Դ Ա Տ Ա Վ Ճ Ի Ռ
ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

քրեական գործ ԵԿԴ/0022/01/17

Երևան քաղաքի ընդհանուր իրավասության դատարանը,

նախագահությամբ` դատավոր Մ. Մարտիրոսյանի,
քարտուղարությամբ` Ա. Գեղամյանի,
Ա. Հովհաննիսյանի,
Թ. Խաչատրյանի,
մասնակցությամբ`

մեղադրող՝
/Հայաստանի Հանրապետության
/այսուհետ նաև ՀՀ/ գլխավոր
դատախազության՝ հասարակական
անվտանգության դեմ ուղղված
հանցագործությունների քննության
նկատմամբ հսկողության վարչության
դատախազ/ Գ. Հովակիմյանի,


պաշտպաններ՝ Ռ. Սիրեկանյանի,
Թ. Բաղդասարյանի,
Ա. Խաչատրյանի,
Ա. Մելքոնյանի,
Կ. Մեժլումյանի,

2018թ. դեկտեմբերի 18-ին Երևանում,

դռնբաց դատական նիստում, քննելով քրեական գործն ըստ մեղադրանքի

Արմեն Հրաչիկի Մարտիրոսյանի՝
/ծնված 1977թ. փետրվարի 25-ին Երևան քաղաքում, հայ, ՀՀ քաղաքացի, միջնակարգ կրթությամբ, ամուսնացած՝ խնամիքին մինչև 14 տարեկան 1 երեխա, դատվածություն չունի, հաշվառված է Երևան քաղաքի Գյուլբեկյան փողոցի թիվ 42/47 հասցեում, բնակվել է Երևան քաղաքի Ա. Միկոյան թիվ 2/2 շենքի թիվ 109 բնակարանում, անազատության մեջ է 2016թ. փետրվարի 23-ից, մեղադրվում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով, 34-266-րդ հոդվածի 3-րդ մասի 2-րդ կետով և 268-րդ հոդվածի 1-ին մասով/

Մոհսեն Խալիլի Սալմանի Ղարիչեհի՝
MOHSEN KHALIL SALMANI GHARICHEH
/ծնված 1986թ. հուլիսի 13-ին Իրանի Իսլամական Հանրապետության /այսուհետ՝ նաև ԻԻՀ/ Թավրիզ քաղաքում, պարսիկ, ԻԻՀ քաղաքացի, ութամյա կրթությամբ, ամուրի, ըստ իր հայտարարության՝ զբաղվում է գորգերի առուվաճառքով, ՀՀ-ում չդատված, հաշվառված է Թավրիզ քաղաքում, բնակվել է Երևան քաղաքի Հ. Քոչար թիվ 6 հասցեում գտնվող «Բելլա» հյուրանոցային համալիրի թիվ 7 սենյակում, անազատության մեջ է 2016թ. փետրվարի 23-ից, մեղադրվում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 267.1-րդ հոդվածի 4-րդ մասի 1-ին կետով/

Արտուշ Էդուարդի Այվազյանի՝
/ծնված 1984թ. սեպտեմբերի 12-ին Երևան քաղաքում, հայ, ՀՀ քաղաքացի, միջնակարգ կրթությամբ, ամուսնացած՝ խնամքին մինչև 14 տարեկան մեկ երեխա, վատառողջ է, չի աշխատում, չդատված, հաշվառված է և բնակվել է Երևան քաղաքի Թոթովենց փողոցի թիվ 6/1 շենքի թիվ 46 բնակարանում, անազատության մեջ է 2016թ. փետրվարի 23-ից, մեղադրվում է ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով/

Գործի դատավարական նախապատմությունը

Թիվ 10110116 քրեական գործը ՀՀ քննչական կոմիտեի Երևան քաղաքի քննչական վարչության Երևան քաղաքի Աջափնյակ և Դավթաշեն վարչական շրջանների քննչական բաժնում, ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 268-րդ հոդվածի 3-րդ մասով, հարուցվել և վարույթ է ընդունվել 2016թ. փետրվարի 22-ին։
Նախաքննության մարմնի 2016թ. փետրվարի 25-ի որոշմամբ Արմեն Հրաչիկի Մարտիրոսյանը ՀՀ քրեական օրենսգրքի 266-րդ հոդվածի 3-րդ մասի 2-րդ կետով ներգրավվել է որպես մեղադրյալ և նրա նկատմամբ Երևան քաղաքի Աջափնյակ և Դավթաշեն վարչական շրջանների ընդհանուր իրավասության դատարանի (այսուհետ՝ նաև Դատարան) նույն օրվա որոշմամբ որպես խափանման միջոց ընտրվել է կալանավորումը։
Նախաքննության մարմնի 2017թ. հունվարի 19-ի որոշմամբ, Արմեն Հրաչիկի Մարտիրոսյանին ՀՀ քրեական օրենսգրքի 266-րդ հոդվածի 3-րդ մասի 2-րդ կետով առաջադրված մեղադրանքը փոփոխվել, լրացվել և նրան կրկին մեղադրանք է առաջադրվել ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով, 266-րդ հոդվածի 3-րդ մասի 2-րդ կետով և 268-րդ հոդվածի 2-րդ մասի 2-րդ կետով հետևյալ արարքների համար, որ նա. «(Դրվագ 1) 2016 թվականի փետրվարի 12-ին Արտուշ Էդուարդի Այվազյանից տեղեկանալով, որ վերջինիս ծանոթ, ԻԻՀ քաղաքացի Մոհսեն Խալիլի Սալմանի Ղալիչեն Իրանում կարող է ձեռք բերել առանձնապես խոշոր չափերով «մետամֆետամին» տեսակի թմրամիջոց և այն անձնական պատասխանատվությամբ տեղափոխել ՀՀ, ձեռք է բերել նախնական համաձայնություն Արտուշ Այվազյանի հետ՝ նշված թմրամիջոցները ՀՀ-ում ապօրինի իրացնելու նպատակով ձեռք բերելու և դրա դիմաց վճարելու շուրջ, որից հետո քննությամբ չպարզված եղանակով և անձից Մ. Սալմանի Ղալիչեհն ձեռք է բերել առանձնապես խոշոր չափերով` 233,432 գրամ ընդհանուր քաշով, «մետամֆետամին» տեսակի թմրամիջոցը, այն 23.02.2016թ. տեղափոխել է ՀՀ ու 2016 թվականի փետրվարի 23-ին ժամը 19.30-ի սահմաններում, Երևան քաղաքի Տիգրան Մեծ փողոցի 31 շենքի մոտ հանդիպել է Արտուշ Այվազյանին և փորձել է ավարտին հասցնել ծրագրած հանրորեն վտանգավոր արարքը` 233,432 գրամ ընդհանուր քաշով «մետամֆետամին» տեսակի թմրամիջոցն իրացնելը, ինչը չի հաջողվել իրենց կամքից անկախ հանգամանքներում, քանի որ հանցագործությունը բացահայտվել է ՀՀ ոստիկանության աշխատակիցների կողմից։
Բացի այդ (Դրվագ 2), Արմեն Մարտիրոսյանը, գործով չպարզված անձից, ժամանակահատվածում և հանգամանքներում, նունպես իրացնելու նպատակով, ապօրինի ձեռք է բերել առանձնապես խոշոր չափերով` 4,592 գրամ քաշով, «մետամֆետամին» տեսակի թմրամիջոց, որը 2016 թվականի փետրվարի 22-ին՝ ժամը 14։30-ի սահմաններում, այդ ժամանակ ՀՀ ԱՆ «Հրազդան» ՔԿՀ դատապարտյալ Զոհրաբ Վահանի Ստեփանյանին իրացնելու նպատակով, Երևան քաղաքի Դավիթաշեն թաղամասի Տ. Պետրոսյան փողոցի սկզբնամասում, իր կողմից վարվող «Աուդի Ա4» մակնիշի 41 DՏ 111 հաշվառման համարանիշի ավտոմեքենայի մեջ, 770.000 ՀՀ դրամով իրացրել է Աշոտ Արայի Ադամյանին, ինչը հայտնաբերվել է նույն օրը վերջինիս անձնական խուզարկությամբ։
Այնուհետև (Դրվագ 3), Արմեն Մարտիրոսյանը 2016 թվականի փետրվարի 23-ին ՀՀ ոստիկանության ԿՀԴՊԳՎ աշխատակիցների կողմից Հրանտ Սարգսյանի և Վաղարշ Մարտիրոսյանի հետ, վերջինիս վարած «Քեմրի» մակնիշի 20 PP 009 հաշվառման համարանիշի ավտոմեքենայով բերման են ենթարկվել և 26.02.2016թ. ավտոմեքենայի խուզարկությամբ հայտնաբերվել է Արմեն Մարտիրոսյանի «Նոկիա» մոդելի բջջային հեռախոսը, իսկ դրանում` խոշոր չափերով` 0,0638 գրամ քաշով, քննությամբ չպարզված հանգամանքներում, առանց իրացնելու նպատակի ապօրինի ձեռք բերված և պահվող «մետամֆետամին» տեսակի թմրամիջոց։»։
Նախաքննության մարմնի 2016թ. փետրվարի 26-ի որոշմամբ Մոհսեն Խալիլի Սալմանի Ղարիչեհին ՀՀ քրեական օրենսգրքի 266-րդ հոդվածի 3-րդ մասի 2-րդ կետով ներգրավվել է որպես մեղադրյալ և նրա նկատմամբ Դատարանի նույն օրվա որոշմամբ որպես խափանման միջոց ընտրվել է կալանավորումը։
Նախաքննության մարմնի 2017թ. հունվարի 20-ի որոշմամբ, Մոհսեն Խալիլի Սալմանի Ղարիչեհիին ՀՀ քրեական օրենսգրքի 266-րդ հոդվածի 3-րդ մասի 2-րդ կետով առաջադրված մեղադրանքը փոփոխվել, լրացվել և նրան կրկին մեղադրանք է առաջադրվել ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 267.1-րդ հոդվածի 4-րդ մասի 1-ին կետով հետևյալ արարքների համար, որ նա. «Իրանի Իսլամական Հանրապետությունում ունենալով մեծ քանակությամբ «մետամֆետամին» տեսակի թմրամիջոց ձեռք բերելու հնարավորություն և շահադիտական դրդումներից ելնելով` նպատակ ունենալով զբաղվել ՀՀ-ում թմրամիջոցները թանկ գներով իրացնելու շահավետ հանցավոր գործունեությամբ, նշված հնարավորության մասին 2016 թվականի փետրվար ամսին հայտնել է ՀՀ-ում իր ծանոթ Արտուշ Էդուարդի Այվազյանին, առաջարկել ձեռք բերել թմրամիջոցը Երևան քաղաքում և ստացել է վերջինիս և նրա ծանոթի` «Քաչալ» մականունով Արմեն Հրաչյայի Մարտիրոսյանի համաձայնությունը, ովքեր պարտավորվել են վճարել թմրամիջոցի արժեքը և ընդունել այն Երևան քաղաքում` ՀՀ-ում այն ապօրինի իրացնելու նպատակով։
