Գործ ԵԱՔԴ/0098/01/09

Ո Ր Ո Շ Ո Ւ Մ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

10 փետրվարի 2011թ. ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ Ս. ՉԻՉՈՅԱՆ
ԴԱՏԱՎՈՐՆԵՐ Ե. ԴԱՐԲԻՆՅԱՆ
Ա. ՀՈՎՀԱՆՆԻՍՅԱՆ

ՔԱՐՏՈՒՂԱՐՈՒԹՅԱՄԲ Տ. ՀԱԿՈԲՅԱՆԻ

ՄԱՍՆԱԿՑՈՒԹՅԱՄԲ

ՄԵՂԱԴՐՈՂ Ա. ԲՈՇՆԱՂՅԱՆԻ
ՊԱՇՏՊԱՆ Ռ. ԹՈՎՄԱՍՅԱՆԻ

Դռնբաց դատական նիստում, վերաքննիչ վարույթի կանոններով, քննության առնելով ամբաստանյալ Սամվել Մարկոսյանի և պաշտպան Ռազմիկ Թովմասյանի վերաքննիչ բողոքը` Սամվել Մարկոսի Մարկոսյանի վերաբերյալ ՀՀ քրեական օրենսգրքի 205-րդ հոդվածի 2-րդ մասով Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010 թվականի օգոստոսի 17-ի դատավճռի դեմ

Պ Ա Ր Զ Ե Ց

1. Գործի դատավարական նախապատմությունը.

2009 թվականի հունվարի 27-ին ՀՀ ԿԱ ՊԵԿ ՀԾ հետաքննության բաժնում ՀՀ քրեական օրենսգրքի 205-րդ հոդվածի 2-րդ մասի հատկանիշներով հարուցվել է թիվ 83151209 քրեական գործը` <<Սագլ>> ՍՊ ընկերության տնօրինության կողմից, առանձնապես խոշոր չափերով հարկեր վճարելուց չարամտորեն խուսափելու դեպքի առթիվ:
2009 թվականի մարտի 24-ին թիվ 83151209 քրեական գործի նախաքննության ժամկետը երկարացվել է երկու ամիս ժամանակով` մինչև 2009 թվականի մայիսի 27-ը:
2009 թվականի հուլիսի 21-ին Սամվել Մարկոսի Մարկոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 205-րդ հոդվածի 2-րդ մասով և նրա նկատմամբ որպես խափանման միջոց կիրառվել է ստորագրություն չհեռանալու մասին:
2009 թվականի հուլիսի 29-ին թիվ 83151209 քրեական գործն ըստ մեղադրանքի` Սամվել Մարկոսի Մարկոսյանի ՀՀ քրեական օրենսգրքի 205-րդ հոդվածի 2-րդ մասով մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարան` ըստ էության քննության առնելու համար:
2009 թվականի օգոստոսի 04-ին քրեական գործը դատավոր Մ.Պապոյանի կողմից ընդունվել է վարույթ և նշանակվել դատական քննության:
2009 թվականի հոկտեմբերի 29-ին թիվ ԵԱՔԴ/0098/01/09 քրեական գործով ըստ մեղադրանքի` Սամվել Մարկոսի Մարկոսյանի` ՀՀ քրեական օրենսգրքի 205-րդ հոդվածի 2-րդ մասով, դատավոր Մ.Պապոյանը հայտնել է ինքնաբացարկ:
2009 թվականի նոյեմբերի 03-ին քրեական գործն ընդունվել է դատավոր Լ.Ավետիսյանի վարույթ և նշանակվել դատական քննության:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010 թվականի փետրվարի 15-ի որոշմամբ անհրաժեշտ քննչական և այլ դատավարական գործողություններ կատարելու համար քրեական գործը վերադարձվել է ՀՀ գլխավոր դատախազին:
2010 թվականի մարտի 05-ին ՀՀ գլխավոր դատախազությունից ՀՀ քրեական դատավարության օրենսգրքի 3091-րդ հոդվածի 5-րդ մասի կարգով Սամվել Մարկոսի Մարկոսյանի վերաբերյալ ՀՀ քրեական օրենսգրքի 205-րդ հոդվածի 2-րդ մասով քրեական գործը վերադարձվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010 թվականի մարտի 22-ի որոշմամբ բավարարվել է գործով մեղադրողի միջնորդությունը` Ս.Մարկոսյանին մեղսագրված արարքի շրջանակներում քննություն կատարելու համար գործի դատական քննությունը, ՀՀ քրեական դատավարության օրենսգրքի 3091-րդ հոդվածի կարգով երկու ամիս ժամկետով հետաձգելու մասին:
2010 թվականի մարտի 29-ին ՀՀ գլխավոր դատախազությունից Սամվել Մարկոսի Մարկոսյանի վերաբերյալ ՀՀ քրեական օրենսգրքի 205-րդ հոդվածի 2-րդ մասով քրեական գործը ՀՀ քրեական դատավարության օրենսգրքի 3091-րդ հոդվածի կարգով ուղարկվել է ՀՀ ԿԱ ՊԵԿ քննչական վարչություն:
ՀՀ ԿԱ պետական եկամուտների կոմիտեի քննչական վարչության ՀԿԳ քննիչ Ա.Գրիգորյանի 2010 թվականի մայիսի 22-ի որոշմամբ թիվ 83151209 քրեական գործի նյութերով <<Սագլ>> ՍՊ ընկերության գործունեությունը և առանձնապես խոշոր չափի հարկերը վճարելուց չարամտորեն խուսափելը կազմակերպելու փաստի առթիվ ՀՀ քրեական օրենսգրքի 38-205-րդ հոդվածի 2-րդ մասի հատկանիշներով հարուցվել է նոր քրեական գործ` այն առանձնացնելով առանձին վարույթում:
2010 թվականի մայիսի 31-ին ՀՀ գլխավոր դատախազությունից հա. 83151209 քրեական գործն ըստ մեղադրանքի` Սամվել Մարկոսի Մարկոսյանի` ՀՀ քրեական օրենսգրքի 205-րդ հոդվածի 2-րդ մասով ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան` դատական քննությունը շարունակելու համար:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010 թվականի օգոստոսի 17-ի դատավճռով Սամվել Մարկոսի Մարկոսյանը մեղավոր է ճանաչվել ՀՀ քրեական օրենսգրքի 205-րդ հոդվածի 2-րդ մասով /2006թ. հուլիսի 12-ի խմբագրությամբ/ և դատապարտվել ազատազրկման 5/հինգ/ տարի 6/վեց/ ամիս ժամկետով` գույքի բռնագրավմամբ:
Պատժի սկիզբը հաշվվել է դատավճռի կատարման օրվանից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Սամվել Մարկոսյանի նկատմամբ ընտրված խափանման միջոցը` ստորագրություն չհեռանալու մասին, թողնվել է անփոփոխ, մինչև դատավճռի օրինական ուժի մեջ մտնելը:
Վճռվել է Սամվել Մարկոսի Մարկոսյանից հօգուտ պետական բյուջեի բռնագանձել 371.702.700/երեք հարյուր յոթանասուն մեկ միլիոն յոթ հարյուր երկու հազար յոթ հարյուր/ ՀՀ դրամ, որպես հանցագործությամբ պատճառված վնասի հատուցում:
<<Սագլ>> ՍՊԸ /ՀՎՀՀ 00092147/ պատկանող գույքի վրա դրված կալանքը թողնվել է անփոփոխ:
Սամվել Մարկոսի Մարկոսյանին պատկանող գույքի վրա դրված կալանքը թողնվել է անփոփոխ:
Վճռվել է նաև ապացույց ճանաչված` <<Սագլ>> ՍՊԸ-ի կողմից հարկային տեսչություն ներկայացված 2006 թվականի շահութահարկի, 2006 թվականի 1-ին, 2007 թվականի 1-ին, 2-րդ, 3-րդ և 4-րդ եռամսյակներ, ինչպես նաև 2008 թվականի հունվար, փետրվար, մարտ, ապրիլ, մայիս և հունիս ամիսների ԱԱՀ-ի հաշվարկների քսերոպատճենները պահել քրեական գործում:
Դատավճռի դեմ 2010 թվականի սեպտեմբերի 09-ին վերաքննիչ բողոք են բերել ամբաստանյալ Սամվել Մարկոսյանը և պաշտպան Ռազմիկ Թովմասյանը:
Քրեական գործը ՀՀ վերաքննիչ քրեական դատարան է մուտք եղել 2010 թվականի սեպտեմբերի 28-ին:
Նախագահող դատավորի 2010 թվականի սեպտեմբերի 29-ի որոշմամբ վերաքննիչ բողոքն ընդունվել է վարույթ և քրեական գործը նշանակվել քննության։
Վերաքննիչ բողոքի դեմ գրավոր պատասխան չի ստացվել:
ՀՀ վերաքննիչ քրեական դատարանի 2010 թվականի դեկտեմբերի 27-ի որոշմամբ բավարարվել է ամբաստանյալ Սամվել Մարկոսյանի պաշտպան Ռազմիկ Թովմասյանի միջնորդությունը և թիվ ԵԱՔԴ/0098/01/09 քրեական գործով ըստ մեղադրանքի` Սամվել Մարկոսի Մարկոսյանի` ՀՀ քրեական օրենսգրքի 205-րդ հոդվածի 2-րդ մասով, վարույթը կասեցվել է` մինչև ամբաստանյալի առողջանալը:
ՀՀ վերաքննիչ քրեական դատարանի 2011 թվականի փետրվարի 01-ի որոշմամբ թիվ ԵԱՔԴ/0098/01/09 քրեական գործով ըստ մեղադրանքի` Սամվել Մարկոսի Մարկոսյանի` ՀՀ քրեական օրենսգրքի 205-րդ հոդվածի 2-րդ մասով, վարույթը վերսկսվել է և քրեական գործը նշանակվել քննության:

2. Գործի փաստական հանգամանքները.

Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանը դատաքննությամբ հիմնավորված է համարել հետևյալը.
Սամվել Մարկոսյանը հանդիսանալով Արաբկիրի հարկային տեսչությունում հաշվառված <<Սագլ>> ՍՊ ընկերության տնօրեն, 2006-2008թթ. ընթացքում տարբեր տնտեսվարող սուբեկտների մատակարարել է տարաբնույթ նյութեր, ապրանքներ, սակայն գործունեության վերաբերյալ հարկային տեսչությանը ներկայացրած 2006 թվականի շահութահարկի, 2006թ.-2008թ. ԱԱՀ-ի հաշվարկներում ակնհայտ խեղաթյուրված տվյալներ է մտցրել և ՀՀ տարածքում ապրանքների ձեռքբերման գումարները, արհեստականորեն մեծացնելու, ինչպես նաև իրացման շրջանառությանը /հասույթը/ պակաս ցույց տալու եղանակով չարամտորեն խուսափել է պետբյուջե վճարել առանձնապես խոշոր չափերի` ընդամենը 371.702.700 դրամ ԱԱՀ-ի և շահութահարկի գումարները:

3. Վերաքննիչ բողոքի հիմքերը, փաստարկները և պահանջը.

Վերաքննիչ բողոքը քննվում է հետևյալ հիմքերի սահմաններում, ներքոհիշյալ հիմնավորումներով:
Ամբաստանյալ Սամվել Մարկոսյանի շահերի պաշտպան Ռազմիկ Թովմասյանը վերաքննիչ բողոքում նշել է, որ իր պաշտպանյալն ինչպես նախաքննության, այնպես էլ դատաքննության ընթացքում տվել է խոստովանական ցուցմունքներ:
Քրական գործով հատատված է, որ իր Սամվել Մարկոսյանը երկրորդ խմբի հաշմանդամ է, տառապում է մի շարք ծանր հիվանդություններով, այն է` ձախ թոքի խրոնիկական օբստրուկտիվ հիվանդություն, վիճակ աջակողմյան պոլմոնեկտոմայից հետո, պնեմոսկլերոզ, շնչառական անբավարարություն 2-3 աստիճանի, թոք-սրտային անբավարարություն 2-3 աստիճանի, սիմպրոմատիկ ռիպետոնիա:
Դատարանը խախտել է ՀՀ քրեական դատավարության օրենսգրքի 360-րդ հոդվածի, ՀՀ քրեական օրենսգրքի 48-րդ հոդվածի պահանջները, նշանակելով ամենախիստ պատիժը:
Դատավարական նորմերի չկիրառելը, սխալ կիրառելը հանգեցրել է նյութական նորմերի խախտմանը, ինչն էլ ազդել է գործի ելքի վրա:
Ելնելով վերոգրյալից պաշտպան Ռազմիկ Թովմասյանը խնդրել է դատավճիռը մասնակիորեն բեկանել, պատժաչափը կրճատել: Կիրառել ՀՀ ԱԺ <<Համաներում հայտարարելու մասին>> 19.06.2009թ. որոշման 2-րդ կետի 1-ին, 2-րդ ենթակետերը և նրան ազատել պատժի կրումից:

4. Վերաքննիչ բողոքի դեմ բերված պատասխանը.

Մեղադրող, ՀՀ գլխավոր դատախազության կոռուպցիոն և կազմակերպված հանցագործությունների գործերով վարչության ավագ դատախազ Ա.Բոշնաղյանը վերաքննիչ բողոքի դեմ առարկեց` նշելով, որ պետությանը պատճառված վնասը չի վերականգնվել և այդ պայմաններում դատարանը նշանակել է համաչափ պատիժ:

5. Վերաքննիչ դատարանի պատճառաբանությունները և եզրահանգումը.

