում է, որ Գոռ Թադևոսյանին ՀՀ քրեական օրենսգրքի 178 հոդվածի 3-րդ մասով առաջադրված մեղադրանքը պետք է փոփոխել և նրան մեղավոր ճանաչել ՀՀ քրեական օրենսգրքի 178 հոդվածի 2-րդ մասի 2-րդ և 3-րդ կետերով, հետևյալ պատճառաբանությամբ.
ՀՀ քրեական օրենսգրքի 178 հոդվածի 3-րդ մասը քրեական պատասխանատվություն է նախատեսում խարդախությամբ ուրիշին առանձնապես խոշոր չափերով նյութական վնաս պատճառելու համար:
ՀՀ քրեական օրենսգրքի 175 հոդվածի 4-րդ մասի 4-րդ պարբերության համաձայն, հափշտակության վերաբերյալ քրեական գործերով առանձնապես խոշոր չափ է համարվում հանցագործության պահին սահմանված նվազագույն աշխատավարձի երեքհազարապատիկը գերազանցող գումարը (արժեքը): Սույն քրեական գործով Գոռ Թադևոսյանի կողմից խարդախությամբ հափշտակված ընդհանուր գումարը կազմում է երկու միլիոն յոթ հարյուր հիսուներկու հազար (2.752.000) ՀՀ դրամ: Նշված գումարը ՀՀ քրեական օրենսգրքի 175 հոդվածի 4-րդ մասի 3-րդ պարբերության համաձայն համարվում է խոշոր չափ: Այսինքն` Գոռ Թադևոսյանի արարքը համապատասխանում է ՀՀ քրեական օրենսգրքի 178 հոդվածի 2-րդ մասի 2-րդ կետի հատկանիշներին:
Բացի այդ, Գոռ Թադևոսյանը խարդախությամբ տիրացել է տուժողներ Անուշ Գուլքանյանի, Վալյա Բաբայանի, Հայկանուշ Տոնոյանի և Հռիփսիկ Մինասյանի գումարներին, այսինքն` խարդախությունը կատարել է կրկին անգամ, որպիսի արարքը համապատասխանում է ՀՀ քրեական օրենսգրքի 178 հոդվածի 2-րդ մասի 3-րդ կետի հատկանիշներին:
Այսպիսով ամբաստանյալ Գոռ Թադևոսյանը կատարել է արարք, որը նախատեսված է ՀՀ քրեական օրենսգրքի 178 հոդվածի 2-րդ մասի 2-րդ և 3-րդ կետերով:
Բացի այդ, նա ապօրինի կերպով կրել է գազային զենք, որպիսի արարքը նախատեսված է ՀՀ քրեական օրենսգրքի 235 հոդվածի 4-րդ մասով:
Գոռ Թադևոսյանի նկատմամբ պատիժ նշանակելիս դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նրա խնամքին են գտնվում մանկահասակ երեխան և հաշմանդամ կինը, 12 տարեկան հասակից սկսած մասնակցել է ԼՂ սահմանների պաշտպանության մարտական գործողություններին, նրա մոտ առկա է ՙանձի օրգանական խանգարում՚, բնութագրվում է դրական, հանցագործությամբ տուժողներ Հ.Տոնոյանին և Հ.Մինասյանին պատճառված վնասը վերականգնվել է:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Գոռ Թադևոսյանը ենթակա է քրեական պատասխանատվության և պատժի:
Դատարանը քննության առնելով տուժող Վալյա Բաբայանի ներկայացրած քաղաքացիական հայցը` 2.592.000 ՀՀ դրամի չափով, գտնում է, որ այն պետք է բավարարել մասնակի` 1.272.000 ՀՀ դրամի չափով (այդ գումարից պետք է հանել պայմանագրով սահմանված 19 տոկոսի գումարը` 760.000 դրամ, ԻԻՀ մեկնելու ճանապարհածախսի գումարը` 400.000 դրամ և համակարգչային օպերատորի վճարը` 160.000 դրամ):
Դատարանը գտնում է նաև, որ տուժող Անուշ Գուլքանյանի նախաքննության ընթացքում ներկայացրած 2.600.000 ՀՀ դրամ գումարի պահանջից պետք է հանել պայմանագրով սահմանված 19 տոկոսի գումարը` 760.000 դրամ, վարորդ Դավիթ Աղաջանյանի երկու ամսվա վարձատրության (ամիսը 150.000 ՀՀ դրամ), ավտոմեքենայի վերանորոգման և վառելիքի ծախսերը` որոնք վարորդի աշխատավարձի հետ միասին կազմել է 600.000 ՀՀ դրամ, և դատարան չներկայացած տուժող Անուշ Գուլքանյանին քաղաքացիական դատավարության կարգով` 1.240.000 ՀՀ դրամ գումարի հայց ներկայացնելու իրավունք վերապահել:
Նկատի ունենալով, որ դատաքննության ընթացքում տուժողներ Հայկանուշ Տոնոյանին և Հռիփսիկ Մինասյանին հանցագործությամբ պատճառված վնասը վերականգնվել է և նրանք քաղաքացիական հայցի պահանջ չեն ներկայացրել, դատարանը գտնում է, որ այդ հարցը պետք է համարել լուծված:
Դատարանն անդրադառնալով հանցագործությամբ պատճառված գույքային վնասի հատուցումը կամ գույքի հնարավոր բռնագրավումն ապահովելու համար գույքի վրա դրված կալանքի հարցին, գտնում է, որ 2009թ. սեպտեմբերի 29-ի որոշմամբ Գոռ Թադևոսյանի մոտ հայտնաբերված ՙՍամսունգ՚ ֆիրմայի բջջային հեռախոսի և 40.000 ՀՀ դրամ գումարի վրա դրված կալանքը պետք է վերացնել և դրանք ուղղել հանցագործությամբ տուժող Վալյա Բաբայանին պատճառված վնասի հատուցմանը:
Անդրադառնալով իրեղեն ապացույցների տնօրինման հարցին, դատարանը գտնում է, որ իրեղեն ապացույց ճանաչված` Գոռ Թադևոսյանի մոտ հայտնաբերված ՙԷԿՕԼ Պ-29՚ մոդելի ՙԵՊ-930201՚ համարի ձայնագազային ատրճանակը, որը պահվում է ՀՀ ոստիկանության ՓՔ վարչությունում, պետք է թողնել վերջինիս տնօրինությանը:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Գոռ Սամվելի Թադևոսյանին մեղավոր ճանաչել ՀՀ քրեական օրենսգրքի 178 հոդվածի 2-րդ մասի 2-րդ, 3-րդ կետերով, 235 հոդվածի 4-րդ մասով և նրան դատապարտել.
ՀՀ քրեական օրենսգրքի 178 հոդվածի 2-րդ մասի 2-րդ և 3-րդ կետերով` ազատազրկման երկու (2) տարի ժամկետով, ՀՀ քրեական օրենսգրքի 235 հոդվածի 4-րդ մասով` ազատազրկման վեց (6) ամիս ժամկետով:
ՀՀ քրեական օրենսգրքի 66 հոդվածի հիման վրա` նշանակված պատիժները լրիվ գումարելու սկզբունքով, Գոռ Սամվելի Թադևոսյանի նկատմամբ վերջնական պատիժ նշանակել ազատազրկում երկու (2) տարի վեց (6) ամիս ժամկետով:
Պատժի սկիզբը հաշվել 2009թ. հունիսի 18-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Գոռ Սամվելի Թադևոսյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Գոռ Սամվելի Թադևոսյանից հօգուտ տուժող Վալյա Բաբայանի բռնագանձել 1.272.000 (մեկ միլիոն երկու հարյուր յոթանասուներկու հազար) ՀՀ դրամ, որպես հանցագործությամբ պատճառված վնաս:
Տուժող Անուշ Գուլքանյանին քաղաքացիական դատավարության կարգով` 1.240.000 (մեկ միլիոն երկու հարյուր քառասուն հազար) ՀՀ դրամ գումարի քաղաքացիական հայց ներկայացնելու իրավունք վերապահել:
Տուժողներ Հայկանուշ Տոնոյանի և Հռիփսիկ Մինասյանի քաղաքացիական հայցերի հարցը համարել լուծված:
Դատավճիռն օրինական ուժի մեջ մտնելուց հետո` Գոռ Թադևոսյանի մոտից առգրավված ՙՍամսունգ՚ ֆիրմայի բջջային հեռախոսի և 40.000 ՀՀ դրամ գումարի վրա դրված կալանքը վերացնել և դրանք ուղղել հանցագործությամբ տուժող Վալյա Բաբայանին պատճառված վնասի հատուցմանը:
Իրեղեն ապացույց ճանաչված, ՀՀ ոստիկանության ՓՔ վարչությունում պահվող ՙԷԿՕԼ Պ-29՚ մոդելի ՙԵՊ-930201՚ համարի ձայնագազային ատրճանակը թողնել նշված վարչության տնօրինությանը:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