ԵԱՔԴ/0106/01/09






ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՀԱՄԱՅՆՔՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«18» սեպտեմբերի 2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Գ.Հովհաննիսյան
տուժողներ Վ.Մելքոնյան
Վ.Օհանյան
Մ.Մանուկյան
Ա.Բալասյան
Ռ.Գևորգյան
Ա.Խաչատրյան
Վ.Մուրադյան
տուժողի ներկայացուցիչ Ս.Մարգարյան
պաշտպան Ժ.Օհանյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Գուրգեն Սերգեյի Սահակյանի` ծնված 1989 թվականի մայիսի 5-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, նախկինում չդատապարտված, ՀՀ պաշտպանության համար մղված մարտական գործողություններում զոհված անձի զավակ, հաշվառված է Երևան քաղաքի Կիևյան փողոցի 8-րդ շենքի 3ա բնակարանում: Մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ և 4-րդ կետերով, արգելանքի տակ է 2009 թվականի մայիսի 22-ից:
1. Գործի դատավարական նախապատմությունը.
2008 թվականի սեպտեմբերի 22-ին ՀՀ ոստիկանության Արաբկիրի բաժնի հետաքննիչ Դ.Աթոյանի որոշմամբ ՀՀ քրեական օրենսգրքի 183-րդ հոդվածի 1-ին մասով հարուցվել և վարույթ է ընդունվել թիվ 14154508 քրեական գործը:
2008 թվականի հոկտեմբերի 2-ին ՀՀ ոստիկանության Արաբկիրի բաժնի հետաքննիչ Դ.Աթոյանի որոշմամբ թիվ 14154508 քրեական գործով արաքը ՀՀ քրեական օրենսգրքի 183-րդ հոդվածի 1-ին մասից վերաորակվել է ՀՀ քրեական օրենսգրքի 177-րդ հոդվածի 2-րդ մասի 2-րդ կետով և թիվ 14154508 քրեական գործն, ըստ ենթակայության, ուղարկվել է Արաբկիրի քննչական բաժին:
2008 թվականի հոկտեմբերի 6-ին ՀՀ ոստիկանության Արաբկիրի քննչական բաժնի քննիչ Վ.Պողոսյանի որոշմամբ թիվ 14154508 քրեական գործն ընդունվել է վարույթ:
2008 թվականի նոյեմբերի 17-ին ՀՀ ոստիկանության Արաբկիրի քննչական բաժնի քննիչ Վ.Պողոսյանի որոշմամբ թիվ 14154508 քրեական գործով վարույթը կասեցվել է` հանցագործություն կատարած անձի ինքնությունը պարզված չլինելու պատճառով:
2008 թվականի սեպտեմբերի 23-ին ՀՀ ոստիկանության Արաբկիրի բաժնի հետաքննիչ Դ.Աթոյանի որոշմամբ ՀՀ քրեական օրենսգրքի 183-րդ հոդվածի 1-ին մասով հարուցվել և վարույթ է ընդունվել թիվ 14154608 քրեական գործը:
2008 թվականի հոկտեմբերի 3-ին ՀՀ ոստիկանության Արաբկիրի բաժնի հետաքննիչ Դ.Աթոյանի որոշմամբ թիվ 14154608 քրեական գործով արաքը ՀՀ քրեական օրենսգրքի 183-րդ հոդվածի 1-ին մասից վերաորակվել է ՀՀ քրեական օրենսգրքի 177-րդ հոդվածի 1-ին մասով և թիվ 14154608 քրեական գործն, ըստ ենթակայության, ուղարկվել է Արաբկիրի քննչական բաժին:
2008 թվականի նոյեմբերի 21-ին ՀՀ ոստիկանության Արաբկիրի քննչական բաժնի քննիչ Հ.Ավետիսյանի որոշմամբ թիվ 14154608 քրեական գործով վարույթը կասեցվել է` հանցագործություն կատարած անձի ինքնությունը հայտնի չլինելու պատճառով:
2008 թվականի հոկտեմբերի 12-ին ՀՀ ոստիկանության Արաբկիրի բաժնի հետաքննության բաժանմունքի պետ Ս.Սարդարյանի որոշմամբ ՀՀ քրեական օրենսգրքի 183-րդ հոդվածի 1-ին մասով հարուցվել և վարույթ է ընդունվել թիվ 14154808 քրեական գործը:
2008 թվականի հոկտեմբերի 22-ին ՀՀ ոստիկանության Արաբկիրի բաժնի հետաքննության բաժանմունքի պետ Ս.Սարդարյանի որոշմամբ թիվ 14154808 քրեական գործով արարքը ՀՀ քրեական օրենսգրքի 183-րդ հոդվածի 1-ին մասից վերաորակվել է ՀՀ քրեական օրենսգրքի 177-րդ հոդվածի 1-ին մասով և թիվ 14154808 քրեական գործն, ըստ ենթակայության, ուղարկվել է Արաբկիրի քննչական բաժին:
2008 թվականի հոկտեմբերի 22-ին ՀՀ ոստիկանության Արաբկիրի քննչական բաժնի քննիչ Գ.Համբարձումյանի որոշմամբ թիվ 14154808 քրեական գործն ընդունվել է վարույթ:
2008 թվականի դեկտեմբերի 12-ին ՀՀ ոստիկանության Արաբկիրի քննչական բաժնի քննիչ Գ.Համբարձումյանի որոշմամբ թիվ 14154808 քրեական գործով վարույթը կասեցվել է` հանցագործություն կատարած անձի ինքնությունը հայտնի չլինելու պատճառով:
2009 թվականի մայիսի 22-ին ՀՀ ոստիկանության Արաբկիրի քննչական բաժնի քննիչ Վ.Իսախանյանի որոշմամբ թիվ 14154508, 14154608, 14154808 քրեական գործերն ընդունվել են վարույթ, քրեական գործերով կասեցված վարույթները վերսկսվել են, քրեական գործերը միացվել են և քննությունը շարունակվել է թիվ 14154508 քրեական գործի վարույթում:
2009 թվականի մայիսի 22-ի ձերբակալման արձանագրության համաձայն`2009 թվականի մայիսի 22-ին Գուրգեն Սերգեյի Սահակյանը ձերբակալվել է:
2009 թվականի մայիսի 25-ին ՀՀ ոստիկանության Արաբկիրի քննչական բաժնի քննիչ Վ.Իսախանյանի որոշմամբ Գուրգեն Սերգեյի Սահակյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ և 4-րդ կետերով:
2009 թվականի հուլիսի 28-ին ՀՀ ոստիկանության Արաբկիրի քննչական բաժնի քննիչ Վ.Իսախանյանի որոշմամբ Գուրգեն Սերգեյի Սահակյանին առաջադրված մեղադրանքը փոփոխվել, լրացվել և նոր մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ և 4-րդ կետերով:
2009 թվականի օգոստոսի 15-ին Գուրգեն Սերգեյի Սահակյանի վերաբերյալ քրեական գործը մեղադրական եզրակացությամբ ուղարկվել է Դատարան:
Գուրգեն Սերգեյի Սահակյանին մեղադրանք է առաջադրվել ՀՀ քրեական օրենսգրքի 177-րդ հոդվածի 2-րդ մասի 2-րդ և 4-րդ կետերով` այն արարքների համար, որ նա 2008 թվականի սեպտեմբերի 22-ին` ժամը 04:00-ի սահմաններում, ավտոմեքենայի պահեստամասեր գողանալու նպատակով ապօրինաբար տիրանալով Երևանի Մամիկոնյանց փողոցի 62 շենքի մոտ կանգնեցված Սուրեն Վոլոդիայի Մարգարյանին վստահված «Մանանդ» ՍՊ ընկերությանը պատկանող «ՎԱԶ 2107» մակնիշի S2330 պետհամարանիշի ավտոմեքենային, այն վարելով տարել է Դավիթաշենի տարածքում գտնվող գերեզմանատան մոտ, որտեղ քանդել է և գողացել է ավտոմեքենայի թվով 2 նստատեղերը, թվով չորս անվադողերը` իրենց անվահեծերով, գազի բալոնը, հայելին, թվով չորս լուսարձակները, ձայնագրիչը, շարժիչը գործարկելու փականը, ռեզինե գորգերը, մարտկոցը, ինժեկտորի համակարգիչը` պատճառելով 948.000 ՀՀ դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականի սեպտեմբերի 23-ին` ժամը 04:00-ի սահմաններում, ավտոմեքենայի պահեստամասեր գողանալու նպատակով ապօրինաբար տիրանալով Երևանի Բաղրամյան փողոցի 65-րդ տան մոտ կանգնեցված Վարդան Մելքոնյանին վստահված «ՎԱԶ 2103» մակնիշի 15ՏԼ120 պետհամարանիշի ավտոմեքենային, այն վարելով տարել է Թոխմախի գերեզմանատան մոտ, որտեղ քանդել և գողացել է ավտոմեքենայի թվով 4 անվադողերն`իրենց անվահեծերով, մեկ պահեստային անվադողն`իր անվահեծով, գազի բալոնը, մարտկոցը, «Ալպայ» մակնիշի ձայնասփյուռները և աշխատանքային գործիքներ` պատճառելով 400.000 ՀՀ դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականի հոկտեմբերի 12-ին` ժամը 04-ի սահմաններում, ավտոմեքենայի պահեստամասեր գողանալու նպատակով ապօրինաբար տիրանալով Երևանի Արղության 23-րդ տան մոտ կանգնեցված Վարդգես Էլիկամի Օհանյանի անձնական օգտագործման «ՎԱԶ 2105» մակնիշի 63ՏՕ127 պետհամարանիշի ավտոմեքենային, այն վարելով տարել է «Արաբկիր» զբոսայգու մոտ, որտեղ քանդել է ավտոմեքենայի ձայնագրիչը, գազի բալոնն ու զոդման սարքը, բալգարկա` պատճառելով Վ.Օհանյանին 290.000 ՀՀ դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականի հոկտեմբեր ամսին` քրեական գործով չպարզված օրը, գողացել է Երևանի Հ.Էմին փողոցի 80 շենքի դիմաց կանգնեցված Մանվել Խաչիկի Մանուկյանին վստահված «Ռիմելս» տաքսի ծառայությանը պատկանող «ՎԱԶ 2107» մակնիշի 64ՍԼ027 պետհամարանիշի ավտոմեքենայի մարտկոցը` Մ.Մանուկյանին պատճառելով 30.000 ՀՀ դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականին հոկտեմբեր ամսին` քրեական գործով չպարզված օրը, գողացել է Երևանի Երզնկյան փողոցի 27 տան դիմաց կանգնեցված Արթուր Սեյրանի Բալասյանին պատկանող «ՎԱԶ 2107» մակնիշի 07ԼԼ482 պետհամարանիշի ավտոմեքենայի թվով երկու ձայնասփյուռները` Ա.Բալասյանին պատճառելով 10.000 դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականի հոկտեմբեր ամսին` քրեական գործով չպարզված օրը, գողացել է Երևանի Բաղրամյան փողոցի 56 շենքի մոտ կանգնեցված Ռուբեն Ավագի Գևորգյանին վստահված «ՎԱԶ 2107» մակնիշի 0258Տ պետհամարանիշի ավտոմեքենայի մարտկոցը` Ռ.Գևորգյանին պատճառելով 12.000 ՀՀ դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականի հոկտեմբեր ամսին, քրեական գործով չպարզված օրը, ավտոմեքենայի պահեստամասեր գողանալու նպատակով ապօրինաբար տիրանալով Երևանի Օրբելի փողոցի 61 տան մոտ կանգնեցված «Ն.Անի Մուս» տաքսի ծառայությանը պատկանող Վաղինակ Վանիկի Մուրադյանին վստահված «ՎԱԶ 2107» մակնիշի 11ՕՕ183 պետհամարանիշի ավտոմեքենային, այն վարելով տարել է Շահումյանի տան գերեզմանատան մոտ և գողացել է ավտոմեքենայի գազի բալոնը և չորս անվադողերն իրենց անվահեծերով` պատճառելով Վ.Մուրադյանին 250.000 ՀՀ դրամի գույքային վնաս:
Բացի այդ, կրկին անգամ, Գուրգեն Սերգեյի Սահակյանը 2008 թվականի հոկտեմբեր ամսվա կեսերին` քրեական գործով չպարզված օրը, գողացել է Երևանի Երզնկյան փողոցի 20 տան դիմաց կանգնեցված Արմեն Նորիկի Խաչատրյանին պատկանող «Վազ 2107» մակնիշի 10ՕԼ593 պետհամարանիշի ավտոմեքենայի կողային հայելիները` պատճառելով Ա.Խաչատրյանին 6.000 ՀՀ դրամի գույքային վնաս:
2. Արագացված դատական քննություն.
Մինչ դատաքննությունն սկսելն ամբաստանյալ Գուրգեն Սերգեյի Սահակյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գուրգեն Սերգեյի Սահակյանը կատարել է արարք` նախատեսված ՀՀ քրեական օրենսգրքի 177-րդ հոդվածի 2-րդ մասի 2-րդ և 4-րդ կետերով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, տուժողներ Ռուբեն Գևորգյանի, Վարդան Մելքոնյանի, Վարդգես Օհանյանի, Արմեն Խաչատրյանի, Արթուր Բալասյանի, Վաղինակ Մուրադյանի, Մանվել Մանուկյանի, տուժողի ներկայացուցիչ Սուրեն Մարգարյանի դիմումները, ՀՀ ոստիկանության ինֆորմացիոն կենտրոնի պահանջագիրը, ՀՀ ՊՆ սոցիալական պաշտպանության վարչության պետի կողմից 2000 թվականի նոյեմբերի 29-ին տրված տեղեկանքի պատճենը, Սերգեյ Գուրգենի Սահակյանի մահվան վկայականի պատճենը, Գուրգեն Սերգեյի Սահակյանի ծննդյան վկայականների պատճենները և հայրությունը ճանաչելու մասին վկայականի պատճենը եկավ հետևյալ եզրահանգման.
Գուրգեն Սահակյանի անձը դրականորեն բնութագրող հանգամանք է նրա կողմից ինքնախոստովանական ցուցմունքներ տալը:
Գուրգեն Սահակյանի պատասխանատվությունն ու պատիժը մեղմացնող հանգամանք է` նախկինում արատավորված` դատապարտված չլինելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը գտնում է, որ պատասխանատվությունը և պատիժը մեղմացնող հանգամանք է նաև հանցագործությամբ պատճառված վնասը վերականգնելուն ուղղված ողջամիտ միջոցների ձեռնարկումը (դատական քննության ընթացքում տուժողներ Վարդան Մելքոնյանը, Ռուբեն Գևորգյանը, Վարդգես Օհանյանը և տուժողի ներկայացուցիչ Սուրեն Մարգարյանը հայտնել են, որ իրենց պատճառնած վնասը փոխհատուցվել է):
Դատարանը միաժամանակ արձանագրում է, որ Գուրգեն Սահակյանի պատասխանատվությունն ու պատիժը ծանրացնող հանգամանքներ չկան:
Համաձայն ՀՀ քրեական դատավարության օրենսգրքի 360-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե ամբաստանյալը պատժի ենթակա է, թե ոչ, պատժի ինչ տեսակ պետք է նշանակվի և պետք է արդյոք նա այն կրի:
Դատարանը գտնում է, որ կատարած արարքի համար ամբաստանյալ Գուրգեն Սերգեյի Սահակյանը ենթակա է քրեական պատասխանատվության և պատժի:
Դատարանը, հաշվի առնելով Գուրգեն Սահակյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ Գուրգեն Սահակյանի կողմից կատարած արարքի համար ՀՀ քրեական օրենսգրքի 177-րդ հոդվածի 2-րդ մասի սանկցիայով նախատեսված է պատիժ ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկում` 3 (երեք) տարի 6 (վեց) ամիս ժամկետով:
«Համաներում հայտարարելու մասին» ՀՀ Ազգային ժողովի 2009 թվականի հունիսի 19-ի որոշման 2-րդ կետի 5-րդ ենթակետի համաձայն` պատժից պետք է ազատել առավելագույնը հինգ տարի ժակետով ազատազրկման դատապարտված այն անձանց, որոնք Հայաստանի Հանրապետության պաշտպանության համար մղված մարտական գործողություններում զոհված անձանց զավակ են և նախկինում դիտավորյալ հանցագործություն կատարելու համար ազատությունից զրկելու հետ կապված պատիժ չեն կրել կամ կրել են սակայն չունեն