Ո Ր Ո Շ ՈՒ Մ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

10 փետրվարի 2010թ. ք.Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂԴԱՏԱՎՈՐ` Ա.ԴԱՆԻԵԼՅԱՆ
ԴԱՏԱՎՈՐՆԵՐ` Մ.ԱՐՂԱՄԱՆՅԱՆ
Մ.ՌԵՀԱՆՅԱՆ

ՔԱՐՏՈՒՂԱՐՈՒԹՅԱՄԲ` Մ.ՄԵԼՔՈՆՅԱՆԻ

ՄԱՍՆԱԿՑՈՒԹՅԱՄԲ`
ՄԵՂԱԴՐՈՂ` Ա.ԵՐԻՑՅԱՆԻ ՏՈՒԺՈՂԻ ԻՐԱՎԱՀԱՋՈՐԴ` Ք.ՉԻԹՉՅԱՆԻ
ՏՈՒԺՈՂԻ ԻՐԱՎԱՀԱՋՈՐԴԻ
ՆԵՐԿԱՅԱՑՈՒՑԻՉ` Է.ՄԱՅՍՈՒՐՅԱՆԻ
ՊԱՇՏՊԱՆ` ՅՈՒ.ԽԱՉԱՏՐՅԱՆԻ


Դռնբաց դատական նիստում քննության առնելով պաշտպանի և տուժողի իրավահաջորդի ներկայացուցչի վերաքննիչ բողոքները` Հայկ Սամվելի Դավթյանի նկատմամբ ՀՀ քր. օր-ի 104 հոդ. 2-րդ մասի 6-րդ կետով, 112 հոդ. 1-ին մասով և 235 հոդ. 2-րդ մասով Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 20.11.2009թ. դատավճռի դեմ.

Պ Ա Ր Զ Ե Ց

Գործի դատավարական նախապատմությունը

26.10.2008թ. հարուցված թիվ 14146608 քրեական գործի նախաքննության ընթացքում.
27.10.2008թ. որոշում է կայացվել Հայկ Սամվելի Դավթյանին ՀՀ քր. օր-ի 104 հոդ. 2-րդ մասի 6-րդ և 7-րդ կետերով և 235 հոդ. 1-ին մասով որպես մեղադրյալ ներգրավելու մասին:
27.10.2008թ. որոշում է կայացվել մեղադրյալ Հայկ Սամվելի Դավթյանի նկատմամբ հետախուզում հայտարարելու մասին:
28.10.2008թ. մեղադրյալ Հայկ Սամվելի Դավթյանը մեղայականով ներկայացել է:
09.02.2009թ. որոշում է կայացվել Հայկ Սամվելի Դավթյանին առաջադրված մեղադրանքը փոփոխելու և լրացնելու մասին
09.02.2009թ. որոշում է կայացվել Հայկ Սամվելի Դավթյանին ՀՀ քր. օր-ի 104 հոդ. 2-րդ մասի 6-րդ կետով, 112 հոդ. 2-րդ մասի 5-րդ կետով և 235 հոդ. 2-րդ մասով որպես մեղադրյալ ներգրավելու մասին:
04.09.2009թ. մեղադրանքի կողմը որոշում է կայացրել Հայկ Սամվելի Դավթյանի կողմից կատարված արարքը ՀՀ քր. օր-ի 104 հոդ. 2-րդ մասի 6-րդ կետով, 112 հոդ. 1-ին մասով և 235 հոդ. 2-րդ մասով վերաորակելու մասին:
07.09.2009թ. քրեական գործը մեղադրական եզրակացությամբ ուղարկվել է Երևանի Արաբկիր և Քանքեռ-Զեյթուն համայնքների ընդհանուր իրավասության դատարան:
Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 20.11.2009թ. դատավճռով.
Ամբաստանյալ Հայկ Սամվելի Դավթյանը մեղավոր է ճանաչվել ՀՀ քր. օր-ի 104 հոդվածի 2-րդ մասի 6-րդ կետով, 112 հոդվածի 1-ին մասով և 235 հոդվածի 2-րդ մասով:
ՀՀ քր.օր-ի 104 հոդվածի 2-րդ մասի 6-րդ կետով դատապարտվել է ազատազրկման 12 /տասներկու/ տարի ժամկետով:
ՀՀ քր.օր-ի 112 հոդվածի 1-ին մասով դատապարտվել է ազատազրկման 5 /հինգ/ տարի ժամկետով:
ՀՀ քր.օր-ի 235 հոդվածի 2-րդ մասով դատապարտվել է ազատազրկման 3 /երեք/ տարի ժամկետով:
ՀՀ քր. օր-ի 66 հոդվածի կանոններով Հայկ Սամվելի Դավթյանի նկատմամբ վերջնական պատիժ է նշանակվել ազատազրկում 14 /տասնչորս/ տարի ժամկետով:
Ընտրված խափանման միջոց կալանքը թողնվել է անփոփոխ մինչև սույն դատավճռի օրինական ուժի մեջ մտնելը:
Պատժի սկիզբը հաշվվել է 28.10.2008թ-ից:
Վճռվել է նաև.
Գործով բոլոր իրեղեն ապացույցները թողնել քրեական գործին կից և դրանց հարցին անրադառնալ սույն քրեական գործից անջատված Հայկազ Հակոբյանի գործով վերջնական դատական ակտով:

Գործի փաստական հանգամանքները.

