Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ
քրեական գործ թիվ ԵԿԴ/0195/01/17

Երևան քաղաքի ընդհանուր իրավասության դատարանը,

նախագահությամբ` դատավոր Մ. Մարտիրոսյանի
քարտուղարությամբ` Ա. Հովհաննիսյանի,
Ա. Գեղամյանի,
Թ. Խաչատրյանի,
մասնակցությամբ`

մեղադրող,
Հայաստանի Հանրապետության
/այսուհետ նաև ՀՀ/ դատախազության
Երևանի քաղաքի Կենտրոն և Նորք-Մարաշ
վարչական շրջանների
դատախազության ավագ դատախազ Տ. Պողոսյանի,

հանրային պաշտպան Թ. Բաղդասարյանի,

տուժող Վ. Բադալյանի,

տուժողի ներկայացուցիչ Ս. Ոսկանյանի,

2018թ. նոյեմբերի 19-ին Երևանում,

դռնբաց դատական նիստում քննեց քրեական գործն ըստ մեղադրանքի

Քրիստինե էդուարդի Մալխասյանի`
/ծնված 1975թ. հոկտեմբերի 05-ին Երևան քաղաքում, հայ, ՀՀ քաղաքացի, միջնակարգ կրթությամբ, ամուսնալուծված՝ խնամքին մինչև տասչորս տարեկան մեկ երեխա, նախկինում դատված, դատվածությունը մարված, չի աշխատում, հաշվառված է Երևան քաղաքի Դավիթաշեն թիվ 6 փողոցի թիվ 7 տանը, փաստացի բնակվում է Մասիս քաղաքի թիվ 9 փողոցի թիվ 3 շարքի թիվ 74 տանը, մեղադրվում է ՀՀ քրեական օրենսգրքի 258-րդ հոդվածի 3-րդ մասի 1-ին կետով/


