ԵԿԴ/0032/01/17

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ
ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ

,,08,, սեպտեմբերի 2017թ. ք. Երևան

Նախագահությամբ դատավոր Մ. Մակյանի
Քարտուղարությամբ` Թ. Խաչատրյանի
Մասնակցությամբ `
Մեղադրող Ռ. Մանուկյանի
Տուժող Է. Մալխասյանի
Տուժողի օրինական ներկայացուցիչ Վ. Մալխասյանի



Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը` նախագահությամբ դատավոր Մ.Մակյանի, խորհրդակցական սենյակում, քննության առնելով թիվ ԵԿԴ/0032/01/17 քրեական գործի նյութերն ըստ մեղադրանքի`

Գևորգ Մուկուչի Այվազյանի` ծնված 30.03.1988թ.
Երևան քաղաքում, ազգությամբ հայ, ՀՀ քաղաքացի,
միջնակարգ կրթությամբ, չամուսնացած, խնամքին ոչ
ոք, նախկինում դատապարտված,
հաշվառված` ք.Երևան, Սարի Թաղի 18-րդ փողոցի
46-րդ տանը, մեղադրվում է ՀՀ քրեական օրենսգրքի
178-րդ հոդվածի1-ին մասով։

Պ Ա Ր Զ Ե Ց

Ըստ նախաքննական մարմնի կողմից դատարան ներկայացրած նյութերի`
«Գևորգ Մուկուչի Այվազյանը մեղադրվում է այն բանի համար, որ նա 2016թ.-ի նոյեմբերի 23-ին Երևան քաղաքի Գրիգոր Լուսավորիչ փողոցում գտնվող «Անգլիական» կոչվող պուրակում ծանոթանալով անչափահաս Էռնեստ Մալխասյանի հետ, միասին այցելել են Խանջյան 7 հասցեում գործող «Ժեմչուգ» բար, որտեղ, չարաշահելով Էռնեստ Մալխասյանի վստահությունը, վերջինիս հեռախոսով խոսելու պատրվակով վերցրել է նրան պատկանող զգալի չափի՝ 485.000 ՀՀ դրամ արժողության «Այֆոն 7» տեսակի բջջային հեռախոսը և հեռացել՝ այդ կերպ խարդախությամբ հափշտակելով այն»։
Դեպքի առթիվ ՀՀ ոստիկանության Կենտրոնական բաժնի կողմից 2016 թվականի դեկտեմբերի 01-ին հարուցվել է քրեական գործը։
07.02.2017թ. ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի կողմից որոշում է կայացվել Գևորգ Մուկուչի Այվազյանին որպես մեղադրյալ ներգրավելու մասին և նրան մեղադրանք է առաջադրվել ՀՀ քրեական օրենսգրքի 178-րդ հոդվածի 1-ին մասով։
Վերջինիս նկատմամբ որպես խափանման միջոց ընտրվել է չհեռանալու մասին ստորագրությունը։
Քրեական գործը մեղադրական եզրակացությամբ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի աշխատակազմի գրասենյակ է ստացվել 16.02.2017թ.-ին, որը 17.02.2017թ-ին ընդունվել է դատարանի վարույթ։
17.05.2017թ.-ին Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից կայացվել է որոշում` ամբաստանյալ Գ.Այվազյանի նկատմամբ որպես խափանման միջոց ընտրված չհեռանալու մասին ստորագրությունը կալանավորմամբ փոխելու վերաբերյալ։
Գործի դատական քննության ընթացքում տուժող Է.Մալխասյանը և տուժողի օրինական ներկայացուցիչ Վ.Մալխասյանը դատարանին հայտարարել են, որ հաշտվում են ամբաստանյալ Գևորգ Մուկուչի Այվազյանի հետ, սակայն ցանկանում են, որպեսզի վերջինս նման վերաբերմունքի համար շնորհակալ լինի իրենցից։
