ԵԱՔԴ/0099/01/09







ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ
ԵՐԵՎԱՆ ՔԱՂԱՔԻ ԱՐԱԲԿԻՐ ԵՎ ՔԱՆԱՔԵՌ-ԶԵՅԹՈՒՆ ՀԱՄԱՅՆՔՆԵՐԻ
ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

«9» հոկտեմբերի 2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանը (այսուհետ` Դատարան)

Նախագահող դատավոր Մ.Պապոյան
դատական նիստերի քարտուղար Ռ.Ավետյան
մեղադրողներ Ռ.Խաչատրյան
Ա.Շահազիզյան
տուժողներ Ա.Գևորգյան
Լ.Պողոսյան
պաշտպան Ա.Ումրշատյան

դռնբաց դատական նիստում` արագացված դատական քննության կարգով, քննեց քրեական գործն ըստ մեղադրանքի`
Գևորգ Լևոնի Սուքիասյանի` ծնված 1983 թվականի մայիսի 14-ին Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուսնացած, չի աշխատում, նախկինում դիտավորյալ հանցագործությունների համար երեք անգամ դատապարտված, դատվածությունները չմարված, ունի 2 տարի 3 օր պատժի չկրած մաս, բնակվել է Երևան քաղաքի Արաբկիրի 23-րդ փողոցի 16-րդ տանը: Մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 6-րդ կետով, 118-րդ հոդվածով և 235-րդ հոդվածի 1-ին մասով, արգելանքի տակ է 2009 թվականի հունիսի 13-ից:
1. Գործի դատավարական նախապատմությունը.
2009 թվականի ապրիլի 13-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ ՀՀ քրեական օրենսգրքի 113-րդ հոդվածի 1-ին մասով և 235-րդ հոդվածի 1-ին մասով նախատեսված հանցագործությունների հատկանիշներով հարուցվել և վարույթ է ընդունվել թիվ 14111309 քրեական գործը:
2009 թվականի ապրիլի 21-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ Գևորգ Լևոնի Սուքիասյանին մեղադրանք է առաջադրվել ՀՀ քրեական օրենսգրքի 113-րդ հոդվածի 1-ին մասով և 235-րդ հոդվածի 1-ին մասով:
2009 թվականի ապրիլի 21-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ Գևորգ Լևոնի Սուքիասյանի նկատմամբ հայտարարվել է հետախուզում:
2009 թվականի հունիսի 12-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ Գևորգ Լևոնի Սուքիասյանին առաջադրված մեղադրանքը փոփոխվել, լրացվել է և նրան նոր մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 6-րդ կետով, 118-րդ հոդվածով և 235-րդ հոդվածի 1-ին մասով:
2009 թվականի հունիսի 12-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ թիվ 14111309 քրեական գործի վարույթը կասեցվել է մինչև Գևորգ Սուքիասյանին հայտնաբերելը:
2009 թվականի հունիսի 13-ին ՀՀ ոստիկանության Արաբկիրի քննչական բաժնի քննիչ Վ.Մկրտչյանի որոշմամբ թիվ 14111309 քրեական գործի վարույթը վերսկսվել է:
2009 թվականի օգոստոսի 5-ին Գևորգ Լևոնի Սուքիասյանի վերաբերյալ քրեական գործը մեղադրական եզրակացությամբ ուղարկվել է Դատարան:
Գևորգ Լևոնի Սուքիասյանին մեղադրանք է առաջադրվել ՀՀ քրեական օրենսգրքի 113-րդ հոդվածի 2-րդ մասի 6-րդ կետով, 118-րդ հոդվածով և 235-րդ հոդվածի 1-ին մասով` այն արարքների համար, որ նա 2009 թվականի ապրիլի 13-ին` ժամը 01:50-ի սահմաներում, Երևան քաղաքի Արաբկիրի 17-րդ փողոցի 12-րդ տանը հավաքույթի ժամանակ տեղի ունեցած վիճաբանության ընթացքում իր մոտ եղած ատրճանակից կրակել և ձախ ոտքի ազդրի շրջանակում մարմնական վնասվածք է պատճառել Անժելա Գևորգյանին: Այսպես, Գևորգ Սուքիասյանը 2006 թվականի հուլիսի 13-ին Արաբկիր և Քանաքեռ-Զեյթուն համայնքների առաջին ատյանի դատարանի կողմից` ՀՀ քրեական օրենսգրքի 258-րդ հոդվածի 4-րդ մասով և 235 հոդվածի 1-ին մասով դատապարտվել է 4 տարի 6 ամիս ազատազրկման և 2008 թվականի սեպտեմբերի 12-ին պայմանական վաղաժամկետ ազատվել է պատիժը կրելուց: 2009 թվականի ապրիլի 13-ին` ժամը 01:50-ի սահմաներում, Երևան քաղաքի Արաբկիրի 17-րդ փողոցի 12-րդ տանը հավաքույթի ժամանակ ալկոհոլային խմիչքներ է օգտագործել, ծեծի է ենթարկել Լուսինե Պողոսյանին և Անժելա Գևորգյանին, իսկ երբ Անժելա Գևորգյանը ցանկացել է զանգահարել ոստիկանություն, Գևորգ Սուքիասյանը, չնչին առիթն օգտագործելով, ինքնահաստատման նպատակով` խուլիգանական դրդումներով, իր մոտ եղած ատրճանակից կրակել է վերջինի ձախ ոտքին` ազդրի շրջանում և առողջությանը պատճառել միջին ծանրության վնաս` առողջության տևական քայքայումով:
Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարանի 2009 թվականի հոկտեմբերի 9-ի «Քրեական հետապնդումը դադարեցնելու մասին» որոշմամբ Գևորգ Լևոնի Սուքիասյանի նկատմամբ քրեական հետապնդումը` Անժելա Գևորգյանին ծեծի ենթարկելու մասով, դադարեցվել է:
2. Արագացված դատական քննություն.
Մինչ դատաքննությունն սկսելն ամբաստանյալ Գևորգ Լևոնի Սուքիասյանը միջնորդեց դատական քննությունն անցկացնել արագացված կարգով և հայտնեց, որ միջնորդությունը ներկայացրել է կամավոր, խորհրդակցել է իր պաշտպանի հետ, գիտակցում է արագացված կարգով դատական քննություն անցկացնելու հետևանքները, առաջադրված մեղադրանքն իրեն պարզ է, համաձայն է մեղադրանքի հետ:
Դատարանը, համոզվելով, որ առկա են ՀՀ քրեական դատավարության օրենսգրքի 3751-րդ և 3752-րդ հոդվածներով նախատեսված պայմանները, որոշում է կայացրել արագացված կարգով դատական քննություն անցկացնելու մասին:
Դատարանը, հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Գևորգ Լևոնի Սուքիասյանը կատարել է արարքներ` նախատեսված ՀՀ քրեական օրենսգրքի 113-րդ հոդվածի 2-րդ մասի 6-րդ կետով, 118-րդ հոդվածով և 235-րդ հոդվածի 1-ին մասով:
3. Դատարանի իրավական վերլուծությունները.
Դատարանը, ուսումնասիրելով ամբաստանյալի անձը բնութագրող, պատասխանատվությունն ու պատիժը մեղմացնող և ծանրացնող հանգամանքները, մասնավորապես` ինքնախոստովանական ցուցմունքները, ամուսնության վկայականի պատճենը, որպես հղի հաշվառման մեջ գտնվելու տեղեկանքի պատճենը, առողջական վիճակի հետազոտման ակտի պատճենը, «Հոգեբուժական բժշկական կենտրոն» ՓԲ ընկերության Նուբարաշենի կլինիկայի ղեկավարի գրության պատճենը, ՀՀ ոստիկանության ինֆորմացիոն կենտրոնի պահանջագիրը, ինչպես նաև հաշվի առնելով այն, որ Դատարանի մեկ այլ որոշմամբ Գևորգ Լևոնի Սուքիասյանի նկատմամբ քրեական հետապնդումը` Անժելա Գևորգյանին ծեծի ենթարկելու մասով, դադարեցվել է, եկավ հետևյալ եզրահանգման.