Գործի դատավարական նախապատմությունը
Թիվ 15815115 քրեական գործը ՀՀ քննչական կոմիտեի Երևան քաղաքի քնչական վարչության /այսուհետ նաև ՔԿ ԵՔՔՎ/ Կենտրոն և Նորք-Մարաշ վարչական շրջանների քննչական բաժնում հարուցվել և վարույթ է ընդունվել 2015թ. դեկտեմբերի 27-ին։
Նախաքննության մարմնի 2016թ. օգոստոսի 24-ի որոշմամբ Քրիստինե Մալխասյանը ձերբակալվել է, իսկ երեք օր անց, նույն մարմնի 2016թ. օգոստոսի 27-ի որոշմամբ Քրիստինե Մալխասյանը ներգրավվել է որպես մեղադրյալ՝ նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 2-րդ կետով։ Նույն օրը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանի /այսուհետ նաև Դատարան/ որոշմամբ Քրիստինե Մալխասյանի նկատմամբ որպես խափանման միջոց կիրառվել է կալանավորումը։ Դատարանի 2016թ. հոկտեմբերի 20-ի որոշմամբ Քրիստինե Մալխասյանին կալանքի տակ պահելու ժամկետը 2 /երկու/ ամիս ժամանակով երկարացվել է։
ՀՀ վերաքննիչ քրեական դատարանը դատական ստուգման ենթարկելով Քրիստինե Մալխասյանին կալանքի տակ պահելու ժամկետը երկարացնելու մասին Դատարանի որոշումը՝ 2016թ. նոյեմբերի 03-ին որոշում է կայացրել այն բեկանելու, Քրիստինե Մալխասյանի նկատմամբ ընտրված խափանման միջոց կալանքը վերացնելու և նրան կալանքից ազատ արձակելու մասին։
Նախաքննության մարմնի 2016թ. նոյեմբերի 14-ի որոշմամբ Քրիստինե Մալխասյանին, ՀՀ քրեական օրենսգրքի 258-րդ հոդվածի 3-րդ մասի 2-րդ կետով առաջադրված մեղադրանքը փոփոխվել է և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով։ Նույն օրվա որոշմամբ Քրիստինե Մալխասյանի նկատմամբ որպես խափանման միջոց ընտրվել է չհեռանալու մասին ստորագրությունը։
Նախաքննության մարմնի 2017թ. հուլիսի 19-ի որոշմամբ, Քրիստինե Մալխասյանին 2017թ. փետրվարի 17-ին ՀՀ քրեական օրենսգրքի 258-րդ հոդվածի 3-րդ մասի 1-ին և 2-րդ կետերով առաջադրված մեղադրանքը փոփոխվել է և նրան մեղադրանք է առաջադրվել ՀՀ քրեական օրենսգրքի 258-րդ հոդվածի 3-րդ մասի 1-ին կետով հետևյալ արարքի համար, որ նա. «2015թ. դեկտեմբերի 27-ին, ժամը 14.30-ի սահմաններում, Երևան քաղաքի Վրացյան փողոցի թիվ 90 հասցեում գործող ՀՀ ոստիկանության Կենտրոնականի բաժնում խմբի կազմում՝ որդիներ Էդգար Արմենի Մալխասյանի և քրեական պատասխանատվության տարիքի չհասած՝ 26.05.2003թ. ծնված՝ Էրիկ Արմենի Մալխասյանի հետ կոպիտ կերպով խախտելով հասրակական կարգը կատարել է խուլիգանություն, վիճաբանել է ՀՀ ոստիկանության Կենտրոնական բաժնի համայնքային ոստիկան Վահե Բադալյանի հետ, որի ընթացքում բռնություն է գործադրել վերջինիս նկատմամբ՝ ապտակել է վերջինիս և ձեռքերով հարվածներ է հասցրել նրա մարմնի տարբեր մասերին, ինչի հետևանքով Վ. Բադալյանի առողջությանը դիտավորությամբ պատճավռել է աջ թիակի արյունազեղումների ձևով և պարանոցի շրջանի արյունազեղումների ձևով՝ առողջությանը թեթև վնասի հատկանիշներ չպարունկող մարմնական վնասվածքներ։
Այսպես.
2015թ. դեկտեմբերի 27-ին, Երևան քաղաքի Հին Էրիվանցի փողոցում ապօրինի ավտոկայանատեղի շահագործելու համար ՀՀ ոստիկանության ՊՊԾ աշխատակիցների կողմից որդուն՝ Էդգար Արմենի Մալխասյանին Երևան քաղաքի Վրացյան 90 հասցեում գտնվող՝ ՀՀ ոստիկանության Երևան քաղաքի վարչության Կենտրոնական բաժին ներկայացնելու հետ կապված, ժամը՝ 14։30-ի սահմաններում խմբի կազմում՝ որդիներ՝ Էդգար Արմենի Մալխասյանի և քրեական պատասխանատվության տարիքի չհասած՝ 26.05.2003թ. ծնված՝ Էրիկ Արմենի Մալխասյանի հետ, խուլիգանական մղումներից ելնելով վիճաբանել է ՀՀ ոստիկանության Կենտրոնական բաժնի համայնքային ոստիկաններ՝ Գևորգ Գրիգորյանի, Վարդան Մարուքյանի և Վահե Բադալյանի հետ, հայհոյել, հասարակության և բարոյականության համընդհանուր նորմերի նկատմամբ դրսևորելով անթաքույց և բացահայտ արհամարհանք, սեփական անձի առավելությունները ընգծելու մոլուցքից մղված, սեփականա անձը վեր դասելով հասարակությունում սահմանված համընդհանուր ճանաչում ստացված նորմերից, շուրջ 25 րոպե տևողությամբ կոպիտ կերպով խախտելով հասարակական կարգը, բացահայտ ցույց է տվել իր արհամարհական վերաբերմունքը հասարակությանը՝ ՀՀ ոստիկանության Կենտրոնական բաժնի աշխատակիցների նկատմամբ, դիտավորությամբ կոպիտ կերպով խախտել է ՀՀ ոստիկանության Կենտրոնական բաժնի երկրորդ հարկում գտնվող աշխատակիցների բնականոն աշխատանքը, իսկ երբ Վահե Բադալյանը փորձել է բջջային հեռախոսով նկարահանել ոստիկանության Կենտրոնական բաժնում նրանց կողմից դրսևորած խուլիգանական վարքագիծը, որդու՝ Էդգար Արմնեի Մալխասյանի հետ միասին շարունակելով իրենց խուլիգանական գործողությունները, բռնություն են գործադրել Վահե Բադալյանի նկատմամբ՝ այն է՝ Ք.Մալխասյանը ապտակել է վերջինիս դեմքին, այնուհետև ձեռքերով և ոտքերով հարվածներ է հասցրել Վ.Բադալյանի մարմնի տարբեր մասերին, որից հետո Էդգար Մալխասյանը բռնելով վերջինիս պարանոցը սեղմել է այն, ինչի հետևանքով Վ.Բադալյանին պատճառվել է աջ թիակի արյունազեղումների ձևով և պարանոցի շրջանի արյունազեղումների ձևով՝ առողջությանը թեթև վնասի հատկանիշներ չպարունկող մարմնական վնասվածքներ։
Այսինքն՝ Քրիստինե Էդուարդի Մալխասյանը մեղսագրվում է հանցավոր արարք, որը նախատեսված է ՀՀ քրեական օրենսգրքի 258 հոդվածի 3-րդ մասի 1-ին կետով։»։
2017թ. հուլիսի 25-ին թիվ 15815115 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, 2017թ. հուլիսի 26-ին ընդունվել է դատարանի վարույթ, 2017թ. օգոստոսի 11-ին որոշում է կայացվել քրեական գործի դատական քննությունը 2017թ. օգոստոսի 21-ին նշանակելու մասին։