Այսպես.
Արտուշ Այվազյանը, իր ծանոթ ԻԻՀ քաղաքացի Մոհսեն Սալմանի Ղարիչեհից տեղեկանալով, որ վերջինս ԻԻՀ-ում հնարավորություն ունի ձեռք բերել մեծ քանակությամբ թմրամիջոցներ և անձնական պատասխանատվությամբ տեղափոխել դրանք ՀՀ, 12.02.2016թ. Արմեն Մարտիրոսյանի հետ ձեռք է բերել նախնական համաձայնություն` ՀՀ-ում թմրամիջոցներն ապօրինի իրացնելու նպատակով դրանք ընդունելու և դրա ձեռք բերման համար անհրաժեշտ գումարը Մոհսեն Սալմանի Ղարիչեհին փոխանցելու շուրջ, որի համար 17.02.2016-20.02.2016թ.թ. ժամանակահատվածում գործով չպարզված եղանակով ՀՀ-ից ԻԻՀ` Մոհսեն Սալմանի Ղալիչեհին են փոխանցել 1000 ԱՄՆ դոլար գումար` որպես թմրամիջոցի ձեռք բերման կանխավճար։ Այնուհետև, Մ. Սալմանի Ղարիչեհը ԻԻՀ-ում քննությամբ չպարզված անձից և հանգամանքներում ձեռք է բերել առանձնապես խոշոր չափերով` 233,432 գրամ ընդհանուր քաշով, «մետամֆետամին» տեսակի թմրամիջոցը, որից հետո` 23.02.2016թ. ժամանել է հայ-իրանական սահման և ժամը 05։20-ին մաքսանենգությամբ՝ մաքսային հսկողությունից թաքցնելու եղանակով, թմրամիջոցը տեղափոխել է Հայաստանի Հանրապետության մաքսային սահմանով և հասցրել Երևանի Ե. Քոչար 6 հասցեում գործող «Բելլա» հյուրանոցային համալիրի թիվ 7 սենյակ։ «Մետամֆետամինե տեսակի թմրամիջոցի 233,432 գրամ ընդհանուր խմբաքանակից 118,275 գրամ քաշով մասը Մոհսեն Սալմանի Ղարիչեհը պահել է «Բելլաե հյուրանոցային համալիրի թիվ 7 սենյակում՝ իր հետ ՀՀ ժամանած ընկերոջ՝ Վահիդ Աքբարիի, բաճկոնի գրպանում՝ առանց վերջինիս գիտության, 2,453 գրամ քաշով մասը՝ նույն հյուրանոցային սենյակում գտնվող՝ «Kent» ծխախոտի տուփի մեջ, 110,657 գրամ քաշով մասը` իր ներքնազգեստի մեջ, իսկ 2,047 գրամ քաշով մասը՝ 2016 թվականի փետրվարի 23-ին ժամը 19.30-ի սահմաններում, Երևան քաղաքի Տիգրան Մեծ փողոցի 31 շենքի մոտ Արտուշ Այվազյանի կողմից վարվող «Մերսեդես» մակնիշի 20SO840 հաշվառման համարանիշի ավտոմեքենայում փորձել է փոխանցել վեջինիս` ընդհանուր խմբաքանակը չկարողանալով փոխանցել նրան իր կամքից անկախ հանգամանքներում, քանի որ բերման է ենթարկվել ոստիկանության աշխատակիցների կողմից։»։
Նախաքննության մարմնի 2016թ. փետրվարի 26-ի որոշմամբ Արտուշ Էդուարդի Այվազյանը ՀՀ քրեական օրենսգրքի 268-րդ հոդվածի 3-րդ մասով ներգրավվել է որպես մեղադրյալ և նրա նկատմամբ Դատարանի նույն օրվա որոշմամբ որպես խափանման միջոց ընտրվել է կալանավորումը։
Նախաքննության մարմնի 2017թ. հունվարի 20-ի որոշմամբ, Արտուշ Էդուարդի Այվազյանին ՀՀ քրեական օրենսգրքի 268-րդ հոդվածի 3-րդ մասով առաջադրված մեղադրանքը փոփոխվել, լրացվել և նրան կրկին մեղադրանք է առաջադրվել ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով հետևյալ արարքի համար, որ նա. «2016 թվականի փետրվար ամսին իր ծանոթից՝ ԻԻՀ քաղաքացի Մոհսեն Խալիլի Սալմանի Ղարիչեհից, տեղեկանալով, որ վերջինս ԻԻՀ-ում հնարավորություն ունի ձեռք բերել մեծ քանակությամբ թմրամիջոցներ և անձնական պատասխանատվությամբ տեղափոխել դրանք ՀՀ, 12.02.2016թ. Արմեն Մարտիրոսյանի հետ ձեռք է բերել նախնական համաձայնություն՝ ՀՀ-ում թմրամիջոցներն ապօրինի իրացնելու նպատակով դրանք ընդունելու և դրա ձեռք բերման համար անհրաժեշտ գումարը Մոհսեն Սալմանի Ղարիչեհին փոխանցելու շուրջ, որի համար 17.02.2016-20.02.2016թ.թ. ժամանակահատվածում գործով չպարզված եղանակով ՀՀ-ից ԻԻՀ՝ Մոհսեն Սալմանի Ղարիչեհին են փոխանցել 1000 ԱՄՆ դոլար գումար՝ որպես թմրամիջոցի ձեռք բերման կանխավճար։ Այնուհետև, Մ. Սալմանի Ղարիչեհը, ԻԻՀ-ում քննությամբ չպարզված անձից և հանգամանքներում, ձեռք է բերել առանձնապես խոշոր չափերով՝ 233,432 գրամ ընդհանուր քաշով, «մետամֆետամին» տեսակի թմրամիջոցը և մաքսանենգությամբ՝ մաքսային հսկողությունից թաքցնելով, դրանք տեղափոխել ՀՀ, որից հետո 2016 թվականի փետրվարի 23-ին ժամը 19.30-ի սահմաններում, Երևան քաղաքի Տիգրան Մեծ փողոցի 31 շենքի մոտ՝ Արտուշ Այվազյանի կողմից վարվող «Մերսեդես» մակնիշի 20SO840 հաշվառման համարանիշի ավտոմեքենայում, փորձել է փոխանցել վեջինիս՝ ընդհանուր խմբաքանակը չկարողանալով փոխանցել իր կամքից անկախ հանգամանքներում, քանի որ բերման է ենթարկվել ոստիկանության աշխատակիցների կողմից։»։
Նախաքննության մարմնի 2017թ հունվարի 20-ի որոշմամբ թիվ 10110116 քրեական գործից անջատվել է թիվ 58200917 քրեական գործը, որը 2017թ. փետրվարի 08-ին մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, 2017թ. փետրվարի 09-ին ընդունվել է դատարանի վարույթ, իսկ 2017թ. փետրվարի 21-ին որոշում է կայացվել քրեական գործի դատական քննությունը 2017թ. մարտի 03-ին նշանակելու մասին։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
Ամբաստանյալ Մոհսեն Խալիլի Սալմանի Ղարիչեհն ԻԻՀ-ում հնարավորություն ունենալով ձեռք բերել առանձնապես խոշոր չափի «մեթամֆետամին» տեսակի թմրամիջոց և նպատակ ունենալով այն իրացնելով ՀՀ-ում շահույթ ստանալ՝ այդ մասին հայտնել է Հայաստանում բնակվող իր ծանոթ, ամբաստանյալ Արտուշ Այվազյանին և առաջարկել է թմրամիջոցն իրենից ստանալ Հայաստանում։
Ամբաստանյալ Արմեն Մարտիրոսյանը 2016 թվականի փետրվարի 12-ին Արտուշ Այվազյանից տեղեկանալով, որ նրա ծանոթ, ԻԻՀ քաղաքացի Մոհսեն Խալիլի Սալմանի Ղարիչեհն ԻԻՀ-ում կարող է ձեռք բերել առանձնապես խոշոր չափերով «մեթամֆետամին» տեսակի թմրամիջոց և տեղափոխել ՀՀ՝ նախնական համաձայնություն է ձեռք բերել Արտուշ Այվազյանի հետ` ՀՀ-ում ապօրինի իրացնելու նպատակով թմրամիջոցներ ձեռք բերելու և դրա դիմաց վճարելու շուրջ։
Ամբաստանյալներ Արմեն Մարտիրոսյանը և Արտուշ Այվազյանը 2016թ. փետրվարի 17-ից 20-ը ներառյալ ժամանակահատվածում թմրամիջոցների ձեռք բերման համար որպես կանխավճար 1000 /մեկ հազար/ ԱՄՆ դոլար գումար են փոխանցել ԻԻՀ-ում այդ ժամանակ գտնվող Մոհսեն Խալիլի Սալմանի Ղարիչեհին։ Վերջինս այլ անձից ձեռք է բերել առանձնապես խոշոր չափերի` 233,432 գրամ քաշով «մեթամֆետամին» տեսակի թմրամիջոց, 2016թ. փետրվարի 23-ին այն տեղափոխել է ՀՀ և նույն օրը, ժամը 19։30-ի սահմաններում, Երևան քաղաքի Տիգրան Մեծ փողոցի թիվ 31 շենքի մոտ հանդիպելով Արտուշ Այվազյանին՝ փորձել է 233,432 գրամ քաշով «մեթամֆետամին» տեսակի թմրամիջոցն իրացնել նրան, սակայն դա նրան չի հաջողվել՝ նրանց կամքից անկախ հանգամանքներում, քանի որ հանցագործությունը բացահայտվել է ՀՀ ոստիկանության աշխատակիցների կողմից։
Բացի այդ, Արմեն Մարտիրոսյանը մեկ ուրիշ այլ անձից իրացնելու նպատակով, ապօրինի ձեռք է բերել առանձնապես խոշոր չափերով՝ 4,592 գրամ քաշով «մեթամֆետամին» տեսակի թմրամիջոց, որը 2016 թվականի փետրվարի 22-ի ժամը 14։30-ի սահմաններում, այլ անձի իրացնելու դիտավորությամբ, Երևան քաղաքի Դավիթաշեն թաղամասի Տ. Պետրոսյան փողոցի սկզբնամասում, իր կողմից վարած «Աուդի Ա4» մակնիշի 41 DՏ 111 հաշվառման համարանիշի /այսուհետ նաև հ/հ/ ավտոմեքենայում, 770.000 /յոթ հարյուր յոթանասուն հազար/ ՀՀ դրամ գումարով իրացրել է։
Բացի այդ, ամբաստանյալ Արմեն Մարտիրոսյանի «Նոկիա» մոդելի բջջային հեռախոսում հայտնաբերվել է զգալի չափերով` 0,0638 գրամ քաշով, առանց իրացնելու նպատակի ապօրինի ձեռք բերված և պահված «մեթամֆետամին» տեսակի թմրամիջոց։
Ամբաստանյալիներից յուրաքանչյուրի անձը բնութագրող տվյալների, պատասխանատվությունն ու պատիժը մեղմացնող և ծանրացնող հանգամանքների ուսումնասիրման արդյունքում պարզվել է, որ ամբաստանյալներ Արմեն Մարտիրոսյանի և Արտուշ Այվազյանի՝ յուրաքանչյուրի խնամքին առկա է մինչև տասնչորս տարեկան մեկ երեխա։