դատվածություն: Նույն որոշման 14-րդ կետի համաձայն` «Համաներում հայտարարելու մասին» ՀՀ Ազգային ժողովի 2009 թվականի հունիսի 19-ի որոշումը կիրառվում է այն անձանց նկատմամբ, որոնք հանցագործություն են կատարել մինչև 2009 թվականի հունիսի 1-ը ներառյալ, իսկ Գուրգեն Սերգեյի Սահակյանը հանրորեն վտանգավոր վերջին արարքը կատարել է 2008 թվականի հոկտեմբեր ամսվա կեսերին: Համաներման որոշման 8-րդ կետում սահմանված են այն դեպքերը, որոնց առկայության պայմաններում օրենսդիրը բացառել է համաներման կիրառումը: Մասնավորապես` համաներման որոշման 8-րդ կետի 7-րդ ենթակետում թվարկված են ՀՀ քրեական օրենսգրքի այն հոդվածները և հոդվածների մասերը, որոնցով նախատեսված արարքները կատարած անձանց նկատմամբ համաներումը կիրառելի չէ: Սակայն հարկ է նկատել, որ թվարկված հոդվածների և հոդվածների մասերի շարքից բացակայում է ՀՀ քրեական օրենսգրքի 177-րդ հոդվածի 2-րդ մասը, այսինքն` ՀՀ քրեական օրենսգրքի 177-րդ հոդվածի 2-րդ մասով նախատեսված արարքներ կատարած անձանց նկատմամբ համաներման կիրառումը սահմանափակված չէ: Սույն քրեական գործի նյութերում բացակայում է նաև համաներման որոշման 8-րդ կետի մյուս ենթակետերում նշված այն սահմանափակումները, որոնք կարող են արգելք հանդիսանալ համաներման ակտի կիրառման համար: Հիմք ընդունելով վերը նշվածը` դատարանը գտնում է, որ ամբաստանյալ Գուրգեն Սերգեյի Սահակյանին «Համաներում հայտարարելու մասին» ՀՀ Ազգային Ժողովի 2009 թվականի հունիսի 19-ի թիվ Ն-152-4 որոշման կիրառմամբ պետք է ազատել նշանակված պաժից:
ՀՀ քրեական դատավարության օրենսգրքի 374-րդ հոդվածի համաձայն` ամբաստանյալի նկատմամբ պատիժը կրելուց ազատելով մեղադրական դատավճիռ կայացնելու դեպքում, եթե ամբաստանյալը կալանքի տակ է գտնվում, դատարանը նրան անհապաղ ազատում է կալանքից դատական նիստի դահլիճում: Քանի որ Գուրգեն Սահակյանը վերոնշյալ հիմնավորմամբ պետք է ազատվի պատիժը կրելուց, ուստի նրա նկատմամբ ընտրված խափանման միջոցը` կալանավորումը, պետք է վերացնել և նրան անհապաղ ազատ արձակել:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2009 թվականի հունիսի 23-ի որոշմամբ իրեղեն ապացույց ճանաչված և ՀՀ ոստիկանության Արաբկիրի բաժնին ի պահ հանձնված Գուրգեն Սահակյանի կողմից շահագործված «ՎԱԶ 2105» մակնիշի 04ՏՍ631 պետհամարանիշի ավտոմեքենայի վրա տեղադրված դիմացի երկու նստատեղերը, սարքավորումների վահանակը, հետևի երկու անվադողերն իրենց անվահեծերով և հետևի լուսարձակները պետք է հանձնել «Տաքսի Մանանդ» ՍՊ ընկերությանը` ի տնօրինություն:
ՀՀ քրեական դատավարության օրենսգրքի 360-րդ հոդվածի 1-ին մասի 10-րդ կետի համաձայն` դատավճիռ կայացնելիս դատարանը լուծում է այն հարցը, թե քաղաքացիական հայցն ենթակա է արդյոք բավարարման, ում օգտին և ինչ չափով։
2008 թվականի հոկտեմբերի 9-ի որոշմամբ տուժող «Տաքսի Մանանդ» ՍՊ ընկերության ներկայացուցիչ Սուրեն Սարգսյանը ճանաչվել է քաղաքցիական հայցվորի ներկայացուցիչ, իսկ 2008 թվականի նոյեմբերի 3-ի, 10-ի, 2009 թվականի հունիսի 2-ի, 12-ի և 22-ի որոշումներով համապատախանաբար տուժողներ Վարդան Մելքոնյանը, Վարդգես Օհանյանը, Մանվել Մանուկյանը, Ռուբեն Գևորգյանը և Արմեն Խաչատրյանը ճանաչվել են քաղաքցիական հայցվորներ: ՀՀ քրեական դատավարության օրենսգրքի 161-րդ հոդվածի 2-րդ մասի համաձայն` քաղաքացիական հայցից հրաժարվելն ընդունելը հանգեցնում է քրեական դատավարությունում քաղաքացիական հայցով վարույթի կարճման: Սույն գործով քաղաքացիական հայցվորի (տուժողի) ներկայացուցիչ Սուրեն Սարգսյանը, քաղաքացիական հայցվորներ (տուժողներ) Վարդան Մելքոնյանը, Վարդգես Օհանյանը, Մանվել Մանուկյանը, Ռուբեն Գևորգյանը և Արմեն Խաչատրյանը դատական նիստի ժամանակ հրաժարվել են իրենց կողմից հարուցած քաղաքացիական հայցերից, ուստի Դատարանը գտնում է, որ քաղաքացիական հայցերից հրաժարումը պետք է ընդունել և «Տաքսի Մանանդ» ՍՊ ընկերության, Վարդան Մելքոնյանի, Վարդգես Օհանյանի, Մանվել Մանուկյանի, Ռուբեն Գևորգյանի և Արմեն Խաչատրյանի կողմից հարուցած քաղաքացիական հայցերի վարույթները կարճել:
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախսերն ամբաստանյալ Գուրգեն Սահակյանից ենթակա չեն բռնագանձման, քանի որ հանցագործությամբ պատճառված վնասի հատուցման համար հարուցված քաղաքացիական հայցերի վարույթները վերը նշված հիմնավորմամբ պետք է կարճել (ավելին, գործի դատական քննության ընթացքում սույն քրեական գործով բոլոր տուժողներն ու տուժողի ներկայացուցիչը հայտնել են, որ Գուրգեն Սահակյանից որևէ պահանջ չունեն), իսկ ՀՀ քրեական դատավարության օրենսգրքի 168-րդ հոդվածի 1-ին մասի 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի, ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ, 369-372-րդ և 3753-րդ, հոդվածներով` Դատարանը
ՎՃՌԵՑ

Գուրգեն Սերգեյի Սահակյանին մեղավոր ճանաչել ՀՀ քրեական օրենսգրքի 177-րդ հոդվածի 2-րդ մասի 2-րդ և 4-րդ կետերով և պատիժ նշանակել ազատազրկում`3 (երեք) տարի 6 (վեց) ամիս ժամկետով:
«Համաներում հայտարարելու մասին» ՀՀ Ազգային Ժողովի 2009 թվականի հունիսի 19-ի թիվ Ն-152-4 որոշման 2-րդ կետի 5-րդ ենթակետի կիրառմամբ Գուրգեն Սերգեյի Սահակյանին պատժից ազատել:
Գուրգեն Սերգեյի Սահակյանի նկատմամբ ընտրված խափանման միջոցը` կալանավորումը, վերացնել և նրան անհապաղ ազատել կալանքից:
Դատավճիռն օրինական ուժի մեջ մտնելուց հետո` իրեղեն ապացույց ճանաչված Գուրգեն Սահակյանի կողմից շահագործված «ՎԱԶ 2105» մակնիշի 04ՏՍ631 պետհամարանիշի ավտոմեքենայի վրա տեղադրված դիմացի երկու նստատեղերը, սարքավորումների վահանակը, հետևի երկու անվադողերն իրենց անվահեծերով և հետևի լուսարձակները հանձնել «Տաքսի Մանանդ» ՍՊ ընկերությանը` ի տնօրինություն:
«Տաքսի Մանադ» ՍՊ ընկերության, Վարդան Մելքոնյանի, Վարդգես Օհանյանի, Մանվել Մանուկյանի, Ռուբեն Գևորգյանի և Արմեն Խաչատրյանի կողմից հարուցած քաղաքացիական հայցերի վարույթները կարճել:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):

ԴԱՏԱՎՈՐ Մ.ՊԱՊՈՅԱՆ