Վերաքննիչ դատարանը քննության առնելով վերաքննիչ բողոքը` բողոքի հիմքերի և հիմնավորումների սահմաններում, լսելով բողոքում ներկայացված հետևությունները հիմնավորելու մասին պաշտպանության կողմի ելույթը, մեղադրողի պատասխանը, ինչպես նաև վերլուծելով գործի նյութերը, դրանք գնահատելով իրենց համակցությամբ, հանգում է այն հետևության, որ վերաքննիչ բողոքը պետք է մերժել հետևյալ պատճառաբանությամբ.
ՀՀ քրեական դատավարության օրենսգրքի 385-րդ հոդվածի 1-ին մասի համաձայն` վերաքննիչ դատարանը դատական ակտը վերանայում է վերաքննիչ բողոքի հիմքերի և հիմնավորումների սահմաններում, նույն հոդվածի 3-րդ մասի համաձայն` վերաքննիչ դատարանում բողոքի քննության ժամանակ առաջին ատյանի դատարանում հաստատված փաստական հանգամանքներն ընդունվում են որպես հիմք, բացառությամբ այն դեպքի, երբ բողոքում վիճարկվում է որևէ փաստական հանգամանք, և վերաքննիչ դատարանը հանգում է այն եզրակացության, որ տվյալ փաստական հանգամանքի վերաբերյալ եզրակացության հանգելիս առաջին ատյանի դատարանն ակնհայտ սխալ է թույլ տվել:
Առաջադրված մեղադրանքում ամբաստանյալ Սամվել Մարկոսյանն իրեն լիովին մեղավոր է ճանաչել և տվել խոստովանական ցուցմունքներ:
Ամբաստանյալ Սամվել Մարկոսյանի կողմից ՀՀ քրեական օրենսգրքի 205-րդ հոդվածի 2-րդ մասով նախատեսված հանցանքը կատարելը և նրա մեղքը որևէ մասնակցի կողմից չի վիճարկվում, չի վիճարկվում նաև առաջին ատյանի դատարանի կողմից դատավճռով հաստատված ճանաչված որևէ փաստական հանգամանք, այդ իսկ պատճառով Սամվել Մարկոսյանին առաջադրված մեղադրանքի հիմնավորվածությունը ՀՀ վերաքննիչ քրեական դատարանը քննության առարկա չի դարձնում:
Քննության առնելով վերաքննիչ բողոքի պահանջը` պատժաչափը կրճատելու, ՀՀ ԱԺ <<Համաներում հայտարարելու մասին>> 19.06.2009թ. որոշման 2-րդ կետի 1-ին, 2-րդ ենթակետերը կիրառելու և Սամվել Մարկոսյանին պատժի կրումից ազատելու մասին, վերաքննիչ դատարանը գտնում է, որ սույն գործով ՀՀ ԱԺ <<Համաներում հայտարարելու մասին>> որոշման կիրառումն անթույլատրելի է` հետևյալ պատճառաբանությամբ.
ՀՀ վճռաբեկ դատարանն իր 2009 թվականի փետրվարի 17-ի Գարուշ Մադաթյանի վերաբերյալ ԵՇԴ/0029/01/08 որոշմամբ իրավական դիրքորոշում է հայտնել այն մասին, որ պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա: Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը:
Արարքի հանրային վտանգավորության բնույթի որոշման հարցում կարևոր է խախտված քրեաիրավական նորմով պաշտպանվող հասարակական հարաբերության սոցիալական նշանակությունը: Պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը:
Հարկերը վճարելուց չարամտորեն խուսափելը դասվում է տնտեսական գործունեության դեմ ուղղված հացագործությունների շարքին: Այս հանցագործության անմիջական օբյեկտը պետության ֆինանսական և հարկային քաղաքականությունն է, հասարակական վտանգավորությունը կայանում է նրանում, որ անձը խուսափում է գանձվող հարկերը, տուրքերը կամ այլ պարտադիր վճարումները վճարելուց:
Վերաքննիչ դատարանը գտնում է, որ առաջին ատյանի դատարանը, պահպանելով ՀՀ քրեական օրենսգրքի պատիժ նշանակելու ընդհանուր սկզբունքները, լիարժեք վերլուծության ենթարկելով գործում առկա փաստական հանգամանքները, այդ թվում` ամբաստանյալի պատասխանատվությունը և պատիժը մեղմացնող հանքամանքները` հանցանքն ընդունելը և կատարածի համար զղջալը, երկրորդ խմբի հաշմանդամ լինելը, պատասխանատվությունը և պատիժը ծանրացնող հանգամանքների բացակայությունը, հաշվի առնելով օրենքով պաշտպանվող հարաբերությունների սոցիալական նշանակությունը և գնահատելով այդ հանգամանքները, նկատի ունենալով, որ Սամվել Մարկոսյանն արարքը կատարել է 2006-2008թթ. ընթացքում` նրա նկատմամբ նշանակել է պատիժ ՀՀ քրեական օրենսգրքի 2006 թվականի հուլիսի 12-ի խմբագրությամբ 205-րդ հոդվածի 2-րդ մասի սանկցիային համապատասխան, որը համապատասխանում է հանցագործության ծանրությանը և ամբաստանյալի անձին, և որի միջոցով հնարավոր է հասնել ՀՀ քրեական օրենսգրքի 48-րդ հոդվածով նախատեսված պատժի նպատակներին, այն է` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը: Այն բխում է նաև ՀՀ քրեական օրենսգրքի 10-րդ հոդվածով սահմանված` արդարության և պատասխանատվության անհատականացման սկզբունքից:
Այս պայմաններում ՀՀ վերաքննիչ քրեական դատարանը գտնում է, որ դատավճռում արձանագրված և վերաքննիչ բողոքում նշված պատասխանատվությունը և պատիժը մեղմացնող հանգամանքներն ավելի մեղմ պատիժ նշանակելու համար օբյեկտիվ հիմք չեն կարող հանդիսանալ, ուստի և կիրառելի չէ ՀՀ Ազգային ժողովի կողմից 19.06.2009թ. ընդունված <<Համաներում հայտարարելու մասին>> որոշումը:
Վերը նշված հանգամանքների վերլուծությամբ և ղեկավարվելով օրենքով, իրավագիտակցությամբ և ներքին համոզմամբ` վերաքննիչ դատարանը գտնում է, որ ընդհանուր իրավասության դատարանն ամբաստանյալի նկատմամբ պատժատեսակի և պատժաչափի նշանակման, ինչպես նաև նշանակված պատիժը կրելու անհրաժեշտության հարցում հանգել է ճիշտ հետևությունների, դատավճիռն օրինական, հիմնավորված և պատճառաբանված է, հետևաբար վերաքննիչ բողոքը բավարարելու հիմքեր չկան և դատավճիռը պետք է թողնել օրինական ուժի մեջ:
Քրեական գործի քննության նախորդ փուլերի ընթացքում նյութական և դատավարական իրավունքի նորմերի խախտումներ թույլ չեն տրվել:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-394-րդ և 402-րդ հոդվածներով` ՀՀ վերաքննիչ քրեական դատարանը

Ո Ր Ո Շ Ե Ց

Ամբաստանյալ Սամվել Մարկոսյանի և պաշտպան Ռազմիկ Թովմասյանի վերաքննիչ բողոքը մերժել:
Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանի 2010 թվականի օգոստոսի 17-ի դատավճիռը քրեական գործով ըստ մեղադրանքի` Սամվել Մարկոսի Մարկոսյանի ՀՀ քրեական օրենսգրքի 205-րդ հոդվածի 2-րդ մասով, թողնել օրինական ուժի մեջ:
Որոշումը կարող է բողոքարկվել ՀՀ վճռաբեկ դատարան` հրապարակման պահից մեկամսյա ժամկետում։
ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ

Իսկականի հետ ճիշտ է`
ՆԱԽԱԳԱՀՈՂ ԴԱՏԱՎՈՐ` Ս. ՉԻՉՈՅԱՆ

գործ No ԵԱՔԴ/0098/01/09

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը

նախագահող դատավոր Լ. Ավետիսյան
դատական նիստերի քարտուղար Ե. Կարապետյան
մեղադրող Ա. Բոշնաղյան
պաշտպան Ռ. Թովմասյան

2010թ. օգոստոսի 17-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Սամվել Մարկոսի Մարկոսյանի, ծնված 24.03.1941թ. Աբովյանի շրջանի Հացավան գյուղում, ազգությամբ հայ, ՀՀ քաղաքացի, միջնակարգ մասնագիտական կրթությամբ, ամուսնացած, խնամքին ոչ ոք, աշխատել է ՙՍագլ՚ ՍՊԸ տնօրեն, ֆիզիկապես վատառողջ, նախկինում չդատված, հաշվառված և բնակվում է Երևան քաղաքի Մամիկոնյանց փողոցի 58 շենքի թիվ 7 բնակարանում, մեղադրվում է ՀՀ քրեական օրենսգրքի 205 հոդվածի 2-րդ մասով,

