գործ No ԵԱՔԴ 0131/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահությամբ դատավոր` Լ. Ավետիսյանի
քարտուղարությամբ` Ե. Կարապետյանի
մասնակցությամբ`
մեղադրող` Ն. Աշրաֆյանի
ամբաստանյալ` Ա. Հակոբյանի
պաշտպան` Ա. Հովհաննիսյանի

2009թ. դեկտեմբերի 08-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Արմեն Ռաֆիկի Հակոբյանի, ծնված 26.07.1978թ., Լոռու մարզի Վանաձոր քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես առողջ, ամուսնացած, խնամքին երեք անձ, նախկինում չդատված, չի աշխատել, հաշվառված և բնակվել է Լոռու մարզի Վանաձոր քաղաքի Աբովյան փողոցի 1 շենքի թիվ 29 բնակարանում:
Մեղադրվում է ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով:


Պ Ա Ր Զ Ե Ց

1.Գործի դատավարական նախապատմությունը.
2009թ. հունիսի 23-ին ՀՀ ոստիկանության ՔԳՎ Երևանի քննչական վարչության Արաբկիրի քննչական բաժնում ՀՀ քրեական օրենսգրքի 268 հոդվածի 2-րդ մասի 2-րդ կետի հատկանիշներով հարուցվել է թիվ 14118009 քրեական գործը:
2009թ. հունիսի 26-ին Արմեն Ռաֆիկի Հակոբյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով և նրա նկատմամբ որպես խափանման միջոց ընտրվել է կալանքը:
2009թ. սեպտեմբերի 10-ին նախաքննության մարմնի կողմից որոշում է կայացվել թիվ 14118009 քրեական գործով Մ.Խաչիկյանի և Վ.Մուրադյանի նկատմամբ քրեական հետապնդում չիրականացնելու մասին` վեջիններիս արարքներում հանցակազմի բացակայության պատճառաբանությամբ:
2009թ. սեպտեմբերի 12-ին նախաքննության մարմնի կողմից որոշում է կայացվել թիվ 14118009 քրեական գործի նյութերով ոմն Արսենի կողմից Արմեն Հակոբյանին 1,6 գրամ հաստատուն քաշով խոշոր չափ հանդիսացող թմրամիջոց ապօրինի իրացնելու դեպքի առթիվ մաս անջատելու և ՀՀ քրեական օրենսգրքի 266 հոդվածի 2-րդ մասի 2-րդ կետով քրեական գործ հարուցելու մասին և շնորհվել է թիվ 14129809 համարը:
2009թ. սեպտեմբերի 22-ին թիվ 14118009 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարան:
2009թ. սեպտեմբերի 22-ին քրեական գործն ընդունվել է վարույթ և նշանակվել դատաքննության 2009թ. հոկտեմբերի 06-ին:
2.Գործի փաստական հանգամանքները.
Նախաքննության մարմինն ամբաստանյալ Արմեն Ռաֆիկի Հակոբյանին մեղադրանք է առաջադրել հետևյալ արարքի համար.
Արմեն Հակոբյանը ապօրինի թմրամիջոց ձեռք բերելու համար, Երևանի քրեական դատարանի 2009թ. փետրվարի 23-ի դատավճռով դատապարտված լինելով, գտնվելով սահմանված փորձաշրջանի ընթացքում, կրկին անգամ, 2009թ. հունիսի 22-ին, առանց իրացնելու նպատակի ապօրինի ձեռք է բերել և պահել խոշոր չափի` 1,6 գրամ հաստատուն քաշով ափիոն տեսակի թմրամիջոց, որը նույն օրը կատարված անձնական խուզարկությամբ հայտնաբերվել և առգրավվել է ոստիկանության աշխատակիցների կողմից:
3.Ապացույցների հետազոտում.
Առաջադրված մեղադրանքում ամբաստանյալ Արմեն Հակոբյանն իրեն լիովին մեղավոր է ճանաչել և հրաժարվելով ցուցմունք տալուց պնդել է նախաքննության ընթացքում տրված ցուցմունքն այն մասին, որ Երևանի քրեական դատարանի 2009թ. փետրվարի 23-ի դատավճռով դատապարտվել է թմրամիջոց ձեռք բերելու, պահելու և օգտագործելու համար: 2009թ. հունիսի 23-ին որդու ծննդյան տարեդարձը ՙուրախ և լավ տրամադրությամբ՚ անցկացնելու համար ցանկացել է ձեռք բերել թմրամիջոց և այդ նպատակով 2009թ. հունիսի 21-ին հեռախոսով կապ է հաստատել իր ծանոթ Արսեն անունով անձնավորության հետ և պայմանավորվել 2009թ. հունիսի 22-ին ժամը 1300-ի սահմաններում հանդիպել Երևան քաղաքի Պռոշյան և Լեոյի փողոցների խաչմերուկի մոտ, որպեսզի 40.000 ՀՀ դրամ գումարով նրանից ձեռք բերի մոտ 1.5 գրամ քաշով ափիոն տեսակի թմրամիջոց:
Ձեռք բերված պայմանավորվածության համաձայն հունիսի 22-ին Վանաձոր քաղաքից երթուղային տաքսի ավտոմեքենայով ուղևորվել է Երևան քաղաք: Ժամը 1300-ի սահմաններում նախապես պայմանավորված վայրում հանդիպել է նշված Արսեն անունով անձնավորությանը: Նրան վճարելով 40.000 ՀՀ դրամ գումար, անձնական օգտագործման նպատակով ձեռք է բերել մոտ 1.5 գրամ քաշով ափիոն տեսակի թմրամիջոց, որից հետո պատահական տաքսի ավտոմեքենայով ուղևորվել է դեպի Փափազյան փողոցի վրա գտնվող ՙՀայր և որդի Երիցյաններ՚ հանրախանութի մոտ, որպեսզի այնտեղից Երևան-Վանաձոր երթուղային տաքսի ավտոմեքենայով մեկնի Վանաձոր: Հասնելով Փափազյան փողոցի վրա գտնվող ՙՀայր և որդի Երիցյաններ՚ հանրախանութի մոտ, իջել է ավտոմեքենայից և մի քանի րոպե անց ոստիկանության աշխատակիցների կողմից տարվել ՀՀ ոստիկանության ԿՀԴՊԳ վարչություն: ԿՀԴՊԳ վարչությունում ոստիկանության աշխատակիցների կողմից կատարված անձնական խուզարկության ընթացքում իր տաբատի աջ գրպանից հայտնաբերվել է վերը նշված ափիոն տեսակի թմրամիջոցը:
Ամբաստանյալի կատարած հանցանքը, բացի նրա խոստովանությունից հիմնավորվել է նաև քրեական գործով ձեռք բերված հետևյալ ապացույցներով.
