գործ թիվ ԵԱՔԴ 0057/01/09
Դ Ա Տ Ա Վ Ճ Ի Ռ
Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջաին ատյանի դատարանը`

նախագահությամբ դատավոր` Լ.Ավետիսյանի
քարտուղարությամբ` Ե.Կարապետյանի
մասնակցությամբ`
դատախազ` Ա.Ավետիսյանի
ամբաստանյալ` Է.Բաղդասարյանի
տուժող` Լ.Մանուկյանի
2009 թվականի հունիսի 10-ին, Երևան քաղաքում, դռնբաց դատական նիստում, քննելով քրեական գործն ըստ մեղադրանքի Էրիկ Մուշեղի Բաղդասարյանի, ծնված 20.11.1976թ., Երևան քաղաքում, ազգությամբ հայ, ՀՀ քաղաքացի, միջնակարգ կրթությամբ, ֆիզիկապես առողջ, զինապարտ, ամուսնացած, խնամքին երեք անձ, նախկինում դատված` ՀՀ քրեական և զինվորական գործերով վերաքննիչ դատարանի 04.12.2006թ. դատավճռով ՀՀ քր. օր-ի 177 հոդվածի 2-րդ մասի 1-ին, 2-րդ, 3-րդ, 4-րդ կետերով դատապարտվել է ազատազրկման 3 տարի ժամանակով, կիրառվել է ՀՀ ԱԺ 07.07.2006թ. համաներում հայտարարելու մասին որոշման 1-ին կետի ՙա՚ ենթակետը և ազատվել է պատժի կրումից, դատավածությունը մարված, չի աշխատում, հաշվառված է Երևան քաղաքի Խաղաղ-Դոն փողոցի 23 շենքի թիվ 12 բնակարանում, բնակվում է Երևան քաղաքի Կոմիտասի պողոտայի 54 շենքի թիվ 108 բնակարանում:
Մեղադրվում է ՀՀ քրեական օրենսգրքի 34-176 հոդվածի 1-ին մասով:

Պ Ա Ր Զ Ե Ց

1.Գործի դատավարական նախապատմությունը.
06.04.2009 թվականին ՀՀ ոստիկանության ՔԳՎ Երևանի քննչական վարչության Արաբկիրի քննչական բաժնի կողմից հարուցվել է թիվ 14110809 քրեական գործը:
09.04.2009 թվականին նրա նկատմամբ որպես կալանավորման այլընտրանքային խափանման միջոց է կիրառվել գրավը` 500.000 ՀՀ դրամի չափով:
2.Գործի փաստական հանգամանքները.
2009 թվականի ապրիլի 15-ին Էրիկ Մուշեղի Բաղդասարյանին` ՀՀ քրեական օրենսգրքի 34-176 հոդվածի 1-ին մասով մեղադրանք է առաջադրվել այն բանի համար, որ նա 2009 թվականի ապրիլի 06-ին ժամը 1820-ի սահմաններում, Երևան քաղաքի Փափազյան փողոցի 22 շենքի դիմաց տեղադրված մրգերի և բանջարեղենների վաճառքի տաղավարի աշխատակցուհի Լիլիթ Մանուկի Մանուկյանի կողքին տեղադրված դրամարկղից բացահայտ հափշտակել է 48 000 ՀՀ դրամ և դիմել փախուստի, սակայն փախուստի ընթացքում բռնվել է ոստիկանության աշխատակցի կողմից և իրենից անկախ պատճառներով չի կարողացել հանցագործությունն ավարտին հասցնել:
2009 թվականի մայիսի 15-ին թիվ 14110809 քրեական գործը մեղադրական եզրակացությամբ ուղարկվել է Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարան:
Քրեական գործը նշանակվել է դատաքննության 2009 թվականի հունիսի 09-ին:
3.Ապացույցների հետազոտում.
Առաջադրված մեղադրանքում ամբաստանյալ Էրիկ Բաղդասարյանն իրեն մեղավոր է ճանաչել և հրաժարվել է ցուցմունք տալուց, պնդելով նախաքննության ընթացքում տված ցուցմունքը, համաձայն որի, 2009թ. ապրիլի 6-ին ժամը 1820-ի սահմաններում, Երևան քաղաքի Փափազյան փողոցով անցնելիս, նույն փողոցի 22 շենքի դիմաց տեղադրված մրգերի վաճառքի տաղավարի մոտ վաճառողուհու կողքին տեղադրված արկղի մեջ նկատել է գումար: Իր մոտ այդ պահին դիտավորություն է առաջացել հափշտակություն կատարելու և բացահայտ հափշտակելով նշված գումարը, դիմել է փախուստի: Վաճառողուհին վազել է իր հետևից, սակայն չի կարողացել հասնել: Փախչելով դեպի դեպքի վայրի դիմացի մայթեզրը, բռնվել է ոստիկանության աշխատակցի կողմից և տարվել ոստիկանության Արաբկիրի բաժին, որտեղ ընթերակաների ներկայությամբ կատարված անձնական խուզարկությամբ իր մոտից հայտնաբերվել է թվով 4 հատ 5000 ՀՀ դրամանոց և 28 հատ 1000 ՀՀ դրամանոց թղթադրամներ, ընդհանուր 48 000 ՀՀ դրամ, որն ինքը փորձել է բացահայտ հափշտակել վերը նշված վաճառողուհուց:
Ամբաստանյալի կատարած հանցանքը հիմնավորվել է նաև գործով ձեռք բերված հետևյալ ապացույցներով.
Գործով տուժող, Փափազյան փողոցի 22 շենքի առջև մրգերի վաճառքի տաղավարում որպես վաճառողուհի աշխատող Լիլիթ Մանուկի Մանուկյանի ցուցմունքով այն մասին, որ 2009թ. ապրիլի 6-ին ժամը 1820-ի սահմաններում, երբ իրականացնելիս է եղել իր աշխատանքային պարտականությունները, նախկինում իրեն անծանոթ մի երիտասարդ, անցնելով տաղավարի դիմացով, բացահայտ հափշտակել է իր կողքին, արկղի մեջ տեղադրված 48 000 ՀՀ դրամ գումարը և դիմել փախուստի: Ինքը վազել է նրա հետևից, սակայն չի կարողացել հասնել: Չնայած դրան, հանցագործը չի կարողացել հեռու փախչել, քանի որ դիմացի մայթեզրում բռնվել է ոստիկանության աշխատակցի կողմից:
Գործով վկա Պետրոս Լյուդվիգի Մկրտչյանի ցուցմունքով այն մասին, որ 2009թ. ապրիլի 6-ին, ինքը և Ռաֆիկ Վարուժանի Օհանյանը անցնելիս են եղել ոստիկանության Արաբկիրի բաժնի շենքի մոտով, երբ իրենց ոստիկանության աշխատակիցը հրավիրել է ոստիկանության բաժին, որպես ընթերակա մասնակցելու անձի անձնական խուզարկությանը: Իրենք բարձրացել են ոստիկանության շենք, որտեղ աշխատասենյակներից մեկում, ոստիկանության աշխատակիցը իրականացրել է մի երիտասարդի անձնական խուզարկություն: Այդ երիտասարդը ներկայացել է որպես Էրիկ Մուշեղի Բաղդասարյան: Վերջինիս անձնական խուզարկության ընթացքում նրա բաճկոնի ձախ ծոցագրպանից ոստիկանության աշխատակցի կողմից հայտնաբերվել է թվով 4 հատ 5000 ՀՀ թղթադրամ և թվով 28 հատ 1000 ՀՀ թղթադրամ, ընդհանուր 48 000 ՀՀ դրամ գումար: Գումարը փաթեթավորվել և կնիքվել է: Նշված գործողության վերաբերյալ կազմվել է արձանագրություն, որը հաստատել են նաև իրենք ստորագրություններով:
Գործով վկա Ռաֆիկ Վարուժանի Օհանյանի նախաքննության ընթացքում տված նույնաբովանդակ ցուցմունքով:
Անձին ոստիկանության բաժին բերման ենթարկելու մասին արձանագրությամբ, ըստ որի Էրիկ Մուշեղի Բաղդասարյանը 2009թ. ապրիլի 6-ին ժամը 1900-ին ոստիկանության Արաբկիրի բաժին է բերման ենթարկվել կողոպուտ կատարելու կասկածանքով:
Անձնական խուզարկություն կատարելու մասին արձանագրությամբ, ըստ որի Էրիկ Մուշեղի Բաղդասարյանի բաճկոնի ձախ ծոցագրպանից հայտնաբերվել է թվով 4 հատ 5000 ՀՀ թղթադրամ և թվով 28 հատ 1000 ՀՀ թղթադրամ, ընդհանուր 48 000 ՀՀ դրամ գումար, որը նա փորձել է հափշտակել սույն քրեական գործով տուժող Լիլիթ Մանուկյանից:
Էրիկ Մուշեղի Բաղդասարյանի անձնական խուզարկության ընթացքում հայտնաբերված և իրեղեն ապացույց ճանաչված թղթադրամների առկայությամբ:
Դատարանը գտնում է, որ գործով անթույլատրելի և ոչ վերաբերելի ապացույցներ չկան:
4.Դատարանի իրավական վերլուծությունները.
Դատարանը հիմք ընդունելով մեղադրանքի հիմքում դրված ապացույցները, գտնում է, որ ամբաստանյալ Էրիկ Մուշեղի Բաղդասարյանին առաջադրված մեղադրանքը ՀՀ քրեական օրենսգրքի 34-176 հոդվածի 1-ին մասով հիմնավորված է: Նրա կողմից կատարված արարքը համապատասխանում է ՀՀ քրեական օրենսգրքի 34-176 հոդվածի 1-ին մասի հատկանիշներին և արարքի որակումը ճիշտ է:
Ամբաստանյալ Էրիկ Մուշեղի Բաղդասարյանի նկատմամբ պատիժ նշանակելիս, դատարանը հաշվի է առնում կատարած արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում որ նա հանցանքն ընդունել և զղջում է կատարած արարքի համար, խնամքին են գտնվում երկու անչափահաս երեխաները և կինը, որոնց միակ կերակրողն ինքն է:
Պատասխանատվությունը և պատիժը ծանրացնող հանգամանքներ չկան:
Դատարանն անդրադառնալով իրեղեն ապացույցների տնօրինման հարցին, գտնում է, որ իրեղեն ապացույց ճանաչված, նախաքննության ընթացքում տուժող Լիլիթ Մանուկի Մանուկյանին ի պահ հանձնված թվով 4 հատ 5000 ՀՀ թղթադրամները և թվով 28 հատ 1000 ՀՀ թղթադրամները պետք է թողնել նրա տնօրինությանը:
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360 հոդվածներով, դատարանը

Վ Ճ Ռ Ե Ց

Էրիկ Մուշեղի Բաղդասարյանին մեղավոր ճանաչել ՀՀ քրեական օրենսգրքի 34-176 հոդվածի 1-ին մասով և նրան դատապարտել տուգանքի երկու հարյուր հազար (200.000) ՀՀ դրամ գումարի չափով:
Էրիկ Մուշեղի Բաղդասարյանի նկատմամբ որպես կալանավորման այլընտրանքային խափանման միջոց կիրառված գրավը` 500.000 ՀՀ դրամի չափով, թողնել անփոփոխ, մինչև դատավճռի օրինական ուժի մեջ մտնելը:
Իրեղեն ապացույց ճանաչված, տուժող Լիլիթ Մանուկի Մանուկյանին ի պահ հանձնված թվով 4 հատ 5000 ՀՀ թղթադրամները և թվով 28 հատ 1000 ՀՀ թղթադրամները թողնել նրան` ի տնօրինություն:
Դատավճիռը կարող է բողոքարկվել ՀՀ վերաքննիչ քրեական դատարան` հրապարակաման պահից մեկամսյա ժամկետում:
ԴԱՏԱՎՈՐ` Լ.ԱՎԵՏԻՍՅԱՆ