Ամբաստանյալ Գևորգ Մուկուչի Այվազյանը տուժողին և տուժողի օրինական ներկայացուցչին հայտնելով իր շնորհակալությունը, դատարանում հայտարարել է, որ ցանկանում է հաշտվել է նրանց հետ, պատրաստ է հատուցել պատճառած վնասը և դեմ չէ, որպեսզի կողմերի` հաշտության հիմքով դադարեցվի իր նկատմամբ հարուցված քրեական հետապնդումը։
Գործով մեղադրող Ռ.Մանուկյանը չի առարկել ամբաստանյալի, տուժողի և տուժողի օրինական ներկայացուցչի կողմից ներկայացված միջնորդությունների դեմ, հայտարարելով, որ գործը մասնավոր մեղադրանքի է և կան օրենքով սահմանված հիմքեր՝ համապատասխան որոշում կայացնելու համար։
Դատարանը, խորհրդակցական սենյակում ուսումնասիրելով քրեական գործի նյութերը և վերլուծելով դատավարության մասնակիցների դիրքորոշումը, հանգում է այն հետևության, որ Գևորգ Մուկուչի Այվազյանի նկատմամբ` ՀՀ քրեական օրենսգրքի 178-րդ հոդվածի 1-ին մասով` տուժող Էռնեստ Մալխասյանի զգալի չափերի գույքը ենթադրաբար խարդախությամբ հափշտակելու վերաբերյալ հարուցված քրեական հետապնդումը ենթակա է դադարեցման, իսկ քրեական գործի վարույթը՝ կարճման, հետևյալ պատճառաբանությամբ.
Համաձայն ՀՀ քրեական դատավարության օրենսգրքի 183-րդ հոդվածի 1-ին մասի`
«ՀՀ քրեական օրենսգրքի /…/ 178-րդ հոդվածի 1-ին մասով /.../ նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է միչև դատավճիռ կայացնելու համար դատարանի խորդակցական սենյակ հեռանալը»։
Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի`
«Քրեական գործ չի կարող հարուցվել և, իսկ հարուցված քրեական գործի վարույթը ենթակա է կարճման, եթե. /.../
« 5. սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։
Դատարանում հաստատված համարվեց այն հանգամանքը, որ ամբաստանյալին մեղսագրված է արարք, որը նախատեսված է ՀՀ քրեական օրենսգրքի 178-րդ հոդվածի 1-ին մասով։
Դատարանն արձանագրում է, որ տուժող Է.Մալխասյանի և նրա օրինական ներկայացուցչի, ինչպես նաև ամբաստանյալ Գ.Այվազյանի կողմից ներկայացված հայտարարություններով և դիրքորոշումներով հիմնավորվեց, որ անչափահաս տուժողն ու տուժողի օրինական ներկայացուցիչն տուժողին պատկանող` զգալի չափերով, գույքը խարդախությամբ հափշտակելու վերաբերյալ ենթադրաբար կատարված հանցավոր ոտնձգության առումով հաշտվել են ամբաստանյալի հետ, իսկ վերջինս` նրանց հետ։
Այսպիսով, դատարանը գտնում է, որ առկա են իրավական հիմքեր՝ սույն քրեական գործով ամբաստանյալի նկատմամբ նախաքննական մարմնի կողմից հարուցված` ՀՀ քրեական օրենսգրքի 178-րդ հոդվածի 1-ին մասով, տուժող Էռնեստ Մալխասյանի զգալի չափերի գույքը ենթադրաբար խարդախությամբ հափշտակելու առնչությամբ քրեական հետապնդումը դադարեցնելու և քրեական գործի վարույթը կարճելու համար` դատարանի վերը նշված պատճառաբանությամբ և հիմնավորումներով։
ՀՀ քրեական դատավարության օրենսգրքի 313-րդ հոդվածի 1-ին և 2-րդ մասերի համաձայն`
1. Այն բոլոր հարցերի առթիվ, որոնք լուծվում են դատարանի կողմից դատական քննության ժամանակ, դատարանը որոշումներ է կայացնում։

