գործ N ԵԱՔԴ 0090/01/09

Ո Ր Ո Շ ՈՒ Մ
Քրեական գործի վարույթը կարճելու մասին

Երևան քաղաքի Արաբկիր և Քանաքեռ-Զեյթուն վարչական շրջանների
ընդհանուր իրավասության առաջին ատյանի դատարանը`

նախագահությամբ դատավոր` Լ. Ավետիսյանի
քարտուղարությամբ` Ն. Ղազարյանի
մասնակցությամբ`
մեղադրող` Ս. Բադալյանի
ամբաստանյալ` Է. Ֆարմանյանի
ամբաստանյալի օրինականի ներկայացուցիչ` Գ. Ֆարմանյանի
պաշտպան` Մ. Թովմասյանի
տուժող` Գ. Եսայանի
տուժողի օրինական ներկայացուցիչ` Ռ. Բադալյանի

2010թ. ապրիլի 01-ին, Երևան քաղաքում, դռնբաց դատական նիստում քննության առնելով քրեական գործն ըստ մեղադրանքի Էմանուել Գագիկի Ֆարմանյանի (ծնված 16.07.1992թ. Երևան քաղաքում, ազգությամբ հայ, ՀՀ քաղաքացի, ֆիզիկապես վատառողջ` տառապում է ֆիզիկական զարգացման արգելակում հիվանդությամբ, սովորում է ՀՀ տնտեսագիտական համալսարանում, ամուրի, նախկինում չդատված, չի աշխատում, հաշվառված և բնակվում է Երևան քաղաքի Հր.Քոչարի փողոցի թիվ 139 տանը) ՀՀ քրեական օրենսգրքի 112 հոդվածի 1-ին մասով:
Պ Ա Ր Զ Ե Ց

