ԵԱՔԴ/0105/01/09







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՀԱՄԱՅՆՔՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ


ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ


«7» հոկտեմբերի 2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Ա.Շահազիզյան

դռնբաց դատական նիստում քննեց քրեական գործն ըստ մեղադրանքի`
Մարաթ Ռաֆիկի Մարությանի` ծնված 1973 թվականի մայիսի 30-ին Նաիրիի շրջանի Պռոշյան գյուղում, ազգությամբ հայ, ՀՀ քաղաքացի, միջնակարգ կրթությամբ, չի աշխատում, չամուսնացած, դատվածություն չունեցող, բնակվել է Կոտայքի մարզի Պռոշյան գյուղի Գ.Զոհրապի փողոցի 8-րդ տանը: Մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 266-րդ հոդվածի 4-րդ մասով և 268-րդ հոդվածի 1-ին մասով, արգելանքի տակ է 2009 թվականի հունիսի 25-ից,
Գագիկ Ավետիքի Աբրահամյանի` ծնված 1968 թվականի հուլիսի 3-ին Աշտարակի շրջանի Պռոշյան գյուղում, ազգությամբ հայ, ՀՀ քաղաքացի, միջնակարգ կրթությամբ, չամուսնացած գտնվում է փաստական ամուսնական հարաբերությունների մեջ, խնամքին երեք անձ, աշխատել է «Ա.Ավետյանի ԱՍԱ» ՍՊ ընկերությունում որպես վարորոդ, դատվածություն չունեցող, բնակվել է Կոտայքի մարզի Պռոշյան գյուղի Իսահակյան փողոցի 5-րդ տանը: Մեղադրանք է առաջադրվել ՀՀ քրեական օրենսգրքի 266-րդ հոդվածի 4-րդ մասով և 268-րդ հոդվածի 2-րդ մասի 2-րդ կետով, արգելանքի տակ է 2009 թվականի հունիսի 25-ից:
1. Գործի դատավարական նախապատմությունը.
2009 թվականի հունիսի 26-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ ՀՀ քրեական օրենսգրքի 268-րդ հոդվածի 2-րդ մասի 2-րդ կետով և 266-րդ հոդվածի 4-րդ մաով նախատեսված հանցագործությունների հատկանիշներով հարուցվել և վարույթ է ընդունվել թիվ 09109609 քրեական գործը:
2009 թվականի հունիսի 29-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ Մարաթ Ռաֆիկի Մարությանին մեադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 266-րդ հոդվածի 4-րդ մասով և 268-րդ հոդվածի 1-ին մասով:
2009 թվականի հունիսի 29-ին ՀՀ ոստիկանության Քանաքեռ-Զեյթունի քննչական բաժնի քննիչ Կ.Պապոյանի որոշմամբ Գագիկ Ավետիքի Աբրահամյանին մեղադրանք է առաջադրվել ՀՀ քրեական օրենսգրքի 266-րդ հոդվածի 4-րդ մասով և 268-րդ հոդվածի 2-րդ մասի 2-րդ կետով:
2009 թվականի օգոստոսի 15-ին Մարաթ Ռաֆիկի Մարությանի և Գագիկ Ավետիքի Աբրահամյանի վերաբերյալ քրեական գործը մեղադրական եզրակացությամբ ուղարկվել է Դատարան:
Մարաթ Ռաֆիկի Մարությանին մեղադրանք է առաջադրվել ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 266-րդ հոդվածի 4-րդ մասով և 268-րդ հոդվածի 1-ին մասով այն արարքների համար, որ նա 2009 թվականին մայիս ամսին, Գորիս քաղաքում գործով չպարզված հանգամանքներում ազգությամբ պարսիկ ոմն Ռաջաֆից ապօրինի ձեռք է բերել ափիոն տեսակի թմրամիջոց և պրեկուրսոր հանդիսացող քացախաթթվի անհիդրիդ, որից` 2009 թվականին հունիսի 25-ին` ժամը 13:30-ի սահմաներում, Աշտարակ-Պռոշյան խճուղու ձախ հատվածում գտնվող «ՌԱՆ-ՕՅԼ» բենզալցակայանի մոտ խոշոր չափի 0.72 գրամ հաստատուն քաշով ափիոն տեսակի թմրամիջոցը և 1 մլ ծավալով պրեկուրսոր հանդիսացող քացախաթթվի անհիդրիդը 10.000 ՀՀ դրամով վաճառելու եղանակով ապօրինի իրացրել է Գագիկ Ավետիքի Աբրահամյանին: Բացի այդ, Մարաթ Ռաֆիկի Մարությանն իր մոտ ապօրինի պահել է 10 մլ ծավալով ներարկիչ, որում առկա է եղել 2.2 մլ ծավալով ացետիլացված ափիոն տեսակի թմրամիջոցի լուծույթ, որում ացետիլացված ափիոնի չոր քաշը կազմում է 0.14586 գրամ, որն էլ 2009 թվականի հունիսի 25-ին հայտնաբերվել է նրա մոտից անձնական խուզարկությամբ:
Գագիկ Ավետրքի Աբրահամյանին մեղադրանք է առաջադրվել ՀՀ քրեական օրենսգրքի 266-րդ հոդվածի 4-րդ մասով և 268-րդ հոդվածի 2-րդ մասի 2-րդ կետով այն արարքների համար, որ նա 2009 թվականին հունիսի 25-ին` ժամը 13:30-ի սահմաներում, Աշտարակ-Պռոշյան խճուղու ձախ հատվածում գտնվող «ՌԱՆ ՕՅԼ» բենզալցակայանի մոտ, Մարաթ Ռաֆիկի Մարությանից 10.000 ՀՀ դրամով ապօրինի ձեռք է բերել և պահել խոշոր չափի 0.72 գրամ հաստատուն քաշով ափիոն տեսակի թմրամիջոց և 1 մլ ծավալով պրեկուրսոր հանդիսացող քացախաթթվի անհիդրիդ, որը նույն օրը հայտնաբերվել է ոստիկանության աշխատակիցների կողմից նրա անձնական խուզարկությամբ:
2. Ապացույցների հետազոտում և գնահատում.
