Գործ հ. ԵԱՔԴ/0117/01/09

Ո Ր Ո Շ ՈՒ Մ
Հ Ա Ն Ո Ւ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ Ո Ւ Թ Յ Ա Ն

25 մարտի 2010թ. ք.Երևան

Հայաստանի Հանրապետության վերաքննիչ քրեական դատարանը
/այսուհետ` Վերաքննիչ դատարան/ հետևյալ կազմով`

ՆԱԽԱԳԱՀՈՂ ԴԱՏԱՎՈՐ` Ա.ՀՈՎՀԱՆՆԻՍՅԱՆ
ԴԱՏԱՎՈՐՆԵՐ` Ե.ԴԱՐԲԻՆՅԱՆ
Ս.ՉԻՉՈՅԱՆ
ՔԱՐՏՈՒՂԱՐՈՒԹՅԱՄԲ` Ա.ՄՈՒՐԱԴՅԱՆԻ
ՄԱՍՆԱԿՑՈՒԹՅԱՄԲ`
ՄԵՂԱԴՐՈՂ` Լ.ՄԱՆՈՒԿՅԱՆԻ
ՊԱՇՏՊԱՆ` Ա.ԳՐԻԳՈՐՅԱՆԻ

Դռնբաց դատական նիստում քննության առավ քրեական գործն ըստ մեղադրանքի` Արթուր Գառնիկի Պետրոսյանի, ծնված 11.06.1971թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, խնամքին չորս անձ, նախկինում դատապարտված` 15.07.2004թ-ին ՀՀ քր. օր-ի 113 հոդվածի 1-ին մասով, 183 հոդվածի 1-ին մասով, 177 հոդվածի 1-ին մասով դատապարտվել է 1 տարի ազատազրկման, 07.09.2004թ-ին պատժի կրումից ազատվել է պայմանական վաղակետ 6 ամիս 15 օր չկրած ժամկետով, դատվածությունը մարված, բնակվում է ք.Երևան, Ֆուչիկի 23 շենք 37 բնակարանում: Կալանքի տակ է 19.06.2009թ-ից:
Մեղադրվում է ՀՀ քր. օր.-ի 268հդ.-ի 2-րդ մասի 2-րդ կետով, 266հդ.-ի 4-րդ մասով:
Ֆելիքս Մարտինի Խաչատրյանի` ծնված 19.10.1965թ.,ք.Երևան, ազգությամբ հայ, ՀՀ քաղաքացի, միջնակարգ մասնագիտական կրթությամբ, ամուսնացած, չի աշխատում, նախկինում չդատված, բնակվում է ք.Երևան Նոր-Արեշ 11 փող. նրբանցք 14 տուն: Կալանքի տակ է 20.06.2009թ-ից:
Մեղադրվում է ՀՀ քր. օր.-ի 266հդ.-ի 2-րդ մասի 2-րդ կետով, 268հդ.-ի 2-րդ մասի 2-րդ կետով, 266հդ.-ի 4-րդ մասով:
ՀՀ Վերաքննիչ քրեական դատարանը դատաքննությամբ

Պ Ա Ր Զ Ե Ց

1.Գործի դատավարական նախապատմությունը.
2009 թվականի հունիսի 20-ին ՀՀ Ոստիկանության Քանաքեռ-Զեյթուն քննչական բաժնում հարուցվել է թիվ 09109309 քրեական գործը ՀՀ քրեական օրենսգրքի 266-րդ հոդվածի 2-րդ մասի 2-րդ կետով և նույն հոդվածի 4-րդ մասով, 268հդ.-ի 2-րդ մասով նախատեսված հանցագործությունների հատկանիշներով, որը նույն որոշմամբ ընդունվել է քննիչի վարույթ, նույն օրը ժամը 23.00-ի սահմաններում Արթուր Գառնիկի Պետրոսյանը և Ֆելիքս Մարտինի Խաչատրյանը, որպես կասկածյալներ, ձերբակալվել են:
Նախաքննության մարմնի 23.06.2009թ. որոշումներով Արթուր Գառնիկի Պետրոսյանը ներգրավվել է որպես մեղադրյալ ՀՀ քրեական օրենսգրքի 266-րդ հոդվածի 4-րդ մասով, 268հդ.-ի 2-րդ մասով, Ֆելիքս Մարտինի Խաչատրյանը` ՀՀ քրեական օրենսգրքի 266-րդ հոդվածի 2-րդ մասի 2-րդ կետով, նույն հոդվածի 4-րդ մասով, 268հդ.-ի 2-րդ մասով նախատեսված հանցանքների համար:
23.06.2009թ. ՀՀ Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանը, բավարարելով նախաքննական մարմնի միջնորդությունը, Արթուր Գառնիկի Պետրոսյանի և Ֆելիքս Մարտինի Խաչատրյանի նկատմամբ որպես խափանման միջոց է ընտրել կալանքը 2/երկու/ ամիս ժամկետով, կալանքի սկիզբը հաշվելով 2009թ. հունիսի 20-ից, նույն դատարանի 19.08.2009թ. որոշումներով մեղադրյալների նկատմամբ ընտրված խափանման միջոց կալանքի ժամկետը երկարացվել է մեկ ամսով` մինչև 2009թ. սեպտեմբերի 20-ը:
Նախաքննական մարմնի 12.08.2009թ. որոշմամբ թիվ 09109309 քրեական գործի նյութերով անհայտ անձի կողմից Ֆելիքս Խաչատրյանին ապօրինի խոշոր չափի ՙափիոն՚ տեսակի թմրամիջոց և պրեկուրսոր հանդիսացող քացախաթթվի անհիդրիդ իրացնելու վերաբերյալ ՀՀ քր. օր.-ի 266հդ.-ի 2-րդ մասի 2-րդ կետով, նույն հոդվածի 4-րդ մասով հարուցվել է նոր քրեական գործ, այն առանձնացվել առանձին վարույթում` շնորհելով 09114509 համարը:
Նախաքննական մարմնի 12.08.2009թ. որոշմամբ Արթուր Գառնիկի Պետրոսյանի նկատմամբ ՀՀ քր. օր.-ի 184հդ.-ի 1-ին մասով նախատեսված մեղադրանքով քրեական գործի մասը կարճվել է` արարքում հանցակազմի բացակայության հիմքով:
Նախաքննական մարմնի 12.08.2009թ. որոշմամբ թիվ 09109309 քրեական գործի նյութերով անհայտ անձի կողմից Ֆելիքս Խաչատրյանին ապօրինի խոշոր չափի ՙափիոն՚ տեսակի թմրամիջոց և պրեկուրսոր հանդիսացող քացախաթթվի անհիդրիդ իրացնելու վերաբերյալ ՀՀ քր. օր.-ի 266հդ.-ի 2-րդ մասի 2-րդ կետով, նույն հոդվածի 4-րդ մասով հարուցվել է նոր քրեական գործ, այն առանձնացվել առանձին վարույթում` շնորհելով 09114509 համարը:
ՀՀ Երևան քաղաքի Արաբկիր և Քանաքեռ-Զեյթուն վարչական շրջանների դատախազի կողմից 2009 թվականի օգոստոսի 26-ին քրեական գործն ըստ մեղադրանքի Արթուր Գառնիկի Պետրոսյանի ՀՀ քր. օր.-ի 266հդ.-ի 4-րդ մասով, 268հդ.-ի 2-րդ մասով, Ֆելիքս Մարտինի Խաչատրյանի` ՀՀ քր. օր.-ի 266հդ.-ի 2-րդ մասի 2-րդ կետով, նույն հոդվածի 4-րդ մասով, 268հդ.-ի 2-րդ մասով` ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարան` ըստ էության քննության առնելու համար:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009 թվականի դեկտեմբերի 15-ի դատավճռով ամբաստանյալ Արթուր Գառնիկի Պետրոսյանը մեղավոր է ճանաչվել ՀՀ քր.օր-ի 266 հոդվածի 4-րդ մասով, 268 հոդվածի 2-րդ մասով նախատեսված հանցանքների կատարման մեջ և ՀՀ քր.օր-ի 266 հոդվածի 4-րդ մասով դատապարտվել տուգանքի` 300.000/երեք հարյուր հազար/ ՀՀ դրամի չափով, ՀՀ քր.օր-ի 268 հոդվածի 2-րդ մասով` դատապարտվել ազատազրկման 2 /երկու/ տարի 6 /վեց/ ամիս ժամկետով, ՀՀ քր.օր-ի 66 հոդվածների կիրառմամբ` նշանակված պատիժները լրիվ գումարելու միջոցով Արթուր Պետրոսյանի նկատմամբ վերջնական պատիժ է նշանակվել ազատազրկում` 2 /երկու/ տարի 6 /վեց/ ամիս ժամկետով և տուգանք` 300.000 /երեք հարյուր հազար/ ՀՀ դրամի չափով:
Ազատազրկման ձևով նշանակված պատժի կրման սկիզբը հաշվվել է 19.06.2009թ-ից, որը նա պետք է կրի ՀՀ ԱՆ համապատասխան քրեակատարողական հիմնարկում:
Ամբաստանյալ Արթուր Պետրոսյանի նկատմամբ ընտրված խափանման միջոց` կալանքը, թողնվել է անփոփոխ` մինչև դատավճռի օրինական ուժի մեջ մտնելը:
Նույն դատավճռով ամբաստանյալ Ֆելիքս Մարտինի Խաչատրյանը մեղավոր է ճանաչվել ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով նախատեսված հանցանքների կատարման մեջ և դատապարտվել` ՀՀ քր.օր-ի 266 հոդվածի 2-րդ մասի 2-րդ կետով` ազատազրկման 6 /վեց/ տարի 6 /վեց/ ամիս ժամկետով, առանց գույքի բռնագրավման, ՀՀ քր.օր-ի 266 հոդվածի 4-րդ մասով` դատապարտվել է տուգանքի 300.000/երեք հարյուր հազար/ ՀՀ դրամի չափով, ՀՀ քր.օր-ի 268 հոդվածի 2-րդ մասի 2-րդ կետով` դատապարտվել է ազատազրկման 2 /երկու/ տարի 6 /վեց/ ամիս ժամկետով:
ՀՀ քր.օր-ի 66 հոդվածի կիրառմամբ, նշանակված պատիժները մասնակիորեն գումարելու միջոցով ամբաստանյալ Ֆելիքս Խաչատրյանի նկատմամբ վերջնական պատիժ է նշանակվել ազատազրկում 8 /ութ/ տարի ժամկետով և տուգանք` 300.000/երեք հարյուր հազար/ ՀՀ դրամի չափով:
Ամբաստանյալ Ֆելիքս Խաչատրյանի պատժի կրման սկիզբը հաշվվել է 20.06.2009թ-ից, որը նա պետք է կրի ՀՀ ԱՆ համապատասխան քրեակատարողական հիմնարկում:
Ամբաստանյալ Ֆելիքս Խաչատրյանի նկատմամբ ընտրված խափանման միջոց կալանքը թողնվել է անփոփոխ` մինչև դատավճռի օրինական ուժի մեջ մտնելը:
Դատավճռով ամբաստանյալններ Ֆելիքս Խաչատրյանի և Արթուր Պետրոսյանի նկատմամբ նշանակվել է հարկադիր բուժում թմրամոլության դեմ:
Վճռվել է իրեղեն ապացույցներ ճանաչված թմրամիջոցները և պրեկուսորը ոչնչոցնել:
Դատավճռի դեմ վերաքննիչ բողոքներ են բերել ամբաստանյալ Ֆելիքս Խաչատրյանի պաշտպան Ա. Գրիգորյանը և ամբաստանյալ Ա. Պետրոսյանը:
Ամբաստանյալ Ֆելիքս Խաչատրյանի պաշտպան Ա. Գրիգորյանի և ամբաստանյալ Ա. Պետրոսյանի վերաքննիչ բողոքները Վերաքննիչ քրեական դատարանի 2010թ. փետրվարի 04-ի որոշմամբ ընդունվել են վարույթ:
Այլ վերաքննիչ բողոքներ, ներկայացված վերաքննիչ բողոքների դեմ գրավոր պատասխան չի ներկայացվել:
Քրեական գործը ՀՀ Վերաքննիչ քրեական դատարանում ստացվել է 2010թ. հունվարի 29-ին:


2.Գործի փաստական հանգամանքները.
ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009 թվականի դեկտեմբերի 15-ի դատավճռով ամբաստանյալ Արթուր Գառնիկի Պետրոսյանը մեղավոր է ճանաչվել ՀՀ քր.օր-ի 266 հոդվածի 4-րդ մասով, 268 հոդվածի 2-րդ մասով նախատեսված հանցանքների կատարման մեջ և դատապարտվել այն բանի համար, որ նա 2009թ-ի հունիսի 19-ին ժամը 15:00-ի սահմաններում, առանց իրացնելու նպատակի, Նոր-Արեշ 11 փողոցի նրբանցքի թիվ 14 տան մոտ Ֆելիքս Մարտինի Խաչատրյանից 20.000 ՀՀ դրամով ապօրինի ձեռք է բերել խոշոր չափերի հասնող 0,52 գրամ հաստատուն քաշով ափիոն տեսակի թմրամիջոց, 0,2 մլ ծավալով պրեկուրսոր հանդիսացող քացախաթթվի անհիդրիդ և ապօրինի պահել իր մոտ, որոնք էլ նույն օրը հայտնաբերվել են ոստիկանության Քանաքեռ-Զեյթուն բաժնում նրա անձնական խուզարկությամբ, նույն դատավճռով Ֆելիքս Մարտինի Խաչատրյանը մեղավոր է ճանաչվել ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով և դատապարտվել այն բանի համար, որ նա 2009թ-ի հունիսի 16-ին Երևանի Արցախի փողոցի ՙՏեցի կրուգ՚ կոչվող հատվածում, գործով չպարզված ազգությամբ պարսիկ մի անձնավորությունից օղու հետ փոխանակման եղանակով ապօրինի ձեռք է բերել ու պահել ափիոն տեսակի թմրամիջոց և 6 մլ ներարկիչով քացախաթթվի անհիդրիդ, որից խոշոր չափերի հասնող` 0,52 գրամ հաստատուն քաշով ափիոն տեսակի թմրամիջոցը և 0,2 մլ պրեկուրսոր հանդիսացող քացախաթթվի անհիդրիդը, 2009թ-ի հունիսի 19-ին ժամը 15:00-ի սահմաններում, իրենց` Նոր-Արեշ 11 փողոցի նրբանցքի թիվ 14 տան մոտ, 20.000 ՀՀ դրամով վաճառելու եղանակով իրացրել է Արթուր Գառնիկի Պետրոսյանին, իսկ խոշոր չափերի հասնող 0,6 գրամ հաստատուն քաշով ափիոն տեսակի թմրամիջոցը, 6 գրամ ներարկիչի մեջ լցված` 4 մլ ծավալով ացետիլացված ափիոն տեսակի թմրամիջոցի լուծույթը, որում ացետիլացված ափիոնի չոր քաշը կազմում է 0,1712 գրամ քաշով և 6 մլ ներարկիչի մեջ լցված 5,5 մլ ծավալով պրեկուրսոր հանդիսացող քացախաթթվի անհիդրիդը պահել է իր մոտ, որոնք 20.06.2009թ. հայտնաբերվել են ոստիկանության աշխատիկցների կողմից նրա անձնական խուզարկությամբ` անդրավարտիքի աջ գրպանից և գուլպաների միջից:


3. Պաշտպանի վերաքննիչ բողոքի հիմքերը, փաստարկները և պահանջը
Վերաքննիչ բողոքում պաշտպանը, ներկայացնելով Ֆելիքս Մարտինի Խաչատրյանին ՀՀ քր. օր.-ի 266հդ.-ի 2-րդ մասի 2-րդ կետով, նույն հոդվածի 4-րդ մասով, 268հդ.-ի 2-րդ մասով առաջադրված մեղադրանքի հիմք դարձած փաստական հանգամանքները, որպես սույն քրեական գործին առնչվող իրավական նորմեր, հղումներ է կատարել ՀՀ քր. օր.-ի 266հդ.-ի, 268հդ.-ի, ՀՀ Սահմանադրության 3-րդ հոդվածի, 19հդ.-ի 1-ին մասի, 21հդ.-ի 2-րդ մասի, 91-րդ հոդվածի, ՙՄարդու իրավունքների և հիմնարար ազատությունների պաշտպանության մասին՚ Եվրոպական Կոնվենցիայի 6-րդ հոդվածի 1-ին կետի, 13-րդ հոդվածի, ՀՀ քրեական դատավարության օրենսգրքի 17հդ.-ի 1-ին մասի, 23-րդ հոդվածի, 24հդ.-ի 1-ին մասի, 25-րդ հոդվածի, 104-րդ հոդվածի 1-ին մասի, 125-րդ հոդվածի, 127հդ.-ի 2-րդ մասի, 202հդ.-ի 1-ին մասի, 265հդ.-ի 1-ին մասի, 270-րդ, 273-րդ հոդվածների, 342հդ.-ի 1-ին մասի, 365հդ.-ի 2-րդ մասի վրա:
Այնուհետև, վերաքննիչ բողոքում պաշտպանը, մասնավորապես, որպես քրեադատավարական և քրեական օրենքի խախտումներ, նշել է հետևյալը:
Դատարանը, որպես ՀՀ քր. օր.-ի 266հդ.-ի 2-րդ մասի 2-րդ կետով, 266հդ.-ի 4-րդ մասով նախատեսված հանցանքների կատարման մեջ ամբաստանյալի մեղավորությունը հաստատող ապացույցներ, վկայակոչել է ամբաստանյալի ցուցմունքները, ամբաստանյալի և Արթուր Պետրոսյանի միջև կատարված առերեսման արձանագրությունը, անձնական խուզարկությամբ Արթուր Պետրոսյանի մոտ հայտնաբերված թմրամիջոցը:
Մինչդեռ, ըստ պաշտպանի, վերը նշված ապացույցները, ինչպես վերաբերելիության, այնպես էլ բավարարության տեսանկյունից, որևէ կերպ չեն հաստատում ամբաստանյալի մեղավորությունը թմրամիջոցի իրացման մեջ, իսկ ընդհանուր իրավասության դատարանի` այս առթիվ արված հետևությունները արդյունք են քրեադատավարական և քրեական օրենքի վերը թվարկված նորմերի խախտումների:
Գործով մինչդատական վարույթի ամենասկզբից էլ ամբաստանյալը ընդունել է իր կողմից վերը նշված թմրամիջոցը ձեռք բերելու և պահելու հանգաամնքները, նշելով սակայն, որ այդ ամենը արել է միայն անձնական օգտագործման համար, իսկ ինչ վերաբերում է թմրամիջոցի մի մասը Արթուր Պետրոսյանին իրացնելուն, ապա ամբաստանյալը կտրականապես ժխտել և մինչև օրս շարունակում է ժխտել այդ մեղադրանքը:
Ամբաստանյալի կողմից թմրամիջոցի մի մասը Արթուր Պետրոսյանին 20.000/քսան հազար/ ՀՀ դրամով իրացնելու դրվագը գործով մինչդատական վարույթի ընթացքում հիմնված է եղել միայն Արթուր Պետրոսյանի ցուցմունքների վրա: Մինչդատական վարույթն իրականացնող մարմինը, այդուհանդերձ, դա բավարարել է համարել ամբաստանյալին, ի թիվս այլոց, թմրամիջոցի իրացման հետ կապված մեղադրանքներ ևս առաջադրելու և այդ մեղադրանքներով գործը դատական քննության ներկայացնելու համար:
Ընդհանուր իրավասության դատարանի դատաքննության ժամանակ ամբաստանյալ Ա. Պետրոսյանը հրաժարվել է իր նախաքննական ցուցմունքներից, պատճառաբանելով, որ ոստիկանության բաժնում դրանք իրենից կորզվել են սպառնալիքների ազդեցության տակ: Նա, մասնավորապես հայտնել է, որ քրեական հետախուզության մի քանի աշխատակիցներ իրեն ներկայացրել են մի քանի անծանոթ անձանց և ասել, որ եթե ինքը ցուցմունք չտա, որ ամբաստանյալն իրեն թմրամիջոց է վաճառել, ապա նշված անձինք ցուցմունք կտան, թե ինքը իրենց թմրամիջոցներ է վաճառել, և այդ դեպքում ինքը ավելի դաժան ճակատագրի կարժանանա, քան նախատեսվում է ամբաստանյալի համար:
Նման պայմաններում, ըստ պաշտպանի, ամբաստանյալին թմրամիջոցի իրացման մեջ մեղավոր ճանաչելով, դատարանը հիմնվել է ոչ թե դատաքննությամբ ձեռք բերված տվյալների, այլ զուտ մինչդատական վարույթի ընթացքում մեղադրանքի կողմի հավաքած նյութերի վրա, որը հակասում է կողմերի հավասարության սկզբունքին, իսկ պաշտպանական կողմը զրկված է եղել իրավական պաշտպանության արդյունավետ միջոցից, որպիսին պետք է հանդիսանար դատարանը:
Նման իրավիճակը, ըստ պաշտպանի, հակասում է նաև ՙանկախ և անկողմնակալ՚ դատարանի պահանջին, այնքանով, որքանով որ դատարանի քննությանը հանձնված գործով արդեն իսկ ձեռք բերված ապացույցներով եզրակացություն է արվել ամբաստանյալի մեղավորության մասին, որը դատարանն ընդամենը հաստատել է:
Վերը նշվածից պաշտպանը եզրահանգել է, որ քրեադատավարական օրենքի էական խախտումներ թույլ տալու հետևանքով դատարանը կիրառել է քրեական օրենքի այն նորմը, որը չպետք է կիրառեր` ամբաստանյալի նկատմամբ ՀՀ քր. օր.-ի 266հդ.-ի 2-րդ մասի 2-րդ կետով, 266հդ.-ի 4-րդ մասով անհիմն կերպով կայացնելով մեղադրական դատավճիռ:
Խնդրել է` բեկանել ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009 թվականի դեկտեմբերի 15-ի Ֆելիքս Մարտինի Խաչատրյանին ՀՀ քր. օր.-ի 266հդ.-ի 2-րդ մասի 2-րդ կետով, 266հդ.-ի 4-րդ մասով մեղավոր ճանաչելու մասով և այդ մասով նրան արդարացնել:
Սկզբնական վերաքննիչ բողոքին ի լրում ներկայացված վերաքննիչ բողոքով պաշտպանը, Վերաքննիչ քրեական դատարանի ուշադրությունը հրավիրելով այն հանգամանքների վրա, որ ընդհանուր իրավասության դատարանը ամբաստանյալ Ֆ. Խաչատրյանի նկատմամբ նշանակել է այնպիսի պատիժ, որն ակնհայտորեն չի համապատասխանում նրա անձին և նրան վերագրված հանցանքների ծանրությանը, դատարանն անտեսել է, որ ամբաստանյալը նախկինում արատավորված չի եղել, խնամքին ունի երկու անչափահաս երեխաներ, մասնակցել է Հայաստանի ինքնապաշտպանությանն ուղղված մարտական գործողություններին, հոր մահից հետո պետք է նաև հոգա իր տարեց մոր, գործազուրկ կնոջ ապրուստը:
Ընդհանուր իրավասության դատարանում մեղադրողը միջնորդել է ամբաստանյալին դատապարտել 7/յոթ/ տարի ժամկետով ազատազրկման, իսկ դատարանը, առանց որևէ հիմնավորման, ոչ միայն դրանից մեկ տարի ժամկետով էլ ավելին է նշանակել ազատազրկում, այլև գերազանցել է ամբաստանյալին վերագրվող հանցանքների սանկցիաներով նախատեսված տուգանքի առավելագույն չափը` 200.000 /երկու հարյուր հազար/ ՀՀ դրամը` նշանակելով 300.000 /երեք հարյուր հազար/ ՀՀ դրամի տուգանք, խնդրել է բեկանել ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009 թվականի դեկտեմբերի 15-ի դատավճիռը` Ֆելիքս Մարտինի Խաչատրյանի նկատմամբ նշանակված պատժի մասով, և դատավճիռն այդ մասով փոփոխել` նրա նկատմամբ նշանակելով հնարավորինս մեղմ պատիժ:


4. Ամբաստանյալ Ա. Պետրոսյանի վերաքննիչ բողոքի հիմքերը, փաստարկները և պահանջը
Վերաքննիչ բողոքում ամբաստանյալ Ա. Պետրոսյանը, հայտնելով, որ համաձայն չէ նշանակված պատժաչափին, դա պատճառաբանել է այն հանգամանքներով, որ խնամքին ունի թոշակառու հայր, հաշմանդամ քույր, ամուսնացած է, ունի երկու անչափահաս երեխա, վիրահատված է, հեռացված է փայծաղը, թոքի մի մասը:
Խնդրել է բեկանել ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009 թվականի դեկտեմբերի 15-ի դատավճիռը և նշանակել մեղմ պատիժ:


5. Վերաքննիչ դատարանի պատճառաբանությունները և եզրահանգումը.
Վերաքննիչ բողոքներում նշված հիմքերի ու հիմնավորումների սահմաններում վերլուծելով գործի նյութերը, քննության առնելով ամբաստանյալ Ֆ. Խաչատրյանի պաշտպանի և ամբաստանյալ Ա. Պետրոսյանի կողմից իրենց վերաքննիչ բողոքների փաստարկները, դատական ակտը չբողոքարկած հակառակ կողմի` մեղադրողի պատասխանը, ստուգելով ապացույցների ձեռքբերման աղբյուրները, քրեական գործով ձեռք բերված յուրաքանչյուր ապացույց վերլուծելով թույլատրելիության, վերաբերելիության քրեադատավարական պահանջների տեսանկյունից, ապացույցների ողջ համակցությունը` քրեական գործի լուծման համար բավարարության տեսանկյունից, Վերաքննիչ քրեական դատարանը հանգում է այն համոզման, որ ամբաստանյալ Ֆ. Խաչատրյանի պաշտպանի վերաքննիչ բողոքը պետք է բավարարել մասնակի, ամբաստանյալ Ա. Պետրոսյանի վերաքննիչ բողոքը` պետք է բավարարել, ըստ այդմ էլ` ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009 թվականի դեկտեմբերի 15-ի դատավճիռը ամբաստանյալ Ֆ. Խաչատրյանի արարքների քրեաիրավական որակման մասով թողնել անփոփոխ, իսկ նշանակված պատժի, ինչպես նաև` ամբաստանյալ Ա. Պետրոսյանի նկատմամբ նշանակված պատժի մասով փոփոխել` հետևյալ պատճառաբանությամբ.
