ԵԿԴ/0068/01/17

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ

ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ


,,05,, մայիսի 2017թ. ք. Երևան



Նախագահությամբ դատավոր Մ. Մակյանի

Քարտուղարությամբ` Թ. Խաչատրյանի

Մասնակցությամբ `

Մեղադրող Վ.Ասատրյանի

Տուժող Օ. Շավիշյանի

Թարգմանիչ Մ. Զաքարյանի


Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը` նախագահությամբ դատավոր Մ.Մակյանի, խորհրդակցական սենյակում, քննության առնելով թիվ ԵԿԴ/0068/01/17 քրեական գործի նյութերն ըստ մեղադրանքի`

1.Վահե Արթուրի Միքայելյանի` ծնված 29.08.1987թ.-ին,
Երևան քաղաքում, ազգությամբ հայ, ՀՀ քաղաքացի,
ամուսնալուծված, միջնակարգ կրթությամբ, նախկինում
դատված`

-17.05.2013թ.-ին Արաբկիր և Քանաքեռ-Զեյթուն վարչական
շրջանների ընդհանուր իրավասության դատարանի
կողմից՝ ՀՀ քրեական օրենսգրքի 178-րդ հոդվածի 2-րդ
մասի 1-ին կետով՝ ազատազրկման՝ 3 տարի 4 ամիս
ժամկետով։ ՀՀ քրեական վերաքննիչ դատարանի
կողմից՝ 15.06.2013թ.-ին կայացված որոշմամբ
պատժաչափը փոփոխվել է՝ ՀՀ քրեական օրենսգրքի
178- րդ հոդվածի 2-րդ մասի 1-ին կետով պատիժ է
նշանակվել ազատազրկում՝ 2 տարի 6 ամիս ժամկետով։
Ազատվել է պատժի կրումից 08.10.2013թ.-ին՝
համաներման հիմքով,

-29.10.2014թ-ին՝ Կենտրոն և Նորք-Մարաշ վարչական
շրջանների ընդհանուր իրավասության դատարանի
կողմից՝ ՀՀ քրեական օրենսգրքի 178-րդ հոդվածի 1-ին
մասով՝ ազատազրկման՝ 1 տարի ժամկետով,

-09.12.2015թ.-ին՝ Ավան և Նոր Նորք վարչական
շրջանների ընդհանուր իրավասության դատարանի
կողմից՝ ՀՀ քրեական օրենսգրքի 178-րդ
հոդվածի 2-րդ մասի 2-րդ կետով ազատազրկման՝
3 տարի 4 ամիս ժամկետով,

-24.10.2016թ.-ին Կենտրոն և Նորք-Մարաշ վարչական
շրջանների ընդհանուր իրավասության դատարանի
կողմից՝ ՀՀ քրեական օրենսգրքի 258-րդ հոդվածի 4-րդ
մասով՝ ազատազրկման՝ 5 /հինգ/ տարի 6 /վեց/ ամիս
ժամկետով, ներկայումս հանդիսանում է
ՀՀ ԱՆ «դատապարտյալների հիվանդանոց» ՔԿ
հիմնարկի դատապարտյալ, մեղադրվում է 2 դրվագով՝
ՀՀ քրեական օրենսգրքի 178-րդ հոդվածի 1-րդ մասով,
խափանման միջոց ընտրված չէ։


Պ Ա Ր Զ Ե Ց

Ըստ նախաքննական մարմնի կողմից դատարան ներկայացրած նյութերի`

«Վահե Արթուրի Միքայելյանը մեղադրվում է այն արարքներում, որ նա Օհանիկ Ավադիսի Շավիշյանի վստահությունը չարաշահելու և խաբեության եղանակով խարդախությամբ հափշտակել է վերջինիս պատկանող զգալի չափերի գումարները։

Այսպես.