Դատական քննության ընթացքում ամբաստանյալ Մարաթ Մարությանն առաջադրված մեղադրանքում իրեն մեղավոր ճանաչեց մասնակի և ցուցմունք տվեց այն մասին, որ թմրամիջոց օգտագործում է մոտ 5-6 ամիս: 2009 թվականի մայիսին Գորիս քաղաքում` ավտոկանգառում, ազգությամբ պարսիկ ոմն Ռաջաֆից ձեռք է բերել թմրամիջոց: Այդ թմրամիջոցն ինքը ձեռք է բերել իր անձնական օգտագործման համար, քանի որ Արցախյան ազատամարտի ժամանակ ցնցակաթված ստանալուց հետո ուժեղ գլխացավեր է ունենում և այդպիսով ցանկացել է գլխացավերը մեղմել: Ինքը Ռաջաֆին խնդրել է իրեն տալ ծխելու եղանակով գործածվող թմրամիջոց, սակայն նա իրեն տվել է պլաստիրինի նման զանգված և անհիդրիդ: Ինքը իմացել է, թե ինչ թմրամիջոց է ձեռք բերում և ինչպիսին է դրա պատրաստման եղանակը: Ռաջաֆից վերցրած թմրամիջոցի մի մասը կուլ տալու եղանակով օգտագործել է, իսկ մնացածը` պահել իր մոտ: Ամբաստանյալ Գագիկ Աբրահամյանն իր մորեղբոր որդին է: Գագիկ Աբրահամյանը իմացել է, որ ինքը թմրամիջոց է օգտագործում, որից ելնելով նա իրենից թմրամիջոց է ուզել: Աշտարակ-Երևան խճուղում գտնվող բենզալցակայանի մոտ ինքը Գագիկին տվել է Ռաջաֆից ձեռք բերած թմրամիջոցի մի մասը և անհիդրիդ: Սակայն Գագիկին տված թմրամիջոցը ինքը ոչ թե վաճառել, այլ պարզապես տվել է, որի չափը չի հիշում: Այնուհետև ոստիկանության աշխատակիցներն իր բակից և իր մոտից հայտնաբերել են թմրամիջոց: Ինչ վերաբերում է նախնական քննության ընթացքում տրված ցուցմունքներին, ապա դրանք համապատասխանում են իրականությանը, ճիշտ են, բացառությամբ Գագիկ Աբրահամյանին թմրամիջոց վաճառելու հանգամանքի: Այդ ցուցմունքները գրել է իր ձեռքով, սակայն այդ պահին իր առողջական վիճակը եղել է ծանր, որի պատճառվ ինքը չի գիտակցել թե ինչ է գրում և ինչիպիսի հետևանքներ դրանք կարող են ունենալ:
Մարաթ Մարությանը նախնական քննության ընթացքում` 2009 թվականի հունիսի 26-ին, ցուցմունք է տվել այն մասին, որ բնակվում է Կոտայքի մարզի Պռոշյան գյուղի Գ.Զոհրապի փողոցի 8-րդ տանը: 2009 թվականի հունիսի 25-ին` ժամը 13:00-ի սահմաններում, իր բարեկամ Գագիկ Աբրահամյանը զանգահարել է իրեն և հարցրել` «Սև ունես», իսկ ինքը պատասխանել է` «Կտամ յոլա կգնաս»: «Սև» ասելով նա նկատի է ունեցել ափիոն տեսակի թմրամիջոց: Իրենք պայմանավորվել են հանդիպել Աշտարակի մայրուղում գտնվող բենզալցակայանի մոտ, որտեղ ինքը պետք է լիցքավորեր իր «Գազ 52» մակնիշի 65ՕՍ007 պետհամարանիշի ավտոմեքենան: Ժամը 13:30-ի սահմաններում իրենք հանդիպել են նշված վայրում և ինքը Գագիկին տվել է մոտ 0.7 գրամ ափիոն տեսակի թմրամիջոց և 1 մլ անհիդրիդ: Այդ պահին իրենց ոչ ոք չի տեսել: Գագիկը եղել է «Գլորիա» տաքսի ծառայության սպիտակ Տ8221 պետհամարանիշի ավտոմեքենայով, որը վարել է անձամբ: Ինքը Գագիկից 10.000 ՀՀ դրամ է ուզել, քանի որ իր ձեռքին գումար չի եղել, որից հետո Գագիկը իրեն է տվել 10.000 ՀՀ դրամ: Դրանից հետո իրենք միմյանցից բաժանվել են: Նույն օրը` ժամը 23:00-ին, ինքը բերման է ենթարկվել ոստիկանության Քանաքեռ-Զեյթունի բաժին, որտեղ իր անձնական խուզարկությամբ հայտնաբերվել է իր կողմից պատրաստված և ներարկիչի մեջ լցված 2.2 մլ ծավալով ափիոնի լուծույթ, որն ինքը պատրաստել էր շերեփի մեջ ափիոնն անհիդրիդով բացելով: Ոստիկանություն բերման ենթարկվելուց մոտ 15 օր առաջ Գորիս քաղաքում ինքը ազգությամբ պարսիկ Ռաջաֆից 50.000 ՀՀ դրամով ձեռք էր բերել մոտ 5-6 գրամ ափիոն, որի մի մասը տվել է Գագիկին, իսկ մնացած մասով պատրաստել իր մոտից հայտնաբերված լուծույթը:
Դատական քննության ընթացքում ամբաստանյալ Գագիկ Աբրահամյանն առաջադրված մեղադրանքում իրեն լիովին մեղավոր ճանաչեց և, օգտվելով իր սահմանադրական իրավունքից, հրաժարվեց ցուցմունք տալ:
Գագիկ Աբրահամյանը նախնական քննության ընթացքում` 2009 թվականի հունիսի 26-ին, ցուցմունք է տվել այն մասին, որ 2009 թվականի հունիսի 25-ին` ժամը 11:00-13:00-ն ընկած ժամանակահատվածում, իր 093-26-91-63 հեռախոսահամարից զանգահարել է իր բարեկամ Մարաթ Մարությանին և ասել, որ իրեն լավ չի զգում ու հարցրել` արդյոք նա կարող է իրեն օգնել: Այսինքն ինքը Մարաթին հասկացրել է, որ թմրամիջոց է ուզում: Մարաթը իրեն ասել է, որ բենզին լիցքավորելու համար գնում է Աշտարակի մայրուղում գտնվող բենզալցակայան, որտեղ էլ պայմանավորվել են հանդիպել: Բենզալցակայանում իրենք հանդիպել են 2009 թվականի հունիսի 25-ին` ժամը 13:00-ին: Ինքը Մարաթից խնդրել է ափիոն տեսակի թմրամիջոց, իսկ նա, տեսնելով իր վիճակը, իրեն տվել է մոտ 0.7 գրամ ափիոն տեսակի թմրամիջոց և այն պատրաստելու համար նախատեսված 1 մլ անհիդրիդ, որը լցված է եղել ներարկիչի մեջ: Ինքը դրանց դիմաց Մարաթին գումար չի տվել, քանի որ Մարաթը դրանք տվել է լավության կարգով: Դրանից հետո ինքը իրեն կցված Տ8221 պետհամարանիշի տաքսի ավտոմեքենայով ուղևորվել է դեպի Երևան քաղաք: Երևան քաղաքի Կիևյան-Հալաբյան փողոցների խաչմերուկից ինքը բերման է ենթարկվել ոստիկանության Քանաքեռ-Զեյթունի բաժին, որտեղ էլ անձնական խուզարկությամբ իր մոտից հայտնաբերվել են Մարաթից վերցված ափիոնը, անհիդրիդը և ափիոնի հետքերով բամբակները: Բամաբակները եղել են իրենը, որոնք մնացած են եղել իր կողմից նախկինում թմրամիջոցներ` հատկապես ափիոն օգտագործելուց: Ինքը թմրամիջոց է օգտագործել վերջին 20-30 օրերի ընթացքում: Օրական օգտագործել է 1 կամ 1.5 հաբ ափիոն, ինչը պատրաստել է անհիդրիդով: Ինքն ափիոն տեսակի թմրամիջոց է ձեռք բերել 2 անգամ` առաջինը` անծանոթ մի մարդուց, իսկ երկրորդը` Մարաթ Մարությանից: Ինքը զղջում է իր կատարածի համար և խնդրում ներել ու մեղմ վերաբերվել:
Գագիկ Աբրահամյանը նախնական քննության ընթացքում` 2009 թվականի հունիսի 27-ին, ցուցմունք է տվել այն մասին, որ Մարաթի հետ պայմանավորվել են հանդիպել ժամը 13:30-ին Աշտարակ-Պռոշյան խճուղում գտնվող «Ռան Օյլ» բենզալցակայանի մոտ, որտեղ էլ ինքը Մարաթից վերցրել է 0.7 գրամ ափիոն և 1 մլ անհիդրիդ:
Գագիկ Աբրահամյանը նախնական քննության ընթացքում` 2009 թվականի հունիսի 29-ին, ցուցմունք է տվել այն մասին, որ 2009 թվականի հունիսի 25-ին` ժամը 13:30-ի սահմաններում, Աշտարակ-Պռոշյան խճուղում գտնվող «Ռան Օյլ» բենզալցակայանի մոտ ինքը Մարաթ Մարությանից 10.000 ՀՀ դրամով ձեռք է բերել և պահել 0.72 գրամ ափիոն տեսակի թմրամիջոց և 1 մլ ծավալով անհիդրիդ, որոնք նույն օրը հայտնաբերվել են իր անձնական խուզարկությամբ:
2009 թվականի հունիսի 27-ի առերես հարցաքննության մասին արձանագրության համաձայն` Մարաթ Մարությանը հայտնել է, որ 2009 թվականի հունիսի 25-ին` ժամը 13:00-ի սահմաններում, Գագիկը զանգահարել է իրեն և հարցրել. «Սև ունես, լոմկա եմ»: Ինքը պատասխանել է. «Ունեմ, կտամ յոլա կգնաս»: Ինքը հասկացել է, որ Գագիկը իրենից ափիոն տեսակի թմրամիջոց է ուզում, քանի որ իրենք ափիոնին «սև» են անվանում: Ինքը Գագիկին ասել է, որ նա գա Աշտարակի մայրուղում գտնվող բենզալցակայանի մոտ: Ժամը 13:30-ի սահմաններում իրենք հանդիպել են պայմանավորված վայրում: Գագիկի խնդրանքով ինքը իր ավտեմեքենայի սրահում նրան տվել է 0.7 գրամ ափիոն և 1 մլ անհիդրիդ: Դրանից հետո ինքը Գագիկից ուզել է 10.000 ՀՀ դրամ և Գագիկը իրեն է տվել այդ գումարը: Իսկ Գագիկ Աբրահամյանը հայտնել է, որ ինքը լսել է Մարաթի ցուցմունքը և համաձայն է նրա հետ, իրականությունը դա է: Ինքը զանգահարել է Մարաթին և հարցրել. «Սև ունես, լոմկա եմ», իսկ Մարաթը պատասխանել է. «Կտամ յոլա կգնաս»: Ինքը նրանից վերցրել է 0.7 գրամ ափիոն և 1 մլ անհիդրիդ: Դրանից հետո Մարաթը իրենից ուզել է 10.000 ՀՀ դրամ և ինքը տվել է այդ գումարը:
2009 թվականի հունիսի 25-ի անձին ոստիկանության բաժին բերման ենթարկելու մասին արձանագրության համաձայն` քաղաքացի Գագիկ Աբրահամյանը թմրամիջոց ապօրինի կերպով ձեռք բերելու, պահելու, իրացնելու և գործածելու կասկածանքով 2009 թվականի հունիսի 25-ին բերման է ենթարկվել ոստիկանության Քանաքեռ-Զեյթունի բաժին:
2009 թվականի հունիսի 25-ի անձնական խուզարկություն կատարելու մասին արձանագրության համաձայն` Գագիկ Ավետիքի Աբրահամյանի վերնաշապիկի աջ գրպանից հայտնաբերվել է զինվորական ծառայության թիվ 465768 վկայականը, ԱՐ952965 համարի վարչական իրավախախտման որոշումը, UA018990 համարի վարորդական իրավունքի վկայականը, անդրավարտիքի հետևի գրպանից հայտնաբերվել է 1 հատ 5 (հինգ) հազար և 5 հատ 1 (մեկ) հազար ՀՀ թղթադրամներ, ձախ գրպանից հայտնաբերվել է 357256009881613 գործարանային համարով «Մոտոռոլա» ֆիրմայի բջջային հեռախոս 093-26-91-63 հեռախոսահամարով և Գագիկ Ավետիքի Աբրահամյանի թիվ 1307680364 սոցիալական քարտը, անդրավարտիքի աջ գրպանից հայտնաբերվել է մոտ 0.8 գրամ քաշով մուգ շագանակագույն ափիոնանման զանգված, որը փաթեթավորված է եղել մուգ գույնի պոլիէթիլենային տոպրակի մեջ, բաց պոլիէթիլենային տոպրակի մեջ եղել է մուգ շագանակագույն հետքերով բամբակ, աջ գրպանից հայտնաբերվել է 17 սմ ընդհանուր երկարությամբ, էբոնիտե բռնակներով և 8 սմ երկարությամբ շեղբով դանակ, իսկ զուգագուլպայի միջից հայտնաբերվել է 1 մգ ծավալով ներարկիչ, որի մեջ եղել է մոտ 1 մգ թափանցիկ հեղուկ, ներարկիչի ծայրը եղել է հալեցված և փակված: Ըստ Գագիկ Աբրահամյանի բանավոր հայտարարության` մուգ գույնի պոլիէթիլենային տոպրակի մեջ առկա է մոտ 0.8 գրամ ափիոն տեսակի թմրամիջոց, իսկ թափանցիկ տոպրակի մեջ գտնվող շագանակագույն հետքերով բամբակները իր կողմից նախկինում օգտագործված ափիոն տեսակի թմրամիջոցի հետքերից առաջացած բամբակներ են, որն ինքը պահել է իր մոտ հետագայում գործածելու համար, 1 մգ ծավալով ներարկիչի մեջ առկա է նույն չափի անհիդրիդ, որը նախատեսված է եղել ափիոնի հետ լուծելու համար:
2009 թվականի հունիսի 25-ի փորձագետի թիվ 256Ք եզրակացության համաձայն` փորձաքննության ներկայացված 0.72 գրամ հաստատուն քաշով մուգ շագանակագույն նյութը հանդիսանում է ափիոն տեսակի թմրամիջոց: Փորձաքննության ներկայացված ներարկիչում առկա 1 մլ ծավալով անգույն թափանցիկ հեղուկը հանդիսանում է քացախաթթվի անհիդրիդ: Փորձաքննության ներկայացված բամբակյա խծուծների վրա հայտնաբերվել են ացետիլացված ափիոն տեսակի թմրամիջոցի հետքեր:
2009 թվականի հունիսի 26-ի ձերբակալման արձանագրության համաձայն` Գագիկ Աբրահամյանը ձերբակալվել է:
2009 թվականի հունիսի 25-ի անձին ոստիկանության բաժին բերման ենթարկելու մասին արձանագրության համաձայն` քաղաքացի Մարաթ Մարությանը թմրանյութեր օգտագործելու, պահելու, վաճառելու կասկածանքով 2009 թվականի հունիսի 25-ին բերման է ենթարկվել ոստիկանության Քանաքեռ-Զեյթունի բաժին:
2009 թվականի հունիսի 25-ի անձնական խուզարկության արձանագրության համաձայն` Մարաթ Ռաֆիկի Մարությանի անդրավարտիքի աջ գրպանից հայտնաբերվել է 2 ներարկիչ` 3 և 12 մգ ծավալներով, որոնցից 12 մգ ծավալով ներարկիչի մեջ առկա է եղել մոտ 2 մգ դեղնակարմրավուն հեղուկ, իսկ ձեռքի պոլիէթիլենային տոպրակի միջից, որի վրա գրված է եղել «Հարություն Բասենցի» հայտնաբերվել է թափանցիկ տոպրակի մեջ փաթեթավորված բամբակյա խծուծներ, «սպիրտ բժշկական» գրառմամբ ապակյա տարա, որի մեջ առկա է եղել թափանցիկ հեղուկ և մեջը եղել է բամբակյա խծուծ, մուգ շագանակագույն հետքերի առկայությամբ 2 հատ 24 մգ ծավալով ներարկիչներ, որոնցից մեկը` ասեղով, մետաղյա բութ եզրերով և ծայրերով կենցաղային 2 դանակներ, որոնց վրա առկա է եղել մուգ շագանակագույն հետքեր, գորշ հետքերի առկայությամբ 2 մետաղյա շերեփներ, որոնցից մեկը եղել է առանց բռնակի, ռուսերեն տառերով «беленькая» (բելենկայա) գրառմամբ օղու բաժակ, դիմեդրոլ տեսակի դեղամիջոցի թղթե փաթեթ, որի մեջ եղել է 5 հաբ, դիմեդրոլ տեսակի դեղամիջոցի պլաստմասե դատարկ փաթեթ, 5 հատ 3 մգ, 3 հատ 1 մգ և 1 հատ 12 մգ ծավալներով դատարկ ներարկիչներ, պոլիէթիլենային տոպրակի մեջ փաթեթավորված բամբակ, վերնաշապիկի գրպանից հայտնաբերվել է «Նոկիա» ֆիրմայի բջջային հեռախոս 093-89-23-59 հեռախոսահամարով: Ըստ Մարաթ Մարությանի բանավոր հայտարարության 12 մգ ծավալով ներարկիչի մեջ եղածը ափիոն տեսակի թմրամիջոց է և վերը նշված իրերն ու թմրամիջոցը պատկանում են իրեն, քանի որ ինքն օգտագործում է թմրամիջոց:
2009 թվականի հունիսի 26-ի փորձագետի թիվ 257Ք եզրակացության համաձայն` փորձաքննության ներկայացված 10 մլ ծավալով ներարկիչում եղած 2.2 մլ ծավալով հեղուկը հանդիսանում է ացետիլացված ափիոն տեսակի թմրամիջոցի լուծույթ, որում ացետիլացված ափիոնի չոր քաշը կազմում է 0.14586 գրամ: Փորձաքննության ներկայացված պոչով շերեփում, բամբակյա խծուծներում, դանակների վրա և մեկ հատ 20 մլ ծավալով ներարկիչում հայտնաբերվերվել են ափիոն տեսակի թմրամիջոցի հետքեր: Փորձաքննության ներկայացված բաժակում և մեկ 20 մլ ծավալով ներարկիչում հայտնաբերվել են ացետիլացված ափիոն տեսակի թմրամիջոցի հետքեր: Փորձաքննության ներկայացված անպոչ շերեփում, «ՍՊԻՐՏ ԲԺՇԿԱԿԱՆ 96%, 100 մլ» գրառմամբ տարայում առկա հեղուկում, ինչպես նաև 10 մլ և 2 մլ ծավալներով ներարկիչներում ափիոնի շարքի թմրամիջոցի հետքեր չեն հայտնաբերվել:
2009 թվականի հունիսի 26-ի ձերբակալման արձանագրության համաձայն` Մարաթ Մարությանը ձերբակալվել է:
ՀՀ ոստիկանության ինֆորմացիոն կենտրոնի պահանջագրի համաձայն` Մարաթ Մարությանը.
