գործ No ԵԱՔԴ 0092/01/09
Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
դատախազ` Ն.Աշրաֆյանի
ամբաստանյալ` Հ.Ղազարյանի
տուժողի ներկայացուցիչ` Հ.Գրիգորյանի

2009թ. հուլիսի 27-ին, Երևան քաղաքում, դռնբաց դատական նիստում քննության առնելով քրեական գործն ըստ մեղադրանքի Հրաչիկ Գրիշայի Ղազարյանի, ծնված 12.05.1964թ., Հրազդան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին մեկ անձ, նախկինում չդատված, չի աշխատել, հաշվառված և բնակվել է Հրազդան քաղաքի Վանատուր թաղամասի թիվ 243 տանը:
Մեղադրվում է ՀՀ քրեական օրենսգրքի 177 հոդվածի 2-րդ մասի 3-րդ կետով:
Պ Ա Ր Զ Ե Ց
1.Գործի դատավարական նախապատմությունը.
08.05.2009թ. ՀՀ ոստիկանության ՔԳՎ Երևանի քննչական վարչության Արաբկիրի քննչական բաժնի կողմից ՀՀ քրեական օրենսգրքի 177 հոդվածի 2-րդ մասի 3-րդ կետի հատկանիշներով հարուցվել է թիվ 14113909 քրեական գործը:
11.05.2009թ. Հրաչիկ Գրիշայի Ղազարյանի նկատմամբ որպես խափանման միջոց է ընտրվել կալանավորումը:
2.Գործի փաստական հանգամանքները.
11.05.2009թ. Հրաչիկ Գրիշայի Ղազարյանը որպես մեղադրյալ է ներգրավվել և նրան մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 3-րդ կետով:
30.06.2009թ. առաջադրված մեղադրանքը փոփոխվել և Հրաչիկ Ղազարյանին նոր մեղադրանք է առաջադրվել ՀՀ քրեական օրենսգրքի 177 հոդվածի 2-րդ մասի 3-րդ կետով հետևյալ արարքի համար.
Ամբաստանյալ Հրաչիկ Ղազարյանը 2009թ. ապրիլ ամսին Հրազդան քաղաքից եկել է Երևան` աշխատանք փնտրելու նպատակով: ազատության պողոտայով անցնելիս նկատել է ՙԼամբադա՚ կամրջի նկուղային հատվածի դուռը, ենթադրել է, որ ներսում հնարավոր է արժեքավոր իրեր լինեն, բացել է մուտքի դուռը և մտել ներս: Զննելով տարածքը տեսել է, որ տարածքով անցնում են հաղորդալարեր, մտադրվել է դրանք գողանալ: Սակայն չունենալով հաղորդալարը կտրելու գործիք, այդ օրը գաղտնի հափշտակել է գետնին թափված 70 կիլոգրամ արճիճը:
Մի քանի օր անց, դարձյալ գողություն կատարելու նպատակով, Հրաչիկ Ղազարյանը տանից վերցրել է ձեռքի սղոցը, եկել նույն նկուղ, որտեղից այս անգամ կտրել և գաղտնի հափշտակել է 15 մետր երկարությամբ չգործող հաղորդալար: Այնուհետև սղոցը թաքցրել է նկուղում` դարձյալ գողություն կատարելու իր մտադրությունը հետագայում իրագործելու համար:
2009թ. մայիսի 8-ին ժամը 1600-ի սահմաններում, Հրազդան քաղաքից գալով Երևան քաղաք, գաղտնի հափշտակություն կատարելու դիտավորությամբ, ապօրինի մուտք է գործել Երևան քաղաքի Ազատության և Դավիթ Անհաղթի խաչմերուկի պողոտաների խաչմերուկին գտնվող կամրջի ՙԱրմենՏել՚ ՓԲԸ-ին պատկանող նկուղ, որտեղ գտնվող հորատանցքից նախապես իր հետ վերցրած ձեռքի սղոցով կտրել և գաղտնի հափշտակել է ՙԱրմենՏել՚ ՓԲԸ-ին պատկանող միջքաղաքային հեռախոսացանցի մոտ 30,5 մետր երկարության հաղորդալարը: Այն տեղափոխել է կամրջի հարևանությամբ գտնվող ծառերի մոտ, որտեղ հաղորդալարի մեջից հանել է պղնձե մալուխներ և դրանք ռետինե երեսվածքից անջատելու համար այրել: Այդ ընքացում բռնվել է ոստիկանության Արաբկիրի բաժնի աշխատակիցների կողմից:
30.06.2009թ. նախաքննության մարմնի կողմից որոշում է կայացվել թիվ 14113909 քրեական գործով Հրաչիկ Ղազարյանի կողմից ՙԼամբադա՚ կամրջի նկուղից 70 կիլոգրամ արճիճ և 15 մետր երկարությամբ հաղորդալար գողանալու մասը կարճելու մասին` ապացույցների անբավարարության պատճառաբանությամբ:
10.07.2009թ. թիվ 14113909 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարան:
Քրեական գործը նշանակվել է դատաքննության 2009թ. հուլիսի 27-ին:
3.Ապացույցների հետազոտում.