Նախաքննության մարմինը թիվ 14106609 քրեական գործով 2009թ. հուլիսի 02-ին Էմանուել Ֆարմանյանին ՀՀ քրեական օրենսգրքի 112 հոդվածի 1-ին մասով մեղադրանք է առաջադրել հետևյալ արարքի համար.
անչափահաս ամբաստանյալ Էմանուել Ֆարմանյանը 2009թ. փետրվարի 19-ին, ժամը 18-ի սահմաններում, իր անչափահաս ընկերներ Իգնատ Նադարյանի, Արամ Նազարյանի և այլ անձանց հետ նախնական պայմանավորվածության համաձայն, Երևան քաղաքի Արաբկիր 21-րդ փողոցում հանդիպել են իրենց հասակակիցներ Վահե Բաղդասարյանին, նրա ընկերներ Գուրգեն Եսայանին, Տիգրան Չախալյանին և այլ անձանց ու փորձել պարզաբանել երկու օր առաջ Արամ Նազարյանի և Վահե Բաղդասարյանի միջև առաջացած տարաձայնությունները:
Շրջապատի մարդկանց ուշադրությունից դուրս մնալու նպատակով, նրանք քայլելով բնակելի տարածքից գնացել են Արաբկիր 21 փողոցի թիվ 1 շենքի հետնամասում գտնվող տարածք: Ժամը 1830-ի սահմաններում, պարզաբանման ժամանակ միմյանց չեն հասկացել, նրանց միջև վիճաբանություն ու քաշքշուկ է սկսվել, որի ժամանակ Էմանուել Ֆարմանյանն իր մոտ եղած դանակով հարվածել է Գուրգեն Եսայանի կրծքավանդակի ձախ կեսին և դիտավորությամբ պատճառել թափանցող, թոքի վնասումով վնասվածք` Գ.Եսայանի առողջությանը պատճառելով կյանքին վտանգ սպառնացող ծանր վնաս:
Կռվի և ծեծկռտուքի ընթացքում մարմնական վնասվածքներ են ստացել նաև Էմանուել Ֆարմանյանը և Վահե Բաղդասարյանը, սակայն տուժողների բողոքի բացակայության հիմքով, ՀՀ քրեական դատավարության օրենսգրքի 183 հոդվածի համաձայն, քննիչի կողմից որոշում է կայացվել Գուրգեն Եսայանի և Իգնատ Նադարյանի նկատմամբ քրեական հետապնդում չիրականացնելու մասին:
Գործի դատական քննության ընթացքում մեղադրող Ս.Բադալյանը հայտարարեց, որ գործով ձեռք բերված ապացույցները հիմք են տալիս Էմանուել Ֆարմանյանին առաջադրված մեղադրանքը ՀՀ քրեական օրենսգրքի 112 հոդվածի 1-ին մասից նույն օրենսգրքի 116 հոդվածի 2-րդ մասով փոփոխելու համար հետևյալ հիմնավորումներով.
անչափահասներ, տուժող Գուրգեն Եսայանի և ամբաստանյալ Էմանուել Ֆարմանյանի և նրանց (նույնպես անչափահաս) ընկերների միջև առաջացած վիճաբանության ընթացքում տուժողը դիտողություն է արել ամբաստանյալին` բղավելու համար, սակայն վերջինս շարունակել է նույն տոնով խոսել, որից հետո տուժողը բռունցքով հարվածել է ամբաստանյալի դեմքին` քունքի և ճակատի շրջանում: Հարվածից ամբաստանյալը գետին է տապալվել, հայհոյել է տուժողին: Վերջինս, ինչպես նաև նրա ընկերները, հարձակվել են գետին ընկած ամբաստանյալի վրա և սկսել հարվածել նրան: Հայտնվելով նման իրավիճակում և ցանկանալով ազատվել, ամբաստանյալն ընկած տեղից իր մոտ գտնվող դանակով հարվածել է իր վրա ընկած տուժողին և նրան պատճառել ծանր մարմնական վնասվածք:
Մեղադրող Ս.Բադալյանը հայտնեց, որ տուժող Գ.Եսայանը զբաղվում է բռնցքամարտով: Ամբաստանյալը տառապում է ՙֆիզիկական զարգացման արգելակում՚ հիվանդությամբ, հասակը 163 սմ է, քաշը` մոտ 45 կգ:
Նկատի ունենալով, որ տուժողի բռունցքով կատարած հարվածին ամբաստանյալը պատասխանել է դանակի հարվածով, այսինքն` պաշտպանությունը հարձակմանը համաչափ չէ, մեղադրողը գտավ, որ տեղի է ունեցել անհրաժեշտ պաշտպանության սահմանազանցում:
Համաձայն ՀՀ քրեական օրենսգրքի 42 հոդվածի 4-րդ մասի` անհրաժեշտ պաշտպանության սահմանազանցում են համարվում դիտավորյալ այն գործողությունները, որոնք պաշտպանվողի համար ակնհայտ, չեն համապատասխանում ոտնձգության բնույթին և վտանգավորությանը:
Վերոգրյալի հիման վրա մեղադրողը միջնորդեց դիտավորությամբ առողջությանը ծանր վնաս պատճառելու համար Էմանուել Գագիկի Ֆարմանյանին` ՀՀ քրեական օրենսգրքի 112 հոդվածի 1-ին մասով առաջադրված մեղադրանքը փոփոխել ՀՀ քրեական օրենսգրքի 116 հոդվածի 2-րդ մասով` առողջությանը ծանր վնաս պատճառելն անհրաժեշտ պաշտպանության սահմանազանցմամբ:
Հաշվի առնելով, որ ամբաստանյալ Էմանուել Ֆարմանյանը, ամբաստանյալի օրինական ներակայացուցիչ Գ.Ֆարմանյանը և պաշտպան Մ.Թովմասյանը չառարկեցին Էմանուել Ֆարմանյանի նկատմամբ համաներման ակտի կիրառմամբ քրեական գործի վարույթը կարճելու և քրեական հետապնդումը դադարեցնելու վերաբերյալ և հիմք ընդունելով ՀՀ Ազգային ժողովի 2009թ. հունիսի 19-ի ՙՀամաներում հայտարարելու մասին՚ որոշումը, մեղադրողը ՀՀ քրեական դատավարության օրենսգրքի 35 հոդվածի 4-րդ մասի համաձայն հայտարարեց ՀՀ քրեական օրենսգրքի 116 հոդվածի 2-րդ մասով քրեական հետապնդում իրականացնելուց հրաժարվելու մասին:
Նկատի ունենալով, որ Էմանուել Ֆարմանյանը հանցագործությունը կատարելլ է մինչև 18 տարին լրանալը, ինչպես նաև այն, որ ՙՀամաներում հայտարարելու մասին՚ ՀՀ Ազգային ժողովի 2009թ. հունիսի 19-ի որոշման 5-րդ կետի 2) ենթակետը սահմանում է կարճել այն անձանց կողմից կատարված հանցագործությունների վերաբերյալ գործերը, ովքեր մեղադրվում են այնպիսի հանցագործություններ կատարելու մեջ, որոնց համար նախատեսված է պատիժ ոչ ավելի, քան հինգ տարի ժամկետով ազատազրկում, իսկ ՀՀ քրեական օրենսգրքի 116 հոդվածի 2-րդ մասը նախատեսում է ազատազրկում` առավելագույնը երկու տարի ժամկետով, ինչպես նաև այն, որ համաձայն ՀՀ քրեական դատավարության օրենսգրքի 35 հոդվածի 4-րդ մասի` ամբաստանյալի նկատմամբ քրեական հետապնդում իրականացնելուց հրաժարվելու մասին մեղադրողի հայտարարությունը դատարանի համար քրեական գործի վարույթը կարճելու և քրեական հետապնդումը դադարեցնելու հիմք է, դատարանը գտնում է, որ քրեական գործի վարույթը ենթակա է կարճման, իսկ քրեական հետապնդումը` դադարեցման:
Դատարանն անդրադառնալով գործով իրեղեն ապացույցների տնօրինման հարցին, գտնում է, որ իրեղեն ապացույց ճանաչված, տուժող Գուրգեն Եսայանի հագուստները` սվիտեր-մայկան, շապիկը, ուսաժապավեններով մայկան, անդրավարտիքը և վարտիքը, պետք է վերադարձնել նրան:
Նկատի ունենալով, որ տուժող Գուրգեն Եսայանը և տուժողի օրինական ներկայացուցիչ Ռուզաննա Բադալյանը հրաժարվել են քաղաքացիական հայցի պահանջից, դատարանն այդ հարցը համարում է լուծված:
Ղեկավարվելով ՙՀամաներում հայտարարելու մասին՚ ՀՀ Ազգային ժողովի 2009թ. հունիսի 19-ի որոշման 5-րդ կետի 2) ենթակետով, 12-րդ կետի 1) ենթակետի ա. պարբերությամբ և ՀՀ քրեական դատավարության օրենսգրքի 35 հոդվածի 1-ին մասի 13-րդ կետով, 313 հոդվածով դատարանը