Քննության առնելով ամբաստանյալ Ֆ. Խաչատրյանի կողմից բերված պատճառաբանությունները, ՀՀ Վերաքննիչ քրեական դատարանը այն գնահատում է որպես ոչ արժանահավատ, մտացածին, այդ պատճառաբանությունները նպատակ են հետապնդում խուսափել ավելի խիստ, այն է` ՀՀ քր. օր.-ի 266հդ.-ի 2-րդ մասի 2-րդ կետով, 266հդ.-ի 4-րդ մասով նախատեսված հանցանքների համար քրեական պատասխանատվությունից և պատժից, նրա կողմից ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով նախատեսված հանցանքները կատարելը և նրա մեղքը հաստատված, իսկ պատճառաբանությունները հերքված են քրեական գործով ձեռք բերված հետևյալ ապացույցներով:
Ամբաստանյալ Արթուր Պետրոսյանի` նախաքննության ընթացքում տված ցուցմունքներով առ այն, որ ՀՀ քր.օր-ի 266 հոդվածի 4-րդ մասով և 268 հոդվածի 2-րդ մասով առաջադրված մեղադրանքում իրեն լիովին մեղավոր է ճանաչել և խոստովանական ցուցմունքներ տալով` հայտնել է, որ շուրջ մեկ տարի գործածել է թմրանյութեր: 2009թ-ի հունիսի 16-ին ժամը 14.00-ի սահմաններում ՙԱրմենիա՚ ԲԿ-ի մոտ հանդիպել է իր նախկին հարևան Ֆելիքս Խաչատրյանին: Խոսակցության ժամանակ Ֆ.Խաչատրյանը հարցրել է, թե ինչու է տրամադրությունն ընկած, կարող է թմրանյութ է օգտագործում, ստանալով դրական պատասխան` առաջարկվել է իրենից 20.000/քսան հազար/ ՀՀ դրամով գնել ափիոն տեսակի թնրամիջոց: Ֆ.Խաչատրյանին տվել է 13.000/տասներեք հազար/ ՀՀ դրամ, և խոստացել է, որ մնացածը հետագայում կվերադարձնի: Ֆ.Խաչատրյանը, համաձայնվելով, նրան է տվել 0,5 գրամ քաշով ափիոն տեսակի թմրամիջոց, 2մլ ծավալով ներարկիչ և ասել, որ ներարկիչում առկա հեղուկը անհիդրիդ է և նախատեսված է ափիոնը բացելու համար: Թմրամիջոցը վերցնելուց հետո բաժանվել է Ֆ.Խաչատրյանից, պատահական տաքսի ավտոմեքենայով ցանկացել է գալ տուն, սակայն ճանապարհին իրեն կանգնեցրել են ոստիկանության աշխատակիցները և բերման ենթարկել ՀՀ ոստիկանության Քանաքեռ-Զեյթուն բաժին, որտեղ էլ իր անձնական զննությամբ հայտնաբերվել է Ֆ.Խաչատրյանի կողմից իրեն իրացված թմրամիջոցները:
ՀՀ Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում, դատաքննության ընթացքում, փոխելով իր նախաքննական ցուցմունքները, ամբաստանյալ Ա. Պետրոսյանը հայտնել է, որ նախաքննության ընթացքում տված ցուցմունքները իրենից կորզվել են սպառնալիքների ազդեցության տակ: Ամբաստանյալ Ա. Պետրոսյանը, մասնավորապես, հայտնել է, որ քրեական հետախուզության մի քանի աշխատակիցներ իրեն ներկայացրել են մի քանի անծանոթ անձանց և ասել, որ եթե ինքը ցուցմունք չտա, որ ամբաստանյալն իրեն թմրամիջոց է վաճառել, ապա նշված անձինք ցուցմունք կտան, թե ինքը իրենց թմրամիջոցներ է վաճառել և այդ դեպքում ինքը ավելի դաժան ճակատագրի կարժանանա, քան նախատեսվում է ամբաստանյալի համար:
Իրավական գնահատության ենթարկելով ամբաստանյալ Ա. Պետրոսյանի նախաքննական և ընդհանուր իրավասության դատարանում տված ցուցմունքները, դրանք համադրելով իրար և քրեական գործով ձեռք բերված մյուս ապացույցների հետ, Վերաքննիչ քրեական դատարանը արժանահավատ է համարում ամբաստանյալ Ա. Պետրոսյանի նախաքննական ցուցմունքները, իսկ ընդհանուր իրավասության դատարանում նրա տված ցուցմունքները արժանահավատ չեն, նպատակ են հետապնդում պաշտպանության տակ առնել ամբաստանյալ Ֆ. Խաչատրյանին:
Ֆելիքս Մարտինի Խաչատրյանի կողմից ՀՀ քր. օր.-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով մեղսագրված հանցանքները հիմնավորված են նաև հետևյալ ապացույցներով:
Իր իսկ տված ցուցմունքներով առ այն, որ ինքը 2009թ-ի հունիսի 16-ին Երևանի Արցախի փողոցի ՙՏեցի կրուգ՚ կոչվող հատվածում, գործով չպարզված ազգությամբ պարսիկ մի անձնավորությունից օղու հետ փոխանակման եղանակով ապօրինի ձեռք է բերել ու պահել ՙափիոն՚ տեսակի թմրամիջոց և 6 մլ ներարկիչով քացախաթթվի անհիդրիդ, որից խոշոր չափերի հասնող` 0,52 գրամ հաստատուն քաշով ափիոն տեսակի թմրամիջոցը և 0,2 մլ պրեկուրսոր հանդիսացող քացախաթթվի անհիդրիդը, 2009թ-ի հունիսի 19-ին ժամը 15:00-ի սահմաններում, իրենց` Նոր-Արեշ 11 փողոցի նրբանցքի թիվ 14 տան մոտ, 20.000/քսան հազար/ ՀՀ դրամով վաճառելու եղանակով իրացրել է Արթուր Գառնիկի Պետրոսյանին, իսկ խոշոր չափերի հասնող 0,6 գրամ հաստատուն քաշով ափիոն տեսակի թմրամիջոցը, 6 գրամ ներարկիչի մեջ լցված` 4 մլ ծավալով ացետիլացված ափիոն տեսակի թմրամիջոցի լուծույթը, որում ացետիլացված ափիոնի չոր քաշը կազմում է 0,1712 գրամ քաշով և 6 մլ ներարկիչի մեջ լցված 5,5 մլ ծավալով պրեկուրսոր հանդիսացող քացախաթթվի անհիդրիդը պահել է իր մոտ, որոնք 20.06.09թ. հայտնաբերվել են ոստիկանության աշխատիկցների կողմից նրա անձնական խուզարկությամբ` անդրավարտիքի աջ գրպանից և գուլպաների միջից:
Ընդհանուր իրավասության դատարանում Ֆելիքս Խաչատրյանը ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով առաջադրված մեղադրանքում իրեն մեղավոր է ճանաչել մասամբ և ցուցմունք է տվել այն մասին, որ 2009թ-ի հունիսի 16-ին Երևանի ՙՏեցի կռուգ՚ կոչվող հատվածում հանդիպել է իրեն անծանոթ երկու պարսիկների և տեսել, որ նրանք ավտոմեքենայի մեջ նստած թմրանյութ են գործածում: Տեսնելով իր ձեռքի օղու շշերը առաջարկել են դրանք փոխանակել թմրանյութի հետ, փոխանակման արդյունքում իրեն են տվել 6մլ. ներարկիչի մեջ լցված անհիդրիդի լուծույթ և մոտ 2 գրամ ափիոն տեսակի թմրամիջոց: Այտեղից գնացել է տուն, որտեղ թմրամիջոցի մի մասը ներարկել է իրեն, իսկ մյուս մասը պահել իր մոտ: Նույն օրը Էրեբունի փողոցի վրա հանդիպել են իր ծանոթ Արթուր Պետրոսյանին և փոխանակվել հեռախոսահամարներով որպեսզի հետագայում կապվեն իրար հետ:
2009թ. հուլիսի 19-ի առավոտյան Ա.Պետրոսյանը զանգահարել է իրեն և ասել, որ թմրանյութի կարիք ունի և խնդրել է իրեն օգնել: Բացատրել է իր տան գտնվելու վայրը, պայմանավորվել և հանդիպել են բակում: Պայմանավորված ժամին Ա.Պետրոսյանը եկել է և իր մոտ եղած թմրամիջոցի մի որոշ քանակություն տվել է նրան, այնուհետև, երբ ընկերոջ հետ գնալիս է եղել ճաշելու, իրենց կանգնեցրել են ոստիկանության աշխատակիցները և բերման ենթարկել ՀՀ ոստիկանության Քանաքեռ-Զեյթուն բաժին, որտեղ էլ իր անձնական խուզարկությամբ հայտնաբերել են թմրանյութերը:
Իրավական գնահատության ենթարկելով ամբաստանյալ Ֆ. Խաչատրյանի նախաքննական և ընդհանուր իրավասության դատարանում տված ցուցմունքները, դրանք համադրելով իրար և քրեական գործով ձեռք բերված մյուս ապացույցների հետ, Վերաքննիչ քրեական դատարանը արժանահավատ է համարում ամբաստանյալ Ֆ. Խաչատրյանի նախաքննական ցուցմունքները, իսկ ընդհանուր իրավասության դատարանում նրա տված ցուցմունքները, լինելով արժանահավատ մասնակիորեն, անարժանահավատ են այն մասով, որ ցանկանում է խուսափել առավել ծանր հանցանքի, այնէ` թմրամիջոցի իրացման համար նախատեսված քրեական պատասխանատվությունից և պատժից:
Նրանց առաջադրված մեղադրանքը հիմնավորվել է ինչպես իրենց իսկ ցուցմունքներով, այնպես էլ դատաքննությամբ ձեռք բերված հետևյալ ապացույցներով.