Ապացույցների հետազոտում և գնահատում

Դատարանի կողմից հաստատված հանգամանքները հիմնավորվում են հետևյալ ապացույցներով.
Վկա Արտավազդ Յաշայի Բաղդասարյանի ցուցմունքներով այն մասին, որ որպես տաքսու վարորդ աշխատել է «Միլենա» տաքսի ծառայությունում։ Վարել է «Վազ 21-07» մակնիշի 34SM185 հ/հ ավտոմեքենան։ Ճանաչել է իրենց շենքի բնակիչ Աշոտ Արայի Ադամյանին։ Նրա հետ 2016թ. փետրվարի 21-ի երեկոյան գնացել է Երևան քաղաքի Ֆուրմանով փողոցի վրա գտնվող՝ «Դիսլաբ» լաբորատորիայի մոտ, որտեղ նա հանդիպել է «Աուդի Ա4» մակնիշի 41 111 հ/հ ավտոմեքենայի վարորդի հետ։ Ճանապարհին լսել է Աշոտ Ադամյանի հեռախոսային խոսակցությունը, համաձայն որի նա պետք է 150.000 ՀՀ դրամ գումար տար այդ ավտոմեքենայի վարորդին։ Աշոտ Ադամյանը նստել է «Աուդի Ա4» մակինշի ավտոմեքենան և հինգ րոպե մնալուց հետո վերադարձել է, ինչից հետո իրենք միասին հեռացել են։ Հաջորդ օրը ժամը 14։00-ի սահմաններում Աշոտ Ադամյանը կրկին զանգահարել է իրեն և խնդրել գնալ Դավիթաշեն թաղամաս։ Գնացել է Ավան՝ Աշոտ Ադամյանին վերցնելու համար, միասին ուղևորվել են Դավիթաշեն կամրջից դեպի կլորակ չհասած հատված, որտեղ Աշոտ Ադամյանը կրկին հանդիպել է «Աուդի Ա4» մակնիշի ավտոմեքենայի վարորդին, 5-10 րոպե այդտեղ մնալուց հետո՝ վերադարձել է և խնդրել է գնալ Ավան, սակայն ճանապարհին նա հեռախոսազանգ է ստացել և իրեն հայտնել է, որ «Աուդի Ա4» մակինշի ավտոմեքենայի վարորդը բան է մոռացել, անհրաժեշտ է եկեղեցու մոտ նրան սպասել։ Եկեղեցու մոտ յոթ րոպե սպասելուց հետո «Աուդի Ա4» մակինշի ավտոմեքենայի վարորդը չի եկել, իրենց են մոտեցել ոստիկանները և բերման ենթարկել բաժին։ Ինքը չի իմացել, որ Աշոտ Ադամյանը թմրամիջոց է վերցնում, այլապես նրան չէր տեղափոխի, իսկ «Աուդի Ա4» մակինշի ավտոմեքենայի վարորդին չի տեսել ընդհանրապես։
/դատական նիստի արձանագրություն, հատոր 1, գ.թ. 44-45, հատոր 12, գ.թ. 13-14/
Վկա Վաղարշ Վահանի Մարտիրոսյանի ցուցմունքներով այն մասին, որ «Տոյոտա Քեմրի» մակնիշի 20PP009 հ/հ ավտոմեքենան պատկանել է իր եղբայր Արման Մարտիրոսյանին, սակայն գտնվել է իր մոտ։ Ավտոմեքենա վատ վարելու պատճառով ունեցել է վարորդ` Հրանտ Սարգսյանը։ Ճանաչել է Արմեն Մարտիրոսյանին, նա բնակվել է Երևանի Դավիթաշեն համայնքում և վարել է «Աուդի Ա4» մակնիշի 41 111 հ/հ ավտոմեքենա։ Արմեն Մարտիրոսյանի հետ ծանոթացել է ձայնային տեխնիկա գնելու ժամանակ, որից հետո մտերմացել են և ժամանակ առ ժամանակ հանդիպել։ 2016թ. փետրվարի 23-ի ժամը 22։30-ի սահմաններում իրեն է զանգահարել Արմեն Մարտիրոսյանը՝ հայտնելով, որ գտնվում է իրենց բակում գտնվող՝ «Ծղոտներ» հյուրանոցային համալիրում և քանի որ նրա ավտոմեքենան փչացել է՝ խնդրել է մոտենալ։ Իր վարորդ Հրանտ Սարգսյանի հետ, նշված ավտոմեքենայով գնացել են Արմեն Մարտիրոսյանի մոտ, հանդիպել են նրան, ով խնդրել է նրա «Աուդի Ա4» մակնիշի ավտոմեքենան կայանել իր ավտոտնակում և նրան տանել Նոր-Նորք։ Ավտոմեքենան կայանելուց հետո ինքը նստել է ղեկին, Արմեն Մարտիրոսյանը` կողքին, իսկ Հրանտ Սարգսյանը` հետևի նստատեղին։ Ուղևորվել են դեպի Նոր-Նորքի թիվ 2 զանգված, որտեղ Արմեն Մարտիրոսյանն ինչ-որ անձի է փնտրել, սակայն նրան չգտնելով` վերադարձել են դեպի կենտրոն։ Չարենց փողոցի վրա իրենց են մոտեցել ոստիկանները և բերման ենթարկել բաժին։
Արմեն Մարտիրոսյանն իր ներկայությամբ թմրամիջոցներ չի օգտագործել, ձեռք չի բերել և չի իրացրել, սակայն տեղյակ է, որ նա օգտագործել է «մեթամֆետամին» տեսակի թմրամիջոց։ Իր ավտոմեքենայի խուզարկությամբ հայտնաբերված և առգրավված «Նոկիա» մոդելի բջջային հեռախոսը և դրանում հայտնաբերված թմրամիջոցը պատկանել է Արմեն Մարտիրոսյանին։ Ինքը չի իմացել, որ Արմեն Մարտիրոսյանն իր ավտոմեքենա նստելու ժամանակ թմրամիջոցներ է ունեցել մոտը։
/դատական նիստի արձանագրություն, հատոր 1, գ.թ. 205-207, հատոր 2, գ.թ. 195-197, հատոր 12, գ.թ. 85-87/
Վկա Հրանտ Արամայիսի Սարգսյանի ցուցմունքներով՝
վերջինս դատարանում հայտնեց, որ Վաղարշ Մարտիրոսյանի մոտ աշխատել է որպես վարորդ, ճանաչել է Արմեն Մարտիրոսյանին, նրան տեսել է երկուսից երեք անգամ։ Իրեն, Վաղարշ Մարտիրոսյանին և Արմեն Մարտիրոսյանին դեղի համար տարել են ոստիկանություն։ Այդ ժամանակ եղել են «Camry» մակնիշի սպիտակ գույնի ավտոմեքենայով, որը վարել է Վաղարշ Մարտիրոսյանը։ Արմեն Մարտիրոսյանը նստած է եղել այդ ավտոմեքենայի առջևում, իսկ ինքը՝ հետնամասում։ Գտնվել են կենտրոնում՝ Սայաթ-Նավա և Չարենց փողոցների խաչմերուկում, որտեղից իրենց տարել են ոստիկանություն, սակայն դեղ չի հայտնաբերվել։ Բացի այդ դեպքն՝ Արմեն Մարտիրոսյանին էլի է տեսել, սակայն շփում չի ունեցել նրա հետ, նրա մականունը չգիտի։ Իրենց ոստիկանություն են տարել ուշ ժամի՝ 12։00-ի կամ 01։00-ի կողմերը, որտեղ մնացել են մինչև առավոտյան ժամը 6-ը։ Իրեն չեն ձերբակալել, ոստիկանությունում պահել են հարցաքննելու համար։
Վկա Հրանտ Սարգսյանի՝ նախաքննական և դատարանում տված ցուցմունքների միջև էական հակասությունների առկայության պատճառով հրապարակվեցին նրա նախաքննական ցուցմունքներն այն մասին, որ հիմնականում աշխատանքի է եղել երեկոյան ժամերի՝ ժամը 21։00-ից սկսած մինչև 03։00-ի սահմանները։ 2016թ. փետրվարի 23-ի ժամը 21։00-ի սահմաններում գտնվել է աշխատանքի վայրում՝ Վարդանանց փողոցի վրա գտնվող «Քրեյզի» գիշերային ակումբում։ Ակումբում մեկ ժամ սպասելուց հետո՝ եկել է Վաղարշ Մարտիրոսյանը, ժամը 22։00-ի սահմաններում իրենք դուրս են եկել ակումբից և Վաղարշ Մարտիրոսյանի հորդորով՝ ավտոմեքենան վարել է դեպի նրա շենքի բակ՝ Հրաչյա Քոչար թիվ 25։ Ճանապարհին միմյանց հետ չեն զրուցել, տեղյակ չի եղել՝ ինչի համար են գնում այնտեղ։ Հասնելով Վաղարշ Մարտիրոսյանի շենքի բակ՝ նկատել է նրա ծանոթ Արմեն Մարտիրոսյանին, ում ավտոմեքենան կայանելուց հետո՝ Վաղարշ Մարտիրոսյանը նստել է իր վարած ավտոմեքենայի ղեկին, Արմեն Մարտիրոսյանը նստել է նրա կողքին, իսկ ինքը՝ հետնամասում։ Ուղևորվել են դեպի Նոր-Նորքի ճանապարհի վրա գտնվող՝ Վաղարշ Մարտիրոսյանի մյուս «Քրեյզի» գիշերային ակումբ՝ բակում պտտվելու համար։ Այնուհետև իրենք գնացել են Սայաթ-Նովա փողոցի կողմը։ Երբ հասել են Սայաթ-Նովա և Չարենց փողոցների խաչմերուկ՝ ոստիկանության աշխատակիցները փակել են իրենց ճանապարհը և բերման են ենթարկել ոստիկանության Մաշտոցի բաժին։
«Քեմրի» մակնիշի ավտոմեքենայից հայտնաբերված՝ «Նոկիա» մոդելի սև գույնի բջջային հեռախոսը պատկանել է Արմեն Մարտիրոսյանին։ Վաղարշ Մարտիրոսյանը նման հեռախոս չի ունեցել, հեռախոսն այդտեղ է դրել Արմեն Մարտիրոսյանը։ Ինքը լսել է, որ Արմեն Մարտիրոսյանին դիմել են «Քաչալ» մականվամբ, այլ մականուններ իրեն հայտնի չեն եղել։
Վկա Հրանտ Սարգսյանը դատարանում պնդեց նախաքնական ցուցմունքը՝ հայտնելով, որ նախաքննության ընթացքում հայտնել է այն ամենն, ինչ հիշել է։
/դատական նիստի արձանագրություն, հատոր 1, գ.թ. 208-210, հատոր 12, գ.թ. 181/
Վկա Օդիսեյ Յուրիի Հարությունյանի նախաքննական ցուցմունքներով այն մասին, որ ճանաչել է Արմեն Մարտիրոսյանին, ում իմացել է ԱՄՆ-ում բնակվելու ժամանակներից` մոտ 7-8 տարի։ Նրա մականունը «Գիլթի» է եղել, իրենք գտնվել են նորմալ փոխհարաբերությունների մեջ, սակայն վերջին մի քանի տարում շփումներ գրեթե չեն եղել։ Իմացել է, որ նա ՀՀ-ում վարել է «Աուդի Ա4» մակնիշի ավտոմեքենա։ Լսել է, որ Արմեն Մարտիրոսյանը թմրամիջոց է օգտագործել և իրացրել, սակայն թե ումից է լսել կամ ում է իրացրել՝ չգիտի։
Դատարանում հայտնեց, որ նախաքննության ընթացքում հարցաքննվելիս՝ գտնվել է թմրամիջոցներից խորը կախվածության մեջ, ուստի դրվագներ է հիշում և չի կարող հաստատել կամ հերքել իր նախաքննական ցուցմունքում նշված հանգամանքները։
/դատական նիստի արձանագրություն, հատոր 10, գ.թ. 178-180/
Վկա Ռոբերտ Մանվելի Թիֆիլյանի ցուցմունքներով այն մասին, որ ճանաչել է Արմեն Մարտիրոսյանին, ով հաճախակի վարձակալել է իր ավտոմեքենաները։ Արմեն Մարտիրոսյանից երբեք թմրամիջոցներ ձեռք չի բերել, նրա հետ հեռախոսակապը պաշտպանել է 098-75-88-10 բջջային հեռախոսահամարով։
/դատական նիստի արձանագրություն, հատոր 10, գ.թ. 262-263/
Վկա Ֆիլիպ Ալենի Չիտեչյանի ցուցմունքներով այն մասին, որ ճանաչել է Արմեն Մարտիրոսյանին, ում հետ գտնվել է գործնական հարաբերությունների մեջ։ Արմեն Մարտիրոսյանի հետ ծանոթացել է 2015 թվականին, միասին ունեցել են «Կոդ» անվամբ համակարգիչների և ակսեսուարների խանութ՝ Սեբաստիա փողոցի վրա։ Արմեն Մարտիրոսյանի հետ կապ հաստատել է 098-75-88-10 և 098-75-88-10 բջջային հեռախոսահամարով։ Տեղյակ է, որ Արմեն Մարտիրոսյանը զբաղվել է «մեթամֆետամին» տեսակի թմրամիջոցների առքուվաճառքով, սակայն նրանից երբեք թմրամիջոցներ ձեռք չի բերել։
/դատական նիստի արձանագրություն, հատոր 10, գ.թ. 282-285/
Վկա Վիգեն Ռոբերտի Շաշաջյանի ցուցմունքներով այն մասին, որ որպես ընթերակա, ոստիկանների կանչով 2016 թվականի փետրվարի 23-ին մասնակցել է Երևանի Երվանդ Քոչար փողոցի վրա գտնվող՝ «Բելլա» հյուրանոցային համալիրի թիվ 7 սենյակում իրականացվող գործողությանը։ Այդ գործողության ժամանակ ոստիկանները նշված սենյակի՝ ԻԻՀ քաղաքացու բնակչին առաջարկել են սենյակում թմրամիջոց լինելու դեպքում ներկայացնել այն, ով բաճկոնի գրպանից ներկայացրել է թվով 2 փաթեթ՝ հայտնելով, որ դրանք թմրամիջոցներ են և պատկանել են նրա ընկեր Մոհսենին։ Թմրամիջոցների քաշը կազմել է շուրջ 133 գրամ։
/դատական նիստի արձանագրություն, հատոր 12, գ.թ. 91-92/
Վկա Լիլիթ Էդուարդի Մնացականյանի ցուցմունքներով այն մասին, որ ճանաչել է Արմեն Մարտիրոսյանին, ով իրեն սկզբում ներկայացել է Սամվել անվամբ։ Նա օգտագործել է 098-75-88-10 և 098-10-88-10 բջջային հեռախոսահամարները։ Արմեն Մարտիրոսյանը Երևանի Լենինգրադյան փողոցի մոտակայքում ունեցել է էլեկտրոնիկայի խանութ։ Արմեն Մարտիրոսյանին մի քանի անգամ տեսել է թմրանյութեր օգտագործելիս, մասնավորապես` սպիտակ կպչուն զանգվածը եղունգով փոշիացրել և քաշել է քիթը։ Մտածելով, որ Արմեն Մարտիրոսյանի մոտ կարող է լինել թմրամիջոց կամ նա կարող է գտնել` դիմել է նրան, սակայն այդպես էլ նա իրեն չի օգնել։
/դատական նիստի արձանագրություն, հատոր 12, գ.թ. 106-108/