Գևորգ Սուքիասյանի անձը դրականորեն բնութագրող հանգամանքներ են ամուսնացած լինելը և ինքնախոստովանական ցուցմունքներ տալը:
Դատարանը գտնում է, որ Գևորգ Սուքիասյանի կողմից կատարված բոլոր հանցագործություններով պատասխանատվությունն ու պատիժը մեղմացնող հանգամանքներ պետք է դիտել նրա հիվանդ լինելը և նրա կնոջ` Ինեսսա Ղևոնդյանի հղի լինելու հանգամանքը:
Գևորգ Սուքիասյանի կողմից կատարված բոլոր հանցագործություններով պատասխանատվությունն ու պատիժը ծանրացնող հանգամանք է հանցանքները կատարելու ռեցիդիվը:
Դատարանը գտնում է նաև, որ Գևորգ Սուքիասյանի կողմից կատարված` ՀՀ քրեական օրենսգրքի 113-րդ հոդվածի 2-րդ մասի 6-րդ կետով և 118-րդ հոդվածով նախատեսված հանցագործություններով պատասխանատվությունն ու պատիժը ծանրացնող հանգամանք պետք է դիտել հանցանքն ալկոհոլի ազդեցության տակ կատարելը:
Կատարած արարքների համար ամբաստանյալ Գևորգ Սուքիասյանը ենթակա է քրեական պատասխանատվության և պատժի:
Համաձայն ՀՀ քրեական դատավարության օրենսգրքի 360-րդ հոդվածի` դատավճիռ կայացնելիս դատարանը մի շարք այլ հարցերի հետ միասին պետք է լուծի նաև այն հարցը, թե ամբաստանյալը պատժի ենթակա է, թե ոչ, պատժի ինչ տեսակ պետք է նշանակվի, և պետք է արդյոք նա այն կրի:
Դատարանը, հաշվի առնելով ամբաստանյալ Գևորգ Սուքիասյանի կատարած հանցանքների` հանրության համար վտանգավորության աստիճանը և բնույթը, այդ թվում նրա գործողությունների վտանգավորության աստիճանը, նրա անձը, նրան դրականորեն բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ինչպես նաև այն, որ Գևորգ Սուքիասյանի կողմից` ՀՀ քրեական օրենսգրքի 113-րդ հոդվածի 2-րդ մասի 6-րդ կետով կատարած հանցանքի համար նախատեսված է պատիժ ազատազրկման ձևով, ՀՀ քրեական օրենսգրքի 235-րդ հոդվածի 1-ին մասով կատարած հանցանքի համար նախատեսված է պատիժ նաև ազատազրկման ձևով, իսկ 118-րդ հոդվածով կատարած հանցանքի համար նախատեսված է պատիժ նաև տուգանքի ձևով, գտնում է, որ նրա նկատմամբ ՀՀ քրեական օրենսգրքի 113-րդ հոդվածի 2-րդ մասի 6-րդ կետով և 235-րդ հոդվածի 1-ին մասով կատարած հանցանքների համար պատիժներ պետք է նշանակել ազատազրկման ձևով, իսկ ՀՀ քրեական օրենսգրքի 118-րդ հոդվածով կատարած հանցանքի համար` տուգանքի ձևով:
Դատարանը գտնում է, որ ամբաստանյալ Գևորգ Սուքիասյանի նկատմամբ պատիժ պետք է նշանակվի ՀՀ քրեական օրենսգրքի 66-րդ հոդվածով սահմանված կարգով` ազատազրկման ձևով նշանակված պատիժները մասնակիորեն գումարելու, իսկ տուգանքը լրիվ գումարելու կանոնով:
ՀՀ ոստիկանության ինֆորմացիոն կենտրոնի պահանջագրի համաձայն` Երևան քաղաքի Արաբկիր և Քանաքեռ-Զեյթուն համայնքների առաջին ատյանի դատարանի 2006 թվականի հուլիսի 13-ի դատավճռով Գևորգ Լևոնի Սուքիսյանը մեղավոր է ճանաչվել ՀՀ քրեական օրենսգրքի 258-րդ հոդվածի 4-րդ մասով, 235-րդ հոդվածի 1-ին մասով և նրա նկատմամբ վերջնական պատիժ է նշանակվել ազատազրկում 4 տարի 6 ամիս ժամանակով: 2008 թվականի սեպտեմբերի 12-ին Գևորգ Սուքիասյանը պայմանական վաղաժամկետ ազատվել է պատժի մնացած մասը` 2 տարի 3 օրը, կրելուց: Նշվածից հետևում է, որ Գևորգ Սուքիսայանի պատժի չկրած մասի ժամկետը կավարտվեր 2010 թվականին, սակայն նա ՀՀ քրեական օրենսգրքով արգելված արարքները կատարել է 2009 թվականին: ՀՀ քրեական օրենսգրքի 76-րդ հոդվածի 6-րդ մասի 3-րդ կետի համաձայն` եթե պատժի չկրած մասի ընթացքում դատապարտյալը կատարում է դիտավորյալ հանցանք, ապա դատարանը նրա նկատմամբ պատիժ է նշանակում ՀՀ քրեական օրենսգրքի 67-րդ հոդվածով նախատեսված կանոններով: Հետևապես, Դատարանը գտնում է, որ ամբաստանյալ Գևորգ Սուքիասյանի նկատմամբ վերջնական պատիժ պետք է նշանակվի ՀՀ քրեական օրենսգրքի 67-րդ հոդվածով սահմանված կարգով` սույն դատավճռով նշանակված պատժին Երևան քաղաքի Արաբկիր և Քանաքեռ-Զեյթուն համայնքների առաջին ատյանի դատարանի 2006 թվականի հուլիսի 13-ի դատավճռով նշանակված պատժի չկրած մասը` 2 (երկու) տարի 3 (երեք) օր ժամկետով ազատազրկումը, մասնակիորեն գումարելու կանոնով, որը նա պետք է կրի:
Դատարանը գտնում է, որ Գևորգ Սուքիասյանի նկատմամբ ընտրված խափանման միջոցը` կալանավորումը, պետք է թողնել անփոփոխ` մինչև դատավճռի օրինական ուժի մեջ մտնելը։
ՀՀ քրեական օրենսգրքի 69-րդ հոդվածի 3-րդ մասի համաձայն` մինչև դատավճռի oրինական ուժի մեջ մտնելը կալանքի տակ պահելու ժամկետը հաշվակցվում է ազատազրկման ձևով նշանակված պատժին` մեկ օրը հաշվելով մեկ օրվա դիմաց: Քանի որ Գևորգ Սուքիասյանը, լինելով հետախուզման մեջ, 2009 թվականի հունիսի 13-ին հայտնաբերվել և արգելանքի է վերցվել, հետևաբար Գևորգ Սուքիասյանի պատժի կրման սկիզբը պետք է հաշվել 2009 թվականի հունիսի 13-ից:
Դատարանը, ղեկավարվելով ՀՀ քրեական դատավարության օրենսգրքի 116-րդ և 119-րդ հոդվածներով, գտնում է, որ դատավճիռն օրինական ուժի մեջ մտնելուց հետո 2009 թվականի հունիսի 13-ի որոշումներով իրեղեն ապացույց ճանաչված մեկ հատ 5.66 մմ կրակված փամփուշտը և 5.66 մմ տրամաչափի կրակված գնդակը պետք է ոչնչացնել, Գևորգ Սուքիասյանի կողմից ներկայացված ատրճանակը և փամփուշտը` բռնագրավել և հանձնել ՀՀ ոստիկանությանը, իսկ անդրավարտիքը` վերադարձնել Անժելա Գևորգյանին:
ՀՀ քրեական դատավարության օրենսգրքի 168-րդ հոդվածի 1-ին մաuի 1-ին կետով նախատեսված դատական ծախսերն ամբաստանյալից ենթակա չեն բռնագանձման, քանի որ տուժողները, հնարավորություն ունենալով իրենց շահերը դատարանում ներկայացնել, հայտարարել են, որ ամբաստանյալից որևէ նյութական պահանջ չունեն: Ինչ վերաբերում է նույն մասի 2-8-րդ կետերով նախատեսված դատական ծախսերին, ապա դրանք արագացված դատական քննության կարգ կիրառելու դեպքում, համաձայն նույն օրենսգրքի 3753-րդ հոդվածի 8-րդ մասի` ամբաստանյալից ենթակա չեն բռնագանձման:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 138-րդ, 168-րդ, 357-360-րդ, 365-րդ, 369-372-րդ, 3751-րդ և 3753-րդ հոդվածներով` Դատարանը

ՎՃՌԵՑ

Գևորգ Լևոնի Սուքիասյանին մեղավոր ճանաչել ՀՀ քրեական օրենսգրքի 113-րդ հոդվածի 2-րդ մասի 6-րդ կետով, 118-րդ հոդվածով և 235-րդ հոդվածի 1-ին մասով:
ՀՀ քրեական օրենսգրքի 113-րդ հոդվածի 2-րդ մասի 6-րդ կետով Գևորգ Լևոնի Սուքիասյանի նկատմամբ պատիժ նշանակել ազատազրկում` 2 (երկու) տարի 6 (վեց) ամիս ժամկետով:
ՀՀ քրեական օրենսգրքի 235-րդ հոդվածի 1-ին մասով Գևորգ Լևոնի Սուքիասյանի նկատմամբ պատիժ նշանակել ազատազրկում` 1 (մեկ) տարի ժամկետով:
ՀՀ քրեական օրենսգրքի 118-րդ հոդվածով Գևորգ Լևոնի Սուքիասյանի նկատմամբ պատիժ նշանակել տուգանք` նվազագույն աշխատավարձի հիսնապատիկի չափով:
ՀՀ քրեական օրենսգրքի 66-րդ հոդվածով սահմանված կարգով` ազատազրկման ձևով նշանակված պատիժները մասնակիորեն գումարելու, իսկ տուգանքը լրիվ գումարելու միջոցով, Գևորգ Լևոնի Սուքիասյանի նկատմամբ պատիժ նշանակել ազատազրկում` 3 (երեք) տարի ժամկետով և տուգանք` նվազագույն աշխատավարձի հիսնապատիկի չափով:
ՀՀ քրեական օրենսգրքի 67-րդ հոդվածով սահմանված կարգով` սույն դատավճռով նշանակված պատժին մասնակիորեն գումարել Երևան քաղաքի Արաբկիր և Քանաքեռ-Զեյթուն համայնքների առաջին ատյանի դատարանի 2006 թվականի հուլիսի 13-ի դատավճռով նշանակված պատժի չկրած մասը` 2 (երկու) տարի 3 (երեք) օր ժամկետով ազատազրկումը և Գևորգ Լևոնի Սուքիասյանի նկատմամբ վերջնական պատիժ նշանակել ազատազրկում` 4 (չորս) տարի ժամկետով և տուգանք` նվազագույն աշխատավարձի հիսնապատիկի չափով` ազատազրկման կրման սկիզբը հաշվելով 2009 թվականի հունիսի 13-ից:
Գևորգ Լևոնի Սուքիասյանի նկատմամբ ընտրված խափանման միջոցը` կալանավորումը, թողնել անփոփոխ` մինչև դատավճռի օրինական ուժի մեջ մտնելը:
Դատավճիռն օրինական ուժի մեջ մտնելուց հետո 2009 թվականի հունիսի 13-ի որոշումներով իրեղեն ապացույց ճանաչված մեկ հատ 5.66 մմ կրակված փամփուշտը և 5.66 մմ տրամաչափի կրակված գնդակը ոչնչացնել, Գևորգ Սուքիասյանի կողմից ներկայացված ատրճանակն ու փամփուշտը բռնագրավել և հանձնել ՀՀ ոստիկանությանը, իսկ անդրավարտիքը վերադարձնել Անժելա Գևորգյանին:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակելու օրվանից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին կետով նախատեսված հիմքով):


ԴԱՏԱՎՈՐ Մ.ՊԱՊՈՅԱՆ