Պ Ա Ր Զ Ե Ց
1.Գործի դատավարական նախապատմությունը.
2009թ. հունվարի 27-ին ՀՀ ԿԱ ՊԵԿ ՀԾ հետաքննության բաժնում ՀՀ քրեական օրենսգրքի 205 հոդվածի 2-րդ մասի հատկանիշներով հարուցվել է թիվ 83151209 քրեական գործը և ըստ քննչական ենթակայության ուղարկվել ՀՀ ԿԱ ՊԵԿ ՀԾ քննչական վարչություն:
2009թ. հուլիսի 21-ին Սամվել Մարկոսի Մարկոսյանը ներգրավվել է որպես մեղադրյալ, նրան մեղադրանք է առաջադրվել ՀՀ քրեական օրենսգրքի 205 հոդվածի 2-րդ մասով և նրա նկատմամբ որպես խափանման միջոց կիրառվել է ստորագրություն չհեռանալու մասին:
2009թ. օգոստոսի 03-ին թիվ 83151209 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության դատարան:
2009թ. օգոստոսի 04-ին քրեական գործը վարույթ է ընդունվել դատավոր Մ.Պապոյանի կողմից և նշանակվել դատական քննության 2009թ. օգոստոսի 27-ին:
2009թ. հոկտեմբերի 29-ին թիվ ԵԱՔԴ 0098/01/09 քրեական գործով ըստ մեղադրանքի Սամվել Մարկոսի Մարկոսյանի` ՀՀ քրեական օրենսգրքի 205 հոդվածի 2-րդ մասով, դատավոր Մ.Պապոյանը հայտնել է ինքնաբացարկ:
2009թ. նոյեմբերի 03-ին Սամվել Մարկոսի Մարկոսյանի վերաբերյալ ՀՀ քրեական օրենսգրքի 205 հոդվածի 2-րդ մասով քրեական գործը վարույթ է ընդունվել դատավոր Լ.Ավետիսյանի կողմից և նշանակվել դատական քննության 2009թ. նոյեմբերի 17-ին:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010թ. փետրվարի 15-ի որոշմամբ անհրաժեշտ քննչական և այլ դատավարական գործողություններ կատարելու համար քրեական գործը վերադարձվել է ՀՀ գլխավոր դատախազին:
2010թ. մարտի 15-ին ՀՀ գլխավոր դատախազությունից ՀՀ քրեական դատավարության օրենսգրքի 3091 հոդվածի 5-րդ մասի կարգով Սամվել Մարկոսի Մարկոսյանի վերաբերյալ ՀՀ քրեական օրենսգրքի 205 հոդվածի 2-րդ մասով քրեական գործը վերադարձվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան:
Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարանի 2010թ. մարտի 22-ի որոշմամբ բավարարվել է գործով մեղադրողի միջնորդությունը` Ս.Մարկոսյանին մեղսագրված արարքի շրջանակներում քննություն կատարելու համար գործի դատական քննությունը, ՀՀ քրեական դատավարության օրենսգրքի 3091 հոդվածի կարգով երկու ամիս ժամկետով հետաձգելու մասին:
2010թ. մարտի 29-ին ՀՀ գլխավոր դատախազությունից Սամվել Մարկոսի Մարկոսյանի վերաբերյալ ՀՀ քրեական օրենսգրքի 205 հոդվածի 2-րդ մասով քրեական գործը ՀՀ քրեական դատավարության օրենսգրքի 3091 հոդվածի կարգով ուղարկվել է ՀՀ ԿԱ ՊԵԿ քննչական վարչություն:
ՀՀ ԿԱ պետական եկամուտների կոմիտեի քննչական վարչության ՀԿԳ քննիչ Ա.Գրիգորյանի 2010թ. մայիսի 22-ի որոշմամբ թիվ 83151209 քրեական գործի նյութերով ՙՍագլ՚ ՍՊ ընկերության գործունեությունը և առանձնապես խոշոր չափի հարկերը վճարելուց չարամտորեն խուսափելը կազմակերպելու փաստի առթիվ ՀՀ քրեական օրենսգրքի 38-205 հոդվածի 2-րդ մասի հատկանիշներով հարուցվել է նոր քրեական գործ` այն առանձնացնելով առանձին վարույթում:
2010թ. մայիսի 31-ին ՀՀ գլխավոր դատախազությունից Սամվել Մարկոսի Մարկոսյանի վերաբերյալ ՀՀ քրեական օրենսգրքի 205 հոդվածի 2-րդ մասով հա. 83151209 քրեական գործն ուղարկվել է Երևան քաղաքի Արաբկիր և Քանաքեռ-Զեյթուն վարչական շրջանների ընդհանուր իրավասության առաջին ատյանի դատարան` դատական քննությունը շարունակելու համար:
2.Գործի փաստական հանգամանքները.
Նախաքննության մարմինն ամբաստանյալ Սամվել Մարկոսի Մարկոսյանին մեղադրանք է առաջադրել հետևյալ արարքի համար.
Սամվել Մարկոսյանը հանդիսանալով Արաբկիրի հարկային տեսչությունում հաշվառված ՙՍագլ՚ ՍՊ ընկերության տնօրեն, 2006-2008թթ. ընթացքում տարբեր տնտեսվարող սուբեկտների մատակարարել է տարաբնույթ նյութեր, ապրանքներ, սակայն գործունեության վերաբերյալ հարկային տեսչությանը ներկայացրած 2006թ. շահութահարկի, 2006թ.-2008թ. ԱԱՀ-ի հաշվարկներում ակնհայտ խեղաթյուրված տվյալներ է մտցրել և ՀՀ տարածքում ապրանքների ձեռքբերման գումարները, արհեստականորեն մեծացնելու, ինչպես նաև իրացման շրջանառությանը /հասույթը/ պակաս ցույց տալու եղանակով չարամտորեն խուսափել է պետբյուջե վճարել առանձնապես խոշոր չափերի` ընդամենը 371.702.700 դրամ ԱԱՀ-ի և շահութահարկի գումարները:
3.Ապացույցների հետազոտում.
Առաջադրված մեղադրանքում ամբաստանյալ Սամվել Մարկոսյանն իրեն լիովին մեղավոր է ճանաչել և տվել խոստովանական ցուցմունքներ այն մասին, որ 2006-2008թթ. ընթացքում հանդիսանալով ՙՍագլ՚ ՍՊ ընկերության տնօրեն, իր աշխատակիցներ Լուսինե Մարկոսյանի և Արամ Գևորգյանի օգնությամբ, Երևանի շինանյութի շուկաներից ու ‎ֆիզիկական անձանցից, առանց համապատասխան փաստաթղթերի, ձեռք է բերել շինանյութեր և այլ ապրանքներ, որոնք իր ՙՍագլ՚ ՍՊ ընկերության հաշվապահական փաստաթղթերով մատակարարել է ՀՀ տարածքում գործող մի շարք տնտեսավարող սուբեկտների: Ընկերությունը գլխավոր հավապահ չի ունեցել և դրա գործառույթները իրականացրել է ինքը և չունենալով ապրանքների ձեռք բերման հաշվապահական փաստաթղթեր, Արաբկիր հարկային տեսչությանը ներկայացրած հաշվետվություններում և ԱԱՀ-ի հաշվարկներում կեղծ տվյալներ է մտցրել` արհեստականորեն մեծացրել ՀՀ տարածքում ապրանքների ձեռքբերման գումարները, ինչպես նաև որոշ ամիսներին իրացման շրջանառությանը պակաս է ցույց տվել և խուսափել է պետբյուջե վճարել ԱԱՀ-ի և շահութահարկի գումարները:
Ամբաստանյալին առաջադրված մեղադրանքը, բացի նրա խոստովանական ցուցմունքից հիմնավորվել է նաև գործով ձեռք բերված հետևյալ ապացույցներով.
Վկա, ՙՍագլ՚ ՍՊ ընկերության փոխտնօրեն Լուսինե Մարկոսյանը դատարանում հրաժարվելով իր հոր դեմ ցուցմունք տալուց, պնդել է նախաքննության ընթացքում տված ցուցմունքով այն մասին, որ 2006-2008թթ. ընթացքում աշխատել է ՙՍագլ՚ ՍՊ ընկերությունում, որպես մատակարարման գծով փոխտնօրեն: Ընկերության տնօրեն է հանդիսացել իր հայրը` Սամվել Մարկոսյանը: ՙՍագլ՚ ՍՊ ընկերությունը զբաղվել է տարբեր կազմակերպություններին նյութերի և ապրանքների մատակարարմամբ: Որպես փոխտնօրեն իր պարտականություններն են եղել ընկերությունների հետ բանակցություններ վարել, պայմանավորվածություններ ձեռք բերել և մատակարարումները կազմակերպել: Նշված աշխատանքները կատարելու համար իրեն է կցված եղել ՙՍագլ՚ ՍՊ ընկերության աշխատակից Արամ Գևորգյանը և 2006-2008թթ ընթացքում տարաբնույթ նյութեր և ապրանքներ են մատակարարել ՙԷներգոկոմպլեքս՚ ՍՊ, ՙՀայաստանի էլեկտրական ցանցեր՚ ՓԲ, ՙՀոյակերտ-շին՚ ՍՊ, ՙՀատուկէլեկտրամոնտաժ՚ ԲԲ, ՙՀանքավան հանքային ջրերի գործարան՚ ԲԲ և այլ ընկերություններին: Մատակարարված նյութերը և ապրանքները ձեռք են բերվել Երևանի տարբեր շինանյութի շուկաներից և մասնավոր անձանցից, հիմնականում տնօրեն Սամվել Մարկոսյանի կողմից: Ընկերությունը գլխավոր հավապահ չի ունեցել և դրա գործառույթները իրականացրել է` /հաշվետվություններ և հաշվարկներ կազմել ու Արաբկիր հարկային տեսչություն հանձնել, ինչպես նաև ‎ֆինանսական մնացած հարցերով զբաղվել է/ տնօրեն Սամվել Մարկոսյանը: Ինքը որպես ՙՍագլ՚ ՍՊ ընկերության փոխտնօրեն ստացել է 300 հազար դրամ ամսական աշխատավարձ:
Վկա, ՙՍագլ՚ ՍՊ ընկերության աշխատակից Արամ Գևորգյանի նախաքննության ընթացքում տված ցուցմունքով այն մասին, որ 2006-2008թթ. ընթացքում աշխատել է ՙՍագլ՚ ՍՊ ընկերությունում: Նշված ընկերությունը զբաղվել է տարբեր կազմակերպություններին նյութերի և ապրանքների մատակարարմամբ: Ընկերության տնօրեն է հանդիսացել Սամվել Մարկոսյանը և ինքը նշված ժամանակաշրջանում վերջինիս, ինչպես նաև փոխտնօրեն Լուսինե Մարկոսյանի հանձնարարությամբ մի շարք ընկերությունների տարաբնույթ շինարարական նյութեր ու այլ ապրանքներ է մատակարարել, որոնցից հիշում է ՙՀայաստանի էլեկտրական ցանցեր՚ ՓԲԸ-ն ու ՙՀատուկէլեկտրամոնտաժ՚ ԲԲԸ-ն, որոնց մատակարարվել են էլեկտրական ապրանքներ և սարքավորումներ: ՙՀանքավան հանքային ջրերի գործարան՚ ՍՊ ընկերությանը մատակարարվել են շինարարական նյութեր և ապրանքներ: Մատակարարված նյութերը և ապրանքները ձեռք են բերվել Երևանի տարբեր շինանյութի շուկաներից և մասնավոր անձանցից: Ընկերությունը գլխավոր հավապահ չի ունեցել և դրա գործառույթներն իրականացրել և ‎ֆինանսական բոլոր հարցերով զբաղվել է տնօրեն Սամվել Մարկոսյանը: Ինքը որպես ՙՍագլ՚ ՍՊ ընկերության աշխատակից ստացել է 70-100 հազար դրամ ամսական աշխատավարձ:
Վկա, Արաբկիրի հարկային տեսչության վերահսկողության բաժնի գլխավոր հարկային տեսուչ Աշոտ Եգանյանի ցուցմունքով այն մասին, որ ՀՀ ԿԱ պետական եկամուտների կոմիտեի նախագահի 11.09.2008թ. թիվ 1000742 հանձնարարագրի հիման վրա Արաբկիրի հարկային տեսչությունում հաշվառված ՙՍագլ՚ ՍՊ ընկերությունում կատարել են բյուջեի հետ փոխհարաբերությունների ու հարկային մարմնի կողմից վերահսկվող օրենսդրության առանձին պահանջների կատարման ճշտության ստուգում: Ստուգման արդյունքներով 12.12.2008թ. կազմված թիվ 1000742 ակտով արձանագրված խախտումների համար ՙՍագլ՚ ՍՊ ընկերությանն առաջադրվել են 796.741.500 դրամի լրացուցիչ գանձման ենթակա հարկային պարտավորություններ, որից ԱԱՀ-ի գծով 730.166.300 դրամ /հարկ- 342.114.200, տույժեր-137.881.200 և տուգանքներ- 250.171.000/, շահութահարկի գծով` 66.575.200 դրամ /հարկ-33.268.500, տույժեր-13.345.600 և տուգանքներ-19.961.100/:
Վկա, ՙՄետրոպոլիտենի ՆՄ՚ ՓԲ ընկերության տնօրեն Պավել Սարգսյանի ցուցմունքով այն մասին, որ 2007-2008թթ. ընթացքում ՙՍագլ՚ ՍՊ ընկերությունը ՙՄետրոպոլիտենի ՆՄ՚ ՓԲ ընկերությանը մատակարարել է տարաբնույթ ապրանքներ: ՙՍագլ՚ ՍՊ ընկերության տնօրեն է հանդիսացել Սամվել Մարկոսյանը, ում հետ 2007թ. նոյեմբեր ամսին կնքել է մատակարարման պայմանագիր: Մատակարարման հետ կապված բոլոր հարցերով պայմանավորվել է տնօրեն Սամվել Մարկոսյանի, ինչպես նաև փոխտնօրեն Լուսինե Մարկոսյանի հետ: Ապրանքները մատակարարել է ՙՍագլ՚ ՍՊ ընկերության աշխատակից Արամը` տարբեր բեռնատար ավտոմեքենաներով, որին ներկա են գտնվել նաև Սամվել կամ Լուսինե Մարկոսյանները: ՙՍագլ՚ ՍՊ ընկերության կողմից մատակարարված ապրանքների դիմաց վճարումները կատարել են բանկային փոխանցումներով, գումարները փոխանցվել են հաշիվ-ապրանքագրում նշված ՙՍագլ՚ ՍՊ ընկերության բանկային հաշվեհամարին:
Վկա, ՙԷներգոկոմպլեքս՚ ՍՊ ընկերության մատակարարման բաժնի պետ Հրաչյա Ղազարյանի ցուցմունքով այն մասին, որ 2005թ.վերջերին-2006թ. սկզբներին ՙՍագլ՚ ՍՊ ընկերությունը ՙԷներգոկոմպլեքս՚ ՍՊ ընկերությանը մատակարարել է շուրջ 200 միլիոն դրամ գումարի մետաղի խառը ջարդոն: Մետաղի ջարդոնի քանակի և գնի վերաբերյալ համաձայնությունը ձեռք է բերել ՙՍագլ՚ ՍՊ ընկերության փոխտնօրեն Լուսինե Մարկոսյանի հետ, ով կազմակերպել է մատակարարումները: Մետաղի խառը ջարդոնը ընկերություն է բերվել ՙԿամազ՚ և ՙԿռազ՚ մակնիշի ինքնաթափ բեռնատար ավտոմեքենաներով, հիմնականում Լեռնային Ղարաբաղի Հանրապետության պետ. համարանիշերով ՙՍագլ՚ ՍՊ ընկերության աշխատակցի կողմից, ում անունը Արմեն կամ Արամ էր: 2-3 անգամ մատակարարումներին մասնակցել է նաև փոխտնօրեն Լուսինե Մարկոսյանը: ՙՍագլ՚ ՍՊ ընկերության տնօրեն Սամվել Մարկոսյանին չի ճանաչում, Լուսինեից իմացել է, որ վերջինս նրա հայրն է: ՙՍագլ՚ ՍՊ ընկերության մատակարարած մետաղի ջարդոնի դիմաց վճարումները կատարել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙԱրագածոտն՚ ՓԲ ընկերության տնօրեն և ՙՍիվա՚ ՓԲ ընկերության հիմնադիր Լևիկ Ղուկասյանի ցուցմունքով այն մասին, որ 2007թ. հոկտեմբեր ամսվա ընթացքում ՙՍագլ՚ ՍՊ ընկերությունը ՙԱրագածոտն՚ և ՙՍիվա՚ ՓԲ ընկերություններին մատակարարել է մոտ 16 միլիոն դրամ գումարի չհանգած կիր, որի քանակների և գնի վերաբերյալ համաձայնությունը ձեռք է բերել ՙՍագլ՚ ՍՊ ընկերության տնօրեն Սամվելի հետ, ով կազմակերպել է մատակարարումները: Չհանգած կիրը Սամվելին պատվիրել է հեռախոսով և նա այն ընկերությունների տարածք է ուղարկվել ցիստերն տիպի բեռնատար ավտոմեքենայով: Կիրը բեռնաթափելուց հետո վարորդը ներկայացրել է հաշիվ-ապրանքագիրը երկու օրինակից ու դրանք հաստատելուց հետո, մեկ օրինակը վերադարձրել է վերջինիս: ՙԱրագածոտն՚ և ՙՍիվա՚ ՓԲ ընկերություններին մատակարարված չհանգած կիրի դիմաց վճարումները կատարել են բանկային փոխանցումներով:
Վկա, ՙՋենովա՚ ՍՊ ընկերության տնօրեն Գագիկ Մկրտչյանի նախաքննության ընթացքում տված ցուցմունքով այն մասին, որ 2007թ. սեպտեմբեր ամսին Երևանի Գնունու փողոցի վրա գտնվող շինանյութի շուկայում ծանոթացել է Սամվել Մարկոսյանի հետ, ով ներկայանալով որպես ՙՍագլ՚ ՍՊ ընկերության տնօրեն, առաջարկել է նորմալ գներով մատակարարել անհրաժեշտ շինարարական նյութեր և ապրանքներ: Ապրանքների քանակի, գնի ու որակի վերաբերյալ փոխադարձ համաձայնությունից հետո կնքել են պայմանագիր: 2007-2008թթ. ընթացքում Սամվել Մարկոսյանն իր աշխատակից Արամի հետ ՙՍագլ՚ ՍՊ ընկերության հաշիվ-ապրանքագրերով ՙՋենովա՚ ՍՊ ընկերությանը կատարել է շուրջ 21 միլիոն դրամ գումարի շինարարական նյութերի 2 մատակարարում: Մատակարարված շինարարական նյութերի և ապրանքների դիմաց վճարումները կատարել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Դատաքննության ժամանակ Գագիկ Մկրտչյանը հայտնել է, որ ՙՍագլ՚ ՍՊ ընկերությունը և ապրանքներ է մատակարարել և շինարարական աշխատանքներ է կատարել: ՙՋենովա՚ ՍՊԸ-ի հետ կնքված պայմանագրի համաձայն ՙՍագլ՚ ՍՊԸ-ն կատարել է 7 միլիոն դրամի ճանապարհի ասֆալտապատման աշխատանքներ:
Վկա, ՙՀայաստանի էլեկտրական ցանցեր՚ ՓԲ ընկերության թիվ 1 գլխավոր պահեստի պահեստապետ Միքայել Հովսեփյանի ցուցմունքով այն մասին, որ 2007թ. ընթացքում ՙՍագլ՚ ՍՊ ընկերության հաշիվ-ապրանքագրերով ՙՀայաստանի էլեկտրական ցանցեր՚ ՓԲ ընկերությանը էլեկտրական ապրանքներ և սարքավորումներ են մատակարարել այդ ընկերության տնօրեն Սամվել Մարկոսյանը կամ փոխտնօրեն Լուսինե Մարկոսյանը, ինչպես նաև աշխատակից Արամը: Մատակարարումները կատարել են բեռնատար և այլ ավտոմեքենաներով: Ապրանքները և սարքավորումները ընդունել է ինքը և, պահեստում գրանցելուց հետո ներկայացրած հաշիվ-ապրանքագրերը փոխանցել է մատակարարման բաժնի պետ Հակոբ Զիրգիլյանին:
Վկա, ՙՀոյակերտ-շին՚ ՍՊ ընկերության տնօրեն Ալեքսանդր Կոստանդյանի ցուցմունքով այն մասին, որ 2007թ. սեպտեմբեր ամսին իր ծանոթ Աիդա Մարկոսյանի միջոցով ծանոթացել է ՙՍագլ՚ ՍՊ ընկերության աշխատակից Լուսինե Մարկոսյանի հետ, ով առաջարկել է մատչելի գներով մատակարարել ընկերության գործունեության համար անհրաժեշտ շինարարական նյութեր և ապրանքներ: Ապրանքների քանակի, գնի ու որակի վերաբերյալ փոխադարձ համաձայնությունից հետո կնքել են պայմանագիր և 2007թ.հոկտեմբեր-2008թ. մարտ ամիսների ընթացքում Լուսինե Մարկոսյանը ՙՍագլ՚ ՍՊ ընկերության աշխատակից Արամի հետ ընկերության հաշիվ-ապրանքագրերով ՙՀոյակերտ-շին՚ ՍՊ ընկերությանը կատարել է շուրջ 22 միլիոն դրամ գումարի շինարարական նյութերի 30 մատակարարում: Ապրանքները պատվիրել է Լուսինե Մարկոսյանին հեռախոսով, վերջինիս բջջային 091017019 հեռախոսահամարով: Ապրանքները բերել են նրանց մեքենաներով: ՙՍագլ՚ ՍՊ ընկերության տնօրեն Սամվել Մարկոսյանին չի ճանաչում և Լուսինեից իմացել է, որ վերջինս նրա հայրն է: Մատակարարված շինարարական նյութերի և ապրանքների դիմաց վճարումները կատարել են բանկային փոխանցումներով: Գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙԷկթրաք սերվիս՚ ՍՊ ընկերության փոխտնօրեն Գուրգեն Խաչատրյանի ցուցմունքով այն մասին, որ 2008թ. մարտի վերջերին իրենց գրասենյակ գնացած ՙՍագլ՚ ՍՊ ընկերության տնօրեն Սամվել Մարկոսյանն առաջարկել է մատչելի գներով մատակարարել էլեկտրական ապրանքներ և սարքավորումներ: Ապրանքների գնի և որակի վերաբերյալ համաձայնություն ձեռք բերելուց հետո Սամվել Մարկոսյանի հետ կնքվել է մատակարարման պայմանագիր: Մատակարարումներով զբաղվել է ՙՍագլ՚ ՍՊ ընկերության փոխտնօրեն Լուսինե Մարկոսյանը, ով Սամվել Մարկոսյանի դուստրն է: Ընկերության աշխատակից Արամը ընկերության հաշվապահական փաստաթղթերով մատակարարել է էլեկտրական ապրանքներ` տարբեր բեռնատար և գազել մակնիշի ավտոմեքենաներով: Մատակարարված ապրանքների դիմաց մոտ 150 միլիոն դրամ վճարումը կատարվել է բանկային փոխանցման կարգով: Գումարները վճարել են հաշիվ-ապրանքագրերում նշված բանկային հաշվեհամարին£
Վկա, ՙԳավիթ ԴԱՎ՚ ՍՊ ընկերության տնօրեն Աշոտ Ենոքյանի նախաքննության ընթացքում տված ցուցմունքով այն մասին, որ 2007թ. հոկտեմբեր-դեկտեմբեր ամիսների ընթացքում ՙՍագլ՚ ՍՊ ընկերությունը ՙԳավիթ ԴԱՎ՚ ՍՊ ընկերությանը մատակարարել է շինարարական նյութեր և ապրանքներ: Մատակարարումների վերաբերյալ պայմանավորվածությունները ձեռք են բերվել ՙՍագլ՚ ՍՊ ընկերության փոխտնօրեն Լուսինե Մարկոսյանի հետ: Նյութերն ու ապրանքները բերվել են տարբեր բեռնատար ավտոմեքենաներով ընկերության աշխատակից Արամի կողմից: ՙՍագլ՚ ՍՊ ընկերությունից ձեռք են բերել մոտ 15 միլիոն դրամի նյութեր և ապրանքներ, որի դիմաց վճարումները կատարել են բանկային փոխանցման կարգով: ՙՍագլ՚ ՍՊ ընկերության տնօրենին չի ճանաչում և Լուսինե Մարկոսյանից իմացել է, որ վերջինս նրա հայրն է:
Վկա, ՙՉարդախլու՚ ՍՊ ընկերության տնօրեն Վիկտոր Մարտիրոսյանի նախաքննության ընթացքում տված ցուցմունքով այն մասին, որ 2007թ. հոկտեմբեր ամսին Երևանի Գնունու փողոցի վրա գտնվող շինանյութի շուկայում ծանոթացել է ՙՍագլ՚ ՍՊ ընկերության տնօրեն Սամվել Մարկոսյանին, ով առաջարկել է մատչելի գներով մատակարարել իր ընկերության գործունեության համար անհրաժեշտ էլեկտրական նյութեր և ապրանքներ: Ապրանքների քանակի, գնի ու որակի վերաբերյալ փոխադարձ համաձայնությունից հետո կնքել են պայմանագիր: Մատակարարումներով զբաղվել է ՙՍագլ՚ ՍՊ ընկերության փոխտնօրեն Լուսինե Մարկոսյանը: Ապրանքները տարբեր բեռնատար ավտոմեքենաներով բերել է ընկերության աշխատակից Արամը: 2007թ. դեկտեմբեր ամսվա ընթացքում ՙՍագլ՚ ՍՊ ընկերության հաշիվ-ապրանքագրերով ՙՉարդախլու՚ ՍՊ ընկերությանը կատարվել է էլեկտրական նյութերի և ապրանքների 7 մատակարարում, ընդհանուրը 30 միլիոն դրամի: Մատակարարված նյութերի և ապրանքների դիմաց վճարումները կատարել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙԼիգա շին՚ ՍՊ ընկերության տնօրեն Սարգիս Հովսեփյանի նախաքննության ընթացքում տված ցուցմունքով այն մասին, որ 2008թ. մայիս-նոյեմբեր ամիսների ընթացքում ՙՍագլ՚ ՍՊ ընկերությունը ՙԼիգա շին՚ ՍՊ ընկերությանը մատակարարել է 15 միլիոն դրամի շինարարական նյութեր և ապրանքներ: ՙՍագլ՚ ՍՊ ընկերության տնօրենն է հանդիսացել Սամվել Մարկոսյանը, ում հետ ձեռք են բերվել մատակարարումների վերաբերյալ բոլոր պայմանավորվածությունները: Ապրանքները պատվիրել է փոխտնօրեն Լուսինե Մարկոսյանին` հեռախոսով, իսկ մատակարարումները կատարել է ՙՍագլ՚ ՍՊ ընկերության աշխատակից Արամը` տարբեր բեռնատար ավտոմեքենաներով: ՙՍագլ՚ ՍՊ ընկերության կողմից մատակարարված ապրանքների դիմաց վճարումները կատարել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙՄետտա-Գրուպ՚ ՍՊ ընկերության գլխավոր տնօրեն Լև Խաչատուրյանի նախաքննության ընթացքում տված ցուցմունքով այն մասին, որ 2008թ. մարտ-օգոստոս ամիսների ընթացքում ՙՄետտա-Գրուպ՚ ՍՊ ընկերությունը արտադրության համար անհրաժեշտ նյութեր և ապրանքներ է ձեռք բերել ՙՍագլ՚ ՍՊ ընկերությունից, որի տնօրենն է հանդիսացել Սամվել Մարկոսյանը: Մատակարարման հետ կապված բոլոր պայմանավորվածությունները ձեռք է բերել վերջինիս հետ: Ճանաչում է նաև փոխտնօրեն Լուսինե Մարկոսյանին, ով անմիջական զբաղվում էր մատակարարումներով և նրան է պատվիրել անհրաժեշտ ապրանքները: Պատվիրված ապրանքները մատակարարել է ՙՍագլ՚ ՍՊ ընկերության աշխատակից Արամը` տարբեր ՙԿամազ՚ և ՙԶիլ՚ մակնիշի բեռնատար ավտոմեքենաներով: ՙՍագլ՚ ՍՊ ընկերության կողմից մատակարարված ապրանքների դիմաց վճարումները կատարվել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙԳեղամաշին՚ ՍՊ ընկերության տնօրեն Անդրանիկ Կնյազյանի ցուցմունքով այն մասին, որ 2007թ. ընթացքում ՙԳեղամաշին՚ ՍՊ ընկերությանը ՙՍագլ՚ ՍՊ ընկերությունից ձեռք է բերել գործածված տրանսֆորմատորային ենթակայան և տարբեր տրամաչափի