Վկա Վերոնիկա Լիպարիտի Ղուլյանի ցուցմունքներով այն մասին, որ զբաղվել է արտերկրից հյուրեր ընդունելով և ՀՀ-ում գտնվող տեսարժան վայրերը նրանց ցույց տալով։ Տիրապետել է պարսկերեն լեզվին։ 2015 թվականի դեկտեմբերին իր ծանոթ Վահիդ Աքբարի միջոցով ծանոթացել է ԻԻՀ քաղաքացի Մոհսեն Սալմանի Ղարիչեհի հետ։ Նախկինում օգնել է Վահիդ Աքբարին, ով 2015 թվականի դեկտեմբերին զանգահարել է իրեն՝ ասելով, որ ԻԻՀ-ից դստեր համար նվեր է բերել, իրեն խնդրել է հանդիպել։ Հանդիպմանը ներկա է եղել Մոհսեն Սալմանի Ղարիչեհը, ով իրեն առաջարկել է գումարի դիմաց թարգմանություն կատարել, ինչին ինքը համաձայնվել է։ Մոհսեն Սալմանի Ղարիչեհը խնդրել է իրեն կապնվել Արտուշ Այվազյանի հետ և պայմանավորվել հանդիպման համար։ Այդ ժամանակ Արտուշ Այվազյանին ճանաչել են որպես Արթուր։ Ըստ Մոհսեն Սալմանի Ղարիչեհի` Արտուշ Այվազյանը նրան 5000 ԱՄՆ դոլար գումար է պարտք եղել և հանդիպման նպատակը գումարը վերցնելն է եղել։ Արտուշ Այվազյանն օգտագործել է 093-222-555 և 055-88-75-50 բջջային հեռախոսահամարները։ «Բելլա» հյուրանոցային համալիրում հանդիպել են Արտուշ Այվազյանի հետ, սակայն Վահիդ Աքբարը չի մասնակցել խոսակցությանը։ Հանդիպման ժամանակ Մոհսեն Սալմանի Ղարիչեհը նրա պարտքն է պահանջել, իսկ Արտուշ Այվազյանը ժամանակ է խնդրել` որպես ձգձգման պատճառ նշելով ոմն «Քաչալի» անունը։ Այդ ժամանակ Մոհսեն Սալմանի Ղարիչեհն ասել է, որ նա ավտոմեքենան է վաճառել և գումարը ներդրել է գաթաների բիզնեսի մեջ, սակայն Արտուշ Այվազյանը ձգձգել է։ Այդ հանդիպումից հետո Մոհսեն Սալմանի Ղարիչեհին և Արտուշ Այվազյանին չի տեսել, սակայն նրանց համար կատարել է թարգմանություն հեռախոսով` կապված Մոհսեն Սալմանի Ղարիչեհի կողմից գաթաներ ՀՀ բերելու, իսկ Արթուրի կողմից՝ դրանց դիմաց 1000 ԱՄՆ դոլար գումար ուղարկելու հետ։ Մոհսեն Սալմանի Ղարիչեհն այդ ժամանակ գտնվել է ԻԻՀ-ում, իսկ Արտուշ Այվազյանը` ՀՀ-ում։ Մոհսեն Սալմանի Ղարիչեհը խնդրել է իրեն՝ Արտուշ Այվազյանին փոխանցել, որ լավ գաթաներ է գտել և 1000 ԱՄՆ դոլար գումար ուղարկելու դեպքում` դրանք կարող է գնել և տեղափոխել Երևան։ Ինքը նույնությամբ դա թարգմանելով փոխանցել է Արտուշ Այվազյանին։ Վերջինս ասել է, որ 1000 ԱՄՆ դոլար գումարը «Քաչալը» կփոխանցի։ Փոխանցումից հետո Մոհսեն Սալմանի Ղարիչեհն ասել է, որ մոտակա երկու օրվա ընթացքում կգա ՀՀ։
Դրանից հետո ո՛չ Մոհսեն Սալմանի Ղարիչեհին և ո՛չ էլ Արտուշ Այվազյանին չի տեսել, միայն մի քանի ամիս անց պատահաբար հանդիպել է Վահիդ Աքբարին, ով իրեն հայտնել է, որ Մոհսեն Սալմանի Ղարիչեհին և Արտուշ Այվազյանին ձերբակալել են թմրամիջոցների համար, որից հետո հասկացել է, որ նրանց կողմից նշված «գաթա» բառը նշանակել է թմրամիջոց։ Ի սկզբանե չի իմացել այդ մասին, իրեն վճարել են թարգմանություն կատարելու համար, սակայն ինքը չի հետաքրքրվել, թե ինչ գաթաների մասին է խոսքը։ Մոհսեն Սալմանի Ղարիչեհը և Արտուշ Այվազյանն իր միջոցով խոսել են թմրամիջոցներ ՀՀ տեղափոխելու մասին` թմրամիջոց բառը փոխելով «գաթա» բառով։
/դատական նիստի արձանագրություն, հատոր 12, գ.թ. 177-179/
Թիվ 10110116 քրեական գործով մեղադրյալ Աշոտ Արայի Ադամյանի ցուցմունքներով այն մասին, որ շուրջ երեք տարի ճանաչել է իրենց թաղամասում բնակվող Սրապ Կարապետյանին։ Վերջինիս միջոցով ծանոթացել է Զոհրաբ Ստեփանյանի հետ, ով դատապարտված է եղել «մեթամֆետամին» տեսակի թմրամիջոցի հետ կապված գործով։ Սրապ Կարապետյանի առաջարկով, իր անունից Զոհրաբ Ստեփանյանին 2015 թվականի դեկտեմբերի 30-ին սնունդ է փոխանցել, որից հետո Սրապ Կարապետյանն ասել է, որ իր՝ 077-58-42-35 բջջային հեռախոսահամարը կփոխանցի Զոհրաբ Ստեփանյանին` հետագայում նրան օգնելու համար։ Զոհրաբ Ստեփանյանը 2016 թվականի հունվարից՝ 098-88-09-54, 055-44-44-00 և 077-20-93-93 հեռախոսահամարներից զանգահարել է իրեն տարբեր խնդրանքներով, այդ թվում՝ թմրամիջոցներ վերցնելու և այլ անձի փոխանցելու համար։ Զոհրաբ Ստեփանյանը 2016թ. փետրվարի 21-ի ժամը 21։30-ի սահմաններում զանգահարել է իրեն և հայտնել, որ անհրաժեշտ է գնալ Երևանի Ֆուրմանով փողոցի վրա գտնվող «Դիսլաբ» լաբորատորիայի մոտ և հանդիպել ինչ-որ անձի, ում հեռախոսահամարն է եղել 098-10-88-10 և վարել է «Աուդի Ա4» մակնիշի 41 111 հ/հ ավտոմեքենա։ Հասնելով պայմանավորված վայր` զանգահարել է Զոհրաբ Ստեփանյանի տված հեռախոսահամարով, սակայն չի կարողացել կապնվել, որից հետո Զոհրաբ Ստեփանյանի խնդրանքով «Զորո» տեքստով հաղորդագրություն է ուղարկել այդ հեռախոսահամարին, ինչից հետո նշված անձը հետ է զանգահարել և մոտեցել է իրեն։ Այդ օրը «Աուդի Ա4» մակնիշի 41 111 հ/հ ավտոմեքենայի վարորդին է փոխանցել 150.000 ՀՀ դրամ գումար և հեռացել։ Նույն օրը երեկոյան Զոհրաբ Ստեփանյանին տեղեկացրել է, որ իր մոտ գումար չի մնացել։
2016թ. փետրվարի 22-ի առավոտյան՝ 077-20-93-93 հեռախոսահամարից իրեն է զանգահարել Զոհրաբ Ստեփանյանը և ասել, որ իջնի Երևան քաղաքի կենտրոն, որտեղ նրանք կմոտենան և գումար կփոխանցեն իրեն։ Թումանյան փողոցի վրա հանդիպել է Զոհրաբ Ստեփանյանի կողմից ուղարկված անձին, ով իրեն է տվել 1.000.000 ՀՀ դրամ գումար և ոսկու կշեռք։ Զոհրաբ Ստեփանյանի ցուցումով այդտեղից ուղևորվել է դեպի Դավիթաշեն թաղամաս` «Աուդի Ա4» մակնիշի ավտոմեքենայի վարորդին հանդիպելու, նրան 700.000 ՀՀ դրամ գումար տալու և «բան» վերցնելու համար։ Ինքն այդ ցուցումով հանդիպել է «Աուդի Ա4» մակնիշի ավտոմեքենայի վարորդին, տվել է 700.000 ՀՀ դրամ գումար, իսկ վարորդն իրեն ասել է, որ մեկ ու կես ժամից գնա նույն վայր։ Նույն օրը ժամը 14։30-ի սահմաններում իր ծանոթ Արտավազդ Բաղդասարյանի «Վազ 21-07» տաքսի ավտոմեքենայով գնավել է նույն վայր, ճանապարհին Զոհրաբ Ստեփանյանն իրեն ասել է, որ բացի նշված՝ 700.000 ՀՀ դրամ գումարից՝ «Աուդի Ա4» մակնիշի ավտոմեքենայի վարորդին անհրաժեշտ է փոխանցել ևս 70.000 ՀՀ դրամ գումար։ Պայմանավորված վայր հասնելուց հետո` տեղեկացրել է Զոհրաբ Ստեփանյանին, որից հետո մոտեցել է «Աուդի Ա4» մակնիշի ավտոմեքնենային, նստել է վարորդի կողքի նստատեղին։ Վարորդը մեքենայում հանել է ոսկու համար նախատեսված պոլիէթիլենային փոքրիկ տոպրակ, որի մեջ «մեթամֆետամին» տեսակի թմրամիջոց է եղել, նրա մոտ եղած կշեռքով կշռել է 5 գրամ, որից հետո նշված քանակը տվել է իրեն։ Այնուհետև նույն վայրից հանել է նույնանման այլ տոպրակ, որից ևս առանձնացրել է «մեթամֆետամին» տեսակի թմրամիջոցի մի քանի գնդիկներ և առանց կշռելու տվել է իրեն։ Վերջում ինքը տվել է 70.000 ՀՀ դրամ գումար և իջել ավտոմեքենայից։
Դրանից հետո զանգահարել է Զոհրաբ Ստեփանյանին, տեղեկացրել է, որ թմրամիջոցն իր մոտ է, ով իրեն ասել է, որ 5 գրամ թմրամիջոցը պահի իր մոտ, իսկ 70.000 ՀՀ դրամ գումարի դիմաց վերցրած թմրամիջոցը պետք է տա նրա ընկեր Դավոյին, ով պետք է իրեն մոտենա «Պորշե Կայեն» մակնիշի սև գույնի ավտոմեքենայով, իրեն վճարի 70.000 ՀՀ դրամ և վերցնի այդ թմրամիջոցը։ Զոհրաբ Ստեփանյանը հաղորդագրությամբ իրեն է փոխանցել Դավոյի բջջային հեռախոսահամարը։ Կապնվել է Դավոյի հետ, ով իրեն ասել է, որ դիմացի մայթում է։ Նստել է մեքենայի մեջ, որում եղել են Դավոն և ինչ-որ աղջիկ, նրան է տվել Զոհրաբ Ստեփանյանի ասած թմրամիջոցի խմբաքանակը, իսկ Դավոն իրեն է տվել ծխախոտի ստվարաթղթով փաթեթավորված՝ «մարիխուանա» տեսակի թմրամիջոց և 40.000 ՀՀ դրամ գումար` ասելով, որ մնացած 30.000 ՀՀ դրամ գումարի համար նա կխոսի Զոհրաբ Ստեփանյանի հետ։ Դավոյի տված «մարիխուանա» տեսակի թմրամիջոցը դնելով տաբատի գրպանում` իջել է նրա մեքենայից։ Այդ ժամանակ իրեն է զանգահարել Զոհրաբ Ստեփանյանը և ասել, որ «Աուդի Ա4» մակնիշի ավտոմեքենայի վարորդը մոռացել է իրեն ինչ-որ բան տա և իրեն սպասում է Դավիթաշենի եկեղեցու մոտ։ Արտավազդի հետ մեկնել են եկեղեցու մոտ, սակայն այդպես էլ «Աուդի Ա4» մակնիշի ավտոմեքենայի վարորդն իրեն չի մոտեցել։ Իրեն են մոտեցել ոստիկանները և բերման ենթարկել բաժին, որտեղ իր անձնական խուզարկությամբ հայտնաբերել են «Աուդի Ա4» մակնիշի ավտոմեքենայի վարորդի տված՝ 5 գրամ «մետամֆեթամին» և Դավոյի տված՝ «մարիխուանա» տեսակի թմրամիջոցները։
Զոհրաբ Ստեփանյանի տված՝ 1.000.000 ՀՀ դրամ գումարից 770.000 ՀՀ դրամ գումարն ինքը տվել է «Աուդի Ա4» մակնիշի ավտոմեքենայի վարորդին, իր մոտ մնացել է 230.000 ՀՀ դրամ գումար, այնուհետև Դավոն իրեն է տվել ևս 40.000 ՀՀ դրամ գումար։ Իր մոտ գոյացած 270.000 ՀՀ դրամ գումարից՝ 50.000 ՀՀ դրամ գումարը լիցքավորել է Զոհրաբ Ստեփանյանի՝ «Վիվառո» բուքմեյքերական ընկերության կայքը, մոտ 6.000 ՀՀ դրամ գումար տվել է տաքսի ծառայության համար, իսկ մնացած 213.000 ՀՀ դրամ գումարը հայտնաբերվել է իր անձնական խուզարկության ժամանակ։ Ինչպես հետագայում է իմացել՝ «Աուդի Ա4» մակնիշի ավտոմեքենայի վարորդի անունն է Արմեն Մարտիրոսյան, իսկ «Պորշե Կայեն» մակնիշի ավտոմեքենայի վարորդ Դավոյի ամբողջական անունն է Դավիթ Սիմիդյան։
/դատական նիստի արձանագրություն, հատոր 1, գ.թ. 35-39, 108, հատոր 2, գ.թ. 1-2, 74, 104, հատոր 10, գ.թ. 176, հատոր 11, գ.թ. 26, 68, հատոր 12, գ.թ. 102, 200-202/
Վկա Վահիդ Ալիասգհարի Ակբարի Զարինհաբայի նախաքննական ցուցմունքներով այն մասին, որ բնակվել է ԻԻՀ Թավրիզ քաղաքում։ Ժամանակ առ ժամանակ այցելել է ՀՀ։ 2016թ. փետրվարի 23-ի առավոտյան իր ընկեր Մոհսեն Սալմանի Ղարիչեհի հետ ժամանել է իրանահայկական սահման, որտեղից տաքսի ավտոմեքենայով եկել է Երևանի Երվանդ Քոչար փողոցի վրա գտնվող «Բելլա» հյուրանոցային համալիր և հանգրվանել թիվ 7 սենյակում։ Փոքր ինչ հանգստանալուց հետո Մոհսեն Սալմանի Ղարիչեհի հետ գնացել են գնումների։ Վերադառնալուց հետո Մոհսեն Սալմանի Ղարիչեհը պայուսակից հանել է երկու փաթեթ, հայտնել, որ դուրս է գալիս և կվերադառնա որոշ ժամանակ հետո։ Ինքը հարցրել է, թե ինչ փաթեթներ են դրանք, իսկ Մոհսեն Սալմանի Ղարիչեհը պատասխանել է, որ «մեթամֆետամին» տեսակի թմրամիջոց է, որոնք պետք է փոխանցի ինչ-որ մեկին և վերադառնա։ Մինչ Մոհսեն Սալմանի Ղարիչեհի հեռանալը՝ ինքը նկատել է, որ նա ևս երկու փաթեթ դրել է իր բաճկոնի գրպանում։ Մոհսեն Սալմանի Ղարիչեհի հեռանալուց մոտ 15 րոպե անց սենյակի դուռը թակել են ոստիկանության աշխատակիցները, ինքը բացել է դուռը, ներս է հրավիրել և ներկայացրել բաճկոնի գրպանում եղած 2 փաթեթ թմրամիջոցները, որոնց քաշը միասին կազմել է մոտ 133 գրամ։
Այդ թմրամիջոցները Մոհսեն Սալմանի Ղարիչեհը ՀՀ է տեղափոխել ԻԻՀ-ից, քանի որ ՀՀ-ում իրենք ոչ մեկին չեն հանդիպել և ամբողջ օրվա ընթացքում եղել են միասին։ Հստակ չգիտի, թե ինչպես է Մոհսեն Սալմանի Ղարիչեհը թմրամիջոցները թաքցրել սահմանն անցնելու պահին։ Նախկինում իր ներկայությամբ Մոհսեն Սալմանի Ղարիչեհը ոչ մեկին թմրամիջոց չի տվել։
/դատական նիստի արձանագրություն, հատոր 1, գ.թ. 154-158, հատոր 2, գ.թ. 95-100, հատոր 11, գ.թ. 57-60/
Վկա Հայկ Զաուրի Մանվելյանի նախաքննական ցուցմունքով այն մասին, որ հանդիսացել է Արմեն Մարտիրոսյանի կնքահայրը։ Նրա կողմից թմրամիջոցներ իրացնելու կամ օգտագործելու մասին տեղեկություններ չունի։ Արմեն Մարտիրոսյանի հետ հեռախոսակապ պաշտպանել է 098-10-88-10 հեռախոսահամարով։
/դատական նիստի արձանագրություն, հատոր 10, գ.թ. 278-280/