Մեղադրյալներ Ա.Պետրոսյանի և Ֆ.Խաչատրյանի առերես հարցաքննության արձանագրությամբ:
Գործով վկա Վարդան Աշոտի Հայրապետյանի ցուցմունքներով այն մասին, որ 2009թ-ի հունիսի 20-ին իրեն են մոտեցել ոստիկանության աշխատակիցները և խնդրել որպես ընթերականեր հանդես գալ անձնական խուզարկություն անցկացնելիս:
Ոստիկանության աշխատակիցների ուղեկցությամբ գնացել է ՀՀ Ոստիկանության Քանաքեռ-Զեյթուն բաժին, աշխատասենյակներից մեկում իր և մեկ այլ անձի ներկայությամբ անձնական խուզարկության է ենթարկվել իրեն անծանոթ մի անձի, որի անունը հետագայում իմացել է, որ Արթուր Պետրոսյան է: Վերջինիս անձնական զննության ժամանակ անդրավարտիքի աջ գրպանից հայտնաբերվել է պոլիէթիլենային տոպրակ գորշ գույնի զանգվածով, իսկ ձախ գուլպայից` 6 մգ ծավալով ներարկիչ, որում առկա էր թափանցիկ հեղուկ: Ա.Պետրոսյանը հայտարարեց, որ պոլիէթիլենային տոպրակի միջինը հանդիսանում է ափիոն , իսկ ներարկիչի միջի հեղուկը` անհիդրիդ լուծույթ: Դրանից հետո անձնական խուզարկության ենթարկվեց կրկին իրեն անծանոթ անձ, որի անունը հետագայում իմացել է, որ Ֆելիքս Խաչատրյան է: Վերջինիս անձնական զննությամբ անդրավարտիքի աջ գրպանից հայտնաբերվեց պոլիէթիլենային տոպրակ գորշ գույնի զանգվածով, ձախ գուլպայից` 6 մգ ծավալով ներարկիչ որում առկա էր դեղնավուն հեղուկ, աջ գուլպայից` 6 մգ ծավալով ներարկիչ թափանցիկ հեղուկով: Ֆ.Խաչատրյանը հայտարարեց, որ գորշ զանգվածը ափիոն է, ներարկիչում առկա դեղնավուն հեղուկը` ափիոնի և անհիդրիդի խառնուրդ, իսկ թափանցիկ հեղուկը` անհիդրիդի լուծույթ:
Երկու անձանց մոտից անձնական զննությամբ հայտնաբերված իրերը առգրավվեցին, փաթեթավորվեցին, կնքվեցին և կազմվեցին համապատասխան արձանագրություններ, որոնց տակ ստորագրեցին բոլոր ներկաները և անձնական զննության ենթարկվողները:
ՀՀ Վերաքննիչ քրեական դատարանը, հետազոտելով գործով ձեռքբերված ապացույցները, համադրելով դրանք միմյանց հետ, տալով դրանց քրեաիրավական գնահատական, ներքին համոզմաբ հանգում է այն հետևության, որ Ֆելիքս Խաչատրյանի մեղքը ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով լիովին ապացուցված է:
Ամբաստանյալ Արթուր Գառնիկի Պետրոսյանին ՀՀ քր. օր.-ի 266հդ.-ի 4-րդ մասով, 268հդ.-ի 2-րդ մասի 2-րդ կետով առաջադրված մեղադրանքի հիմնավորվածությունը ՀՀ Վերաքննիչ քրեական դատարանը քննության առարկա չի դարձնում ՀՀ քր. դատ. օր.-ի 385հդ.-ի 1-ին մասի հիմքով` այն է` այն դուրս է գտնվում վերաքննիչ բողոքների հիմքերի և հիմնավորումների սահմաններից:
Վերաքննիչ քրեական դատարանն արձանագրում է, որ նախաքննության մարմնի և ընդհանուր իրավասության դատարանի կողմից ամբաստանյալներին ՀՀ քր. օր-ի 268 հոդ. 2-րդ մասով մեղսագրված հանցանքում համապատասխան կետը չի նշվել, չնայած արձանագրված է խոշոր չափ, որը համապատասխանում է ՀՀ քր. օր-ի 268 հոդ. 2-րդ մասի 2-րդ կետին:
Դատական վիճաբանությունների փուլում մեղադրողը հայտնց, որ ամբաստանյալների նկատմամբ նշանակվող պատիժը թողնում է դատարանի հայեցողությանը:
Քննության առնելով ամբաստանյալներ Արթուր Պետրոսյանի նկատմամբ ՀՀ քր. օր.-ի 266հդ.-ի 4-րդ մասով, 268հդ.-ի 2-րդ մասի 2-րդ կետով և Ֆելիքս Խաչատրյանի նկատմամբ ՀՀ քր. օր.-ի 266հդ.-ի 4-րդ մասով, 268հդ.-ի 2-րդ մասի 2-րդ կետով, 266հդ.-ի 2-րդ մասի 2-րդ կետով նշանակված պատիժների հարցը, ՀՀ Վերաքննիչ քրեական դատարանը գտնում է, որ երկու ամբաստանյալների նկատմամբ այն պետք է փոփոխել` մեղմացման շարժառիթով` հետևյալ պատճառաբանությամբ:
ՀՀ քրեական օրենսգրքի 48-րդ հոդվածի 2-րդ մասի համաձայն` պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները: Սոցիալական արդարությունը վերականգնելու նպատակը բխում է արդարության և պատասխանատվության անհատականացման սկզբունքն ամրագրված ՀՀ քրեական օրենսգրքի 10-րդ հոդվածի բովանդակությունից: Այն սահմանում է, որ հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար: Պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակվում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքների կատարումը կանխելու համար:
ՀՀ քրեական օրենսգրքի 268հդ.-ի 2-րդ մասի 2-րդ կետով նախատեսված հանցանքի կատարման համար քրեական օրենքը պատիժ է նախատեսում ազատազրկում` առավելագույնը երեք տարի ժամկետով, նշված հանցանքի կատարման համար ամբաստանյալներ Ա. Պետրոսյանի և Ֆ. Խաչատրյանի նկատմամբ նշանակվել է յուրաքանչյուրին` ազատազրկում 2/երկու/ տարի 6/վեց/ ամիս ժամկետով, այսինքն` օրենքով նախատեսված առավելագույնին մոտ պատիժ, ՀՀ քրեական օրենսգրքի 266հդ.-ի 4-րդ մասով նախատեսված հանցանքի կատարման համար քրեական օրենքը պատիժ է նախատեսում` տուգանք` նվազագույն աշխատավարձի առավելագույնը երկուհարյուրապատիկի չափով, կամ կալանք` առավելագույնը երեք ամիս ժամկետով, նշված հանցանքի կատարման համար ամբաստանյալներ Ա. Պետրոսյանի և Ֆ. Խաչատրյանի նկատմամբ նշանակվել է ՀՀ քր.օր.-ի 266հդ-ի 4-րդ մասի սանկցիայով նախատեսված առավելագույնից ավելի պատիժ` տուգանք` յուրաքանչյուրին 300.000/երեք հարյուր հազար/ ՀՀ դրամի չափով, /սանկցիան, ինչպես նշվեց, նախատեսում է առավելագույնը նվազագույն աշխատավարձի 200-ապատիկի` այսինքն` 200.000 ՀՀ դրամի չափով/: ՀՀ քրեական օրենսգրքի 266հդ.-ի 2-րդ մասի 2-րդ կետով նախատեսված հանցանքի կատարման համար քրեական օրենքը պատիժ է նախատեսում ազատազրկում` հինգից տաս տարի ժամկետով` գույքի բռնագրավմամբ կամ առանց դրա: ՀՀ քր. օր.-ի 66հդ.-ի կիրառմամբ` ամբաստանյալ Ա. Պետրոսյանի նկատմամբ պատիժ է նշանակվել ազատազրկում` 2/երկու/ տարի 6/վեց/ ամիս ժամկետով և տուգանք` 300.000/երեք հարյուր հազար/ ՀՀ դրամի չափով, նույն հոդվածի կիրառմամբ` ամբաստանյալ Ֆ. Խաչատրյանի նկատմամբ վերջնական պատիժ է նշանակվել ազատազրկում` 8/ութ/ տարի ժամկետով և տուգանք` 300.000/երեք հարյուր հազար/ ՀՀ դրամի չափով:
Պաշտպանության կողմից ՀՀ Վերաքննիչ քրեական դատարան ներկայացված ընտանիքի կազմի վերաբերյալ տեղեկանքից, Երևանի Էրեբունի թաղապետարանի կնիքով, թիվ 15տ լ/ն Ա. Սահակյանի ստորագրությամբ, երևում է, որ Ֆ. Խաչատրյանը հաշվառված և բնակվում է Նոր-Արեշ 11-րդ փողոց, 14 տուն հասցեում, ընտանիքի կազմը` մայրը` Ռ. Բադալյան, չի աշխատում, տարիքային թոշակառու, կինը` Ս. Ճղլյան` չի աշխատում, որդին` Ս. Խաչատրյան` ծնվ. 1998թ., սովորում է թիվ 68 միջնակարգ դպրոցում, դուստրը` Ք. Խաչատրյան` ծնվ. 1993թ. սովորում է նույն դպրոցում, դրական բնութագիր` տրված հարևանների կողմից, հաստատված թաղային կոմիտեի կնիքով և նախագահի ստորագրությամբ, դրական բնութագիր` աշխատանքի վայրից` հաստատված ՙԵրևանի միկրոավտոբուսային ՈՒԱՏՙ-ի կնիքով, ՚Ս. Զաքարյան՚ ստորագրությամբ, երեխաների ծննդյան վկայականները, ամբաստանյալ Ֆ. Խաչատրյանի հոր` Մարտին Ոսկանի Խաչատրյանի մահվան վկայականի պատճենը, համաձայն որի` ամբաստանյալի հայրը մահացել է 2010թ. փետրվարի 27-ին:
Ամբաստանյալ Ֆ. Խաչատրյանի վերաբերյալ վերը նշված հանգամանքները ընդհանուր իրավասության դատարանում քրեական գործի քննության ժամանակ հայտնի չեն եղել, այդ իսկ պատճառով ընդհանուր իրավասության դատարանը ամբաստանյալ Ֆ. Խաչատրյանի քրեական պատասխանատվությունը և պատիժը մեղմացնող հանգամանքներ չի արձանագրել:
Վերը նշված հանգամանքների մի մասը ՀՀ Վերաքննիչ քրեական դատարանը դիտում է որպես ամբաստանյալ Ֆ. Խաչատրյանի անձը դրական բնութագրող հանգամանքներ, մյուս մասը` ՀՀ քր. օր.-ի 62հդ.-ի 1-ին մասի 4-րդ կետի, նույն հոդվածի 2-րդ մասի ուժով` որպես ամբաստանյալի քրեական պատասխանատվությունը և պատիժը մեղմացնող հանգամանքներ, քրեական պատասխանատվությունը և պատիժը ծանրացնող հանգամանքներ Վերաքննիչ քրեական դատարանը չի արձանագրում:
Ինչպես վերը նշվեց, ամբաստանյալ Ա. Պետրոսյանի նկատմամբ ընդհանուր իրավասության դատարանը նշանակել է ՀՀ քր. օր.-ի 268հդ.-ի 2-րդ մասի 2-րդ կետով նախատեսված առավելագույն պատժին մոտ պատիժ, այն դեպքում, երբ դատավճռով դատարանը, որպես նրա անձը բնութագրող հանգամանք է դիտել այն, որ նա երիտասարդ է, ամուսնացած է, զբաղվել է հանրօգուտ աշխատանքով, քրեական պատասխանատվությունը և պատիժը մեղմացնող հանգամանք է դիտել այն, որ ամբաստանյալ Ա. Պետրոսյանը անկեղծորեն զղջացել է կատարած արարքի համար, քրեական պատասխանատվությունը և պատիժը ծանրացնող հանգամանքներ չի արձանագրել:
Քննության առնելով վերը նշված հանգամանքներն իրենց համակցության մեջ, ՀՀ Վերաքննիչ քրեական դատարանը գտնում է, որ ամբաստանյալներ Ա. Պետրոսյանի և Ֆ. Խաչատրյանի նկատմամբ նշանակված պատիժները մեղմացնելով` հնարավոր է հասնել ՀՀ քր. օր.-ի 48հդ.-ի 2-րդ մասով ամրագրված պատժի նպատակներին` սոցիալական արդարության վերականգնմանը, հանցագործություների կանխմանը, պատժի ենթարկված անձի ուղղմանը:
Բացի այդ, դուրս գալով ՀՀ քր. օր.-ի 266հդ.-ի 4-րդ մասի սանկցիայի սահմաններից և այդ հոդվածով ամբաստանյալներին դատապարտելով 300.000-ական ՀՀ դրամ տուգանքի, ընդհանուր իրավասության դատարանը խախտել է ՀՀ քրեական օրենսդրության հիմնարար սկզբունք հանդիսացող ՀՀ քրեական օրենսգրքի 5-րդ հոդվածի 1-ին մասի պահանջը, համաձայն որի` արարքի հանցավորությունը, դրա պատժելիությունը և քրեաիրավական այլ հետևանքները որոշվում են միայն քրեական օրենքով, նույն հոդվածի 2-րդ մասի համաձայն` քրեական օրենքը անոլոգիայով կիրառելն արգելվում է:
ՀՀ քր. օր-ի 12 հդ. 1-ին մասի համաձայն` արարքի հանցավորությունը և պատժելիությունը որոշվում են դա կատարելու ժամանակ գործող քրեական օրենքով:
Արարքի պատժելիությունը որոշվում է սանկցիայով:
Եվ արարքի կատարման պահին և այժմ ՀՀ քր. օր.-ի 266հդ.-ի 4-րդ մասի սանկցիան նախատեսում է տուգանք` նվազագույն աշխատավարձի առավելագույնը երկուհարյուրապատիկի չափով, կամ կալանք` առավելագույնը երեք ամիս ժամկետով:
Միայն այս հանգամանքը ընդհանուր իրավասության դատարանի դատավճիռը բեկանելու հիմք է, քանի որ ՀՀ քր. դատ. օր.-ի 395հդ.-ի 2-րդ կետի համաձայն` բողոքարկված դատական ակտը բեկանվում կամ փոփոխվում է, եթե թույլ է տրվել դատական սխալ, այն է` ճիշտ չի կիրառվել քրեական օրենքը կամ Հայաստանի Հանրապետության միջազգային պայմանագիրը:
Այս դեպքում ընդհանուր իրավասության դատարանը խախտել է ՀՀ քրեական օրենսդրության հիմնարար սկզբունք հանդիսացող 5-րդ հոդվածի պահանջը, հետևաբար, դատարանի դատավճիռը պետք է բեկանել և փոփոխել:
Ելնելով շարադրվածից և ղեկավարվելով ՀՀ քրեական դատավարության օրենսգրքի 376-1-րդ, 385-րդ, 386-րդ, 390-րդ, 391-րդ, 393-395-րդ, 402-րդ հոդվածներով ՀՀ Վերաքննիչ քրեական դատարանը


Ո Ր Ո Շ Ե Ց

Պաշտպան Ա. Գրիգորյանի վերաքննիչ բողոքը բավարարել մասնակիորեն.