Օհանիկ Ավադիսի Շավիշյանի կողմից ՀՀ քրեական օրենսգրքի 329.1 հոդվածով նախատեսված հանցավոր արարք կատարելու համար վերջինիս նկատմամբ որպես խափանման միջոց Կենտրոն և Նորք-Մարաշ վարչական շրջանների ընդհանուր իրավասության դատարանի կողմից կիրառվել է կալանքը և 2015 թվականի նոյեմբերի 14-ին տեղափոխվել է ՀՀ ԱՆ «Նուբարաշեն» ՔԿՀ, որտեղ ՔԿՀ-ի մեկ այլ կալանավոր Վահե Արթուրի Միքայելյանի հետ միասին պատիժ է կրել միևնույն՝ թիվ 2-րդ, խցում։ Վերջինս տեղեկանալով Օհանիկ Շավիշյանի ազատ արձակվելու ցանկության և հայերեն լեզվի չիմացության հանգամանքի մասին, նպատակադրվել է խարդախությամբ հափշտակել վերջինիս պատկանող զգալի չափի գումարներ։
Վահե Արթուրի Միքայելյանը ունենալով զգալի չափերի գումարներ հափշտակելու նախնական դիտավորություն, խեղաթյուրելով ապագայի վերաբերյալ փաստերը` Օհանիկ Շավիշյանին փաստաբանի միջոցով ՀՀ ԱՆ «Նուբարաշեն» ՔԿՀ-ից ազատ արձակելու պատրվակով, նշված հարցի շուրջ որևէ գործողություն չկատարելով, 2015թ.-ի վերջերից մինչև 2016թ.-ի սկզբներն ընկած ժամանակահատվածում, Երևան քաղաքի Աբովյան 3 հասցեում գործող «Հայէկոնոմբանկ» ՓԲԸ-ից մոր` Նունե Կոստյայի Գևորգյանի միջոցով ստացել և Օհանիկ Ավադիսի Շավիշյանի վստահությունը չարաշահելու եղանակով հափշտակել է զգալի չափերի` 465.790 ՀՀ դրամ գումարին համարժեք 1.000 ԱՄՆ դոլար գումար։

Բացի այդ, Վահե Արթուրի Միքայելյանը, նույն եղանակով՝ խարդախությամբ, զգալի չափերի` ընդհանուր 200 ԱՄՆ դոլար գումար հափշտակելու նախնական դիտավորությամբ իրականությունը խեղաթյուրելով` 2015թ.-ի վերջերից մինչև 2016 թ.-ի սկզբներն ընկած ժամանակահատվածում, ձեռքի համրիչներ /թզբեխ/ գնելու և դրանք ՀՀ ԱՆ «Նուբարաշեն» ՔԿՀ-ում վերավաճառելու պատրվակով, նշված հարցի շուրջ որևէ գործողություն չկատարելով, Երևան քաղաքի Աբովյան 3 հասցեում գործող «Հայէկոնոմբանկ» ՓԲԸ-ից մոր` Նունե Կոստյայի Գևորգյանի միջոցով ստացել և Օհանիկ Ավադիսի Շավիշյանի վստահությունը չարաշահելու եղանակով հափշտակել է զգալի չափերի` 93.958 ՀՀ դրամ գումարին համարժեք 200 ԱՄՆ դոլար գումար»։

Փաստի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի կողմից 2016 թվականի նոյեմբերի 07-ին հարուցվել է քրեական գործ։

16.02.2017թ. ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի կողմից որոշում է կայացվել` Վահե Արթուրի Միքայելյանին որպես մեղադրյալ ներգրավելու մասին և նրան մեղադրանք է առաջադրվել 2 դրվագներով՝ ՀՀ քրեական օրենսգրքի 178-րդ հոդվածի 1-ին մասով։

Քրեական գործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան է ստացվել և մուտքագրվել 21.03.2017թ.-ին, որը 22.03.2016թ.-ին ընդունվել է դատարանի վարույթ։

Գործի դատական քննության նախապատրաստական մասում տուժող Օհանիկ Ավադիսի Շավիշյանը դատարանին հայտարարել է, որ հաշտվում է ամբաստանյալ Վահե Արթուրի Միքայելյանի հետ և որևէ բողոք չունի նրա դեմ, քանի որ իրեն տրված գրավոր պարտավորագրով վերջինս պարտավորվել է որոշակի ժամանակահատվածում, մաս-մաս, վերադարձնել իրենից հափշտակված գումարը։

Ամբաստանյալ Վահե Արթուրի Միքայելյանը դատարանում նույնպես հայտարարել է, որ հաշտվել է տուժողի հետ և դեմ չէ, որպեսզի դադարեցվի իր նկատմամբ հարուցված քրեական հետապնդումը։ Ավելին, ամբաստանյալը դատարանում տուժողին է հանձնել գրավոր պարտավորագիր, համաձայն որի՝ «Ես՝ Վահե Արթուրի Միքայելյանս, պարտավորվում են 11 տասնմեկ ամսվա ընթացքում թիվ ԵԿԴ /0068/01/17 քրեական գործով տուժող Օհանիկ Ավադիսի Շավիշյանին վերադարձնել նրանից հափշտակված՝ հինգհարյուր հիսունինը հազար յոթ հարյուր քառասունութ /559.748/ ՀՀ դրամը, որի համար ստորագրում եմ»։