Վկա Դիանա Տիգրանի Սահակյանի նախաքննական ցուցմունքով այն մասին, որ ճանաչել է «Գիլթի» մականվամբ Արմեն Մարտիրոսյանին։ Նրա հետ ծանոթացել է իր ընկեր Օդիսեյ Հարությունյանի միջոցով, ով գտնվել է կալանավայրում, քանի որ դատապարտվել է թմրանյութերի ապօրինի շրջանառության համար։ «Գիլթի»-ի հետ ծանոթացել է 2015 թվականի հոկտեմբերին` նրա «213 սայդ» ակումբի բացման ժամանակ։ Տեղյակ է, որ «Գիլթի»-ն և Օդիսեյ Հարությունյանը մտերիմ ընկերներ են եղել, սակայն հոկտեմբերից սկսած միմյանց հետ չեն խոսել։ Օդիսեյ Հարությունյանը հաճախ օգտագործել է «մեթամֆետամին» տեսակի թմրամիջոց, իսկ «Գիլթի» մականվամբ Արմեն Մարտիրոսյանը զբաղվել է դրա իրացմամբ։ Օդիսեյ Հարությունյանի խնդրանքով մի քանի անգամ զանգահարել է «Գիլթի»-ին և խնդրել թմրամիջոց` գումարի դիմաց։ «Գիլթի»-ն Օդիսեյ Հարությունյանի հեռախոսազանգերին չի պատասխանել, իսկ պատասխանելու դեպքում տարբեր պատճառաբանություններով չի տվել։ «Գիլթի»-ն օգտագործել է 098-10-88-10 հեռախոսահամարը։
«Գիլթի»-ի բռնվելուց հետո խոսակցություններից իմացել է, որ բերդում նստած Զորոն նրանից «մետամֆեթամին» տեսակի թմրամիջոց է գնել՝ ոմն Աշոտի միջոցով, որի պատճառով բռնվել է։ Ճանաչել է նաև Զորոյին, ով դատապարտվել է «մեթամֆետամին» տեսակի թմրամիջոցի ապօրինի շրջանառության համար։ Տեղյակ է, որ «Գիլթի»-ն «մեթամֆետամին» տեսակի թմրամիջոցի մեկ գրամն իրացրել է 100.000 ՀՀ դրամ գումարի դիմաց, իսկ թե ում՝ չի կարող ասել, քանի որ իրացման ժամանակ ներկա չի եղել։ Հստակ չի կարող ասել, թե որտեղից է «Գիլթի»-ն թմրամիջոցները ձեռք բերել, սակայն իմացել է, որ դրանք բերվել են ԻԻՀ-ից։
/դատական նիստի արձանագրություն, հատոր 12, գ.թ. 7-9/
Վկա Արև Գարիկի Ալավերդյանի նախաքննական ցուցմունքով այն մասին, որ պարսկերեն լեզվին տիրապետելու պատճառով` 2016 թվականի փետրվարի 23-ին ոստիկանների հրավերով մասնակցել է Երևանի Երվանդ Քոչար փողոցի վրա գտնվող «Բելլա» հյուրանոցային համալիրի թիվ 7 սենյակում իրականացվող գործողությանը։ Այդ գործողության ժամանակ ոստիկանները նշված սենյակի բնակիչ ԻԻՀ քաղաքացուն առաջարկել են սենյակում թմրամիջոց լինելու դեպքում ներկայացնել այն, ով կաշվե բաճկոնի գրպանից ներկայացրել է 2 փաթեթ՝ հայտնելով, որ դրանցում «մեթամֆետամին» տեսակի թմրամիջոց է և պատկանել է ընկերոջը` Մոհսեն Սալմանի Ղարիչեհին, ով դրանք ՀՀ է բերել ԻԻՀ-ից։
/դատական նիստի արձանագրություն, հատոր 12, գ.թ. 103-104/
Դատաքիմիական փորձաքննության 2016թ. փետրվարի 22-ի թիվ 62 Ք-16 եզրակացությամբ, համաձայն որի. «1. Փորձաքննության ներկայացված 4,92 գրամ քաշով սպիտակ, փայլատ բյուրեղային զանգվածում հայտնաբերվեց 4,592 գրամ քաշով «մեթամֆետամին» տեսակի թմրամիջոց։
2. Փորձաքննության ներկայացված 0,0475 գրամ հաստատուն քաշով կանեփի բուսական մանրացված զանգվածը հանդիսանում է «մարիխուանա» տեսակի թմրամիջոց։»։
/դատական նիստի արձանագրություն, հատոր 1, գ.թ. 23-27/
Դատաքիմիական փորձաքննության 2016թ. փետրվարի 25-ի թիվ 70 Ք-16 եզրակացությամբ, համաձայն որի. «1. Փորձաքննության ներկայացված թղթյա ծրարում առկա 2,23 գրամ քաշով սպիտակ գույնի, փայլատ բյուրեղային զանգվածում հայտնաբերվեց 2,047 գրամ քաշով Մեթամֆետամին տեսակի թմրամիջոց։
2. Փորձաքննության ներկայացված «գրպանից բաճկոնի» գրառմամբ փաթեթում առկա ընդհանուր 124,64 գրամ (64,37 գրամ և 60,27 գրամ) քաշով սպիտակ գույնի, փայլատ բյուրեղային զանգվածներում հայտնաբերվեց ընդհանուր 118,275 գրամ (61,083 գրամ և 57,192 գրամ) քաշով Մեթամֆետամին տեսակի թմրամիջոց /տես հետազոտական մաս և համակարգչային հավելված/։
3. Փորձաքննության ներկայացված «Մոհսեն.... անձնական զննություն» գրառմամբ փաթեթում առկա ընդհանուր 115,8 գրամ (59,62 գրամ և 56,18 գրամ) քաշով սպիտակ գույնի, փայլատ բյուրեղային զանգվածներում հայտնաբերվեց ընդհանուր 110,657 գրամ (56,972 գրամ և 53,685 գրամ) քաշով Մեթամֆետամին տեսակի թմրամիջոց /տես հետազոտական մաս և համակարգչային հավելված/։»։
/դատական նիստի արձանագրություն, հատոր 2, գ.թ. 128-134/
Դատաքիմիական փորձաքննության 2016թ. մարտի 25-ի թիվ 92 Ք-16 եզրակացությամբ, համաձայն որի. «Թիվ 10110116 քրեական գործով փորձաքննությանը տրամադրված «Բելլա հյուրանոցային համալիրի թիվ 7 առանձնասենյակից հայտնաբերված փաթեթը» գրառմամբ թղթյա ծրարում առկա 2,75 գրամ քաշով սպիտակավուն, փայլատ բյուրեղային զանգվածում հայտնաբերվեց 2,453 գրամ քաշով Մեթամֆետամին տեսակի թմրամիջոց։ /տես հետազոտական մաս և համակարգչային հավելված/։
2. Փորձաքննությանը տրամադրված «Toyota camry մակնիշի 20 PP 009 պ/հ ավտոմեքենայի նստատեղի արանքում դրված նոկիա մոդելի բջջային հեռախոսի հետնամասից հայտնաբերված 0,07 գրամ քաշով, սպիտակավուն, փոշենման բյուրեղային զանգվածում հայտնաբերվեց 0,0638 գրամ քաշով Մեթամֆետամին տեսակի թմրամիջոց։ /տես հետազոտական մաս և համակարգչային հավելված/։
3. Փորձաքննությանը տրամադրված թվով երեք ապակյա կոլբաների ներքին պատերին առկա ծղոտագույն կետային հետքերում հայտնաբերվեցին Մեթամֆետամին տեսակի թմրամիջոցի հետքեր։(...)»։
/դատական նիստի արձանագրություն, հատոր 10, գ.թ. 47-54/
Դատաբժշկական փորձաքննության 2016թ. փետրվարի 26-ի թիվ 0451 եզրակացությամբ, համաձայն որի. «Մոհսեն Խալիլի Սալմանիի մոտ, ներկա փորձաքննությամբ մարմնական վնասվածքների օբյեկտիվ հատկանիշներ, ներարկումների հետքեր չեն հայտնաբերվել։ Մոհսեն Խալիլի Սալմանիի հետանցքի շրջանում վնասվածքների օբյեկտիվ հատկանիշներ, նրանցից մնացած հետքեր և այլ յուրահատկություններ վկայող հետանցքից սեռական հարաբերություն ունենալու մասին չեն հայտնաբերվել։»։
/դատական նիստի արձանագրություն, հատոր 2, գ.թ. 251-254/
Դատաբժշկական փորձաքննության 2016թ. փետրվարի 26-ի թիվ 0452 եզրակացությամբ, համաձայն որի. «Վահիդ Ալի Սաղարի Աքրաբի Զարինղարայի մոտ, ներկա փորձաքննությամբ մարմնական վնասվածքների օբյեկտիվ հատկանիշներ, ներարկումների հետքեր չեն հայտնաբերվել։ Վահիդ Ալի Սաղարի Աքրաբի Զարինղարայի հետանցքի շրջանում վնասվածքների օբյեկտիվ հատկանիշներ, նրանցից մնացած հետքեր և այլ յուրահատկություններ վկայող հետանցքից սեռական հարաբերություն ունենալու մասին չեն հայտնաբերվել։»։
/դատական նիստի արձանագրություն, հատոր 2, գ.թ. 255-258/
Դատաքիմիական փորձաքննության 2016թ. մարտի 09-ի թիվ 0162 եզրակացությամբ, համաձայն որի. «ա.բ./ 25.02.2016թ. Մոհսեն Խալիլի Սալմանի Ղարիչեհի մեզի և 2,0սմ մազի փորձանմուշներում հայտնաբերվեցին կանաբինոիդների, ափիոնի և ֆենիլալկիլամինների խմբի` մեթամֆետամինների հետքերը։»։
/դատական նիստի արձանագրություն, հատոր 10 գ.թ. 46/
Դատաքիմիական փորձաքննության 2016թ. մարտի 11-ի թիվ 0157 եզրակացությամբ, համաձայն որի. «ա.բ./ 24.02.2016թ. Արտուշ Էդուարդի Այվազյանի մեզի և 3,50սմ մազի փորձանմուշներում հայտնաբերվեցին կանաբինոիդների խմբի թմրամիջոցների և ֆենիլալկիլամինների խմբի՝ մեթամֆետամինների հետքերը։»։
/դատական նիստի արձանագրություն, հատոր 10 գ.թ. 58/
Դատաքիմիական փորձաքննության 2016թ. մարտի 11-ի թիվ 0158 եզրակացությամբ, համաձայն որի. «ա.բ./ 24.02.2016թ. Արմեն Հրաչյայի Մարտիրոսյանի մեզի և 1,0սմ երկարության ձեռքի հատվածից վերցված մազի փորձանմուշներում հայտնաբերվեցին ֆենիլալկիլամինների խմբի՝ մեթամֆետամինների թմրալկալոիդները։»։
/դատական նիստի արձանագրություն, հատոր 10 գ.թ. 63/
Իրեղեն ապացույց ճանաչված, Արտուշ Էդուարդի Այվազյանի ավտոմեքենայից առգրավված` 2,047 գրամ քաշով, Մոհսեն Սալմանի Ղարիչեհի անձնական խուզարկությամբ հայտնաբերված և առգրավված` 110,657 գրամ քաշով և «Բելլա» հյուրանոցային համալիրի թիվ 7 սենյակի բաճկոնի գրպանից հայտնաբերված և առգրավված` 118,275 գրամ քաշով «մեթամֆետամին» տեսակի թմրամիջոցներով։
/դատական նիստի արձանագրություն, հատոր 12, գ.թ. 237-238/
Իրեղեն ապացույց ճանաչված, «Բելլա» հյուրանոցային համալիրի «Քենթ» տեսակի ծխախոտի տուփից հայտնաբերված և առգրավված` 2,453 գրամ և «Տոյոտա Քեմրի» մակնիշի 20 PP 009 հ/հ ավտոմեքենայում եղած, Արմեն Հրաչյայի Մարտիրոսյանի «Nokia 1035» մոդելի բջջային հեռախոսի մեջ հայտնաբերված և առգրավված` 0,0638 գրամ «մեթամֆետամին» տեսակի թմրամիջոցներով։
/դատական նիստի արձանագրություն, հատոր 12, գ.թ. 237-238/
Իրեղեն ապացույց ճանաչված, Աշոտ Արայի Ադամյանի անձնական խուզարկությամբ հայտնաբերված` 4,592 գրամ քաշով «մեթամֆետամին» տեսակի թմրամիջոցով և 0,0475 գրամ քաշով «մարիխուանա» տեսակի թմրամիջոցով։
/դատական նիստի արձանագրություն, հատոր 12, գ.թ. 237-238/
Իրեղեն ապացույց ճանաչված, Վաղարշ Մարտիրոսյանի վարած «Քեմրի» մակնիշի 20 PP 009 հ/հ ավտոմեքենայում հայտնաբերված` Արմեն Հրաչյայի Մարտիրոսյանի «Nokia 1035» մոդելի բջջային հեռախոսով, որի մեջ առկա են եղել 098-75-88-10 և 098-10-88-10 բջջային հեռախոսաքարտերը։ Նշված բջջային հեռախոսի մեջ հայտնաբերվել է 0,0638 գրամ քաշով «մեթամֆետամին» տեսակի թմրամիջոց։ 098-75-88-10 և 098-10-88-10 հեռախոսահամարները գաղտնալսվել են նախաքննության ընթացքում։
/դատական նիստի արձանագրություն, հատոր 12, գ.թ. 237-238/
Իրեղեն ապացույց ճանաչված, Աշոտ Ադամյանի անձնական խուզարկությամբ հայտնաբերված և առգրավված, դատապարտյալ Զոհրաբ Ստեփանյանի ցուցումով` թմրամիջոցներ կշռելու նպատակով նրան փոխանցված, «Capacity։300gX0.01g» ֆիրմայի՝ ձեռքի կշեռքով։
/դատական նիստի արձանագրություն, հատոր 12, գ.թ. 237-238/
Իրեղեն ապացույց ճանաչված, Աշոտ Ադամյանի անձնական խուզարկությամբ հայտնաբերված և առգրավված, Զոհրաբ Ստեփանյանի կողմից թմրամիջոցների ձեռք բերման համար վճարելու նպատակով նրան փոխանցված, 213.000 ՀՀ դրամ գումարով։
/դատական նիստի արձանագրություն, հատոր 12, գ.թ. 237-238/
Անձնական խուզարկություն կատարելու մասին 2016թ. փետրվարի 22-ի արձանագրությամբ, համաձայն որի՝ բերման ենթարկված Աշոտ Ադամյանի հագին եղած կապույտ գույնի ջինսե տաբատի աջ գրպանիկից հայտնաբերվել են սպիտակ թղթի մեջ փաթաթված դեղնականաչավուն չորացված կանեփանման զանգված` մոտ 0,01 գրամ քաշով և ծալովի դանակ։ Նույն տաբատի ձախ գրպանից հայտնաբերվել են` «Նոկիա 1800» բջջային հեռախոս` 077-58-42-35 հեռախոսահամարով, սպիտակ պոլիէթիլենային տոպրակի մեջ փաթեթավորված «մեթանֆետամին» տեսակի թմրամիջոցին նմանվող սպիտակ բյուրեղանման զանգված` մոտ 5,1 գրամ քաշով, 213.000 ՀՀ դրամ գումար և անդորրագրեր։ Ըստ Աշոտ Ադամյանի հայտարարության՝ նշված դանակը պատկանել է իրեն, իսկ հայտնաբերված թմրամիջոցները վերցրել է Զոհրաբ Ստեփանյանի խնդրանքով՝ 098-10-88-10 հեռախոսահամարն օգտագործող «Աուդի» մակնիշի 41 111 հ/հ ավտոմեքենայի վարորդից, ում տվել է 770.000 ՀՀ դրամ գումար` դրանք ձեռք բերելու համար։
/դատական նիստի արձանագրություն, հատոր 1, գ.թ. 7/
Անձնական խուզարկություն կատարելու մասին 2016թ. փետրվարի 23-ի արձանագրությամբ, համաձայն որի՝ բերման ենթարկված Արտուշ Այվազյանի բաճկոնի գրպանից հայտնաբերել են «Ալկատել Ուան Տաչ» բջջային հեռախոս՝ 055-88-75-50 հեռախոսահամարով և «Այֆոն 5» տեսակի բջջային հեռախոս՝ 093-222-555 հեռախոսահամարով, որոնք գաղտնալսվել են։
/դատական նիստի արձանագրություն, հատոր 1, գ.թ. 115/
Թմրամիջոց ներկայացնելու մասին 2016թ. փետրվարի 23-ի արձանագրությամբ, համաձայն որի՝ ՀՀ ոստիկանության Երևան քաղաքի վարչության աշխատակիցներն այցելել են «Բելլա» հյուրանոցային համալիր և թիվ 7 սենյակի բնակիչ Վահիդ Աքբարին առաջարկել են առկայության դեպքում ներկայացնել թմրամիջոցներ, ով բաճկոնի գրպանից ներկայացրել է «մեթամֆետամին» տեսակի թմրամիջոցներ` 2 փաթեթում, ընդհանուր մոտ 133 գրամ քաշով` հայտարարելով, որ դրանք պատկանել են իր հետ ՀՀ ժամանած ընկերոջը` Մոհսեն Սալմանի Ղարիչեհին, ով դրանք ՀՀ է տեղափոխել ԻԻՀ-ից և ևս երկու փաթեթ հետը տարել է` այլ անձի փոխանցելու համար։
/դատական նիստի արձանագրություն, հատոր 1, գ.թ. 121/
Անձնական խուզարկություն կատարելու մասին 2016թ. փետրվարի 23-ի արձանագրությամբ, համաձայն որի՝ բերման ենթարկված Մոհսեն Խալիլի Սալմանի Ղարիչեհի մոտից, ի թիվս այլ իրերի՝ հայտնաբերել են 043-38-09-54 հեռախոսահամարի պլաստիկը, «Նոկիա» մոդելի բջջային հեռախոսը՝ 043-38-09-54 հեռախոսահամարով։ Բացի այդ, Մոհսեն Խալիլի Սալմանի Ղարիչեհի աճուկային մասից հայտնաբերվել են թվով 2 փաթեթ` սպիտակ զանգվածի պարունակությամբ, մոտ 124,30 գրամ քաշով։ Ըստ Մոհսեն Խալիլի Սալմանի Ղարիչեհի` նշված իրերը, հեռախոսաքարտի պլաստիկը և «Նոկիա» հեռախոսը պատկանել են իրեն, իսկ սպիտակ զանգվածով 2 փաթեթները` Վահիդ Աքբարիին, ով հավանաբար դրանք ՀՀ է տեղափոխել ԻԻՀ-ից։
/դատական նիստի արձանագրություն, հատոր 1, գ.թ. 130-131/
Առգրավում կատարելու մասին 2016թ. փետրվարի 24-ի արձանագրությամբ, համաձայն որի՝ Արտուշ Այվազյանի վարած «Մերսեդես» մակնիշի 20 840 հ/հ ավտոմեքենայից առգրավվել է մոտ 2,54 գրամ «մեթամֆետամին» տեսակի թմրամիջոց։
/դատական նիստի արձանագրություն, հատոր 1, գ.թ. 161-162/
Լուսանկարով ճանաչման ներկայացնելու մասին 2016թ. փետրվարի 23-ի արձանագրությամբ, համաձայն որի՝ Աշոտ Ադամյանը որպես իրեն «մեթամֆետամին» տեսակի թմրամիջոց իրացրած, 098-10-88-10 հեռախոսահամարն օգտագործած անձ և «Աուդի Ա4» մակնիշի 41 111 հ/հ ավտոմեքենայի վարորդ մատնանշել է թիվ 3 համարի տակ փակցված Արմեն Մարտիրոսյանի լուսանկարը։
/դատական նիստի արձանագրություն, հատոր 1, գ.թ. 105-106/
«Բելլա» հյուրանոցային համալիրի թիվ 7 սենյակում խուզարկություն կատարելու մասին 2016թ. փետրվարի 25-ի արձանագրությամբ, համաձայն որի՝ թիվ 7 սենյակում առկա «Քենթ» ծխախոտի տուփի մեջ հայտնաբերվել և առգրավվել է մոտ 2,73 գրամ սպիտակ բյուրեղային զանգված։ Ըստ ներկա Վահիդ Աքբարիի հայտարարության` հայտնաբերվածը պատկանել է իր ընկեր Մոհսեն Խալիլի Սալմանի Ղարիչեհին։
/դատական նիստի արձանագրություն, հատոր 2, գ.թ. 154-155/
Վաղարշ Մարտիրոսյանի վարած «Տոյոտա Քեմրի» մակնիշի 20PP009 հ/հ ավտոմեքենայի խուզարկության 2016թ. փետրվարի 26-ի արձանագրությամբ, համաձայն որի՝ այդ ավտոմեքենայում հայտնաբերվել են «Նոկիա» մոդելի բջջային հեռախոս, իսկ դրանում` մոտ 2,23 գրամ փոշենման զանգված, 098-10-88-10 և 098-75-88-10 հեռախոսահամարները, որոնք գաղտնալսվել են։ Ըստ ներկա Վաղարշ Մարտիրոսյանի հայտարարության` հայտնաբերված բջջային հեռախոսը և դրա պարունակությունը պատկանել են Արմեն Մարտիրոսյանին։
/դատական նիստի արձանագրություն, հատոր 2, գ.թ. 183-184/
Որպես այլ փաստաթուղթ ապացույց ճանաչված, Մոհսեն Խալիլի Սալմանի Ղարիչեհիի անձնական խուզարկությամբ հայտնաբերված և առգրավված «Nokia 1133» մոդելի սև գույնի բջջային հեռախոսով, որի մեջ առկա է եղել «Բիլայն» օպերատորի՝ 043-38-09-54 հեռախոսահամարը, որով նա կապ է հաստատել Արտուշ Այվազյանի հետ։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Զոհրաբ Վահանի Ստեփանյանի մոտ, նրա կալանավայրում հայտնաբերված և առգրավված «Samsung Duos 1202» մոդելի բջջային հեռախոսով, որի մեջ առկա է եղել 8937401000143930501 համարով «Բիլայն» օպերատորի հեռախոսաքարտը, որով հիմնավորվել է Զոհրաբ Ստեփանյանի կողմից կալանավայրում բջջային հեռախոս օգտագործելու հանգամանքը։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Մոհսեն Խալիլի Սալմանի Ղարիչեհիի անձնական խուզարկությամբ հայտնաբերված «Բիլայն» օպերատորի բջջային հեռախոսաքարտի պլաստիկով, որի վրա առկա է եղել ձեռագիր կապույտ գրիչով կատարված 043-38-09-54 գրառումը, որով նա կապ է հաստատել Արտուշ Այվազյանի հետ։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Զոհրաբ Վահանի Ստեփանյանի մոտ, նրա կալանավայրում հայտնաբերված և առգրավված «Samsung Duos GU46» մոդելի բջջային հեռախոսով, որի մեջ առկա է եղել 098-81-18-82 բջջային հեռախոսաքարտը, որով հիմնավորվել է Զոհրաբ Ստեփանյանի կողմից կալանավայրում բջջային հեռախոս օգտագործելու հանգամանքը։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Զոհրաբ Վահանի Ստեփանյանի մոտ, նրա կալանավայրում հայտնաբերված և առգրավված «Iphone 5» մոդելի բջջային հեռախոսով, որով հիմնավորվել է Զոհրաբ Ստեփանյանի կողմից կալանավայրում բջջային հեռախոս օգտագործելու հանգամանքը։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, «Samsung E 1272» մոդելի երկքարտանի բջջային հեռախոսով, որի մեջ առկա են եղել 096-69-69-66 և 099-39-99-93 բջջային հեռախոսաքարտերը, որոնցով ֆիքսվել են գործի համար նշանակություն ունեցող հեռախոսազանգեր։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Արտուշ Այվազյանի «Iphone 5» մոդելի՝ imei։013431003887868 գործարանային համարով բջջային հեռախոսով, որի մեջ առկա է եղել 093-222-555 բջջային հեռախոսահամարը, որը գաղտնալսվել է և արձանագրվել են գործի համար նշանակություն ունեցող հեռախոսազանգեր։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Արտուշ Այվազյանի «Alcatel one touch 1013x» մոդելի բջջային հեռախոսով, որի մեջ առկա է եղել 055-88-75-50 բջջային հեռախոսաքարտը, որը գաղտնալսվել է և արձանագրվել են գործի համար նշանակություն ունեցող հեռախոսազանգեր։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, Աշոտ Արայի Ադամյանի անձնական խուզարկությամբ հայտնաբերված և առգրավված «Nokia 1800» մոդելի՝ 354322/04/875515/1 գործարանային համարով բջջային հեռախոսով, որի մեջ առկա է եղել 077-58-42-35 բջջային հեռախոսաքարտը և գործի համար նշանակություն ունեցող տվյալներ։
/դատական նիստի արձանագրություն, հատոր 12, գ.թ. 38-46, 235-236/
Որպես այլ փաստաթուղթ ապացույց ճանաչված, 2016թ. նոյեմբերի 14-ին ՀՀ ԱԱԾ ՀՀԳՎ 7-րդ բաժնից ստացված, Մոհսեն Խալիլի Սալմանի Ղարիչեհի՝ ՀՀ սահմանահատումների վերաբերյալ տեղեկատվություն պարունակող փաստաթղթերով /ՍԷԿՏ համակարգ/, որոնց համաձայն` Մոհսեն Խալիլի Սալմանի Ղարիչեհը 2016թ. փետրվարի 23-ի ժամը 05։20-ին, Մեղրի սահմանային անցակետով, ԻԻՀ քաղաքացու թիվ W22615399 անձնագրով մուտք է գործել ՀՀ։
/դատական նիստի արձանագրություն, հատոր 12, գ.թ. 3-5, 219-220, 222/
Որպես այլ փաստաթուղթ ապացույց ճանաչված, Արտուշ Այվազյանի օգտագործած 093-22-25-55 և 055-88-75-50 հեռախոսահամարների գաղտնալսումները պարունակող «Verbatim» ֆիրմայի «5-185-16» և «N51» գրառումներով, ինչպես նաև «Verbatim» ֆիրմայի «5-184-16» և «N52» գրառումներով թվով 2 սկավառակներով, որոնցում առկա հեռախոսային խոսակցությունների հետազոտմամբ հաստատվել է հետևյալը.
2016թ. փետրվարի 12-ին, ժամը 14։14։02-ին, ամբաստանյալ Արտուշ Այվազյանը վկա Վերոնիկա Ղուլյանից ճշտում է, թե արդյոք կապնվել է մեկ այլ անձի հետ, ինչին Վերոնիկա Ղուլյանը դրական է պատասխանում և հայտնում է, որ նա պատրաստ է գալ, սակայն նրան գումար է անհրաժեշտ։ Ամբաստանյալ Արտուշ Այվազյանն ասում է, որ թող նա գա՝ «Քաչալը» փողերը կտա, խնդրում է վկա Վերոնիկա Ղուլյանին մեկ այլ անձից ճշտել, թե կոնկրետ երբ է գալու՝ ավելացնելով, որ նրան գումարով չեն նեղացնի։
2016թ. փետրվարի 12-ին, ժամը 14։56։18-ին, վկա Վերոնիկա Ղուլյանն ամբաստանյալ Արտուշ Այվազյանին ասում է, որ կապնվել է մեկ այլ անձի հետ, ով շատ լավ «գաթաներ» բերելու համար 1500 ԱՄՆ դոլար գումար է ուզում, ինչին ամբաստանյալ Արտուշ Այվազյանը պատասխանում է, որ կարող է 1000 ԱՄՆ դոլար ուղարկել, ընդ որում՝ մեկ այլ անձն ամբաստանյալ Արտուշ Այվազյանին ճանաչում է որպես Արթուր։ Վկա Վերոնիկա Ղուլյանն ամբաստանյալ Արտուշ Այվազյանին ասում է, որ գումարն ուղարկելու հաջորդ օրը տվյալ անձը կգա։
2016թ. փետրվարի 23-ին, ժամը 17։33։57-ին, ամբաստանյալ Մոհսեն Խալիլի Սալմանի Ղարիչեհն ամբաստանյալ Արտուշ Այվազյանին դիմում է Արթուր անունով, որից հետո արտաբերում է «հոթել Բելլա» խոսքերը, իսկ ամբաստանյալ Արտուշ Այվազյանը պատասխանում է, որ հասկացել է։
2016թ. փետրվարի 23-ին, ժամը 18։10։29-ին, ամբաստանյալ Մոհսեն Խալիլի Սալմանի Ղարիչեհն ամբաստանյալ Արտուշ Այվազյանին ասում է, որ հոթելի փարկինգում է, ամբաստանյալ Արտուշ Այվազյանն անգլերեն լեզվով ասում է, որ այդտեղ է, հասկացնում է, որ մեքենայի ձայնային ազդանշան է տալիս, ինչից հետո ամբաստանյալ Մոհսեն Խալիլի Սալմանի Ղարիչեհը նկատում է նրան։
2016թ. փետրվարի 12-ին, ժամը 19։57։57-ին, ամբաստանյալ Արտուշ Այվազյանն ամբաստանյալ Արմեն Մարտիրոսյանին ասում է, որ հինգ օր սպասելուց հետո «լավ կլինի», սակայն անհրաժեշտ է «1» մանեթ դոլար ուղարկել, իսկ ամբաստանյալ Արմեն Մարտիրոսյանն առաջարկում է գործերը վերջացնելուց հետո հանդիպել։
2016թ. փետրվարի 14-ին, ժամը 23։36։49-ին, վկա Վերոնիկա Ղուլյանն ամբաստանյալ Արտուշ Այվազյանին ասում է, որ խոսել է ամբաստանյալ Մոհսեն Ղարիչեհի հետ, ով ասել է, որ 1000 ԱՄՆ դոլարը շտապ ուղարկել, որից հետո ինքն ապրանքը կվերցնի և կգա, ինչքան շուտ գումարն ուղարկվի, այնքան շուտ ամբաստանյալ Մոհսեն Ղարիչեհը կգա։
2016թ. փետրվարի 15-ին, ժամը 16։16։57-ին, ամբաստանյալ Արտուշ Այվազյանը վկա Վերոնիկա Ղուլյանի հետ խոսում է 1000 ԱՄՆ դոլար գումարն ամբաստանյալ Մոհսեն Ղարիչեհին ուղարկելու մասին։ Ամբաստանյալ Արտուշ Այվազյանն ասում է, որ գումարն ինչքան շուտ ուղարկեն, ավելի լավ կլինի իրենց համար։
2016թ. փետրվարի 15-ին, ժամը 17։09։08-ին, վկա Վերոնիկա Ղուլյանն ամբաստանյալ Արտուշ Այվազյանին ասում է, որ կրկին խոսել է ամբաստանյալ Մոհսեն Ղարիչեհի հետ և նա ասել է, որ Հանրապետության հրապարակի մոտ գործում է «Ռոյալ Սարաֆի» անունով ընկերություն, որի միջոցով հնարավոր է գումարը փոխանցել։
2016թ. փետրվարի 17-ին, ժամը 22։50։14-ին, ամբաստանյալ Արտուշ Այվազյանն ամբաստանյալ Արմեն Մարտիրոսյանին ասում է, որ իրեն քաշել է, քանի որ գումարը ստեղ պետք է մուծվի։
2016թ. փետրվարի 20-ին, ժամը 19։55։28-ին, վկա Վերոնիկա Ղուլյանն ամբաստանյալ Արտուշ Այվազյանին ասում է, որ ամբաստանյալ Մոհսեն Ղարիչեհն էր զանգել, ինքն ասել է, որքան հնարավոր է շուտ գա, «Քաչալը» բան կանի։ Ամբաստանյալ Մոհսեն Ղարիչեհն ասել է, որ 2016թ. փետրվարի 21-ին կամ 22-ին ստեղ կլինի։