Դատարանի կողմից հաստատված փաստական հանգամանքները.
Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Քրիստինե Մալխասյանը 2015թ. դեկտեմբերի 27-ի ժամը 14։30-ի սահմաններում, Երևան քաղաքի Վրացյան փողոցի թիվ 90 հասցեում գործող՝ ՀՀ ոստիկանության Կենտրոնականի բաժնում, խմբի կազմում դիտավորությամբ կոպիտ կերպով խախտելով հասարակական կարգը՝ կատարել է խուլիգանություն՝ վիճաբանել է ՀՀ ոստիկանության Կենտրոնական բաժնի համայնքային ոստիկան Վահե Բադալյանի հետ, որի ընթացքում բռնություն է գործադրել նրա նկատմամբ՝ ապտակել է նրան և ձեռքերով հարվածներ է հասցրել նրա մարմնի տարբեր մասերին, ինչի հետևանքով Վահե Բադալյանի առողջությանը պատճառվել է աջ թիակի արյունազեղումների ձևով և պարանոցի շրջանի արյունազեղումների ձևով՝ առողջությանը թեթև վնասի հատկանիշներ չպարունկող մարմնական վնասվածքներ։
Ամբաստանյալ Քրիստինե Մալխասյանը վիճաբանելով ՀՀ ոստիկանության Կենտրոնական բաժնի համայնքային ոստիկաններ՝ Գևորգ Գրիգորյանի, Վարդան Մարուքյանի և Վահե Բադալյանի հետ՝ հայհոյել է, հասարակության և բարոյականության համընդհանուր նորմերի նկատմամբ դրսևորել է բացահայտ արհամարհանք՝ սեփական անձը վեր դասելով հասարակությունում սահմանված համընդհանուր ճանաչում ստացած նորմերից։ Այդ կերպ շուրջ 25 րոպե տևողությամբ դիտավորությամբ կոպիտ կերպով խախտել է ՀՀ ոստիկանության Կենտրոնական բաժնի երկրորդ հարկում գտնվող աշխատակիցների բնականոն աշխատանքը՝ բացահայտ ցույց տալով իր արհամարհական վերաբերմունքը հասարակության՝ ՀՀ ոստիկանության Կենտրոնական բաժնի աշխատակիցների նկատմամբ։
Տուժող Վահե Բադալյանը փորձել է բջջային հեռախոսով տեսանկարահանել ՀՀ ոստիկանության Կենտրոնական բաժնում ամբաստանյալ Քրիստինե Մալխասյանի կողմից դրսևորած խուլիգանական վարքագիծը, սակայն Քրիստինե Մալխասյանը մեկ այլ անձի հետ միասին շարունակելով իրենց խուլիգանական գործողությունները՝ բռնություն են գործադրել տուժող Վահե Բադալյանի նկատմամբ, այն է՝ ամբաստանյալ Քրիստինե Մալխասյանն ապտակել է տուժող Վահե Բադալյանի դեմքին, այնուհետև ձեռքերով և ոտքերով հարվածներ է հասցրել նրա մարմնի տարբեր մասերին, որից հետո մեկ այլ անձը բռնելով վերջինիս պարանոցը՝ սեղմել է այն, ինչի հետևանքով տուժող Վահե Բադալյանին պատճառվել է աջ թիակի արյունազեղումների ձևով և պարանոցի շրջանի արյունազեղումների ձևով՝ առողջությանը թեթև վնասի հատկանիշներ չպարունակող մարմնական վնասվածքներ։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Քրիստինե Մալխասյանի խնամքին առկա է մինչև տասնչորս տարեկան մեկ երեխա, իսկ նրա պատասխանատվությունը և պատիժը ծանրացնող հանգամանքների առկայության վերաբերյալ տեղեկություններ դատարանին չեն ներկայացվել։

Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Տուժող Վահե Բադալյանի ցուցմունքներով այն մասին, որ 2015թ. դեկտեմբերի 27-ին ընդգրկված է եղել ՀՀ ոստիկանության ԵՔՎ Կենտրոնական բաժնի վերակարգում։ Նույն օրը ժամը 14։30-ի սահմաններում, ապօրինի ավտոկայանատեղի շահագործելու կասկածանքով ՊՊԾ գնդի ոստիկանների կողմից բաժին է ներկայացվել Էդգար Մալխասյանը։ Բաժին են եկել նաև վերջինիս մայր Քրիստինե Մալխասյանը, տատը՝ Մանիկ Մալխասյանը, քույրը՝ Էդիտա Մալխասյանը և եղբայրը՝ Էրիկ Մալխասյանը։ Էդգար Մալխասյանին ոստիկանության բաժին ներկայացնելու հարցի շուրջ վերջիններս սկսել են վիճաբանել ոստիկանության աշխատակիցների հետ, որի ընթացքում սեռական բնույթի հայհոյանքներ են հնչեցրել ոստիկանության աշխատակիցների հասցեներին, ինչի հետևանքով խաթարվել է ոստիկանության Կենտրոնական բաժնի 2-րդ հարկի բնականոն աշխատանքը։ Այդ ընթացքում ցանկացել է իր մոտ եղած բջջային հեռախոսով տեսանկարահանել վերջիններիս խուլիգանական վարքագիծը՝ հայհոյանքներն ու գորգոռոցները։ Տեսնելով դա՝ Քրիստինե Մալխասյանը ձեռքով հարվածել է իր դեմքին, որի պատճառով ընկել է գետնին։ Իրեն օգնել են բարձրանալ և ուղեկցել են դեպի իր աշխատասենյակ։ Հայհոյանքները և գոռգոռոցները տևել են շուրջ 25 րոպե, ուստի կրկին դուրս է եկել իր աշխատասենյակից, որպեսզի նորից տեսանկարահանի կատարվածը։ Էդգար Մալխասյանն օգտվելով ավելի բարձրահասակ լինելու հանգամանքից՝ երկու ձեռքով բռնել է իր պարանոցից, ինչի պատճառով իր ինքնազգացողությունը վատացել է, ընկել է գետնին, որից հետո իրեն տեղափոխել են հիվանդանոց։
/դատական նիստի արձանագրություն, հատոր 1, գ.թ. 52-54, 130-132/
Վկա Մուրադ Խաչատրյանի ցուցմունքներով այն մասին, որ 2015 թվականի դեկտեմբերի 27-ին ընդգրկված է եղել ՀՀ ոստիկանության ԵՔՎ Կենտրոնական բաժնի վերակարգում։ Այդ օրը ցերեկային ժամերին գտնվել է դրսում և կատարել իր աշխատանքային պարտականությունները։ Աշխատանքի վայր է վերադարձել ժամը 14։30-ի սահմաններում և նկատել է, որ բաժնի երկրորդ հարկում է գտնվում Էդգար Մալխասյանը։ Տեղեկացել է, որ վերջինս ոստիկանության բաժին է ներկայացվել ՊՊԾ գնդի աշխատակիցների կողմից` ապօրինի ավտոկայանատեղի շահագործելու կասկածանքով։ Գործընկերների հետ պատրաստվել է համապատասխան արձանագրություն կազմել, սակայն այդ ժամանակ բաժին են եկել Էդգար Մալխասյանի տատ Մանիկ Մալխասյանը, եղբայր Էրիկ Մալխասյանը, մայր Քրիստինե Մալխասյանը, և քույր Էդիտա Մալխասյանը։ Վերջիններս բաժնի երկրորդ հարկում սկսել են վիճաբանել ոստիկանության աշխատակիցների հետ, գոռգոռալ և սեռական բնույթի հայհոյանքներ հնչեցնել ոստիկանության աշխատակիցների հասցեներին։ Հանդարտեցնելու նպատակով նշված անձանց տարել են թիվ 222 աշխատասենյակ, որտեղ Քրիստինե Մալխասյանը կանգնած է եղել ՀՈԲ ավագ տեսուչ Վահե Բադալյանի թիկունքում։ Երբ Վահե Բադալյանը փորձել է բջջային հեռախոսով տեսանկարահանել ՀՀ ոստիկանության ԵՔՎ Կենտրոնական բաժնում նրանց կողմից դրսևորած խուլիգանական վարքագիծը՝ Քրիստինե Մալխասյանը ձեռքով անսպասելիորեն հարվածել է Վահե Բադալյանի դեմքին, ինչի հետևանքով վերջինս ընկել է հատակին, իսկ Քրիստինե Մալխասյանը սկսել է ոտքով հարվածել Վահե Բադալյանին։ Այնուհետև նրանց մի կողմ են տարել որից հետո քաշքշուկ է սկսվել։ Այդ ժամանակ ոստիկանները փորձել են հանդարտեցնել Մալխասյաններին, սակայն վերջիններս հայհոյանքներ են հնչեցրել ոստիկանության աշխատակիցների, մասնավորապես՝ Վահե Բադալյանի հասցեին։ Վիճաբանության ընթացքում Էդգար Մալխասյանը հարձակվել է Վահե Բադալյանի վրա, ձեռքով բռնել է նրա կոկորդից, իսկ Քրիստինե Մալխասյանը և Էրիկ Մալխասյանը սկսել են հարվածներ հասցնել Վահե Բադալյանի մարմնի տարբեր հատվածներին, ինչի հետևանքով վերջինիս ինքնազգացողությունը վատացել է և նրան շտապօգնության ավտոմեքենայով տեղափոխել են հիվանդանոց։ Վիճաբանությունը տևել է շուրջ 25 րոպե, որին ականատես են եղել ոստիկաններ Վարդան Մարուքյանը, Գևորգ Գրիգորյանը և այլ աշխատակիցներ։
/դատական նիստի արձանագրություն, հատոր 1, գ.թ. 58-60/