Հայկ Դավթյանը սպանություն կատարելու ուղղակի դիտավորությամբ հանցագործության կատարման ընթացքում օժանդակություն ստանալու մասին, նախնական համաձայնության գալով Հայկազ Ռաֆիկի Հակոբյանի հետ, նախապես ապօրինաբար ձեռք բերված ինքնաձիգը և ատրճանակը փոխադրելով վերջինիս կողմից վարվող ՚Նիսան-Տիդաՙ մակնիշի 02 ՍՍ 055 պետ. համարանիշի ավտոմեքենա, 2008թ. հոկտեմբերի 26-ին ժամը 14:00-ի սահմաններում Երևանի Թբիլիսյան խճուղու վրա գտնվող լամպերի գործարանի մոտից սկսած Ադոնցի, Գրիբոյեդովի և Կոմիտաս փողոցներով, շուրջ երեք կիլոմետր տարածքում, հանդիպել են իրենց հետ թշնամական հարաբերությունների մեջ գտնվող Հրաչյա Մուշեղի Մաթևոսյանին, որը այդ պահին երթևեկել է Հարություն Բաղդասարի Բաղդասարյանի կողմից վարվող ՚Վազ-2121ՙ մակնիշի 83 ՏՍ 888 պ/հ մեքենայով: Ժամը 14:30-ի սահմաններում հասնելով Վրացական փողոցի 2-րդ նրբանցք մտած ՚Վազ-2121ՙ մակնիշի 83 ՏՍ 888 պ/հ ավտոմեքենային` ակոսավոր հրազեն հանդիսացող ինքնաձիգից, շատերի կյանքի համար վտանգավոր եղանակով, ավտոմեքենաների շուրջ 40-50կմ ժամ արագությամբ ընթանալու պայմաններում, մեքենայի առջևի աջ պատուհանից, շուրջ 10-15 մետր հեռավորությունից, կրակոցներ է արձակել ՚Վազ-2121ՙ մակնիշի 83 ՏՍ 888 պ/հ ավտոմեքենայի մեջ գտնվող Հ.Մաթևոսյանի և Հ.Բաղդասարյանի վրա և հրազենային մարմնական վնասվածքներ պատճառել նրանց: Ղեկավարումը կորցրած ՚Վազ-2121ՙ մակնիշի 83 ՏՍ 888 պ/հ ավտոմեքենան բախվելով Վրացական փողոցի 2-րդ նրբանցքի թիվ 4 տան ցանկապատին` կանգ է առել: Շարունակելով իր հանցավոր դիտավորությունը, Հ.Դավթյանը մոտեցել է վթարված մեքենային, բացել առջևի ձախ դուռը, մեքենայից քաշելով հանել է վարորդ Հ.Բաղդասարյանին, գցել գետնին, ինքնաձիգի խզակոթով հարվածներ հասցրել նրա գլխին, որից հետո գոտկատեղում կրած, ակոսավոր հրազեն հանդիսացող ատրճանակից ստուգողական կրակոցներ է արձակել Հ.Մաթևոսյանի գլխին և նստելով իրեն սպասարկող Հայկազ Հակոբյանի մեքենան` վերջինիս հետ միասին դիմել փախուստի:

Վերաքննիչ բողոքների հիմքերը, հիմնավորումները և պահանջը.

Պաշտպանը վկայակոչելով իր իսկ վերաքննիչ բողոքում նշված պատճառաբանությունները` դատարանի դատավճիռն անհիմն և անօրինական լինելու, գործի փաստական հանգամանքներից չբխելու, քրեադատավարական և նյութական օրենքի էական խախտմամբ կայացված լինելու, ապացույցների ոչ վերաբերելի լինելու, ենթադրություններով և չփարատված կասկածներով մեղադրանք առաջադրելու, մրցակցության սկզբունքը խախտելու և այլնի վերաբերյալ, խնդրել է Երևան քաղաքի Արաբկիր և Քանաքեռ-Զեյթուն վարչական շրջաների ընդհանուր իրավասության դատարանի թիվ ԵԱՔԴ/0124/01/09 քրեական գործով կայացված 20.11.2009թ. դատավճիռը բեկանել և փոփոխել` Հայկ Սամվելի Դավթյանի նկատմամբ պատժատեսակ և պատժաչափ սահմանել ՀՀ քր. օր-ի 105 հոդ. 1-ին մասով` հոգեկան խիստ հուզմունքի վիճակում կատարված սպանության, 120-րդ հոդ. 1-ին մասով` անզգուշությամբ առողջությանը ծանր վնաս պատճառելու և 235-րդ հոդ. 1-ին մասով` ապօրինի կերպով հրազեն ձեռք բերելու, պահելու, փոխադրելու հանցագործությունները կատարելու համար: Միջնորդել է նշանակել դատահոգեբանական և դատահոգեբուժական համալիր փորձաքննություն` Հայկ Դավթյանի մոտ ֆիզիոլոգիական աֆեկտիվ վիճակի կամ հոգեկան հիվանդության հանգամանքի հաստատման կամ մերժման վերաբերյալ:
Տուժողի իրավահաջորդի ներկայացուցիչը վկայակոչելով իր իսկ վերաքննիչ բողոքում նշված պատճառաբանությունները` մեղմ պատիժ սահմանելու և այլնի վերաբերյալ, դիմել է վերաքննիչ դատարան, որ Հայկ Դավթյանի նկատմամբ ավելի խիստ պատիժ սահմանվի:

Վերաքննիչ դատարանի պատճառաբանությունները և եզրահանգումը.

Վերաքննիչ բողոքների հիմքերի և հիմնավորումների սահմաններում վերլուծելով գործի նյութերը, վերաքննիչ դատարանը հանգում է այն հետևության, որ պաշտպանի և տուժողի իրավահաջորդի ներկայացուցչի վերաքննիչ բողոքները պետք է մերժել հետևյալ պատճառաբանությամբ:
Գործի քննության ընթացքում Հայկ Դավթյանը իրեն մեղավոր է ճանաչել մասնակիորեն, այն է` ապօրինի զենք և զինամթերք ձեռք բերելու, պահելու, կրելու համար պատճառաբանելով, որ մեղադրանք առաջադրելու որոշման մեջ նկարագրվածը չի համապատասխանում իր կողմից կատարած արարքին և դեպքի կապակցությամբ տրված ցուցմունքով հայտնել է, որ 2007թ. նոյեմբերի 8-ին հորեղբոր Ս.Դավթյանի սպանությունից հետո իր և Հրաչյա Մաթևոսյանի միջև հարաբերությունները եղել են լարված, այն բանի համար, որ ինքը վերջինիս կասկածել է հորեղբոր սպանության կազմակերպման մեջ: Նշված հարաբերությունների ընթացքում Հ.Մաթևոսյանը բազմիցս սպառնացել է իրեն, որպեսզի անհիմն չհոլովի իր անունը` հորեղբոր սպանության գործում, հակառակ դեպքում իրեն չեն ների դրա համար:
2008թ. հոկտեմբերի 26-ին ինքը հորեղբոր որդի Հայկազ Հակոբյանի, իրեն ծանոթների և բանվորների հետ գնացել են հանգուցյալ Ս.Դավթյանի գերեզմանոց և կատարել են վերանորոգման աշխատանքներ: Այդ օրը գերեզմանոցում նկատել է անծանոթ անձանց և կարծել է, որ իրեն հետապնդում են: Հ.Հակոբյանից վերցրել է վերջինիս անձնական օգտագործման ՚Նիսան-Տիդաՙ մակնիշի 02 ՍՍ 055 պետ. համարանիշի ավտոմեքենան, առանց վերջինիս տեղեկացնելու իր գնալու նպատակի մասին, վերադարձել է տուն և ավտոտնակում պահած ինքնաձիգը փամփուշտներով վերցնելով այն տեղավորել է մեքենայի հետևի ձախ մասի ուղևորի ոտքերի տակի հատվածում և վերադարձել գերեզմանատուն: Մոտ 30 րոպե հետո գերեզմանոցում մնալուց հետո` ժամը 14:00-ի սահմաններում, սննդամթերք գնելու և բանվորներին կերակրելու նպատակով Հ.Հակոբյանի վերը նշված մեքենայով, որը վարել է վերջինս, ուղևորվել են Կոմիտասի շուկա: Գրիբոյեդովի և Կոմիտասի փողոցների հատման խաչմերուկում աջ կողմից իրենց է հավասարվել ՚Վազ-2121ՙ մակնիշի 83 ՏՍ 888 պ/հ ավտոմեքենան և այդ պահին վարորդի դռան ապակին կիսով չափ իջեցնելուց հետո նկատել է Հրաչյա Մաթևոսյանին, որը ատրճանակն ուղղել է իր վրա և կրակել: Քանի որ ավտոմեքենան գտնվել է դանդաղ ընթացքի մեջ, ուստի գնդակը իրեն չի կպել, այն կպել է ավտոմեքոնայի աջ կողմի վերին մասին: Այդ պահին ավտոմեքենայի հետևի ձախ մասից ամիջապես վերցրել է այնտեղ պահված ինքնաձիգը և մի պահ նկատել է, որ ՚Վազ-2121ՙ մակնիշի 83 ՏՍ 888 պ/հ ավտոմեքենան փորձում է փակել իրենց ավտոմեքենայի առջևը: Տեսնելով այդ Հ.Հակոբյանին առաջարկել է ամեն գնով չթողնել, որ վերջիններս փակեն ավտոմեքենայի առջևը: Այնուհետև, իր առաջարկությամբ Հակոբյանը ավտոմեքենան վարել է ՚Վազ-2121ՙ մակնիշի 83 ՏՍ 888 պ/հ ավտոմեքենայի հետևից, իսկ վերջինս Կոմիտասի պողոտայից ամիջապես ձախ թեքվելով մտել է շենքերի բակ, իրենք էլ նրանց հետևից: Ընթացքի ժամանակ ինքը ավտոմեքենայի առջևի աջ դռան պատուհանից` մարմնի կեսի չափով դուրս գալով, ինքնաձիգից կրակահերթ է արձակել առջևից ընթացող ՚Վազ-2121ՙ մակնիշի 83 ՏՍ 888 պ/հ ավտոմեքենայի վրա, որի արդյունքում նշված ավտոմեքենան բախվել է դիմացի առանձնատան ցանկապատին ու կանգնել: Իրենք նույն պես կանգնել են ավտոմեքենայի մոտ 5 մետր հեռավորության վրա և ինքնաձիքը ձեռքին ինքը իջել է ավտոմեքենայից: Մոտենալով ՚Վազ-2121ՙ մակնիշի 83 ՏՍ 888 պ/հ ավտոմեքենայի աջ կողմին, դուռը բացելով նկատել է Հ.