Վկա Հարություն Մկրտչյանի նախաքննության փուլում տրված և դատաքննության ժամանակ հետազոտված ցուցմունքով այն մասին, որ 2009թ. հունիսի 22-ին, ժամը 1730-ի սահմաններում Ղազար Ղազարյանի հետ անցնելիս են եղել Երևան քաղաքի Նալբանդյան փողոցով, որտեղ իրենց են մոտեցել ՀՀ ոստիկանության աշխատակիցները և հրավիրել որպես ընթերակա մասնակցելու բերման ենթարկված անձի անձնական խուզարկությանը: Նրանք համաձայնել են և ԿՀԴՊԳ վարչության աշխատասենյակներից մեկում ոստիկանության աշխատակիցների կողմից կատարվել է մի տղամարդու անձնական խուզարկություն: Անձնական խուզարկության ընթացքում նշված քաղաքացու տաբատի աջ գրպանից ոստիկանության աշխատակիցները հայտնաբերել են պոլիէթիլենային տոպրակի մեջ փաթեթավորված մուգ շագանակագույն զանգված: Այն փաթեթավորվել և կնիքվել է` հետագա ստուգումներ կատարելու նպատակով: Անձնական խուզարկության ընթացքում նրանք տեղեկացել են, որ այդ քաղաքացին հանդիսանում է Վանաձոր քաղաքի բնակիչ Արմեն Ռաֆիկի Հակոբյանը: Խուզարկության վերաբերյալ կազմվել է համապատասխան արձանագրություն, որը ստորագրվել է մասնակիցների կողմից: Ինչպես իրենց, այնպես էլ Արմեն Հակոբյանի կողմից հայտարարություններ և դիտողություններ չեն եղել:
Վկա Ղազար Ղազարյանի նախաքննության փուլում տրված և դատաքննության ժամանակ հետազոտված նույնաբովանդակ ցուցմունքով:
Վկա Արթուր Ռաֆիկի Մարտիրոսյանի նախաքննության փուլում տրված և դատաքննության ժամանակ հետազոտված ցուցմունքով այն մասին, որ աշխատում է ՙՍուպեր՚ տաքսի ծառայությունում որպես վարորդ: Իրեն է ամրակցված ՙՎազ 2107՚ մակնիշի Տ 13-80 պետհամարանիշի ավտոմեքենան: 2009թ. հունիսի 22-ին, ժամը 1700-ի սահմաններում, Երևան քաղաքի Պռոշյան փողոցում մի երիտասարդ պատվիրել է իրեն տանել Փափազյան փողոցի վրա գտնվող ՙՀայր և որդի Երիցյաններ՚ հանրախանութի մոտ: Ուղևորվելու ընթացքում երիտասարդը հարցրել է, թե կարող է իրեն հետ տանել Պռոշյան փողոց: Ինքը համաձայնել է: Նշված երիտասարդը խնդրել է մի քանի րոպե սպասել մինչ վերադառնալը: Մոտ 10 րոպե անց իրեն է մոտեցել մի անծանոթ տղամարդ, ներկայացել որպես ոստիկանության աշխատակից և հրավիրել է իրեն ԿՀԴՊԳ վարչություն:
Ամբաստանյալի կատարած հանցանքը հիմնավորվել է նաև նախաքննության ընթացքում քրեական գործով ձեռք բերված և դատաքննության ընթացքում հետազոտված հետևյալ ապացույցներով.
Բերման ենթարկելու մասին արձանագրությամբ, համաձայն որի Արմեն Հակոբյանը 2009թ. հունիսի 22-ին թմրանյութեր պահելու, օգտագործելու և իրացնելու կասկածանքով բերման է ենթարկվել ՀՀ ոստիկանության ԿՀԴՊԳՎ:
Անձնական խուզարկության ենթարկելու մասին արձանագրությամբ, ըստ որի Արմեն Հակոբյանի տաբատի աջ գրպանից հայտնաբերվել և առգրավվել է 1,6 գրամ քաշով ափիոն տեսակի թմրամիջոց:
Դատաքիմիական փորձաքննության թիվ 248 եզրակացությամբ այն մասին, որ փորձաքննությանը ներկայացված 1,6 գրամ քաշով նյութը հանդիսանում է ափիոն տեսակի թմրամիջոց:
Տոքսիկոքիմիական փորձաքննության թիվ 0473 եզրակացությամբ, համաձայն որի Արմեն Հակոբյանի մեզի փորձանմուշում հայտնաբերվել է ափիոն խմբի թմրամիջոցի թմրալկալոիդների հետքեր:
Արմեն Հակոբյանի անձնական խուզարկությամբ հայտնաբերված, իրեղեն ապացույց ճանաչված` 1,6 գրամ հաստատուն քաշով ափիոն տեսակի թմրամիջոցի առկայությամբ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Գործով մեղադրող Ն.Աշրաֆյանը հիմք ընդունելով Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. նոյեմբերի 24-ի որոշումը` համաներման կիրառմամբ դատապարտյալին պատժից ազատելու վերաբերյալ, հրաժարվել է ՀՀ քրեական օրենսգրքի 268 հոդվածի 2-րդ մասի 1-ին կետով ամբաստանյալ Արմեն Հակոբյանին առաջադրված մեղադրանքից:
Դատարանը 2009թ. դեկտեմբերի 08-ի առանձին որոշմամբ ամբաստանյալ Արմեն Ռաֆիկի Հակոբյանի նկատմամբ ՀՀ քրեական օրենսգրքի 268 հոդվածի 2-րդ մասի 1-ին կետով քրեական հետապնդումը դադարեցրել է:
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Ռաֆիկի Հակոբյանին առաջադրված մեղադրանքը` ՀՀ քրեական օրենսգրքի 268 հոդվածի 2-րդ մասի 2-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 268 հոդվածի 2-րդ մասի 2-րդ կետի հատկանիշներին և արարքի որակումը ճիշտ է:
Արմեն Հակոբյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Արմեն Հակոբյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար, խնամքին են գտնվում յոթ տարեկան երեխան, կինը և թոշակառու մայրը, որոնց միակ կերակրողն ինքն է:
Ամբաստանյալի պատասխանատվությունը և պատիժը ծանրացնող հանգամանքներ չկան:
Դատարանն անդրադառնալով իրեղեն ապացույցների տնօրինման հարցին, գտնում է, որ քրեական գործով իրեղեն ապացույց ճանաչված` 1,6 գրամ հաստատուն քաշով ափիոն տեսակի թմրամիջոցը պետք է ոչնչացնել:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց
Արմեն Ռաֆիկի Հակոբյանին մեղավոր ճանաչել ՀՀ քրեական օրենսգրքի 268 հոդվածի 2-րդ մասի 2-րդ կետով և նրան դատապարտել ազատազրկման մեկ (1) տարի վեց (6) ամիս ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվել 2009թ. հունիսի 23-ից:
Արմեն Ռաֆիկի Հակոբյանի նկատմամբ ընտրված խափանման միջոցը` կալանքը, թողնել անփոփոխ, մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո, իրեղեն ապացույց ճանաչված 1,6 գրամ հաստատուն քաշով ափիոն տեսակի թմրամիջոցը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ



գործNoԵԱՔԴ0131/01/09
Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՄԱՍԻՆ

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահությամբ դատավոր` Լ. Ավետիսյանի
քարտուղարությամբ` Ե. Կարապետյանի
մասնակցությամբ`
մեղադրող` Ն. Աշրաֆյանի
ամբաստանյալ` Ա. Հակոբյանի
պաշտպան` Ա. Հովհաննիսյանի

2009թ. դեկտեմբերի 08-ին, Երևան քաղաքում, դռնբաց դատական նիստում քննության առնելով Արմեն Ռաֆիկի Հակոբյանի վերաբերյալ ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով քրեական գործով մեղադրող Ն.Աշրաֆյանի միջնորդությունը` ամբաստանյալի նկատմամբ ՀՀ քրեական օրենսգրքի 268 հոդվածի 2-րդ մասի 1-ին կետով քրեական հետապնդումը դադարեցնելու մասին,

Պ Ա Ր Զ Ե Ց

Արմեն Ռաֆիկի Հակոբյանը ապօրինի թմրամիջոց ձեռք բերելու համար, Երևանի քրեական դատարանի 2009թ. փետրվարի 23-ի դատավճռով դատապարտված լինելով և ՀՀ քրեական օրենսգրքի 70 հոդվածի կիրառմամբ գտնվելով սահմանված փորձաշրջանի ընթացքում, կրկին անգամ, 2009թ. հունիսի 22-ին, առանց իրացնելու նպատակի ապօրինի ձեռք է բերել և պահել խոշոր չափի` 1,6 գրամ հաստատուն քաշով ափիոն տեսակի թմրամիջոց, որը նույն օրը կատարված անձնական խուզարկությամբ հայտնաբերվել և առգրավվել է ոստիկանության աշխատակիցների կողմից:
2009թ. հունիսի 26-ին Արմեն Ռաֆիկի Հակոբյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 268 հոդվածի 2-րդ մասի 1-ին և 2-րդ կետերով և նրա նկատմամբ որպես խափանման միջոց ընտրվել է կալանքը:
2009թ. սեպտեմբերի 22-ին թիվ 14118009 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարան, քրեական գործն ընդունվել է վարույթ և նշանակվել դատաքննության 2009թ. հոկտեմբերի 06-ին:
Արմեն Ռաֆիկի Հակոբյանը Երևանի քրեական դատարանի 2009թ. փետրվարի 23-ի դատավճռով ՀՀ քրեական օրենսգրքի 268 հոդվածի 1-ին մասով դատապարտվել է ազատազրկման 1 տարի ժամկետով, ՀՀ քրեական օրենսգրքի 70 հոդվածի կիրառմամբ սահմանվել է փորձաշրջան 1 տարի ժամկետով:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. նոյեմբերի 24-ի որոշմամբ ՙՀամաներում հայտարարելու մասին՚ ՀՀ Ազգային ժողովի 2009թ. հունիսի 19-ի որոշման կիրառմամբ Արմեն Ռաֆիկի Հակոբյանը ազատվել է Երևանի քրեական դատարանի 2009թ. փետրվարի 23-ի դատավճռով նշանակված պատժից:
Գործով մեղադրող Ն.Աշրաֆյանը հայտնաբերելով քրեական հետապնդումը բացառող հանգամանքներ հայտարարել է ամբաստանյալի նկատմամբ ՀՀ քրեական օրենսգրքի 268 հոդվածի 2-րդ մասի 1-ին կետով քրեական հետապնդում իրականացնելուց հրաժարվելու մասին` հիմք ընդունելով Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. նոյեմբերի 24-ի որոշումը:
Լսելով մեղադրող Ն.Աշրաֆյանի միջնորդությունը քրեական հետապնդումը դադարեցնելու մասին, դատարանը գտավ, որ այն բխում է ՀՀ քրեական դատավարության օրենսգրքի 35 հոդվածի 1-ին մասի 13-րդ կետի և նույն հոդվածի 4-րդ մասի պահանջներից ու ենթակա է բավարարման հետևյալ պատճառաբանությամբ.
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. նոյեմբերի 24-ի որոշմամբ Արմեն Ռաֆիկի Հակոբյանի նկատմամբ կիրառվել է ՙՀամաներում հայտարարելու մասին՚ ՀՀ Ազգային ժողովի 2009թ. հունիսի 19-ի որոշումը և նա ազատվել է Երևանի քրեական դատարանի 2009թ. փետրվարի 23-ի դատավճռով նշանակված պատժից: ՙՀամաներում հայտարարելու մասին՚ որոշման 12-րդ կետի 16-րդ ենթակետի համաձայն, համաներման կիրառման դեպքում դատվածության մարման հարցը լուծվում է օրենքով սահմանված կարգով: ՀՀ քրեական օրենսգրքի 84 հոդվածի համաձայն Արմեն Հակոբյանը համարվում է դատվածություն չունեցող անձ:
Նման պայմաններում Արմեն Հակոբյանի կողմից թմրամիջոց ձեռք բերելը չի կարող համարվել կրկին անգամ կատարված:
Հետևաբար Արմեն Ռաֆիկի Հակոբյանի վերաբերյալ ՀՀ քրեական օրենսգրքի 268 հոդվածի 2-րդ մասի 1-ին կետով քրեական հետապնդումը ենթակա է դադարեցման:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 35 հոդվածի 1-ին մասի 13-րդ կետով և նույն հոդվածի 4-րդ մասով, դատարանը
Ո Ր Ո Շ Ե Ց

Արմեն Ռաֆիկի Հակոբյանի վերաբերյալ ՀՀ քրեական օրենսգրքի 268 հոդվածի 2-րդ մասի 1-ին կետով քրեական հետապնդումը դադարեցնել:
Որոշումը կարող է բողոքարկվել ՀՀ վերաքննիչ քրեական դատարան` մեկամսյա ժամկետում:

ԴԱՏԱՎՈՐ Լ. ԱՎԵՏԻՍՅԱՆ