օգտագործված խողովակներ: Մատակարարումների վերաբերյալ պայմանավորվածությունները ձեռք է բերել ՙՍագլ՚ ՍՊ ընկերության փոխտնօրեն Լուսինե Մարկոսյանի հետ հեռախոսով: Նշված ապրանքները բերվել են բեռնատար ՙԶիլ՚ մակնիշի ավտոմեքենայով Լուսինե Մարկոսյանի աշխատակցի կողմից: Մատակարարված ապրանքների արժեքը կազմում է մոտավորապես 3 միլիոն դրամ: ՙՍագլ՚ ՍՊ ընկերությունից ձեռք բերված տրանսֆորմատորային ենթակայանի և տարբեր տրամաչափի խողովակների դիմաց վճարումները կատարել են բանկային փոխանցման կարգով, գումարները փոխանցել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙՀանքավան՚ ՀՋԳ ԲԲ ընկերության տնօրեն Լևոն Հակոբյանի ցուցմունքով այն մասին, որ 2007թ. մայիսի վերջերին իր ընկերներից մեկը խորհուրդ է տվել շինարարական աշխատանքները կատարելու համար անհրաժեշտ նյութերը և ապրանքները ձեռք բերել ՙՍագլ՚ ՍՊ ընկերությունից, տալով հեռախոսահամար: Զանգահարել և խոսել է նշված ընկերության մատակարարման հարցերով փոխտնօրեն Լուսինե Մարկոսյանի հետ: Վերջինիս հետ շինարարական նյութերի և ապրանքների քանակի, գնի ու որակի վերաբերյալ փոխադարձ համաձայնությունից հետո կնքել են պայմանագիր: 2007-2008թթ. ընթացքում Լուսինե Մարկոսյանն ընկերության աշխատակից Արամի հետ ՙՍագլ՚ ՍՊԸ-ի հաշիվ-ապրանքագրերով ՙՀանքավան՚ ՀՋԳ ԲԲ ընկերությանը կատարել է շինարարական նյութերի և ապրանքների շուրջ 60 մատակարարում: Ապրանքները պատվիրել է Լուսինե Մարկոսյանին` հեռախոսով, վերջինիս բջջային 091017019 հեռախոսահամարով, կամ` նրան հանդիպելով: ՙՍագլ՚ ՍՊ ընկերության տնօրեն Սամվել Մարկոսյանին հանդիպել է միայն մեկ անգամ: Մատակարարված շինարարական նյութերի և ապրանքների դիմաց վճարումները կատարվել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Վկա, ՙՀովնար՚ ՍՊ ընկերության տնօրեն Նորայր Հակոբյանի ցուցմունքով այն մասին, որ 2007թ. դեկտեմբեր-2008թ. փետրվար ամիսների ընթացքում ՙՀովնար՚ ՍՊ ընկերությունը ՙՍագլ՚ ՍՊ ընկերությունից ձեռք է բերել շին-վերանորոգման աշխատանքներ կատարելու համար շուրջ 15 միլիոն դրամի նյութեր և ապրանքներ: ՙՍագլ՚ ՍՊ ընկերության տնօրեն Սամվել Մարկոսյանի հետ ծանոթացել է Երևանի Գնունու փողոցի վրա գտնվող շինանյութի շուկայում: Նա էժան գներով մատակարարել ապրանքներ է առաջարկել և ձեռք է բերվել պայմանավորվածություն: Մատակարարումներով զբաղվել են ՙՍագլ՚ ՍՊ ընկերության փոխտնօրեն Լուսինե Մարկոսյանը և աշխատակից Արամ Գևորգյանը: Վերջինս անձամբ է կատարել մատակարարումները տարբեր բեռնատար ավտոմեքենաներով: Մատակարարված նյութերի և ապրանքների դիմաց վճարումները կատարել են բանկային փոխանցումներով, գումարները փոխանցվել են հաշիվ-ապրանքագրերում նշված ՙՍագլ՚ ՍՊ ընկերության բանկային հաշվեհամարին:
Ամբաստանյալի կատարած հանցանքը հիմնավորվել է նաև քրեական գործով ձեռք բերված հետևյալ ապացույցներով.
Դատա-հաշվապահական փորձաքննության թիվ 08-1771 եզրակացությամբ համաձայն որի, ՙՍագլ՚ ՍՊ ընկերության 2006-2008թթ. գործունեության ընթացքում տնօրեն Սամվել Մարկոսյանը, խախտելով ՙՇահութահարկի մասին՚ ՀՀ օրենքի 46-րդ հոդվածի 1-ին կետի, ինչպես նաև ՙԱվելացված արժեքի հարկի մասին՚ ՀՀ օրենքի 9-րդ հոդվածի և 23-րդ հոդվածի 1-ին կետի պահանջները, ՙՍագլ՚ ՍՊ ընկերության իրականացրած գործունեության վերաբերյալ Արաբկիրի հարկային տեսչություն ներկայացրած 2006թ. շահութահարկի, 2006թ. 1-ին, 2007թ. 1-ին, 2-րդ, 3-րդ և 4-րդ եռամսյակների, ինչպես նաև 2008թ. հունվար, փետրվար, մարտ, ապրիլ, մայիս և հունիս ամիսների ԱԱՀ-ի հաշվարկներում ակնհայտ խեղաթյուրված տվյալներ է մտցրել և այդ եղանակով չարամտորեն խուսափել է պետբյուջե վճարել ընդամենը 371.702.700 դրամ ԱԱՀ-ի և շահութահարկի գումարները /ԱԱՀ-338.434.200 դրամ, շահութահարկ-33.268.500 դրամ/, որոնց վրա հաշվարկվել են 425.724.600 դրամի չափով տույժեր և տուգանքներ:
Թիվ 1000742 ստուգման ակտով, ապացույց ճանաչված` ՙՍագլ՚ ընկերության գործունեության վերաբերյալ հարկման հիմք հանդիսացող շահութահարկի տարեկան և ԱԱՀ-ի եռամսյակային ու ամսեկան հաշվարկներով, ինչպես նաև առգրավման արձանագրություններով և կից փաստաթղթերով:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Սամվել Մարկոսի Մարկոսյանին առաջադրված մեղադրանքը ՀՀ քրեական օրենսգրքի 205 հոդվածի 2-րդ մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 205 հոդվածի 2-րդ մասի հատկանիշներին և արարքի որակումը ճիշտ է:
Դատարանը նկատի ունենալով, որ ամբաստանյալ Մարկոսյանն արարքը կատարել է 2006-2008թթ. ընթացքում, գտնում է, որ նրա նկատմամբ պատիժ պետք է նշանակել ՀՀ քրեական օրենսգրքի 2006թ. հուլիսի 12-ի խմբագրությամբ 205 հոդվածի 2-րդ մասի սանկցիային համապատասխան:
Որպես ամբաստանյալի անձը բնութագրող, պատասխանատվությունը և պատիժը մեղմացնող հանգամանքներ դատարանը հաշվի է առնում այն, որ նա հանցանքն ընդունել և զղջում է կատարածի համար, երկրորդ խմբի հաշմանդամ է:
Ամբաստանյալի պատասխանատվությունը և պատիժը ծանրացնող հանգամանքներ չկան:
Կատարած արարքի համար ամբաստանյալ Սամվել Մարկոսյանը ենթակա է քրեական պատասխանատվության և պատժի:
Դատարանը, հաշվի առնելով Սամվել Մարկոսյանի կատարած արարքի հանրության համար վտանգավորության աստիճանը և բնույթը, նրա անձը, պատասխանատվությունը և պատիժը մեղմացնող հանգամանքները, պատասխանատվությունն ու պատիժը ծանրացնող հանգամանքների բացակայությունը, գտնում է, որ պատժի նպատակներին հասնելու համար նրա նկատմամբ պատիժ պետք է նշանակել ազատազրկման ձևով, որը նա պետք է կրի:
Դատարանը քննության առնելով ամբաստանյալի նկատմամբ լրացուցիչ պատիժ կիրառելու հարցը, գտնում է, որ պետք է կիրառել ՀՀ քրեական օրենսգրքի 205 հոդվածի 2-րդ մասի սանկցիայով նախատեսված լրացուցիչ պատիժը` գույքի բռնագրավումը:
Դատարանը քննության առնելով ՀՀ գլխավոր դատախազության քաղաքացիական հայցը` ամբաստանյալ Սամվել Մարկոսյանից հօգուտ պետական բյուջեի 371.702.700 դրամ բռնագանձելու վերաբերյալ, նկատի ունենալով, որ Սամվել Մարկոսյանի գործողությունների հետևանքով վնաս է պատճառվել պետության գույքային շահերին, գտնում է, որ ՀՀ գլխավոր դատախազության քաղաքացիական հայցը հիմնավոր է և ենթակա բավարարման ամբողջությամբ:
Դատարանը գտնում է, որ գործով ապացույց ճանաչված ՙՍագլ՚ ՍՊԸ-ի կողմից հարկային տեսչություն ներկայացված 2006թ. շահութահարկի, 2006թ. 1-ին, 2007թ. 1-ին, 2-րդ, 3-րդ և 4-րդ եռամսյակներ, ինչպես նաև 2008թ. հունվար, փետրվար, մարտ, ապրիլ, մայիս և հունիս ամիսների ԱԱՀ-ի հաշվարկների քսերոպատճենները պետք է պահել քրեական գործում:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը
Վ Ճ Ռ Ե Ց

