ԵԱՔԴ 0075/01/09





ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

09.07.2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանը հետևյալ կազմով`
նախագահող դատավորª Ս.Ղազարյան
քարտուղարությամբª Հ.Ավագյանի
մասնակցությամբ`
մեղադրողª Ա.Ավետիսյանի
տուժող` Ա.Պողոսյանի

Դռնբաց դատական նիստում քննության առավ քր.գործն ըստ մեղադրանքի
Ալեքսեյ Սերգեյի Ավետյանի, ծնված 04.02.1983թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, խնամքին 4 անձ, ՀՀ քր. օր-ի 84 հոդվածի 8-րդ կետի հիմքով չդատապարտված, չի աշխատում, հաշվառված է ք.Երևան, 16 թաղ. 21 շենք, 121 բնակարանում, բնակվում է ք.Երևան Նոր Խարբերդ 12 փ. 70/76 տուն:
Կալանքի տակ է 17.04.2009թ-ից:

Ամբաստանվում է ՀՀ քր.օր-ի 178 հոդվածի 2-րդ մասի 3-րդ կետով, այն բանի համար, որ նա խարդախություն կատարելու դիտավորությամբ, ներկայանալով որպես անշարժ գույքի գործակալ, վարձակալությամբ բնակարան տրամադրելու պատրվակով չարաշահել է Սոնա Առաքելի Հարությունյանի վստահությունը և 2008թ. հուլիս ամսվա սկզբին, գործով չպարզված օրը, Զեյթուն թաղամասի փոստի շենքում, որպես միջնորդավճար նրանից խաբեությամբ հափշտակել է զգալի չափերի հասնող 45.000 ՀՀ դրամ:
Բացի այդ կրկին անգամ խարդախություն կատարելու դիտավորությամբ ներկայանալով, որպես անշարժ գույքի գործակալ, վարձակալությամբ բնակարան տրամադրելու պատրվակով չարաշահել է Անաստասիա Վիլի Պողոսյանի վստահությունը և 2008թ. հուլին 19-ին Երևան քաղաքի Վրացական փողոցի մանկապարտեզի մոտ, որպես միջնորդավճար նրանից խաբեությամբ հափշտակել է 50.000 ՀՀ դրամ գումար, որից հետո 2008թ. հուլիսի 22-ին, նույն պատրվակով, որպես բնակարանի վարձավճար, Երևան քաղաքի Մամիկոնյանց 47/1 շենքի մուտքի մոտ Ա.Պողոսյանից խաբեությամբ հափշտակել է 100.000 ՀՀ դրամ, որից հետո 2008թ. հուլիսի 24-ին, նույն նպատակով, նույն տեղում` բնակարանի վերանորոգման համար Ա.Պողոսյանից խաբեությամբ հափշտակել է 100.000 ՀՀ դրամ, այնուհետև մեկ միասնական դիտավորությամբ Անաստասիա Վիլի Պողոսյանից հափշտակել է զգալի չափերի ընդհանուրը 250.000 ՀՀ դրամ գումար:
Բացի այդ, կրկին անգամ, խարդախություն կատարելու դիտավորությամբ, ներկայանալով որպես ք.Երևան Գայդարի փողոցի 47 շենքի 47 բնակարանի սեփականատեր, չարաշահել է ԻԻՀ քաղաքացի Մոհամադ Ալի Ահանչյանի վստահությունը և նշված բնակարանը վարձակալությամբ տրամադրելու պատրվակով` 2009թ. մարտի 12-ին Երևան քաղաքի Սոսեի 76 տանը խաբեությամբ Մ. Ահանչյանից հափշտակել է զգալի չափերի 50.000 ՀՀ դրամ գումար: Որից հետո 2009թ. մարտի 15-ին, հիշյալ բնակարանի վերանորոգման աշխատանքներ կատարելու համար, ՙՍիլ Պլազա՚ համալիրի շենքում Մ. Ահանչյանից խաբեությամբ հափշտակել է 150.000 ՀՀ դրամ, այսինքն մեկ միասնական դիտավորությամբ Մոհամադ Ալի Ահանչյանից հափշտակել է զգալի չափերի` ընդհանուրը 200.000 ՀՀ դրամ գումար:
Վերը նշված արարքների համար Ալեքսեյ Ավետյանին մեղադրանք է առաջադրվել ՀՀ քր.օր-ի 178 հոդվածի 2-րդ մասի 3-րդ կետով, որում նա իրեն մեղավոր չի ճանաչել և ցուցմունք է տվել այն մասին, որ 2002թ-ից զբաղվել է վարձակալությամբ բնակարաններ տրամադրելու աշխատանքներով: Այդ աշխատանքի հետ կապված պարբերաբար ինքը հայտարարություններ է տվել ՙԳինդ՚ տեղեկատվական շաբաթաթերթում: 2007թ-ին 2-րդ անգամ ամուսնացել է Ալիսա Մամիկոնյանի հետ: Ամուսնությունից հետո իր կինը հղիության հետ կապված առողջական խնդիրներ է ունեցել: Բուժման ծախսերը չկարողանալով հոգալ` որոշել է գումար հայթայթել: 2008թ. հուլիս ամսվա սկզբներին, կոնկրետ օրը չի հիշում իրեն զանգահարել է Սոնա Առաքելի Հարությունյանը և վարձով տրվող բնակարան խնդրել: Ինքը խոստացել է օգնել Ս.Հարությունյանին բնակարան վարձակալելու հարցում: Այդ նպատակով իրենք միասին գնացել են Զեյթուն թաղամասի Դրոյի 15 շենք, որտեղ վարձակալությամբ տրվող բնակարանը ցուցադրելուց հետո համաձայնության են եկել և Ս.Հարությունյանը իրեն վճարել է 225.000 ՀՀ դրամ գումար` որպես բնակարանի նախնական վարձավճար: Այդ գումարը վերցնելով` ինքը չի տրամադրել պայմանավորված բնակարանի բանալիները, Ս.Հարությունյանը հետ է պահանջել գումարը: Ինքը հանդիպելով Ս.Հարությունյանին` նրան է վերադարձրել 180.000 ՀՀ դրամ, իսկ 45.000 ՀՀ դրամը խոստացել է հետո վերադարձնել: Որոշ Ժամանակ անց, Ս.Հարությունյանը այցելելով իր Նոր-Նորքի 2-րդ զանգվածի վարձակալած բնակարան` պահանջել է մնացած 45.000 ՀՀ դրամը: Ինքը չցանկանալով հետ վերադարձնել գումարի մնացորդը` համոզել է Ս.Հարությունյանի և որպես երաշխիք նրան է տվել իր` օգտագործած Մոտոռոլա Վ-3 մոդելի բջջային հեռախոսը, դրանով ներշնչելով վստահություն: Որից հետո խզել է կապերը Ս.Հարությունյանի հետ` այդպես էլ չվճարելով նրա 45.000 ՀՀ դրամ գումարը: Դրանից հետո` 2008թ. հուլիս ամսի կեսերին, փորձել է կրկին գումար հայթայթել: Իր կողմից ՙԳինդ՚ շաբաթաթերթում տված հայտարարության կապակցությամբ, իրեն է զանգահարել Անաստասիա Վիլի Պողոսյանը և ցանկություն հայտնել Կոմիտասի փողոցի վրա բնակարան վարձակալել: Ինքը պայմանավորվելով Ա.Պողոսյանի հետ և խոստանալով վարձով բնակարան տրամադրել` 2008թ. հուլիս ամսի երկրորդ կեսին Երևան քաղաքի Վրացական փողոցի մանկապարտեզի մոտ նրանից որպես բնակարանի վարձակալության միջնորդավճար, վերցրել է 50.000 ՀՀ դրամ գումար, որը ծախսել է իր անձնական կարիքների համար: Դրանից մի քանի օր հետո, կրկին անգամ զանգահարելով Ա.Պողոսյանին վարձով տրվող բնակարանը վերանորոգելու պատրվագով Երևան քաղաքի Մամիկոնյանց 47/1 շենքի մուտքի մոտ վերջինից խաբեությամբ վերցրել է 100.000 ՀՀ դրամ, իսկ ևս մի քանի օր անց, նույն տեղում` բնակարանի վերջնական վերանորոգման աշխատանքները ավարտելու համար Ա.Պողոսյանից խաբեությամբ վերցրել է ևս 100.000 ՀՀ դրամ և խզելով բոլոր կապերը` գումարները ծախսել է իր անձնական կարիքների համար: Դրանից հետո` 2009թ. մարտ ամսի կեսերին, իրեն է զանգահարել ազգությամբ իրանացի Մոհամմադ Ալիի Ահանչյանը և ցանկություն հայտնել Երևան քաղաքի Գայդար փողոցի վրա բնակարան վարձակալել: Ինքը հանդիպել է Մ.