Ո Ր Ո Շ Ե Ց

Էմանուել Գագիկի Ֆարմանյանի վերաբերյալ ՀՀ քրեական օրենսգրքի 116 հոդվածի 2-րդ մասով թիվ ԵԱՔԴ 0090/01/09 քրեական գործի վարույթը կարճել և նրա նկատմամբ քրեական հետապնդումը դադարեցնել` ՀՀ քրեական դատավարության օրենսգրքի 35 հոդվածի 13-րդ կետով և ՀՀ Ազգային ժողովի 2009թ. հունիսի 19-ի ՙՀամաներում հայտարարելու մասին՚ որոշման 2-րդ հոդվածի 3-րդ կետի և 5-րդ հոդվածի 2-րդ կետի կիրառմամբ:
Էմանուել Գագիկի Ֆարմանյանի նկատմամբ ընտրված խափանման միջոցը` գրավը, վերացնել և որոշումն ուժի մեջ մտնելուց հետո 600.000 ՀՀ դրամ գրավի գումարը վերադարձնել ամբաստանյալի օրինական ներկայացուցիչ Գագիկ Ֆարմանյանին:
Իրեղեն ապացույց ճանաչված, տուժող Գուրգեն Եսայանի հագուստները` սվիտեր-մայկան, շապիկը, ուսաժապավեններով մայկան, անդրավարտիքը և վարտիքը, վերադարձնել նրան:
Որոշումը կարող է բողոքարկվել ՀՀ վերաքննիչ քրեական դատարան` մեկամսյա ժամկետում:

ԴԱՏԱՎՈՐ` ստորագրություն
Բնագրի հետ ճիշտ է
ԴԱՏԱՎՈՐ Լ. ԱՎԵՏԻՍՅԱՆ