Նշված փաստից ելնելով, մեղադրող Վ.Ասատրյանը հայտարարել է, որ ամբաստանյալին մեղսագրված արարքը մասնավոր մեղադրանքի է, իսկ դատավարության ընթացքում պարզ է դարձել, որ ամբաստանյալը և տուժողը հաշտվել են, ուստի գտնում է, որ առկա են օրենքով սահմանված հիմքեր՝ քրեական գործի վարույթը կարճելու համար՝ տուժողի հետ հաշտության հիմքով։

Դատարանը, խորհրդակցական սենյակում ուսումնասիրելով քրեական գործի նյութերը և վերլուծելով դատավարության մասնակիցների դիրքորոշումը, հանգում է այն հետևության, որ Վահե Արթուրի Միքայելյանի նկատմամբ` երկու դրվագներով` ՀՀ քրեական օրենսգրքի 178-րդ հոդվածի 1-ին մասով` տուժող Օհանիկ Ավադիսի Շավիշյանի` զգալի չափերի գույքը ենթադրաբար խարդախությամբ հափշտակելու վերաբերյալ հարուցված քրեական հետապնդումը ենթակա է դադարեցման, իսկ քրեական գործի վարույթը՝ կարճման, հետևյալ պատճառաբանությամբ.

Համաձայն ՀՀ քրեական դատավարության օրենսգրքի 183-րդ հոդվածի 1-ին մասի`

«ՀՀ քրեական օրենսգրքի (…) 178-րդ հոդվածի 1-ին մասով (…) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է միչև դատավճիռ կայացնելու համար դատարանի խորդակցական սենյակ հեռանալը»։

Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի`

« Քրեական գործ չի կարող հարուցվել և, իսկ հարուցված քրեական գործի վարույթը ենթակա է կարճման, եթե.

(…)

« 5. սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։

Դատարանում հաստատված համարվեց այն հանգամանքը, որ ամբաստանյալին մեղսագրված են արարքներ, որոնք նախատեսված են երկու դրվագներով` ՀՀ քրեական օրենսգրքի 178-րդ հոդվածի 1-ին մասով։

Դատարանն արձանագրում է, որ տուժող Օհանիկ Ավադիսի Շավիշյանի, ինչպես նաև ամբաստանյալ Վահե Արթուրի Միքայելյանի կողմից ներկայացված հայտարարություններով և դիրքորոշումներով հիմնավորվեց, որ տուժողն իր` զգալի չափերով գույքը խարդախությամբ հափշտակելու վերաբերյալ ենթադրաբար կատարված հանցավոր ոտնձգության առումով հաշտվել է ամբաստանյալի հետ, իսկ վերջինս` նրա հետ։

Այսպիսով, դատարանը գտնում է, որ առկա են իրավական հիմքեր սույն քրեական գործով ամբաստանյալի նկատմամբ նախաքննական մարմնի կողմից հարուցված` երկու դրվագներով` ՀՀ քրեական օրենսգրքի 178-րդ հոդվածի 1-ին մասով, տուժող Օհանիկ Ավադիսի Շավիշյանի` զգալի չափերի գույքը ենթադրաբար խարդախությամբ հափշտակելու առնչությամբ քրեական հետապնդումը դադարեցնելու և քրեական գործի վարույթը կարճելու համար` դատարանի վերը նշված պատճառաբանությամբ և հիմնավորումներով։

ՀՀ քրեական դատավարության օրենսգրքի 313-րդ հոդվածի 1-ին և 2-րդ մասերի համաձայն`

1. Այն բոլոր հարցերի առթիվ, որոնք լուծվում են դատարանի կողմից դատական քննության ժամանակ, դատարանը որոշումներ է կայացնում։

2. Գործը լրացուցիչ քննության ուղարկելու, կարճելու կամ կասեցնելու, խափանման միջոցը փոխելու կամ վերացնելու, բացարկների, փորձաքննություն նշանակելու մասին որոշումները դատարանը կայացնում է խորհրդակցական սենյակում և դրանք պետք է շարադրված լինեն առանձին փաստաթղթերի ձևով` ստորագրված դատարանի ամբողջ կազմի կողմից։

Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ և 313-րդ հոդվածներով, դատարանը


Ո Ր Ո Շ Ե Ց

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննվող ԵԿԴ/0068/01/17 քրեական գործով ամբաստանյալ Վահե Արթուրի Միքայելյանի նկատմամբ՝ երկու դրվագներով՝ ՀՀ քրեական օրենսգրքի 178-րդ հոդվածի 1-ին մասով, հարուցված քրեական հետապնդումը դադարեցնել և քրեական գործի վարույթը կարճել` տուժող Օհանիկ Ավադիսի Շավիշյանի կողմից վերջինիս հետ հաշտվելու հիմքով։

Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո` մեկամսյա ժամկետում։




Դ Ա Տ Ա Վ Ո Ր Մ. Մ Ա Կ Յ Ա Ն