Վկա Վարդան Մարուքյանի ցուցմունքներով այն մասին, որ 2015 թվականի դեկտեմբերի 27-ին ընդգրկված է եղել ՀՀ ոստիկանության Կենտրոնական բաժնի վերակարգում։ Նույն օրը ժամը 14։30-ի սահմաններում միջանցքից ձայներ է լսել։ Այդ պահին ինքը գտնվել է ՀՀ ոստիկանության ԵՔՎ Կենտրոնական բաժնի երկրորդ հարկի իր աշխատասենյակում։ Դուրս գալով միջանցք՝ նկատել է, որ Մանիկ Մալխասյանն իր դուստր Քրիստինե Մալխասյանի և թոռների հետ բարձր ձայնով գոռգոռում են և սեռական բնույթի հայհոյանքներ են հնչեցնում ոստիկանության աշխատակիցների հասցեներին։ Հանդարտեցնելու նպատակով նրանց տարել են թիվ 222 աշխատասենյակ։ Երբ Վահե Բադալյանը փորձել է բջջային հեռախոսով տեսանկարահանել ՀՀ ոստիկանության ԵՔՎ Կենտրոնական բաժնում նրանց դրսևորած խուլիգանական վարքագիծը՝ Քրիստինե Մալխասյանն, ով կանգնած է եղել ՀՈԲ ավագ տեսուչ Վահե Բադալյանի թիկունքում, անսպասելիորեն ձեռքով հարվածել է վերջինիս դեմքին, ինչի հետևանքով վերջինս ընկել է հատակին և Քրիստինե Մալխասյանը ոտքով հարվածել է նրան։ Դրանից հետո նրանց մի կողմ են տարել և սկսվել է քաշքշուք, որի ժամանակ ոստիկանները փորձել են հանդարտեցնել նրանց։ Մալխասյանները հայհոյանքներ են հնչեցրել ոստիկանության աշխատակիցների, մասնավորապես՝ Վահե Բադալյանի հասցեին։ Վիճաբանության ընթացքում Էդգար Մալխասյանը ձեռքով բռնել է Վահե Բադալյանի կոկորդից, իսկ Քրիստինե Մալխասյանն և Էրիկ Մալխասյանը սկսել են հարվածներ հասցնել Վահե Բադալյանի մարմնի տարբեր հատվածներին, ինչի հետևանքով Վահե Բադալյանի ինքնազգացողությունը վատացել է և նրան շտապօգնության ավտոմեքենայով տեղափոխել են հիվանդանոց։ Տեղի ունեցած վիճաբանությունը տևել է մոտ 25 րոպե, որին ականատես են եղել ոստիկաններ Մուրադ Խաչատրյանը, Գևորգ Գրիգորյանը և այլ աշխատակիցներ։
/դատական նիստի արձանագրություն, հատոր 1, գ.թ. 69-71/
Վկա Գևորգ Գրիգորյանի ցուցմունքներով այն մասին, որ 2015 թվականի դեկտեմբերի 27-ին ընդգրկված է եղել ՀՀ ոստիկանության ԵՔՎ Կենտրոնական բաժնի վերակարգում։ Այդ օրը ժամը 14։30-ի սահմաններում, երբ միջանցքից աղմուկի ձայներ է լսել, գտնվել է ոստիկանության Կենտրոնական բաժնի երկրորդ հարկի թիվ 224 աշխատասենյակում։ Դուրս է եկել միջանցք և տեսել է, որ Մանիկ Մալխասյանը, նրա դուստր Քրիստինե Մալխասյանը և թոռները՝ Էդիտա Մալխասյանը, Էրիկ Մալխասյանը և Էդգար Մալխասյանը քաշքշում են բաժնում գտնվող ոստիկանության ծառայողներին, հնչեցնում են սեռական բնույթի հայհոյանքներ աշխատակիցների հասցեներին։ Վերջիններիս հանդարտեցնելու նպատակով նրանց տարել են թիվ 222 աշխատասենյակ։ Երբ Վահե Բադալյանը փորձել է բջջային հեռախոսով նկարահանել ոստիկանության Կենտրոնական բաժնում նրանց դրսևորած խուլիգանական վարքագիծը՝ Քրիստինե Մալխասյանը, ով կանգնած է եղել ՀՈԲ ավագ տեսուչ Վահե Բադալյանի թիկունքում, անսպասելիորեն ձեռքով հարվածել է վերջինիս դեմքին, ինչի հետևանքով վերջինս ընկել է հատակին և Քրիստինե Մալխասյանն ոտքով հարվածել է նրան։ Դրանից հետո նրանց մի կողմ են տարել և նորից սկսվել է քաշքշուկ, որի ժամանակ ոստիկանները փորձել են նրանց հանդարտեցնել։ Մալխասյանները հայհոյանքներ են տվել ոստիկանության աշխատակիցներին, մասնավորապես՝ Վահե Բադալյանին։ Վիճաբանության ընթացքում Էդգար Մալխասյանը ձեռքով բռնել է Վահե Բադալյանի կոկորդից, իսկ Քրիստինե Մալխասյանը և Էրիկ Մալխասյանը սկսել են հարվածներ հասցնել Վահե Բադալյանի մարմնի տարբեր հատվածներին, ինչի հետևանքով Վահե Բադալյանի ինքնազգացողությունը վատացել է և նրան շտապօգնության ավտոմեքենայով տեղափոխել են հիվանդանոց։ Տեղի ունեցած վիճաբանությունը տևել է մոտ քսանհինգ րոպե, որին ականատես են եղել ոստիկաններ Մուրադ Խաչատրյանը, Վարդան Մարուքյանը և այլ աշխատակիցներ։
/դատական նիստի արձանագրություն, հատոր 1, գ.թ. 55-57/
Տուժող Վահե Բադալյանի վերաբերյալ նշանակված դատաբժշկական փորձաքննության թիվ 0690 եզրակացությամբ, համաձայն որի.
«Վահե Բադալյանի մարմնական վնասվածքները ըստ բժշկական փաստաթղթերի տվյալների պարանոցի և աջ թիակի շրջանների արյունազեղումների ձևով, պատճառվել են բութ առարկաների ներգործությամբ, հնարավոր է փորձաքննվողի կողմի նշված ժամանակին և հանգամանքներում, որոնք առողջության թեթև վնասի հատկանիշներ չեն պարունակում։»։
/դատական նիստի արձանագրություն, հատոր 1, գ.թ. 104-105/
Առաջադրված մեղադրանքում Քրիստինե Մալխասյանն իրեն մեղավոր չի ճանաչել և հայտնել է, որ ոստիկանության բաժին գնալուց հետո իր որդի Էդգար Մալխասյանին տեսել է ծեծված և շորերը՝ պատռված վիճակում։ Փորձել է պարզել տեղի ունեցածի պատճառը, սակայն սկսել են հայհոյել իրեն։ Ինքը զայրացել է՝ իր որդուն այդպես ծեծելու համար, որից հետո սկսել են իրեն նույնպես քաշքշել։
Ոչ ինքը, ոչ էլ որդիները ոստիկանության աշխատակիցների հետ չեն վիճաբանել և որևէ հակաօրինական գործողություն չեն կատարել։ Ինքը և իր ընտանիքի անդամներն ոստիկանների կողմից ենթարկվել են բռնության։
/դատական նիստի արձանագրություն, հատոր 2, Գ.Թ. 100-102, 154-156/