2. Գործը լրացուցիչ քննության ուղարկելու, կարճելու կամ կասեցնելու, խափանման միջոցը փոխելու կամ վերացնելու, բացարկների, փորձաքննություն նշանակելու մասին որոշումները դատարանը կայացնում է խորհրդակցական սենյակում և դրանք պետք է շարադրված լինեն առանձին փաստաթղթերի ձևով` ստորագրված դատարանի ամբողջ կազմի կողմից։

Դատարանը գտնում է, որ Գևորգ Մուկուչի Այվազյանի՝ վարույթը կարճելու պայմաններում նրա նկատմամբ որպես խափանման միջոց ընտրված կալանավորումը պետք է վերացվի։

Քննվող քրեական գործով տուժող Է.Մալխասյանի օրինական ներկայացուցիչ Վ.Մալխասյանը դատարանին են ներկայացրել հայցադիմում՝ հանցագործությամբ պատճառված վնասի փոխհատուցման պահանջի մասին, որով խնդրել է պատասխանող, սույն գործով ամբաստանյալ Գ.Այվազյանից հօգուտ իրենց բռնագանձել 485.000 /չորս հարյուր ութսունհինգ հազար/ ՀՀ դրամ՝ որպես հանցագործությամբ պատճառված վնասի հատուցում։
Այնուհետև, տուժողի օրինական ներկայացուցիչ, քաղաքացիական հայցվոր Վ.Մալխասյանը, դիմելով դատարանին հայտարարել է, որ ամբաստանյալի նկատմամբ վնասի հատուցման պահանջ չունի։
Նման պարագայում դատարանը գտնում է, որ տուժող Էռնեստ Վիլլիի Մալխասյանի օրիանական ներկայացուցիչ Վիլլի Ռուդոլֆի Մալխասյանի կողմից ամբաստանյալ Գևորգ Մուկուչի Այվազյանի դեմ ներկայացված քաղաքացիական հայցը պետք է թողնել առանց քննության՝ նրան պարզաբանելով հետագայում, քաղաքացիական դատավարության կարգով քաղաքացիական հայց ներկայացնելու նրա իրավունքը։
Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ և 313-րդ հոդվածներով, դատարանը՝

Ո Ր Ո Շ Ե Ց
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննվող ԵԿԴ/0032/01/17 քրեական գործով, ամբաստանյալ Գևորգ Մուկուչի Այվազյանի նկատմամբ՝ ՀՀ քրեական օրենսգրքի 178-րդ հոդվածի 1-ին մասով հարուցված քրեական հետապնդումը դադարեցնել և քրեական գործի վարույթը կարճել` անչափահաս տուժող Էռնեստ Վիլլիի Մալխասյանի և նրա օրինական ներկայացուցիչ Վիլլի Ռուդոլֆի Մալխասյանի կողմից ամբաստանյալի հետ հաշտվելու հիմքով։
Ամբաստանյալ Գևորգ Մուկուչի Այվազյանի նկատմամբ ընտրված խափանման միջոցը՝ կալանավորումը, վերացնել և նրան անհապաղ ազատ արձակել դատական նիստերի դահլիճում։
Անչափահաս տուժող Էռնեստ Վիլլիի Մալխասյանի օրինական ներկայացուցիչ Վիլլի Ռուդոլֆի Մալխասյանի կողմից ամբաստանյալ Գևորգ Մուկուչի Այվազյանի դեմ ներկայացված քաղաքացիական հայցը թողնել առանց քննության՝ նրան պարզաբանելով հետագայում՝ քաղաքացիական դատավարության կարգով, քաղաքացիական հայց ներկայացնելու նրան իրավունքը։
Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո` մեկամսյա ժամկետում։


Դ Ա Տ Ա Վ Ո Ր Մ. Մ Ա Կ Յ Ա Ն