ԵԱՔԴ/0102/01/09






ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՀԱՄԱՅՆՔՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«7» հոկտեմբերի 2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրող Գ.Հովհաննիսյան
պաշտպան Վ.Գրիգորյան

դռնբաց դատական նիստում քննեց քրեական գործն ըստ մեղադրանքի`
Գեղամ Արարատի Գրիգորյանի` ծնված 1964 թվականի սեպտեմբերի 6-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, չամուսնացած, չի աշխատում, դատվածություն չունեցող, բնակվել է Երևան քաղաքի Բաղրամյան փողոցի 1-ին փակուղու 14-րդ շենքի 6-րդ բնակարանում: Մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 1-ին կետով, արգելանքի տակ է 2009 թվականի մայիսի 13-ից:
1. Գործի դատավարական նախապատմությունը.
2009 թվականի մայիսի 15-ին ՀՀ ոստիկանության Արաբկիրի քննչական բաժնի քննիչ Ա.Մարգարյանի որոշմամբ թիվ 14104909 քրեական գործով Գեղամ Արարատի Գրիգորյանին մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 1-ին կետով:
2009 թվականի հունիսի 13-ին ՀՀ ոստիկանության Արաբկիրի քննչական բաժնի քննիչ Ա.Մարգարյանի որոշմամբ թիվ 14104909 քրեական գործից Գ.Գրիգորյանի կողմից թմրամիջոցներ ապօրինի ձեռք բերելու և պահելու մասը` ՀՀ քրեական օրենսգրքի 268-րդ հոդվածի 2-րդ մասի 1-ին կետով առանձնացվել է առանձին վարույթում և նախաքննությունը շարունակվել է թիվ 14117409 համարի տակ:
2009 թվականի հուլիսի 2-ին ՀՀ ոստիկանության Արաբկիրի քննչական բաժնի քննիչ Ռ.Համբարձումյանի որոշմամբ թիվ 14117409 քրեական գործն ընդունվել է վարույթ:
2009 թվականի հուլիսի 29-ին ՀՀ ոստիկանության Արաբկիրի քննչական բաժնի քննիչ Ռ.Համբարձումյանի որոշմամբ անհայտ անձի կողմից թմարմիջոց ապօրինի իրացնելու վերաբերյալ ՀՀ քրեական օրենսգրքի 266-րդ հոդվածի 2-րդ մասի 2.1 կետի հատկանիշներով թիվ 14117409 քրեական գործից անջատվել է մաս և անջատված մասին շնորհվել է 14123809 համարը:
2009 թվականի օգոստոսի 10-ին Գեղամ Արարատի Գրիգորյանի վերաբերյալ քրեական գործը մեղադրական եզրակացությամբ ուղարկվել է Դատարան:
Գեղամ Արարատի Գրիգորյանին մեղադրանք է առաջադրվել ՀՀ քրեական օրենսգրքի 268-րդ հոդվածի 2-րդ մասի 1-ին կետով այն արաքների համար, որ նա 2009 թվականի փետրվար ամսից մինչև 2009 թվականի մայիսի 13-ն ընկած ժամանակահատվածում կրկին անգամ, առանց իրացնելու նպատակի ոմն Ռադոյից 10.000 ՀՀ դրամով ապօրինի ձեռք է բերել ափիոն տեսակի թմրամիջոց, որը գործածել է ներարկման եղանակով: 2009 թվականի մարտ ամսին Գեղամ Գրիգորյանը ոմն Ռադոյից 10.000 ՀՀ դրամով կրկին անգամ ապօրինի ձեռք բերված ափիոն տեսակի թմրամիջոցի մի մասը գործածել է, իսկ մյուս մասը` 0.48 գրամը հայտնաբերվել է վերջինի տաբատի ձախ գրպանից 2009 թվականի մայիսի 13-ին անձնական խուզարկությամբ:
2. Ապացույցների հետազոտում և գնահատում.