Մաթևոսյանին վարորդի կողքին նստած, աչքերը փակ և մարմնի կեսով չափ դեպի վարորդի կողմը թեքված վիճակում: Դուռը բացելու պահին Հրաչի աջ ձեռքից գետին է ընկել ատրճանակ, որը ինքը ոտքով հրել է մեքենայի հետնամաս: Ենթադրելով, որ ավտոմեքենայի վարորդը կարող է նույնպես զինված լինել, ամիջապես մոտեցել է վարորդին և նկատել, որ վարորդը հանդիսանում է իր ծանոթ Հարություն Բաղդասարյանը, որը այդ պահին ընկած է եղել մարմնի կիսով չափ ՚ասֆալտիՙ վրա, իսկ ոտքերը եղել են ավտոմեքենայի ներսում: Տեսնելով, որ Հարությունի մոտ զենք չկա, իր ձեռքին եղած ինքնաձիգի խզակոթով մի քանի հարվածներ է հասցրել նրա պարանոցի հատվածին, այնուհետև շրջանցելով մեքենան, վերցրել է Հրաչի ձեռքից գետին ընկած ատրճանակը, դրել գոտկատեղում և փորձել հեռանալ: Սակայն վերապրելով Սայադի սպանության դեպքը գոտկատեղից նորից հանելով ատրճանակը, այն ուղղելով ՚Վազ-2121ՙ մակնիշի 83 ՏՍ 888 պ/հ ավտոմեքենայի աջ մասում նստած Հ.Մաթևոսյանին, կրակել է այնքան, մինչև փամփուշտները վերջանան: Կրակոցներից հետո դեպքի վայրից Հ.Հակոբյանի կողմից վարած ՚Նիսան Տիդաՙ մակնիշի ավտոմեքենայով թողել հեռացել է` իր հետ վերցնելով ատրճանակը և ինքնաձիգը:
Հայտնել է նաև, որ ինքը հաստատապես համոզված լինելով, որ Հրաչ Մաթևոսյանի կազմակերպմամբ և նրա անմիջական մասնակցությամբ է կատարվել իր հորեղբայր` Սայադ Դավթյանի սպանությունը, ինքը վրեժ է լուծել և սպանել է Հրաչ Մաթևոսյանին:
Բացի այդ նա պնդել է, որ դեպքի օրը առաջինը Հ.Մաթևոսյանն է իր մոտ եղած ատրճանակից կրակել իր վրա, որը սակայն իրեն չի կպել, այլ կպել է ՚Նիսան-Տիդաՙ ավտոմեքենայի աջ կողմի ՚Ստոյկայիՙ վերին մասին, ինքն է սպանել Հրաչին, որպեսզի վերջինս իրեն չսպանի:
Ճանապարհին ատրճանակը քանդել և դեն է նետել ինչ որ ջրափոսի մեջ: Դեպքից երկու օր անց կամովին ներկայացել է քննության` ներկայացնելով ատրճանակն ու ինքնաձիգը:
Վերաքննիչ դատարանը հանգում է այն հետևության, որ ամբաստանյալ Հայկ Սամվելի Դավթյանին ՀՀ քր. օր-ի ՀՀ քր. օր-ի 104 հոդվածի 2-րդ մասի 6-րդ կետով, 112 հոդվածի 1-ին մասով և 235 հոդվածի 2-րդ մասով մեղսագրված արարքները հիմնավորվում, իսկ պաշտպանության կողմի վերը բերված պատճառաբանությունները պաշտպանյալի պատասխանատվությունը հնարավորինս նվազեցնելու և այլնի վերաբերյալ հերքվում են գործով ձեռք բերված հետևյալ ապացույցներով.
Տուժող Հարություն Բաղդասարյանի գործի քննության ընթացքում տված ցուցմունքներով այն մասին, որ 2008թ. հոկտեմբերի 26-ին ժամը 14:00-ի սահմաններում նախնական պայմանավորվածության համաձայն, իր անձնական օգտագործման ՚Վազ-2121ՙ մակնիշի 83 ՏՍ 888 պ/հ ավտոմեքենայով, իր ընկեր Հրաչյա Մաթևոսյանի հետ Քանաքեռից գնացել են Երևանի Կոմիտաս 48ա շենք, որտեղ իրենց է սպասել իրենց ընկեր Սուրեն Եղիազարյանը: Պայմանավորվածության համաձայն, Սուրենին վերցնելուց հետո միասին պետք է գնային վերջինիս աներոջ ամառանոց, որը գտնվում է Աշտարակի Նազրվան գյուղում: Անցնելով ՚Ծարավ Աղբյուրՙ կոչվող փողոցով շարժվել են դեպի Թբիլիսյան խճուղի և ՚Երազՙ գործարանի մոտով թեքվել աջ: Այնուհետև, Գրիբոյեդովի