ԴԱՏԱՎՃԻՌ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

11.06.2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր իրավասության առաջին ատյանի դատարանը հետևյալ կազմով`
նախագահող դատավորª Ս.Ղազարյան
քարտուղարությամբª Հ.Ավագյանի
մասնակցությամբ`
մեղադրողª Ս.Բադալյանի

Դռնբաց դատական նիստում քննության առավ քր.գործն ըստ մեղադրանքի

Գևորգ Տիգրանի Բալխչյանի, ծնված 08.02.1984թ., ք.Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, նախկինում չդատված, ֆիզիկապես առողջ, զինապարտ, չի աշխատում, բնակվում է ք.Երևան Ավան 14 փողոց, 4-րդ նրբանցք, 10 տուն:
Տիգրան Կաթմոսի Բալխչյանի, ծնված 22.06.1957թ. ք. Երևան, ազգությամբ հայ, ՀՀ քաղաքացի, միջնակարգ կրթությամբ, ամուսնացած, վատառողջ, տառապում է սրտի անոթային հիվանդությամբ, չի աշխատում, նախկինում դատված` 07.04.08թ. ՀՀ քր. օր-ի 258 հոդվածի 3-րդ մասի 4-րդ կետով, դատապարտվել է ազատազրկման 1 տարի ժամկետով, դատվածությունը չմարված, փաստացի բնակվում է ք.Երևան, Ավան 14 փողոց 4-րդ նրբանցք 10 տանը:

Ամբաստանվում են ՀՀ քր. օր-ի 258 հոդվածի 1-ին մասով, այն բանի համար, որ նրանք հանդիսանալով հայր և որդի 2009թ. փետրվարի 07-ին ժամը 01:30-ի սահմաններում Երևան քաղաքի Կ.Ուլնեցու 3-րդ փակուղու 5-րդ շենքում կատարել են խուլիգանություն:
Այն է` 2009թ. փետրվարի 7-ին ժամը 01:30-ի սահմաններում երկուսով միասին որդու` Գևորգ Բալխչյանի կնոջը` Ելենա Քոչարովային տուն տանելու նպատակով գնացել են վերջինիս մոր` Լարիսա Քոչարովայի ընկերուհի Սվետլանա Թումանյանի Երևան քաղաքի Կ.Ուլնեցի 3 փակ. 5-րդ շենքի 15 բնակարան: Տեսնելով, որ բնակարանատերերը դուռը չեն բացում և Ե.Քոչարովան չի ցանկանում դուրս գալ բնակարանից, երկուսով շուրջ 10 րոպե տևողությամբ դիտավորությամբ կոպիտ կերպով խախտել են հասարակական կարգը, անհարգալից վերաբերմունք դրսևորելով հարևանությամբ բնակվող բնակիչների նկատմամբ` սեռական բնույթի հայհոյանքներ տալով, ձեռքերով ուժգին հարվածել են Կ.Ուլնեցի 3 փակ. 5-րդ շենքի 15 բնակարանի մուտքի դռանը:
Վերը նշված արարքների համար Գևորգ և Տիգրան Բալխչյաններին մեղադրանք է առաջադրվել ՀՀ քր. օր-ի 258 հոդվածի 1-ին մասով, որում նրանք իրենց լիովին մեղավոր են ճանաչել և ցուցմունք են տվել, որ իրոք կատարել են մեղսագրված արարքը հայտնելով, որ Գ.Բալխչյանը իր կնոջ` Ելենա Քոչարովայի և նորածին դստեր հետ բնավել է Բաբաջանյան 131 շենքի 9 բնակարանում: Նշված բնակարանում գազի տեղադրման աշխատանքներ կատարելու կապակցությամբ 2009թ. փետրվարի 05-ին կնոջը և երեխային տարել է զոքանչի` Երևան քաղաքի Կ.Ուլնեցու 2-րդ փակուղի 2-րդ շենքի 14 բնակարան: Գազի տեղադրման աշխատանքները ավարտվելուն պես, նրանց տուն բերելու նպատակով երեկոյան զանգահարել է կնոջը ու տեղեկացրել այդ մասին: Հեռախոսային խոսակցության ժամանակ նրանց միջև կենցաղային հարցի շուրջ վեճ է առաջացել: Դրանից հետո իրենք երկուսով Տ.Բալխչյանի մեքենայով գնացել են զոքանչի տուն: Շենքի մուտքի մոտ տեսել են զոքանչին` Լ.Քոչարովային ու իմացել, որ կինը` Ելենա Քոչարովան երեխայի հետ տանը չեն: Ենթադրելով, որ նրանք կլինեն Լ.Քոչարովայի ընկերուհու` Ս.Թումանյանի Կ.Ուլնեցու 3 փակուղի 5-րդ շենքի 13 բնակարանում, գնացել են նրա տուն: Դռան զանգը տալուց հետո, տեսնելով, որ բնակարանի դուռը չեն բացում, սկսել են ձեռքերով ուժգին հարվածել բնակարանի մուտքի դռանը և սեռական բնույթի հայհոյանքներ տալով պահանջել, որպեսզի կինը դուրս գա: Քիչ հետո բնակարանի ներսից լսելով, որ ոստիկանություն է գալիս, հոր հետ միասին հեռացել են: Նշել են նաև, որ միջադեպը տևել է մոտ 10-15 րոպե, իրենք սպառնալիքներ չեն տվել, չեն վնասել Թումանյանների մուտքի դուռը:
Ամբաստանյալներ Տիգրան և Գևորգ Բալխչյաններին մեղսագրված արարքը ապացուցվել է ինչպես իր խոստովանական ցուցմունքով, այնպես էլ գործով ձեռք բերված հետևյալ ապացույցներով.
Գործով վկա Սվետլանա Թումանյանի ցուցմունքով այն մասին, որ ընտանիքի հետ բնակվում է Կ.Ուլնեցու 3 փակուղի 5-րդ շենքի 13 բնակարանում: Լարիսա և Ելենա Քոչարովաներին ճանաչում է վաղուց, Լ.Քոչարովայի հետ գտնվում է մտերիմ հարաբերությունների մեջ: 2009թ. փետրվարի 6-ին իրենց տուն են եկել Լարիս և Ելենա Քոչարովաները, ընկերուհին հայտնել է, որ աղջկա և ամուսնու միջև վիճաբանություն է եղել և նրա ամուսինը գալիս է կնոջ հետևից, իսկ իր աղջիկը չի ցանկանում գնալ: Փետրվարի 07-ին ժամը 01:30-ի սահմաններում, իրենց տուն են եկել Գևորգ և Տիգրան Բալխչյանները: Ելենա Քոչարովայի խնդրանքով, երբ իրենք դուռը չեն բացել, Գևորգ և Տիգրան Բալխչյանները մոտ 15 րոպե տևողությամբ սկսել են բարձրաձայն աղմկել, սեռական բնույթի հայհոյանքներ տալ, պահանջել որպեսզի դուռը բացեն: Տեսնելով, որ նրանք չեն հանգստանում և շարունակում են աղմկել, հայհոյել և իրենց դուռը անընդմեջ ծեծել, ներսից նրանց ասել են, որ ոստիկանություն է գալիս: Դրանից հետո նրանք դուրս են եկել շենքից:
Գործով վկա Ս.Թումանյանի ամուսին Մաքսիմ Թումանյանի և որդի` Սամսոն Թումանյանի նույնաբովանդակ ցուցմունքներով:
Գործով վկա Լարիսա Քոչարովայի ցուցմունքով, այն մասին, որ միայնակ բնակվում է ք.Երևան Կ.Ուլնեցու 2-րդ փակուղի 2-րդ շենքի 14 բնակարանում: Ելենա Քոչարովան իր դստեր և ամուսնու` Գևորգ Բալխչյանի հետ բնակվում են առանձին: 2009թ. փետրվարի 05-ին, աղջիկը երեխայի հետ եկել է իր տուն, քանի որ նրանց բնակարանում գազի տեղադրման աշխատանքներ էին կատարվում:
Հաջորդ օրը փետրվարի 6-ի երեկոյան, երբ տանը գտնվել են երկուսով նկատել է, որ Ելենան հեռախոսով վիճաբանում է ամուսնու հետ: Ինքը սաստել է աղջկան, որպեսզի վերջինս ցած դնի հեռախոսափողը: Ապա մտավախություն ունենալով, որ Ելենայի ամուսինը կարող է գալ իրենց բնակարան և վիճաբանություն սկսել, զանգահարել է ընկերուհուն` իրենց շենքի հարևանությամբ բնակվող Սվետլանա Թումանյանին, նրան հայտնել կատարվածի մասին և աղջկան երեխայի հետ ուղարկել նրա տուն: Որոշ ժամանակ անց եկել է փոսան` Գևորգ Բալխչյանը, հոր` Տիգրան Բալխչյանի հետ և իմանալով, որ Ելենան տանը չի, հեռացել են: Հասկանալով, որ նրանք գնում են իր ընկերուհի Ս.Թումանյանի տուն, շտապ զանգել են է նրանց և հայտնել , որ Գևորգն ու Տիգրանը գալիս են: Որոշ ժամանակ անց ինքն էլ է գնացել նրանց բնակարան և իմացել, որ Գ.Բալխչյանը և նրա հայրը տեսնելով, որ Ս.Թումանյանը բնակարանի դուռը չի բացում, մոտ 15 րոպե հայհոյանքներ են տվել, ուժգին հարվածել են բնակարանի մուտքի դռանը, ապա հեռացել են:
Ամբաստանյալ Գևորգ Բալխչյանի կնոջ` Ելենա Քոչարովայի նույնաբովանդակ ցուցմունքներով:
Գործով վկա Վարդան Հովհաննիսյանի ցուցմունքով այն մասին, որ ընտանիքով բնակվում են Կ.Ուլնեցու 3 փակ. 5-րդ շենքի 13 բնակարանում իր ընտանիքի հետ միասին: Թումանյանների ընտանիքին ճանաչում է որպես իրենց դիմացի հարևան: 2009թ. փետրվարի 07-ին ժամը 01:30-ի սահմաններում, երբ ինքը կնոջ հետ գտնվել է իրենց տանը, տվել են իրենց բնակարանի դռան զանգը: Ինքը բացել է դուռը և տեսել է իրեն անծանոթ երկու անձնավորություն, որոնց հետագայում իմացել է, որ հայր ու որդի Բալխչյաններն են: Նրանք հանտնել են, թե որտեղ է Ելենան, ապա տեսնելով, որ իրենց տանը ոչ մի Ելենա չկա, հեռացել են, թե որն է Սվետլանայի բնակարանը, ինքը նրանց մատնացույց է արել դիմացի բնակարանը և դուռը փակել: Մի քանի րոպե անց դրսից լսել է Բալխչյանների աղմուկի ձայները, որոնք զուգորդվել են սեռական բնույթի հայհոյանքներով: Ինքը ցանկացել է բացել դուռը և պարզել թե ինչ է կատարվում, սակայն իր կինը` Մարիամ Պետրոսյանը խնդրել է դուրս չգալ:
Վ.Հովհաննիսյանի կնոջ` Մարիամ Պետրոսյանի, գործով մյուս վկաներ Լուսինե Հարությունյանի, Սամվել Սամվելյանի նույնաբովանդակ ցուցմունքներով:
Դատարանը հետազոտելով գործով ձեռքբերված ապացույցները, համադրելով դրանք միմյանց հետ, տալով դրանց քրեաիրավական գնահատական, ղեկավարվելով օրենքով իրավագիտակցությամբ և ներքին համոզմամբ, հանգում է այն հետևության, որ Տիգրան և Գևորգ Բալխչյանների մեղքը ՀՀ քր. օր-ի 258 հոդվածի 1-ին մասով լիովին ապացուցված է:
Քննության առնելով ամբաստանյալներ Տիգրան և Գևորգ Բալխչյանների նկատմամբ նշանակվող պատժի հարցը` դատարանը գնահատում է ինչպես արարքի բնույթն ու վտանգավորության աստիճանը, այնպես էլ նրանց անձը բնութագրող, պատասխանատվությունը մեղմացնող և ծանրացնող հանգամանքները:
Անձը բնութագրող հանգամանք դատարանը հաշվի է առել այն, որ ամբաստանյալներից Տիգրան Բալխչյանը վատառողջ է, տառապում է սրտանոթային հիվանդությամբ:
Պատասխանատվությունը մեղմացնող հանգամանք դատարանը դիտում է այն, որ նրանք անկեղծորեն զղջում են կատարած արարքի համար:
Պատասխանատվությունը ծանրացնող հանգամանք դատարանը Գ.Բալխչյանի մասով չի գտել, իսկ Տ.Բալխչյանի մասով դիտել է արարքի ռեցիդիվը:
Վերլուծելով վերը նշվածը դատարանը գտնում է, որ Տիգրան և Գևորգ Բալխչյանների ուղղումն ու վերադասիարակումը հնարավոր է տուգանքի ձևով պատիժ կրելով, որով կվերականգնվի նաև սոցիալական արդարությունը, նշանակված պատիժը կծառայի իր նպատակին:
Ելնելով վերոգրյալից և ղեկավարվելով ՀՀ քր. դատ. օր-ի 357-360 հոդվածներով դատարանը

Վ Ճ Ռ Ե Ց

Ամբաստանյալ Գևորգ Տիգրանի Բալխչյանին մեղավոր ճանաչել ՀՀ քր. օր-ի 258 հոդվածի 1-ին մասով և նրան դատապարտել տուգանքի 30.000 /երեսուն հազար/ ՀՀ դրամ: Նրա նկատմամբ ընտրված խափանման միջոցը թողնել անփոփոխ:
Ամբաստանյալ Տիգրան Կաթմոսի Բալխչյանին մեղավոր ճանաչել ՀՀ քր. օր-ի 258 հոդվածի 1-ին մասով և նրան դատապարտել տուգանքի 40.000 /քառասուն հազար/ ՀՀ դրամ: Նրա նկատմամբ ընտրված խափանման միջոցը թողնել անփոփոխ:
Դատավճիռը կարող է բողոքարկվել ՀՀ վերաքննիչ քրեական դատարան, այն հրապարակելուց հետո մեկամսյա ժամկետում:



ԴԱՏԱՎՈՐª Ս.ՂԱԶԱՐՅԱՆ