Առաջադրված մեղադրանքում ամբաստանյալ Հրաչիկ Ղազարյանն իրեն լիովին մեղավոր է ճանաչել և ցուցմունք տվել այն մասին, որ մոր` Օֆիկ Հարությունյանի հետ բնակվում է Հրազդան քաղաքի Վանատուր թաղամասի 243 տանը: Ինքը մշտական աշխատանք չունի և կատարում է բանվորական աշխատանքներ: 2009թ. ապրիլ ամսվա ընթացքում, կոնկրետ օրը չի հիշում, աշխատանք փնտրելու նպատակով եկել է Երևան: Ազատության պողոտայի վրա գտնվող կամրջի մոտով անցնելիս, նկատել է նկուղային հատվածի դուռը: Ենթադրելով, որ ներսում հնարավոր է արժեքավոր իրեր լինեն, բացելով մուտքի դուռը, ներս է մտել: Զննելով տարածքը և նկատելով, որ նկուղի տարածքով անցնում են հաղորդալարեր, մտադրվել է դրանք գողանալ: Հաղորդալարերը կտրելու գործիք չունենալու պատճառով գողացել է գետնին թափված 70 կիլոգրամ արճիճ: Մի քանի օր հետո տանից վերցրել է ձեռքի սղոց և եկել նույն նկուղ, որտեղից կտրել և հափշտակել է 15 մետր երկարությամբ չգործող հաղորդալար: Սղոցը թաքցրել է նկուղում, իսկ հաղորդալարը հանձնել Երևանի ՙՍարի Թաղ՚ կոչվող թաղամասում գործող գունավոր մետաղների ընդունման կետերից մեկում: 2009թ. մայիսի 8-ին, առավոտյան նույն նկուղից հաղորդալար գողանալու դիտավորությամբ, տանից վերցրել է պարկ և եկել նկուղ: Նկուղում նախապես թաքցրած սղոցով կտրել է հաղորդալարերից մեկը` 30 մետր երկարությամբ, այն տեղափոխել կամրջի հարևանությամբ գտնվող ծառերի մոտ, որպեսզի իրեն չնկատեն, որտեղ էլ հաղորդալարը կտրել է փոքր մասերի, հանել երեսվածքը, իսկ մեջը եղած մալուխները ռետինե երեսվածքներից առանձնացնելու նպատակով այրել կրակի վրա: Չհասցնելով մալուխներն ամբողջությամբ այրել, իրեն են մոտեցել ոստիկանության աշխատակիցները և տարել ոստիկանության Արաբկիրի բաժին: Ինքը զղջում է կատարած արարքի համար:
Ամբաստանյալի կատարած հանցանքը, բացի նրա խոստովանությունից հիմնավորվել է նաև գործով ձեռք բերված հետևյալ ապացույցներով.
Տուժողի ներկայացուցիչ Հակոբ Գրիգորյանի ցուցմունքով այն մասին, որ աշխատում է ՙԱրմենտել՚ ՓԲ ընկերության իրավաբանական տնօրինության դատական և վարչական գործերով բաժնում, որպես ավագ իրավախորհրդատու: ՙԱրմենտել՚ ՓԲԸ-ի ղեկավարության կողմից լիազորված է մասնակցել գործին, որպես տուժողի ներկայացուցիչ: Կատարված հանցագործության մասին տեղեկացել է ՙԱրմենտել՚ ՓԲԸ-ի անվտանգության աշխատակիցներից, որոնք իրեն հայտնել են, որ 08.05.2009թ. միջքաղաքային հեռախոսացանցի կապն ընդհատվել է և համապատասխան տեխնիկական աշխատակիցները չափումների արդյունքում պարզել են, որ կտրվել է Ազատության պողոտայի վրա գտնվող կամրջի նկուղում գտնվող հաղորդալարերից մեկը և հափշտակվել: Հարակից տարածքը զննելու ժամանակ ՙԱրմենտել՚ ՓԲԸ-ն աշխատակիցը նկատել է մի քաղաքացու հեռախոսային մալուխներ այրելիս, որից հետո ահազանգել են ոստիկանություն: Նշել է, որ կատարված հանցագործությամբ ՙԱրմենտել՚ ՓԲԸ-ին պատճառվել է 54.900 ՀՀ դրամի գույքային վնաս:
Վկա Արմեն Ղարիբյանի ցուցմունքով այն մասին, որ 1997թ. աշխատում է ՙԱրմենտել՚ ՓԲԸ-ի տրանսմիսիայի շահագործման բաժնում, որպես ուղության ղեկավար: Իր պարտականությունների մեջ է մտնում Երևան քաղաքի օպտիկական և միջքաղաքային մայրուղային մալուխների սպասարկումը: ՙԱրմենտել՚ ՓԲԸ-ն Երևան քաղաքի տարբեր հատվածներում ունի կաբելային դիտահորեր և կաբելային նկուղներ, որոնցից մեկն էլ գտնվում է Ազատության պողոտայի վրա գտնվող կամրջի նկուղում: 08.05.2009թ. ժամը 1440-ին միջքաղաքային հեռախոսացանցից ահազանգ է ստացվել, որ կապերից մեկը խափանվել է: Համապատասխան չափումների արդյունքում պարզվել է, որ Ազատության և Դավիթ Անհաղթի պողոտաների խաչմերուկի կամրջի տակ գտնվող կաբելային նկուղում ՙԱրմենտել՚ ՓԲԸ-ին պատկանող միջքաղաքային հեռախոսալարից կտրվել է 30 մետր երկարությամբ հաղորդալար:
Հարակից տարածքը զննելուց հետո նկատել է, որ մի քաղաքացի կտրել է հաղորդալարը և այրում է այն: Ահազանգել է ՙԱրմենտել՚ ՓԲԸ-ն անվտանգության աշխատակիցներին, որոնք էլ ոստիկանության Արաբկիրի բաժնի աշխատակիցների հետ անմիջապես եկել են դեպքի վայր և այդ քաղաքացուն տարել ոստիկանության Արաբկիրի բաժին:
Դեպքի վայրի զննության վերաբերյալ կազմված արձանագրությամբ, որի ժամանակ հայտնաբերվել և առգրավվել են գողացված հաղորդալարի արճիճը և ռետինե համաձուլվածքով երեսվածքները, պղնձե մալուխները և հանցագործության գործիք սղոցը:
Ապրանքագիտական փորձաքննության 26.06.2009թ. թիվ 531 եզրակացությամբ այն մասին, որ գողացված հաղորդալարի մեկ գծամետրի շուկայական արժեքը 08.05.2009թ. դրությամբ կազմում է 1800 ՀՀ դրամ:
Առգրավված և իրեղեն ապացույց ճանաչված մալուխների և սղոցի առկայությամբ և դրանք զննելու արձանագրությամբ:
Հ.Ղազարյանին բերման ենթարկելու վերաբերյալ կազմված արձանագրությամբ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Հրաչիկ Գրիշայի Ղազարյանին առաջադրված մեղադրանքը` ՀՀ քրեական օրենսգրքի 177 հոդվածի 2-րդ մասի 3-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 177 հոդվածի 2-րդ մասի 3-րդ կետի հատկանիշներին և արարքի որակումը ճիշտ է:
Ամբաստանյալ Հրաչիկ Գրիշայի Ղազարյանի նկատմամբ պատիժ նշանակելիս դատարանը հաշվի է առնում կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում, որ նա հանցանքն ընդունել և զղջում է կատարած արարքի համար, նախկինում դատված չի եղել, խնամքին է գտնվում զառամյալ մայրը:
Ամբաստանյալի պատասխանատվությունը և պատիժը ծանրացնող հանգամանքներ չկան:
Անդրադառնալով գործով իրեղեն ապացույցների տնօրինման հարցին, դատարանը գտնում է, որ գործով իրեղեն ապացույց ճանաչված, դեպքի վայրից առգրավված հաղորդալարի թվով 44 հատ պատյանները, մալուխները և մեկ հատ ձեռքի սղոցը, որոնք գտնվում են Արաբկիրի քննչական բաժնի իրեղեն ապացույցների պահման սենյակում, պետք է ոչնչացնել:
Դատարանը քննության առնելով տուժողի ներկայացուցիչ Հակոբ Գրիգորյանի քաղաքացիական հայցը` 54.900 ՀՀ դրամ գումարի չափով, գտնում է, որ այն հիմնավոր է և ենթական բավարարման ամբողջությամբ:
Նկատի ունենալով, որ ամբաստանյալը հանցանքը կատարել է 2009թ. մայիս ամսին, դատարանը գտնում է, որ նրա նկատմամբ պետք է կիրառվի ՙՀամաներում հայտարարելու մասին՚ ՀՀ Ազգային ժողովի 2009թ. հունիսի 19-ի որոշման 1-ին կետի 1) ենթակետը, համաձայն որի պատժից պետք է ազատել առավելագույնը երեք տարի ժամկետով ազատությունից զրկելու հետ կապված պատիժների դատապարտված անձանց:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց
Հրաչիկ Գրիշայի Ղազարյանին մեղավոր ճանաչել ՀՀ քրեական օրենսգրքի 177 հոդվածի 2-րդ մասի 3-րդ կետով և նրան դատապարտել ազատազրկման երեք (3) տարի ժամկետով:
Կիրառել ՙՀամաներում հայտարարելու մասին՚ ՀՀ Ազգային ժողովի 2009թ. հունիսի 19-ի որոշման 1-ին կետի 1) ենթակետը և Հրաչիկ Գրիշայի Ղազարյանին ազատել պատժի կրումից:
Հրաչիկ Գրիշայի Ղազարյանի նկատմամբ ընտրված խափանման միջոցը` կալանավորումը, փոփոխել և նրա նկատմամբ որպես խափանման միջոց ընտրել` ստորագրություն չհեռանալու մասին, մինչև դատավճռի օրինական ուժի մեջ մտնելը:
Հրաչիկ Գրիշայի Ղազարյանին անհապաղ ազատել կալանքից դատական նիստի դահլիճում:
Հրաչիկ Գրիշայի Ղազարյանից հօգուտ տուժող ՙԱրմենտել՚ ՓԲԸ-ի բռնագանձել 54.900 (հիսունչորս հազար ինը հարյուր) ՀՀ դրամ գումար, որպես հանցագործության հետևանքով պատճառված վնասի փոխհատուցում:
Իրեղեն ապացույց ճանաչված հաղորդալարի թվով 44 հատ պատյանները, մալուխները և մեկ հատ ձեռքի սղոցը ոչնչացնել:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` Լ.ԱՎԵՏԻՍՅԱՆ