Ահանչյանի հետ և նրան առաջարկել Գայդար փողոցի 47 շենքի 47 բնակարանը: Բնակարանը տեսնելուց հետո, երբ Մ.Ահանչյանը ցանկացել է վարձակալել բնակարանը, ինքը նրանից որպես կանխավճար վերցրել է 50.000 ՀՀ դրամ գումար: Այդ գումարը ծախսելուց հետո, որոշել է կրկին գումար վերցնել, Մ.Ահանչյանին խաբել է, որ բնակարանի վերանորոգման աշխատանքներ կատարելու համար անհրաժեշտ է ևս 150.000 ՀՀ դրամ: Երբ Մ.Ահանչյանը առաջարկել է իրեն նոտարական կարգով պայմանագիր ստորագրել` գումար վճարելու վերաբերյալ, ինքը չի համաձայնվել, քանի որ նախապես որոշել է խաբել նրան: Վերջապես պայմանավորվել են գրավոր պայմանագիր կնքել և դրա համաձայն 2009թ. մարտի 15-ին Երևան քաղաքի ՙՍիլ Պլազա՚ համալիրի շենքում ինքը Մ.Ահանչյանին խաբելով նրանից վերցրել է 150.000 ՀՀ դրամ գումար և թողելով իր վարձակալած բնակարանը անհետացել:
Ամբաստանյալ Ալեքսեյ Ավետյանին մեղսագրված արարքը ապացուցվել է ինչպես իր խոստովանական ցուցմունքներով, այնպես էլ գործով ձեռքբերված հետևյալ ապացույցներով.
Գործով տուժողներ Սոնա Հարությունյանի, Անաստասիա Պողոսյանի, Մոհամմադ Ահանչյանի նույնաբովանդակ ցուցմունքներով այն մասին, որ վարձով բնակարան գնելու համար գնել են ՙԳինդ՚ շաբաթաթերթ: Այնտեղ եղած հայտարարություններով զանգահարել են Ալեքսեյ Ավետյանին 010-63-13-11 հեռախոսահամարով և ցանկություն հայտնել հայտարարությամբ նշված բնակարանը տեսնել, այնուհետև վարձակալել այն: Իսկ Ալեքսեյ Ավետյանը իրենցից պահանջել է կանխավճար և բնակարանը վերանորոգելու համար ընդհանուր առմամբ Սոնա Հարությունյանից 225.000 ՀՀ դրամ, որից 180.000 դրամը վերադարձրել է, իսկ 45.000 ՀՀ դրամը չի վերադարձրել, Անաստասիա Պողոսյանից 250.000 ՀՀ դրամ, իսկ Մոհամմադ Ահանչյանից 200.000 ՀՀ դրամ:
Վկաներ` մեղադրյալ Ալեքսեյ Ավետյանի կնոջ` Ալինա Մամիկոնյանի, նրա մայր` Լուսիկ Մամիկոնյանի և քույր` Ալլա Մամիկոնյանի նույնաբովանդակ ցուցմունքներով այն մասին, որ ամբաստանյալ Ալեքսեյ Ավետյանը 2007թ. ապրիլ ամսին ամուսնացել է Ալինա Մամիկոնյանի հետ, որից հետո սկսել են բնակվել վարձով: Հղիության հետ կապված Ալինա Մամիկոնյանը առողջական խնդիրներ է ունեցել: Այդ ժամանակ նրանք վարձով բնակվելիս են եղել Նորքի 2-րդ զանգվածի 29 շենքի 32 բնակարանում: Նշված բնակարանի հեռախոսահամարն է եղել 010-63-13-11: Ալեքսեյ Ավետյանը հայտարարություններ է տվել ՙԳինդ՚ շաբաթաթերթում` բնակարաններ վարձով տրամադրելու մասին: 2008թ. հուլիս ամսին եկել է Սոնա Հարությունյանը և պանջել է 45.000 ՀՀ դրամ գումար: Խոսակցություններից իրենք տեղեկացել են, որ 2008թ. հուլիս ամսվա սկզբներին, ՙԳինդ՚ շաբաթաթերթում տված հայտարարության հիման վրա Ս.Հարությունյանը ծանոթացել էր իրենց փեսա Ա.Ավետյանի հետ և վերջինս խոստացել է Ս.Հարությունյանին վարձով բնակարան տրամադրել և նրանից վերցրել է 225.000 ՀՀ դրամ գումար` որպես բնակարանի նախնական վարձավճար: Դրանից հետո մի քանի օր անց, քանի որ Ա.Ավետյանը չի տրամադրել պայմանավորված բնակարանի բանալիները, Ս.Հարությունյանին վերադարձրել է 180.000 ՀՀ դրամ, իսկ մնացած 45.000 դրամը խոստացել է վերադարձնել: Տեսնելով, որ վերջինս չի կատարել իր խոստումը եկել է Ա.Ավետյանի տուն և պահանջել գումարը, իսկ նա համոզել է նրան և որպես երաշխիք նրան է տվել իր Մոտոռոլա Վ-3 մոդելի բջջային հեռախոսը: Դրանից հետո Ա.Ավետյանը ընտանիքով տեղափոխվել է նշված բնակարանից:
2009թ. մարտ ամսին, երբ իրենք հյուրընկալվել են իրենց փեսային, նրա տուն է եկել ազգությամբ պարսիկ Մոհամմադ Ահանչյանը և նրա ընկերուհի Ազադեհը, որը նույնպես ցանկացել է վարձակալել բնակարան, իսկ Ա.Ավետյանը նրանց ցուցադրել է ք.Երևան Գայդար 47 շենք 47 բնակարանը և նայելուց հետո Մ.Ահանչյանը հավանել է ու ցանկացել այն վարձակալել: Դրանից հետո Ա.Ավետյանը Մ.Ահանչյանից վերցրել է 50.000 ՀՀ դրամ, իսկ որոշ ժամանակ անց նրանք թողել և հեռացել են Երևան քաղաքից:
Գործով վկաներ` տուժող Անաստասիա Պողոսյանի մայր Էլվինա Մովսիսյանի, տուժող Մոհամմադ Ահանչյանի ընկերուհի` Ազադեհ Էլիասի Մոհամմադի, Մոհամմադ Ահանչյանի ընկեր Հումման Համիդի Սալահիի նույնաբովանդակ ցուցմունքներով այն մասին, որ տուժողներ Ս.Հարությունյանը, Ա.Պողոսյանը և Մոհամմադ Ահանչյանը վարձով բնակարան փնտրելիս են եղել և ՙԳինդ՚ շաբաթաթերթում կարդալով Ալեքսեյ Ավետյանի հայտարարությունը հանդիպել են նրա հետ, այցելել վարձով տրվող բնակարաններ, հավանել դրանք և որպես կանխավճար Ալեքսեյ Ավետյանին վճարել վարձավճարներ, որից հետո Ալեքսեյ Ավետյանը խուսափել է բնակարանները տրամադրել և հանդիպել տուժողների հետ:
Գործով վկա Արփինե Պերճի Պերճիևայի ցուցմունքով այն մասին, որ ինքը աշխատում է անշարժ գույքի գործակալությունում որպես գործակալ: 2008թ. հուլիսին Ա.Ավետյանը զանգահարել է իրեն և հարցրել, արդյոք ինքը 100.000 ՀՀ դրամով վարձով տրվող բնակարանի տեղ գիտի: Ինքը նրան պատասխանել է, որ նման բնակարանի տեղ գիտի և Ա.Ավետյանը խնդրել է նրան այդ բնակարանը ցույց տալ վարձակալներին: Պայմանավորվելով, ինքը հանդիպել է Անաստասիա Պողոսյանին և նրա մորը և նրանց ուղեկցել Կոմիտաս փողոցի 54/1 շենք 42 բնակարան: Բնակարանը հավանելով Ա.Պողոսյանը ցանկություն է հայտնել վարձակալել այն, սակայն բնակարանատերը ժամանակ է խնդրել մտածելու համար: Այդ բանից հետո ինքը հալտնել է Ա.Ավետյանին, որ տանտերը տատանվում է 100.000 դրամով բնակարանը վարձակալությամբ տալ: Ա.Ավետյանը իմանալով այս մասին իրեն ոչինչ չի ասել և ինքը միայն ոստիկանության բաժնում է տեղեկացել, որ Ա.Ավետյանը խաբեությամբ 25.000 դրամ է հափշտակել Անաստասիա Պողոսյանից` նշված բնակարանը վարձով տրամադրելու պատրվակով:
Տուժող Անաստասիա Պողոսյանի կողմից ՀՀ ոստիկանության Արաբկիրի բաժնում հաղորդում տալու մասին արձանագրությամբ, ըստ որի Ալեքսեյ Ավետյանը իրենից խարդախությամբ հափշտակել է 250.000 ՀՀ դրամ գումար:
Գործով նշանակված դատաապրանքագիտական փորձաքննության 23.12.2008թ. թիվ 1498-ԱՊ եզրակացությամբ, համաձայն որի փորձաքննության տրամադրված բջջային հեռախոսի միջին շուկայական գինը 2008թ. օգոստոսի 11-ի դրությամբ կազմում է 18.000 ՀՀ դրամ:
Անձին լուսանկարով ճանաչման ներկայացնելու մասին արձանագրությամբ, որտեղ տուժող Անաստասիա Պողոսյանը ճանաչել և մատնանշել է Ալեքսեյ Ավետյանի լուսանկարն ու հայտարարել, որ հենց մատնանշած լուսանկարում պատկերված անձն է իրենից խաբեությամբ հափշտակել 250.000 ՀՀ դրամ գումար:
Տուժող Մոհամմադ Ահանչյանի կողմից Ալեքսեյ Ավետյանի լուսանկարը ներկայացնելու մասին արձանագրությամբ, ըստ որի տուժողը լուսանկարահանել է Ա.Ավետյանին Գայդարի 47 շենքի 47 բնակարանը ցույց տալիս:
Մեղադրյալ Ա.Ավետյանին ՀՀ ոստիկանության Արաբկիրի բաժին բերման ենթարկելու և անձնական խուզարկություն կատարելու մասին արձանագրություններով:
Դատարանը հետազոտելով գործով ձեռքբերված ապացույցները, համադրելով դրանք միմյանց հետ, տալով դրանց քրեաիրավական գնահատական, ղեկավարվելով օրենքով իրավագիտակցությամբ և ներքին համոզմամբ, հանգում է այն հետևության, որ Ալեքսեյ Ավետյանի մեղքը ՀՀ քր.օր-ի 178 հոդվածի 2-րդ մասի 3-րդ կետով ապացուցված է:
Քննության առնելով ամբաստանյալ Ա.Ավետյանի նկատմամբ նշանակվող պատժի հարցը` դատարանը գնահատում է ինչպես արարքի բնույթն ու վտանգավորության աստիճանը, այնպես էլ նրա անձը, պատասխանատվությունը մեղմացնող և ծանրացնող հանգամանքները:
Անձը բնութագրող հանգամանք դատարանը հաշվի է առել այն, որ նա երիտասարդ է ամուսնացած է խնամքին երեք անչափահաս երեխա:
Պատասխանատվությունը մեղմացնող հանգամանք դատարանը հաշվի է առել այն, որ նա անկեղծորեն զղջում է կատարած արարքի համար, կամովին վերականգնել է պատճառված վնասն ամբողջությամբ:
Պատասխանատվությունը ծանրացնող հանգամանք դատարանը չի գտել:
Վերլուծելով վերը նշվածը դատարանը գտնում է, որ Ա.Ավետյանի նկատմամբ ՀՀ քր.օր-ի 178 հոդվածի 2-րդ մասի 3-րդ կետով պատիժ պետք է նշանակվի ազատազրկման ձևով:
Դատարանը քննության առնելով ՀՀ Ազգային Ժողովի 19.06.2009թ. համաներում հայտարարելու մասին որոշման կիրառման հարցը գտավ, որ համաներումը ամբաստանյալ Ալեքսեյ Ավետյանի նկատմամբ կիրառելի է:
Ելնելով վերոգրյալից և ղեկավարվելով ՀՀ քր. դատ. օր-ի 357-360 հոդվածներով դատարանը

Վ Ճ Ռ Ե Ց

Ամբաստանյալ Ալեքսեյ Սերգեյի Ավետյանին մեղավոր ճանաչել ՀՀ քր.օր-ի 178 հոդվածի 2-րդ մասի 3-րդ կետով և նրան դատապարտել ազատազրկման 3 /երեք/ տարի ժամկետով:
Կիրառել ՀՀ Ազգային Ժողովի 19.06.2009թ. համաներում հայտարարելու մասին որոշման 1-ին կետի 1-ին ենթակետը և Ալեքսեյ Սերգեյի Ավետյանին ազատել նշանակված հիմնական պատժի կրումից:
Ընտրված խափանման միջոց կալանքը վերացնել և Ալեքսեյ Սերգեյի Ավետյանին անհապաղ ազատ արձակել դատական նիստերի դահլիճում:
Իրեղեն ապացույց ճանաչված հեռախոսը հանձնել ըստ պատկանելիության:
Քաղ հայցի հարցը համալել լուծված տուժողներն պատճառված նյութական վնասը վերականգնելու կապակցությամբ:
Դատավճիռը կարող է բողոքարկվել ՀՀ քր. վերաքննիչ դատարան, այն հրապարակելուց հետո մեկամսյա ժամկետում:


ԴԱՏԱՎՈՐª Ս.ՂԱԶԱՐՅԱՆ