2016թ. փետրվարի 22-ին, ժամը 15։27։26-ին, ամբաստանյալ Արմեն Մարտիրոսյանն ամբաստանյալ Արտուշ Այվազյանից հետաքրքրվում է, թե ինչ կա, ինչ ունեն, ինչ չունեն, հարցնում է, թե արդյոք նրանք կարող է էլի սկսեն՝ 21-ը դարձավ 23։ Ամբաստանյալ Արտուշ Այվազյանն ասում է, որ եթե այսօր չհասնեն՝ վաղը հաստատ ստեղ կլինի միլիարդ տոկոս։
2016թ. փետրվարի 23-ին, ժամը 16։23։04-ին, ամբաստանյալ Արտուշ Այվազյանն ամբաստանյալ Արմեն Մարտիրոսյանին ասում է, որ պատրաստ լինել։ Ամբաստանյալ Արմեն Մարտիրոսյանը հետաքրքրվում է, թե որքան ժամանակից կլինի, իսկ ամբաստանյալ Արտուշ Այվազյանն ասում է, որ մոտ երեք ժամից։ Ամբաստանյալ Արմեն Մարտիրոսյանը հարցնում է, թե արդյոք ինքան է լինելու՝ քանի «կիլոմետր», իսկ ամբաստանյալ Արտուշ Այվազյանը պատասխանում է, որ իր իմանալով 200 է, սակայն հնարավոր է փոքր ինչ շատ։
/դատական նիստի արձանագրություն, հատոր 12, գ.թ. 39-42, 222/
Որպես այլ փաստաթուղթ ապացույց ճանաչված, Արմեն Մարտիրոսյանի օգտագործած 098-75-88-10 և 098-10-88-10 հեռախոսահամարների գաղտնալսումներ պարունակող «Verbatim» ֆիրմայի «5-188-16» և «N50» գրառումներով, «Verbatim» ֆիրմայի «5-135-16» և «N49» գրառումներով, «Princo» ֆիրմայի «5-1032-15» և «686» գրառումներով, ինչպես նաև «Princo» ֆիրմայի «5-1032-15» և «33» գրառումներով թվով 4 սկավառակներով, որոնցում առկա հեռախոսային խոսակցությունների համաձայն, ի թիվս այլ խոսակցությունների՝ 2016թ. փետրվարի 15-ին, ժամը 16։50։22-ին, ամբաստանյալ Արտուշ Այվազյանն ամբաստանյալ Արմեն Մարտիրոսյանին հարցնում է, թե արդյոք 1000 ԱՄՆ դոլարը լինում է, թե ոչ, ինչին ի պատասխան ամբաստանյալ Արմեն Մարտիրոսյանն իր մոտ է կանչում ամբաստանյալ Արտուշ Այվազյանին։
/դատական նիստի արձանագրություն, հատոր 12, գ.թ. 39-42, 222/
Որպես այլ փաստաթուղթ ապացույց ճանաչված, Վերոնիկա Լիպարիտի Ղուլյանի օգտագործած 093-93-26-86 հեռախոսահամարի գաղտնալսումներ պարունակող «Verbatim» ֆիրմայի «5-206-16» և «N53» գրառումներով սկավառակով։
/դատական նիստի արձանագրություն, հատոր 12, գ.թ. 39-46, 222/
Արմեն Հրաչյայի Մարտիրոսյանն առաջադրված մեղադրանքում իրեն մեղավոր է ճանաչել մասնակիորեն՝ միայն ՀՀ քրեական օրենսգրքի 268-րդ հոդվածի 2-րդ մասի 2-րդ կետով և ցուցմունքներ է տվել այն մասին, որ 2015 թվականից օգտագործել է «մեթամֆետամին» տեսակի թմրամիջոց, որը ձեռք է բերել տարբեր անձանցից։ Երբևէ թմրամիջոցներ այլ անձի չի տվել, չի իրացրել կամ հյուրասիրել։ Իր հետ բերման ենթարկված` Վաղարշ Մարտիրոսյանն իր ընկերն է, իսկ Հրանտ Սարգսյանը՝ նրա վարորդը։ Տեղյակ չէ, թե արդյոք վերջիններս թմրամիջոցներ օգտագործել են, թե ոչ։ Իր բջջային հեռախոսահամարներն են եղել 096-69-69-66, 098-10-88-10, 098-75-88-10 և 099-39-99-93։ 2016թ. փետրվարի 22-ին իր «Աուդի Ա4» մակնիշի 41 111 հ/հ ավտոմեքենայում ոչ մեկին «մեթամֆետամին» տեսակի թմրամիջոց չի իրացրել։ Մեքենայում եղած ապակյա գլանակը պատկանել է իրեն, դրանով ծխել է «մեթամֆետամին» տեսակի թմրամիջոց։ Ճանաչել է «Տյուշ» մականվամբ Արտուշ Էդուարդի Այվազյանին, նրա հետ ծանոթացել է ակումբում։ Արտուշ Այվազյանից կամ նրա միջոցով երբևէ թմրամիջոցներ ձեռք չի բերել։ Զորո անունով անձի չի ճանաչել։ Վաղարշ Մարտիրոսյանի «Տոյոտա Քեմրի» մակնիշի ավտոմեքենայի մեջ եղած «Նոկիա» հեռախոսի կափարիչի տակ եղել է իր՝ 0,0638 գրամ «մեթամֆետամին» տեսակի թմրամիջոցը, դրա մասին այդ ավտոեքենայում գտնված Վաղարշ Մարտիրոսյանը և Հրանտ Սարգսյանը չեն իմացել, այն եղել է իր օգտագործման համար։
1000 ԱՄՆ դոլար գումարը վերաբերել է գիշերային ակումբի համար դիջեյ բերելուն։ Թմրամիջոցներ երբևի չի վաճառել։ Աշոտ Ադամյանին թմրամիջոց տվել է, սակայն չի վաճառել։ Իր ծանոթի խնդրանքով իր թմրամիջոցներից տվել է նրան, քանի որ ինքը նույնպես թմրամոլ է եղել և փորձել է այդ կերպ օգնել նրան, որպեսզի անհրաժեշտության դեպքում իրեն էլ օգնեն։ Իրեն գումար չեն տվել, այդ պատճառով է, որ իրեն ձերբակալելիս մի քանի ժամ հետո՝ իր մոտ գումար չի եղել։ Ինքն Աշոտ Ադամյանին տվել է իր մոտ հայտնաբերված թմրամիջոցի կեսը։ Նրա մոտ հայտնաբերված թմրամիջոցն ինքը չի տվել նրան։ Աշոտ Ադամյանի հետ նախկինում չի առընչվել և չի ճանաչել, սակայն իմացել է, որ նա թմրամիջոց օգտագործող է։ Կարծում է, որ Աշոտ Ադամյանը պետք է դատապարտվի, քանի որ նա է առընչվել տարբեր դրվագներով թմրամիջոցների իրացմանը։
Արտուշ Այվազյանի հետ ծանոթացել է ակումբի գործունեության առընչությամբ՝ դիջեյներ ապահովելու գործնական հարցերով։
Շուրջ երկու տարի երեք ամիս օգտագործել է թմրամիջոց։ Զորիկն իրենից ուզել է կես կամ 0.5 գրամ թմրամիջոց, բայց ինքն այդքան չի ունեցել, սակայն տվել է մեկ կամ երկու անգամ օգտագործելու համար։ Արտուշ Այվազյանի ցուցմունքներից չի ընդունում գումարի և դրա չափի հանգամանքը։ Ինքը թմրամիջոց ձեռք է բերել տարբեր անձանցից՝ իր օգտագործման համար։ Իր մականունը «գիլթի» է եղել։ Իրեն քյաչալ մականունով չեն դիմել։ «Քյաչալ»-ն Արտուշ Այվազյանի ծանոթն է եղել՝ Վրաստանից։
/դատական նիստի արձանագրություն, հատոր 1, գ.թ. 198-199, 248-249, հատոր 2, գ. թ. 1-2, 116, հատոր 10, գ.թ. 67, հատոր 11, գ.թ. 21, 128, 218, 306, հատոր 12, գ.թ. 199, 230-231/
Մոհսեն Խալիլի Սալմանի Ղարիչեհն առաջադրված մեղադրանքում իրեն մեղավոր չի ճանաչել և ցուցմունքներ է տվել այն մասին, որ Վահիդ Աքբարի առաջարկով, շրջագայության համար եկել է ՀՀ։ ԻԻՀ-ում հանդիպել են Վահիդի՝ Ավո անվամբ ծանոթին, ով ՀՀ-ում նախկինում աշխատել է որպես մեխանիկ։ Ավոն և Վահիդ Աքբարն առանձնացել են մոտ 30 րոպեով, որից հետո իրենք հատել են սահմանը և տաքսիով հասել են Երևանի «Բելլա» հյուրանոցային համալիր, տեղավորվել են թիվ 7 սենյակում, որտեղ դասավորել են իրենց իրերը։ Դրանից որոշ ժամանակ անց Վահիդ Աքբարը մտել է զուգարան, որտեղ մնացել է մոտ 20 րոպե և դուրս է եկել։ Վահիդ Աքբարից հետո ինքն է մտել զուգարան և նկատել է թաշկինակներ, անձեռոցիկներ և լեյկոպլաստ, որի վրա եղել են շատ մազեր։ Վահիդ Աքբարիին հարցրել է, թե դրանք ինչ են և նա պատասխանել է, որ դրանցով փաթեթավորված փաթեթները հետանցքում պահելով՝ անցկացրել է իրանա-հայկական սահմանը, իսկ վրայի մազերը` հետանցքի մազերն են, որից հետո ցույց է տվել թվով 3 վարդագույն-մանուշակագույն փաթեթներ։ Դրանցից երկուսը Վահիդ Աքբարը փաթաթել է անձեռոցիկով և տվել է իրեն` հրահանգելով դրանք դնել աճուկային մասում և փոխանցել Արթուր անվամբ նրա ծանոթին, ում կճանաչի մեքենայի ազդանշանի միջոցով։ Մինչ դուրս գալը Վահիդ Աքբարն ասել է, որ Արթուրը փաթեթների դիմաց 10 հատ 100 ԱՄՆ դոլարանոց կտա, իսկ եթե նույնիսկ չտա՝ ինքը թող փաթեթներն ամեն դեպքում տա նրան։ Դուրս է եկել հյուրանոցից, նստել նշված ավտոմեքենայի վարորդի կողքի նստատեղին և շարժվել են, որից հետո իրենց բերման են ենթարկել ոստիկանական բաժին։ Ինքը տեղյակ չի եղել Վահիդ Աքբարի կողմից թմրամիջոցներ ՀՀ տեղափոխելու մասին, դա, իր մտածելով, Ավոն է տվել Վահիդ Աքբարին։ Բացի այդ դեպքը, Արթուրին ևս մեկ անգամ տեսել է նախկինում, երբ Վահիդ Աքբարի հետ նա հյուրանոց է եկել։
Արտուշ Այվազյանին ճանաչել է, որպես Արթուր։ Նրա հետ ծանոթացել է Վահիդ Աքբարի և Վերոնիկայի միջոցով։ Արտուշ Այվազյանը եկել է հյուրանոց Վահիդ Աքբարին տեսնելու համար և այդպես ծանոթացել են։ Վահիդ Աքբարն իրեն առաջարկել է Արթուրին թմրամիջոց տալ՝ ասելով, որ նա իր ընկերն է և ամաչել է անձամբ վաճառել։ Վերոնիկայի միջոցով խոսելիս՝ իրեն պարզ է դարձել, որ ևս մեկի համար էլ է թմրամիջոց նախատեսված, ում անունը «քյաչալ» է եղել և Վրաստանից է եկել։ Վահիդ Աքբարի հետ առերում է կատարվել, սակայն քննիչը նրան է օգնել, որպեսզի նրան բաց թողնի։
Նախաքննության ընթացքում շփոթված է եղել և որոշ հանգամանքներ սխալ է ասել։ Շուրջ հինգ ամիս եղել է թմրամիջոցների ազդեցության տակ։ Ինքն Արթուրին պետք է տար երեք գրամ և ոչ թե իր աճուկային շրջանում պահվող թմրամիջոցը։ Քննիչին այլ կերպ է պատմել՝ շփոթված լինելու պատճառով։
/հատոր 2, գ.թ. 34, 95-100, 108-110, 160, հատոր 10, գ.թ. 71, հատոր 12, գ.թ. 251-252/
Արտուշ Էդուարդի Այվազյանն առաջադրված մեղադրանքում իրեն մեղավոր չի ճանաչել, հրաժարվել է ցուցմունքներ տալուց և հարցերին պատասխանելուց, սակայն նախկինում ցուցմունքներ է տվել այն մասին, որ 2015 թվականից օգտագործել է 055-88-75-50 հեռախոսահամարը, իսկ մոտ 2013 թվականից՝ 093-22-25-55 հեռախոսահամարը։ Օգտագործել է մարիխուանա տեսակի թմրամիջոց, որը քաղել է Հրազդանի կիրճից։ 2015 թվականի սկզբներին ծանոթացել է Մոհսեն Խալիլի Ղարիչեհի հետ, ով զբաղվել է «մեթամֆետամին» տեսակի թմրամիջոցի առևտրով։ Նա հայերեն չի խոսել։ 2016 թվականի փետրվարի 19-ին կամ 20-ին Մոհսեն Խալիլի Ղարիչեհը զանգահարել է իրեն՝ պարսկական համարից և հայտնել, որ գալիս է Երևան։ 2016թ. փետրվարի 23-ի կեսօրին Մոհսեն Խալիլի Ղարիչեհը զանգահարել է իրեն՝ հայկական անծանոթ հեռախոսահամարից, արտաբերել «Բելլա» բառը, որից հետո ինքը գնացել է Երվանդ Քոչար փողոցի վրա գտնվող նշված հյուրանոց, զանգահարել է Մոհսեն Խալիլի Ղարիչեհին և հայտնել, որ կայանատեղիում է։ Մոհսեն Խալիլի Ղարիչեհն իջել է, նստել իր ավտոմեքենան և իրենք շարժվել են։ Ճանապարհին Մոհսեն Խալիլի Ղարիչեհը ծխախոտի պոլիէթիլենային թաղանթի մեջ իրեն է փոխանցել 3-4 գրամ «մեթամֆետամին» տեսակի թմրամիջոց, սակայն չի հասցրել օգտագործել, քանի որ մոտեցել են ոստիկանները, իսկ թմրամիջոցը գցել է փոխանցման տուփի ներքևում գտնվող գրպանիկի մեջ, որը հետագայում իր ներկայությամբ ոստիկաններն առգրավվել են։
Ճանաչել է Արմեն Մարտիրոսյանին, ծանոթացել են ինչ-որ ակումբում, նրանից երբևէ թմրամիջոցներ չի վերցրել։ Թմրամիջոցներ երբեք չի իրացրել, իսկ իր մոտից առգրավված «մեթամֆետամին» տեսակի թմրամիջոցն իր անձնական օգտագործման համար է նախատեսված եղել։ Վահիդ Աքբարին տեսել է Մոհսեն Խալիլի Ղարիչեհի հետ, սակայն թմրանյութերի հետ կապված պայմանավորվածությունները ձեռք է բերել վերջինիս հետ։
Վրացի ծանոթ է ունեցել՝ Բեսո անվամբ, որին «քյաչալ» են ասել։ Արմեն Մարտիրոսյանից 1000 ԱՄՆ դոլար գումար է խնդրել, իսկ նա մերժել է իրեն։ Ինքն ուղարկել է 500 ԱՄՆ դոլար գումար՝ իր համար 3 գրամ թմրամիջոց ձեռք բերելու նպատակով։ Իրեն առաջադրված մեղադրանքի հետ Արմեն Մարտիրոսյանն որևէ կապ չունի։ Վերջինս թմրամիջոցը ձեռք բերելու համար Մոհսեն Խալիլի Ղարիչեհի հետ է կապ ունեցել։ Իսկզբանե, Վերոնիկայի մեջոցով խոսելիս ավելի շատ է ուզել ձեռք բերել՝ 6-7 գրամ՝ 1000 ԱՄՆ դոլար գումարով, սակայն կարողացել է 500 ԱՄՆ դոլար գումար ձեռք բերել։ Ինքն Արմեն Մարտիրոսյանին էլ է «քյաչալ» ասել։
/հատոր 1, գ.թ. 169-171, հատոր 2, 108-110, 168, հատոր 10, գ.թ. 73, 255, հատոր 11, գ.թ. 23, 92, 305, հատոր 12, գ.թ. 261-262/


