Գործ ԵԱՔԴ/0126/01/09 Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ`

ՆԱԽԱԳԱՀՈՂ ԴԱՏԱՎՈՐ Մ.ՌԵՀԱՆՅԱՆ
ԴԱՏԱՎՈՐՆԵՐ Ա.ԴԱՆԻԵԼՅԱՆ
Ա.ՀՈՎՀԱՆՆԻՍՅԱՆ

ՔԱՐՏՈՒՂԱՐՈՒԹՅԱՄԲ` Մ.ՄԵԼՔՈՆՅԱՆԻ
Մասնակցությամբ`
ԴԱՏԱԽԱԶ Հ.ՀԱՐՈՒԹՅՈՒՆՅԱՆԻ
ՊԱՇՏՊԱՆ Կ. ՔԱՄԱԼՅԱՆԻ
ՏՈՒԺՈՂ Ս.ԱՅՎԱԶՅԱՆԻ

2010թ. մարտի 29-ին ք.Երևան

Դռնբաց դատական նիստում, քննության առնելով, պաշտպան Կարեն Քամալյանի վերաքննիչ բողոքն` ամբաստանյալ Համլետ Նիկոլայի Խաչատրյանի վերաբերյալ, ՀՀ քրեական օրենսգրքի 178-րդ հոդվածի 2-րդ մասի 2-րդ կետով, Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանի 2009թ. հոկտեմբերի 14-ի դատավճռի դեմ,

Պ Ա Ր Զ Ե Ց

1.Գործի դատավարական նախապատմությունը.
2009թ. հուլիսի 13-ին, ՀՀ հատուկ քննչական ծառայության կողմից, հարուցվել է թիվ 62203709 քրեական գործը:
2009թ. օգոստոսի 19-ին Համլետ Նիկոլայի Խաչատրյանը ներգրավվել է որպես մեղադրյալ և նրան մեղադրանք առաջադրվել` ՀՀ քրեական օրենսգրքի 178-րդ հոդվածի 2-րդ մասի 2-րդ կետով:
2009թ. օգոստոսի 19-ին Համլետ Նիկոլայի Խաչատրյանի նկատմամբ` որպես խափանման միջոց, կիրառվել է ստորագրություն չհեռանալու մասին:
2009թ. օգոստոսի 19-ին, Համլետ Նիկոլայի Խաչատրյանի գույքի վրա կալանք է դրվել:
2009թ. սեպտեմբերի 10-ին թիվ 62203709 քրեական գործը` մեղադրական եզրակացությամբ, ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարան:
Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանի, արագացված դատաքննության կարգով, 2009թ. հոկտեմբերի 14-ի դատավճռով` Համլետ Նիկոլայի Խաչատրյանը մեղավոր է ճանաչվել ՀՀ քրեական օրենսգրքի 178-րդ հոդվածի 2-րդ մասի 2-րդ կետով և դատապարտվել ազատազրկման 3(երեք) տարի 6(վեց) ամիս ժամկետով:
Պատժի սկիզբ է հաշվել դատավճռի կատարման օրվանից:
Համլետ Նիկոլայի Խաչատրյանի նկատմամբ ընտրված խափանման միջոցը` ստորագրություն չհեռանալու մասին, թողնվել է անփոփոխ, մինչև դատավճռի օրինական ուժի մեջ մտնելը:
Վճռվել է. Համլետ Նիկոլայի Խաչատրյանից հօգուտ Սլավիկ Այվազյանի բռնագանձել 1400 ԱՄՆ դոլարին համարժեք ՀՀ դրամ, որպես հանցագործությամբ պատճառված վնասի հատուցում:
ՀՀ հատուկ քննչական ծառայության ՀԿԳ քննիչի 2009թ. օգոստոսի 19-ի որոշմամբ Համլետ Նիկոլայի Խաչատրյանի գույքի վրա դրված կալանքը պահպանել, մինչև հանցագործությամբ պատճառված գույքային վնասի հատուցումը:
Իրեղեն ապացույց ճանաչված լազերային սկավառակը պահել քրեական գործի հետ միասին:
Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանի, 2009թ. հոկտեմբերի 14-ի դատավճռի դեմ վերաքննիչ բողոք է բերել ամբաստանյալ Համլետ Խաչատրյանի պաշտպան Կարեն Քամալյանը:
2. Գործի փաստական հանգամանքները
Նախաքննական մարմնի կողմից Համլետ Նիկոլայի Խաչատրյանին` ՀՀ քրեական օրենսգրքի 178-րդ հոդվածի 2-րդ մասի 2-րդ կետով, մեղադրանք է առաջադրվել այն բանի համար, որ նա հանդիսանալով պետական հատուկ ծառայություն իրականացնող անձ` ՀՀ դատական դեպարտամենտի դատական կարգադրիչ, խարդախություն կատարելու դիտավորությամբ, իր ծանոթ Սլավիկ Այվազյանի և Մարտիրոս Ղանդիլյանի միջև եղած դատական վեճը հօգուտ Սլավիկ Այվազյանի լուծելու, նրա օգտին վճիռ կայացնելու համար, Արաբկիր և Քանաքեռ-Զեյթուն համայնքների ընդհանուր իրավասության դատարանի դատավորին կաշառք տալու պատրվակով, 2008թ. հունիսին Սլավիկ Այվազյանի վստահությունը չարաշահելով և խաբեությամբ, վերցրել է 518.500 ՀՀ դրամին համարժեք 1700 ԱՄՆ դոլար գումար և հափշտակել այն:
3.Վերաքննիչ բողոքի հիմքերը, փաստարկները և պահանջը.
Վերաքննիչ բողոքը քննվում է հետևյալ հիմքերի սահմաններում ներքոհիշյալ հիմնավորումներով.
Վերաքննիչ բողոքում հեղինակը նշել է, որ գտնում է 14.10.2009թ. դատավճիռն անհիմն է, թույլ են տրվել նյութական և դատավարական իրավունքի հիմնարար խախտումներ, որոնց արդյունքում ընդունված դատական ակտը խաթարել է արդարադատության բուն էությունը և իր պաշտպանյալին դատարանը դատապարտել է ազատազրկման 3 /երեք/տարի 6 /վեց/ ամիս ժամկետով, թեև իր պաշտպանյալի նկատմամբ քրեական հետապնդումը պետք է դադարացվեր, խափանման միջոցը վերացվեր, իսկ նրա ՀՀ հատուկ քննչական ծառայության ՀԿԳ քննիչի 2009թ. որոշմամբ իր պաշտպանյալի գույքի վրա դրված արգելանքը պետք է վերացվեր, հետևյալ պատճառաբանություններով:
Նախ, դատարանը ոչ մի հնարավորություն չի ընձեռել իր պաշտպանյալին ներկայացնել դատարանին, պատասխանատվությունը և պատիժը մեղմացնող լրացուցիչ հանգամանքներ և դատավճռի հիմքում որպես մեղմացնող հանգամանքներ միայն դրել է այն, որ իր պաշտպանյալը նախկինում դատապարտված չի եղել, հանցանքն ընդունել է և զղջում է կատարածի համար: Դատարանի կողմից վերջինիս հնարավորություն չընձեռելու արդյունքում իր պաշտպանյալի կողմից չի ներկայացվել փաստաթուղթ այն մասին, որ վերջինս` 18.12.1992թ. մինչև 26.06.1994թ. ծառայելով ՀՀ ՊՆ թիվ 55076 զորամասում, ակտիվորեն մասնակցություն է ունեցել ՀՀ և ԼՂՀ պաշտպանության համար մղված մարտական գործողություններին: Նշված փաստը, քանի որ դատարանը հնարավորություն չի ընձեռել իր պաշտպանյալին ներկայացնել դատարանին, իսկ դատարանն էլ իր հերթին չի կիրառել` 19.06.2009թ. ՀՀ ԱԺ-ի կողմից ընդունված համաներման որոշման 2-րդ կետի 4-րդ ենթակետը, ըստ որի պատժից ենթակա են ազատման առավելագույնը հինգ տարի ժամկետով ազատազրկման դատապարտված այն անձինք, ովքեր ՀՀ պաշտպանության համար մղված մարտական գործողությունների մասնակից են, իսկ իր պաշտպանյալը դատապարտվում է 3 /երեք/ տարի 6 /վեց/ ամիս ժամկետով ազատազրկման և պատիժը կրելուց չի ազատվում վերոհիշյալ հիմքով:
Դատարանը` որպես պատասխանատվությունը և պատիժը մեղմացնող հանգամանք, հաշվի չի առել նաև այն, որ իր պաշտպանյալն ամբողջությամբ հատուցել է տուժողին պատճառված վնասը և տուժողը իր պաշտպանյալի նկատմամբ որևէ պարտք կամ պահանջ չունի և ինքն է միջնորդում դատարանին Համլետ Խաչատրյանին ազատել պատժի կրումից, հաշվի չի առնվել նաև, որ իր պաշտպանյալի խնամքին են տարեց ծնողները և հանդիսանում է ընտանիքի միակ կերակրողն ու ապավենը, հենց նախաքննության սկզբից անկեղծորեն զղջալով կատարածի համար տվել է ինքնախոստովանական ցուցմունքներ և ակտիվորեն աջակցել է հանցագործության բացահայտմանը, իր պաշտպանյալը նշանադրված է և շուտով պետք է ամուսնանար, արարքը կատարել է ընտանեկան , նյութական ծանր պայմաններից ելնելով:
Խնդրում է բեկանել 14.10.2009թ. դատավճիռը իր պաշտպանյալի նկատմամբ կիրառել ՀՀ ԱԺ-ի կողմից ընդունված ` 19.06.2009թ. համաներման մասին որոշման 2-րդ կետի 4-րդ ենթակետը և Համլետ Նիկոլայի Խաչատրյանին ազատել պատժի կրումից: Վերացնել նրա նկատմամբ ընտրված խափանման միջոցը, իսկ ՀՀ հատուկ քննչական ծառայության ՀԿԳ քննիչի 19.08.2009թ. որոշմամբ իր պաշտպանյալի գույքի վրա դրված արգելանքը վերացնել, եթե նրա մարտական գործողությունների մասնակցությունը չի բավարարում կառավաության որոշմամբ նրա կարգավիճակը հաստատելու կապակցությամբ, խնդրում է իր պաշտպանյալի նկատմամբ նշանակված պատժաչափը նվազեցնել և նրա նկատմամբ կիրառել համաներումը:
4.Վերաքննիչ բողոքի դեմ բերված պատասխանը.
Ամբաստանյալի պաշտպանի վերաքննիչ բողոքի դեմ ասռարկեց գործով մասնակցող մեղադրողը հայտնելով, որ գտնում է Երևան քաղաքի Արաբկիր և Քանաքեռ- Զեյթուն վարչական շրջանների ընդհանուր իրավասության դատարանի 2009թ. հոկտեմբեր 14-ի դատավճռով Համլետ Խաչատրյանի նկատմամբ սահմանվել է համաչափ պատիժ:
Մասնավորապես, պատիժ նշանակելիս դատարանի կողմից հաշվի է առնվել ինչպես կատարած արարքի հանրության համար վտանգավորության աստիճանը, այնպես էլ ամբաստանյալի անձը բնութագրող, պատասխանատվությունը և պատիժը մեղմացնող ու ծանրացնող հանգամանքները:
Այն է` որպես պատասխանատվությունը և պատիժը մեղմացնող հանգամանքներ են դիտվել, որ նա ընդունել է հանցանքը և զղջացել, նախկինում դատված չի եղել:
Միաժամանակ անհրաժեշտ է փաստել, որ Համլետ Խաչատրյանը, ծառայության անցնելով ՀՀ դատական կարգադրիչների ծառայությունում, երդվել է իր լիազորությունները կատարելիս պահպանել ՀՀ Սահմանադրությունը և օրենքները, մարդու և քաղաքացու իրավունքներն ու ազատությունները, անվեհապահորեն և բարեխիղճ կատարել դատական կարգադրիչի ծառայողական պարտականությունները, բարձր պահել դատարանի հեղինակությունը:
Այսինքն, Համլետ Խաչատրյանը հանցանք կատարելով, խախտել է մասնագիտական երդումը, որպիսի հանգամանքը դատարանը, ՀՀ քրեական օրենսգրքի 63-րդ հոդվածի 1-ին մասի 10-րդ կետի համաձայն, իրավացիորեն, դիտել է որպես պատասխանատվությունը և պատիժը ծանրացնող հանգամանք:
Ինչ վերաբերում է պաշտպանության կողմի վերաքննիչ բողոքում ներկայացված այն պնդմանը, որ դատարանը կողմին զրկել է պատասխանատվությունը և պատիժը մեղմացնող լրացուցիչ հանգամանքներ ներկայացնելուց, այն իր հիմնավորումը չի կարող գտնել քրեական գործի նյութերում, քանզի առաջին ատյանի դատարանում ամբաստանյալը և նրա պաշտպանը լիարժեք հնարավորություն են ունեցել ներկայացնելու իրենց դիրքորոշումը ցանկացած հարցի վերաբերյալ, դատարանի կողմից որևէ սահմանափակում կիրառված չի եղել:
Բացի այդ, ՀՀ քրեական դատավարությանօրենսգրքի 385-րդ հոդվածի համաձայն` վերաքննիչ դատարանը դատական ակտը վերանայում է վերաքննիչ բողոքի հիմքերի և հիմնավորումների սահմաններում, իսկ պաշտպանության կողմը պատժի խստության առումով բողոք չի բերել, ընդամենը վիճարկել է Համլետ Խաչատրյանին 3 /երեք/ տարի 6 /վեց/ ամիս ժամկետով ազատազրկման դատապարտելու պայմաններում նրա նկատմամբ <<Համաներում հայտարարելու մասին>> ՀՀ ԱԺ 2009թ. հունիսի 19-ի որոշման 2-րդ կետի 4-րդ ենթակետը չկիրառելու և պատժից չազատելու հանգամանքը:
Ինչպես հայտնի է, <<Համաներում հայտարարելու մասին>> հիշյալ որոշման 2-րդ կետի 4-րդ ենթակետով սահմանվում է, որ պատժից ենթակա են ազատման առավելագույնը մինչև 5 տարի ժամկետով ազատազրկման դատապարտված այն անձինք, ովքեր Հայրենական մեծ պատերազմի, Հայաստանի Հանրապետության պաշտպանության համար մղված մարտական գործողությունների մասնակիցներ են, ՀՀ օրենսդրությամբ սահմանված կարգով հավասարեցված են նրանց կամ ունեն բռնադատվածի կարգավիճակ և նախկինում դիտավորյալ հանցագործություն կատարելու համար ազատությունից զրկելու հետ կապված պատիժ չեն կրել կամ կրել են, սակայն չունեն դատվածություն:
Պաշտպանության կողմը վկայակոչելով, որ Համլետ Խաչատրյանը 18.12.1992թ. մինչև 26.06.1994թ. ծառայելով ՀՀ ՊՆ թիվ 55076 զորամասում, մասնակցություն է ունեցել ՀՀ և ԼՂՀ պաշտպանության համար մղված մարտական գործողություններին, կամայական մեկնաբանություն է տվել օրենսդրությանը, քանի որ ՀՀ պաշտպանության մարտերին մասնակցած անձանց մարտական գործողությունների մասնակցի կարգավիճակը հավաստող վկայական դատարան չի ներկայացվել:
Մեղադրանքի կողմը գտնում է, որ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. հոկտեմբերի 14-ի դատական ակտը ճիշտ է, օրինական, հիմնավորված և պատճառաբանված, իսկ պաշտպանության կողմի վերաքննիչ բողոքում բերված եզրահանգումներն` անհիմն:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 54-րդ, 354-րդ և 392-րդ հոդվածներով, միջնորդել է պաշտպանության կողմի վերաքննիչ բողոքը մերժել` Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. հոկտեմբերի 14-ի դատական ակտը թողնելով օրինական ուժի մեջ:
Գործով տուժող Սլավիկ Այվազյանը դիմում է ներկայացրել դատարանին հայտնելով, որ ամբաստանյալ համլետ Նիկոլայի Խաչատրյանի կողմից ամբողջությամբ հատուցվել է իրեն պատճառված վնասը և նրա նկատմամբ որևէ պարտք-պահանջ չունի:
5. Վերաքննիչ դատարանի պատճառաբանությունները և եզրահանգումը
Քննելով վերաքննիչ բողոքը նշված հիմքերի սահմաններում, ՀՀ վերաքննիչ քրեական դատարանը գտնում է, որ ամբաստանյալի պաշտպանի վերաքննիչ բողոքը պետք է բավարարել և Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանի 2009թ. հոկտեմբերի 14-ի դատական ակտը պատժի մասով փոփոխել, հետևյալ պատճառաբանությամբ.
ՀՀ քրեական օրենսգրքի 10-րդ հոդվածի համաձայն` հանցանք կատարած անձի նկատմամբ կիրառվող պատիժն արդարացի է, եթե համապատասխանում է հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար է անձին ուղղելու և նոր հանցագործությունները կանխելու համար:
ՀՀ քրեական օրենսգրքի 48-րդ հոդվածի 2-րդ մասի համաձայն` հանցագործության համար մեղավոր ճանաչված անձի նկատմամբ նշանակվող պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները:
ՀՀ քրեական օրենսգրքի 61-րդ հոդվածը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում՝ հաշվի առնելով սույն օրենսգրքի Ընդհանուր մասի դրույթները:
Պատժի տեսակը և չափը որոշվում են հանցագործության՝ հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով:
Դատարանը պետք է բացահայտի կատարված կոնկրետ հանցանքի առանձնահատուկ հատկանիշները, որոնք կարող են ազդել հանրության համար վտանգավորության աստիճանի վրա հանցագործության կատարման եղանակը, հանցավորի մտադրության իրականացման աստիճանը, վնասի չափը և այլն:
Պատիժ նշանակելիս դատարանը հաշվի է առնում նաև ՀՀ քրեական օրենսգրքի 62-րդ և 63-րդ հոդվածներում նախատեսված պատասխանատվությունը և պատիժը մեղմացնող կամ ծանրացնող հանգամանքները, որոնք բնութագրում են ինչպես կատարված հանցագործությունը, այնպես էլ հանցավորի անձնավորությունը և հնարավորություն է տալիս յուրաքանչյուր կոնկրետ գործով անհատականացնել պատիժը: Պատիժը մեղմացնող կամ ծանրացնող հանգամանքները բնութագրում են ինչպես կատարված հանցագործությունը, այնպես էլ հանցավորի անձնավորությունը: Դրանք բարձրացնում կամ իջեցնում են հասարակական վտանգավորության աստիճանը և ազդում են պատժի վրա:
Քրեական օրենքի ընդհանուր մասի վերը թվարկված դրույթներից հետևում է, որ հանցագործության համար մեղավոր ճանաչված անձի նկատմամբ ինչպես պատժատեսակի, այնպես էլ պատժաչափի վերաբերյալ դատարանի կողմից կայացված որոշումը պետք է հիմնված լինի կատարած հանցագործության, դրա առանձնահատկությունների, գործի կոնկրետ հանգամանքների, հանցավորի անձի, պատասխանատվությունը և պատիժը մեղմացնող կամ ծանրացնող հանգամանքների բազմակողմանի գնահատման վրա:
Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները:
Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանն ամբաստանյալ Համլետ Խաչատրյանի նկատմամբ պատիժ նշանակելիս` որպես մեղմացուցիչ հանգամանք դիտել է այն, որ նա հանցանքն ընդունել և զղջում է կատարածի համար, նախկինում դատված չի եղել, որպես ամբաստանյալի պատասխանատվությունը և պատիժը ծանրացնող հանգամանք է դիտել նրա կողմից մասնագիտական երդումը խախտելը:
ՀՀ քրեական օրենսգրքի 62 հոդվածի 2-րդ մասի պատիժ նշանակելիս դատարանը կարող է հաշվի առնել նաև մեղմացնող այլ հանգամանքներ, որոնք նշված չեն սույն հոդվածի առաջին մասում:
Վերաքննիչ դատարանը հարկ է համարում արձանագրել, որ ՀՀ պաշտպանության մարտերին մասնակցած անձանց մարտական գործողությունների մասնակցի կարգավիճակ տալու կարգը սահմանված է ՀՀ կառավարության 27.11.2000թ. թիվ 778 որոշմամբ, մինչդեռ սույն կարգով սահմանված`համապատասխան հանձնաժողովի որոշում կամ կարգավիճակը հավաստող վկայական դատարան չեն ներկայացվել, որոնց բացակայության պայմաններում Համլետ Խաչատրյանը չի կարող համարվել ՀՀ պաշտպանության համար մղված մարտական գործողությունների մասնակից կամ ՀՀ օրենսդրությամբ սահմանված կարգով նրանց հավասարեցված անձ:
Տվյալ դեպքում ամբաստանյալ Համլետ Նիկոլայի Խաչատրյանը բնութագրվում է դրական, նախկինում արատավորված չի եղել, իրեն մեղավոր է ճանաչել, անկեղծորեն զղջում է կատարածի համար, ունի մշտական բնակության վայր, երիտասարդ է, ամբողջությամբ հատուցել է տուժողին պատճառված նյութական վնասը, համաձայն <Զոհված և հաշմանդամ ազատամարտիկների <<Ժառանգություն>> հասարակական կազմակերպության նախագահ Ա.Նիկողոսյանի կողմից տրված երաշխավորագիր-բնութագրի` Համլետ Խաչատրյանը 1993թ. փետրվարի, մարտ ամիսներին մասնակցել է ՀՀ սահմանների պաշտպանության մարտական գործողություններին, իրեն դրսևորել է կարգապահ, ընկերասեր և պարտաճանաչ: Վայելել է ընկերների և հրամանատարության սերն ու հարգանքը:
Վեաքննիչ դատարանը` հաշվի առնելով վերոգրյալ պատասխանատվությունն ու պատիժը մեղմացնող հանգամանքները իրենց համակցության մեջ, ինչպես նաև դատական ակտում շարադրված անձը բնութագրող տվյալները` հանգում է հետևության, որ ամբաստանյալ Համլետ Նիկոլայի Խաչատրյանի նկատմամբ` ՀՀ քրեական օրենսգրքի 178-րդ հոդվածի 2-րդ մասի 2-րդ կետով, Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանի դատավճիռը` պատժի մասով, պետք է փոփոխել և նրա նկատմամբ պատիժ նշանակել`ՀՀ քրեական օրենսգրքի 178-րդ հոդվածի 2-րդ մասի սանկցիայի շրջանակներում` ազատազրկում երեք տարի ժամկետով և կիրառել ՀՀ Ազգային Ժողովի կողմից 19.06.2009թ. համաներում հայտարարելու մասին որոշման 1-ին կետի 1-ին ենթակետը, և նրան ազատել նշանակված պատժի կրումից:
Միաժամանակ հաշվի առնելով, որ ամբաստանյալի կողմից ամբողջությամբ հատուցվել է տուժողին պատճառված նյութական վնասը, պետք է ՀՀ Հատուկ քննչական ծառայության ՀԿԳ քննիչի 2009թ. օգոստոսի 19-ի որոշմամբ ամբաստանյալ Համլետ Խաչատրյանի գույքի վրա դրված կալանքը վերացնել:
ՀՀ Վերաքննիչ քրեական դատարանը` ղեկավարվելով ՀՀ Սահմանադրության 92-րդ հոդվածով, ՀՀ քրեական դատավարության օրենսգրքի 390-րդ, 393-396-րդ, 402-րդ հոդվածներով,