փողոցից դուրս են եկել Կոմիտաս պողոտա, նշված հատվածում մոտ 20մ հեռավորությունից նկատել է, որ իրենց հետևից գալիս է ՚Նիսան Տիդաՙ մակնիշի ավտոմեքենա և ճանաչել է, որ այդ ավտոմեքենան Սայադ Դավթյանի որդու Հայկազի ավտոմեքենան է: Հասնելով ՚Դայանաՙ հագուստի խանութի դիմաց գտնվող ՚Միլենաՙ խանութի մոտ ձախ է թեքվել և մտել Վրացական 2-րդ նրբանցք, որպեսզի մոտենա իր ընկեր Սուրենեց` թիվ 48ա շենքին: Մի քանի մետր տարածություն անցնելով լսել է ինքնաձիգի կրակոցի ձայներ և ավտոմեքենայի ետնամաս նայող հայելիով նկատել է, որ ՚Նիսան Տիդաՙ ավտոմեքենայի առջևի աջ դռան պատուհանից մարմնի կեսով չափ դուրս եկած վիճակում Հայկը ինքնաձիգը ձեռքին կրակահերթեր է արձակել իրենց վրա: Գնդակներից մեկը կպել է իր գոտկատեղի հետևի մասին և զգալով, որ Հայկը իրենց վրա է կրակում, ավտոմեքենայի արագությունը ավելի է զարգացրել, որպեսզի կարողանա փախուստի դիմել: Սակայն իր ընկեր Սուրենենց շենքի մոտ, արդեն իսկ վիրավորված վիճակում չկարողանալով կառավարել ավտոմեքենան, առջևի մասով բախվել է դիմացի առանձնատան ցանկապատին ու կանգնել և կորցրել գիտակցությունը: Հիվանդանոց տեղափոխվելուց հետո գիտակցության գալով տեղեկացել է, որ Հ.Մաթևոսյանը կրակոցներից մահացել է: Միաժամանակ նշել է նաև, որ Հ.Դավթյանի և Հ.Հակոբյանի այն պատճառաբանությունները, թե իբր դեպքի օրը իրենք Գրիբոյեդով և Կոմիտաս փողոցների խաչմերուկում իր կողմից վարած ՚Նիվաՙ մակնիշի ավտոմեքենայով հարվածել են ՚Նիսան Տիդաՙ մակնիշի ավտոմեքենային և ավտոմեքենայի աջ պատուհանից Հրաչյա Մաթևոսյանը կրակել է Հայկի վրա` ճիշտ չէ, չի համապատասխանում իրականությանը, քանի որ հետապնդողը ոչ թե իրենք են եղել, այլ Հ.Հակոբյանը և Հ.Դավթյանը:
Վկա Բաղդասար Բաղդասարյանի գործի քննության ընթացքում տված ցուցմունքով այն մասին, որ 26.10.2008թ. ժամը 14:00-ի սահմաններում, ինքը իր հարսի հետ միասին դուրս է եկել տանից գնումներ կատարելու` 27.10.2008թ. իր ծննդյան օրվա կապակցությամբ: ՚Երազՙ գործարանի դիմացի ճանապարհով երթևեկելիս նկատել է հանդիպակած ուղղությամբ ընթացող` իր որդու ավտոմեքենան և այդ պահին ինքը հարսից տեղեկացել է, որ Հարությունը հրավիրված է Աշտարակ` ընկերների հետ ժամանակ անցկացնելու: Հարսին տուն իջեցնելուց հետո, մոտ 15 րոպե անց վերջինս իրեն է զանգահարել և հայտնել, որ շտապ գնա ՚Միքայելյանիՙ անվան ԲԿ: Հիվանդանոցի վերակենդանացման բաժանմունքում տեղեկացել է, որ որդու գոտկատեղում առկա է հրազենային վնասվածք: Իր այն հարցին թե ով է ՚խփելՙ, որդին պատասխանել է, որ Սայադի եղբոր որդին` Հայկը:
Վկա Սուրեն Եղիազարյանի գործի քննության ընթացքում տված ցուցմունքով այն մասին, որ 26.10.2008թ. ժամը 10-ից 11:00-ի սահմաններում զանգահարել է իր ուսանողական ընկերոջը` Հրաչյա Մաթևոսյանին, ընկեր Հարություն Բաղդասարյանին և առաջարկել վերջիններիս գնալ Աշտարակ, Նազրվան գյուղ` գառ ուտելու: Համաձայն պայմանավորվածության, ինքը ժամը 13:00-ի սահմաններում, ավտոշուկայից շուտ վերադարձել է տուն և սպասել նրանց: Ժամը 14:00-ի սահմաններում կրկին զանգահարել է նրանց և Հարությունը պատասխանել է, որ Հրաչի հետ ճանապարհին են, քիչ հետո կհասնեն: Հարությունի հետ խոսելուց հետո, 15-20 րոպե անց, շենքի բակից լսել է կրակոցի ձայներ և չհասկանալով, թե ինչ է կատարվում, դուրս է եկել բակ, որտեղ էլ տեսել է շենքի բնակիչներին, որոնք վազելով մոտեցել են շենքի առաջին մուտքին: Ինքը նույնպես մոտենալով տեսել է, որ մուտքի դիմաց գտնվող առանձնատան ցանկապատին բախվել է Հարությունի կողմից վարած ՚Վազ-2121ՙ մակնիշի 83 ՏՍ 888 պ/հ ավտոմեքենան: Մոտենալով ավտոմեքենային տեսել է Հարությունին ավտոմեքենայի ձախ կողմում գետնին ընկած և գոտկատեղի մասը եղել է արնաշաղախ վիճակում: Այդ պահին Հարությունը ոչինչ չի խոսել, բացառությամբ հայտնելով, որ իրեն փրկեն: Այնուհետև մոտենալով ավտոմեքենայի աջ մասին տեսել է Հրաչյային վարորդի աջ կողմում նստած, մահացած վիճակում` գլուխը թեքված վարորդի կողմը: Տեսել է նաև, որ ավտոմեքենայի նստատեղի պաստառները և տանիքը այրվում է և հավաքված մարդկանց օգնությամբ հաջողվել է կանխել հրդեհը: Մի քանի րոպե անց դեպքի վայր է եկել շտապօգնության մեքենան և Հարությունին տեղափոխել են հիվանդանոց, իսկ ինքը վատ զգալով կատարվածից` թողել հեռացել է:
Դեպքի վայրի` Կոմիտաս 48ա շենքի մոտ գտնված վկաներ Փայլակ Դիլանյանի, Գոհար Ալիխանյանի, Սոնա և Աննա Եսայանցների, Հրայր և Մարինե Պողոսյանների, Լիաննա Պողոսյանի, Քրիստինե Սիմոնյանի, Արթուր Գևորգյանի գործի քննության ընթացքում տված նույնաբովանդակ ցուցմունքներով:
Վկա Քնարիկ Չիթչյանի գործի քննության ընթացքում տված տված ցուցմունքներով այն մասին, որ 26.10.2008թ. ժամը 14:00-ի սահմաններում, ինքը դուրս է եկել տանից և գնացել հիվանդանոց բուժում ստանալու: Այդ պահին իր որդին` Հրաչը գտնվել է տանը: Վերջինս տեղեկացել է, որ նա հրավիրված է Աշտարակի Նազրվան գյուղ` ընկերների հետ ժամանակ անցկացնելու և մի քանի րոպեից դուրս պետք է գա տանից: Հիվանդանոց հասնելուց հետո, երբ զանգահարել է տուն հարսը` Աննան, իրեն տեղեկացրել է, որ շտապ տուն գա: Տուն հասնելուն պես տեղեկացել է, որ իր որդուն` Հրաչին վերջինիս ընկեր Սուրեն Եղիազարյանենց տան մոտ սպանել են: Միաժամանակ հայտնել է, որ Հրաչը եղել է իր ընկերոջ Հարութի հետ միասին` վերջինիս ՚Նիվաՙ ավտոմեքենայով: Հայտնել է նաև, որ 2007թ. հոկտեմբերի 8-ին տեղի ունեցած Սայադ Դավթյանի սպանությունից հետո վերջինիս հարազատները կասկածել են իր որդուն` Հրաչին, սակայն նա ոչ մի կապ չի ունեցել այդ սպանության հետ:
Դեպքի վայրի զննության, ՚Միքայելյանիՙ անվան բժշկական կենտրոնի ընդունարանի կրիմինալ մատյանի զննության արձանագրություններով, դատաբժշկական փորձաքննության թիվ 1777/հ, դատաձգաբանական փորձաքննության թիվ 2446 և թիվ 2421, ապրանքագիտական փորձաքննության թիվ 43430810, դատաբժշկական փորձաքննության թիվ 988, դատահրդեհատեխնիկական փորձաքննության թիվ 42950804 եզրակացություններով:
Իրեղեն ապացույց ճանաչված և դեպքի վայրից հայտնավերված 33 հատ պարկուճներով, ատրճանակի 6 հատ պարկուճներով, 3 գնդակներով, Հ.Դավթյանի ներկայացրած 44621 համարի ինքնաձիգով և ԼՍ 4107 համարի ատրճանակով, առգրավված Հ.Բաղդասարյանի և Հ.Մաթևոսյանի հագուստներով, ՚ՎԱԶ 2121ՙ մակնիշի 83 ՏՍ 888 պ/հ ավտոմեքենայով և ՚Նիսան Տիդաՙ մակնիշի 02 ՍՍ 055 պ/հ ավտոմեքենայով:
Դատահոգեբուժական փերձաքննության եզրակացությամբ, ինչպես նաև փորձաքննության ներկայացված հագուստներով, ձգաբանության և պայթունատեխնիկական փորձաքննության եզրակացությամբ:
Գործում առկա փորձագետի թիվ 14146608 եզրակացության համաձայն հաշվի առնելով հետազոտվող ՚Նիսան Տիդաՙ մակնիշի ավտոմեքենայի վրա առկա վնասվածքի տեղակայումը, ուղղությունը, դիտասևեռման արդյունքում ստացաված թվային տվյալները, ավտոմեքենանների փոխադարձ դիրքերը լուսաֆորի մոտ, դեպքի վայրի ճանապարահատվածի թեքության աստիճանը, ՚ՎԱԶ 2121ՙ մակնիշի ավտոմեքենայի կոնստրուկտիվ հատկանիշները, Հարություն Բաղդասարյանի մարմնակազմությունը, մեքենաների շարժման արագությունը թույլ է տալիս կրակոցի հանգամանքը ՚ՎԱԶ 2121ՙ մակնիշի ավտոմեքենայից համարել քիչ հավանական:
Գնահատելով ամբաստանյալ Հայկ Դավթյանի գործի քննության ընթացքում տված ցուցմունքները, դրանք համադրելով միմյանց և գործով ձեռք բերված մյուս փաստական տվյալների հետ վերաքննիչ դատարանը ոչ արժանահավատ է համարում վերջինիս կողմից բերված պատճառաբանություններն իր իսկ պատասխանատվությունը հնարավորինս նվազեցնելու և այլնի վերաբերյալ, քանի որ դրանք չեն բխում գործի օբյեկտիվ տվյալներից, որով փորձ է արվում հնարավորինս խուսափել քրեական պատասխանատվությունից:
Տվյալ դեպքում պաշտպանության կողմի պատճառաբանություններն այն մասին, որ պաշտպանյալը դեպքի պահին գտնվել է հոգեկան խիստ հուզված վիճակում, որի պայմաններում էլ կատարել է հանցանքը, անհիմն է և չի բխում գործի օբյեկտիվ տվալներից, նկատի ունենալով, որ վերջինիս գործողությունները ուղղված են եղել Հ.Մաթևոսյանին ուղղակի դիտավորությամբ կյանքից զրկելուն, վրեժի հողի վրա ձևավորված նկատառումներից ելնելով, որն էլ իրականացրել է, հետևաբար վերջինիս գործողությունները ըստ էության պայմանավորված չեն եղել հանկարծակի ծագած հոգեկան խիստ հուզված վիճակից, այդ մասին վկայող բավարար հիմքեր առկա չեն:
Բացի այդ, գործի քննության ընթացքում Հ.Դավթյանը ըստ էության չի ժխտել, որ Հ.Մաթևոսյանին սպանել է վրեժից ելնելով և որ վերջինս հետապնդել է իրեն:
Գործի քննության ընթացքում Հայկ Դավթյանի նկատմամբ նշանակվել է ամբուլատոր դատահոգեբուժական փորձաքննություն:
ՀՀ ԱՆ կից ամբուլատոր դատահոգեբուժական փորձագիտական հանձնաժողովի 13.03.2009թ. թիվ 59/09 եզրակացության համաձայն հանձնաժողովը հանգել է եզրակացության, որ Հայկ Սամվելի Դավթյանը որևէ հոգեկան հիվանդությամբ չի տառապել և չի տառապում, նրա մոտ հայտնաբերվում են բնավորության փսիխոպաթիկ գծեր /տարած գանգուղեղային վնասվածքի հետևանքով/: Որպես հոգեկան հիվանդությամբ չտառապող անձնավորություն փորձաքննվողը կարող էր և կարող է հաշիվ տալ իրեն իր գործողությունների համար և ղեկավարել դրանք ինչպես իրավախախտումը կատարելու պահին, այնպես էլ ներկայումս: Ուստի Հայկ Սամվելի Դավթյանին իրեն մեղսագրվող արարքների նկատմամբ հարկ է ճանաչել մեղսունակ: Իր ներկա հոգեկան վիճակով նա կարող է մասնակցել դատաքննչական գործողություններին:
Նման պայմաններում, անդրադառնալով պաշտպանության կողմի միջնորդություններին պաշտպանյալի նկատմամբ դատահոգեբանական և դատահոգեբուժական համալիր, ինչպես նաև կրկնակի դատահոգեբուժական փորձաքննություններ նշանակելու վերաբերյալ, վերաքննիչ դատարանը հանգում է հետևության, որ Հ.Դավթյանի վերաբերյալ վերը վկայակոչված համապատասխան հանձնաժողովային փորձաքննության եզրակացության առկայության պայմաններում, վերջինիս նկատմամբ վերստին փորձաքննություններ նշանակելու անհրաժեշտություն չկա և միջնորդություններով բերված պատճառաբանություններն դրանք բավարարելու հիմք համարվել չեն կարող:

Այսպիսով, վերլուծելով գործի փաստական տվյալները, գնահատելով ինչպես յուրաքանչյուր ապացույց, այնպես էլ դրանք իրենց համակցությամբ վերաքննիչ դատարանը հանգում է այն հետևության, որ ամբաստանյալ Հայկ Դավթյանին ՀՀ քր. օր-ի 104 հոդ. 2-րդ մասի 6-րդ կետով, 112 հոդ. 1-ին մասով և 235 հոդ.. 2-րդ մասով մեղսագրված արարքները հիմնավորվում են և նա պետք է քրեական պատասխանատվության և պատժի ենթարկվի:
Նման պայմաններում, վերը նշված հանգամանքների առկայության պայմաններում, պաշտպանության կողմի վերաքննիչ բողքում բերված պատճառաբանություններն անհիմն են և այն բավարարելու հիմք համարվել չեն կարող:
Քննության առնելով ամբաստանյալ Հայկ Դավթյանի նկատմամբ նշանակված պատժի հարցը վերաքննիչ դատարանը հաշվի է առնում ամբաստանյալի կատարած հանցագործությունների բնույթը և վտանգավորության աստիճանը, կատարման հանգամանքները, դատական ակտում շարադրված ամբաստանյալի անձը բնութագրող տվյալներն այն, որ երիտասարդ է, վատառողջ է, բնութագրվում է դրական, ամուսնացած է խնամքին ունի երկու անչափահաս երեխաներ, չաշխատող կինը և մայրը, պատասխանատվությունը մեղմացնող հանգամանք` մեղայականով վարույթն իրականացնող մարմնին ներկայանալը, ինչպես նաև պատասխանատվությունն ծանրացնող հանգամանքների բացակայությունը, և հանգում է այն հետևության, որ տվյալ դեպքում վերջինիս նկատմամբ հանցանքների համակցությամբ նշանակվել է ազատազրկման ձևով պատիժ, ինչը տվյալ դեպքում խստացման առումով փոփոխելու հիմքեր չկան:
Ինչ վերաբերում է տուժողի իրավահաջորդի ներկայացուցչի վերաքննիչ բողոքում բերված պատճառաբանությանն, ապա տվյալ դեպքում այն բավարարելու հիմք համարվել չի կարող:
Վերոգրյալի հիման վրա և ղեկավարվելով ՀՀ քր. դատ. օր-ի 393-394 հոդվածներով վերաքննիչ դատարանը


Ո Ր Ո Շ Ե Ց


Հայկ Սամվելի Դավթյանի նկատմամբ ՀՀ քր. օր-ի 104 հոդ. 2-րդ մասի 6-րդ կետով, 112 հոդ.1-ին մասով և 235 հոդ. 2-րդ մասով Երևանի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 20.11.2009թ. դատավճիռը թողնել օրինական ուժի մեջ, իսկ պաշտպանի և տուժողի իրավահաջորդի ներկայացուցչի վերաքննիչ բողոքները մերժել:
Սույն որոշումը կարող է բողոքարկվել ՀՀ Վճռաբեկ դատարան հրապարակման պահից մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ

Իսկականի հետ ճիշտ է.



ՆԱԽԱԳԱՀՈՂ ԴԱՏԱՎՈՐ` Ա.ԴԱՆԻԵԼՅԱՆ