Գործ ԵԱՔԴ / 0037/01/09







Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

21. 07.2009թ. ք.Երևան

Երևան քաղաքի Արաբկիր և Քանաքեռ-Զեյթուն համայնքների ընդհանուր
իրավասության առաջին ատյանի դատարանը

Նախագահությամբ դատավոր` Մ.Խաչատրյանի
Քարտուղարությամբ` Հ.Արտաշեսյանի
Մասնակցությամբ
Մեղադրող` Հ.Հարությունյանի
Պաշտպան` Ա.Հակոբյանի



Դռնբաց դատական նիստում քննության առավ քրեական գործն ըստ մեղադրանքի Վարդան Սերյոժայի Ասատրյանի` ծնված 1958 թվականին Երևան քաղաքում, հայ, ՀՀ քաղաքացի, բարձրագույն կրթությամբ, ամուսնացած, ծառայել է ՀՀ ՊՆ քննչական վարչությունում որպես ՀԿԳ ավագ քննիչ, գրանցված է ք.Երևան, Դավիթաշեն 9-րդ փողոց, 18 տուն, նախկինում չդատված: Մեղադրվում է ՀՀ քրեական օրենսգրքի 309-րդ հոդվածի 1-ին մասով:
Արագացված դատաքննությամբ դատարանն ապացուցված համարեց հետևյալը.
Նախաքննության մարմինը Վարդան Սերյոժայի Ասատրյանին ՀՀ քրեական օրենսգրքի 309-րդ հոդվածի 1-ին մասով մեղադրանք է առաջադրել այն բանի համար, որ նա, ծառայելով ՀՀ պաշտպանության նախարարության քննչական վարչությունում որպես հատկապես կարևոր գործերի ավագ քննիչ, հանդիսանալով պաշտոնատար անձ, վարույթում քննվող քրեական գործով դիտավորությամբ կատարել է գործողություն, որն ակնհայտորեն դուրս է եկել իր լիազորությունների շրջանակից` էական վնաս պատճառելով պետության օրինական շահերին:
Այսպես` ՀՀ ՊՆ ՀԿԳ ավագ քննիչ Վարդան Ասատրյանը, իր վարույթում քննվող քրեական գործով մեղադրյալ Արշակ Հովսեփյանի կողմից թիվ 17079 զորամասի հրամանատարի տեղակալ, մայոր Մամիկոն Վարդանյանի առողջությանը ծանր վնաս պատճառելու հետևանքով վերջինիս բուժման և դրա հետ կապված ծախսերն օրենքով սահմանված կարգով վերականգնելու ուղղությամբ միջոցներ ձեռնարկելու փոխարեն, անձնական շահագրգռվածությունից ելնելով, 2008 թվականի դեկտեմբերի 3-ին Երևանի Սունդուկյանի փողոցի 66ա շենքում գտնվող իր աշխատասենյակում բանակցություններ է վարել մեղադրյալ Արշակ Հովսեփյանի հոր` վկա Սպարտակ Հովսեփյանի հետ և ակնհայտորեն դուրս գալով օրենքով իրեն վերապահված լիազորությունների շրջանակից` Արշակ Հովսեփյանի վերաբերյալ քրեական գործը դատարան չուղարկելու պատրվակով պահանջել է 766.125 դրամին համարժեք 2500 ԱՄՆ դոլար` Մամիկոն Վարդանյանին տալու և վերջինիս պատճառված նյութական վնասը հարթելու համար, որպիսի գործողություններով հեղինակազրկել է իշխանության մարմիններին` էական վնաս պատճառելով պետության օրինական շահերին:
Մինչև դատաքննության սկսելը ինչպես ամբաստանյալ Վարդան Ասատրյանը, այնպես էլ նրա շահերի պաշտպանը խնդրեցին կիրառել արագացված դատաքննություն, որին մեղադրողը չառարկեց:
Դատարանը համոզվելով, որ առկա են ՀՀ քրեական դատավարության օրենսգրքի 375.1 և 375.2 հոդվածներով նախատեսված պայմանները, դատական նիստում արձանագրային որոշում է կայացրել արագացված դատական քննություն անցկացնելու մասին:
Դատարանը հիմք ընդունելով մեղադրանքի հիմքում դրված ապացույցները գտնում է, որ ամբաստանյալ Վարդան Ասատրյանին ՀՀ քրեական օրենսգրքի 309-րդ հոդվածի 1-ին մասով առաջադրված մեղադրանքը հիմնավորված է:
Ամբաստանյալ Վարդան Ասատրանին պատիժ նշանակելիս, դատարանը հաշվի է առնում կատարված արարքի հանրության համար վտանգավորության աստիճանը, ինչպես նաև հանցավորի անձը:
Որպես ամբաստանյալի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա նախկինում դատված չի եղել, ամուսնացած է, ունի երկու երեխա, անկեղծորեն զղջում է կատարվածի համար:
Պատիժը և պատասխանատվությունը ծանրացնող հանագամանք գործում առկա չէ:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360-րդ, 365-րդ, 373-րդ, 375.1-375.4-րդ հոդվածներով դատարանը


ՎՃՌԵՑ

Վարդան Սերյոժայի Ասատրյանին մեղավոր ճանաչել ՀՀ քրեական օրենսգրքի 309-րդ հոդվածի 1-ին մասով և դատապարտել ազատազրկման 2 /երկու/ տարի ժամկետով:
Կիրառել Հայաստանի Հանրապետության Ազգային ժողովի ՙՀամաներում հայտարարելու մասին՚ 19.06.2009 թ. որոշման 1-ին կետի 1-ին ենթակետը և Վարդան Սերյոժայի Ասատրյանին ազատել նշանակված 2 /երկու/ տարի ազատազրկումը կրելուց:
Ընտրված խափանման միջոց ստորագրություն չհեռանալու մասին թողնել անփոփոխ` մինչև սույն դատավճռի օրինական ուժի մեջ մտնելը:
Գաղտնալսումների վերաբերյալ ձայներիզը թողնել քրեական գործում:
Դատավճիռը դատավարության մասնակիցների կողմից 1 /մեկ/ ամսվա ընթացքում կարող է բողոքարկվել ՀՀ վերաքննիչ քրեական դատարան: