գործ թիվ ԵԱՔԴ 0062/01/09
Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
դատախազ` Ա.Ավետիսյանի
ամբաստանյալ` Ռ.Փիլոյանի

2009թ. հուլիսի 08-ին, Երևան քաղաքում, դռնբաց դատական նիստում քննության առնելով քրեական գործն ըստ մեղադրանքի Ռաֆայել Ռախուբի Փիլոյանի, ծնված 27.09.1954թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ամուրի, խնամքին ոչ ոք, նախկինում 6 անգամ դատված` վերջինը 11.03.2005թ. Ուկրաինայի Հանրապետության քրեական օրենսգրքի 185 հոդվածի 3-րդ մասով, գողություն կատարելու համար, դատապարտվել է ազատազրկման 3 տարի ժամանակով, պատիժը կրելուց ազատվել է 2008թ.` լրիվ կրելու հետևանքով, դատվածությունը չմարված, չի աշխատել, հաշվառված է Երևան քաղաքի Արցախի փողոցի 10 շենքի թիվ 6 բնակարանում:
Մեղադրվում է ՀՀ քրեական օրենսգրքի 34-177 հոդվածի 2-րդ մասի 4-րդ կետով:
Պ Ա Ր Զ Ե Ց

1.Գործի դատավարական նախապատմությունը.
06.04.2009թ. ՀՀ ոստիկանության ՔԳՎ Երևանի քննչական վարչության Արաբկիրի քննչական բաժնի կողմից ՀՀ քրեական օրենսգրքի 34-177 հոդվածի 1-ին մասի հատկանիշներով հարուցվել է թիվ 14110509 քրեական գործը:
08.04.2009 թվականին Ռաֆայել Ռախուբի Փիլոյանի նկատմամբ որպես խափանման միջոց է ընտրվել կալանավորումը:
2.Գործի փաստական հանգամանքները.
08.04.2009թ. Ռաֆայել Ռախուբի Փիլոյանին մեղադրանք է առաջադրվել, իսկ 19.05.2009թ. առաջադրված մեղադրանքը փոփոխվել, լրացվել և Ռաֆայել Ռախուբի Փիլոյանին նոր մեղադրանք է առաջադրվել ՀՀ քրեական օրենսգրքի 34-177 հոդվածի 2-րդ մասի 4-րդ կետով այն բանի համար, որ նա 11.03.2005թ. Ուկրաինայի Հանրապետության քր. օր-ի 185 հոդվածի 3-րդ մասով, գողություն կատարելու համար, դատապարտված լինելով երեք տարի ժամանակով ազատազրկման, 2008թ. պատիժը կրելուց ազատվելուց հետո, դատվածությունը չմարված, կրկին կատարել է գույքի գաղտնի հափշտակություն, այն է`
2009թ. ապրիլի 3-ին ժամը 1640-ի սահմաններում, Երևան քաղաքի Մամիկոնյանց 2 հասցեում գտնվող ՙՍթար՚ հանրախանութում գողություն կատարելու նպատակով գաղտնի վերցրել է զգալի չափերով` 5 տուփ ՙՋիլետ՚ տեսակի սափրիչների գլխիկներ, 36.600 ՀՀ դրամ ընդհանուր արժողությամբ, որոնք տեղադրել է հանրախանութի պահախցում, որից հետո որոշակի գնումներ կատարելով և վճարելով, մոտեցել և պահախցից վերցրել է նախապես իր կողմից թաքցրած սափրիչները և փորձել է դուրս գալ հանրախանութից, սակայն իր կամքից անկախ գողությունն ավարտին չի հասցրել և բռնվել է հանրախանութի անվտանգության աշխատակից Եսայի Ջհանգիրյանի կողմից:
27.05.2009 թվականին թիվ 14110509 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարան:
Քրեական գործը նշանակվել է դատաքննության 2009 թվականի հունիսի 19-ին:
3.Ապացույցների հետազոտում.
Առաջադրված մեղադրանքում ամբաստանյալ Ռաֆայել Փիլոյանն իրեն մեղավոր է ճանաչել լիովին և ցուցմունք տվել այն մասին, որ ինքը մշտական բնակության վայր չունի և գիշերում է տարբեր վայրերում: 2009թ. ապրիլի 3-ին առևտուր կատարելու նպատակով մտել է Երևան քաղաքի Մամիկոնյանց փողոցի 2 հասցեում գտնվող ՙՍթար՚ հանրախանութ և տնտեսական մասի ցուցափեղկի վրայից գաղտնի վերցնելով թվով 5 տուփ ՙՋիլետ՚ տեսակի սափրիչներ, դրանք տեղադրել է խանութի մուտքի դռան մոտ գտնվող պահախցիկի մեջ, ապա վերադառնալով վերցրել է մեկ շիշ գարեջուր, մեկ հատ հացաբուլկեղեն և մեկ տուփ կաղինի միջուկ, որոնց գնման համար վճարել է դրամարկղում: Այնուհետև մոտեցել է պահախցին, վերցրել իր կողմից նախապես նշված պահախցում տեղադրված և դրանց դիմաց չվճարած սափրիչները, ցանկացել է դուրս գալ խանութից: Նույն պահին իրեն է մոտեցել հանրախանութի անվտանգության աշխատակից Եսայի Ջհանգիրյանը, պահանջել իր կողմից գողացված սափրիչները և զանգահարել ոստիկանություն: Ինքը ներկայացրել է գողացված սափրիչները: Ինքը գողությունը կատարել է նյութական կարիքից դրդված, զղջում է կատարած արարքի համար:
Ամբաստանյալի կատարած հանցանքը, բացի նրա խստովանությունից հիմնավորվել է նաև գործով ձեռք բերված հետևյալ ապացույցներով.
Տուժողի ներկայացուցիչ Եսայի Ջհանգիրյանի նախաքննության ընթացքում տրված և դատաքննության ընթացքում հետազոտված ցուցմունքով այն մասին, որ աշխատում է Մամիկոնյանց փողոցի 2 հասցեում գտնվող ՙՍթար՚ հանրախանութում, որպես անվտանգության պետ: Իր պարտականությունների մեջ է մտնում տեսախցիկների մոնիտորների միջոցով հանրախանութի սրահը հսկելը: 2009թ. ապրիլի 3-ին ժամը 1640-ի սահմաններում գտնվել է իր աշխատասենյակում, որտեղ առկա են ՙՍթար՚ հանրախանութի սրահը նկարահանող տեսախցիկների մոնիտորները: Մոնիտորների վրա նկատել է մոտ 50-55 տարեկան տղամարդու, որը մտնելով հանրախանութ, տնտեսական մասի ցուցափեղկի վրայից գաղտնի վերցրել է թվով 5 տուփ ՙՋիլետ՚ տեսակի սափրիչների գլխիկներ, դրանք տեղադրել խանութի մուտքի դռան մոտ գտնվող պահախցի մեջ, ապա վերադառնալով վերցրել է մեկ շիշ գարեջուր, մեկ հատ հացաբուլկեղեն և մեկ տուփ կաղինի միջուկ, գնման դիմաց վճարել է դրամարկղում:
Այնուհետև մոտեցել է պահախցին, վերցրել իր կողմից նախապես այնտեղ տեղադրված ու դրանց դիմաց չվճարված սափրիչները և ցանկացել է դուրս գալ խանութից: Ինքը հանրախանութի մուտքի դռների մոտ մոտեցել է նրան և պահանջել սափրիչների գլխիկները և զանգահարել ոստիկանություն: Քիչ անց հանրախանութ են եկել ոստիկանության աշխատակիցները և գողության փորձ կատարած անձին տարել ոստիկանության բաժին: Նույն պահին ինքը տեղեկացել է, որ գողության փորձը կատարած անձը հանդիսանում է Ռաֆայել Ռախուբի Փիլոյանը, ծնված 1954թ., մշտական բնակության վայր չունի: Նկատի ունենալով, որ Ռաֆայել Փիլոյանին չի հաջողվել հանրախանութից գողություն կատարել, ինքը որևէ քաղաքացիական հայց չի ներկայացրել, սակայն ցանկացել է, որ վերջինս կատարած արարքի համար ենթարկվի քրեական պատասխանատվության:
Վկա Լուսինե Վարշամի Կարապետյանի նախաքննության ընթացքում տրված և դատաքննության ընթացքում հետազոտված ցուցմունքով այն մասին, որ ինքն աշխատում է Մամիկոնյանց փողոցի 2 հասցեում գտնվող ՙՍթար՚ հանրախանութում որպես գանձապահ: 2009թ. ապրիլի 3-ին ժամը 1640-ի սահմաններում գտնվել է իր աշխատանքի վայրում, դրամարկղի մոտ: Իրեն է մոտեցել մոտ 50-55 տարեկան տղամարդ, վճարել մեկ շիշ գարեջրի, մեկ հատ հացաբուլկեղենի և մեկ տուփ կաղինի միջուկի դիմաց, որից հետո մոտեցել է պահախցին, վերցրել ինչ-որ իր և ցանկացել է հեռանալ:
Այդ պահին նրան է մոտեցել հանրախանութի անվտանգության աշխատակից Եսայի Ջհանգիրյանը և նրան ուղեկցել աշխատասենյակ: Հետագայում ինքը տեղեկացել է, որ այդ անձը հանդիսանում է Ռաֆայել Փիլոյանը, որը մշտական բնակության վայր չունի և հանրախանութից ցանկացել է գողանալ իր կողմից նախապես նշված պահախցում տեղադրված և դրանց դիմաց չվճարված սափրիչները, սակայն բռնվել է անվտանգության աշխատակցի կողմից և չի կարողացել ավարտին հասցնել գողությունը:
Անձին բերման ենթարկելու արձանագրությամբ այն մասին, որ 2009թ. ապրիլի 3-ին ժամը 2200-ին Երևան քաղաքի Մամիկոնյանց փողոցի 2 հասցեում գտնվող ՙՍթար՚ հանրախանութից գողության փորձ կատարելու կասկածանքով ոստիկանության Արաբկիրի բաժին է բերման ենթարկվել Ռաֆայել Ռախուբի Փիլոյանը:
Ներկայացման արձանագրությամբ այն մասին, որ 2009թ. ապրիլի 3-ին Մամիկոնյանց փողոցի 2 հասցեում գտնվող ՙՍթար՚ հանրախանութի աշխատակից Եսայի Մարտիրոսի Ջհանգիրյանը ներկայացրել է թվով 5 տուփ ՙՋիլետ՚ տեսակի սափրիչներ և հայտարարել, որ դրանք վերցրել է Ռաֆայել Փիլոյանից, ով փորձել է դրանք գողանալ հանրախանութից:
Իրեղեն ապացույց ճանաչված սափրիչների գլխիկների զննության արձանագրությամբ այն մասին, որ թվով հինգ տուփ սափրիչների գլխիկները զննվել, ճանաչվել են իրեղեն ապացույց և կցվել քրեական գործին:
Ապրանքագիտական փորձաքննության թիվ 304 եզրակացությամբ այն մասին, որ փորձաքննությանը տրամադրված հինգ տուփ ՙՋիլետ՚ տեսակի սափրիչների գլխիկների ընդհանուր շուկայական գինը 2009թ. ապրիլի 3-ի դրությամբ գնահատվում է 36.000 ՀՀ դրամ:
Դատվածության տեղեկանքով այն մասին, որ Ռափայել Փիլոյանը 11.03.2005թ. Ուկրաինայի Հանրապետության քրեական օրենսգրքի 185 հոդվածի 3-րդ մասով, գողություն կատարելու համար, ենթարկվել է քրեական պատասխանատվության և դատվածությունը չի մարվել:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Ռաֆայել Ռախուբի Փիլոյանին առաջադրված մեղադրանքը` ՀՀ քրեական օրենսգրքի 34-177 հոդվածի 2-րդ մասի 4-րդ կետով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 34-177 հոդվածի 2-րդ մասի 4-րդ կետի հատկանիշներին և արարքի որակումը ճիշտ է:
ՀՀ քրեական օրենսգրքի 17 հոդվածի համաձայն, օտարերկրյա պետության դատարանի դատավճիռը կարող է հաշվի առնվել, եթե Հայաստանի Հանրապետության քաղաքացին, օտարերկրյա քաղաքացին կամ քաղաքացիություն չունեցող անձը դատապարտվել է Հայաստանի Հանրապետության տարածքից դուրս կատարած հանցանքի համար և կրկին հանցանք է կատարել Հայաստանի Հանրապետության տարածքում:
Սույն հոդվածի առաջին մասին համապատասխան հանցագործությունների ռեցիդիվը, չկրած պատիժը կամ օտարերկրյա պետության դատարանի դատավճռի այլ իրավական հետևանքները հաշվի են առնվում նոր հանցանքը որակելիս, պատիժ նշանակելիս, քրեական պատասխանատվությունից կամ պատժից ազատելիս:
Նշված հոդվածի համաձայն, Ուկրաինայի Հանրապետությունում գողություն կատարելու համար ամբաստանյալի չմարված և չհանված դատվածություն ունենալը հիմք է հանդիսանում վերջինիս հանցանքը ՀՀ քրեական օրենսգրքի 34-177 հոդվածի 2-րդ մասի 4-րդ կետով (որպես կրկին անգամ կատարված գողություն) որակելու համար:
Ամբաստանյալ Ռաֆայել Ռախուբի Փիլոյանի նկատմամբ պատիժ նշանակելիս դատարանը հաշվի է առնում կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում, որ նա հանցանքն ընդունել և զղջում է կատարած արարքի համար:
Ամբաստանյալի պատասխանատվությունը և պատիժը ծանրացնող հանգամանքներ չկան:
Անդրադառնալով գործով իրեղեն ապացույցների տնօրինման հարցին, դատարանը գտնում է, որ գործով իրեղեն ապացույց ճանաչված և քրեական գործին կցված թվով 5 տուփ ՙՋիլետ՚ տեսակի սափրիչների գլխիկները պետք է վերադարձնել տուժողի ներկայացուցիչ Եսայի Ջհանգիրյանին:
Նկատի ունենալով, որ գողությամբ պատճառված վնասն ամբողջությամբ բնեղենով վերականգնվել է և տուժողի ներկայացուցիչ Եսայի Ջհանգիրյանը քաղաքացիական հայցի պահանջից հրաժարվել է, դատարանն այդ հարցը համարում է լուծված:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Ռաֆայել Ռախուբի Փիլոյանին մեղավոր ճանաչել ՀՀ քրեական օրենսգրքի 34-177 հոդվածի 2-րդ մասի 4-րդ կետով և նրան դատապարտել ազատազրկման չորս (4) տարի ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվել 2009 թվականի ապրիլի 06-ից:
Ռաֆայել Ռախուբի Փիլոյանի նկատմամբ ընտրված խափանման միջոցը` կալանավորումը, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված և քրեական գործին կցված թվով 5 տուփ ՙՋիլետ՚ տեսակի սափրիչների գլխիկները վերադարձնել տուժողի ներկայացուցիչ Եսայի Ջհանգիրյանին:
Տուժողի ներկայացուցիչ Եսայի Ջհանգիրյանի քաղաքացիական հայցի հարցը համարել լուծված:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակման պահից մեկամսյա ժամկետում:

ԴԱՏԱՎՈՐ` Լ.ԱՎԵՏԻՍՅԱՆ