Թիվ ԵԿԴ/0325/01/17



Դ Ա Տ Ա Վ Ճ Ի Ռ
Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն Ա Ն ՈՒ Ն Ի Ց
Շիրակի մարզի առաջին ատյանի ընդհանուր իրավասության դատարանը,

ՆԱԽԱԳԱՀՈւԹՅԱՄԲ ԴԱՏԱՎՈՐ` Վ. ՄԻՍԱԿՅԱՆԻ
ՔԱՐՏՈւՂԱՐՈւԹՅԱՄԲ` Ա. ՎԱՐՈՍՅԱՆԻ
Մասնակցությամբ`
ՄԵՂԱԴՐՈՂ Ա. ՉԱԽՈՅԱՆԻ
ՊԱՇՏՊԱՆ Ս. ԵՂԻԱԶԱՐՅԱՆԻ
ԱՄԲԱՍՏԱՆՅԱԼ Ա. ՄԵԼԻՔՍԵԹՅԱՆԻ

2019 թվականի հուլիսի 23-ին դռնբաց դատական նիստում քննության առնելով քրեական գործն ըստ մեղադրանքի Արա Գեղեցիկ Հմայակի Մելիքսեթյանի` ծնված 09.03.1953թ, ք.Գյումրի, ազգությամբ հայ, ՀՀ քաղաքացի, բարձրագույն կրթությամբ, ամուսնացած, թոշակառու, հանդիսանում է «Վահրամաբերդ» պարի խմբի ղեկավար, նախկինում չդատված, հաշվառված և բնակվում է ք. Գյումրի Մայակովսկի փողոցի 118-րդ տանը, մեղադրվում է ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերով,
1. Գործի դատավարական նախապատմությունը.
19.12.2016թ. ՀՀ ԱԱԾ քննչական վարչության քննիչի կողմից հարուցվել է թիվ 58218116 քրեական գործը` ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերով:
31.05.2017թ. Արա Գեղեցիկ Հմայակի Մելիքսեթյանը որպես մեղադրյալ է ներգրավվել ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերով, այն բանի համար, որ նա, 2016 թվականի հունվար ամսին «Ա.Շաբոյան» պարի խմբի գեղարվեստական ղեկավար Արմեն Ռազմիկի Շաբոյանից տեղեկանալով, որ նույն թվականի մարտի 17-20-ն ընկած ժամանակահատվածում Ֆրանսիայի Հանրապետության Նիցցա և Մոնտե-Կառլո քաղաքներում տեղի է ունենալու պարի միջազգային փառատոն, պայմանավորվածություն է ձեռք բերել վերջինիս հետ` իր ղեկավարած «Վահրամաբերդ» պարի խումբը «Ա.Շաբոյան» պարի խմբին միացնելու և «Վահրամաբերդ» պարի խմբի անվան տակ նշված փառատոնին մասնակցելու վերաբերյալ: Այնուհետև, նախնական համաձայնության գալով Արմեն Շաբոյանի հետ, շահադիտական նպատակով, այն է` նյութական օգուտ ստանալու և նյութական որոշակի ծախսերից ազատվելու ձգտումով, «Վահրամաբերդ» պարի խմբի ցուցակում ընդգրկել են խմբի անդամ չհանդիսացող ՀՀ 9 քաղաքացիների, որոնցից` Նաիրա ժորայի Մկրտչյանից պահանջել և ստացել է 380 եվրո, Գևորգ Սուրենի Մարտիրոսյանից` 300 եվրո, իսկ Լուսինե և Ջեմմա Գյոլեցյաններից յուրաքանչյուրից` 200 եվրո, որը հետագայում փոխանցել է Արմեն Շաբոյանին:
Իրենց հանցավոր մտադրությունն իրականացնելու նպատակով, վերջիններիս անօրինական միգրացիան ՀՀ-ից դեպի Ֆրանսիայի Հանրապետություն կազմակերպելու դիտավորությամբ, Արմեն Շաբոյանի հետ միասին վերոհիշյալ անձանց ծանոթացրել է «Վահրամաբերդ» պարի խմբի անդամների հետ, նրանց ներկայացրել` որպես երաժիշտ, պարող և հանդերձապահ, ու հայտարարել, որ նրանք պարի խմբի կազմում մեկնելու են Ֆրանսիայի Հանրապետություն` փառատոնին մասնակցելու նպատակով:
Այնուհետև, ՀՀ-ում գործող Ֆրանսիայի Հանրապետության դեսպանատան կողմից մուտքի թույլտվություն ստանալու նպատակով, Արմեն Շաբոյանին է հանձնել իր խնդրանքով Վահրամաբերդ համայնքի ղեկավարի կողմից վավերացված պարի խմբի ցուցակը, ապա 2016 թվականի փետրվարի 29-ին Արմեն Շաբոյանի հետ միասին «Վահրամաբերդ» պարի խմբի ցուցակում ընդգրկված անձանց ուղեկցել է ՀՀ-ում գործող Ֆրանսիայի դեսպանատուն, որտեղ Արմեն Շաբոյանը հանձնել է համայնքի ղեկավարի կողմից վավերացված պարի խմբի ցուցակում ներառված կեղծ տեղեկություններ, որտեղ նշված անձինք ընդգրկված են եղել որպես երաժիշտ, պարող և հանդերձապահ, սակայն դեսպանատան աշխատակիցների կողմից կեղծիքները բացահայտվել են և մուտքի թույլտվություն չի տրվել:
31.05.2017թ. Արա Գեղեցիկ Հմայակի Մելիքսեթյանի նկատմամբ որպես խափանման միջոց ընտրվել է ստորագրություն չհեռանալու մասին:
31.05.2017թ. Արա Գեղեցիկ Հմայակի Մելիքսեթյանի նկատմամբ հայտարարվել է հետախուզում:
19.06.2017թ. քրեական գործի վարույթը կասեցվել է` մինչև Արա Գեղեցիկ Հմայակի Մելիքսեթյանի հայտնաբերելը:
03.12.2017թ. Արա Գեղեցիկ Հմայակի Մելիքսեթյանը հայտնաբերվել է և նույն օրը քրեական գործի վարույթը վերսկսվել է:
15.12.2017թ. քրեական գործը մեղադրական եզրակացությամբ ստացվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան և 18.12.2017թ. թիվ ԵԿԴ/0325/01/17 քրեական գործը վարույթ է ըդունվել նույն դատարանի դատավոր Մ. Մարտիրոսյանի կողմից:
12.02.2018թ. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը որոշում է կայացրել` թիվ ԵԿԴ/0325/01/17 (58218116) քրեական գործով ըստ մեղադրանքի Արա Գեղեցիկ Հմայակի Մելիքսեթյանի` ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերով, ընդդատությունը փոխել և գործն ուղարկել ՀՀ Շիրակի մարզի ընդհանուր իրավասության առաջին ատյանի դատարան` դատական քննություն կատարելու հարցը լուծելու համար։
22.02.2018թ. թիվ ԵԿԴ/0325/01/17 (58218116) քրեական գործը ստացվել է Շիրակի մարզի ընդհանուր իրավասության առաջին ատյանի դատարան և 26.02.2018թ. նշված քրեական գործը վարույթ է ընդունվել նույն դատարանի դատավոր Վ. Գրիգորյանի կողմից:
14.11.2018թ. ՀՀ Նախագահի թիվ ՀՆ-487-Ա հրամանագրով դատավոր Վ. Գրիգորյանը նշանակվել է Երևան քաղաքի առաջին ատյանի ընդհանուր իրավասության դատարանի դատավոր:
23.11.2018թ. թիվ ԵԿԴ/0325/01/17 (58218116) քրեական գործը մակագրվել է Շիրակի մարզի առաջին ատյանի ընդհանուր իրավասության դատարանի դատավոր Վ. Միսակյանին:
2. Ապացույցների հետազոտում և գնահատում.
Քրեական գործի դատական քննության ընթացքում ամբաստանյալ Արա Գեղեցիկ Հմայակի Մելիքսեթյանը առաջադրված մեղադրանքում իրեն մեղավոր չճանաչեց և ցուցմունք տվեց այն մասին, որ 2016թ. ձմռանը Արմեն Շաբոյանը իրեն զանգել և հայտնել է, որ Ֆրանսիայում փառատոն է կազմակեպված և գիտեր, որ ինքը լավ բեմադրություններ ունի նվիրված հայոց ցեղասպանությանը, ջարդերին, եղեռնի 100 ամյակին և ցանկացել է, որ իր խումբը տանեն Ֆրանսիա մասնակցելու Մոնտե-Կառլո և Նիցցա քաղաքներում կայանալիք փառատոնին, Արմեն Շաբոյանը ասել էր, որ ինքը զբաղվի խումբը պատրաստելու աշխատանքներով: Ինչպես միշտ ինքը զբաղված է եղել իր պարապմունքներով, Արմեն Շաբոյանը զանգել և ասել է, որ արդեն որոշված է Ֆրասիա մեկնելու ժամկետը, միասին պայմանավորվել են, որ հանդիպեն և քննարկեն իր և Արմեն Շաբոյանի խմբերի միանալու և պարապմունքներ անցկացնելու մասին: Արմեն Շաբոյանը ասել է, որ ինքը կենտրոնանա պարերի փորձերի վրա, իսկ ֆինանսական և մնացած հարցերով ինքը կզբաղվի: Ինքը ցանկացել է ճշտել, թե ինչ պայմաններով պետք է մեկնեն, որպեսզի երեխաների ծնողներին տեղեկացնի, Արմեն Շաբոյանը ասել է, որ պետք է երեխաներից հավաքեն 100 եվրո գումար և ներկայացնեն իրենց փաստաթղթերը, ինքը խոսել է պարի խմբի երեխաների ծնողների հետ այդ մասին, սակայն ծնողները չեն համաձայնվել նշված գումարը վճարելու համար, նա այդ մասին տեղեկացրել է Արմեն Շաբոյանին, սակայն վերջինս ասել է, որ կփորձի կարգավորել այդ հարցերը ասել է, որ կգտնի հովանավորներ և կլուծի այդ հարցերը, և նրանք սկսում են համատեղ պարապմունքները Արմեն Շաբոյանի և իր խմբի հետ: Նա Արմեն Շաբոյանին է փոխանցել «Վահրամաբերդ» պարի խմբի ցուցակը, որի մեջ գրվել է նաև նրա խմբի անդամների անունները, ինքը ուրիշ ցուցակ չի տվել, ընդհանուր ցուցակները կազմել է Արմեն Շաբոյանը և ասել է, որ այն պետք է հաստատվի Վահրամաբերդի գյուղապետի կողմից և պետք է ուղարկի Ֆրանսիա փառատոնի կազմակերպիչներին, ասել է նաև մնացած կազմակերպչական աշխատանքներով կզբաղվի ինքը: Մի քանի օրից զանգել և հայտնել է, որ պետք է մեկնեն Երևան, որպեսզի մտնեն Ֆրանսիայի դեսպանատուն, վիզաներ ստանալու համար: Երկու խմբերը միասին գնացել են Երևան, խմբի հետ դեսպանատուն մտել է Արմեն Շաբոյանը, ինքը ներս չի մտել, մեկ շաբաթ անց իմացել են, որ մերժում են ստացել:
Պաշտպանի հարցերին պատասխանեց, որ ինքը Արմեն Շաբոյանին ներկայացրել է միայն իր «Վահրամաբերդ» խմբում պարող երեխաների անուները, այլ անծանոթ մարդկանց անուններ չի ներկայացրել, ձեռագիր գրված ցուցակ է եղել, հետո Արմեն Շաբոյանը պետք է այդ նույն ցուցակում գրեր նաև իր խմբի անդամների անունները, Երևանում կարդացել են իրեն անծանոթ անձանց անուններ, ինքը ասել է, որ դրանք իր խմբի անդամները չեն:
Մեղադրողի հարցերին պատասխանեց, որ իրեն ոչ ոք չի մոտեցել, գումար չի փոխանցել Ֆրանսիա մեկնելու համար, Ֆրանսիայից հրավերը ստացվել է «Վահրամաբերդ» խմբի անունով, դա է եղել պատճառը, որ <<Սևյան>> խմբի անդամների անունները ներկայացվել է մեկ ցուցակով, Գևորգ Մարտիրոսյանին ճանաչել է, որպես դհոլահար, Արմեն Շաբոյանն է նրան ներկայացրել իր խմբում, որպես դհոլահար, Ջեմմա Գյոլեցյանին նույնպես ինքն է ներկայացրել որպես իր խմբի անդամ:
Դատարանի հարցերին պատասխանեց, որ իր խմբի անդամները եղել են թվով 16 երեխաներ, բոլորը մերժվեցին, ոչ ոք վիզաներ չստացան, իր խումբը միացել է Արմեն Շաբոյանի խմբին, նա իրեն ասել է, որ զբաղվի պարերի բեմադրություններով, իսկ ֆինանսական հարցերով կզբաղվի ինքը, փառատոնին մասնակցելը Արմեն Շաբոյանի գաղափարն է եղել, ինքը բացի իր խմբի երեխաներից, որը իրեն ասել էր Արմեն Շաբոյանը, պետք է հավաքեն 100 եվրո գումար, ինքը ոչ ոքից գումար չի պահանջել և չի ստացել:
/դատական նիստի արձանագրություն/
Դատարանը, արձանագրելով, որ ամբաստանյալ Արա Գեղեցիկ Հմայակի Մելիքսեթյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Արա Գեղեցիկ Հմայակի Մելիքսեթյանը նախաքննության ընթացքում ցուցմունք է տվել այն մասին, որ կնոջ` Անահիտ Ղազարյանի, հետ միասին բնակվում է Շիրակի մարզի Գյումրի քաղաքի Մայակովսկի ւիողոցի 118-րդ տանը: Չի աշխատում, թոշակառու է: Մասնավոր դասընթացներ է անցկացրել Շիրակի մարզի Վահրամաբերդ գյուղի ակումբում, հանդիսացել է «Վահրամաբերդ. կոչվող պարի խմբի ղեկավար, որը գործել է Շիրակի մարզի «Վահրամաբերդ» գյուղի կուլտուրայի տանը: Համույթը բաղկացած է եղել երեք տարիքային խմբերից, որոնցում ընդգրկված են եղել 60 երեխաներ: Պարի հաճախող յուրաքանչյուր երեխա ամսեկան իրեն վճարել է 2.000 ՀՀ դրամ, այն երեխաները, ովքեր հանդիսացել են հարազատ քույր և եղբայր, վճարել են 1.500 ՀՀ դրամ, իսկ սոցիալապես անապահով երեխաներից վարձավճար չի վերցրել: Հաշվի առնելով, որ որպես պարուսույց, պարի խմբի ղեկավար, ինքը որևէ վարձատրություն` աշխատավարձ չի ստացել, ուստի հավաքագրված ամսավճարների մի մասը տնօրինել է որպես աշխատավարձ, իսկ մնացած մասը ծառայել է փորձերի ժամանակ օգտագործվող երաժշտական կենտրոնի վերանորոգման, նոր ձայներիզների ձեռք բերման և այլ նպատակներով: 2011 թվականից «Վահրամաբերդ» պարի խումբն ակտիվորեն մասնակցել է Գյումրի քաղաքում կազմակերպված տարբեր տեսակի ւիառատոնների ստացել դիպլոմներ, պատվոգրեր և մեդալներ: 2014 թվականին Գյումրիի «էսկադա» խմբի հետ միասին մասնակցել է Չեխիայում և Լեհաստանում կազմակերպված ւիառատոններին և արժանացել հաղթողի գավաթին: 2016 թվականի հունվար ամսին` ստույգ օրը չի հիշում, իրեն է զանգահարել Գյումրի քաղաքի «Աղասի Շաբոյանի անվան ժողովրդական պարի համույթի» տնօրեն Արմեն Շաբոյանը և հայտնել, որ իր հետ խոսելու բան ունի` միաժամանակ խնդրելով հանդիպել: Հանդիպման ժամանակ Արմեն Շաբոյանն ասել է, որ նույն թվականի մարտ ամսին Ֆրանսիայի Հանրապետության Նիցցա և Մոնտե-Կառլո քաղաքներում տեղի է ունենալու ժողովրդական պարի փառատոն և հաշվի առնելով, որ ինքն ունի պատրաստված պարի խումբ առաջարկել է «Վահրամաբերդ» պարի խումբը միացնել իր խմբին և միասին մասնակցել փառատոնին, ինչին ինքը համաձայնվել է: Հաջորդ օրը, պարի խմբի փորձի ժամանակ, մեծերի խմբի մեջ պարող երեխաներին տեղեկացրել է, որ 2016 թվականի մարտ ամսին Ֆրանսիայի Հանրապետության Նիցցա և Մոնտե-Կառլո քաղաքներում տեղի է ունենալու ժողովրդական պարի փառատոն, ինչին մասնակցելու հրավերք է ստացել «Ա.Շաբոյանի անվան ժողովրդական պարի խումբը» և ցանկության դեպքում իրենց պարի խումբը նույնպես կարող է միանալ «Ա.Շաբոյան» պարի խմբին ու մասնակցել փառատոնին: Ստանալով պարի խմբի անդամների համաձայնությունը, վերջիններիս տեղեկացրել է, որ նշված փառատոնին մասնակցելու համար պահանջվում է որոշ փաստաթղթեր, մասնավորապես` անձնագիր, լուսանկարներ, ծննդյան վկայական, ծնողների զագսի վկայական, ծնողների անձնագրերի պատճեններ, անչափահասների համար լիազորագրեր, տեղեկանքներ ուսման վայրերից, ինչպես նաև 100 եվրո գումար` Ֆրանսիայի դեսպանատուն մուտք գործելու, մուծումներ կատարելու և ճանապարհածախսի համար: Մոտ մեկ շաբաթվա ընթացքում շուրջ 20 երեխաներ իրեն են ներկայացրել պահանջվող փաստաթղթերը, որոնք տվել է Արմեն Շաբոյանին: Գումարները հնարավոր չի եղել հավաքագրել, քանի որ երեխաները և նրանց ծնողները հայտնել են, որ չունեն համապատասխան գումարներ, որի մասին տեղեկացրել է Արմեն Շաբոյանին, ինչին ի պատասխան վերջինս հայտնել է, որ ունի հովանավորներ և ծանոթներ, որոնց միջոցով կփորձի գումարային հարցերը կարգավորել: Դրանից հետո Արմեն Շաբոյանին է փոխանցել «Վահրամաբերդ» պարի խմբի ցուցակը, որի մեջ ընդգրկված են եղել պարի խմբի 16 անդամներ, ինչպես նաև պարի խմբի հետ կապ չունեցող 4 անձանց տվյալներ, միաժամանակ հայտնելով, որ այդ անձինք իր ծանոթներն են և ցանկություն են հայտնել պարի խմբի հետ միասին մեկնել Ֆրանսիայի Հանրապետություն: Դրանից հետո, Արմեն Շաբոյանի պահանջով, նշված անձանցից` Նաիրա ժորայի Մկրտչյանից ստացել է 380 եվրո գումար, Գևորգ Սուրենի Մարտիրոսյանից` 300 եվրո գումար, իսկ Լուսինե և Ջեմմա Գյոլեցյաններից` յուրաքանչյուրից 200 եվրո գումար, որոնք ամբողջությամբ փոխանցել է Արմեն Շաբոյանին: Դրանից հետո, Արմեն Շաբոյանի խնդրանքով, իր պարի խմբի անդամների հետ գնացել է Գյումրի քաղաքում գործող «Սևյան» ակումբ, որտեղ վերջինս պարի խմբի անդամներին ներկայացրել է պարի խմբի հետ կապ չունեցող անձանց և խնդրել մտապահել վերջիններիս տվյալները: Այնուհետև Արմեն Շաբոյանից տեղեկացել է, որ 2016 թվականի փետրվարի 29֊ին խմբի հետ միասին պետք է մեկնեն Երևան քաղաքում գտնվող Ֆրանսիայի դեսպանատուն’ վիզայի ստացման նպատակով, ինչի մասին հայտնել է պարի խմբի անդամներին: 2016 թվականի փետրվարի 29-ին, առավոտյան ժամը 07:00-ի սահմաններում, Երևան քաղաք տեղափոխող ավտոբուսը Վահրամաբերդ գյուղից շարժվել է դեպի Գյումրի քաղաք, որտեղ «Սևյան» կոչվող ակումբի դիմաց հավաքված երեխաներին վերցնելով ուղևորվել է Երևան քաղաք: Հասնելով այնտեղ, պարի խմբի անդամները և Արմեն Շաբոյանը միասին մուտք են գործել Ֆրանսիայի դեսպանատուն: 2016 թականի մարտի 17-20-ն ընկած ժամանակահատվածում Ֆրանսիայի Նիցցա և Մոնտե-Կառլո քաղաքներում կայանալիք ժողովրդական պարի փառատոնին մասնակցության հրավերքը ստանալու և հետագա բոլոր կազմակերպչական աշխատանքներով զբաղվել է Արմեն Շաբոյանը: Մի քանի օր անց, ստույգ օրը չի հիշում, խմբի հետ միասին կրկին մեկնել է Երևան քաղաք` Ֆրանսիայի դեսպանատուն, որտեղ տեղեկացել է, որ Ֆրանսիայի դեսպանատունը պարի խմբի որևէ անձի վիզա չի տրամադրել:
/Հատոր 3-րդ` Գ/Թ 78-84, 314, 333/
Նախաքննական ցուցմունքը հրապարակելուց հետո հայտնեց, որ 2017թ. մարտ ամսվա վերջին քննիչը կանչել է իր մոտ, մինչ այդ քննիչը մի քանի անգամ եկել է Վահրամաբերդ գյուղ, Գյումրի, հարցաքննել է նաև երեխաներին ու նրանց ծնողներին, նրանց զգուշացրել է, որ իրենց ղեկավարը չիմանա, որ իրենց հարցաքննել է, ինքը քննիչի մոտ հարցաքննվել է, հետո նրան քննիչը ասել է, որ կարող է գնալ, նաև հարցրել է թե, որ կանչեն ինքը կգա, պատասխանել է, որ` այո և քանի որ ինքը Ռուսատանի քաղաքացի է և այնտեղից թոշակ է ստանում, մեկնել է Ռուսաստան, աշխատել է իր բարեկամների մոտ, մինչև փաստաթղթային հարցերը կարգավորելը, քանի որ ունի վատառողջ կին, որի բուժման ծախսերը ինքն է հոգում: Դիմում է գրել և սպասել է, որ իր թոշակը վերականգնեն, մի քանի ամիս հետո երբ գնացել է, որ անձնագիրը վերցնի, իմացել է, որ Հայաստանում իրեն փնտրում են և անձնագրի փոխարեն վերադարձի թուղթ են տվել, որով ինքը կարողացել է վերադառնալ Հայաստան, օդանավակայանում կանգնեցրել են, ինքը խնդրել է, որ իրեն թողնեն գնա տուն, քանի որ կինը վատառողջ է և հիվանդանոցից այդ օրն է դուրս է գրվել, նա ցանկացել է կնոջը տեղափոխել Գյումրի, հետո գնա քննիչի մոտ ցուցմունք տալու, սակայն նրան տեղափոխել են Երևանի քննչական բաժին, այնտեղ ինքը առանց կարդալու, ինչ-որ պատրաստած է եղել քննիչը ստորագրել է, որ շուտ կարողանա վերադառնալ տուն: Քանի որ ինքը ճանապարհից հոգնած եկել է, կինը վատառողջ է եղել, հիվանդանոցից նոր է դուրս գրված եղել, ինքը չի կարդացել, այլ արագ ստորագրել է, որ շուտ հասնեն տուն, երեկոյան ուշ ժամ է եղել: Ինքը ոչ մեկից գումար չի վերցրել, ֆինանսական հարցերով զբաղվել է Արմեն Շաբոյանը, Լուսինե և Ջեմմա Գյոլեցյանները «Վահրամաբերդ» խմբի հետ ոչ մի կապ չեն ունեցել և խմբի անդամներ չեն եղել, նրանցից գումար չի վերցրել, 3-4 անգամ գնացել է <<Սևյանի>> ակումբ փորձեր անցկացնելու համար:
Դատարանի հարցերին պատասխանեց, որ ինքը պատրաստ է եղել ցանկացած արձանագրության տակ ստորագրելու, միայն թե կարողանա շուտ հասնի տուն, քանի, որ կինը մեքենայի մեջ է եղել և հիվանդանոցից այդ օրն է դուրս գրված եղել, ինքը հոգնած է եղել, քննիչին խնդրել է, որ հաջորդ օրը կգա և ցուցմունք կտա, բայց նա չի համաձայնվել:
Վկա Շողիկ Հարությունի Հովհաննիսյանը դատաքննության ընթացքում ցուցմունք է տվել այն մասին, որ ընկեր Արան համարվում է պարային խմբի ղեկավարը, պարուսույցը, որտեղ ինքը ելույթ է ունեցել, 5-6 տարուց ավել ճանաչում է նրան, իրենց պարային փորձերը անցկացրել են Վահրամաբերդ գյուղի մշակույթի տանը, մինչ այդ դպրոցի դահլիճում, ընկեր Արան քաղաքից գալիս էր, իրենց պար էր սովորեցնում, հրավերներ բազմաթիվ անգամ են ստացել, գնացել մեր երկիրը պատվով ներկայացրել վերադարձել են Հայաստան: Ֆրանսիա հրավեր ունեին պետք է գնային, դեսպանատունը մերժեց, չգնացին:
Մեղադրողի հարցերին պատասխանեց, որ ներկայումս ամուսնացած է, ունի փոքրիկ ուստի ժամանակավորապես չի գնում պարի: Պարային խմբակը բացվելու օրվանից գնացել է պարի, ստույգ թիվ չի կարող ասել, սակայն իր հիշելով 2012 թվականին է բացվել պարային խմբակը, հաճախել է մինչև 2017թ. սեպտեմբեր ամիսը, մինչև ամուսնանալը: Շրջագայել են, եղել են, տարբեր երկրներում, 1-ին անգամ Վրաստանում, հետագայում գնացել են Հունաստան, Լեհաստան, Լիտվա: Որոշակի գումար վճարում էին իրենց ծախսերի համար, ընկեր Արային էին տալիս, ստույգ թիվ չի կարող ասել մոտավոր 50-100 եվրո: Ֆրանսիայի մեկնելու հետ կապված որևէ դրամական միջոցների մասին խոսք չի գնացել, չեն հավաքել, ինքը որևէ բան չի վճարել: Թե ինչու է նախկինում վճարել հիմա չէ, այդ մասին չի կարող ասել, ինքը լիարժեք վստահում է իր պարուսույցին: Անձնագիր, աշխատանքի վայրից տեղեկանք, նմանատիպ փաստաթղթեր է ներկայացրել, աշխատում է Եվրոպական քոլեջում, ակադեմիայից տեղեկանք է ներկայացրել, որ այդ բուհի ուսանողուհին է, այդ ժամանակ ուսանողուհի է եղել: Իրենց պարուհիներից Նառային է հիշում, Քնարիկին, տղաներից` Միսակին, Արմանին, իրենց գյուղի պարող երեխաներն էին: Ընդհանուր ավտոբուսով են գնացել Ֆրանսիայի դեսպանատուն, 20-ից ավել էին, հստակ ասել չի կարող, բավական ժամանակ է անցել, կային մարդիկ որ չէր ճանաչում, չի հիշում շատ էին թե չէ, իրեն չէր հետաքրքրում, չի հիշում իրեն անծանոթ մարդիկ մտան դեսպանատուն, թե` ոչ, բայց երևի մտել են: Գնացել են դեսպանատուն, գործերը հանձնել են, որոշ ժամանակ հետո պատասխան են ստացել, որ մերժել են: Չի կարող ասել իրեն անծանոթ մարդիկ գումար վճարել են, թե` ոչ: Ավտոբուսի հետ կապված խնդիր առաջացավ, փչացավ ու հետ են եկել գնացքով: Խոսել է մի աղջկա հետ, ով գեղեցկության սրահում էր աշխատում, խոսել են միայն գեղեցկության մասին` մազերի հարդարում, եղունգներից, սակայն աղջկա անունը չի հիշում: Արմեն Շաբոյանին ճանաչում է որպես ընդհանուր խմբի ղեկավար, Եվրոպա գնալ գալու հարցերը ինքն էր կարգավորում, իրա մոտ էր կենտրոնացած փաստաթղթերը` անձնագիր, տեղեկանք տալիս էին Արմեն Շաբոյանին: Չի կարող նշել թե իրենց հետ եկողները մնացել են, թե` չէ, այլ երկրում, չի հիշում, իրենք միշտ գնացել ու հետ են վերադարձել: Հենց իմացել են, որ գնալու են Ֆրանիսա մի քանի անգամ իրենց մշակույթի տանից գնացել են Սևյանի շենքը, եղել են տարբեր մարդիկ, ընկեր Արան ասել է էս մարդը ձեր հետ պետք է ելույթ ունենա, որպես պարող և երգող, կանգնում էին պարելու մի քանիսը միանում էին, շարժումներ էին սովորեցնում, նվագողներ էլ են եղել: Հայտնեց նաև, որ հիմա ավելի լավ է հիշում, քան քննիչի մոտ հարցաքննվելուց, որովհետև հիշողությունը թարմացել է, ավելի լավ է մտաբերում, երկար ժամանակ է անցել իր կյանքում իրադարձային փոփոխություններ են եղել, ինչ հիշում է այն էլ ասում է:
Պաշտպանի հարցերին պատասխանեց, որ 2016 թվականին են իրեն հարցաքննել, Մելիքսեթյան Արայի գործի հետ կապված, ինչքան հիշում է գրված էր Մելիքսեթյանի Արայի և Արմեն Շաբոյանին գործի հետ, ովքեր մեղադրում են ապօրինի միգրացիայի մեջ, երկուսի անունն էլ երևի թե հիշատակվում էր:
Արմեն Շաբոյանին գիտի, որ Աղասի Շաբոյանի թոռն է, հետո անձամբ տեսել է Ֆրանսիա գնալու հետ կապված, ինչքան հիշում է այդ առիթով է տեսել, ծանոթացրել են: Գեղարվեստական ղեկավարը ընկեր Արան է, լիդեր ղեկավարը Արմեն Շաբոյանը, չի կարող ասել, թե ինչով է զբաղվում լիդեր ղեկավարը: Հունաստան, Լեհաստան, Չեխիա էլ են գնացել, չի կարող հիշել ուրիշ ղեկավար կար, թե` ոչ: Չգիտի, թե վարսահարդար աղջիկը պարի փորձերին կար, թե` ոչ, իրենց ավտոբուսի մեջ եղած մարդկանց չի հիշում, եթե դեմքով էլ տեսնի չի հիշի: Ֆրանսիա մեկնելու համար դեսպանատնից հետո մի քանի շաբաթ անց նախատեսում էին մեկնել, կոնկրետ ժամանակը չգիտի, իրեն անծանոթ մարդիկ պետք է ելույթ ունենային «Վահրամաբերդ» պարի խմբի անվան տակ:
Դատարանը, արձանագրելով, որ վկա Շողիկ Հարությունի Հովհաննիսյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Վկա Շողիկ Հարությունի Հովհաննիսյանը նախաքննության ընթացքում ցուցմունք է տվել այն մասին, որ ամուսնու և վերջինիս ծնողների հետ միասին բնակվում է Շիրակի մարզի Բասեն 1ա փողոցի 1-ին նրբանցքի 42-րդ տանը: 2016 թվականի սեպտեմբեր ամսից աշխատում է Հայաստանում Եվրոպական քոլեջ հիմնադրամի Գյումրու մասնաճյուղում` որպես իրավագիտության դասախոս: 2009 թվականից մինչև 2016 թվականի նոյեմբեր ամիսը հաճախել է պարի դասընթացների` «Վահրամաբերդ» պարի խմբակում, որը ղեկավարել է Արա Գեղեցիկ Մելիքսեթյանը: «Վահրամաբերդ» պարի խումբը պարբերաբար մասնակցել է արտասահմանյան տարբեր փառատոնների, մրցույթների և համերգների: Այդ ամենն ամբողջությամբ նախաձեռնել և իրականացրել է Արա Գեղեցիկ Մելիքսեթյանը: Պարի խմբակում ուսանելու տարիներին պարի խմբի հետ շրջագայությունների է մեկնել Վրաստան, Հունաստան, Լիտվա, Լեհաստան, Չեխիա: Սովորաբար արտասահման մեկնելիս, բացառությամբ Վրաստանի, Արա Գեղեցիկ Մելիքսեթյանն իրենց հայտնել է, որ ծախսերի համար անհրաժեշտ է 100 եվրո գումար վճարեր, որը պատճառաբանել է դեսպանատանը կատարվելիք վճարումներով: 2016 թվականի փետրվար ամսին Արա Գեղեցիկ Մելիքսեթյանից տեղեկացել է, որ հերթական անգամ պարի խմբակը հրավերք է ստացել Ֆրանսիայի Հանրապետությունում կայանալիք փառատոնի մասնակցության համար, ինչին մասնակցելու ցանկություն է հայտնել նաև ինքը և ներկայացրել պահանջվող փաստաթղթերը: Նշված փաստաթղթերը տրամադրելուց Արա Գեղեցիկ Մելիքսեթյանի նախաձեռնությամբ պարի խմբի անդամների հետ միասին գնացել է Գյումրի քաղաքում գտնվող «Սևյան» ակումբ, որտեղ Արմեն Շաբոյանը, Արա Գեղեցիկ Մելիքսեթյանի ներկայությամբ իրենց է ներկայացրել «Վահրամաբերդ» պարի խմբի անդամ չհանդիսացող անձանց, հայտնել նրանց երաժշտական մասնագիտությունները և խնդրել մտապահել նրանց տվյալները, որպեսզի դեսպանատանը նրանց վերաբերյալ հարցեր տալու դեպքում կարողանան պատասխանել դրանց: Այնուհետև, 2016 թվականի փետրվար ամսվա կեսերին, «Վահրամաբերդ» պարի խմբի մասնակիցների հետ Վահրամաբերդ գյուղից մեկնել են Երևան` Ֆրանսիայի դեսպանատուն այցելության համար: ճանապարհին Գյումրի քաղաքից իրենց ավտոբուս են նստել իրեն անծանոթ մի քանի անձինք, ովքեր իրենց հետ միասին գնացել են Ֆրանսիայի դեսպանատուն: Արդեն դեսպանատանը խմբի բոլոր անդամներն, ինչպես նաև Գյումրիից իրենց հետ եկած անձինք, մասնակցել են հարցազրույցի, որի ընթացքում իրենցից հետաքրքրվել են, թե ովքեր են, ինչով են զբաղվում և ինչ նպատակով են մեկնում Ֆրանսիայի Հանրապետություն: Հարցերին պատասխանելուց հետո դեսպանատան աշխատակիցներն իրենց հայտնել են, որ հետագայում լրացուցիչ կկապնվեն և կհայտնեն արդյունքների մասին: Այնուհետև տեղեկացել են, որ իրենց դիմումները` մուտքի արտոնագիր ստանալու վերաբերյալ, մերժվել են:
/Հատոր 2-րդ` Գ/Թ 246-249, Հատոր 3-րդ` Գ/Թ. 14-18/
Նախաքննական ցուցմունքը հրապարակելուց հետո վկան հայտնեց, որ ցուցմունք տալուց կարող է շփոթված է եղել կամ անճշտություն է եղել, ասել է 2009թ., հիմա ասում է 2012թ., ասել է 100 եվրո, հիմա 50, թվային որևէ ստույգ տվյալ չի կարող ասել, գումարի ու տարեթվի վերաբերյալ հնարավոր են հակասություններ: Թվային տվյալներից բացի նախաքննական մյուս ցուցմունքները ճիշտ են: Գնացել են Սևյան ակումբ, ծանոթացրել են իրեն անծանոթ մարդկանց հետ, 2-3 հոգի կանգնեցին, ընկեր Արան պարային շարժումներ ցույց տվեց, սովորեցին, եկան տուն:
Վկա Հովհաննես Վարդանի Զաքարյանը դատաքննության ընթացքում ցուցմունք է տվել այն մասին, որ հաճախել է Վահրամաբերդի ակումբ, ճանաչում է Արային, ճանաչում է Արմեն Շաբոյանին, 2016թ. դիմել է խմբի հետ մեկնելու նպատակով շրջագայելու համար:
Մեղադրողի հարցերին պատասխանեց, որ 2011թ. բուժվելու նպատակով եղել է Ֆրանսիայում, 2018թ. վերադարձել է: Սևյան ակումբում 2016 թվականին պատահաբար ծանոթացել է Արմեն Շաբոյանի հետ, խումբը հրավիրված էր Ֆրանիսա Նիցցա քաղաք, հայտնել է նրան, որ ուզում է իրենց հետ գնա շրջագայի հետ գա, վերջինս ասել է, որ հնարավոր է, հետո գնացել են դեսպանատուն, մանրամասն չի հիշում, մի քանի օր անցավ պատասխանը եղավ, որ մերժել են, իրանից ուզել են 400 եվրո, չգիտի թե ինչ ծախսեր են մտնում դրա մեջ, տվել է գումարը, դեսպանատան կողմից մերժումից 1 օր հետո գնացել հետ է վերցրել գումարը, դեսպանատանը ասել է, որ գնում է փառատոնի խմբով, ինքը նվագողն է, դուդուկ է նվագում, փոքրուց սովորել է տեսնելով, 1 ամիս փորձի օրերին գնացել է Վահրամաբերդի ակումբ, 2015թ. ամռանն էր, այդ ժամանակ վարձով էր ապրում կայարանում, գնում-գալիս էր Վահրամաբերդ, պարեր էր սովորում, հաճախում էր, նայում էր, երաժիշտ է, դիտելու համար է գնացել, լավ չի նվագում, ոչ մեկ չի խնդրել իրեն, թե ինչ ասի, ինչ չասի: Խմբի անդամ չի եղել, գնալու էր Ֆրանսիա նվագեր, հետն էլ շրջագայեր ու հետ գար հետները: Սևյան ակումբում Արային չի տեսել, միայն Արմեն Շաբոյանին, մարդիկ կային մի քիչ հեռու, երևի պահակ կամ աշխատող, գնացել էր իմանալու շրջագայության մասին, մի քանի օր գնացել է: Պատահական է ծանոթացել, հետո գնացել է Սևյան ակումբ, դրսում է ծանոթացել` Սևյանի ակումբի մոտ, հստակ չի հիշում, թե քանի անգամ է եղել Սևյան ակումբում, քննիչի մոտ կարդացել, ստորագրել է իր ասածների տակ, նույն բանը ասել է և Գյումրիում և Երևանում, իր հիշելով ոչ մի հակասական բան չի ասել:
/դատական նիստի ձայնային արձանագրում/
Դատարանը, արձանագրելով, որ վկա Հովհաննես Վարդանի Զաքարյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Վկա Հովհաննես Վարդանի Զաքարյանը նախաքննության ընթացքում ցուցմունք է տվել այն մասին, որ հաշվառված է Գյումրի քաղաքի Կնունյանց փողոցի 78֊րդ տանը, սակայն շուրջ 1 տարի է վարձակալական հիմունքներով միայնակ բնակվում է Գյումրի քաղաքի գնացքի կայարանին կից տանը, որի հասցեն չգիտի: Շուրջ մեկուկես տարի է աշխատում է Գյումրի քաղաքում գտնվող «Լաչին» կոչվող մթերային խանութում որպես վաճառող: 2008 թվականից մինչ օրս տառապում է «Հեպատիտ Բ» հիվանդությամբ, ինչի կապակցությամբ` 2011 թվականի ապրիլ ամսին դիմել է ՀՀ-ում Ֆրանսիայի դեսպանատուն` մուտքի թույլտվություն ստանալու համար, և նույն ամսին մեկնել է Ֆրանսիայի Հանրապետության Բորդո քաղաք և հանձնվել իշխանություններին` այնտեղ բուժում ստանալու նպատակով: Որոշակի բուժում ստանալուց հետո, 2015 թվականի մարտ ամսին դիմել է Ֆրանսիայում ՀՀ-ի դեսպանատուն` վերադարձի վկայական ստանալու նպատակով, և ստանալով այն` նույն ամսին վերադարձել է ՀՀ-ի Գյումրի քաղաք: 2016 թվականի սկզբներին պատահական ծանոթացել է Գյումրի քաղաքի բնակիչ, ժողովրդական պարի խմբի ղեկավար Արմեն Շաբոյանի հետ: Վերջինիս հետ զրույցի ժամանակ նրանից տեղեկացել է, որ մտադրություն ունի իր պարի խմբի հետ միասին մեկնելու Ֆրանսիայի Նիցցա քաղաք` այնտեղ կայանալիք հյուրախաղերին մասնակցելու նպատակով: Իմանալով այդ մասին, ցանկություն է հայտնել պարի խմբի հետ միասին մեկնել Ֆրանսիայի Հանրապետության Նիցցա քաղաք, շրջագայել և նույն խմբի հետ վերադառնալ ՀՀ, ինչին Արմեն Շաբոյանը տվել է իր համաձայնությունը և հայտնել, որ մեկնելու համար պետք է իրեն վճարի 400 եվրո գումար և տրամադրի պահանջվող փաստաթղթերը: Համաձայնվելով Արմենի պայմանին, պատրաստականություն է հայտնել այդ գումարը նրան վճարել, և մի քանի օր հետո, 2016 թվականի հունվար կամ փետրվար ամսին, հանդիպելով Արմեն Շաբոյանին Գյումրի քաղաքում գործող «Սևյան» ակումբում, նրան է տվել պահանջվող 400 եվրո գումարը, ինչպես նաև անձնագիրը և լուսանկարներ: Դրանից մի քանի օր անց, Արմեն Շաբոյանը զանգահարել է իրեն և հայտնել, որ պարի խմբի անդամները հավաքվում Են «Սևյան» ակումբում, միաժամանակ խնդրելով իրեն նույնպես գնալ այնտեղ: Պայմանավորված ժամին գնացել է «Սևյան» ակումբ, որտեղ Արմեն Շաբոյանն իրեն ծանոթացրել է պարի խմբի անդամների հետ, հայտնել իր անուն, ազգանունը և հայտարարել, որ ինքը նույնպես պարի խմբի հետ միասին պետք է մեկնի Ֆրանսիայի Հանրապետություն` փառատոնին մասնակցելու համար: Խոսակցության ժամանակ Արմեն Շաբոյանն իրեն տեղեկացրել է, որ «Վահրամաբերդ» պարի խմբում իրեն ընդգրկելու է որպես երաժիշտ, ինչի մասին խնդրել է հայտնել նաև դեսպանատանը: 2016 թվականի փետրվար ամսվա վերջին` ստույգ օրը չի հիշում, Արմեն Շաբոյանը կրկին զանգահարել է իրեն և հայտնել, որ մոտակա օրերին պարի խմբի հետ միասին պետք է մեկնեն Երևան քաղաք` Ֆրանսիայի դեսպանատուն մուտք գործելու նպատակով: Պայմանավորված օրն առավոտյան ժամը 7:00-ին, Գյումրի քաղաքում գործող «Սևյան» ակումբի դիմացից պարի խմբի անդամների հետ միասին մեկնել է Երևան քաղաք: Հասնելով Ֆրանսիայի դեսպանատան մոտ, մուտք են գործել ներս, և դեսպանատան աշխատակցի հարցին, թե ուր է գնում և ինչ դերակատարություն ունի պարի խմբում, պատասխանել է, որ հանդիսանում եմ «Վահրամաբերդ» պարի խմբի երաժիշտներից և խմբի հետ մեկնում է Ֆրանսիայի Հանրապետության Նիցցա քաղաք` այնտեղ կայանալիք փառատոնին մասնակցելու նպատակով, որից հետո դուրս է եկել դեսպանատնից և վերադարձել Գյումրի: Դրանից մոտ մեկ շաբաթ անց կրկին «Վահրամաբերդ» պարի խմբի հետ միասին գնացել է Ֆրանսիայի դեսպանատուն, որտեղ իրենց հայտնել են, որ Ֆրանսիայի դեսպանատունը մուտքի թույտվություն չի տվել: Այնուհետև «Սևյան» ակումբում հանդիպել է Արմեն Շաբոյանին, ով իրեն է վերադարձրել 400 եվրո գումարը:
Քննիչի հարցերին ի պատասխան հայտնել է հետևյալը.
Հարց-Նշեք Դուք ճանաչում եք Գյումրի քաղաքի բնակիչ, «Վահրամաբերդ» պարի խմբի ղեկավար Արա Գեղեցիկ Մելիքսեթյանին, եթե այո, ապա ինչպիսի հարաբերությունների մեջ եք գտնվում վերջինիս հետ:
Պատասխան֊ Ոչ, Ձեր կողմից նշված տվյալներով անձին ես չեմ ճանաչում, նրա հետ ընդհանրապես շփում չեմ ունեցել և տեղեկություն չունեմ, թե Ձեր կողմից նշված տվյալներով անձն ինչ առնչություն ունի այս գործի հետ:
Հարց- Նշեք Դուք երբևէ հանդիսացել եք «Վահրամաբերդ» պարի խմբի անդամ կամ Ձեր ընկերներից, բարեկամներից կան այնպիսի անձինք ովքեր նշված խմբի անդամ են եղել:
Պատասխան- Ոչ, ես երբևէ «Վահրամաբերդ» պարի խմբի անդամ չեմ հանդիսացել, որևէ կապ չեմ ունեցել այդ խմբի հետ և իմ շրջապատում չկան այնպիսի անձինք ովքեր նշված խմբի անդամ են եղել: Ես ընդհանրապես երաժշտության հետ որևէ կապ չեմ ունեցել և չունեմ:
Հարց- Նշեք 400 եվրո գումարը Արմեն Շաբոյանին փոխանցելու ժամանակ վերջինիս հետ որևէ անձ եղել է, թե՝ ոչ:
Պատասխան- Ոչ իմ կողմից նշված գումարը փոխանցելու Ժամանակ Արմեն Շաբոյանն եղել է միայնակ: Նշեմ, որ այդ ժամանակ ինձ հետ նույնպես որևէ անձ չի եղել:
Հարց- Նշեք երբ ավտոբուսով «Վահրամաբերդ» պարի խմբի անդամների հետ միասին գնացել եք Ֆրանսիայի դեսպանատուն, այնտեղ պարի խմբի անդամների կամ Ձեզ հետ դեսպանատուն մուտք գործող այլ անձանց նկատել եք, թե ոչ, եթե այո, ապա հայտնեք թե նրանք քանիսն էին, Դուք վերջիններիս ճանաչում էիք, թե` ոչ և հայտնեք նրանց վերաբերյալ տեղեկություններ:
Պատասխան- Երբ ավտոբուսով հասանք Երևան քաղաքում գտնվող Ֆրանսիայի դեսպանատան մոտ, ես այնտեղ նկատեցի Արմեն Շաբոյանին, ով դրսում կանգնած սպասում էր մեզ: Բացի Արմենից այլ անձի դեսպանատան մոտ ես չեմ նկատել:
Հարց- Քրեական գործի քննության ընթացքում տեղեկություններ են ստացվել, որ Արմեն Շաբոյանը և Արա Գեղեցիկ Մելիքսեթյանը 2016 թվականի փետրվար և մարտ ամսիներին «Վահրամաբերդ» պարի խմբում բացի ձեզնից ընդգրկեր են նաև մի շարք ւսյլ անձանց ովքեր որևէ կապ չեն ունեցել պարի խմբի հետ: Խմբում ընդգրկելու եղանակով նրանք փորձել են հիշյալ անձանց պարի խմբի անդամների հետ միասին տանել Ֆրանսիա: Ինչ կասեք այս կապակցությանը, Ձեզ այդ մասին որևէ տեղեկություն հայտնի է թե, ոչ:
Պատասխան- Ինձ այդ մասին որևէ-տեղեկություն հայտնի չէ, ես չգիտեմ, թե բացի ինձնից պարի խմբի հետ կապ չունեցող այլ անձ ընդգրկվել է «Վահրամաբերդ» պարի խմբում, թե ոչ:
Հարց- Տեղյակ եք թե ով էր հովանավորելու նշված պարի խմբին Ֆրանսիա մեկնելու համար, այդ մասին Արմեն Շաբոյանը Ձեզ որևէ բան հայտնել է, թե ոչ:
Պատասխան- Ես տեղյակ չեմ թե «Վահրամաբերդ» պարի խումբը որևէ հովանավոր ունեցել է, թե ոչ, ինձ այդ մասին Արմեն Շաբոյանը չի ասել, իսկ ես էլ չեմ հետաքրքրվել:
Հարց- Նշեք Ֆրանսիայի դեսպանատուն մուտք գործելու համար Դուք որևէ վճարում կատարել եք, թե ոչ, եթե այո, ապա որքան գումարի չափով:
Պատասխան- Չեմ հիշում և չեմ կարող պատասխանել թե Ֆրանսիայի դեսպանատուն մուտք գործելու համար ես վճարում կատարել եմ, թե՝ ոչ:
Հարց- Նախաքննության ընթացքում տեղեկություններ են ստացվեյ, որ Դուք ինչպես նաև պարի խմբի հետ առնչություն չունեցող այլ անձինք մինչև Ֆրանսիայի դեսպանատուն մուտք գործելը Գյումրի քաղաքում գործող «Սևյան» ակումբում հանդիպել եք «Վահրամաբերդ» պարի խմբի անդամներին: Հանդիպման ժամանակ Արմեն Շաբոյանը և Արա Գեղեցիկ Մելիքսեթյանը ներկայացրել են ձեզանից յուրաքանչյուրի երաժշտական մասնագիտությունները, անուն, ազգանունները և հայտնել, որ դուք իրենց հետ միասին գնալու եք Ֆրանսիա: Հանդիպման ժամանակ Ա.Շաբոյանը և Ա.Մելիքսեթյանը խնդրել են պարի խմբի անդամներին, մտապահել Ձեր տվյալները, որպեսզի դեսպանատանն անհրաժեշտություն առաջանալու դեպքում նրանք կարողանան պատասխանել դեսպանատան աշխատակիցների հարցերին: Ինչ կասեք այդ կապակցությամբ, իրականում նման դեպք եղել է, թե ոչ:
Պատասխան- Ինչպես արդեն նշեցի Արմեն Շաբոյանի պահանջով ես գնացել եմ «Սևյան» ակումբ որտեղ ծանոթացել եմ «Վահրամաբերդ» պարի խմբի անդամների հետ: Այդ ժամանակ Արմենը պարի խմբի անդամներին ասել է իմ անուն, ազգանունը և հայտնել, որ պարի խմբում հանդիսանում եմ որպես երաժիշտ և իրենց հետ միասին գնալու եմ Ֆրանսիա' հյուրախաղերին մասնակցելու համար: Դրանից հետո ես դուրս եմ եկել ակումբից և գնացել տուն: Արա Գեղեցիկ Մելիքսեթյան տվյալներով անձի ես այնտեղ չեմ տեսել, միգուցե նման տվյալներով անձ այնտեղ եղել է, սակայն ես չեմ իմացել, թե ով է նա: Ինչ վերաբերվում է այն հանգամանքին, որ Արմեն Շաբոյանը պարի խնբի անդամներին հայտնել է իմ անուն, ազգանունը և խնդրել պարի խմբի անդամներին, որպեսզի նրանք մտապահեն և անհրաժեշտության դեպքում հայտնեն դեսպանատանը, ապա նշեմ, որ ես նման խոսակցություն չեմ հիշում: Չեմ կարող ասել, թե բացի ինձնից Արմեն Շաբոյանը այլ անձանց պարի խմբի անդամներին ներկայացրել է, թե ոչ: Ես այնտեղ գտնվող անձանցից որևէ մեկին չեմ ճանաչել:
/Հատոր 3-րդ` Գ/Թ.-201-206/
Իր նախաքննական ցուցմունքը հրապարակելուց հետո վկան ըստ էության պնդեց իր դատաքննական ցուցմունքը և հայտնեց, որ Արմեն Շաբոյանն է իրեն ուղարկել, որ ծանոթանա Արա Գեղեցիկի և պարի խմբի անդամների հետ:
Վկա Նաիրա Ժորայի Մկրտչյանը դատաքննության ընթացքում ցուցմունք է տվել այն մասին, որ 3 անգամ գրել է ցուցմունք, փոքր տղան պարի է գանցել, Ֆրանսիա պիտի գնար, մերժվել են, 2 տարի անցել է շատ բաներ չեմ հիշում: Մի քանի ամիս է տղան գնացել պարի, թոքերի խնդիր է ունեցել, Վահրամաբերդ գյուղ է գնացել, 2 ժամ էր տևում պարապմունքները, միայն պար են սովորացրել, Ֆրանիսա համերգների պիտի գնային 6 օրով, բայց մերժվել են, ինքն էլ պետք է գնար որպես ծնող, ինքը երաժիշտ է մասնագիտությամբ, եթե պետք լիներ պետք է նվագեր, սովորել է, քանոն նվագել գիտի, խմբի անդամ չի հանդիսացել, դեսպանատուն գնացել է, ասել է և ծնող է և երաժեշտ` քանոնահարուհի, իր երեխան փոքր է, ուզում էր հետը գնար, դեսպանատան մուծումն էր 30-35 եվրո և ճամփի փողն էր 100 դոլար, ղեկավարներին են տվել, բոլորն էլ հավաքել և տվել են, 2 հոգու համար 30-35 դոլար, մնացածը ամուսինն է հանդիպել իրենց, Արա Գեղեցիկը միայն ուզել է ծննդյան վկայական, տեղեկանք, լուսանկար:
/դատական նիստի ձայնային արձանագրում/
Դատարանը, արձանագրելով, որ վկա Նաիրա Ժորայի Մկրտչյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Վկա Նաիրա Ժորայի Մկրտչյանը նախաքննության ընթացքում ցուցմունք է տվել այն մասին, որ որ 2009 թվականին ծնված որդին' Վահրամ Վլադիմիրի Մկրտչյանը, մինչև 2017 թվականը հաճախել է Շիրակի մարզի Վահրամաբերդ գյուղում գործող «Վւսհրամաբերդ» պարի խմբակ: Պարի խմբում ընդգրկելու համար' խմբի ղեկավար Արա Գեղեցիկ Մելիքսեթյանի հետ կնքել է պայմանագիր և ներկայացրել պահանջվող փաստաթղթեր` ծննդյան վկայական, լուսանկար, բժշկի տեղեկանք և այլն: 2016 թվականի փետրվար ամսին, հերթական փորձի ժամանակ, պարի խմբի ղեկավար Արա Գեղեցիկ Մելիքսեթյանն իրեն ու այդ օրը ներկա գտնվող ծնողներին հայտնել է, որ մոտակա օրերին պարի խումբը հրավերք է ստանալու Ֆրանսիայի Հանրապետության Նիցցա քաղաքում անցկացվելիք պարի փառատոնին մասնակցելու համար և խնդրել նրան տրամադրել երեխայի վերաբերյալ մի շարք փաստաթղթեր, մասնավորապես' երեխայի անձնագիրը, 2 լուսանկար և ծննդյան վկայականը, միաժամանակ հայտարարելով, որ եթե երեխաների ծնողներից կլինեն անձինք, ովքեր ցանկություն կունենան պարի խմբի հետ մեկնել հյուրախաղերի, նույնպես պետք է ներկայացնեն նշված փաստաթղթերը: Հաշվի առնելով որդու տարիքով փոքր լինելու հանգամանքը, խնդրել է Արա Գեղեցիկ Մելիքսեթյանին' իրեն նույնպես ընդգրկել պարի խմբում և որդու փաստաթղթերի հետ միասին ներկայացրել նաև իր փաստաթղթերը: Դրանք Արա Գեղեցիկ Մելիքսեթյանին հանձնելուց հետո, վերջինս իրեն հայտնել է, որ փառատոնին մասնակցելու համար' իր և որդու համար պետք է վճարի ընդհանուր 380 եվրո գումար: Համաձայնվելով նրա առաջարկին, մի քանի օր անց ամուսնու միջոցով Արա Գեղեցիկ Մելիքսեթյանին է փոխանցել 380 եվրո գումար, ապա 2016 թվականի փետրվար ամսվա վերջին, որդու և ամուսնու հետ միասին իրենց ավտոմեքենայով մեկնել է Երևան քաղաքում գտնվող Ֆրանսիայի դեսպանատուն, մուտք գործել ներս, որի ժամանակ դեսպանատան աշխատակցուհու հարցին' թե ուր են գնում, պատասխանել է, որ գնում են Ֆրանսիայի Հանրապետության Նիցցա քաղաք' հյուրախաղերին մասնակցելու նպատակով, միաժամանակ ավելացնելով, որ հանդիսանում է խմբի երաժիշտ֊քանոնահարը: Մի քանի օր անց կրկին գնացել է Ֆրանսիայի դեսպանատուն, որտեղ իրեն հայտնել են, որ մուտքի արտոնագիր չի տրամադրվել: Դրանից հետո Արա Գեղեցիկ Մելիքսեթյանը Վահրամաբերդ գյուղում հանդիպել է իրենց և վերադարձրել 310 եվրո գումար: Ն.Մկրտչյանը նշել է, որ ինքը երբևէ պարի խմբի անդամ չի հանդիսացել, և միայն Արա Գեղեցիկ Մելիքսեթյանի պահանջով է դեսպանատանը հայտնել նման բնույթի տեղեկություններ:
Հատոր 3-րդ` Գ/Թ.- 197-199/
Իր նախաքննական ցուցմունքը հրապարակելուց հետո վկան հայտնեց, որ ինքը չի ասել որ Արա Գեղեցիկը իրեն ստիպել է ասել, որ ինքը երաժիշտ է, նման բան չի գրել, ինքը չի ասել, որ խմբի անդամ է, ինքը երաժիշտ է, եթե կարիք լինի կնվագի, երեխայի համար է ուզեցել մեկնել, որևէ մեկը չի ասել, որ դեսպանատանը ասի, որ ինքը խմբի անդամ է:
Վկա Նաիրա Հովնանի Մկրտչյանը դատաքննության ընթացքում ցուցմունք է տվել այն մասին, որ Արա Մելիքսեթյանը իր պարի ղեկավարն է, հայտել է, որ Ֆրանսիա են մեկնելու, Ֆրանսիա մուտք են գործելու առանց որևէ գումարի, ուզել են լուսանկար, սովորելու վայրից տեղեկանք, իր անձնագիրը, ղեկավարի հետ գնացել է դեսպանատուն, իրենց հետ եղել են Շաբոյանի մարդիկ, ոչ մեկին չի ճանաչել, նա ներկայացրել է, թե ովքեր են և ինչ գործիքավորմամբ են զբաղվում: 2011թ.-ից Վահրամաբերդ պարի խմբի անդամ է, բայց 3 տարի է արդեն չի հանդիսանում այդպիսին: Նախկինում գնացել է հյուրախաղերի, իրենից գումար չի պահանջվել, միայն մեծահասակները պիտի մասնակցեին փառատոնին, երևի 8 կամ 12 հոգի էին, կային 12-13 տարեկաններ, իրենցից բացի ուրիշ խմբեր են եղել, չի ճանաչում, չգիտի մոտավոր քանի հոգի էին, դուդուկով չեն պարել, իրենց ասել են, որ մերժել են, պատճառը չեն ասել, Արա Գեղեցիկը ասել է, բայց Արմեն Շաբոյանն է մյուսների հետ ծանոթացրել երաժիշտների հետ, ասեց, որ մտապահենք դեսպանատանը ասեն, եթե նկար ցույց տային իմանային ով են, իրենցից փոքր կային 12-13 տարեկան, ամենափոքրը ինչքան որ հիշում է 12 տարեկան էին, ավտոբուսով են գնացել դեսպանատուն, Շաբոյանին ճանաչել է, դեսպանատնից առաջ հանդիպում էր կազմակերպել ծանոթացնելու իր մարդկանց հետ, երևի 2 տարի առաջ էր, միայն ասել է, որ տիրապետում է այս գործիքին, երաժշտությունը տեղում կար, դուդուկահար, քանոնահար պետք չէր, ծնողի համաձայնություն պետք չէր: Պարի խմբի ամդամներից մեծերին ճանաչել է, Վահրամաբերդ կամ Կապս գյուղից էին:
/դատական նիստի ձայնային արձանագրում/
Վկա Քնարիկ Էդիկի Մկրտչյանը դատաքննության ընթացքում ցուցմունք է տվել այն մասին, որ պարի խմբի ղեկավար Արա Մելիքսեթյանին ճանաչում է, ինքը պարի անդամ է, 8 տարի պարող է եղել, հիմնականում ծնողներն են զբաղվել, ընկեր Արան ծնողների հետ է զրուցել, անձնագիր է ուզել է, 7-8 տարի է հաճախել, տարբեր երկրներ է մեկնել, գումարի հարցով ծնողներն են զբաղվել, Ֆրանսիայի համար գումար չեն ուզել, խմբի թիվը չի հիշում, մեծերին ճանաչում է, պարի խմբում բոլորը իրենց գյուղից են եղել, փոքրերին չի ճանաչում, դեսպանատան համար փաստաթղթեր պահանջել է Արա Գեղեցիկը, գումար չի ուզել, ավտոբուսով են գնացել, իր պարի երեխաներն են եղել, ուրիշ մարդ չգիտի եղել են, թե` ոչ, Արա Գեղեցիկը իրենց ոչ ոքի հետ չի ծանոթացրել, Սևյան ակումբը պարային ակումբ է, այնտեղ ծանոթացրել են ուրիշ մարդկանց հետ, տեղում են ծանոթացել, միայն Վահրամաբերդ պարի խումբն էր մասնակցելու, դեսպանատուն միայն իրենք են գնացել, Սևյան ակումբում ծանոթանալու էին երաժիշտների հետ, ընկեր Արան էր տարել, ծրագրին տեղյակ էր, երաժիշտների մասնակցությամբ չեն պարել, ֆանագրամա են պարել, կենդանի, թե ֆանագրամա տարբերություն չկա, ընթացքում երաժիշտների հետ ծանոթացել են, միմյանց ոճի ծանոթանալու անհրաժեշտություն չկար:
/դատական նիստի ձայնային արձանագրում/
Վկա Աղվան Զարզանդի Մարտիրոսյանը դատաքննության ընթացքում ցուցմունք է տվել այն մասին, որ ճանաչում է Արա Գեղեցիկին, պարի ուսուցիչ է, այդ ժամանակ ներկայացվել է վիզա Ֆրանսիա գնալու, սակայն մերժվել են, գործ է հարուցվել, ինքը ցուցակներն է հաստատել, որ տվյալ անձինք գյուղի բնակիչներ են և զբաղվում են պարով, որի ղեկավարը Արա Գեղեցիկն է, 10 տարի է, 2012թ-ից մոտավորապես գործել է պարի խմբակը, գործել է կուլտուրայի տանը, բոլորին էլ ճանաչել է, գյուղի երեխաներն են եղել, ուրիշ տեղերից չկային, իր տեղեկությամբ գումարի չի հավաքվել, Արա Գեղեցիկը ներկայացրել է Ֆրանսիա գնացողների անուններ, որի տակ ինքը կնիք է դրել, որ նշված անձինք են, այսինքն` իրենց գյուղի երեխաները, անգլերեն էր գրված, ուշադիր չի նայել, անգլերեն չգիտի: Հստակ չի հիշում քանի հոգի էին, Արա Գեղեցիկին վաղուց է ճանաչում, վստահում է, երաժիշտներ գալիս էին համերգների ժամանակ, ընդհանրապես նվագողներ չեն եղել, իրենց գյուղում երաժիշտներ չկան, քանի որ վստահում է, հաստատել է ցուցակը:
/դատական նիստի ձայնային արձանագրում/
Վկա Արա Վարդևանի Գրիգորյանը դատաքննության ընթացքում ցուցմունք է տվել այն մասին, որ Երևանում հարցաքննվել է որպես վկա, այդտեղից է ճանաչում Արա Գեղեցիկին, ինքը կանչվել է որպես վկա իր հիմնարկի կողմից որպես հովանավոր տեղեկանք տրամադրելու համար, ինքն տրամադրել տեղեկանքը պարի խմբին որպես հովանավոր, ճանապարհածախսը վերցրել է իր վրա, տեղեկանքը տրամադրել է Վահրամաբերդ պարի խմբին արտասահման այցի համար, որով պարտավորվել է դիզելային վառելիքի վառելանյութի ծախսը տրամադրել, ընկերը` Հարություն Հարությունյանը, իրեն խնդրել է հովանավորելու համար, տեղեկանքը տվել է, հետո 4-5 ամիս հետո ազգային անվտանգություն է հրավիրվել, տեղեկանքը ներկայացրել է, ընկերն է զանգել խնդրել, եթե հնարավորություն կա ֆինանսավորելու, ինքն էլ պատրաստ է եղել տրամադրել, 2000-2500 դոլարի դիզվառելիք, ինչքան տեղեկացված է ավտոբուսով պիտի գնային, ԱԱԾ-ից կանչել են, ինքն ել ներկայացրել է տեղեկանքը, որ օրինական ճանապարհով պատրաստ է տրամադրել, ինքը կնքել, ստորագրել է տեղեկանքը, Շաբոյան Արմենին չի ճանաչում, լսել է, բայց չի հանդիպել:
/դատական նիստի ձայնային արձանագրում/
Դատարանը, արձանագրելով, որ վկա Արա Վարդևանի Գրիգորյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Վկա Արա Վարդևանի Գրիգորյանը նախաքննության ընթացքում ցուցմունք է տվել այն մասին, որ ընտանիքի հետ միասին բնակվում է Գյումրի քաղաքի Կ.Դեմիրճյան փողոցի 67-րդ տանը: 2010 թվականից մինչ օրս հանդիսանում է «Ֆենհալ» ՍՊԸ֊ի տնօրեն: Նշված ընկերությունը զբաղվում է հիդրոէլեկտրոկայանների կառուցման գործունեությամբ: Տարիների ընթացքում ընկերությունը բազմիցս իր սեփական միջոցներով հովանավորել է Գյումրու քաղաքապետարանի ենթակայության տակ գտնվող հաստատությունները, մասնավորապես' վերանորոգել է դպրոցներ և մանկապարտեզներ: 2016 թվականի հունվար ամսին, ստույգ օրը չի հիշում, Շվեդիայից իրեն է զանգահարել ընկերը' Հարություն Հարությունյանը, և հայտնել, որ Գյումրի քաղաքի բնակիչներից Արմեն Շաբոյանը ցանկանում է իր պարի խումբը տանել Ֆրանսիայի Հանրապետություն' ինչ որ փառատոնի մասնակցելու համար, միաժամանակ խնդրելով իրեն' պարի խմբի հարցով հանդես գալ որպես հովանավոր: Չմերժելով ընկերոջ խնդրանքը, համաձայնվել է, ապա մի քանի օր անց հանդիպել Արմեն Շաբոյանին և նրանից վերցրել պարի խմբի վերաբերյալ տվյալներ, որպեսզի դրանք ներառի որպես հովանավոր հանդես գալու փաստաթղթի մեջ: Ըստ Արմեն Շաբոյանի խոսքերի, այդ տեղեկանքն անհրաժեշտ է եղել ՀՀ-ում Ֆրանսիայի դեսպանատուն ներկայացնելու համար: Դրանից մի քանի օր անց կազմել և Արմեն Շաբոյանին է ներկայացրել այդ տեղեկանքը, որտեղ նշվել է, որ «Ֆենհալ» ՍՊԸ-ն հանդես է գալիս որպես «Վահրամաբերդ» պարի խմբի հովանավոր և հոգում է խմբի ճանապարհածախսը դեպի Ֆրանսիայի Հանրապետություն: Ըստ իրենց պայմանավորվածության, իր ընկերությունը պետք է 2000-2500 ԱՄՆ դոլար գումար տրամադրեր' խմբի անդամների ավտոբուսով ճանապարհածախսը հոգալու համար: Սակայն այդ գումարն ինքը տեղում չի տրամադրել և Արմեն Շաբոյանի հետ պայմանավորվածություն է ձեռք բերել Ֆրանսիայի Հանրապետություն մեկնելուց մի քանի օր առաջ հանդիպել և փոխանցել:
/Հատոր 3-րդ` Գ/Թ 121-126/
Իր նախաքննական ցուցմունքը հրապարակելուց հետո վկան հայտնեց, որ պնդում է դատաքննության ընթացքում տված ցուցմունքները, առկա հակասությունները չի կարող բացատրել: Միգուցե իրականությանը համապատասխանում է, որ հանդիպել է Արմեն Շաբոյանին:
Վկա Արտուշ Էդվարդի Մարանջյանը դատաքննության ընթացքում ցուցմունք է տվել այն մասին, որ Արային ճանաչում է Շաբոյանի ակումբից, այդ թաղի բնակիչ է եղել երկար տարիներ, զանգահարել է տվյալ օրը ավտոբուսով դեսպանատուն տանելու Երևան, ինքը 2-րդ վարորդ է գնացել, ինքը ունեցել է մուլտիվիզա, եթե վիզաները ստանային, պետք է որոշեին, թե ով պետք է տաներ, ինքը գնալու էր որպես 2-րդ վարրորդ, միկրոավտոբուսը ուներ 49 տեղ, յուղ լցնելու համար ընկեր Արայից փող են վերցրել, պարի խմբի անունը չգիտի, Վահրամաբերդ երևի, ղեկավարը Արան էր, Արմեն Շաբոյանն է զանգել Ռուբոյին` 1-ին վարորդին, խնդրել է, որ տանեն, տարբեր տարիքի էին` մեծ, փոքր, 15, 16, 14 և ավելի փոքր, ուշադիր չի եղել, արտասահման 2011թ-ին են եղել, Չեխիա կամ Լեհաստան էր, Չեխիա գնալուց Արան չի եղել, Արմեն Շաբոյանի հետ են եղել, ցուցակով գնացել են, ցուցակով հետ են եկել:
/դատական նիստի ձայնային արձանագրում/
Վկա Անահիտ Նահապետի Խալաթյանը դատաքննության ընթացքում ցուցմունք է տվել այն մասին, որ Շաբոյան Արմենը ակումբի ղեկավարն է, Արան պարի ղեկավարը, ճանաչում է որպես քաղաքի բնակիչ, Արային ճանաչում է Շաբոյանի ակումբից, որպես պարի ղեկավար, 2 տարի է անցել, լավ չի հիշում, որքան հիշում է կարող է ասել, որ 2016թ. էր Գյումրիում պատահական հանդիպել է Շաբոյան Արմենին, իրան վաղուց է ճանաչում, Արմենն ասել է, որ գնալու են Ֆրանսիա, մարտ ամսին պարի խումբը մեկնելու է Մոնտե Կարլո քաղաք, քույրը մահացել էր փետրվար ամսին, քառասունքն էր, դեսպանատանը ասեցին գնալ-գալը 800 եվրո թանկ էր, ասեց ուզում ես մեկնել պարի խմբով, ավտոբուսի ճանապարհածախսը վճարես գաս, քառասունքին կհասնես, ինքը համաձայնվել է, պայմանավորվել են, գնացել է ակումբ, Արմենը Արային ասել է Անահիտն էլ է ուզում գալ, կվճարի հյուրանոցի արժեքը` մոտ 400 եվրո, ինքը համաձայնվել է և գնացել է դեսպանատուն: Պարի խմբի անդամ երբեք չի եղել:
Դատարանը, արձանագրելով, որ վկա Անահիտ Նահապետի Խալաթյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Վկա Անահիտ Նահապետի Խալաթյանը նախաքննության ընթացքում ցուցմունք է տվել այն մասին, որ հաշվառված է Գյումրի քաղաքի Երևանյան խճուղու 17-րդ շենքի 13-րդ բնակարանում, սակայն փաստացի բնակվում է Գյումրի քաղաքի Դուկասյան 5-րդ շարքի 19-րդ հասցեում: 1999 թվականից հանդիսանում է «Տրանս-Ակնթարթ» ՍՊԸ-ի տնօրեն: 2016 թվականի փետրվար ամսին Գյումրի քաղաքում պատահական հանդիպել է իր ծանոթ' ժողովրդական պարի խմբի ղեկավար Արմեն Շաբոյանին և տեղեկանալով, որ նրա պարի խումբը նույն թվականի մարտ ամսին պատրաստվում է մեկնել Ֆրանսիայի Հանրապետություն, խնդրել է իրեն նույնպես պարի խմբի հետ միասին տանել Ֆրանսիա, պատճառաբանելով, որ ցանկանում է այցելել քրոջ գերեզմանին: Զրույցի ժամանակ Արմեն Շաբոյանը համաձայնվել է և իրենից պահանջել 400 եվրո գումար, հայտնելով, որ փառատոնին մասնակցելու համար նախապես գումար պետք է վճարի: Հաշվի առնելով, որ այդ ժամանակ գումար չի ունեցել, խնդրել է նրան նշված գումարը տրամադրել վիզա ստանալուց հետո, ինչին Արմեն Շաբոյանը համաձայնվել է: Դրանից հետո, Ա.Շաբոյանի պահանջով, գնացել է Գյումրի քաղաքում գործող «Սևյան» ակումբ, որտեղ Արա Գեղեցիկ Մելիքսեթյանը և Արմեն Շաբոյան իրեն, ինչպես նաև մի քանի անձանց ծանոթացրել են պարի խմբի անդամների հետ, հայտնել իրենց երաժշտական մասնագիտությունները և խնդրել պարի խմբի անդամներին մտապահել այդ տեղեկությունները, որպեսզի դեսպանատանն անհրաժեշտության դեպքում կարողանան հայտնել: Այնուհետև, 2016 թվականի փետրվարի 29-ին, պարի խմբի հետ միասին գնացել է Երևան քաղաքում գտնվող Ֆրանսիայի դեսպանատուն և մի քանի օր անց տեղեկացել է, որ դեսպանատունը վիզա չի տրամադրել, ինչի արդյունքում Արմեն Շաբոյանին այլևս խոստացված 400 եվրո գումարը չի վճարել:
/Հատոր 2-րդ` Գ/Թ.-212-216, Հատոր 3-րդ` Գ/Թ.- 178-181/
Իր նախաքննական ցուցմունքը հրապարակելուց հետո վկան հայտնեց, որ քանի որ երկար ժամանակ է անցել, պնդում է նախաքննության ընթացքում տված ցուցմունքը:
Վկա Քրիստինե Հայկի Մանուկյանը դատաքննության ընթացքում ցուցմունք է տվել այն մասին, որ ընկեր Արային ճանաչում է, իրենց պարուսույցն է, 2 տարի առաջ ցուցմունք տվել է, որ պետք է գնային Ֆրանսիայում մասնակցեին փառատոնի և վերադառնային Հայաստան, մարդիկ առաջարկել են գնալ, ման գալ, հետ գալ, ուրիշ ոչինչ չգիտի: Իրենց խմբով էին գնալու, բայց մարդիկ կային ուզում էին գային հանգստանային հետ գնային, ծանոթներ էին, բայց պարի խմբի անդամ չէին, շրջագայության տանելու էր Շաբոյանը և Արա Գեղեցիկը` որպես ղեկավար, տեղյակ չի այդ անձանցից գումար վերցրել են, թե` ոչ, Վահրամաբերդ խմբի անդամներին ճանաչել է, եղել են 16, 20 տարեկան մեծ երեխաներ, Արտուշ Մառանջյանը վարորդն էր, երաժիշտներին չի հիշում, ոչ մեկի հետ չեն ծանոթացրել:
/դատական նիստի ձայնային արձանագրում/
Դատարանը, արձանագրելով, որ վկա Քրիստինե Հայկի Մանուկյանի նախաքննական և դատաքննական ցուցմունքներում առկա են էական հակասություններ, որոշում է կայացրել հրապարակել և հետազոտել վերջինիս նախաքննական ցուցմունքները:
Վկա Քրիստինե Հայկի Մանուկյանը նախաքննության ընթացքում ցուցմունք է տվել այն մասին, որ ցանկանում է լրացուցիչ ցուցմունք տալ և քննությանը հայտնել քրեական գործի վերաբերյալ մի կարևոր հանգամանքը, որը իր կողմից տրված նախկին ցուցմունքով, ինչպես նաև բացատրությամբ սխալ էր ներկայացրել, քանի որ գտնվում էր խառնաշփոթ և հուզված վիճակում: Հետագայում սթափվելով և վերհիշելով կատարվածը ու հաշվի առնելով, որ դա շատ կարևոր է գործի համար, ցանկանում է այժմ հայտնել ողջ իրականությունը, այսպես' իր կողմից տրված նախկին ցուցմունքով հայտնել է, որ Արմեն Շարոյանը Ֆրանսիա մեկնելու համար իրենից, ինչպես նաև պարի խմբի անդամներից պահանջել է 400 եվրո գումար: Սակայն ցանկանում է նշել, որ իրականում այդպես չի եղել, Արմենը 400 եվրո գումար է պահանջել ոչ թե պարի խմբի անդամներից կամ իրենից, այլ մի քանի քաղաքացիներից, ովքեր պարի խմբի անդամ չեն հանդիսացել, սակայն դիմել են իրեն' ցանկություն հայտնելով պարի խմբի հետ միասին գնալ Ֆրանսիա շրջագայության նպատակով: Այս ամենի մասին իրեն պատմել է Արմեն Շարոյանը, հայտնելով, որ այդ անձանցից յուրաքանչյուրից վերցրել է որքան հիշում է 400 եվրո գումար: Ինչ վերաբերվում է որպես դեսպանատան գումար 35 եվրո Արմենին վճարելուն, ապա մինչ դեսպանատուն մտնելը պարզվել է, որ մշակութային ծրագրով գնացող խմբերը ազատվում են դեսպանատան մուտքի համար վճարում կատարելուց, ուստի ինքը Արմենին որևէ գումար չի տվել: Հաշվի առնելով, որ նախկինում այդ վճարումը իրենք կատարում էին, ուստի շփոթվել է և իր նախկին ցուցմունքով հայտնել, որ վճարել է 35 եվրո գումար, սակայն իրականում նման բան չի եղել:
Իր նախաքննական ցուցմունքը հրապարակելուց հետո վկան հայտնեց, որ պնդում է նախաքննության ընթացքում տված ցուցմունքը, հայտնեց, որ լսել է, բայց անձամբ իր աչքով չի տեսել, որ գումար վճարեն:
Դատարան ներկայանալու անհնարինության հիմքով դատարանում հրապարակվել է վկա Կարեն Հրայրի Բադալյանի նախաքննական ցուցմունքները.
Վկա Կարեն Հրայրի Բադալյանը նախաքննության ընթացքում ցուցմունք է տվել այն մասին, որ ընտանիքի հետ միասին բնակվում է Գյումրի քաղաքի Շիրակացի փողոցի 8-րդ զինվորական թաղամասի 9-րդ շենքի 42-րդ բնակարանում: 2014 թվականի նոյեմբեր ամսից մինչև 2015 թվականի մայիս ամիսը հանդիսացել է «Հայ» տաքսի սերվիզի համասեփականատեր: Արմեն Շաբոյանին ճանաչել է մանկուց, տեղյակ է եղել, որ վերջինս հանդիսացել է պարի խմբի ղեկավար, ով հաճախ է պարի խմբերի հետ միասին մեկնել արտասահման` տարբեր հյուրախաղերի մասնակցելու նպատակով: 2016 թվականի փետրվար ամսին Գյումրի քաղաքում պատահական հանդիպել է Արմեն Շաբոյանին և խոսակցության ժամանակ նրանից հետաքրքրվել իր ղեկավարած պարի խմբի արտասահման տանելու վերաբերյալ շրջանառվող լուրերի մասին, միաժամանակ նրան հայտնելով, որ 2 տարի առաջ ընկերը Ֆրանսիայի Հանրապետությունում մահացել է, ուստի ցանկություն ունի գնալ Ֆրանսիա նրա շիրիմին այցելելու նպատակով: Դա լսելուց հետո Արմեն Շաբոյանն ասել է, որ եթե հնարավորություն լինի ապա իրեն այդ մասին անպայման կտեղեկացնի: Դրանից հետո, 2016 թվականի փետրվար ամսվա վերջին իրեն է զանգահարել Արմեն Շաբոյանը և հայտնել, որ իրեն ընդգրկել է «Վահրամաբերդ» պարի խմբի կազմում, հայտնելով, որ խմբի հետ միասին փետրվարի 29֊ին պետք է այցելի Ֆրանսիայի դեսպանատուն: Դրանից 1-2 օր անց Արմեն Շաբոյանի պահանջով նրան է փոխանցել անձնագիրը և թվով 2 լուսանկարներ, ինչի արդյունքում վերջինս իրեն հայտնել է, որ եթե դեսպանատան աշխատակիցն իրեն հարցնի թե ինչ կապ ունի «Վահրամաբերդ» պարի խմբի հետ, ապա հայտնի, որ հանդիսանում է երաժիշտ-դուդուկահար: 2016 թվականին ընկերոջ ավտոմեքենայով Գյումրի քաղաքից գնացել է Երևան քաղաք և պարի խմբի անդամների հետ միասին մուտք գործել Ֆրանսիայի դեսպանատուն: Մոտ մեկ շաբաթ անց կրկին գնացել է Ֆրանսիայի դեսպանատուն, որտեղ իրեն հայտնել են, որ խմբի անդամներին վիզա չի տրամադրվել: Մինչև դեսպանատուն մուտք գործելը Արմեն Շաբոյանի խնդրանքով գնացել է «Սևյան» ակումբ` ծանոթացել պարի խմբի անդամների հետ, որից հետո Արմեն Շաբոյանը պարի խմբի անդամներին հայտնել է իր անուն, ազգանունը, երաժշտական մասնագիտությունը, հայտնելով, թե իբր ինքը հանդիսանում է դուդուկահար, միաժամանակ խնդրել պարի խմբի անդամներին մտապահել իր տվյալները, որպեսզի եթե դեսպանատանը նրանց հարցնեն իր վերաբերյալ տեղեկություններ նրանք կարողանան պատասխանել դեսպանատան աշխատակիցների հարցերին: Արմեն Շաբոյանը խմբի կազմում ընդգրկելու կամ Ֆրանսիա մեկնելու համար իրենից գումար չի պահանջել, նրան գումար չի տվել և գումար տալու խոստում իրենց մեջ չի եղել:
/Հատոր 2-րդ` Գ/Թ 206-209, Հատոր 3-րդ` Գ/Թ 189-191/
Դատարան ներկայանալու անհնարինության հիմքով դատարանում հրապարակվել է սույն քրեական գործից անջատված մասով մեղադրյալ Արմեն Ռազմիկի Շաբոյանի նախաքննական ցուցմունքները.
Մեղադրյալ Արմեն Ռազմիկի Շաբոյանը նախաքննության ընթացքում ցուցմունք է տվել այն մասին, որ 2002 թվականից հանդիսանում է Շիրակի մարզի Գյումրու քաղաքապետարանի ենթակայության տակ գտնվող «Ա.Շաբոյանի անվան պարի համույթի» գեղարվեստական ղեկավար և տնօրեն: Իր ղեկավարած տարիներին համույթը բազմիցս մասնակցել է ինչպես համահայկական, այնպես էլ միջազգային ւիառատոններին, որի արդյունքում արժանացել է բարձր պարգևների` պատվոգրերի, գավաթների և դիպլոմների: Միջազգային ւիառատոններին մասնակցելու նպատակով անհրաժեշտ հրավերքը ստացել է համացանցի միջոցով համապատասխան կայքերից: Միջազգային փառատոնին մասնակցության հրավերքները հիմնականում վճարովի են եղել, մասնավորապես` գումար է սահմանվել յուրաքանչյուր մասնակցի համար, որն իր մեջ ներառել է տվյալ փառատոնի մասնակցության ընթացքում կացության, սննդի և այլ ծախսեր: 2016 թվականի հունվար ամսին համացանցի միջոցով տեղեկացել է, որ Ֆրանսիայի Հանրապետության Նիցցա և Մոնտե-Կառլո քաղաքներում նույն թվականի մարտի 17-20-ն ընկած ժամանակահատվածում կայանալու է 5-րդ միջազգային պարի փառատոնը: Հիշյալ փառատոնին մասնակցելու համար, որոշել է «Վահրամաբերդ» պարի խմբի հետ միանալ և միասին մասնակցել նշված փառատոնին, ինչի կապակցությամբ հանդիպել է Շիրակի մարզի «Վահրամաբերդ» համայնքում գործող «Վահրամաբերդ» պարի խմբի գեղարվեստական ղեկավար Արա Գեղեցիկ Մելիքսեթյանի հետ: Իր և Արա Գեղեցիկ Մելիքսեթյանի միջև ձեռք է բերվել բանավոր պայմանավորվածություն այն մասին, որ փառատոնի մասնակցության դեպքում Արա Գեղեցիկ Մելիքսեթյանը ստանձնելու է խմբի գեղարվեստական ղեկավարի և պարի բեմադրիչի պարտականությունները, իսկ ինքը զբաղվելու է կազմակերպչական հարցերով` փաստաթղթերի կազմում, հրավերքի ստացում, երաժիշտների ապահովում, տրանսպորտային միջոցի ընտրություն, աշխատանք հովանավորների հետ և ֆինանսական հարցերի կարգավորում: Հաշվի առնելով, որ փառատոնին մասնակցելու համար անհրաժեշտ է եղել կատարել նախնական վճարում, ուստի իր անձնական միջոցներով, Գյումրի քաղաքում գործող «Կոնվերս բանկի» միջոցով, նշված փառատոնի հաշվեհամարին է փոխանցել ընհանուր 2.500 եվրո գումար, որից մոտ 3 օր անց ստացել է փառատոնի մասնակցության հրավերքը: Դրանից հետո «Վահրամաբերդ» պարի խմբի ղեկավար Արա Գեղեցիկ Մելիքսեթյանը զբաղվել է իր խմբի երեխաների փաստաթղթերի հավաքմամբ, իսկ ինքը մնացած մասնակիցների: Փառատոնին մասնակցելու համար պահանջվել է ընդհանուր 5.000 եվրո գումար, որի կեսը պետք է փոխանցվեր որպես կանխավճար, իսկ մնացած մասը պետք է վճարվեր տեղում: Ֆրանսիայի դեսպանատան կողմից ելքի արտոնգիր ստանալու համար` իր և Արա Գեղեցիկ Մելիքսեթյանի կողմից պարի խմբի մասնակիցներից պահանջվել են` անձնագրեր, լուսանկարներ, անչափահասների համար ծննդյան վկայականներ, ծնողների ամուսնության վկայականներ, անչափահասների դեպքում ծնողների համաձայնությունը նոտարական վավերացմամբ, ինչպես նաև ուսանողներից և դպրոցականներից` տեղեկանքներ ուսման վայրերից, իսկ աշխատողներից` տեղեկանքներ աշխատանքի վայրերից: Փառատոնի մասնակցության ծախսերը հոգալու համար, որոշվել է խմբի անդամներից յուրաքանչյուրից հավաքել 100 եվրո գումար, իսկ մնացած ֆինանսական հարցերը պետք է լուծեր խմբի հովանավոր «Ֆեն-Հալ» ընկերությունը, սակայն հերթական հանդիպման ժամանակ Արա Գեղեցիկից տեղեկացել է, որ պարի խմբի անդամները ֆինանսապես անվճարունակ են և չեն կարող տրամադրել վերը նշված գումարը: 2016 թվականի փետրվար ամսին Արա Գեղեցիկն իրեն է տվել 19 անձանցից բաղկացած ցուցակ և այդ ցուցակում ընդգրկված անձանց փաստաթղթերը: Միաժամանակ իրեն հայտնել է, որ իր կողմից ներկայացված պարի խմբի ցուցակում մտցրել է պարի խմբի հետ առնչություն չունեցող 4 անձանց տվյալներ, ովքեր հանդիսացել են իր ծանոթները և ցանկություն են հայտնել պարի խմբի հետ միասին մեկնելու Ֆրանսիայի Հանրապետություն շրջագայության նպատակով, որի կապակցությամբ ինքը տվել է իր համաձայնությունը, ինչի դիմաց Արա Գեղեցիկ Մելիքեթյանի միջոցով նրանցից պահանջել և ստացել է գումար: Փառատոնին մասնակցելու համար իր կողմից ցուցակում ընդգրկել է 22 մասնակիցների, որից 5 անձինք` Կարեն Բադալյանը, Անահիտ Խալաթյանը, Հովհաննես Զաքարյանը, Գարիկ Վարդերեսյանը և Հասմիկ Տեր-Ավագյանը չեն հանդիսացել «Ա.Շաբոյանի» պարի խմբի անդամ, սակայն լինելով ծանոթներ, դիմել են իրեն, որպեսզի շրջագայության նպատակով պարի խմբի հետ միասին մեկնեն Ֆրանսիայի Հանրապետություն, ինչի դիմաց նրանցից յուրաքանչյուրից պահանջել և ստացել է 400 եվրո գումար, իսկ Կարեն Բադալյանի և Անահիտ Խալաթյանի հետ պայմանավորվածություն է ձեռք բերել յուրաքանչյուրից 400 եվրո գումար ստանալ դեսպանատան կողմից մուտքի արտոնագիր տրամադրելուց հետո: «Վահրամաբերդ» պարի խմբի կազմում ներառված, սակայն պարի խմբի հետ կապ չունեցող թվով 9 անձանցից գումարներ է վերցրել, որպեսզի վերադարձնի իր կատարած ծախսերը` կապված 2.500 եվրո գումարի վճարման հետ, ինչի մասին տեղեկացրել է նաև Արա Գեղեցիկ Մելիքսեթյանին: Այնուհետև, վերը նշված անձանց Գյումրի քաղաքում գտնվող «Սևյան» ակումբում ծանոթացրել է պարի խմբի անդամների հետ` նրանց ներկայացնելով դուդուկահար, երաժիշտ և այլն, որպեսզի դեսպանատանը կարիքն առաջանալու դեպքում խմբի անդամները կարողանան պատասխանել դեսպանատան աշխատակիցների հարցերին: 2016 թվականի փետրվար ամսվա վերջին «Վահրամաբերդ» պարի խմբի կազմում ընդգրկված անձանցից մի մասն ավտոբուսով մեկնել են Երևան քաղաք, իսկ ինքը Քրիստինա Մանուկյանի հետ միասին դեսպանատուն է գնացել իր անձնական ավտոմեքենայով: Նույն օրը, ժամը 10:00-ի սահմաններում, խմբի կազմում ընդգրկված անձինք մուտք են գործել Ֆրանսիայի դեսպանատուն, որտեղ յուրաքանչյուրը հանձնել է իր փաստաթղթերը, իսկ ինքը հանձնել է խմբի 41 անձանցից բաղկացած ցուցակը, հովանավորի վերաբերյալ տեղեկանքը, վճարման անդորրագրերը և մի քանի փաստաթղթեր: Դրանից մեկ շաբաթ անց «Վահրամաբերդ» պարի խմբի կազմում ընդգրկված անձինք կրկին այցելել են Ֆրանսիայի դեսպանատուն, որտեղ նրանց հայտնել են, որ Ֆրանսիա մեկնելու համար անհրաժեշտ մուտքի վիզա չի տրամադրվել: Դեսպանատան կողմից վիզայի մերժումից հետո, հավաքված գումարները հետ է վերադարձվել իր և Արա Գեղեցիկ Մելիքսեթյանի միջոցով նշված անձանց:
/Հատոր 3-րդ` Գ/Թ 158-164, 168, 217-219, 237-239, 247/
Ապացույց է ճանաչված` ՀՀ ԱԱԾ արտաքին կապերի վարչության միջոցով ՀՀ-ում Ֆրանսիայի Հանրապետության դեսպանատնից ստացված 41 անձանցից բաղկացած` «Վահրամաբերդ» պարի խմբի ցուցակը:
/Հատոր 3-րդ` Գ/Թ 265-266/
3. Դատարանի իրավական վերլուծությունները և պատճառաբանությունները.
Դատարանը, ՀՀ քրեական դատավարության օրենսգրքի 127-րդ հոդվածի դրույթներին համապատասխան, հետազոտելով և գնահատելով ապացույցներն իրենց վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից` հիմնված ներքին համոզմամբ հանգում է հետևության, որ ամբաստանյալ Արա Գեղեցիկ Մելիքսեթյանը կատարել է արարք, որը համապատասխանում է ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերի հատկանիշներին, այն է` 2016 թվականի հունվար ամսին «Ա.Շաբոյան» պարի խմբի գեղարվեստական ղեկավար Արմեն Ռազմիկի Շաբոյանից տեղեկանալով, որ նույն թվականի մարտի 17-20-ն ընկած ժամանակահատվածում Ֆրանսիայի Հանրապետության Նիցցա և Մոնտե-Կառլո քաղաքներում տեղի է ունենալու պարի միջազգային փառատոն, պայմանավորվածություն է ձեռք բերել վերջինիս հետ` իր ղեկավարած «Վահրամաբերդ» պարի խումբը «Ա.Շաբոյան» պարի խմբին միացնելու և «Վահրամաբերդ» պարի խմբի անվան տակ նշված փառատոնին մասնակցելու վերաբերյալ: Այնուհետև, նախնական համաձայնության գալով Արմեն Շաբոյանի հետ, շահադիտական նպատակով, այն է` նյութական օգուտ ստանալու և նյութական որոշակի ծախսերից ազատվելու ձգտումով, «Վահրամաբերդ» պարի խմբի ցուցակում ընդգրկել են խմբի անդամ չհանդիսացող ՀՀ 9 քաղաքացիների, որոնցից` Նաիրա ժորայի Մկրտչյանից պահանջել և ստացել է 380 եվրո, Գևորգ Սուրենի Մարտիրոսյանից` 300 եվրո, իսկ Լուսինե և Ջեմմա Գյոլեցյաններից յուրաքանչյուրից` 200 եվրո, որը հետագայում փոխանցել է Արմեն Շաբոյանին:
Իրենց հանցավոր մտադրությունն իրականացնելու նպատակով, վերջիններիս անօրինական միգրացիան ՀՀ-ից դեպի Ֆրանսիայի Հանրապետություն կազմակերպելու դիտավորությամբ, Արմեն Շաբոյանի հետ միասին վերոհիշյալ անձանց ծանոթացրել է «Վահրամաբերդ» պարի խմբի անդամների հետ, նրանց ներկայացրել` որպես երաժիշտ, պարող և հանդերձապահ ու հայտարարել, որ նրանք պարի խմբի կազմում մեկնելու են Ֆրանսիայի Հանրապետություն` փառատոնին մասնակցելու նպատակով:
Այնուհետև, ՀՀ-ում գործող Ֆրանսիայի Հանրապետության դեսպանատան կողմից մուտքի թույլտվություն ստանալու նպատակով, Արմեն Շաբոյանին է հանձնել իր խնդրանքով Վահրամաբերդ համայնքի ղեկավարի կողմից վավերացված պարի խմբի ցուցակը, ապա 2016 թվականի փետրվարի 29-ին Արմեն Շաբոյանի հետ միասին «Վահրամաբերդ» պարի խմբի ցուցակում ընդգրկված անձանց ուղեկցել է ՀՀ-ում գործող Ֆրանսիայի դեսպանատուն, որտեղ Արմեն Շաբոյանը հանձնել է համայնքի ղեկավարի կողմից վավերացված պարի խմբի ցուցակում ներառված կեղծ տեղեկություններ, որտեղ նշված անձինք ընդգրկված են եղել որպես երաժիշտ, պարող և հանդերձապահ, սակայն դեսպանատան աշխատակիցների կողմից կեղծիքները բացահայտվել են և մուտքի թույլտվություն չի տրվել:
Վերլուծելով ամբաստանյալ Ա. Մելիքսեթյանի դատաքննական ցուցմունքները, համադրելով դրանք քրեական գործի դատական քննությամբ ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ՝ դատարանը գտնում է, որ ամբաստանյալ Ա. Մելիքսեթյանի ցուցմունքները` ըստ էության, որ ինքը ոչ ոքից գումար չի պահանջել և չի ստացել, իրականությանը չեն համապատասխանում, արժանահավատ չեն, քրեական պատասխանատվությունից և սպասվող պատժից խուսափելու, քրեական գործով պարզված փաստական հանգամանքները խեղաթյուրելու նպատակ են հետապնդում և հերքվում են վերոնշյալ ապացույցներով:
Այսպիսով, Արա Գեղեցիկ Մելիքսեթյանի արարքը ապացուցված է բավարար ապացույցների համակցությամբ, որակված է ճիշտ և վերջինս իր կատարած այդ արարքի համար ենթակա է քրեական պատասխանատվության և պատժի:
Դատարանը, հաստատված համարելով հանցագործության և դրա կատարման մեջ Ա. Մելիքսեթյանի մեղքի ապացուցված լինելը, գտնում է, որ նա ենթակա է պատժի կատարածի համար:
Ամբաստանյալի նկատմամբ պատիժ նշանակելու հարցը քննարկելիս դատարանը գտնում է հետևյալը.
ՀՀ քրեական օրենսգրքի 10-րդ հոդվածի համաձայն`
«Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար»:
ՀՀ քրեական օրենսգրքի 48-րդ հոդվածի 2-րդ մասի համաձայն՝
«Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները»:
ՀՀ քրեական օրենսգրքի 61-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները:
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում պատասխանատվությունը և պատիժը մեղմացնող կամ ծանրացնող հանգամանքներով:
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները»:
ՀՀ վճռաբեկ դատարանը Կարեն Հարությունյանի վերաբերյալ գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները, հանգել է այն հետևության, որ պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով` հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար (տե´ս ՀՀ վճռաբեկ դատարանի` Կարեն Հարությունյանի վերաբերյալ գործով 2007 թվականի նոյեմբերի 30-ի ՎԲ-201/07 որոշումը):
Պատժի տեսակների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ. Մադաթյանի գործով որոշման մեջ, որտեղ իրավական դիրքորոշում է հայտնել այն մասին, որ. «(…) այլընտրանքային սանկցիաների միջև ընտրություն կատարելիս պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա:
Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ:
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը: (…)» (տե´ս Գարուշ Նորիկի Մադաթյանի վերաբերյալ 2009 թվականի փետրվարի 17-ի թիվ ԵՇԴ/0029/01/08 որոշումը):
Մեկ այլ` Ս. Թոմոյանի վերաբերյալ գործով ՀՀ վճռաբեկ դատարանն իրավական դիրքորոշում է հայտնել այն մասին, որ. «Պատժի անհատականացման սկզբունքի բովանդակության հիմնական մասն է կազմում հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով: Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս: Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն:» (տե´ս Սերյոժա Սարգսի Թոմոյանի վերաբերյալ 2010 թվականի փետրվարի 12-ի թիվ ԼԴ2/0019/01/09 որոշումը):
Դատարանն ամբաստանյալի նկատմամբ պատիժ նշանակելիս հաշվի է առնում ինչպես կատարած հանցագործության բնույթն ու հասարակական վտանգավորության աստիճանը, այնպես էլ նրա անձը բնութագրող տվյալները, այն է` Ա. Մելիքսեթյանը, նախկինում դատապարտված չի եղել (ըստ ՀՀ ոստիկանության ինֆորմացիոն կենտրոն կատարված հարցման արդյունքների):
Ամբաստանյալի պատասխանատվությունը և պատիժը մեղմացնող և ծանրացնող հանգամանքներ դատարանը չի արձանագրում:
Ն. Սարգսյանի վերաբերյալ գործով ՀՀ վճռաբեկ դատարանն իրավական դիրքորոշում է հայտնել այն մասին, որ դատարանի կողմից արարքի հանրային վտանգավորության աստիճանի և բնույթի բացահայտումը սերտորեն կապված է պատիժ նշանակելու ընդհանուր սկզբունքների հետ` թե՛ արդարացի պատիժ նշանակելու և թե՛ պատժի անհատականացման համատեքստում:
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության աստիճանի գնահատականը տրվում է դատարանի կողմից` հանցագործության կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա, և արտահայտվում է կոնկրետ պատժի տեսքով (տե՛ս Նարեկ Սարգսյանի գործով Վճռաբեկ դատարանի 2011 թվականի դեկտեմբերի 22-ի թիվ ԵԿԴ/0042/01/11 որոշման 16-17-րդ կետերը):
Քննարկելով նշանակվելիք պատժի և պատժաչափի հարցը, ՀՀ քրեական օրենսգրքի 10-րդ, 48-րդ և 61-րդ հոդվածներով սահմանված իրավադրույթները ՀՀ վճռաբեկ դատարանի վերը նշված մոտեցումների հետ համադրելով, հաշվի առնելով հանցավոր արարքի բնույթը և հանրության համար վտանգավորության աստիճանը, այդ թվում` նրա կատարած արարքը, հանցավոր մտադրության իրականացման աստիճանը, խախտված հասարակական հարաբերության սոցիալական նշանակությունը, դրանք համադրելով ամբաստանյալի անձը բնութագրող հանգամանքների հետ՝ դատարանը հանգում է հետևության, որ ամբաստանյալ Ա. Մելիքսեթյանի նկատմամբ ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերով նախատեսված արարքի համար որպես պատիժ պետք է նշանակվի ազատազրկում` 3 /երեք/ տարի ժամկետով` առանց գույքի բռնագրավման և որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու:
Քննարկելով նշանակված պատիժը կրելու հարցը` դատարանը գտնում է հետևյալը.
«Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 1-ին մասի համաձայն`
«1. Համաներում հայտարարելով՝ պատժից ազատել`
1) առավելագույնը չորս տարի ժամկետով ազատությունից զրկելու հետ կապված պատժի դատապարտված անձանց.
(…)»:
Նկատի ունենալով այն, որ Ա. Մելիքսեթյանի նկատմամբ պատիժ է նշանակվելու ոչ ավելի, քան չորս տարի ժամկետով ազատազրկում, բացի այդ համաներման կիրառումը սահմանափակող հանգամանքներ առկա չեն՝ դատարանը գտնում է, որ «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 1-ին մասի 1-ին կետի կիրառմամբ Ա. Մելիքսեթյանին պետք է ազատել նշանակվող պատժից։
Անդրադառնալով քրեական գործով առկա դատական ծախսերին` դատարանն արձանագրում է, որ սույն քրեական գործով դրանք բացակայում են, հետևաբար այդ հարցը պետք համարել լուծված:
Քննարկելով խափանման միջոցի հարցը` դատարանը գտնում է, որ ամբաստանյալ Ա. Մելիքսեթյանի նկատմամբ որպես խափանման միջոց ընտրված չհեռանալու մասին ստորագրությունը պետք է վերացնել` դատավճիռն օրինական ուժի մեջ մտնելուց հետո:
Քննարկելով ապացույցների տնօրինման հարցը` դատարանը գտնում է, որ դատավճռի օրինական ուժի մեջ մտնելուց հետո նախաքննական մարմնի 31.05.2017թ. որոշմամբ որպես ապացույց ճանաչված՝ ՀՀ ԱԱԾ արտաքին կապերի վարչության միջոցով ՀՀ-ում Ֆրանսիայի Հանրապետության դեսպանատնից ստացված 41 անձանցից բաղկացած «Վահրամաբերդ» պարի խմբի ցուցակը պետք է թողնել կցված քրեական գործին:
Ելնելով վերոգրյալից և ղեկավարվելով ՀՀ քրեական դատավարության օրենսգրքի 357-360-րդ, 365-րդ և 369-372-րդ, 3761-րդ և 379-րդ հոդվածներով, «Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 1-ին մասի 1-ին կետով` դատարանը

Վ Ճ Ռ Ե Ց

Արա Գեղեցիկ Հմայակի Մելիքսեթյանին մեղավոր ճանաչել ՀՀ քրեական օրենսգրքի 329.1-րդ հոդվածի 3-րդ մասի 1-ին և 2-րդ կետերով նախատեսված հանցանքի կատարման մեջ և դատապարտել ազատազրկման` 3 /երեք/ տարի ժամկետով` առանց գույքի բռնագրավման և որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու:
«Էրեբունի-Երևանի հիմնադրման 2800-ամյակի և Հայաստանի առաջին հանրապետության անկախության հռչակման 100-ամյակի կապակցությամբ քրեական գործերով համաներում հայտարարելու մասին» ՀՀ օրենքի 2-րդ հոդվածի 1-ին մասի 1-ին կետի կիրառմամբ Արա Գեղեցիկ Հմայակի Մելիքսեթյանին ազատել նշանակված պատժից:
Դատավճիռն օրնական ուժի մեջ մտնելուց հետո Արա Գեղեցիկ Հմայակի Մելիքսեթյանի նկատմամբ ընտրված խափանման միջոցը` չհեռանալու մասին ստորագրությունը, վերացնել:
Քրեական գործով ապացույց ճանաչված փաստաթղթերը` թողնել կցված քրեական գործին:
Դատավճիռը կարող է բողոքարկվել ՀՀ վերաքննիչ քրեական դատարան հրապարակվելու օրվանից հետո` մեկամսյա ժամկետում:


ԴԱՏԱՎՈՐ` Վ. ՄԻՍԱԿՅԱՆ