գործ No ԵԱՔԴ 0123/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
մեղադրող` Ա. Աղայանի
ամբաստանյալ` Ա. Ումրոյանի
պաշտպան` Է. Վարդանյանի
տուժող` Ս. Եսայանի

2010թ. հունվարի 26-ին, Երևան քաղաքում, դռնբաց դատական նիստում, արագացված դատաքննության կարգով, քննելով քրեական գործն ըստ մեղադրանքի Արմեն Գուրգենի Ումրոյանի, ծնված 17.04.1973թ. Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես առողջ, ամուսնալուծված, նախկինում չդատված, չի աշխատել, մշտական բնակության վայր չունի:
Մեղադրվում է ՀՀ քրեական օրենսգրքի 176 հոդվածի 1-ին մասով:
Պ Ա Ր Զ Ե Ց

1.Գործի դատավարական նախապատմությունը.
2009թ. հունիսի 08-ին ՀՀ ոստիկանության ՔԳՎ Երևանի քննչական վարչության Արաբկիրի քննչական բաժնում ՀՀ քրեական օրենսգրքի 176 հոդվածի 1-ին մասի հատկանիշներով հարուցվել է թիվ 14155809 քրեական գործը:
2009թ. հունիսի 25-ին Արմեն Գուրգենի Ումրոյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 176 հոդվածի 1-ին մասով և նրա նկատմամբ որպես խափանման միջոց ընտրվել է ստորագրություն չհեռանալու մասին:
2009թ. սեպտեմբերի 08-ին թիվ 14155809 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարան:
2009թ. սեպտեմբերի 08-ին քրեական գործն ընդունվել է վարույթ և նշանակվել դատաքննության 2009թ. սեպտեմբերի 18-ին:
Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանի 2009թ. սեպտեմբերի 18-ի որոշմամբ Արմեն Գուրգենի Ումրոյանի նկատմամբ հայտարարվել է հետախուզում և նրա նկատմամբ որպես խափանման միջոց ընտրվել է կալանքը:
2009թ. հոկտեմբերի 10-ին Արմեն Ումրոյանը հայտնաբերվել և կալանավորվել է:
2.Գործի փաստական հանգամանքները.
Նախաքննության մարմինն ամբաստանյալ Արմեն Գուրգենի Ումրոյանին մեղադրանք է առաջադրել հետևյալ արարքի համար.
Մշտական բնակության վայր չունեցող, թափառաշրջիկ Արմեն Ումրոյանը 2009թ. հունիսի 8-ին, ժամը 1730-ի սահմաններում Երևան քաղաքի Կասյան փողոցի թիվ 2 հասցեում գտնվող վարագույրների խանութում, օգտվելով այն հանգամանքից, որ վաճառող Սուսաննա Եսայանն իր ՙՍամսունգ՚ տեսակի բջջային հեռախոսը դրել է վաճառասեղանին, բացահայտ հափշտակել է այն և դիմել փախուստի` Ս.Եսայանին պատճառելով 10.000 ՀՀ դրամի` զգալի չափերի գույքային վնաս:
3. Արագացված դատական քննություն .
Մինչև դատաքննությունն սկսելն ամբաստանյալ Արմեն Ումրոյանը միջնորդել է դատական քննությունն անցկացնել արագացված կարգով և հայտարարել, որ առաջադրված մեղադրանքն իրեն պարզ է, համաձայն է իրեն առաջադրված մեղադրանքին, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացրել է կամավոր` պաշտպանի հետ խորհրդակցելուց հետո:
Միջնորդությունը հաստատել է նաև ամբաստանյալի պաշտպան Է.Վարդանյանը:
Մեղադրող Ա.Աղայանը դատական քննության արագացված կարգ կիրառելուն չի առարկել:
Դատարանը համոզվելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, որոշում է կայացրել արագացված կարգով դատական քննության անցկացնելու մասին:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Արմեն Գուրգենի Ումրոյանին առաջադրված մեղադրանքը` ՀՀ քրեական օրենսգրքի 176 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 176 հոդվածի 1-ին մասի հատկանիշներին և արարքի որակումը ճիշտ է:
Արմեն Ումրոյանի նկատմամբ պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի անձը դրականորեն բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, նախկինում դատված չի եղել, ինչպես նաև տուժողի խնդրանքը ամբաստանյալի նկատմամբ մեղմ պատիժ նշանակելու վերաբերյալ:
Ամբաստանյալի պատասխանատվությունը և պատիժը ծանրացնող հանգամանքներ չկան:
Դատարանը գտնում է, որ պատժի նպատակներին հասնելու համար Արմեն Գուրգենի Ումրոյանի նկատմամբ պատիժ պետք է նշանակել ազատազրկման ձևով:
Նկատի ունենալով, որ տուժող Սուսաննա Եսայանը հրաժարվել է քաղաքացիական հայցի պահանջից, դատարանը գտնում է, որ այդ հարցը պետք է համարել լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360, 3753-3754 հոդվածներով, դատարանը

Վ Ճ Ռ Ե Ց

Արմեն Գուրգենի Ումրոյանին մեղավոր ճանաչել ՀՀ քրեական օրենսգրքի 176 հոդվածի 1-ին մասով և նրան դատապարտել ազատազրկման ութ (8) ամիս ժամկետով:
Պատժի սկիզբը հաշվել 2009թ. հոկտեմբերի 10-ից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Արմեն Գուրգենի Ումրոյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Տուժող Սուսաննա Եսայանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:
Դատավճիռը չի կարող բողոքարկվել ՀՀ քրեական դատավարության օրենսգրքի 395 հոդվածի 1-ին կետով նախատեսված հիմքով:

ԴԱՏԱՎՈՐ Լ. ԱՎԵՏԻՍՅԱՆ