Սամվել Մարկոսի Մարկոսյանին մեղավոր ճանաչել ՀՀ քրեական օրենսգրքի 205 հոդվածի 2-րդ մասով /2006թ. հուլիսի 12-ի խմբագրությամբ/ և նրան դատապարտել ազատազրկման հինգ /5/ տարի վեց /6/ ամիս ժամկետով` գույքի բռնագրավումով:
Պատժի սկիզբը հաշվել դատավճռի կատարման օրվանից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Սամվել Մարկոսյանի նկատմամբ ընտրված խափանման միջոցը` ստորագրություն չհեռանալու մասին, թողնել անփոփոխ, մինչև դատավճռի օրինական ուժի մեջ մտնելը:
Սամվել Մարկոսի Մարկոսյանից հօգուտ պետական բյուջեի բռնագանձել երեք հարյուր յոթանասուն մեկ միլիոն յոթ հարյուր երկու հազար յոթ հարյուր (371.702.700) ՀՀ դրամ, որպես հանցագործությամբ պատճառված վնասի հատուցում:
ՙՍագլ՚ ՍՊԸ (ՀՎՀՀ 00092147) պատկանող գույքի վրա դրված կալանքը թողնել անփոփոխ:
Սամվել Մարկոսի Մարկոսյանին պատկանող գույքի վրա դրված կալանքը թողնել անփոփոխ:
Ապացույց ճանաչված` ՙՍագլ՚ ՍՊԸ-ի կողմից հարկային տեսչություն ներկայացված 2006թ. շահութահարկի, 2006թ. 1-ին, 2007թ. 1-ին, 2-րդ, 3-րդ և 4-րդ եռամսյակներ, ինչպես նաև 2008թ. հունվար, փետրվար, մարտ, ապրիլ, մայիս և հունիս ամիսների ԱԱՀ-ի հաշվարկների քսերոպատճենները պահել քրեական գործում:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