Պաշտպանության կողմի միջնորդությամբ որպես վկա դատարանում հարցաքննված ներքոհիշյալ անձինք հայտնեցին հետևյալը.

Գևորգ Հայրապետյանը դատարանին հայտնեց, որ 2015թ. դեկտեմբեր ամսին, օրը չի հիշում, ընդգրկված է եղել ծառայությունում։ Ցերեկային ժամերին Երևան քաղաքի Հին Էրիվանցու փողոցով անցնելիս, ապօրինի ավտոկայանատեղի շահագործելու կասկածանքով, նույն բաժնի ոստիկան Յուրա Հայրապետյանի հետ Էդգար Մալխասյանին ներկայացրել են բաժին, զեկուցագիր են գրել, նրան ներկայացրել են ՀՈԲ տեսուչներին, այնուհետև հեռացել են բաժնից՝ շարունակելու իրենց ծառայությունը։ Միջադեպի ժամանակ բաժնում չի գտնվել։
Մինչև բաժին բերելն Էդգար Մալխասյանից պահանջել են ներկայացնել համապատասխան գործունեությամբ զբաղվելու թույլտվությունը հավաստող փաստաթղթեր, սակայն վերջինս նման փաստաթղթեր չի ներկայացրել՝ ասելով, որ ինքը գրանցված աշխատող է, գործատուն այդտեղ չէ, որպեսզի փաստաթղթերը բերի։ Այդ ընթացքում նա զանգեր է կատարել, սակայն 10-15 րոպե սպասելուց հետո ոչ ոք չի բերել այդ փաստաթղթերը և նրան ներկայացրել են բաժին։
/դատական նիստի արձանագրություն/
Յուրա Հայրապետյանը դատարանին հայտնեց, որ 2015թ. դեկտեմբեր ամսին, օրը չի հիշում, ցերեկային ժամերին ծառայություն է իրականացրել Երևան քաղաքի Հին Էրիվանցու փողոցում, որտեղից ապօրինի ավտոկայանատեղի շահագործելու կասկածանքով, նույն բաժնի ոստիկան Գևորգ Հայրապետյանի հետ Էդգար Մալխասյանին ներկայացրել են բաժին, զեկուցագիր են գրել, նրան ներկայացրել են ՀՈԲ տեսուչներին, այնուհետև հեռացել են բաժնից՝ շարունակելու իրենց ծառայությունը։ ՀՀ ոստիկանության Կենտրոնական բաժնում տեղի ունեցած միջադեպի ժամանակ բաժնում չի գտնվել։ Մինչև բաժին բերելն Էդգար Մալխասյանից պահանջել են ներկայացնել համապատասխան գործունեությամբ զբաղվելու թույլտվությունը հավաստող փաստաթղթեր, սակայն վերջինս նման փաստաթղթեր չի ներկայացրել՝ ասելով, որ ինքը գրանցված աշխատող է, գործատուն այդտեղ չէ, որպեսզի փաստաթղթերը բերի։ Այդ ընթացքում նա զանգեր է կատարել, սակայն 10-15 րոպե սպասելուց հետո, երբ ոչ ոք չի բերել այդ փաստաթղթերը՝ նրան ներկայացրել են բաժին։
/դատական նիստի արձանագրություն/
Անի Հովհաննիսյանը դատարանին հայտնեց, որ դեպքի օրը գնացել է Էդգար Մալխասյանի մոտ՝ նրանից գումար խնդրելու համար։ Հասնելով Հյուսիսային պողոտա՝ նկատել է, որ կռիվ է ընթանում։ Տեսել է, որ քաշքշում են Էդգարին Մալխասյանին և նրա քույր Ռուզաննա Մալխասյանին։ Այդ քաշքշուկի պատճառով Ռուզաննան Մալխասյանն ընկել է գետնին։ Նկատել է, որ Էդգարի Մալխասյանին հարվածել և քաշքշել են չորս հոգի, որոնց մեջ եղել են նաև համազգեստով անձինք։ Այդ հարվածների պատճառով Էդգար Մալխասյանի բերանից արյուն է եկել։ Ինքը փորձել է մոտենալ նրանց, սակայն Էդգար Մալխասյանին քաշքշելով տարեն են դեպի ավտոմեքենան, նստեցրել և տարել են։
Թե ինչու են ոստիկանները տարել Էդգար Մալխասյանին՝ ինքը չգիտի։ Ինքը և անցորդները չեն միջամտել այդ միջադեպին։ Այն տեղի է ունեցել Հյուսիսային պողոտայում, Էդգար Մալխասյանի աշխատավայրի մոտ։ Էդգար Մալխասյանն աշխատել է որպես այգեպան։
Ոստիկանության բաժին չի գնացել, իսկ ոստիկանության բաժնում տեղի ունեցած միջադեպի մասին տեղեկացել է հաջորդ օրը։
/դատական նիստի արձանագրություն/
Մանիկ Մալխասյանը դատարանին հայտնեց, որ Էդիտա Մալխասյանի և Էրիկ Մալխասյանի հետ գնացել է ոստիկանություն։ Այնտեղ նկատել է, որ Էդգար Մալխասյանի դեմքն արյունոտ է։ Տեսել է, որ Էդգար Մալխասյանին ոստիկանության 2-րդ հարկում ծեծել են։ Հետո եկել է Էդգար Մալխասյանի մայր Քրիստինե Մալխասյանը, ով ամոթանք է տվել ոստիկաններին՝ Էդգարի Մալխասյանին հարվածելու համար և փորձել է պարզել, թե ով է Էդգար Մալխասյանին այդպես ծեծել, ինչի պատճառով նրան նույնպես սկսել են քաշքշել։
Այդ միջադեպը տևել է մի քանի ժամ, ոստիկանության 2-րդ հարկի աշխատասենյակում։ Ինքը տեսել է, թե ինչպես է Էդգար Մալխասյանը ծեծի ենթարկվում ոստիկանության աշխատակիցների կողմից, որոնց թվում եղել է նաև Վլադ անունով քննիչը։ Այդ ծեծի պատճառով Էդգար Մալխասյանը չի կարողացել խոսել և իրեն վատ է զգացել, նաև ուշագնաց է եղել։ Քրսիտինե Մալխասյանը շտապօգնություն է կանչել Էդգար Մալխասյանի համար։
Չի ցանկացել, որ իր հետ գնացած երեխաները տեսնեն այդ ամենը և նրանց հետ իջել է առաջին հարկ։ Քրիստինե Մալխասյանը ոչ մեկի չի հարվածել, սակայն շատ զայրացած է եղել՝ իր որդուն այդպես ծեծելու համար։ Իմացել է, որ Էդգար Մալխասյանին ծեծել են այն բանի համար, որ նա բարձր տոնով է խոսել ոստիկանների հետ։
/դատական նիստի արձանագրություն/
Էդիտա Մալխասյանը դատարանին հայտնեց, որ ոստիկանություն գնալուց հետո տեսել է, որ իր եղբայր Էդգար Մալխասյանը գտնվում է ծեծված և շորերը պատռված վիճակում։ Այդ ամենը տեսնելով՝ զանգել է իր մայր Քրիստինե Մալխասյանին, ով գալով ոստիկանություն և տեսնելով Էդգար Մալխասյանի պատռված շորերն ու ծեծված վիճակը՝ վրդովվել է։ Բաժնի երկրորդ հարկի միջանցքում ծեծել են նաև իր մյուս եղբայր Էրիկ Մալխասյանին։ Կատարվածի մասին իր մայր Քրիստինե Մալխասյանը փորձել է խոսել ոստիկանների հետ՝ պարզելու համար, թե ինչու են ծեծել իր որդիներին, սակայն ոստիկանները սկսել են իր մայր Քրիստինե Մալխասյանին նույնպես քաշքշել, հենել են պատին և հայհոյել են։
Ինքը փորձել է նկարել ոստիկանության բաժնում տեղի ունեցածը, սակայն ոստիկանները վերցրել են իր հեռախոսը և կոտրել են այն՝ ասելով, որ չի կարելի նկարել։ Քանի որ Էդգարի Մալխասյանի վիճակը շատ վատ է եղել՝ իր մայր Քրիստինե Մալխասյանը շտապօգնություն է կանչել։
Իր եղբայր Էդգար Մալխասյանին ոստիկանության բաժին բերման են ենթարկել, սակայն չգիտի, թե ինչու, չգիտի նաև նրան ծեծելու պատճառը։
/դատական նիստի արձանագրություն/


Դատարանի իրավական վերլուծությունները
Ստուգելով ամբաստանյալի, տուժողի, վկաների ցուցմունքները, համադրելով դրանք քրեական գործով ձեռք բերված և հետազոտված ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ` դատարանը գտնում է, որ Քրիստինե Մալխասյանի մեղադրանքը հիմնավորող ցուցմունքներն արժանահավատ են, հաստատվում են քրեական գործի քննությամբ ձեռք բերված և հետազոտված ապացույցների համակցությամբ, իսկ ամբաստանյալ Քրիստինե Մալխասյանի ցուցմունքները՝ ոստիկանության աշխատակիցների հետ չվիճելու, որևէ հակաօրինական գործողություն չկատարելու, ինչպես նաև առաջադրված մեղադրանքն այլ պատճառաբանություններով հերքելու վերաբերյալ` իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են վերոհիշյալ ապացույցներով։
Վերոհիշյալ վերլուծության արդյունքում դատարանը գտնում է նաև, որ ամբաստանյալ Քրիստինե Մալխասյանի կողմից, նրա մեղավորությամբ խմբի կազմում, խուլիգանություն կատարելը, ինչը զուգորդվել է անձի նկատմամբ բռնություն գործադրելով` ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության հատկանիշներին։
Ամբաստանյալ Քրիստինե Մալխասյանի կողմից կատարված, ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության համար պատիժ նշանակելու հարցը քննարկելիս` դատարանը գտնում է հետևյալը.
ՀՀ քրեական օրենսգրքի 10-րդ հոդվածի 1-ին մասի համաձայն՝
«Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար։»։
ՀՀ քրեական օրենսգրքի 48-րդ հոդվածի 2-րդ մասի համաձայն՝
«Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները»։
ՀՀ քրեական օրենսգրքի 61-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները։
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում պատասխանատվությունը և պատիժը մեղմացնող կամ ծանրացնող հանգամանքներով։
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները»։
ՀՀ քրեական օրենսգրքի 69-րդ հոդվածի 5-րդ մասի համաձայն՝
«Մինչև դատական քննությունը կալանքի տակ գտնվող անձի նկատմամբ տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու ձևով պատիժ նշանակելիս դատարանը, հաշվի առնելով կալանքի տակ պահելու ժամկետը, մեղմացնում է նշանակված պատիժը կամ լրիվ ազատում պատիժը կրելուց։»։
ՀՀ վճռաբեկ դատարանը Կարեն Տիգրանի Հարությունյանի վերաբերյալ ՎԲ-201/07 քրեական գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները` 2007 թվականի նոյեմբերի 30-ին կայացված որոշմամբ արտահայտել է հետևյալ իրավական դիրքորոշումները.
«4. (…) ՀՀ քրեական օրենսգրքի 48-րդ հոդվածի 2-րդ մասի համաձայն` պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները։ Սոցիալական արդարությունը վերականգնելու նպատակը բխում է արդարության և պատասխանատվության անհատականացման սկզբունքն ամրագրած ՀՀ քրեական օրենսգրքի 10-րդ հոդվածի բովանդակությունից։ Այն սահմանում է, որ հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար։ Սոցիալական արդարության վերականգնումը հնարավոր է, եթե հանցանք կատարած անձի նկատմամբ նշանակվի այնպիսի պատիժ, որն անհրաժեշտ ու բավարար է նրան ուղղելու և նոր հանցագործությունները կանխելու համար։
Պատիժ նշանակելու արդարության սկզբունքը դրսևորվում է օրենքով նախատեսված մի շարք պահանջներով։ ՀՀ քրեական օրենսգրքի 61-րդ հոդվածի 1-ին մասը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ։ Նույն հոդվածի 3-րդ մասի համաձայն` պատժի տեսակը և չափը որոշվում է հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով։ Պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար։ (…)»։
ՀՀ քրեական օրենսգրքի 258-րդ հոդվածի 3-րդ մասի սանկցիան այլընտրանքային է՝ պատիժ է նախատեսում տուգանքի և ազատազրկման ձևով։
Պատժի տեսակների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ. Մադաթյանի վերաբերյալ ԵՇԴ/0029/01/08 քրեական գործով 2009 թվականի փետրվարի 17-ի որոշման մեջ, որտեղ արտահայտել է հետևյալ իրավական դիրքորոշումները.
«13. (…) այլընտրանքային սանկցիաների միջև ընտրություն կատարելիս պատժի արդարացիության սկզբունքի ապահովման հիմնական երաշխիքը դատարանների կողմից յուրաքանչյուր գործի քննության ժամանակ այնպիսի հանգամանքների բացահայտումն է, որոնք ազդել են անձի կողմից կատարված արարքի հանրային վտանգավորության բնույթի և աստիճանի վրա։
14. Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության` հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ։
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում` հանցավորի կատարած արարքը և հանցագործությանը նրա մասնակցության աստիճանը։