Ո Ր Ո Շ Ե Ց

Պաշտպան Կարեն Քամալյանի վերաքննիչ բողոքը բավարարել:
Ամբաստանյալ Համլետ Նիկոլայի Խաչատրյանի վերաբերյալ` ՀՀ քրեական օրենսգրքի 178-րդ հոդվածի 2-րդ մասի 2-րդ կետով, Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանի 2009թ. հոկտեմբերի 14-ի դատավճիռը պատժի մասով փոփոխել:
Համլետ Նիկոլայի Խաչատրյանին մեղավոր ճանաչել ՀՀ քրեական օրենսգրքի 178-րդ հոդվածի 2-րդ մասի 2-րդ կետով և դատապարտել ազատազրկման 3/երեք/ տարի ժամկետով:
Կիրառել ՀՀ Ազգային Ժողովի կողմից 19.06.2009թ. ընդունված <<Համաներում հայտարարելու մասին>> որոշման 1-ին կետի 1-ին ենթակետը և ամբաստանյալ Համլետ Նիկոլայի Խաչատրյանին ազատել նշանակված պատժի կրումից:
Քաղաքացիական հայցը համարել լուծված:
ՀՀ Հատուկ քննչական ծառայության ՀԿԳ քննիչի 2009թ. օգոստոսի 19-ի որոշմամբ ամբաստանյալ Համլետ Խաչատրյանի գույքի վրա դրված կալանքը վերացնել:
Դատավճիռը մնացած մասով թողնել անփոփոխ:
Սույն որոշումը կարող է բողոքարկվել ՀՀ վճռաբեկ դատարան` հրապարակման պահից, մեկամսյա ժամկետում:

ՆԱԽԱԳԱՀՈՂ ԴԱՏԱՎՈՐ ստորագրություն
ԴԱՏԱՎՈՐՆԵՐ ստորագրություններ

Իսկականի հետ ճիշտ է :


ՆԱԽԱԳԱՀՈՂ ԴԱՏԱՎՈՐ Մ.ՌԵՀԱՆՅԱՆ