գործ ԵԿԴ/0345/01/17
Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
Երևան քաղաքի ընդհանուր իրավասության դատարանը

Նախագահությամբ դատավոր` Արմեն Բեկթաշյանի
քարտուղարությամբ` Անի Ավագյանի
Մարիամ Սողոմոնյանի
մասնակցությամբ`
մեղադրող` Ժորա Չիչոյանի
թարգմանիչ՝ Անի Հովհաննիսյանի
պաշտպան` Անուշ Մխիթարյանի

2018 թվականի հունիսի 19-ին, Երևան քաղաքում, դռնբաց դատական նիստում, քննեց քրեական գործն ըստ մեղադրանքի`
Զաքար Վարդանի Միրզախանյանի` ծնված 06.04.1996 թվականին, Երևան քաղաքում, ազգությամբ հայ, ՀՀ քաղաքացի, նախկինում չդատված, չամուսնացած, բնակվում է Երևան քաղաքի Ն.Շենգավիթ, 3-րդ փողոցի 33-րդ տանը:
Զաքար Վարդանի Միրզախանյանը մեղադրվում է ՀՀ քրեական օրենսգրքի 258-րդ հոդվածի 2-րդ մասով:
Մեղադրյալ Զաքար Վարդանի Միրզախանյանի նկատմամբ որպես խափանման միջոց է ընտրվել ստորագրություն չհեռանալու մասին:

Գործի դատավարական նախապատմությունը.
2017 թվականի հոկտեմբերի 06-ին ոստիկանության Կենտրոնական բաժնի ավագ հետաքննիչ Ա.Տիգրանյանի կողմից որոշում է կայացվել ՀՀ քրեական օրենսգրքի 258-րդ հոդվածի 2-րդ մասով թիվ 13897617 քրեական գործը հարուցելու մասին:
2017 թվականի հոկտեմբերի 06-ին ոստիկանության Կենտրոնական բաժնի ավագ հետաքննիչ Ա.Տիգրանյանի կողմից որոշում է կայացվել թիվ 13897617 քրեական գործը Կենտրոն և Նորք-Մարաշ վարչական շրջանների քննչական բաժին ուղարկելու մասին:
2017 թվականի հոկտեմբերի 11-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից որոշում է կայացվել թիվ 13897617 քրեական գործը վարույթ ընդունելու մասին:
2017 թվականի հոկտեմբերի 11-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից որոշում է կայացվել թիվ 13897617 քրեական գործով Լեռնիկ Ապրեսյանին որպես տուժող ճանաչելու մասին:
2017 թվականի նոյեմբերի 17-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից որոշում է կայացվել թիվ 13897617 քրեական գործով կասկածյալ Զաքար Միրզախանյանի նկատմամբ որպես խափանման միջոց ստորագրություն չհեռանալու մասին ընտրելու վերաբերյալ:
2017 թվականի նոյեմբերի 24-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից որոշում է կայացվել թիվ 13897617 քրեական գործով Զաքար Միրզախանյանին որպես մեղադրյալ ներգրավելումասին և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով այն բանի համար, որ նա 28.09.2017 թվականին ժամը 16:30-ի սահմաններում, Երևան քաղաքի Տիգրան Մեծ և Եր.Քոչար փողոցների խաչմերուկում, կատարել է Լեռնիկ Ապրեսյանի նկատմամբ բռնության գործադրմամբ զուգորդված խուլիգանություն:
Այսպես,
Զ.Միրզախանյանը, 2017 թվականի սեպտեմբերի 28-ին ժամը, 16:30-ի սահմաններում, իր կողմից շահագործվող ՙՍուբարու՚ մակնիշի 47 OV 007 հ/հ-ի ավտոմեքենայով փորձել է դուրս գալ ՙՏաշիր՚ առևտրի կենտրոնի ավտոկայանատեղիից և թեքվել աջ՝ դեպի Եր.Քոչար փողոցի ուղղությամբ, որի ընթացքում խախտելով երթևեկության կաննոները, խոչընդոտել է ստեղծել նույն փողոցով ՙՏոյոտա՚ մանիշի 34 MN 985 հ/հ-ի ավտոմեքենայով երթևեկող Լեռնիկ Յուրիկի Ապրեսյանի համար: Վերջինս այդ կապակցությամբ բարձրաձայն զգուշ՜ացում է կատարել Զ.Միրզախանյանին, ինչը վերջինս ցավագին ընդունելով, հասարակության մեջ իր կարծեցյալ առավելությունները ընդգծելու մոլուցքով տրված, ավտոմեքենան կայանելով հասարակական վայրում վարքագիծ ընդունաված նորմերը, բացահայտ անհարգալից վերաբերմունք դրսևոչելով հասարակության համակեցության կանոնների նկատմամբ, կոպիտ կերպով խախտելով հասարակական կարգը, մոտեցել է փողոցում կայանված Լ.Ապրեսյանի ավտոմեքենային, հայհոյել է և աղմկել, բռնություն գործադրել՝ բաց պատուհանից ձեռքերով հարվածել վերջինիս մարմնի տարբեր մասերին, այնուհետև բացել ավտոմեքենայի դուռը, սկսել քաշքշել Լ.Ապրեսյանի վերնաշապիկից, իր այդ դիտավորյալ գործողություններովց շուրջ 3 րոպե տևողությամբ խաթարել երթևեկության նորմալ ընթացքը:
2017 թվականի դեկտեմբերի 20-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից որոշում է կայացվել թիվ 13897617 քրեական գործով ՀՀ ոստիկանության ՃՈ ծառայությունից ստացված լազերային սկավառակը որպես ապացույց ճանաչելու մասին:
2017 թվականի դեկտեմբերի 20-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից որոշում է կայացվել թիվ 13897617 քրեական գործով Զաքար Միրզախանյանի անվամբ սեփականության իրավունքով ՀՀ տարածքում գրանցված անշարժ և շարժական գույքի վրա կալանք դնելու մասին:
2017 թվականի դեկտեմբերի 27-ին քրեական գործը մեղադրական եզրակացությամբ ստացվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան:
Արագացված դատական քննություն.
Մինչ դատաքննության սկսվելը` ամբաստանյալ Զաքար Վարդանի Միրզախանյանը միջնորդություն է ներկայացրել` դատական քննությունն արագացված կարգով անցկացնելու մասին` հայտարարելով, որ առաջադրված մեղադրանքը իրեն պարզ է, համաձայն է մեղադրանքի հետ և առաջադրված մեղադրանքում իրեն մեղավոր է ճանաչում, գիտակցում է արագացված կարգով դատական քննություն անցկացնելու հետևանքները, միջնորդությունը ներկայացնում է կամավոր, պաշտպանի հետ խորհրդակցելուց հետո:
Դատախազը մեղադրական եղրակացությունը հաստատելու մասին որոշմամբ չի առարկել արագացված կարգով դատական քննություն անցկացնելու կարգի դեմ:
Դատարանը պարզելով, որ առկա են ՀՀ քրեական դատավարության օրենսգրքի 3751 և 3752 հոդվածներով նախատեսված պայմանները, 2018 թվականի հունիսի 19-ին որոշում է կայացվել արագացված կարգով դատական քննություն անցկացնելու մասին:
Այսպիսով, քրեական գործով ձեռք բերված ապացույցների ընդհանուր կարգով սահմանված հետազոտություն չկատարելով, արագացված դատաքննությամբ հիմք ընդունելով մեղադրանքի հիմքում դրված ապացույցները, դատարանը հանգեց այն համոզման, որ ամբաստանյալ Զաքար Վարդանի Միրզախանյանը կատարել է ՀՀ քրեական օրենսգրքի 258-րդ հոդվածի 2-րդ մասով նախատեսվածհանցագործությունը` որպիսի արարքի համար նա պետք է պատասխանատվության ենթարկվի:
Զաքար Վարդանի Միրզախանյանը ենթակա է պատժի կատարած արարքի համար:
Դատարանի իրավական վերլուծությունները.
ՀՀ քրեական օրենսգրքի 10-րդ հոդվածի 1-ին մասը սահմանում է` ՙՀանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար՚:
ՀՀ քրեական օրենսգրքի 48-րդ հոդվածի 2-րդ մասը սահմանում է` ՙՊատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները՚:
ՀՀ քրեական օրենսգրքի 61-րդ հոդվածը սահմանում է` ՙ1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները: 2. Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով: 3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները՚:
Ամբաստանյալ Զաքար Վարդանի Միրզախանյանը առաջադրված մեղադրանքում իրեն մեղավոր է ճանաչել, զղջացել է կատարած արարքի համար, նախկինում դատված կամ որևէ այլ կերպ արատավորված չի եղել:
Ամբաստանյալ Զաքար Վարդանի Միրզախանյանի պատասխանատվությունը և պատիժը մեղմացնող հանգամանքներ առկա չեն:
ՀՀ քրեական օրենսգրքի 63-րդ հոդվածի համաձայն՝ ամբաստանյալ Զաքար Վարդանի Միրզախանյանի արարքում պատասխանատվությունը և պատիժը ծանրացնող հանգամանքներ առկա չեն:
Սույն քրեական գործով Զաքար Վարդանի Միրզախանյանին մեղադրանք է առաջադրվել ՀՀ քրեական օրենսգրքի 258-րդ հոդվածի 2-րդ մասով, որի սանկցիան նախատեսում է հետևյալ պատժատեսակները` տուգանք՝ նվազագույն աշխատավարձի հարյուրապատիկից երեքհարյուրապատիկի չափով, կամ կալանք՝ մեկից երեք ամիս ժամկետով, կամ ազատազրկմում՝ առավելագույնը երկու տարի ժամկետով:
Այլընտրանքային սանկցիաների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ. Մադաթյանի գործով որոշման մեջ, որտեղ իրավական դիրքորոշում է հայտնել այն մասին, որ. ՙ(…) այլընտրանքային սանկցիաների միջև ընտրություն կատարելիս պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա:
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը: (…)՚ (տե’ս Գարուշ Նորիկի Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշումը):
Հաշվի առնելով ամբաստանյալ Զաքար Վարդանի Միրզախանյանի կատարած արարքի հանրության համար վտանգավորության աստիճանը և բնույթը, այդ թվում` նրա գործողությունների վտանգավորության աստիճանը, ինչպես նաև նախկինում դատապարտված կամ որևէ այլ կերպ արատավորված չլինելու հանգամանքը, երիտասարդ լինելը, ինչպես նաև այն որ առաջին անգամ կատարել է ոչ մեծ ծանրության հանցագործություն և զղջացել է կատարած արարքի համար, կատարած արարքից հետո զերծ է մնացել նոր հանցանքներ կատարելուց, պատասանատվությունը ու պատիժը մեղմացնող և պատասխանատվությունն ու պատիժը ծանրացնող հանգամանքների բացակայությունը` Դատարանը գտնում է, որ Զաքար Վարդանի Միրզախանյանի նկատմամբ չի կարող նշանակել ՀՀ քրեական օրենսգրքի 258-րդ հոդվածի 2-րդ մասի սանկցիայով նախատեսված ՙկալանք՚ կամ ՙազատազրկում՚ պատժատեսակները և ղեկավարվելով օրինականության, արդարության, պատժի անհատականացման ու մարդասիրության սկզբունքներով, Դատարանը հանգում է այն համոզման, որ ամբաստանյալ Զաքար Վարդանի Միրզախանյանին ՀՀ քրեական օրենսգրքի 258-րդ հոդվածի 2-րդ մասով մեղսագրվող հանցագործության համար, նշված հոդվածով նախատեսված պատիժներից նվազ խիստ տեսակը նշանակելիս կարող է ապահովել պատժի նպատակները, հետևաբար` ամբաստանյալի նկատմամբ պատիժ պետք է նշանակել տուգանքի ձևով, որով հնարավոր կլինի հասնել ՀՀ քրեական օրենսգրքի 48-րդ հոդվածով սահմանված պատժի նպատակներին` սոցիալական արդարության վերականգնմանը, պատժի ենթարկված անձի ուղղմանը և հանցագործությունների կանխմանը:
Զաքար Վարդանի Միրզախանյանի նկատմամբ ընտրված խափանման միջոցը` ստորագրություն չհեռանալու մասին պետք է վերացնել դատավճիռն օրինական ուժի մեջ մտնելու պահից:
Դատավճիռն օրինական ուժի մեջ մտնելուց հետո ապացույց ճանաչված ՀՀ ոստիկանության ՃՈ ծառայությունից ստացված լազերային սկավառակը, պետք է թողնել քրեական գործի նյութերին կցված դրա պահելու ամբողջ ժամանակաշրջանում:
2017 թվականի դեկտեմբերի 20-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից կայացված որոշմամբ Զաքար Միրզախանյանի անվամբ սեփականության իրավունքով ՀՀ տարածքում գրանցված անշարժ և շարժական գույքի վրա դրված կալանքը պետք է վերացնել:
Դատարանը գտնում է, որ դատական ծախսերն ամբաստանյալ Զաքար Վարդանի Միրզախանյանից ենթակա չեն բռնագանձման, քանի որ ՀՀ քրեական դատավարության օրենսգրքի 168-րդ հոդվածի 1-ին մասի 1-ին կետով նախատեսված դատական ծախս սույն քրեական գործով չկա, իսկ 2-8-րդ կետերով նախատեսված դատական ծախսերն արագացված դատական քննության կարգ կիրառելու դեպքում, համաձայն նույն օրենսգրքի 3753 հոդվածի 8-րդ մասի, ամբաստանյալից ենթակա չեն բռնագանձման:
Եզրափակիչ մաս.
Ելնելով վերոգրյալից և ղեկավարվելով ՀՀ քրեական դատավարության օրենսգրքի 116-րդ, 119-րդ, 357-360-րդ, 3753-րդ հոդվածներով, դատարանը

Վ Ճ Ռ Ե Ց`
Զաքար Վարդանի Միրզախանյանին մեղավոր ճանաչել ՀՀ քրեական 258-րդ հոդվածի 2-րդ մասով և դատապարտել տուգանքի՝ նվազագույն աշխատավարձի երկուհարյուրապատիկի 200.000 /երկու հարյուր հազար/ ՀՀ դրամի չափով:
Զաքար Վարդանի Միրզախանյանի նկատմամբ որպես խափանման միջոց` ընտրված ստորագրություն չհեռանալու մասին, թողնել անփոփոխ մինչև դատավճիռն օրինական ուժի մեջ մտնելը:
Դատավճիռն օրինական ուժի մեջ մտնելուց հետո ապացույց ճանաչված ՀՀ ոստիկանության ՃՈ ծառայությունից ստացված լազերային սկավառակը՝ թողնել քրեական գործի նյութերին կցված դրա պահելու ամբողջ ժամանակաշրջանում:
2017 թվականի դեկտեմբերի 20-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Գ.Ավագյանի կողմից կայացված որոշմամբ Զաքար Միրզախանյանի անվամբ սեփականության իրավունքով ՀՀ տարածքում գրանցված անշարժ և շարժական գույքի վրա դրված կալանքը՝ վերացնել:
Դատական ծախսերի հարցը համարել լուծված:
Դատավճիռը կարող է բողոքարկվել Հայաստանի Հանրապետության քրեական վերաքննիչ դատարան` հրապարակման պահից մեկամսյա ժամկետում (դատավճիռը չի կարող բողոքարկվել ՀՀ քրեական դատավարության օրենսգրքի 395-րդ հոդվածի 1-ին մասի 1-ին կետով նախատեսված հիմքով):

ԴԱՏԱՎՈՐ` Ա. ԲԵԿԹԱՇՅԱՆ