15. Արարքի հանրային վտանգավորության բնույթի որոշման հարցում Վճռաբեկ դատարանը կարևորում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը։ Վճռաբեկ դատարանը գտնում է, որ պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը։ (…)»։
ՀՀ վճռաբեկ դատարանն Արարատ Ավագի Ավագյանի և Վահան Սերյոժայի Սահակյանի վերաբերյալ ԵԿԴ/0252/01/13 քրեական գործով 2014թ. հոկտեմբերի 31-ի որոշման մեջ արտահայտել է նաև հետևյալ իրավական դիրքորոշումը.
«(…) նշանակվող պատժի արդարացիության հիմնական պահանջն այն է, որ պատիժը պետք է համապատասխանի հանցագործության հանրային վտանգավորության աստիճանին և բնույթին (…)։
Հանցագործության հանրային վտանգավորության տիպային բնութագիրն արտացոլվում է օրենսդրի կողմից սահմանված սանկցիայում, իսկ յուրաքանչյուր կոնկրետ գործով արարքի հանրային վտանգավորության գնահատականը դատարանի կողմից կարող է որոշվել կոնկրետ հանցագործության տարրերի առանձնահատկությունների, դրա կատարման հանգամանքների, հանցավորի անձնավորության, պատասխանատվությունն ու պատիժը մեղմացնող և ծանրացնող հանգամանքների հիման վրա։
(…)
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով։ Ընդ որում՝ անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս։ Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն։ (…)»։
Ամբաստանյալ Քրիստինե Մալխասյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Քրիստինե Մալխասյանի անձը, կատարված հանցագործության հանրային վտանգավորության աստիճանը, հանցագործության կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո ամբաստանյալի դրսևորած վարքագիծը։
Ամբաստանյալ Քրիստինե Մալխասյանի կատարած հանցագործության համար պատիժ նշանակելիս` որպես նրա պատասխանատվությունը և պատիժը մեղմացնող հանգամանք դատարանը հաշվի է առնում խնամքին մինչև 14 տարեկան մեկ երեխայի առկայությունը, իսկ նրա պատասխանատվությունը և պատիժը ծանրացնող հանգամանք դատարանը չի արձանագրում։
Հաշվի առնելով վերոգրյալը` դատարանը գտնում է, որ ամբաստանյալ Քրիստինե Մալխասյանն իր կատարած, ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցագործության համար ենթակա է պատժի այդ հանցագործության համար նախատեսված պատիժներից նվազ խստի` տուգանքի ձևով, 500.000 /հինգ հարյուր հազար/ ՀՀ դրամ գումարի չափով, իսկ պատիժներից առավել խիստը կիրառելու հիմքեր առկա չեն։ Բացի այդ` տուգանքի միջոցով հնարավոր կլինի ապահովել ՀՀ քրեական օրենսգրքի 48-րդ հոդվածով նախատեսված պատժի նպատակները։
Քննարկելով ՀՀ քրեական օրենսգրքի 69-րդ հոդվածի 5-րդ մասով սահմանված կարգով Քրիստինե Մալխասյանի պատիժը մեղմացնելու կամ նրան պատժից ազատելու հարցը, հաշվի առնելով, որ Քրիստինե Մալխասյանը մինչև դատական քննությունը 2 /երկու/ ամիս 10 /տասը/ օր գտնվել է կալանքի տակ` դատարանը գտնում է, որ տուգանքի դատապարտվելու դեպքում Քրիստինե Մալխասյանի պատիժը ենթակա է մեղմացման՝ նվազեցվելով 200.000 /երկու հարյուր հազար/ ՀՀ դամ գումարի չափով։
Դատարանը գտնում է, որ նշանակված պատիժն ամբաստանյալ Քրիստինե Մալխասյանը պետք է կրի, քանի որ դրան խոչընդոտող հանգամանքներ առկա չեն։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել, ամբաստանյալ Քրիստինե Մալխասյանի գույքի վրա կալանք չի դրվել, իրեղեն ապացույց առկա չէ։
Քննելով խափանման միջոցի հարցը` դատարանը գտնում է, որ ամբաստանյալ Քրիստինե Մալխասյանի նկատմամբ ընտրված խափանման միջոց չհեռանալու մասին ստորագրությունը հիմնավոր է ընտրված և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը, քանի որ խափանման միջոցի այդ տեսակի պահանջներն ամբաստանյալի կողմից խախտված լինելու վերաբերյալ տեղեկություններ դատարանին չեն ներկայացվել։ Բացի այդ, տուգանքի դատապարտվելու դեպքում, նշանակված պատիժը կրելուց խուսափելու և դատավճռի կատարմանը խոչընդոտելու հավանականությունը ցածր է։
Դատական ծախսերի վերաբերյալ տեղեկություններ դատարանին չեն ներկայացվել։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357-360-րդ, 364-365-րդ և 369-373-րդ հոդվածներով` դատարանը

Վ Ճ Ռ Ե Ց

Ամբաստանյալ Քրիստինե էդուարդի Մալխասյանին մեղավոր ճանաչել ՀՀ քրեական օրենսգրքի 258-րդ հոդվածի 3-րդ մասի 1-ին կետով նախատեսված հանցանքում և դատապարտել տուգանքի՝ նվազագույն աշխատավարձի երեքհարյուրապատիկի՝ 300.000 /երեք հարյուր հազար/ ՀՀ դրամ գումարի չափով։
Խափանման միջոց չհեռանալու մասին ստորագրությունը թողնել անփոփոխ` մինչև դատավճռի օրինական ուժի մեջ մտնելը։
Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։


ԴԱՏԱՎՈՐ` Մ. ՄԱՐՏԻՐՈՍՅԱՆ