Ամբաստանյալ Արթուր Գառնիկի Պետրոսյանի վերաքննիչ բողոքը բավարարել.
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության դատարանի 2009թ. դեկտեմբերի 15-ի դատավճիռը քրեական գործով ըստ մեղադրանքի Արթուր Գառնիկի Պետրոսյանի` ՀՀ քր. օր-ի 266 հոդվածի 4-րդ մասով և 268 հոդվածի 2-րդ մասի 2-րդ կետով, Ֆելիքս Մարտինի Խաչատրյանի` ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով` ամբաստանյալներ Արթուր Գառնիկի Պետրոսյանի և Ֆելիքս Մարտինի Խաչատրյանի նկատմամբ նշանակված պատժի մասով` բեկանել և փոփոխել.
Արթուր Գառնիկի Պետրոսյանին մեղավոր ճանաչել ՀՀ քր.օր-ի 266 հոդվածի 4-րդ մասով և 268 հոդվածի 2-րդ մասի 2-րդ կետով նախատեսված հանցանքների կատարման մեջ և դատապարտել` ՀՀ քր.օր-ի 268 հոդվածի 2-րդ մասի 2-րդ կետով ազատազրկման 1/մեկ/ տարի 6/վեց/ ամիս ժամկետով.
ՀՀ քր.օր-ի 266 հոդվածի 4-րդ մասով` տուգանքի` ՀՀ նվազագույն աշխատավարձի հարյուրհիսունապատիկի` 150.000/մեկ հարյուր հիսուն հազար/ ՀՀ դրամի չափով.
ՀՀ քր. օր-ի 66 հոդվածի կիրառմամբ Արթուր Պետրոսյանի նկատմամբ վերջնական պատիժ նշանակել ազատազրկում 1/մեկ/ տարի 6 /վեց/ ամիս ժամկետով և տուգանք` ՀՀ նվազագույն աշխատավարձի հարյուրհիսունապատիկի` 150.000/մեկ հարյուր հիսուն հազար/ ՀՀ դրամի չափով:
Ազատազրկման ձևով նշանակված պատիժը պետք է կրի ՀՀ ԱՆ համապատասխան քրեակատարողական հիմնարկում:
Ամբաստանյալ Ա. Պետրոսյանի պատժի սկիզբը հաշվել 2009թվականի հունիսի 19-ից:
Ամբաստանյալ Ա. Պետրոսյանի նկատմամբ ընտրված խափանման միջոց կալանքը թողնել անփոփոխ` մինչև դատավճռի օրինական ուժի մեջ մտնելը:
Ամբաստանյալ Ֆելիքս Մարտինի Խաչատրյանին մեղավոր ճանաչել ՀՀ քր.օր-ի 266 հոդվածի 2-րդ մասի 2-րդ կետով, 266 հոդվածի 4-րդ մասով և 268 հոդվածի 2-րդ մասի 2-րդ կետով նախատեսված հանցանքների կատարման մեջ և դատապարտել.
ՀՀ քր.օր-ի 266 հոդվածի 2-րդ մասի 2-րդ կետով` ազատազրկման 5/հինգ/ տարի 6 /վեց/ ամիս ժամկետով, առանց գույքի բռնագրավման, ՀՀ քր.օր-ի 268 հոդվածի 2-րդ մասի 2-րդ կետով` ազատազրկման 1 /մեկ/ տարի 6 /վեց/ ամիս ժամկետով, ՀՀ քր.օր-ի 266 հոդվածի 4-րդ մասով` տուգանքի` ՀՀ նվազագույն աշխատավարձի հարյուրհիսունապատիկի` 150.000/մեկ հարյուր հիսուն հազար/ ՀՀ դրամի չափով:
ՀՀ քր.օր-ի 66 հոդվածի կիրառմամբ Ֆելիքս Մարտինի Խաչատրյանի նկատմամբ վերջնական պատիժ նշանակել ազատազրկում` 6/վեց/ տարի 6/վեց/ ամիս ժամկետով` առանց գույքի բռնագրավման և տուգանք` ՀՀ նվազագույն աշխատավարձի հարյուրհիսունապատիկի` 150.000/մեկ հարյուր հիսուն հազար/ ՀՀ դրամի չափով:
Ամբաստանյալ Ֆելիքս Խաչատրյանը ազատազրկման ձևով նշանակված պատիժը պետք է կրի ՀՀ ԱՆ համապատասխան քրեակատարողական հիմնարկում:
Ամբաստանյալ Ֆ. Խաչատրյանի պատժի կրման սկիզբը հաշվել 2009 թվականի հունիսի 20-ից:
Ամբաստանյալ Ֆ. Խաչատրյանի նկատմամբ ընտրված խափանման միջոց կալանքը թողնել անփոփոխ` մինչև դատավճռի օրինական ուժի մեջ մտնելը:
Դատավճիռը մնացած մասով թողնել անփոփոխ:
Որոշումը կարող է բողոքարկվել ՀՀ Վճռաբեկ դատարան` հրապարակման պահից մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ
Իսկականի հետ ճիշտ է

ՆԱԽԱԳԱՀՈՂ ԴԱՏԱՎՈՐ` Ա. ՀՈՎՀԱՆՆԻՍՅԱՆ