գործ No ԵԱՔԴ 0127/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Ռ. Խաչատրյանի
ամբաստանյալ` Ս. Անտոնյանի
պաշտպան` Հ. Բաղդասարյանի
տուժողներ` Ա. Խաչատրյանի, Գ.Ղարիբյանի

2009թ. հոկտեմբերի 29-ին, Երևան քաղաքում, դռնբաց դատական նիստում, արագացված դատաքննության կարգով, քննելով քրեական գործն ըստ մեղադրանքի Սմբատ Հարությունի Անտոնյանի, ծնված 17.05.1970թ. Երևան քաղաքում, ազգությամբ հայ, ՀՀ քաղաքացի, միջնակարգ-մասնագիտական կրթությամբ, ֆիզիկապես առողջ, ամուսնացած, խնամքին երեք անձ, նախկինում դատված չի եղել, չի աշխատել, հաշվառված և բնակվել է Երևան քաղաքի Առաքելյան փողոցի 27/1 տանը:
Մեղադրվում է ՀՀ քրեական օրենսգրքի 316 հոդվածի 1-ին մասով:

Պ Ա Ր Զ Ե Ց
1.Գործի դատավարական նախապատմությունը.
2009թ. հուլիսի 15-ին Արաբկիրի քննչական բաժնի կողմից հարուցվել է թիվ 14120409 քրեական գործը:
2009թ. հուլիսի 18-ին Սմբատ Հարությունի Անտոնյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 316 հոդվածի 1-ին մասով:
2009թ. հուլիսի 18-ին Սմբատ Անտոնյանի նկատմամբ որպես խափանման միջոց է ընտրվել կալանքը:
2009թ. սեպտեմբերի 12-ին թիվ 14120409 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարան:
2009թ. սեպտեմբերի 12-ին քրեական գործը վարույթ է ընդունվել և նշանակվել է դատաքննության 2009թ. սեպտեմբերի 30-ին:
2.Գործի փաստական հանգամանքները.
Նախաքննության մարմինն ամբաստանյալ Սմբատ Հարությունի Անտոնյանին մեղադրանք է առաջադրել հետևյալ արարքի համար.
Սմբատ Անտոնյանը 2009թ. հուլիսի 15-ին, ժամը 2220-ի սահմաններում, Երևան քաղաքի Կոմիտասի և Վ.Վաղարշյան փողոցների խաչմերուկի մոտ, գտնվելով ոգելից խմիչքի ազդեցության տակ, չի ենթարկվել իշխանության ներկայացուցիչ հանդիսացող, իրենց ծառայողական պարտականությունները կատարող ՀՀ ոստիկանության ՊՊԾ գնդի 2-րդ գումարտակի 2-րդ վաշտի ոստիկաններ Գևորգ Ղարիբյանի և Արկադի Խաչատրյանի օրինական պահանջներին, որի ընթացքում Սմբատ Անտոնյանը նրանց կյանքի և առողջության համար ոչ վտանգավոր բռնություն գործադրելով, գլխով հարվածել է Արկադի Խաչատրյանի դեմքին, իսկ բռունցքով հարվածել է Գևորգ Ղարիբյանի ձախ քունքին` վերջիններիս պատճառելով մարմնական վնասվածքներ:
3. Արագացված դատական քննություն .
Մինչև դատաքննությունն սկսելն ամբաստանյալ Սմբատ Անտոնյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Հ.Բաղդասարյանը:
Մեղադրող Ռ.Խաչատրյանը դատական քննության արագացված կարգ կիրառելու վերաբերյալ չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սմբատ Հարությունի Անտոնյանին առաջադրված մեղադրանքը ՀՀ քրեական օրենսգրքի 316 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 316 հոդվածի 1-ին մասի հատկանիշներին և արարքի որակումը ճիշտ է:
Սմբատ Հարությունի Անտոնյանի նկատմամբ պատիժ նշանակելիս, դատարանը հաշվի է առնում նրա կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալ Սմբատ Անտոնյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, խնամքին են գտնվում կինը և երկու անչափահաս երեխաները, բնակության վայրում բնութագրվում է դրականորեն:
Դատարանը որպես ամբաստանյալ Սմբատ Անտոնյանի պատասխանատվությունը և պատիժը ծանրացնող հանգամանք է դիտում հանցանք ալկոհոլի ազդեցության տակ կատարելը:
Դատարանը գտնում է, որ պատժի նպատակներին հասնելու համար Սմբատ Հարությունի Անտոնյանի նկատմամբ պատիժ պետք է նշանակել ազատազրկման ձևով:
Նկատի ունենալով, որ տուժող Գևորգ Ղարիբյանը հրաժարվել է քաղաքացիական հայցի պահանջից, դատարանն այդ հարցը համարում է լուծված:
Դատարանը գտնում է, որ հիվանդության պատճառով վերջին դատական նիստին չներկայացած տուժող Արկադի Խաչատրյանին պետք է քաղաքացիական հայցի իրավունք վերապահել, քաղաքացիական դատավարության կարգով, պահանջելու հանցագործությամբ իրեն պատճառված վնասը:
Դատարանն անդրադառնալով իրեղեն ապացույցների տնօրինման հարցին, գտնում է, որ գործով իրեղեն ապացույց ճանաչված` ոստիկանական համազգեստի վերնաշապիկը պետք է վերադարձնել Արկադի Խաչատրյանին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360, 3751-3754 հոդվածներով, դատարանը

Վ Ճ Ռ Ե Ց

Սմբատ Հարությունի Անտոնյանին մեղավոր ճանաչել ՀՀ քրեական օրենսգրքի 316 հոդվածի 1-ին մասով և նրան դատապարտել ազատազրկման մեկ (1) տարի վեց (6) ամիս ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվել 2009թ. հուլիսի 16-ից:
Սմբատ Հարությունի Անտոնյանի նկատմամբ ընտրված խափանման միջոցը` կալանքը, թողնել անփոփոխ, մինչև դատավճռի օրինական ուժի մեջ մտնելը:
Տուժող Արկադի Խաչատրյանին քաղաքացիական հայցի իրավունք վերապահել, քաղաքացիական դատավարության կարգով, պահանջելու հանցագործությամբ իրեն պատճառված վնասը:
Տուժող Գևորգ Ղարիբյանի քաղաքացիական հայցի հարցը համարել լուծված:
Իրեղեն ապացույց ճանաչված` ոստիկանական համազգեստի վերնաշապիկը վերադարձնել Արկադի Խաչատրյանին:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ` Լ.ԱՎԵՏԻՍՅԱՆ