Գործ հ. ԵԱՔԴ/0028/01/09

Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ ՈՒ Ն
Վ Ե Ր Ա Ք Ն Ն Ի Չ Ք Ր Ե Ա Կ Ա Ն Դ Ա Տ Ա Ր Ա Ն

Ո Ր Ո Շ Ո Ւ Մ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

16 սեպտեմբերի 2009թ. ք. Երևան

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ

ՆԱԽԱԳԱՀՈՂ ԴԱՏԱՎՈՐ` Ա.ԽԱՉԱՏՐՅԱՆԻ
ԴԱՏԱՎՈՐՆԵՐ` Մ.ՊԵՏՐՈՍՅԱՆԻ
Ս.ՀԱՄԲԱՐՁՈՒՄՅԱՆԻ

ՔԱՐՏՈՒՂԱՐՈՒԹՅԱՄԲ` Թ.ԿԱՇԻԿՅԱՆԻ

ՄԱՍՆԱԿՑՈՒԹՅԱՄԲ՝
ՄԵՂԱԴՐՈՂ` Ն.ԱՇՐԱՖՅԱՆԻ
ՊԱՇՏՊԱՆՆԵՐ` Ա.ՋՈՒՎԱՆՈՎԱՅԻ
Վ.ԳԵՎՈՐԳՅԱՆԻ
Գ.ՀԱԿՈԲՅԱՆԻ


Դռնբաց դատական նիստում պաշտպաններ Ա.Ջուվանովայի, Վ.Գևորգյանի և Գ.Հակոբյանի վերաքննիչ բողոքների հիման վրա վճռաբեկ դատարանում գործի քննության համար սահմանված կարգով քննության առնելով քրեական գործն ըստ մեղադրանքի` Արման Լենդրուշի Կարապետյանի` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, 316-րդ հոդվածի 2-րդ մասով, Արտյոմ Արտակի Հովհաննիսյանի` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, Արամայիս Մնացականի Սարոյանի` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով

Պ Ա Ր Զ Ե Ց

1.Գործի դատավարական նախապատմությունը

04.01.2009թ. Արաբկիրի քննչական բաժնում ՀՀ քրեական օրենսգրքի 258-րդ հոդվածի 3-րդ մասի 1-ին, 2-րդ կետերով և 316-րդ հոդվածի 1-ին մասով հարուցվել է թիվ 14100209 քրեական գործը:
05.01.2009թ. Արտյոմ Արտակի Հովհաննիսյանը ձերբակալվել է:
08.01.2009թ. որոշմամբ Արտյոմ Հովհաննիսյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին, 2-րդ կետերով և 316-րդ հոդվածի 2-րդ մասով:
Նույն օրը, վարույթն իրականացնող մարմինը միջնորդություն է հարուցել Արաբկիր և Քանաքեռ-Զեյթուն համայնքների ընդհանուր իրավասության դատարան /այսուհետ` դատարան/` մեղադրյալ Ա.Հովհաննիսյանի նկատմամբ կալանքը որպես խափանման միջոց ընտրելու մասին:
Դատարանի 08.01.2009թ. որոշմամբ մեղադրյալ Ա.Հովհաննիսյանի նկատմամբ որպես խափանման միջոց է ընտրվել կալանք 2/երկու/ ամիս ժամկետով: Կալանքի սկիզբը հաշվվել է 05.01.2009թ.-ից:
14.01.2009թ. Արամայիս Մնացականի Սարոյանը ինքնակամ ներկայացել է ՀՀ ոստիկանության Արաբկիրի բաժին:
Նույն օրը, Արամայիս Սարոյանը ձերբակալվել է:
16.01.2009թ. Արման Լենդրուշի Կարապետյանը ինքնակամ ներկայացել է ՀՀ ոստիկանության Արաբկիրի բաժին:
Նույն օրը, Արման Կարապետյանը ձերբակալվել է:
17.01.2009թ. որոշմամբ Արամայիս Սարոյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին, 2-րդ կետերով և 316-րդ հոդվածի 2-րդ մասով:
Նույն օրը, վարույթն իրականացնող մարմինը Արամայիս Սարոյանի նկատմամբ որպես խափանման միջոց է կիրառել ստորագրություն չհեռանալու մասին:
19.01.2009թ. որոշմամբ Արման Կարապետյանը ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին, 2-րդ կետերով և 316-րդ հոդվածի 2-րդ մասով:
Նույն օրը, վարույթն իրականացնող մարմինը միջնորդություն է հարուցել դատարան մեղադրյալ Ա.Կարապետյանի նկատմամբ կալանքը որպես խափանման միջոց ընտրելու մասին:
Դատարանի 19.01.2009թ. որոշմամբ մեղադրյալ Ա.Կարապետյանի նկատմամբ որպես խափանման միջոց է ընտրվել կալանք 2/երկու/ ամիս ժամկետով: Կալանքի սկիզբը հաշվվել է 16.01.2009թ.-ից:
19.03.2009թ. որոշումներով մեղադրյալներ Ա.Հովհաննիսյանին, Ա.Սարոյանին և Ա.Կարապետյանին աջառադրված մեղադրանքը փոփոխվել է և մեղադրանք է առաջադրվել` Արտյոմ Հովհաննիսյանին և Արամայիս Սարոյանին ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, իսկ Արման Կարապետյանին` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, 316-րդ հոդվածի 2-րդ մասով:
30.03.2009թ. քրեական գործը մեղադրական եզրակացությամբ ուղարկվել է Արաբկիր և Քանաքեռ-Զեյթուն համայնքների ընդհանուր իրավասության դատարան:
Ամբաստանյալ Արման Լենդրուշի Կարապետյանը դատարանի 2009թ. հուլիսի 24-ի դատավճռով մեղավոր է ճանաչվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, ՀՀ քրեական օրենսգրքի 316-րդ հոդվածի 2-րդ մասով և դատապարտվել` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով ազատազրկման 1/մեկ/ տարի ժամկետով, ՀՀ քրեական օրենսգրքի 316-րդ հոդվածի 2-րդ մասով` ազատազրկման 5/հինգ/ տարի ժամկետով:
ՀՀ քրեական օրենսգրքի 66-րդ հոդվածի հիման վրա , նշանակված պատիժները մասնակի գումարելու սկզբունքով, Արման Կարապետյանի նկատմամբ վերջնական պատիժ է նշանակվել ազատազրկում` 5/հինգ/ տարի 2/երկու/ ամիս ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվվել է 2009թ. հունվարի 16-ից:
Ա.Կարապետյանի նկատմամբ ընտրված խափանման միջոցը` կալանավորումը թողնվել է անփոփոխ, մինչև դատավճռի օրինական ուժի մեջ մտնելը:
Նույն դատավճռով Արտյոմ Արտակի Հովհաննիսյանը մեղավոր է ճանաչվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով և դատապարտվել` ազատազրկման 1/մեկ/ տարի ժամկետով:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Պատժի սկիզբը հաշվվել է 2009թ. հունվարի 05-ից:
Արտյոմ Հովհաննիսյանի նկատմամբ ընտրված խափանման միջոցը` կալանավորումը թողնվել է անփոփոխ, մինչև դատավճռի օրինական ուժի մեջ մտնելը:
Նույն դատավճռով Արամայիս Մնացականի Սարոյանը մեղավոր է ճանաչվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով և դատապարտվել` ազատազրկման 1/մեկ/ տարի ժամկետով:
Արամայիս Սարոյանի նկատմամբ նշանակված պատժից հանվել է արգելանքի տակ գտնվելու 3/երեք օրը և վերջնական պատիժ է նշանակվել ազատազրկում 11/տասնմեկ/ ամիս 27/քսանյոթ/ օր ժամկետով:
Արամայիս Սարոյանի նկատմամբ ընտրված խափանման միջոցը` ստորագրություն չհեռանալու մասին, թողնվել է անփոփոխ, մինչև դատավճռի օրինական ուժի մեջ մտնելը:
Պատժի սկիզբը հաշվվել է դատավճռի կատարման օրվանից:
Պատիժը պետք է կրի ՀՀ ԱՆ համապատասխան քրեակատարողական հիմնարկում:
Տուժող Յուրա Բադիկյանի քաղաքցիական հայցի հարցը համարվել է լուծված:
Դատավճռի դեմ ամբաստանյալների շահերի պաշտպաններ Ա.Ջուվանովան, Վ.Գևորգյանը և Գ.Հակոբյանը բերել են վերաքննիչ բողոքներ:
Վերաքննիչ բողոքների առթիվ գրավոր պատասխաններ չեն ստացվել:
16.09.2009թ. տուժող Յուրա Բադիկյանը ներկայացրել է դիմում, որով հայտնել է, որ Արամայիս Սարոյանի նկատմամբ բողոք չունի:
Վերաքննիչ դատարանի 01.09.2009թ. որոշմսմբ վերաքննիչ բողոքը ընդունվել է վարույթ և գործը նշանակվել քննության վճռաբեկ դատարանում գործի քննության համար սահմանված կանոններով:

2.Գործի փաստական հանգամանքները

Ամբաստանյալներ Արամայիս Սարոյանը, Արտյոմ Հովհաննիսյանը, Արման Կարապետյանը և վկա Հայկ Ավանեսյանը 2009թ. հունվարի 3-ին, ժամը 20:30-ի սահմաններում, միասին, ալկոհոլային հարբածության վիճակում, Հայկ Ավանեսյանի` Երևան քաղաքի Մամիկոնյանց 19 շենքի 18 բնակարանից դուրս գալով, գնացել են Մամիկոնյանց և Ազատության պողոտաների խաչմերուկի կանգառ, փորձել են տաքսի ավտոմեքենա կանգնեցնել և գնալ տուն: Երբ ավտոմեքենաները չեն կանգնել, Արամայիս Սարոյանը, Արման Կարապետյանը և Արտյոմ Հովհաննիսյանը հրապարակավ, խուլիգանություն կատարելու դիտավորությամբ, կանգառում հավաքված հասարակության նկատմամբ բացահայտ անհարգալից վերաբերմունք դրսևորելով, շուրջ 10 րոպե տևողությամբ բարձրաձայն խուլիգանական բնույթի հայհոյանքներ են տվել: Այնուհետև շարունակելով խուլիգանական գործողությունները, չեն ենթարկվել ոստիկանի համազգեստով այդ պահին կանգառում գտնվող իշխանության ներկայացուցչին` ՀՀ ոստիկանության ՊՊԾ 2-րդ գումարտակի 1-ին վաշտի 1-ին դասակի ոստիկան, ոստիկանության ավագ Յուրա Բադիկյանի օրինական պահանջներին, այն է` դադարեցնել խուլիգանական գործողությունները:
Հայկ Ավանեսյանը մոտեցել է ոստիկանին և ներողություն խնդրել Արամայիս Սարոյանի, Արտյոմ Հովհաննիսյանի և Արման Կարապետյանի գործողությունների համար: Սակայն Արման Կարապետյանը, չենթարկվելով իր ծառայողական պարտականությունները կատարող հասարակական կարգի խախտումը խափանող ոստիկան Յուրա Բադիկյանի օրինական պահանջներին, հայհոյանքներով ուղեկցված, հարձակվել է նրա վրա, բռունցքով հարվածել Յուրա Բադիկյանի դեմքին և քթին` դիտավորությամբ պատճառելով թեթև մարմնական վնասվածք, որն արտահայտվել է վերջինիս քթի մեջքի շրջանի, գլխի աջ ճակատգագաթային շրջանի քերծվածքների, քթի ոսկրերի առանց տեղաշարժի կոտրվածքների ձևով: Դրանով իսկ Արման Կարապետյանը առողջության համար վտանգավոր բռնություն է գործադրել Յուրա Բադիկյանի նկատմամբ: Իսկ Արամայիս Սարոյանը և Արտյոմ Հովհաննիսյանը հետևելով Արման Կարապետյանի օրինակին, հայհոյանքներով ուղեկցված, հարձակվել են Յուրա Բադիկյանի վրա և առողջության համար ոչ վտանգավոր բռնություն գործադրելով, ծեծի են ենթարկել վերջինիս` ձեռքերով և ոտքերով հարվածելով նրան:
Հայկ Ավանեսյանը փորձել է կանխել կոնֆլիկտային իրավիճաը: Արման Կարապետյանը անզգուշությամբ մի կողմ է հրել Հայկ Ավանեսյանին, վերջինս գլխի ծոծրակի մասով դիպել է էլեկրական լույսի սյանը և ընկել գետնին` ստանալով թեթև մարմնական վնասվածքի հատկանիշներ ունեցող գանգուղեղային տրավմա և այլևս չի կարողացել որևիցե գործողություն կատարել: Առաջացած ծեծկրտուքի և բարձրաձայն հնչող խուլիգանական հայհոյանքների ձայների վրա կանգառում հավաքված որոշ քաղաքացիներ մոտեցել և փորձել են միջամտել և հանգստացնել ամբաստանյալներին, սակայն ապարդյուն: Այդ ժամանակ Արաբկիրի ոստիկանության բաժնի ԱԳԲ օպեր լիազոր Ռազմիկ Լյովայի Գենջոյանն իր ժառայողական աշխատասենյակի պատուհանից Ազատության և Մամիկոնյանց պողոտաների խաչմերուկի կանգառի կողմից հայհոյանքների և ծոծկռտուքի ձայներ լսելով, գնացել է դեպի նշված փողոցների խաչմերուկ և տեսել անօգնական վիճակում հայտնված ոստիկանի համազգեստով ոստիկանության ավագ Յուրա Բադիկյանին` կիսակռացած դիրքում, ում ձեռքերով և ոտքերով հարվածներ են հասցրել Արտյոմ Հովհաննիսյանը, Արման Կարապետյանը և Արամայիս Սարոյանը` բարձրաձայն հնչող լկտի հայհոյանքներով ուղեկցված: Սկզբում Ռազմիկ Գենջոյանը փորձել է ներկայանալ նշված անձանց ասելով, որ ինքն էլ է ոստիկան` քրեական հետախուզության աշխատակից, սակայն ամբաստանյալները, գտնվելով ալկոհոլային հարբածության վիճակում, ուշադրություն չեն դարձրել և շարունակել են հայհոյել ու հարվածել Յուրա Բադիկյանին: Ռազմիկ Գենջոյանը, փորձելով օգնել Յուրա Բադիկյանին, միջոցներ է ձեռնարկել սաստելու Ա.Հովհաննիսյանին, Ա.Կարապետյանին և Ա.Սարոյանին և խափանելու վերջիններիս խուլիգանական գործողությունները: Ռ.Գենջոյանը Ա.Հովհաննիսյանին բերման է ենթարկել ոստիկանության Արաբկիրի բաժին: Այդ ժամանակ դեպքի վայր են գնացել նաև ոստիկանության Արաբկիրի բաժնի օպերատիվ հերթապահ Գարիկ Մամիկոնի Մանուչարյանը, ինչպես նաև Ազատության պողոտայով պատահական անցնող Կ.Դեմիրճյանի անվան մետրոպոլիտենի քաղաքացիական հագուստներով ոստիկաններ Գոռ Աշոտի Մովսիսյանը և Արսեն Լևոնի Ենոքյանը:
Հասկանալով, որ բարձրաձայն աղմուկի վրա դեպքի վայրին մոտեցել են ոստիկանության աշխատակիցներ, Արման Կարապետյանը և Արամ Սարոյանը դիմել են փախուստի, իսկ Հայկ Ավանեսյանը և Արտյոմ Հովհաննիսյանը Յուրա Բադիկյանին օգնության հասած ոստիկանության աշխատակիցների կողմից դեպքի վայրից տարվել են ոստիկանության Արաբկիրի բաժին:

3.Վերաքննիչ բողոքների հիմքերը, փաստարկները և պահանջը

Ամբաստանյալ Արտյոմ Հովհաննիսյանի շահերի պաշտպան Վ.Գևորգյանը վերաքննիչ բողոքով խնդրել է` բեկանել և փոփոխել դատարանի 24.07.2009թ. դատական ակտը` Արտյոմ Հովհաննիսյանի նկատմամբ ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով նշանակված 1/մեկ/ տարի ժամկետով ազատազրկումը և նրա նկատմամբ նշանակել ՀՀ քրեական օրենսգրքի 258-րդ հոդվածի 3-րդ մասով նախատեսված ալտերտանիվ պատիժ` տուգանք կամ ՀՀ քրեական օրենսգրքի 70-րդ հոդվածի կիրառմամբ նրա նկատմամբ նշանակված պատիժը պայմանականորեն չկիրառել, սահմանելով փորձաշրջան, բերելով հետևյալ պատճառաբանությունները:
Բողոք բերած անձը գտնում է, որ դատարանը ամբաստանյալ Ա.Հովհաննիսյանի նկատմամբ պատիժ նշանակելիս չի պահպանել ՀՀ քրեական օրենսգրքի 4-րդ, 10-րդ, 11-րդ, 48-րդ, 61-րդ, 62-րդ և 70-րդ հոդվածների պահանջները, որոնք ազդել են գործով ճիշտ որոշում կայացնելու վրա:
Մասնավորապես, թեև դատարանը ակտում նշել է. <<Որպես ամբաստանյալ Արտյոմ Հովհաննիսյանի պատասխանատվությունը և պատիժը մեղմացնող հանգամանք դատարանը հաշվի է առնում այն, որ նա հանցանքն ընդունել է և զղջում է կատարած արարքի համար, նախկինում դատված չի եղել>>, սակայն եթե դատարանը հաշվի առներ գործի բնույթը և դատական ակտում շարադրեր Արտյոմ Հովհաննիսյանի պատասխանատվությունը և պատիժը մեղմացնող հանգամանքները, անձը բնութագրող տվյալները, մասնավորապես` նախաքննության ընթացքում և դատարանում իրեն մեղավոր ճանաչելով ինքնախոստովանական ցուցմունքներ տալու, կատարած արարքի համար անկեղծորեն զղջալու, գործով օբյեկտիվ ճշմարտության բացահայտմանը չխոչընդոտելու, քրեորեն պատժելի մեկ արարք կատարած լինելու, նախկինում դատապարտված չլինելու, հանցավոր կապեր չունենալու, դրական բնութագրվելու հանգամանքները, որոնք ապացուցում են նրա ուղղված և վերադաստիարակված լինելը, ապա նրա նկատմամբ պատժի անհատականացմամբ կնշանակեր արդարացի, ազատությունից զրկելու հետ չկապված պատիժ, որը կհամապատասխաներ նրա կատարած հանցանքի ծանրությանը, դա կատարելու հանգամանքներին, նրա անձին, ինչն այնուհանդերձ, դատարանը չի ցանկացել տեսնել: Մինչդեռ Արտյոմ Հովհաննիսյանն արդեն իսկ ուղղվել և վերադաստիարակվել է և նրան հասարակությունից մեկուսացնելու անհրաժեշտությունն ամենևին էլ չկար:
Բացի այդ, դատարանը որևէ ձևով դատավճռում չի պատճառաբանել, թե ինչից ելնելով Արտյոմ Հովհաննիսյանի նկատմամբ պատիժ է նշանակել ազատազրկման ձևով, այն դեպքում, երբ դատավճռում չի նշվել և քրեական գործում էլ չկա Արտյոմ Հովհաննիսյանի պատասխանատվությունը ծանրացնող որևէ հանգամանք, իսկ նրա պատասխանատվությունը մեղմացնող հանգամանքները բազմաթիվ են:
Բողոք բերած անձը գտնում է, որ ՀՀ քրեական օրենսգրքի 48-րդ հոդվածով ամրագրված պատժի նպատակների իրացվելիության հարցը սույն գործով լուծված է, քանի որ Արտյոմ Հովհաննիսյանը շուրջ ութ ամիս գտնվելով անազատության մեջ, ըստ էության արդեն իսկ կրել էր իր պատիժը և արդեն իսկ ուղղվել ու վերադաստիարակվել էր և պատժի խստությամբ, մասնավորապես ազատազրկման դատապարտելով չէ, որ պատիժի ենթարկվածը պետք է ուղղվի կամ սոցիալական արդարությունը վերականգնվի:
Բողոք բերած անձը վերլուծության ենթարկելով ՀՀ քրեական օրենսգրքի 70-րդ հոդվածի համապատասխան դրույթները իր խորին համոզմունքն է, որ ամբաստանյալ Ա.Հովհաննիսյանը գիտակցել և համապատասխան ճիշտ հետևություններ է արել, հետևապես վերջինս ՀՀ քրեական օրենսգրքի 70-րդ հոդվածի կարգով ենթակա է պատժի կրումից պայմանականորեն ազատման:
Ամբաստանյալ Արման Կարապետյանի շահերի պաշտպան Ա.Ջուվանովան վերաքննիչ բողոքով խնդրել է` մասնակիորեն բեկանել դատարանի 24.07.2009թ. դատավճիռը, Արման Կարապետյանին առաջադրված ՀՀ քրեական օրենսգրքի 316-րդ հոդվածի 2-րդ մասի հատկանիշներով մեղադրանքը կարճել, բերելով հետևյալ պատճառաբանությունները:
Բողոք բերած անձը գտնում է, որ ամբաստանյալ Արման Կարապետյանին ՀՀ քրեական օրենսգրքի 316-րդ հոդվածի 2-րդ մասով առաջադրված մեղադրանքն ապացուցված չէ, իսկ դատարանի դատավճիռը այդ մասով ենթակա է բեկանման:
ՀՀ քրեական օրենսգրքի 316-րդ հոդվածի 1-ին մասով նախատեսված հանցագործության հանցակազմի օբյեկտիվ կողմը դրսևորվում է իշխանության ներկայացուցչի կամ նրա մերձավորների նկատմամբ կյանքի կամ առողջության համար ոչ վտանգավոր բռնություն գործադրելու կամ դրա սպառնալիքով, կապված իշխանության ներկայացուցչի կողմից իր ծառայողական պարտականություննրը կատարելու հետ:
Կյանքի կամ առողջության համար ոչ վտանգավոր բռնություն են համարվում ծեծը, խոշտանգումը, ազատությունից զրկելը կամ այլ բռնի գործողություննրը, որոնք ֆիզիկական ցավ են պատճառում, բայց առողջությանը վնաս չեն հասցնում:
Նշված դեպքերում, սպառնալիքի բնույթը որոշելիս պետք է հաշվի առնել մի շարք հանգամանքներ մասնավորապես, հանցագործության վայրը, ժամանակը, հանցավորի և տուժողի ֆիզիկական հնարավորություննրը, հանցավորների և տուժողների քանակը, ցուցադրվող զենքի և այլ առարկայի բնույթը: Պետք է հաշվի առնվի նաև տուժողի ընկալումը:
Եթե սպառնալիքը տուժողի կողմից ընկալվել է կյանքի համար վտանգավոր, ապա արարքը պետք է որակել ՀՀ քրեական օրենսգրքի 316-րդ հոդվածի 2-րդ մասով, սակայն այսպիսի դեպքերում պետք է նկատի ունենալ, որ տուժողը կարող է նաև չափազանցնել սպառնացող վնասի բնույթը:
Ինչպես ասում են. <<Վախի աչքերը մեծ են>>: Այդպիսի դեպքերում է, որ անհրաժեշտ է հաշվի առնել վերը թվարկված հանգամանքները` իրականում սպառնացող վտանգի բնույթը որոշելու համար:
Իշխանության ներկայացուցչի կամ նրա մերձավոր ազգականի առողջությանը թեթև կամ միջին ծանրության վնաս հասցնելու դեպքում, արարքը որակվում է միայն քրական օրենսգրքի 316-րդ հոդվածի 2-րդ մասով: Սակայն եթե նշված անձնավորությանը ծանր վնաս է պատճառվում, ապա արարքը պետք է որակել հանցագործությունների համակցությամբ:
Իշխանության ներկայացուցչին դիմադրություն ցույց տալը դրսևորվում է նրանում, որ հանցավորը, բռնություն գործադրելով հակազդում է իշխանության ներկայացուցչի լիազորություննրի իրականցմանը կամ էլ հարկադրում է նրան հրաժարվելու իր լիազորություննրի իրականացումից:
Նման դեպքերում շատ կարևոր է գնահատել դիմադրություն ցույց տվողի և հակառակ կողմի ֆիզիկական տվյալները:
Քննարկվող հանցագործության սուբյեկտիվ կողմը բնութագրվում է ուղղակի դիտավորությամբ: Հանցավորը գիտակցում է, որ բռնություն կամ բռնության սպառնալիք է գործադրում իշխանության ներկայացուցչի կամ նրա մերձավորի նկատմամբ: Ընդ որում հանցագործության շարժառիթներն ու նպատակները թեև կարող են բազմազան լինել, վրեժ, պատասխանատվությունից խուսափել այլ հանցանքի կատարումը հեշտացնել և այլն:
Սրա հետ մեկտեղ բողոք բերած անձը անդրադառնալով ամբաստանյալ Արման Կարապետյանին ՀՀ քրեական օրենսգրքի 258-րդ հոդվածով առաջադրված մեղադրանքին նշել է, որ ամբաստանյալ Ա.Կարապետյանը ընդունում է, որ իրականում իր ընկերների հետ միասին գտնվել է հասարակական վայրում, վիճաբանության մեջ են մտել իշխանության ներկայացուցչի հետ, որպիսի արարքն էլ համապատասխանաբար որակվել է որպես ՀՀ քրեական օրենսգրքի 258-րդ հոդվածի 2-րդ մասի 1-ին և 2-րդ կետի հատկանիշներով կատարված:
Ամբաստանյալ Արամայիս Սարոյանի շահերի պաշտպան Գ.Հակոբյանը վերաքննիչ բողոքով խնդրել է` դատարանի 24.07.2009թ. դատավճիռը ամբաստանյալ Արամայիս Սարոյանի նկատմամբ նշանակված պատժատեսակի մասով բեկանել և Ա.Սարոյանի նկատմամբ նշանակել պատիժ տուգանքի ձևով, կամ ՀՀ քրեական օրենսգրքի 70-րդ հոդվածի կիրառմամբ Ա.Սարոյանի նկատմամբ նշանակված ազատազրկման ձևով պատիժը պայմանականորեն չկիրառել:
Բողոք բերած անձը գտնում է, որ դատարանը Արամայիս Սարոյանի նկատմամբ պատիժ նշանակելիս հաշվի չի առել անձը բնութագրող, պատասխանատվությունը և պատիժը մեղմացնող մի շարք հանգամանքներ, մասնավորապես` կատարած արարքի համար անկեղծորեն զղջալը, վարույթն իրականացնող մարմնին կամավոր ներկայանալը, ինքնախոստովանական ցուցմունքներ տալը և վարույթն իրականացնող մարմնին ակտիվորեն օժանդակելը, նախկինում ոչնչով արատավորված չլինելը, դրականորեն բնութագրվելը:
ՀՀ քրեական դատավարության օրենսգրքի 360-րդ հոդվածի 1-ին մասի 8-րդ կետի համաձայն դատավճիռ կայացնելիս դատարանն ի թիվս այլ հարցերի լուծում է նաև այն հարցը, թե ամբաստանյալն արդյոք պետք է կրի իր նկատմամբ նշանակված պատիժը:
Բացի այդ դատարանը Ա.Սարոյանի նկատմամբ պատիժ նշանակելով, առանց պատճառաբանության, անհիմն կերպով հանգել է հետևության, որ վերջինս պետք է կրի իր նկատմամբ նշանակված պատիժը, որպիսի հետևությունը հիմնավորված չէ և չի բխում գործի փաստական տվյալներից:
Նման հետևության հանգելով դատարանը թույլ է տվել նյութական և դատավարական իրավունքի մի շարք նորմերի խախտումներ.
Մասնավորապես` դատարանը անտեսել է ՀՀ քրեական օրենսգրքի 10-րդ, 48-րդ, 61-րդ և 70-րդ հոդվածների պահանջները, ինչպես նաև թույլ է տվել ՀՀ քրեական օրենսգրքի 358-րդ հոդվածի 4-րդ մասի պահանջի խախտում, համաձայն որի դատարանի դատավճիռը պետք է լինի պատճառաբանված: Պատճառաբանման ենթակա են դատարանի կողմից դատավճռում շարադրվող բոլոր հետևությունները և որոշումները: Դատարանը բացի ստանդարտ ձևակերպումներից, որևէ ձևով չի պատճառաբանել, թե ինչից ելնելով է հանգել հետևության, որ Ա.Սարոյանի նկատմամբ պետք է նշանակվի վերագրվող արարքի համար նախատեսված պատժատեսակներից առավել խիստ տեսակը, կամ ինչից ելնելով է հանգել հետևության, որ Ա.սարոյանը պետք է ռեալ կրի նշանակված ազատազրկման ձևով պատիժը:
Դատարանը դատավճռում թեև շարադրել է Արամայիս Սարոյանի անձը բնութագրող և պատասխանատվությունն ու պատիժը մեղմացնող մի շարք հանգամանքներ, մասնավորապես` նախկինում դատված կամ այլ կերպ արատավորված չլինելը, դրականորեն բնութագրվելը, վարույթն իրականացնող մարմնին կամավոր ներկայանալը, միաժամանակ արձանագրել է, որ Ա.Սարոյանի պատասխանատվությունը և պատիժը ծանրացնող հանգամանքներ չկան, սակայն այդ փաստերն իրական գնահատման չի արժանացրել և նշանակված պատիժը կրելու նպատակահարմարության տեսանկյունից չի դիտարկել:
Բացի այդ, պատիժ նշանակելիս և այն կրելու նպատակահարմարության հարցը քննարկելիս դատարանը պետք է հաշվի առներ նաև ՀՀ քրեական օրենսգրքի 61-րդ և 63-րդ հոդվածներով նախատեսված պատասխանատվությունն ու պատիժը մեղմացնող և ծանրացնող հանգամանքները: Դրանց գնահատմամբ է հնարավոր յուրաքանչյուր կոնկրետ գործով անհատական մոտեցում ցուցաբերել` ինչպես պատժի տեսակը և չափը որոշելիս, այնպես էլ այն կրելու նպատակահարմարության հարցը լուծելիս:
Քրեական օրենքի Ընդհանուր մասի վերը թվարկված դրույթներից հետևում է, որ հանցագործության համար մեղավոր ճանաչված անձի նկատմամբ ինչպես պատժատեսակի և պատժաչափի, այնպես էլ նշանակված պատիժը կրելու նպատակահարմարության վերաբերյալ դատարանի կողմից կայացված որոշումը պետք է հիմնված լինի կատարած հանցագործության, դրա առանձնահատկությունների, գործի կոնկրետ հանգամանքների, հանցավորի անձի, պատասխանատվությունը և պատիժը մեղմացնող կամ ծանրացնող հանգամանքների բազմակողմանի գնահատման վրա` նպատակ ունենալով ապահովել ՀՀ քրեական օրենսգրքի 48-րդ հոդվածի 2-րդ մասում նշված պատժի նպատակների իրագործման հնարավորությունը:
Նշանակված պատիժը կրելու պարտականությունից ազատելու հնարավորություն է նախատեսում ՀՀ քրեական օրենսգրքի 70-րդ հոդվածով սահմանված` պատիժը պայմանականորեն չկիրառելու ինստիտուտը:
ՀՀ քրեական օրենսգրքի 70-րդ հոդվածի 1-ին մասի համաձայն` եթե դատարանը, կալանքի, ազատազրկման կամ կարգապահական գումարտակում պահելու ձևով պատիժ նշանակելով, հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին: Նույն հոդվածի 2-րդ մասը սահմանում է, որ պատիժը պայմանականորեն չկիրառելիս դատարանը հաշվի է առնում, հանցավորի անձը բնութագրող տվյալները, պատասխանատվությունը և պատիժը մեղմացնող ու ծանրացնող հանգամանքները:
Այսինքն` օրենսդիրը պատիժը պայմանականորեն չկիրառելու հիմք է համարում դատարանի համոզվածությունը, որ դատապարտյալի ուղղվելը հնարավոր է առանց որոշակի պատժատեսակները ռեալ կրելու:
Նշանակված պատիժը պայմանականորեն չկիրառելիս դատարանը պետք է հանգամանորեն քննության առնի ինչպես հանցագործության կատարման, այնպես էլ հանցավորի անձին վերաբերող բոլոր հանգամանքները: Կարևորն այն է, որ դատարանը հանգի հիմնավոր եզրահանգման, որ դատապարտյալի ուղղումը հնարավոր է առանց նշանակված պատիժը կրելու:
Եթե անգամ դատարանը հիմնավոր պատճառաբանություն բերեր, որ Ա.Սարոյանի նկատմամբ պետք է նշանակվի նախատեսված պատժատեսակներից առավել խիստ տեսակը, ապա այս պարագայում գործում առկա հանգամանքների բազմակողմանի և օբյեկտիվ վերլուծության պարագայում ընդհանուր իրավասության դատարանը կհանգեր հետևության առ այն, որ ամբաստանյալ Ա.Սարոյանի նկատմամբ նշանակված ազատազրկման ձևով պատիժը պայմանականորեն չկիրառելով և վերջինիս նկատմամբ որոշակի ժամկետով փորձաշրջան նշանակելով կիրականանա ՀՀ քրեական օրենսգրքի 48-րդ հոդվածի 2-րդ մասով սահմանված պատժի նպատակները:

4.Վերաքննիչ դատարանի պատճառաբանությունները և եզրահանգումը

Վերաքննիչ բողոքների հիմքերի և հիմնավորումների սահմաններում, վերլուծելով քրեական գործով ձեռք բերված ապացույցները, վերաքննիչ դատարանը գտնում է, ամբաստանյալների շահերի պաշտպանների վերաքննիչ բողոքները պետք է մերժել հետևյալ պատճառաբանությամբ։
Վերաքննիչ դատարանը գտնում է, որ պաշտպան Ա.Ջուվանովայի վերաքննիչ բողոքում բերված պատճառաբանությունները չեն կարող սույն քրեական գործի շրջանակներում հիմք հանդիսանալ դատավճիռը բեկանելու և ամբաստանյալ Արման Կարապետյանին ՀՀ քրեական օրենսգրքի 316-րդ հոդվածի 2-րդ մասի հատկանիշներով առաջադրված մեղադրանքը կարճելու համար:
Վերաքննիչ դատարանը վերլուծության և գնահատության ենթարկելով քրեական գործով ձեռք բերված ապացույցները հանգում է այն հետևության, որ ամբաստանյալ Արման Կարապետյանին ՀՀ քրեական օրենսգրքի 316-րդ հոդվածի 2-րդ մասով առաջադրված մեղադրանքը հաստատված է քրեական գործով ձեռք բերված հետևյալ ապացույցներով:
Նախաքննության ընթացքում ամբաստանյալ Արտյոմ Հովհաննիսյանն իրեն լիովին մեղավոր է ճանաչել և ցուցմունքներ է տվել այն մասին, որ ինքը Արման Կարապետյանի, Արամայիս Սարոյանի և Հայկ Ավանեսյանի հետ միասին 03.01.2009թ. ժամը 2030-ի սահմաններում Երևան քաղաքի Ազատության և Մամիկոնյանց փողոցների խաչմերուկի կանգառում փորձել են տաքսի ավտոմեքենա կանգնեցնել, սակայն ավտոմեքենանները չեն կանգնել: Ինքն ու Արման Կարապետյանը բարձրաձայն հայհոյանքներ են տվել երթևեկող տաքսի ավտոմեքենաների վարորդների հասցեին` անհարգալից վերաբերմունք դրսևորելով կանգառում հավաքված քաղաքացիների նկատմամբ: Այդ ժամանակ իրենց է մոտեցել ոստիկանի համազգեստով Յուրա Բադիկյանը և դիտողություն արել` ասելով, որ չի կարելի հայհոյանքներ տալ, քաղաքացիներ կան կանգառում հավաքված, այդ թվում` կանայք: Հայկ Ավանեսյանը մոտեցել է ոստիկանին և ներողություն խնդրել իր և Արման Կարապետյանի կողմից տված հայհոյանքների համար: Արման Կարապետյանը, վրդովվելով դրանից, հայհոյանքներ է տվել Յուրա Բադիկայնի հասցեին: Ոստիկանը կարգի է հրավիրել, սակայն Արման Կարապետյանը հարձակվել է Յուրա Բադիկյանի վրա, բռունցքով մի քանի անգամ հարվածել վերջինիս դեմքին և քթին: Ոստիկանը կռացել է, որից հետո ինքն ու Արամայիս Սարոյանը նույնպես ծեծել են Յուրա Բադիկյանին` հարվածելով մարմնի տարբեր մասերին, սակայն ոչ դեմքի և ոչ էլ գլխի շրջանում: Իրենք շարունակել են հայհոյանքներ տալ ոստիկանի հասցեին: Այնուհետև դեպքի վայր է գնացել Ռազմիկ Գենջոյանը և իրեն բերման ենթարկել ոստիկանության Արաբկիրի բաժին:
Նախաքննության ընթացքում ամբաստանյալ Արամայիս Սարոյանը առաջադրված մեղադրանքում իրեն լիովին մեղավոր է ճանաչել և ցուցմունքներ է տվել, որ ինքը, Արման Կարապետյանը, Արտյոմ Հովհաննիսյանը և Հայկ Ավանեսյանը 03.01.2009թ. ժամը 20:30-ի սահմաններում Երևանի Ազատության և Մամիկոնյանց փողոցների խաչմերուկի կանգառում փորձել են տաքսի ավտոմեքենա կանգնեցնել, սակայն ավտոմեքենանները չեն կանգնել: Այդ ժամանակ Արտյոմ Հովհաննիսյանը և Արման Կարապետյանը, ալկոհոլային հարբածության մեջ գտնվելով, վրդովվել են և բարձրաձայն լկտի հայհոյանքներ տվել տաքսի ավտոմեքենաների վարորդների հասցեին` ուշադրություն չդարձնելով, որ կանգառում մարդիկ կան հավաքված: Այդ ժամանակ իրենց է մոտեցել ոստիկանի համազգեստով Յուրա Բադիկյանը և դիտողություն արել իրենց` հասարակական վայրում հայհոյելու և աղմկելու համար: Հայկ Ավանեսյանը մոտեցել է ոստիկանին և ներողություն խնդրել Արտյոմ Հովհաննիսյանի և Արման Կարապետյանի կողմից արված հայհոյանքների համար: Արման Կարապետյանը լկտի հայհոյանքներ է տվել Յուրա Բադիկայնի հասցեին: Ոստիկանը կրկին ցանկացել է կարգի հրավիրել նրան, սակայն Արման Կարապետյանը հարձակվել է Յուրա Բադիկյանի վրա, բռուցքով մի քանի անգամ հարվածել վերջինիս դեմքին և քթին: Ոստիկանը կռացել է, որից հետո ինքն ու Արտյոմ Հովհաննիսյանը նույնպես հայհոյել և ծեծել են Յուրա Բադիկյանին` հարվածելով վերջինիս մարմնի տարբեր մասերին, սակայն ոչ դեմքի և գլխի շրջանում:
Տուժող Յուրա Բադիկյանի նախաքննության ընթացքում տրված ցուցմունքներով այն մասին, որ Երևան քաղաքի Ազատության և Մամիկոնյանց փողոցների կանգառում նկատել է 4 երիտասարդների, որոնցից Արման Կարապետյանը և Արտյոմ Հովհաննիսյանը բարձրաձայն լկտի հայհոյանքներ են տվել` բացահայտ անհարգալից վերաբերմունք դրսևորելով կանգառում եղած քաղաքացիների նկատմամբ: Ինքը մոտեցել է այդ երիտասարդներին, որոնք ալկոհոլի ազդեցության տակ են եղել և դիտողություն արել: Նրան է մոտեցել Հայկ Ավանեսյանը և ներողություն է խնդրել իր ընկերների վարքագծի համար: Այդ ժամանակ Արման Կարապետյանը բարձրաձայն հայհոյանքներ է տվել իրեն: Ինքը զայրացած կարգի է հրավիրել Արման Կարապետյանին, սակայն վերջինս ագրեսիվություն դրսևորելով հարձակվել է իր վրա և մի կողմ հրելով Հայկ Ավանեսյանին բռունցքով հարվածել իր քթին: Այնուհետև ևս մեկ անգամ հարվածել իր գլխին և քթին, իսկ Արման Կարապետյանից հետո իր վրա են հարձակվել նաև Արամայիս Սարոյանը և Արտյոմ Հովհաննիսյանը, որոնք ծեծի են ենթարկել իրեն` ուղեկցված բարձրաձայն լկտի հայհոյանքներով: Ինքը կարողացել է ոտքի կանգնել միայն մի քանի րոպե անց, գործով վկա Ռազմիկ Գենջոյանի օգնության հասնելուց հետո:
Առերես հարցաքննության արձանագրությամբ այն մասին, որ տուժող Յուրա Բադիկյանն իր վերոհիշյալ ցուցմունքը նախաքննության ընթացքում պնդել է ամբաստանյալներ Արտյոմ Հովհաննիսյանի, Արամայիս Սարոյանի և Արման Կարապետյանի հետ առերես հարցաքննվելիս:
Վկա Ռազմիկ Գենջոյանի ցուցմունքով այն մասին, որ 2009թ. հունվարի 3-ին ժամը 20:30-ի սահմաններում աղմուկի ձայներից դուրս գալով ոստիկանության Արաբկիրի բաժնի իր աշխատասենյակից և շարժվելով դեպի աղմուկի ուղությամբ, տեսել է Ազատության և Մամիկոնյանց փողոցների խաչմերուկում Արման Կարապետյանին, Արամայիս Սարոյանին և Արտյոմ Հովհաննիսյանին, որոնք ձեռքերով ու ոտքերով ծեծելիս են եղել գետին ընկած ոստիկանի համզգեստով Յուրա Բադիկյանին: Ինքը պահանջել է դադարեցնել այդ գործողությունները, սակայն վերջիններս ուշադրություն չեն դարձրել և շարունակելով խուլիգանական գործողությունները բարձրաձայն լկտի հայհոյանքներով ուղեկցված, հարվածներ են հասցրել Յուրա Բադիկյանին: Ինքը փորձելով օգնել տուժողին, միջոցներ է ձեռնարկել սաստելու Ա.Հովհանիսյանին, Ա.Կարապետյանին, Ա.Սարոյանին և խափանելու խուլիգանական գործողությունները, սակայն վերջիններս չեն հանգստացել: Ընթացքում ինքը սաստել է Արտյոմ Հովհանիսյանին և տարել ոստիկանության Արաբկիրի բաժին, իսկ Արամայիս Սարոյանը և Արման Կարապետյանը դիմել են փախուստի: Այդ ժամանակ դեպքի վայր են եկել նաև ոստիկանության Արաբկիրի բաժնի օպերատիվ հերթապահ Գարիկ Մանուչարյանը, ինչպես նաև Ազատության պողոտայով պատահական անցնող Կ.Դեմիրճյանի անվան մետրոպոլիտենի ոստիկաններ Գոռ Մովսիսյանը և Արսեն Ենոքյանը:
Վկա Հայկ Ավանեսյանի ցուցմունքով այն մասին, որ ինքը Արամայիս Սարոյանի, Արտյոմ Հովհաննիսյանի և Արման Կարապետյանի հետ միասին, ալկոհոլային հարբածության վիճակում, իրենց տանից դուրս գալով, գնացել են Երևանի Մամիկոնյանց և Ազատության պողոտաների խաչմերուկի կանգառ, փորձել են տաքսի ավտոմեքենա կանգնեցնլ և գնալ տուն: Երբ ավտոմեքենաները չեն կանգնել, Արման Կարապետյանը և Արտյոմ Հովհաննիսյանը բարձրաձայն լկտի հայհոյանքներ են տվել: Այդ ժամանակ իրենց է մոտեցել ոստիկան Յուրա Բադիկյանը և դիտողություն արել հայհոյանքներ տալու համար: Ինքը մոտեցել է Բադիկյանին և ներողություն խնդրել իր ընկերների վարքագծի համար: Տուժողի հետ իր խոսելու ընթացքում, Արման Կարապետյանը հայհոյել է ոստիկանին, ապա առաջ է գնացել դեպի ոստիկանը և բռունցքով հարվածել վերջինիս քթին: Ինքը փորձել է կանխել կոնֆլիկտային իրավիճակը, սակայն Արման Կարապետյանը անզգուշությամբ մի կողմ է հրել իրեն և ինքը գլխի ծոծրակի մասով դիպել է Էլեկտրական լույսի սյանը և ընկել գետին: Իր մոտ առաջացել է գլխապտույտ, որի ժամանակ ինքը միայն նկատել է, որ Արամայիս Սարոյանը և Արտյոմ Հովհաննիսյանը նետվել են դեպի ոստիկանը:
Վկա Մանյա Գրիգորյանի ցուցմունքով այն մասին, որ ինքը ծաղիկներ է վաճառում Երևան քաղաքի Ազատության և Մամիկոնյանց փողոցների խաչմերուկի հարևանությամբ գտնվող տաղավարում: 03.01.2009թ. նշված խաչմերուկի կանգառում լսել է, որ երեք-չորս երիտասարդներ հայհոյանքներ են տալիս: Մի քանի րոպե անց, տեսել է ծեծված վիճակում ոստիկան Յուրա Բադիկյանին, որի դեմքը արյունոտված է եղել և իմացել է, որ նշված երիտասարդներն են ծեծել նրան:
Վկա Հասմիկ Միքայելյանի ցուցմունքով այն մասին, որ ինքը Երևան քաղաքի Մամիկոնյանց 2 շենքին կից գտնվող ծաղիկների կրպակում աշխատում է որպես ծաղկավաճառ: 03.01.2009թ. ժամը 20:30-ի սահմաններում ինքը, դուրս գալով ”Սթար” հանրախանութից, տեսել է փողոցում հավաքված բազմաթիվ մարդկանց, որոնք իրեն ասել են, որ մի քանի երիտասարդներ քիչ առաջ, բարձրաձայն լկտի հայհոյանքներով ուղեկցված, հարձակվել և ծեծել են կանգառում կանգնած ոստիկան Յուրա Բադիկյանին:
Վկա Գարիկ Մանուչարյանի ցուցմունքով այն մասին, որ 03.01.2009թ. ժամը 20:30-ի սահմաններում ոստիկանության բաժնի շենքին է մոտեցել ինչ որ քաղաքացի, որն իրեն ասել է, որ մի քանի երիտասարդներ կանգառում ոստիկայության աշխատողի են ծեծում: Ինքը մոտենալով նշված փողոցների խաչմերուկ, տեսել է Ռազմիկ Գենջոյանին, ով Արտյոմ Հովհաննիսյանին տանում է ոստիկանության բաժին: Այնուհետև ինքը կանգառում հավաքված քաղացիներից իմացել է, որ Արամայիս Սարոյանը, Արման Կարապետյանը և Արտյոմ Հովհաննիսյանը կանգառում խուլիգանություն են կատարել և ծեծի ենթարկել ոստիկան Յուրա Բադիկյանին:
Վկաներ Գոռ Մովսիսյանի և Արսեն Ենոքյանի նույնաբովանդակ ցուցմունքներով այն մասին, որ 03.01.2009թ. ժամը 20:30-ի սահմաններում Երևան քաղաքի Ազատության պողոտայով քայլելիս, Ազատության և Մամիկոնյանց փողոցների խաչմերուկի կանգառում, նկատել են ծեծկռտուք և լսել հայհոյանքի ձայներ, որի ընթացքում երեք երիտասարդներ` Արման Կարապետյանը, Արտյոմ Հովհաննիսյանը և Արամայիս Սարոյանը ծեծի են ենթարկել և հայհոյել համազգեստով ոստիկան Յուրա Բադիկյանին: Իրենք մոտեցել են որպեսզի միջամտեն, սակայն այդ ընթացքում Արամայիս Սարոյանը և Արման Կարապետյանն անցնելով փողոցը, դիմել եմ փախուստի: Հետագայում իրենք իմացել են, որ վերջիններս հարձակվել և ծեծի են ենթարկել ոստիկան Յուրա Բադիկյանին` խուլիգանական գործողություններ կատարելու համար դիտողություն անելու և այդ գործողությունները խափանել փորձելու համար:
Առերես հարցաքննության արձանագրությամբ այն մասին, որ Հայկ Ավանեսյանն իր վերը նշված ցուցմունքն առերես պնդել է Արման Կարապետյանին:
Առերես հարցաքննության արձանագրությամբ այն մասին, որ Արամայիս Սարոյանն իր վերը նշված ցուցմունքն առերես պնդել է Արման Կարապետյանին:
Առերես հարցաքննության արձանագրությամբ այն մասին, որ Արտյոմ Հովհաննիսյանն իր վերը նշված ցուցմունքն առերես պնդել է Արման Կարապետյանին:
Դատաբժշկական փորձաքննության թիվ 7 եզրակացությամբ, ըստ որի Յուրա Բադիկյանի մարմնական վնավածքները քթի մեջքի շրջանի, գլխի աջ ճակաթգագաթային շրջանի քերծվածների, քթի ոսկրերի առանց տեղաշարժի կոտրվածքների ձևով պատճառվել են բութ առարկայի ներգործության հետևանքով, հնարավոր է նշված ժամանակին և հանգամանքներում, որոնցից քթի ոսկրերի առանց տեղաշարժի կոտրվածքը պատճառել է առողջությանը թեթև վնաս` առողջության կարճատև քայքայումով, նկատի ունենալով վնասվածքների հետ պատճառական կապի մեջ եղած հետևանքների տևողությունը վեց օրից ավելի, բայց ոչ ավելի քան 21 օրից, իսկ քթի մեջքի շրջանի, գլխի աջ ճակաթգագաթային շրջանի քերծվածքները և մնացած վնասվածքները առոջության թեթև վնասի հատկանիշներ չեն պարունակում:
Քննչական փորձարարություններ կատարելու արձանագրություններով այն մասին, որ մեղադրյալ Արամայիս Սարոյանի մասնակցությամբ դեպքի վայրում կատարվել է դեպքի պարագաների վերականգնում:
Քննչական փորձարարություն կատարելու արձանագրությամբ այն մասին, որ մեղադրյալ Արտյոմ Հովհաննիսյանի մասնակցությամբ դեպքի վայրում կատարվել է դեպքի պարագաների վերականգնում:
Ինքնակամ ներկայանալու մասին արձանագրությամբ այն մասին, որ 2009թ հունվարի 3-ին խուլիգանություն և իշխանության ներկայացուցչի նկատմամբ բռնություն գործադրելու կասկածանքով 16.01.2009թ. Արման Կարապետյանն ինքնակամ ներկայացել է ոստիկանության Արաբկիրի բաժին:
Ամբաստանյալ Արման Կարապետյանն ինչպես նախաքննության ընթացքում, այնպես էլ դատաքննության ժամանակ չի ընդունել ոստիկան Յուրա Բադիկյանի կողմից իր ծառայական պարտականությունների կատարման ընթացքում վերջինիս առողջության նկատմամբ վտանգավոր բռնություն գործադրելու համար ՀՀ քրեական օրենսգրքի 316 հոդվածի 2-րդ մասով առաջադրված մեղադրանքը և հայտնել, որ ինքը տուժողի դեմքին և գլխին բռունցքով չի հարվածել և նրան մարմնական վնասվածք չի պատճառել:
Մյուս ամբաստանյալներ Արտյոմ Հովհաննիսյանը և Արամայիս Սարոյանը, ինչպես նաև վկա Հայկ Ավանեսյանը հրաժարվելով իրենց կողմից նախաքննության ընթացքում տրված ցուցմունքներից, դատարանում հայտնել են, որ իրենք չեն տեսել, թե ով է հարվածել տուժող Բադիկյանի դեմքին` քթի շրջանում և գլխին, ու պատճառել մարմնական վնասվածքներ:
Վերաքննիչ դատարանը գնահատության ենթարկելով ամբաստանյալներ Ա.Կարապետյանի, Ա. Հովհաննիսյանի, Ա.Սարոյանի, ինչպես նաև վկա Հ.Ավանեսյանի ցուցմունքները քրեական գործով ձեռք բերված ապացույցների հետ միասին իրենց համակցությամբ արժանահավատ է համարում ամբաստանյալներ Ա.Սարոյանի, Ա.Հովհաննիսյանի և վկա Հ.Ավանեսյանի նախաքննության ընթացքում տված ցուցմունքները, քանի որ դրանք հիմնավոր են և բխում են քրեական գործով ձեռք բերված և սույն որոշման մեջ շարադրված ապացույցներից:
Այսպիսով վերաքննիչ դատարանը հաստատված է համարում, որ ամբսատանյալ Ա.Կարապետյանը կատարել է հանցագործություն նախատեսված ՀՀ քրեական օրենսգրքի 316-րդ հոդվածի 2-րդ մասով, որի համար պետք է ենթարկվի քրեական պատասխանատվության և այդ մասով <<առաջադրված մեղադրանքը կարճելու>> հիմքեր չկան:
Վերաքննիչ դատարանը գտնում է, որ ինչպես նախաքննության, այնպես էլ դատաքննության ընթացքում ամբաստանյալ Ա.Կարապետյանի արարքին տրվել է համապատասխան ճիշտ քրեաիրավական գնահատական:
Անդադառնալով ամբաստանյալներ Արամայիս Սարոյանի և Արտյոմ Հովհաննիսյանի նկատմամբ նշանակված պատժի հարցին և այդ առումով վերաքննիչ բողոքում բերված պատճառաբանություններին, վերաքննիչ դատարանը հանգում է այն հետևության, որ դատարանը պատիժ նշանակելիս պահպանելով ՀՀ քրեական դատավարության օրենսգրքի 10-րդ, 48-րս, 61-63-րդ հոդվածների պահանջները վերջիններիս նկատմամբ նշանակել է համապատասխան պատիժ, որը մեղմացման առումով փոփոխելու կամ ՀՀ քրեական օրենսգրքի 70-րդ հոդվածի կիրառմամբ պատիժ նշանակելու հիմքեր չկան:
Ամբաստանյալներ Ա.Սարոյանի և Ա.Հովհաննիսյանի կողմից կատարված հանցավոր արարքը թեև դասվում է միջին ծանրության հանցագործությունների շարքին, սակայն նախատեսում է նաև պատիժ ազատազրկման ձևով մինչև հինգ տարի ժամկետով:
Նրանց վերագրված հանցագործությունն իր մեջ պարունակում է երկու որակյալ հատկանիշներ` խուլիգանություն կատարված մի խումբ անձանց կողմից և խուլիգանություն, որը զուգորդվել է իշխանության ներկայացուցչին կամ հասարակական կարգի պահպանության պարտականություն իրականացնող կամ հասարակական կարգի խախտումը խափանող անձին դիմադրություն ցույց տալով:
Նման պայմաններում վերաքննիչ դատարանը գտնում է, որ դատարանի պատճառաբանությունները այն մասին, որ ամբաստանյալների նկատմամբ հանցագործության համար նախատեսված պատիժներից նվազ խիստ պատիժը չի կարող ապահովել պատժի նպատակները, հիմնավոր են և այդ առումով նույնպես ամբաստանյալների նկատմամբ նշանակված պատիժը մեղմացման առումով փոփոխելու հիմքեր չկան:
Անդրադառնալով ամբաստանյալների նկատմամբ ընտրված խափանման միջոցի հարցին, վերաքննիչ դատարանը գտնում է, որ այն հիմնավոր է և պետք է թողնել անփոփոխ:
Ելնելով վերոգրյալներից և ղեկավարվելով ՀՀ քրեական դատավարության օրենսգրքի 393-394-րդ հոդվածներով վերաքննիչ դատարանը

Ո Ր Ո Շ Ե Ց

Ամբաստանյալների շահերի պաշտպաններ Ա.Ջուվանովայի, Վ.Գևորգյանի և Գ.Հակոբյանի վերաքննիչ բողոքները մերժել:
Երևանի Արաբկիր և Քանաքեռ-Զեյթուն համայնքների ընդհանուր իրավասության դատարանի 2009թ. հուլիսի 24-ի դատավճիռը քրեական գործով ըստ մեղադրանքի՝ Արման Լենդրուշի Կարապետյանի` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, 316-րդ հոդվածի 2-րդ մասով, Արտյոմ Արտակի Հովհաննիսյանի` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, Արամայիս Մնացականի Սարոյանի` ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով, թողնել օրինական ուժի մեջ։
Ամբաստանյալներ Արման Կարապետյանի և Արտյոմ Հովհաննիսյանի նկատմամբ ընտրված խափանման միջոցը` կալանքը թողնել անփոփոխ, մինչև սույն որոշման օրինական ուժի մեջ մտնելը:
Արամայիս Սարոյանի նկատմամբ ընտրված խափանման միջոցը`, ստորագրություն չհեռանալու մասին թողնել անփոփոխ, մինչև սույն որոշման օրինական ուժի մեջ մտնելը:
Որոշումը կարող է բողոքարկվել ՀՀ Վճռաբեկ դատարանի քրեական պալատին այն հրապարակելու պահից մեկամսյա ժամկետում։


ՆԱԽԱԳԱՀՈՂ ԴԱՏԱՎՈՐ՝ ստորագրություն
ԴԱՏԱՎՈՐՆԵՐ՝ ստորագրություններ
Իսկականի հետ ճիշտ է՝

ՆԱԽԱԳԱՀՈՂ ԴԱՏԱՎՈՐ՝ Ա.ԽԱՉԱՏՐՅԱՆ


























ՆԱԽԱԳԱՀՈՂ ԴԱՏԱՎՈՐ` Ա.ԽԱՉԱՏՐՅԱՆ

ԴԱՏԱՎՈՐՆԵՐ` Մ.ՊԵՏՐՈՍՅԱՆ

Ս.ՀԱՄԲԱՐՁՈՒՄՅԱՆ


























ՆԱԽԱԳԱՀՈՂ ԴԱՏԱՎՈՐ՝ ստորագրություն
ԴԱՏԱՎՈՐՆԵՐ՝ ստորագրություններ
Իսկականի հետ ճիշտ է՝

ՆԱԽԱԳԱՀՈՂ ԴԱՏԱՎՈՐ՝ Ա.ԽԱՉԱՏՐՅԱՆ













ՆԱԽԱԳԱՀՈՂ ԴԱՏԱՎՈՐ` Ա.ԽԱՉԱՏՐՅԱՆ

ԴԱՏԱՎՈՐՆԵՐ` Մ.ՊԵՏՐՈՍՅԱՆ

Ս.ՀԱՄԲԱՐՁՈՒՄՅԱՆ