Դատական քննության ընթացքում ամբաստանյալ Գեղամ Արարատի Գրիգորյանը իրեն մեղավոր ճանաչեց և ցուցմունք տվեց այն մասին, որ երկու անգամ ոմն Ռադոյից օգտագործելու նպատակով ձեռք է բերել թմրամիջոց: Ռադոյի հետ ծանոթացել է մոտ 7-8 ամիս առաջ: Ռադոյի հետ մի քանի անգամ հանդիպելուց հետո նրան այլևս չի տեսել: Ոմն Ռադոյից փետրվար ամսին 10.000 ՀՀ դրամով օգտագործելու նպատակով ձեռք է բերել ափիոն տեսակի թմրամիջոց, որն օգտագործել է ներարկման եղանակով: Այնուհետև մարտ ամսին փողոցում հանդիպել է Ռադոյի հետ և 10.000 ՀՀ դրամով գնել է նույն չափի թմրամիջոց, որի չափը ստույգ ասել չի կարող և օգտագործել է այն: 2009 թվականի մայիսի 13-ին Արաբկիրի փողոցներից մեկում իրեն են մոտեցել ոստիկանության աշխատակիցները, ստուգել և իր գրպանից հայտնաբերել են պոլիէթիլենային տոպրակի մեջ փաթաթված ափիոն տեսակի թմրամիջոց:
Նախնական քննության ընթացքում` 2009 թվականի հուլիսի 3-ին, վկա Արթուր Էդուարդի Հակոբյանը ցուցմունք է տվել այն մասին, որ բնակվում է Երևան քաղաքի Բաղրամյան պողոտայի 1-ին փակուղու 14-րդ շենքի 12-րդ բնակարանում: 2009 թվականի մայիսի 13-ին իր բնակարան են եկել ՀՀ ոստիկանության Արաբկիրի բաժնի աշխատակիցները և առաջարկել որպես ընթերակա ներկա գտնվել Երևան քաղաքի Բաղրամյան պողոտայի 1-ին փակուղու 14-րդ շենքի 6-րդ բնակարանի խուզարկությանը: Ինքը համաձայնվել է ոստիկաների առաջարկին և նրանց հետ գնացել նշված շենքի թիվ 6 բնակարան, որտեղ ոստիկաները բացատրել են իրենց` որպես ընթերակայի իրավունքներն ու պարտականություները և նշված բնակարանի տիրոջ` Արարատ Գրիգորյանի ներկայությամբ սկսել են խուզարկել բնակարանը: Ինքը ներկա է գտնվել խուզարկությանը և տեսել է, որ Երևան քաղաքի Բաղրամյան պողոտայի 1-ին փակուղու 14-րդ շենքի 6-րդ բնակարանի հյուրասենյակում դրված սեղանի վրայից ոստիկաները հայտնաբերել և առգրավվել են երկու բջջային հեռախոս, որոնց արտադրական ֆիրմաները չի հիշում, նույն հյուրասենյակում տեղադրված փոքրիկ պահարանի միջից հայտնաբերվել և առգրավել է տարբեր ծավալներով երկու ներարկիչ, որոնց ծավալները նույնպես չի հիշում, նույն փոքրիկ պահարանի վրա դրված մոխրամանի միջից հայտնաբերվել և առգրավել է բամբակյա մեկ խծուծ, որի վրա մուգ գույնի հետքեր են եղել: Այնուհետև նույն պահարանի միջից հայտնաբերվել և առգրավվել է մեկ հատ թեյի գդալ և եթե չի սխալվում պահարանի դիմաց, գետնին ընկած հայտնաբերվել և առգրավել է մեկ հատ փոքրիկ ափսե, որի վրա եղել են կրակի մոխրից առաջացած սև հետքեր: Բնակարանատերը` Արարատ Գրիգորյանը խուզարկության ողջ ընթացքում որևէ հայտարարություն չի արել: Ինքը Գեղամ Արարատի Գրիգորյանին անձնապես չի ճանաչում և նրա հետ որևէ հարաբերություն չունի:
Նախնական քննության ընթացքում` 2009 թվականի հուլիսի 6-ին, վկա Վահրամ Վարազդատի Կարապետյանը ցուցմունք է տվել այն մասին, որ բնակվում է Երևան քաղաքի Արաբկիրի 51-րդ փողոցի 25-րդ տանը: 2009 թվականի մայիսի 13-ին ինքը անցնելիս է եղել ՀՀ ոստիկանության Արաբկիրի բաժնի մոտով, երբ իրեն են մոտեցել ոստիկանության երկու աշխատակիցներ և առաջարկել որպես ընթերակա ներկա գտնվել անձի անձնական խուզարկությանը: Ինքը համաձայնվել է ոստիկանների առաջարկին և նրանց հետ գնացել է ՀՀ ոստիկանության Արաբկիրի բաժին, որտեղ աշխատասենյակներից մեկում ոստիկաները նրան և որպես ընթերակա հրավիրված մյուս անձին բացատրել են իրենց` որպես ընթերակայի իրավունքներն ու պարտականությունները: Այնուհետև իրենց ներկայությամբ ոստիկանները կատարել են Գեղամ Գրիգորյանի անձնական խուզարկությունը: Խուզարկության ընթացքում ինքը տեսել է, որ ոստիկաները Գեղամ Գրիգորյանի տաբատի ձախ գրպանից հատնաբերել են սպիտակ թափանցիկ պոլիէթիլենային տոպրակի մեջ փաթաթված գորշ գույնի նյութ: Ոստիկանների այն հարցին, թե ինչ է նշված նյութը իրենից ներկայացնում, Գեղամ Գրիգորյանը պատասխանել է, որ հայտնաբերված նյութը հանդիսանում է ափիոն տեսակի թմրամիջոց, որը պահել է անձնական օգտագործման համար: Այնուհետև Գեղամ Գրիգորյանի մոտից հայտնաբերված գորշ գույնի նյութը ոստիկանների կողմից առգրավվել և փաթեթավորվել է, որի վրա իրենք բոլորով ստորագրել են: Ինքը Գեղամ Գրիգորյանին անձնապես չի ճանաչել, նրա հետ որևէ հարաբերություն չի ունեցել:
Նախնական քննության ընթացքում` 2009 թվականի հուլիսի 7-ին, վկա Ռաֆիկ Վարուժանի Օհանյանը ցուցմունք է տվել այն մասին, որ բնակվում է Երևան քաղաքի Ղափանցյան փողոցի 16/3 տանը: 2009 թվականի մայիսի 13-ին ինքը անցնելիս է եղել ՀՀ ոստիկանության Արաբկիրի բաժնի մոտով, երբ նրան են մոտեցել ոստիկանության երկու աշխատակիցներ և առաջարկել որպես ընթերակա ներկա գտնվել անձի անձնական խուզարկությանը: Ինքը համաձայնել է ոստիկաների առաջարկին և նրանց հետ գնացել ՀՀ ոստիկանության Արաբկիրի բաժին, որտեղ աշխատասենյակներից մեկում ոստիկանները իրեն և որպես ընթերակա հրավիրված մյուս անձին բացատրել են իրենց` որպես ընթերակայի իրավունքներն ու պարտականություները: Դրանից հետո իրենց ներկայությամբ ոստիկանները կատարել են Գեղամ Արարատի Գրիգորյանի անձնական խուզարկությունը: Խուզարկության ընթացքում ինքը տեսել է, որ ոստիկանները Գեղամ Գրիգորյանի տաբատի ձախ գրպանից հայտնաբերել են սպիտակ թափանցիկ պոլիէթիլենային տոպրակի մեջ փաթաթված գորշ գույնի նյութ: Ոստիկանների այն հարցին, թե ինչ է նշված նյութը իրենից ներկայացնում, Գեղամ Գրիգորյանը պատասխանել է, որ այն հանդիսանում է ափիոն տեսակի թմրամիջոց և այն պահել է իր մոտ անձնական օգտագործման համար: Այնուհետև Գեղամ Գրիգորյանի մոտից հայտնաբերված գորշ նյութը ոստիկանների կողմից առգրավվել և փաթեթավորվել է, որի վրա իրենք բոլորով ստորագրել են: Ինքը Գեղամ Գրիգորյանին անձնապես չի ճանանչում:
2009 թվականի հուլիսի 29-ի որոշման համաձայն` թիվ 14117409 քրեական գործով 2009 թվականի մայիսի 13-ին ՀՀ ոստկիկանության Արաբկիրի բաժնում Գեղամ Արարատի Գրիգորյանի կողմից տրված բացատրության արձանագրությունը ճանաչվել է որպես այլ ապացույց:
2009 թվականի մայիսի 13-ին ամբաստանյալ Գեղամ Արարատի Գրիգորյանը բացատրություն է տվել այն մասին, որ բնակվում է Երևան քաղաքի Բաղրամյան փողոցի 1-ին փակուղու 14-րդ շենքի 6-րդ բնակարանում: Թմրամոլությամբ զբաղվում է մի քանի ամիս և օգտագործում է ափիոն տեսակի թմրամիջոց: Մի քանի ամիս առաջ ծանոթացել է ոմն Ռադոյի հետ, ում դիմել են նաև «Սյունիք» անունով: Նա բնակվել է Երևան քաղաքի Մայիսի 9-ի փողոցում: Նրա հետ ծանոթանալու ընթացքում ինքը իմացել է, որ նա հնարավորություն ունի ձեռք բերելու ափիոն տեսակի թմրամիջոց: Ինքը նրան ասել է իր բնակության վայրը և նա շաբաթը մեկ անգամ մեկ չափաբաժին ափիոն տեսակի թմրամիջոց է տվել իրեն 10.000 ՀՀ դրամով: Վերջին անգամ ինքը նրանից թմրամիջոց է վերցրել մոտ 2 ամիս առաջ, որի մի փոքր մասը օգտագործել է, իսկ մնացածը մնացել է շալվարի գրպանում: Ինքը ոչ ոքի թմրամիջոց չի տվել և չի վաճառել:
2009 թվականի մայիսի 13-ի խուզարկություն (առգրավում) կատարելու մասին արձանագրության համաձայն` Գեղամ Արարատի Գրիգորյանի` Երևան քաղաքի Բաղրամյան փողոցի 1-ին փակուղու 14-րդ շենքի 6-րդ բնակարանի խուզարկությամբ հայտնաբերվել և առգրավվել է մեկ հատ 10 մգ ներարկիչ, մեկ հատ 5 մգ ներարկիչ, մեկ հատ 1 մգ ծավալով ներարկիչ, բամբակ` արյան հետքերով, մեկ հատ «Նոկիա» ֆիրմայի բջջային հեռախոս, մեկ հատ «Սոնի Էրիկսոն» ֆիրմայի բջջային հեռախոս, մեկ հատ թեյի գդալ, մեկ հատ սալաթի ափսե` սև գույնի վառած նյութի հետքերով:
2009 թվականի մայիսի 13-ի անձին բերման ենթարկելու արձանագրության համաձայն` 2009 թվականի մայիսի 13-ին Գեղամ Արարատի Գրիգորյանը թմրամիջոց պահելու և օգտագործելու կասկածանքով բերման է ենթարկվել ոստիկանության բաժին:
2009 թվականի մայիսի 13-ի անձնական խուզարկություն կատարելու մասին արձանագրության համաձայն` Գեղամ Արարատի Գրիգորյանի անձնական խուզարկությամբ նրա շալվարի ձախ գրպանից հայտնաբերվել է սպիտակ թափանցիկ պոլիէթիլենային տոպրակի մեջ փաթաթված մոտ 0.6 գրամ քաշով ափիոնանման գորշ նյութ:
2009 թվականի մայիսի 13-ի փորձագետի թիվ 193Ք եզրակացության համաձայն` փորձաքննության ներկայացված 0.48 գրամ հատատուն քաշով նյութը հանդիսանում է ափիոն տեսակի թմրամիջոց, փորձաքննության ներկայացված թեյի գդալի վրա հայտնաբերվել են ափիոն տեսակի թմրամիջոցի հետքեր, իսկ ափսեի մեջ թմրամիջոցի հետքեր չեն հայտնաբերվել:
ՀՀ ոստիկանության ինֆորմացիոն կենտրոնի պահանջագրի համաձայն` Գեղամ Արարատի Գրիգորյանը`
-1987 թվականի օգոստոսի 16-ին Օրջոնոկիձեի շրջանի ժողովրդական դատարանի կողմից Քրեական օրենսգրքի 222-րդ հոդվածի 1-ին մասով դատապարտվել է 1 տարի ժամկետով ազատազրկման: 1988 թվականի հունվարի 25-ին պայմանական վաղաժամկետ ազատվել է պատժի մնացած մասը` 6 ամիս ժամկետով ազատազրկումը կրելուց,
-1999 թվականի հունիսի 25-ին Մոսկվա քաղաքի Տիմիրյազևսկի ժողովրդական դատարանի կողմից ՌԴ քրեական օրենսգրքի 158-րդ հոդվածի 1-ին մասով դատապարտվել է 1 տարի պայմանական ազատազրկման: Նույն օրը կիրառվել է համաներման հրամանագիր և ազատվել է պատժի կրումից,
-2006 թվականի հոկտեմբերի 13-ին Քրեական օրենսգրքի 258-րդ հոդվածի 4-րդ մասով և 316-րդ հոդվածի 2-րդ մասով կալանավորվել է: 2006 թվականի նոյեմբերի 28-ին Արաբկիր և Քանաքեռ-Զեյթուն համայնքների դատարանի որոշմամբ քրեական գործը կարճվել է:
2009 թվականի մայիսի 15-ի կալանավորումը որպես խափանման միջոց ընտրելու մասին միջնորդությունը քննելու մասին որոշման համաձայն` Գեղամ Արարատի Գրիգորյանի նկատմամբ որպես խափանման միջոց ընտրվել է կալանավորումը. կալանավորման սկիզբը հաշվվել է ձերբակալման օրվանից` 2009 թվականի մայիսի 13-ից:
2009 թվականի մայիսի 18-ի փորձագետի թիվ 0319 եզրակացության համաձայն` Գեղամ Արարատի Գրիգորյանի 2009 թվականի մայիսի 13-ի մեզի փորձանմուշում հայտնաբերվել են ափիոն խմբի թմրամիջոցի թմրալկալոիդներ:
2009 թվականի մայիսի 14-ի փորձագետի թիվ 954 եզրակացության համաձայն` Գ.Գրիգորյանի մարմնական վնասվածքը աջ բազկի վերին երրորդականի հետին մակերեսի արյունազեղման ձևով հասցվել է բութ, կոշտ առարկայով, հնարավոր է փորձաքննությունից 3-4 օր առաջ, որն առողջության թեթև վնասի հատկանիշներ չի պարունակում: Աջ և ձախ աճուկային ծալքերում, երակի պրոյեկցիայով հայտնաբերվել են կետավոր վերքեր, որոնք ունեն մոտ 3-4 օր առաջվա վաղեմություն և հետևանք են ներերակային ներարկումների:
Երևան քաղաքի Կենտրոն թաղային համայնքի «Կենտրոն-1» համատիրության կողմից 2009 թվականի մայիսի 15-ին տրված տեղեկանքի համաձայն Գեղամ Արարատի Գրիգորյանը բնակվում է Երևան քաղաքի Բաղրամյան 1-ին փակուղու 14-րդ շենքի 6-րդ բնակարանում: Նշված բնակարանում բնակվում է նաև նրա հայրը` Արարատ Գեղամի Գրիգորյանը, ով գտնվում է Գեղամ Գրիգորյանի խնամքին:
2009 թվականի մայիսի 15-ին Երևան քաղաքի Բաղրամյան 1-ին փակուղու 14-րդ շենքի լիազոր Ա.Մարտիրոսյանի կողմից տրված և «Կենտրոն-1» համատիրության նախագահ Ս.Ներսիսյանի կողմից հաստատված հավաստագրի համաձայն` Արարատ Գեղամի Գրիգորյանը գտնվում է ծանր առողջական վիճակում, հայրենական պատերազմի մասնակից, 2-րդ կարգի հաշմանդամ, գտնվում է անկողնային վիճակում: Նրա միակ խնամողը նրա որդի Գեղամ Արարատի Գրիգորյանն է: Արարատ Գրիգորյանը կորցրել է կնոջը 1 տարի առաջ և որդուց բացի ոչ ոք չունի:
ՀՀ ԱՆ «Հոգեբուժական բժշկական կենտրոն» ՓԲ ընկերության նարկոլոգիական կլինիկայի ղեկավար Պ.Սեմերջյանի 2009 թվականի հունիսի 2-ի թիվ 1450 գրության համաձայն` Գեղամ Արարատի Գրիգորյանը նարկոլոգիական կլինիկայում 2009 թվականի մայիսի 13-ից գտնվում է կանխարգելիչ դիտարկման մեջ ափիոն տեսակի թմրամիջոց գործածելու կապակցությամբ:
ՀՀ ԱՆ «Հոգեբուժական բժշկական կենտրոն» ՓԲ ընկերության նարկոլոգիական կլինիկայի դատանարկոլոգիական հանձնաժողովի 2009 թվականի հունիսի 25-ի թիվ 157/09 եզրակացության համաձայն` Գեղամ Արարատի Գրիգորյանի գիտակցությունը պարզ է, կողմնորշման ձևերը ստույգ, կոնտակտին մատչելի: Գեղամ Արարատի Գրիգորյանը տառապում է ափիոնային թմրամոլությամբ, ուստի հարկադիր բուժման կարիք ունի, որի համար հակացուցումներ չկան:
2009 թվականի հուլիսի 17-ի փորձագետի թիվ 376 եզրակացության համաձայն` փորձաքննության ներկայացված Գեղամ Գրիգորյանի արյան նմուշն ըստ արյան AB0 իզոշճաբանական համակարգի պատկանում է B խմբին: Փորձաքննության ներկայացված բամբակյա խծուծի վրա տեղակայված կասկածելի հետքերում հաստատվել է մարդկային ծագման արյան առկայություն, որն առաջացել է ըստ արյան AB0 իզոշճաբանական համակարգի B խմբի արյուն ունեցող որևէ անձից կամ անձանցից, այդ թվում նաև կարող էր առաջանալ Գեղամ Գրիգորյանից:
2009 թվականի հուլիսի 21-ի փորձագետի թիվ 269Ք եզրակացության համաձայն` փորձաքննության ներկայացված մեկանգամյա օգտագործման համար նախատեսված ներարկիչներից կանաչ մխոցով 5 մլ և 10 մլ ծավալներով ներարկիչներում հայտնաբերվել են ափիոն շարքի թմրալկալոիդների հետքեր:
2009 թվականի հուլիսի 29-ի որոշման համաձայն` Գեղամ Արարատի Գրիգորյանի տաբատի գրպանից հայտնաբերված 0.48 գրամ քաշով ափիոն տեսակի թմրամիջոցը, նրա բնակարանի խուզարկությամբ հայտնաբերված ափիոն տեսակի թմրամիջոցի առկայությամբ մեկ հատ գդալը, երկու հատ ներարկիչները և արյան հետքերով բամբակյա խծուծը ճանաչվել են որպես իրեղեն ապացույց:
3. Դատարանի իրավական վերլուծությունները.
Վերոնշյալ ապացույցների հիման վրա Դատարանը գալիս է այն եզրահանգման, որ Գեղամ Արարատի Գրիգորյանը 2009 թվականի փետրվարին ոմն Ռադոյից անձնական օգտագործման համար 10.000 ՀՀ դրամով ձեռք է բերել մեկ չափաբաժին ափիոն տեսակի թմրամիջոց: Այնուհետև Գեղամ Արարատի Գրիգորյանը 2009 թվականի մարտին նույն անձից անձնական օգտագործման համար 10.000 ՀՀ դրամով ձեռք է բերել նույն չափի ափիոն տեսակի թմրամիջոց, որի մի մասն օգտագործել է, իսկ մնացած մասը` 0.48 գրամը 2009 թվականի մայիսի 13-ին հայտնաբերվել է նրա մոտից: Այսինքն` Գեղամ Արարատի Գրիգորյանը, առանց իրացնելու նպատակի, կրկին անգամ ապօրինի ձեռք է բերել զգալի չափերով թմրամիջոց, ինչը համապատասխանում է ՀՀ քրեական օրենսգրքի 268-րդ հոդվածի 2-րդ մասի 1-ին կետի հատկանիշներին:
Ապացուցված է Գեղամ Արարատի Գրիգորյանի մեղավորությունը ՀՀ քրեական օրենսգրքի 268-րդ հոդվածի 2-րդ մասի 1-ին կետով նախատեսված հանցանքը կատարելու մեջ:
Գեղամ Գրիգորյանի անձը դրականորեն բնութագրող հանգամանքներ են ինքնախոստովանական ցուցմունքներ տալը և կատարածի համար զղջալը:
Գեղամ Գրիգորյանի պատասխանատվությունն ու պատիժը մեղմացնող հանգամանք է դրականորեն բնութագրվելը (նման իրավական դիրքորոշում է արտահայտել ՀՀ վճռաբեկ դատարանն իր` 2007 թվականի հունիսի 12-ի թիվ ՎԲ-124/07 որոշմամբ):
Դատարանը գտնում է, որ Գեղամ Գրիգորյանի պատասխանատվությունն ու պատիժը մեղմացնող հանգամանք պետք է դիտել նաև այն, որ նա անկողնային հիվանդ, հաշմանդամ հոր միակ խնամողն է:
Դատարանը միաժամանակ արձանագրում է, որ Գեղամ Գրիգորյանի պատասխանատվությունն ու պատիժը ծանրացնող հանգամանքներ չկան:
Կատարած արարքի համար ամբաստանյալ Գեղամ Գրիգորյանը ենթակա է քրեական պատասխանատվության և պատժի:
Դատարանը, հաշվի առնելով Գեղամ Գրիգորյանի կատարած արարքի` հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, նրա անձը, նրան դրականորեն բնութագրող և պատասխանատվությունն ու պատիժը մեղմացնող հանգամանքները, պատասխանատվությունը և պատիժը ծանրացնող հանգամանքների բացակայությունը, ինչպես նաև այն, որ Գեղամ Գրիգորյանի կողմից կատարած արարքների համար ՀՀ քրեական օրենսգրքի համապատասխան հոդվածի սանկցիայով նախատեսված է պատիժ ազատազրկման ձևով, գտնում է, որ նրա նկատմամբ պատիժ պետք է նշանակել ազատազրկման ձևով, որը նա պետք է կրի:
ՀՀ քրեական օրենսգրքի 97-րդ հոդվածի 1-ին մասի 4-րդ կետի համաձայն` բժշկական բնույթի հարկադրական միջոցներ դատարանը կարող է նշանակել այն անձի նկատմամբ, ով հանցանք է կատարել և ճանաչվել է ալկոհոլամոլությունից և թմրամոլությունից բուժման կարիք ունեցող: ՀՀ քրեական օրենսգրքի 98-րդ հոդվածի 1-ին մասի 2-րդ կետի համաձայն` մեղսունակությունը չբացառող հոգեկան խանգարման վիճակում կատարած հանցանքի համար դատապարտված, բայց ալկոհոլամոլությունից, թմրամոլությունից կամ թունամոլությունից, կամ մեղսունակությունը չբացառող հոգեկան խանգարումներից բուժման կարիք ունեցող անձանց նկատմամբ դատարանը պատժի հետ մեկտեղ կարող է նշանակել հոգեբույժի մոտ արտահիվանդանոցային հսկողություն և հարկադիր բուժում:
Վերոգրյալի հիման վրա Դատարանը գտնում է, որ Գեղամ Գրիգորյանի նկատմամբ պետք է նշանակել բժշկական բնույթի հարկադրանքի միջոց` հոգեբույժի մոտ արտահիվանդանոցային հսկողություն և հարկադիր բուժում:
ՀՀ քրեական դատավարության օրենսգրքի 138-րդ հոդվածի համաձայն` մեղադրյալին կալանքի տակ պահելու ժամկետը հաշվվում է ձերբակալելիu անձին փաստացի արգելանքի վերցնելու պահից, իսկ ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Ամբաստանյալ Գեղամ Գրիգորյանի պատժի կրման սկիզբը պետք է հաշվել 2009 թվականի մայիսի 13-ից, քանի որ նա ձերբակալվել է այդ օրը, իսկ 2009 թվականի մայիսի 15-ին նրա նկատմամբ որպես խափանման միջոց ընտրվել է կալանավորումը:
Դատարանը գտնում է, որ Գեղամ Գրիգորյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո` 2009 թվականի հուլիսի 29-ի որոշմամբ իրեղեն ապացույց ճանաչված 0.48 գրամ ափիոն տեսակի թմրամիջոցը, ափիոն տեսակի թմրամիջոցի հետքերի առկայությամբ գդալը, երկու ներարկիչները և արյան հետքերով բամբակյա խծուծը պետք է ոչնչացնել:
ՀՀ քրեական դատավարության օրենսգրքի 360-րդ հոդվածի 1-ին մասի 14-րդ կետի համաձայն` դատավճիռ կայացնելիս դատարանը լուծում է այն հարցը, թե դատական ծախսերն ում վրա և ինչ չափով պետք է դրվեն։
Դատարանը գտնում է, որ ՀՀ քրեական դատավարության օրենսգրքի 168-րդ հոդվածի 1-ին մասի 1-6-րդ կետերով նախատեսված դատական ծախսերն ամբաստանյալ Գեղամ Գրիգորյանից ենթակա չեն բռնագանձման, քանի որ 1-ին, 4-րդ և 6-րդ կետերով նախատեսված դատական ծախսեր ընդհանրապես չկան, իսկ 2-րդ, 3-րդ և 5-րդ կետերով նախատեսված ծախսերի վերաբերյալ տվյալները բացակայում են: Ավելին, նման պահանջ դատարանին չի ներկայացվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 168-րդ, 309-րդ, 357-360-րդ, 365-րդ և 369-372-րդ, հոդվածներով` Դատարանը
ՎՃՌԵՑ

Գեղամ Արարատի Գրիգորյանին մեղավոր ճանաչել ՀՀ քրեական օրենսգրքի 268-րդ հոդվածի 2-րդ մասի 1-ին կետով և պատիժ նշանակել ազատազրկում` 1 (մեկ) տարի ժամկետով` պատժի կրման սկիզբը հաշվելով 2009 թվականի մայիսի 13-ից:
Գեղամ Արարատի Գրիգորյանի նկատմամբ նշանակել հոգեբույժի մոտ արտահիվանդանոցային հսկողություն և հարկադիր բուժում:
Գեղամ Արարատի Գրիգորյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը։
Դատավճիռն օրինական ուժի մեջ մտնելուց հետո` իրեղեն ապացույց ճանաչված 0.48 գրամ ափիոն տեսակի թմրամիջոցը, ափիոն տեսակի թմրամիջոցի հետքերի առկայությամբ գդալը, երկու ներարկիչները և արյան հետքերով բամբակյա խծուծը ոչնչացնել:
Դատական ծախսերի հարցը համարել լուծված։
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում:


ԴԱՏԱՎՈՐ Մ.ՊԱՊՈՅԱՆ