-Նաիրիի ժողովրդական դատարանի 1997 թվականի օգոստոսի 5-ի դատավճռով Քրեական օրենսգրքի 86-րդ հոդվածի 2-րդ մասով դատապարտվել է ազատազրկման` 2 տարի 6 ամիս ժամկետով և 1997 թվականի ապրիլի 30-ին ընդունված համաներման ակտի կիրառմամբ ազատվել է նշանակված պատիժը կրելուց,
-Կոտայքի մարզի առաջին ատյանի դատարանի 2000 թվականի նոյեմբերի 15-ի դատավճռով Քրեական օրենսգրքի 222-րդ հոդվածի 2-րդ մասով դատապարտվել է ազատազրկման` 1 տարի ժամկետով: 2001 թվականի օգոստոսի 8-ին պայմանական վաղաժամկետ ազատվել է պատժի մնացած մասը` 7 ամիս 12 օրը, կրելուց,
-Արարատի մարզի առաջին ատյանի դատարանի 2001 թվականի հոկտեմբերի 5-ի դատավճռով Քրեական օրենսգրքի 229-րդ հոդվածով դատապարտվել է ազատազրկման` 2 տարի ժամկետով: 2003 թվականի օգոստոսի 1-ին ազատվել է պատժի կրումից:
ՀՀ ոստիկանության ինֆորմացիոն կենտրոնի պահանջագրի համաձայն` Գագիկ Աբրահամյանը Շահումյանի դատարանի 2000 թվականի հուլիսի 13-ի դատավճռով Քրեական օրենսգրքի 229-րդ հոդվածով դատապարտվել է ազատազրկման` 2 տարի ժամկետով: 2002 թվականի ապրիլի 27-ին ազատվել է պատժի կրումից:
2009 թվականի հունիսի 29-ի կալանավորումը որպես խափանման միջոց ընտրելու միջնորդությունը քննության առնելու մասին որոշման համաձայն` մեղադրյալ Գագիկ Աբրահամյանի նկատմամբ որպես խափանման միջոց ընտրվել է կալանավորումը:
2009 թվականի հունիսի 29-ի կալանավորումը որպես խափանման միջոց ընտրելու միջնորդությունը քննության առնելու մասին որոշման համաձայն` մեղադրյալ Մարաթ Մարությանի նկատմամբ որպես խափանման միջոց ընտրվել է կալանավորումը:
ՀՀ առողջապահության նախարարության «Հոգեբուժական բժշկական կենտրոն» ՓԲ ընկերության Ավանի կլինիկայի ղեկավար Ն.Դարբինյանի 2009 թվականի հուլիսի 2-ի թիվ 0125-3069 գրության համաձայն` Մարաթ Ռաֆիկի Մարությանը «Հոգեբուժական բժշկական կենտրոն» ՓԲ ընկերության Ավանի կլինիկայում հաշվառման մեջ չի գտնվել:
ՀՀ առողջապահության նախարարության «Հոգեբուժական բժշկական կենտրոն» ՓԲ ընկերության Ավանի կլինիկայի ղեկավար Ն.Դարբինյանի 2009 թվականի հուլիսի 2-ի թիվ 0125-3068 գրության համաձայն` Գագիկ Ավետիքի Աբրահամյանը «Հոգեբուժական բժշկական կենտրոն» ՓԲ ընկերության Ավանի կլինիկայում հաշվառման մեջ չի գտնվել:
«Հոգեբուժական բժշկական կենտրոն» ՓԲ ընկերության նարկոլոգիական կլինիկայի ղեկավար Պ.Սեմերջյանի 2009 թվականի հուլիսի 2-ի թիվ 1732 գրության համաձայն` Մարաթ Ռաֆիկի Մարությանը «Հոգեբուժական բժշկական կենտրոն» ՓԲ ընկերության նարկոլոգիական կլինիկայում հաշվառման մեջ չի գտնվել:
«Հոգեբուժական բժշկական կենտրոն» ՓԲ ընկերության նարկոլոգիական կլինիկայի ղեկավար Պ.Սեմերջյանի 2009 թվականի հուլիսի 2-ի թիվ 1733 գրության համաձայն` Գագիկ Ավետիքի Աբրահամյանը «Հոգեբուժական բժշկական կենտրոն» ՓԲ ընկերության նարկոլոգիական կլինիկայում հաշվառման մեջ չի գտնվել:
2009 թվականի հուլիսի 1-ի փորձագետի թիվ 0477 եզրակացության համաձայն` հետազոտման պահին` 2009 թվականի հունիսի 27-ին, Մարաթ Ռաֆիկի Մարությանի մեզի փորձանմուշում հայտնաբերվել են ափիոնի խմբի թմրամիջոցի թմրալկալոիդների հետքեր: Բիոմիջավայրի հետազոտությամբ օգտագործման եղանակը հնարավոր չի եղել որոշել: Վերջին օգտագործումից հետո մարդու օրգանիզմում ափիոնի խմբի թմրալկալոիդները կարող են հայտնաբերվել 100 ժամվա ընթացքում:
2009 թվականի հուլիսի 1-ի փորձագետի թիվ 0476 եզրակացության համաձայն` հետազոտման պահին` 2009 թվականի հունիսի 27-ին, Գագիկ Ավետիքի Աբրահամյանի մեզի փորձանմուշում հայտնաբերվել են ափիոնի խմբի թմրամիջոցի թմրալկալոիդների հետքեր: Բիոմիջավայրի հետազոտությամբ օգտագործման եղանակը հնարավոր չի եղել որոշել: Վերջին օգտագործումից հետո մարդու օրգանիզմում ափիոնի խմբի թմրալկալոիդները կարող են հայտնաբերվել 100 ժամվա ընթացքում:
2009 թվականի հուլիսի 14-ի փորձագետի թիվ 09-1331 եզրակացության համաձայն` փորձաքննության ներկայացված «ДИМЕДРОЛ 50МГ, 10 ТАБЛЕТОК» (Դիմեդրոլ 50 մգ, 10 տաբլետոկ) գրառումներով գործարանային թղթյա փաթեթավորման մեջ առկա սպիտակ գույնի, շրջանաձև թվով 5 հատ դեղահատերից յուրաքանչյուրում պարունակվում է 0.05 գրամ դիֆենիլհիդրամին (դիմեդրոլ) տեսակի ակտիվ բաղադրատարր: Վերահաշվարկված` 5 դեղհատերում պարունակվող դիֆենիլհիդրամի ընդհանուր պարունակությունը կազմում է 0.25 գրամ: Դիֆենիլհիդրամինը (դիմեդրոլ) ներառված չէ «Հայաստանի Հանրապետության հսկման ենթակա թմրամիջոցների, հոգեմետ նյութերի և դրանց պրեկուրսորների» կազմում (Երևան 2003): Փորձաքննությանը ներկայացված օբյեկտներում պրեկուրսոր հանդիսացող նյութեր, թմրակտիվ և հոգեմետ բաղադրատարրեր չեն պարունակվում:
2009 թվականի հուլիսի 10-ի փորձագետի թիվ 2080 եզրակացության համաձայն` փորձաքննության ներկայացված ծալովի դանակը գործարանային արտադրության տնտեսակենցաղային նշանակության ծալովի գրպանի դանակ է, սառը զենք չի հանդիսանում:
2009 թվականի օգոստոսի 8-ի իրեղեն ապացույց ճանաչելու և քրեական գործին կցելու մասին որոշման համաձայն` թիվ 09109609 քրեական գործով Գագիկ Աբրահամյանի անձնական խուզարկությամբ նրա մոտից հայտնաբերված խոշոր չափի 0.72 գրամ հաստատուն քաշով ափիոն տեսակի թմրամիջոցը և 1 մլ ծավալով պրեկուրսոր հանդիսացող քացախաթթվի անհիդրիդը, ացետիլացված ափիոն տեսակի թմրամիջոցի հետքերով բամբակյա խծուծները, ծալովի դանակը, Մարաթ Մարությանի անձնական խուզարկությամբ նրա մոտից հայտնաբերված 10 մլ ծավալով ներարկիչը, որում առկա է 2.2 մլ ծավալով ացետիլացված ափիոն տեսակի թմրամիջոցի լուծույթ, որում ացետիլացված ափիոնի չոր քաշը կազմում է 0.14586 գրամ, ափիոն տեսակի թմրամիջոցի հետքերով պոչով շերեփը, բամբակյա խծուծները, 2 հատ բութ եզրերով դանակներ, 20 մլ ծավալով դատարկ ներարկիչը, ացետիլացված ափիոն տեսակի թմրամիջոցի հետքերով օղու բաժակը և 20 մլ ծավալով ներարկիչը, ինչպես նաև անպոչ շերեփը, 10 մլ և 2 մլ ծավալներով ներարկիչները, 4 հատ 2 մլ ծավալով դատարկ ներարկիչները, 3 հատ 1 մլ ծավալով դատարկ ներարկիչները, թվով 2 պոլիէթիլենային տարաները` բամբակյա խծուծներով, դեղահաբերի համար նախատեսված թղթից փաթեթը` «ДИМЕДРОЛ 50МГ» (Դիմեդրոլ 50 մգ) գրառումով, որի մեջ առկա են թվով 5 հաբեր, դեղահաբերի համար նախատեսված «ДИМЕДРОЛ-ДАРНИЦА» (Դիմեդրոլ-դարնիցա) գրառումով պլաստմասե դատարկ փաթեթը ճանաչվել են իրեղեն ապացույցներ և կցվել քրեական գործին:
2009 թվականի հունիսի 28-ի գույքի վրա կալանք դնելու մասին որոշման համաձայն` գույքի հնարավոր բռնագրավումն ապահովելու համար որոշվել է Մարաթ Ռաֆիկի Մարությանի Կոտայքի մարզի Պռոշյան գյուղի Գ.Զոհրապի փողոցի 8-րդ տանը գտնվող գույքի վրա կալանք դնել:
2009 թվականի հունիսի 28-ի գույքի վրա կալանք դնելու մասին արձանագրության համաձայն` Կոտայքի մարզի Պռոշյան գյուղի Գ.Զոհրապի փողոցի 8-րդ տանը կալանքի ենթակա գույք չի հայտնաբերվել:
2009 թվականի հուլիսի 21-ի գույքի վրա կալանք դնելու մասին որոշման համաձայն` որոշվել է գույքի հնարավոր բռնագրավումն ապահովելու համար, ինչպես նաև դատական ծախսերը ապահովելու նպատակով Մարաթ Ռաֆիկի Մարությանի գույքի վրա կալանք դնել:
Հայաստանի Հանրապետության կառավարությանն առընթեր անշարժ գույքի կադաստրի պետական կոմիտեի աշխատակազմի տեղեկատվական կենտրոն ստորաբաժանման ղեկավարի 2009 թվականի օգոստոսի 8-ի թիվ ՍԴ-1/1086 գրության համաձայն` 2009 թվականի հուլիսի 21-ի դրությամբ Մարաթ Ռաֆիկի Մարությանի անվամբ Կոտայքի մարզի Պռոշյան գյուղում գտնվող բնակելի տան, տնամերձ հողամասի և խաղողի այգու նկատմամբ գրանցված է համատեղ սեփականության իրավունք: Նշված գույքի նկատմամբ սահմանված կարգով կիրառվել է արգելանք:
ՀՀ Կոտայքի մարզի Պռոշյանի գյուղապետարանի կողմից 2009 թվականի օգոստոսի 24-ին տրված թիվ 1668 տեղեկանքի համաձայն` Գագիկ Ավետիքի Աբրահամյանը բնակվում է Կոտայքի մարզի Պռոշյան համայնքի Իսահակյան փողոցի 5-րդ տանը: Նրա ընտանիքի անդամներն են` հայրը` Ավետիք Աբրահամյանը, մայրը` Ռիմա Մանուկյանը, կինը` Սյուզաննա Դանիելյանը և դուստրը` Ռիմա Դանիելյանը:
Ծննդյան թիվ ԱԱ088902 վկայականի պատճենի համաձայն` Ռիմա Գագիկի Դանիելյանը ծնվել է 2006 թվականի մայիսի 24-ին:
ՀՀ Կոտայքի մարզի Պռոշյանի գյուղապետարանի կողմից 2009 թվականի սեպտեմբերի 10-ին տրված թիվ 1820 տեղեկանքի համաձայն` Գագիկ Ավետիքի Աբրահամյանի խնամքին են գտնվում կինը, անչափահաս դուստրը և թոշակառու ծնողները:
Պռոշյան համայքի ղեկավար Հ.Մուրադյանի և «Ա.Ավետյանի ԱՍԱ» ՍՊ ընկերության գործադիր տնօրեն Ա.Ավետիսյանի կողմից տրված բնութագրերի համաձայն` Գագիկ Ավետիքի Աբրահամյանը բնութագրվում է դրականորեն:
ՀՀ ՊՆ Շահումյանի զինկոմիսարիատի կողմից տրված տեղեկանքի համաձայն` Մարաթ Ռաֆիկի Մարությանը զինվորագրվել է Արցախյան ազատամարտին Շուշիի առանձին հրաձգային գումարտակի կազմում և 1993 թվականի մայիսից մինչև 1994 թվականի ապրիլը մասնակցել Մարտակերտի, Աղդամի, Կուբատլուի, Ֆիզուլու և Քելբաջարի շրջաններում մղված ինքնապաշտպանական և ազատագրական գործողություններին:
ՀՀ պաշտպանության նախարարի կողմից 1997 թվականի սեպտեմբերի 21-ին տրված թիվ 002518 վկայականի համաձայն` Մարաթ Ռաֆիկի Մարությանը պարգևատրվել է «1992-1994թթ. մարտական գործողությունների մասնակից» կրծքանշանով:
Պռոշյան համայքի ղեկավար Հ.Մուրադյանի կոմից տրված բնութագրի համաձայն` Մարաթ Ռաֆիկի Մարությանը բնութագրվում է դրականորեն:
«Երևան» բժշկական կենտրոնի կողմից տրված էպիկրիզի համաձայն Մարաթ Մարությանը 2009 թվականի օգոստոսի 29-ից մինչև 2009 թվականի սեպտեմբերի 4-ը «Երևան» բժշկական կենտրոնում ստացել է ստացիոնար բուժում: Նրա մոտ ախտորոշվել է խրոնիկական պերսիստացող հեպատիտ սրացման շրջանում, հեմառոյէկտոմիայից հետո թութքի կապակցությամբ: Հիվանդը դուրս է գրվել բավարար վիճակում: Հիվանդի հետագա բուժումը և հսկողությունը պետք է իրականացվի տեղամասային պոլիկլինիկայի կողմից:
«Երևան» բժշկական կենտրոնի բաժնի վարիչ Լ.Շահինյանի 2009 թվականի սեպտեմբերի 23-ի գրության համաձայն Մարաթ Մարությանը «Երևան» բժշկական կենտրոնի ընդհանուր թերապևտիկ և նևրոլոգիական բաժանմունքում ստացիոնար բուժում է ստացել 2008 թվականի օգոստոսի 29-ից մինչև 2008 թվականի սեպտեմբերի 4-ը: Նրան տրված էպիկրիզում սխալմամբ գրվել է 2009 թվական:
Վերոգրյալի հիման վրա Դատարանը հաստատված է համարում գործի լուծման համար նշանակություն ունեցող հետևյալ փաստերը.
-Մարաթ Մարությանը 2009 թվականի մայիսին` Գորիս քաղաքում, ազգությամբ պարսիկ ոմն Ռաջաֆից ապօրինի ձեռք է բերել ափիոն տեսակի թմրամիջոց և թմրամիջոց պատրաստելու համար պրեկուրսոր հանդիսացող քացախաթթվի անհիդրիդ,
-Մարաթ Մարությանը ոմն Ռաջաֆից ձեռք բերած թմրամիջոցի և քացախաթթվի անհիդրիդի մի մասը օգտագործել է, իսկ մյուս մասը պահել է իր մոտ,
-Մարաթ Մարությանը և Գագիկ Աբրահամյանը ազգականներն են,
-Գագիկ Աբրահամյանը անձնական օգտագործման համար թմրամիջոց ձեռք բերելու նպատակով դիմել է Մարաթ Մարությանին,
-Գագիկ Աբրահամյանը և Մարաթ Մարությանը 2009 թվականին հունիսի 25-ին հանդիպել են Աշտարակի խճուղու մոտ գտնվող բենզալցակայանում,
-Աշտարակի խճուղու մոտ գտնվող բենզալցակայանում Մարաթ Մարությանը Գագիկ Աբրահամյանին տվել է 0.72 գրամ հաստատուն քաշով ափիոն տեսակի թմրամիջոց և թմրամիջոց պատրաստելու համար պրեկուրսոր հանդիսացող քացախաթթվի անհիդրիդ,
-Մարաթ Մարությանի մոտ հայտնաբերվել է 2.2 մլ ծավալով ացետիլացված ափիոն տեսակի թմրամիջոցի լուծույթ,
-հայտնաբերված 2.2 մլ ծավալով ացետիլացված ափիոն տեսակի թմրամիջոցի լուծույթում ացետիլացված ափիոնի չոր քաշը կազմել է 0.14586 գրամ,
-Գագիկ Աբրահամյանի մոտ հայտնաբերվել է 0.72 գրամ ափիոն տեսակի թմրամիջոց և թմրամիջոց պատրաստելու համար պրեկուրսոր հանդիսացող քացախաթթվի անհիդրիդ,
-Մարաթ Մարությանը և Գագիկ Աբրահամյանն արգելանքի տակ են 2009 թվականի օգոստոսի 25-ից,
-Մարաթ Մարությանը համարվում է դատվածություն չունեցող, վատառողջ է, մասնակցել է Արցախյան ազատամարտին և բնութագրվում է դրականորեն,
-Գագիկ Աբրահամյանը գտնվում է փաստական ամուսնական հարաբերությունների մեջ, խնամքին ունի մինչև 14 տարեկան երեխա,
-Գագիկ Աբրահամյանը համարվում է դատվածություն չունեցող և բնութագրվում է դրականորեն:
3. Դատարանի իրավական վերլուծությունները.
Վերգորյալ փաստերի հիման վրա Դատարանը գալիս է այն եզրահանգման, որ Մարաթ Ռաֆիկի Մարությանը 2009 թվականի մայիսին Գորիս քաղաքում ազգությամբ պարսիկ ոմն Ռաջաֆից ապօրինի ձեռք է բերել և իր մոտ պահել ափիոն տեսակի թմրամիջոց և թմրամիջոց պատրաստելու համար պրեկուրսոր հանդիսացող քացախաթթվի անհիդրիդ, որից խոշոր չափի 0.72 գրամ հաստատուն քաշով ափիոն տեսակի թմրամիջոցը և թմրամիջոց պատրաստելու համար պրեկուրսոր հանդիսացող քացախաթթվի անհիդրիդը 2009 թվականին հունիսի 25-ին Աշտարակ-Պռոշյան խճուղում գտնվող բենզալցակայանի մոտ ապօրինի իրացրել է Գագիկ Աբրահամյանին: Բացի այդ, Մարաթ Ռաֆիկի Մարությանը առանց իրացնելու նպատակի իր մոտ ապօրինի պահել է զգալի չափի 0.14586 գրամ չոր քաշով ացետիլացված ափիոն տեսակի թմրամիջոց, որն էլ 2009 թվականին հունիսի 25-ին ՀՀ ոստիկանության Երևանի քաղաքի վարչության Քանաքեռ-Զեյթունի բաժնում հայտնաբերվել է նրա անձնական խուզարկությամբ: Այսինքն` Մարաթ Ռաֆիկի Մարությանը, կատարել է արարքներ, որոնք համապատասխանում են ՀՀ քրեական օրենսգրքի 266-րդ հոդվածի 2-րդ մասի 2-րդ կետի, 266-րդ հոդվածի 4-րդ մասի և 268-րդ հոդվածի 1-ին մասի հատկանիշներին:
Ապացուցված է Մարաթ Ռաֆիկի Մարությանի մեղավորությունը ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 266-րդ հոդվածի 4-րդ մասով և 268-րդ հոդվածի 1-ին մասով նախատեսված հանցանքները կատարելու մեջ:
Մարաթ Մարությանի անձը դրականորեն բնութագրող հանգամաններ են խոստովանական ցուցմունքներ տալը և կատարածի համար զղջալը:
Դատարանը գտնում է, որ Մարաթ Մարությանի պատասխանատվությունն ու պատիժը մեղմացնող հանգամանքներ պետք է դիտել Արցախյան ազատամարտին մասնակցելը և վատառողջ լինելը:
Մարաթ Մարությանի պատասխանատվությունն ու պատիժը մեղմացնող հանգամանք է նաև դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Վերը նշված անձը դրականորեն բնութագրող և պատասխանատվությունն ու պատիժը մեղմացնող հանգամանքները Մարաթ Մարությանի կատարած բոլոր արարքներով էլ առկա են:
Դատարանը միաժամանակ արձանագրում է, որ Մարաթ Մարությանի կողմից կատարված բոլոր արարքներով էլ պատասխանատվությունն ու պատիժը ծանրացնող հանգամանքներ չկան:
Կատարած արարքների համար ամբաստանյալ Մարաթ Մարությանը ենթակա է քրեական պատասխանատվության և պատժի:
Դատարանը, հաշվի առնելով Մարաթ Մարությանի կատարած արարքների` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, ինչպես նաև այն, որ ՀՀ քրեական օրենսգրքի 266-րդ հոդվածի 2-րդ մասի սանկցիայով նախատեսված է պատիժ ազատազրկման ձևով, ՀՀ քրեական օրենսգրքի 268-րդ հոդվածի 1-ին մասի սանկցիայով նախատեսված է պատիժ նաև ազատազրկման ձևով, իսկ ՀՀ քրեական օրենսգրքի 266-րդ հոդվածի 4-րդ մասի սանկցիայով նախատեսված է պատիժ նաև տուգանքի ձևով, գտնում է, որ նրա նկատմամբ ՀՀ քրեական օրենսգրքի 266-րդ հոդվածի 2-րդ մասի 2-րդ կետով և 268-րդ հոդվածի 1-ին մասով կատարած արարքների համար պատիժներ պետք է նշանակել ազատազրկման ձևով, իսկ ՀՀ քրեական օրենսգրքի 266-րդ հոդվածի 4-րդ մասով կատարած արարքի համար` տուգանքի ձևով: Ընդ որում` ՀՀ քրեական օրենսգրքի 266-րդ հոդվածի 2-րդ մասի 2-րդ կետով նախատեսված արարքի համար չպետք է նշանակել տվյալ հոդվածի սանկցիայով նախատեսված լրացուցիչ պատիժը` գույքի բռնագրավումը:
Դատարանը գտնում է, որ ամբաստանյալ Մարաթ Մարությանի նկատմամբ վերջնական պատիժ պետք է նշանակել ազատազրկման ձևով նշանակված պատիժները մասնակիորեն գումարելու կանոնով, իսկ տուգանքը` լրիվ գումարման կանոնով, որը նա պետք է կրի:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց: Մարաթ Մարությանի ազատազրկման ձևով պատժի կրման սկիզբը պետք է հաշվել 2009 թվականի հունիսի 25-ից, քանի որ նա փաստացի արգելանքի է վերցվել այդ օրը, որից հետո` 2009 թվականի հունիսի 26-ին, կազմվել է ձերբակալման արձանագրություն, իսկ 2009 թվականի հունիսի 29-ից նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Մարաթ Մարությանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Վերգրյալ փաստերի հիման վրա Դատարանը գալիս է այն եզրահանգման, որ, Գագիկ Ավետիքի Աբրահամյանը 2009 թվականին հունիսի 25-ին Աշտարակ-Պռոշյան խճուղում գտնվող բենզալցակայանի մոտ Մարաթ Ռաֆիկի Մարությանից առանց իրացնելու նպատակի, ապօրինի ձեռք է բերել խոշոր չափի` 0.72 գրամ հաստատուն քաշով ափիոն տեսակի թմրամիջոց և թմրամիջոց պատրաստելու համար պրեկուրսոր հանդիսացող քացախաթթվի անհիդրիդ, որոնք 2009 թվականին հունիսի 25-ին ՀՀ ոստիկանության Երևան քաղաքի վարչության Քանաքեռ-Զեյթունի բաժնում հայտնաբերվել է նրա անձնական խուզարկությամբ: Այսինքն` Գագիկ Ավետիքի Աբրահամյանը, կատարել է արարքներ, որոնք համապատասխանում են ՀՀ քրեական օրենսգրքի ՀՀ քրեական օրենսգրքի 266-րդ հոդվածի 4-րդ մասի և 268-րդ հոդվածի 2-րդ մասի 2-րդ կետի հատկանիշներին:
Ապացուցված է Գագիկ Ավետիքի Աբրահամյանի մեղավորությունը ՀՀ քրեական օրենսգրքի 266-րդ հոդվածի 4-րդ մասով և 268-րդ հոդվածի 2-րդ մասի 2-րդ կետով նախատեսված հանցանքները կատարելու մեջ:
Գագիկ Աբրահամյանի անձը դրականորեն բնութագրող հանգամանքներ են` թոշակառու ծնողներին խնամելը և կատարածի համար զղջալը։
Գագիկ Աբրահամյանի պատասխանատվությունն ու պատիժը մեղմացնող հանգամանք է` խնամքին 14 տարին չլրացած (Ռիմա Գագիկի Դանիելյան` ծնված 2006 թվականի մայիսի 24-ին) երեխայի առկայությունը:
Գագիկ Աբրահամյանի պատասխանատվությունը և պատիժը մեղմացնող հանգամանք է նաև դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Վերը նշված անձը դրականորեն բնութագրող և պատասխանատվությունն ու պատիժը մեղմացնող հանգամանքները Գագիկ Աբրահամյանի կատարած բոլոր արարքներով էլ առկա են:
Դատարանը միաժամանակ արձանագրում է, որ Գագիկ Աբրահամյանի կողմից կատարված բոլոր արարքներով էլ պատասխանատվությունն ու պատիժը ծանրացնող հանգամանքներ չկան:
Դատարանը գտնում է, որ կատարած արարքների համար ամբաստանյալ Գագիկ Աբրահամյանը ենթակա է քրեական պատասխանատվության և պատժի:
Դատարանը, հաշվի առնելով Գագիկ Աբրահամյանի կատարած արարքների` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունը և պատիժը մեղմացնող հանգամանքները, ծանրացնող հանգամանքի բացակայությունը, ինչպես նաև այն, որ ՀՀ քրեական օրենսգրքի 268-րդ հոդվածի 2-րդ մասի սանկցիայով նախատեսված է պատիժ ազատազրկման ձևով, իսկ ՀՀ քրեական օրենսգրքի 266-րդ հոդվածի 4-րդ մասի սանկցիայով նախատեսված է պատիժ նաև տուգանքի ձևով, գտնում է, որ նրա նկատմամբ ՀՀ քրեական օրենսգրքի 268-րդ հոդվածի 2-րդ մասի 2-րդ կետով կատարած արարքի համար պատիժ պետք է նշանակել ազատազրկման ձևով, իսկ ՀՀ քրեական օրենսգրքի 266-րդ հոդվածի 4-րդ մասով կատարած արարքի համար` տուգանքի ձևով: Ընդ որում` Գագիկ Աբրահամյանի նկատմամբ վերջնական պատիժ պետք է նշանակել ՀՀ քրեական օրենսգրքի 66-րդ հոդվածով սահմանված` պատիժները լրիվ գումարելու կանոնի կիրառմամբ:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիս անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ oրը հաշվելով մեկ oրվա դիմաց: Գագիկ Աբրահամյանի ազատազրկման ձևով պատժի կրման սկիզբը պետք է հաշվել 2009 թվականի հունիսի 25-ից, քանի որ նա փաստացի արգելանքի է վերցվել այդ օրը, որից հետո` 2009 թվականի հունիսի 26-ին, կազմվել է ձերբակալման արձանագրություն, իսկ 2009 թվականի հունիսի 29-ից նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Գագիկ Աբրահամյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ իրեղեն ապացույց ճանաչված 0.72 գրամ հաստատուն քաշով ափիոն տեսակի թմրամիջոցը, 1 մլ ծավալով պրեկուրսոր հանդիսացող քացախաթթվի անհիդրիդը, ացետիլացված ափիոն տեսակի թմրամիջոցի հետքերով բամբակյա խծուծները, 10 մլ ծավալով ներարկիչը և դրանում առկա 2.2 մլ ծավալով ացետիլացված ափիոն տեսակի թմրամիջոցի լուծույթը, ափիոն տեսակի թմրամիջոցի հետքերով պոչով շերեփը, բամբակյա խծուծները, 20 մլ ծավալով դատարկ ներարկիչը, ացետիլացված ափիոն տեսակի թմրամիջոցի հետքերով օղու բաժակը և 20 մլ ծավալով ներարկիչը, 4 հատ 2 մլ ծավալով դատարկ ներարկիչները, 3 հատ 1 մլ ծավալով դատարկ ներարկիչները, 2 հատ բութ եզրերով դանակները, թվով 2 պոլիէթիլենային տարաները` բամբակյա խծուծներով, պետք է ոչնչացնել, իսկ դեղահաբերի համար նախատեսված թղթից փաթեթը` «ДИМЕДРОЛ 50МГ» (Դիմեդրոլ 50 մգ) գրառումով, որի մեջ առկա են թվով 5 հաբեր, դեղահաբերի համար նախատեսված «ДИМЕДРОЛ-ДАРНИЦА» (Դիմեդրոլ-դարնիցա) գրառումով պլաստմասե դատարկ փաթեթը, 10 մլ և 2 մլ ծավալներով ներարկիչները և անպոչ շերեփը պետք է վերադարձնել Մարաթ Մարությանին, իսկ ծալովի դանակը` Գագիկ Աբրահամյանին:
Մարաթ Մարությանից անձնական խուզարկությամբ առգրավված «Նոկիա» ֆիրմայի բջջային հեռախոսը պետք է վերադարձնել նրան:
ՀՀ քրեական դատավարության օրենսգրքի 360-րդ հոդվածի 1-ին մասի 11-րդ կետի համաձայն` դատարանը պետք է լուծի նաև գույքի հնարավոր բռնագրավումն ապահովելու համար գույքի վրա դրված կալանքը վերացնելու հարցը: Սույն գործով 2009 թվականի հուլիսի 21-ին կայացվել է գույքի վրա կալանք դնելու մասին որոշում, համաձայն որի որոշվել է գույքի հնարավոր բռնագրավումն ապահովելու համար, ինչպես նաև դատական ծախսերը ապահովելու նպատակով Մարաթ Ռաֆիկի Մարությանի գույքի վրա դնել կալանք: Ի կատարումն նշված որոշման` արգելանք է դրվել Մարաթ Ռաֆիկի Մարությանին պատկանող, Կոտայքի մարզի Պռոշյան գյուղում գտնվող բնակելի տան, տնամերձ հողամասի և խաղողի այգու նկատմամբ: ՀՀ քրեական դատավարության օրենսգրքի 238-րդ հոդվածի համաձայն` գույքը, քրեական վարույթն իրականացնող մարմնի որոշմամբ ազատվում է կալանքից, եթե քաղաքացիական հայցը ետ վերցվելու, կասկածյալին կամ մեղադրյալին վերագրվող արարքի որակումը փոխվելու հետևանքով կամ այլ պատճառներով վերացել է գույքի վրա կալանք դնելուց բխող սահմանափակումների կիրառման անհրաժեշտությունը: Դատարանը, նկատի ունենալով, որ Մարաթ Մարությանի` ՀՀ քրեական օրենսգրքի 266-րդ հոդվածի 2-րդ մասի 2-րդ կետով կատարած արարքի համար չպետք է նշանակել տվյալ հոդվածի սանկցիայով նախատեսված լրացուցիչ պատիժը` գույքի բռնագրավումը, գտնում է, որ վերացել է նրա գույքի վրա կալանք դնելուց բխող սահմանափակումների կիրառման անհրաժեշտությունը: Հետևաբար դատավճիռն օրինական ուժի մեջ մտնելուց հետո, 2009 թվականի հուլիսի 21-ի որոշմամբ, Մարաթ Ռաֆիկի Մարությանին պատկանող, Կոտայքի մարզի Պռոշյան գյուղում գտնվող բնակելի տան, տնամերձ հողամասի և խաղողի այգու վրա դրված կալանքը պետք է վերացնել: Ինչ վերաբերում է գույքի վրա կալանք դնելու մասին 2009 թվականի հունիսի 28-ի որոշմանը, ապա նույն օրը կազմված արձանագրության համաձայն` կալանքի վերցնելու ենթակա գույք չի հայտնաբերվել: Այսինքն` նշված որոշմամբ չկա կալանքի տակ գտնվող գույք, ուստի տվյալ հարցը պետք է համարել լուծված:
ՀՀ քրեական դատավարության օրենսգրքի 360-րդ հոդվածի 1-ին մասի 14-րդ կետի համաձայն` դատավճիռ կայացնելիս դատարանը լուծում է այն հարցը, թե դատական ծախսերն ում վրա և ինչ չափով պետք է դրվեն։
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-6-րդ կետերով նախատեսված դատական ծախսերն ամբաստանյալներ Մարաթ Մարությանից և Գագիկ Աբրահամյանից ենթակա չեն բռնագանձման, քանի որ 1-ին, 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ և 5-րդ կետերով նախատեսված ծախսերի վերաբերյալ տվյալները բացակայում են: Ավելին` նման պահանջ դատարանին չի ներկայացվել: Ինչ վերաբերում է 3-րդ կետով նախատեսված դատական ծախսին, ապա դատարանը գտնում է, որ թիվ 09-1331 դատաքիմիական փորձաքննության համար ծախսված գումարը Մարաթ Ռաֆիկի Մարությանից ենթակա չէ բռնագանձման, քանի որ փորձաքննության ներկայացված օբյեկտներում պրեկուրսոր հանդիսացող նյութեր, թմրակտիվ և հոգեմետ բաղադրատարրեր չեն պարունակվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 138-րդ, 168-րդ, 309-րդ, 357-360-րդ, 365-րդ և 369-372-րդ հոդվածներով` Դատարանը

ՎՃՌԵՑ

Մարաթ Ռաֆիկի Մարությանին մեղավոր ճանաչել ՀՀ քրեական օրենսգրքի 266-րդ հոդվածի 2-րդ մասի 2-րդ կետով, 266-րդ հոդվածի 4-րդ մասով և 268-րդ հոդվածի 1-ին մասով։
ՀՀ քրեական օրենսգրքի 266-րդ հոդվածի 2-րդ մասի 2-րդ կետով Մարաթ Ռաֆիկի Մարությանի նկատմամբ պատիժ նշանակել ազատազրկում` 6 (վեց) տարի ժամկետով։
ՀՀ քրեական օրենսգրքի 268-րդ հոդվածի 1-ին մասով Մարաթ Ռաֆիկի Մարությանի նկատմամբ պատիժ նշանակել ազատազրկում` 6 (վեց) ամիս ժամկետով։
ՀՀ քրեական օրենսգրքի 266-րդ հոդվածի 4-րդ մասով Մարաթ Ռաֆիկի Մարությանի նկատմամբ պատիժ նշանակել տուգանք` նվազագույն աշխատավարձի հարյուրապատիկի չափով:
ՀՀ քրեական օրենսգրքի 66-րդ հոդվածով սահմանված կարգով` ազատազրկման ձևով նշանակված պատիժները մասնակիորեն գումարելու, իսկ տուգանքը լրիվ գումարելու միջոցով, Մարաթ Ռաֆիկի Մարությանի նկատմամբ վերջնական պատիժ նշանակել ազատազրկում` 6 (վեց) տարի 3 (երեք) ամիս ժամկետով և տուգանք` նվազագույն աշխատավարձի հարյուրապատիկի չափով` ազատզարկման ձևով նշանակված պատժի կրման սկիզբը հաշվելով 2009 թվականի հունիսի 25-ից:
Մարաթ Ռաֆիկի Մարությանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Գագիկ Ավետիքի Աբրահամյանին մեղավոր ճանաչել ՀՀ քրեական օրենսգրքի 268-րդ հոդվածի 2-րդ մասի 2-րդ կետով և 266-րդ հոդվածի 4-րդ մասով:
ՀՀ քրեական օրենսգրքի 268-րդ հոդվածի 2-րդ մասի 2-րդ կետով Գագիկ Ավետիքի Աբրահամյանի նկատմամբ պատիժ նշանակել ազատազրկում` 1 (մեկ) տարի ժամկետով։
ՀՀ քրեական օրենսգրքի 266-րդ հոդվածի 4-րդ մասով Գագիկ Ավետիքի Աբրահամյանի նկատմամբ պատիժ նշանակել տուգանք` նվազագույն աշխատավարձի հարյուրապատիկի չափով:
ՀՀ քրեական օրենսգրքի 66-րդ հոդվածով սահմանված կարգով` պատիժները լրիվ գումարելու միջոցով, Գագիկ Ավետիքի Աբրահամյանի նկատմամբ վերջնական պատիժ նշանակել ազատազրկում` 1 (մեկ) տարի ժամկետով և տուգանք` նվազագույն աշխատավարձի հարյուրապատիկի չափով` ազատազրկման ձևով նշանակված պատժի կրման սկիզբը հաշվելով 2009 թվականի հունիսի 25-ից:
Գագիկ Ավետիքի Աբրահամյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո` իրեղեն ապացույց ճանաչված 0.72 գրամ հաստատուն քաշով ափիոն տեսակի թմրամիջոցը, 1 մլ ծավալով պրեկուրսոր հանդիսացող քացախաթթվի անհիդրիդը, ացետիլացված ափիոն տեսակի թմրամիջոցի հետքերով բամբակյա խծուծները, 10 մլ ծավալով ներարկիչը և դրանում առկա 2.2 մլ ծավալով ացետիլացված ափիոն տեսակի թմրամիջոցի լուծույթը, ափիոն տեսակի թմրամիջոցի հետքերով պոչով շերեփը, բամբակյա խծուծները, 20 մլ ծավալով դատարկ ներարկիչը, ացետիլացված ափիոն տեսակի թմրամիջոցի հետքերով օղու բաժակը և 20 մլ ծավալով ներարկիչը, 4 հատ 2 մլ ծավալով դատարկ ներարկիչները, 3 հատ 1 մլ ծավալով դատարկ ներարկիչները, 2 հատ բութ եզրերով դանակները, թվով 2 պոլիէթիլենային տարաները` բամբակյա խծուծներով, ոչնչացնել, իսկ դեղահաբերի համար նախատեսված թղթից փաթեթը` «ДИМЕДРОЛ 50МГ» (Դիմեդրոլ 50 մգ) գրառումով, որի մեջ առկա են թվով 5 հաբեր, դեղահաբերի համար նախատեսված «ДИМЕДРОЛ-ДАРНИЦА» (Դիմեդրոլ-դարնիցա) գրառումով պլաստմասե դատարկ փաթեթը, 10 մլ և 2 մլ ծավալներով ներարկիչները և անպոչ շերեփը վերադարձնել Մարաթ Մարությանին, իսկ ծալովի դանակը` Գագիկ Աբրահամյանին:
Դատավճիռն օրինական ուժի մեջ մտնելուց հետո` Մարաթ Ռաֆիկի Մարությանից առգրավված «Նոկիա» ֆիրմայի բջջային հեռախոսը վերադարձնել նրան:
Դատավճիռն օրինական ուժի մեջ մտնելուց հետո` Մարաթ Ռաֆիկի Մարությանի գույքի վրա դրված կալանքը վերացնել:
Դատական ծախսերի հարցը համարել լուծված։
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