Դատարանի իրավական վերլուծությունները

Ստուգելով ամբաստանյալների, վկաների ցուցմունքները, համադրելով դրանք քրեական գործով ձեռք բերված և հետազոտված մյուս ապացույցների հետ, գնահատելով դրանք վերաբերելիության, թույլատրելիության, իսկ ամբողջ ապացույցներն իրենց համակցությամբ` գործի լուծման համար բավարարության տեսանկյունից, իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ` դատարանը գտնում է, որ ամբաստանյալներից յուրաքանչյուրին առաջադրված մեղադրանքները հիմնավորող ցուցմունքներն արժանահավատ են, հաստատվում են քրեական գործի քննությամբ ձեռք բերված և հետազոտված ապացույցների համակցությամբ, իսկ ամբաստանյալ Արմեն Մարտիրոսյանի ցուցմունքը թմրամիջոցներ իրացնելու հետ կապ չունենալու և Մոհսեն Խալիլի Սալմանի Ղարիչեհի ցուցմունքը՝ իրանահայկական սահմանով թմրամիջոց չանցկացնելու և այն չիրացնելու, ամբաստանյալներից և վկաներից յուրաքանչյուրի ցուցմունքներն՝ առաջադրված մեղադրանքն այլ պատճառաբանություններով հերքելու վերաբերյալ` իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու հարցում ամբաստանյալներին օգնելու նպատակ են հետապնդում և հերքվում են վերոհիշյալ ապացույցներով։
Այդ վերլուծությունների արդյունքում դատարանը գտնում է, որ ամբաստանյալ Արմեն Հրաչյայի Մարտիրոսյանի կողմից, նրա մեղավորությամբ, մի խումբ անձանց հետ նախնական համաձայնությամբ, իրացնելու նպատակով թմրամիջոցներ ապօրինի ձեռք բերելը, որը կատարվել է առանձնապես խոշոր չափերով՝ հիմնավորված է, նրա արարքը ճիշտ է որակված և համապատասխանում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցագործության հատկանիշներին։
Ամբաստանյալ Արմեն Մարտիրոսյանի կողմից, նրա մեղավորությամբ, թմրամիջոցներ ապօրինի իրացնելու փորձ կատարելը, որը կատարվել է առանձնապես խոշոր չափերով՝ նույնպես հիմնավորված է, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով նախատեսված հանցագործության հատկանիշներին։
Ամբաստանյալ Արմեն Մարտիրոսյանի կողմից, նրա մեղավորությամբ, առանց իրացնելու նպատակի թմրամիջոցներ ձեռք բերելը և պահելը, որը կատարվել է խոշոր չափերով՝ ապացուցված չէ, նրա այդ արարքը ճիշտ չէ որակված և չի համապատասխանում ՀՀ քրեական օրենսգրքի 268-րդ հոդվածի 2-րդ մասի 2-րդ կետով նախատեսված հանցագործության հատկանիշներին։
Ապացուցված է ամբաստանյալ Արմեն Մարտիրոսյանի կողմից, նրա մեղավորությամբ, առանց իրացնելու նպատակի թմրամիջոցներ ձեռք բերելը և պահելը, որը կատարվել է զգալի չափերով, ուստի նրա արարքը համապատասխանում է ՀՀ քրեական օրենսգրքի 268-րդ հոդվածի 1-ին մասով նախատեսված հանցագործության հատկանիշներին՝ հետևյալ պատճառաբանությամբ.
ՀՀ Սահմանադրության 63-րդ հոդվածի 1-ին մասի համաձայն`
«1. Յուրաքանչյուր ոք ունի անկախ և անաչառ դատարանի կողմից իր գործի արդարացի, հրապարակային և ողջամիտ ժամկետում քննության իրավունք։»։
«Մարդու իրավունքների և հիմնարար ազատությունների պաշտպանության մասին» Եվրոպական կոնվենցիայի 6-րդ հոդվածի համաձայն`
«1. Յուրաքանչյուր ոք« երբ որոշվում են նրա քաղաքացիական իրավունքներն ու պարտականությունները կամ նրան ներկայացված ցանկացած քրեական մեղադրանքի առնչությամբ« ունի օրենքի հիման վրա ստեղծված անկախ ու անաչառ դատարանի կողմից ողջամիտ ժամկետում արդարացի և հրապարակային դատաքննության իրավունք (…)։
2. Յուրաքանչյուր ոք, ով մեղադրվում է քրեական հանցագործության մեջ, անմեղ է համարվում, մինչև որ նրա մեղավորությունը չապացուցվի օրենքին համապատասխան։(…)»։
ՀՀ քրեական օրենսգրքի 3-րդ հոդվածի համաձայն`
«Քրեական պատասխանատվության միակ հիմքը հանցանք, այսինքն` այնպիսի արարք կատարելն է, որն իր մեջ պարունակում է քրեական օրենքով նախատեսված հանցակազմի բոլոր հատկանիշները։»։
ՀՀ քրեական օրենսգրքի 12-րդ հոդվածի 1-ին մասի համաձայն`
«Արարքի հանցավորությունը և պատժելիությունը որոշվում են դա կատարելու ժամանակ գործող քրեական օրենքով։»
Նույն օրենսգրքի 13-րդ հոդվածի 1-ին մասի համաձայն`
«Արարքի հանցավորությունը վերացնող, պատիժը մեղմացնող կամ հանցանք կատարած անձի վիճակն այլ կերպ բարելավող օրենքը հետադարձ ուժ ունի, այսինքն՝ տարածվում է մինչև այդ օրենքն ուժի մեջ մտնելը համապատասխան արարք կատարած անձանց, այդ թվում՝ այն անձանց վրա, ովքեր կրում են պատիժը կամ կրել են դա, սակայն ունեն դատվածություն։»։
Նույն օրենսգրքի 268-րդ հոդվածի 1-ին և 2-րդ մասերի համաձայն`
«Առանց իրացնելու նպատակի զգալի չափերով թմրամիջոցներ կամ հոգեմետ (հոգեներգործուն) նյութեր ապօրինի պատրաստելը, վերամշակելը, ձեռք բերելը, պահելը, փոխադրելը կամ առաքելը
պատժվում է կալանքով առավելագույնը երկու ամիս ժամկետով, կամ ազատազրկմամբ առավելագույնը մեկ տարի ժամկետով։
Նույն արարքները, որոնք կատարվել են (...)
2) խոշոր չափերով
պատժվում են ազատազրկմամբ՝ առավելագույնը երեք տարի ժամկետով։»։
«Թմրամիջոցների և հոգեմետ /հոգեներգործուն/ նյութերի զգալի, խոշոր և առանձնապես խոշոր չափերը» սահմանող ՀՀ քրեական օրենսգրքի թիվ 1 հավելվածի 100-րդ կետում նշված՝ «մետամֆետամին» տեսակի թմրամիջոցի խոշոր չափ սահմանված է՝ 0.02-1.5 գրամը։
«Թմրամիջոցների և հոգեմետ /հոգեներգործուն/ նյութերի մանր, զգալի, խոշոր և առանձնապես խոշոր չափերը» սահմանող ՀՀ կառավարության 2018թ. հունիսի 27-ի թիվ 707 որոշման 107-րդ կետում նշված՝ «մետամֆետամին» տեսակի թմրամիջոցի զգալի չափ սահմանվել է 0.05-0.25 գրամը։
Դատարանը գտնում, որ ամբաստանյալ Արմեն Մարտիրոսյանի կողմից, առանց իրացնելու նպատակի, ապօրինի ձեռք բերված և պահված՝ 0,0638 գրամ քաշով «մետամֆետամին» տեսակի թմրամիջոցի չափը համապատասխանում է «Թմրամիջոցների և հոգեմետ /հոգեներգործուն/ նյութերի մանր, զգալի, խոշոր և առանձնապես խոշոր չափերը» սահմանող ՀՀ կառավարության 2018թ. հունիսի 27-ի թիվ 707 որոշման 107-րդ կետում նշված՝ տվյալ տեսակի թմրամիջոցի զգալի չափին։
Դատարանը գտնում է նաև, որ ամբաստանյալ Մոհսեն Խալիլի Սալմանի Ղարիչեհի կողմից, նրա մեղավորությամբ, մի խումբ անձանց հետ նախնական համաձայնությամբ իրացնելու նպատակով թմրամիջոցներ ապօրինի պահելը և փոխադրելը, որը կատարվել է առանձնապես խոշոր չափերով՝ հիմնավորված է, նրա արարքը ճիշտ է որակված և համապատասխանում է ՀՀ քրեական օրենսգրքի 266-րդ հոդվածի 3-րդ մասի 2-րդ կետով նախատեսված հանցագործության հատկանիշներին։
Ամբաստանյալ Մոհսեն Խալիլի Սալմանի Ղարիչեհի կողմից, նրա մեղավորությամբ, Հայաստանի Հանրապետության պետական սահմանով թմրամիջոցների մաքսանենգությունը, որը կատարվել է առանձնապես խոշոր չափերով՝ հիմնավորված է, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 267.1-րդ հոդվածի 4-րդ մասի 1-ին կետով նախատեսված հանցագործության հատկանիշներին։
Ամբաստանյալ Արտուշ Էդուարդի Այվազյանի կողմից, նրա մեղավորությամբ, մի խումբ անձանց հետ նախնական համաձայնությամբ թմրամիջոցներ ապօրինի իրացնելու փորձ կատարելը, որը կատարվել է առանձնապես խոշոր չափերով՝ հիմնավորված է, նրա արարքը ճիշտ է որակված և համապատասխանում է ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով նախատեսված հանցագործության հատկանիշներին։
Քննելով ամբաստանյալներից յուրաքանչյուրի նկատմամբ պատիժ նշանակելու հարցը` դատարանը գտնում է հետևյալը.
ՀՀ քրեական օրենսգրքի 10-րդ հոդվածի համաձայն`
«Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար»։
ՀՀ քրեական օրենսգրքի 48-րդ հոդվածի 2-րդ մասի համաձայն`
«Պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները»։
ՀՀ քրեական օրենսգրքի 61-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները։
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում պատասխանատվությունը և պատիժը մեղմացնող կամ ծանրացնող հանգամանքներով։
3. Հանցագործության համար նախատեսված պատիժներից առավել խիստը նշանակվում է, եթե նվազ խիստ տեսակը չի կարող ապահովել պատժի նպատակները։»։
ՀՀ վճռաբեկ դատարանը Կարեն Տիգրանի Հարությունյանի վերաբերյալ ՎԲ-201/07 քրեական գործով վերլուծելով ՀՀ քրեական օրենսգրքի Ընդհանուր մասի մի շարք դրույթներ, մասնավորապես` ՀՀ քրեական օրենսգրքի 10-րդ, 48-րդ և 61-րդ հոդվածները` 2007 թվականի նոյեմբերի 30-ին կայացված որոշմամբ արտահայտել է հետևյալ իրավական դիրքորոշումները.
«4. (…) ՀՀ քրեական օրենսգրքի 48-րդ հոդվածի 2-րդ մասի համաձայն` պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները։ Սոցիալական արդարությունը վերականգնելու նպատակը բխում է արդարության և պատասխանատվության անհատականացման սկզբունքն ամրագրած ՀՀ քրեական օրենսգրքի 10-րդ հոդվածի բովանդակությունից։ Այն սահմանում է, որ հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի, համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար։ Սոցիալական արդարության վերականգնումը հնարավոր է, եթե հանցանք կատարած անձի նկատմամբ նշանակվի այնպիսի պատիժ, որն անհրաժեշտ ու բավարար է նրան ուղղելու և նոր հանցագործությունները կանխելու համար։
Պատիժ նշանակելու արդարության սկզբունքը դրսևորվում է օրենքով նախատեսված մի շարք պահանջներով։ ՀՀ քրեական օրենսգրքի 61-րդ հոդվածի 1-ին մասը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ։ Նույն հոդվածի 3-րդ մասի համաձայն՝ պատժի տեսակը և չափը որոշվում է հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում՝ պատասխանատվությունը և պատիժը մեղմացնող կամ ծանրացնող հանգամանքներով։ Պատիժը համարվում է արդարացի, եթե դատարանը ճիշտ է գնահատում գործի բոլոր հանգամանքները, անձին բնութագրող բոլոր տվյալները և քրեական օրենքով նախատեսված պահանջներից ելնելով, հանցագործության մեջ մեղավոր անձի նկատմամբ նշանակում է այնպիսի պատիժ, որն անհրաժեշտ և բավարար է այդ անձին ուղղելու և նրա կողմից նոր հանցանքի կատարումը կանխելու համար։ (…)»։
ՀՀ քրեական օրենսգրքի 266-րդ հոդվածի 3-րդ մասի 2-րդ կետի սանկցիան պատիժ է նախատեսում միայն ազատազրկման ձևով՝ գույքի բռնագրավմամբ կամ առանց դրա, ՀՀ քրեական օրենսգրքի 267.1-րդ հոդվածի 4-րդ մասի 1-ին կետի սանկցիան նույնպես պատիժ է նախատեսում միայն ազատազրկման ձևով՝ գույքի բռնագրավմամբ, իսկ ՀՀ քրեական օրենսգրքի 268-րդ հոդվածի 1-ին մասի սանկցիան անյլընտրանքային է` պատիժ է նախատեսում ինչպես կալանքի, այնպես էլ ազատազրկման ձևով։
Պատժի տեսակների միջև ճիշտ ընտրություն կատարելու և արարքի բնույթն ու հանրային վտանգավորության աստիճանը գնահատելու հարցերին ՀՀ վճռաբեկ դատարանն անդրադարձել է Գ. Մադաթյանի վերաբերյալ ԵՇԴ/0029/01/08 քրեական գործով 2009 թվականի փետրվարի 17-ի որոշման մեջ, որտեղ արտահայտել է հետևյալ իրավական դիրքորոշումները.
«(…)14. Արարքի հանրային վտանգավորության բնույթը հանցագործության որակական կողմն է, այն որոշվում է մեղքի ձևի և տեսակի, հանցագործության նպատակի և շարժառիթի, ինչպես նաև քրեական օրենսդրությամբ պահպանվող հասարակական հարաբերության՝ հանցանքի կատարման պահին ունեցած սոցիալական նշանակության վերաբերյալ փաստական տվյալների ամբողջությամբ։
Արարքի հանրային վտանգավորության աստիճանի որոշման ժամանակ դատարանը պետք է բացահայտի կատարված հանցագործությամբ պատճառված վնասի չափը, հանցագործության կատարման եղանակը, հանցավոր մտադրության իրականացման աստիճանը, հանցակցության դեպքում՝ հանցավորի կատարած արարքը և հանցագործությանը նրա մասնակցության աստիճանը։
15. Արարքի հանրային վտանգավորության բնույթի որոշման հարցում Վճռաբեկ դատարանը կարևորում է խախտված քրեաիրավական նորմով պաշտպանվող հասարակական հարաբերության սոցիալական նշանակությունը։ Վճռաբեկ դատարանը գտնում է, որ պատիժ նշանակելիս դատարանները պարտավոր են հաշվի առնել տվյալ ժամանակահատվածում քրեական օրենսդրությամբ պահպանվող կոնկրետ հասարակական հարաբերության սոցիալական նշանակությունը, այդ ոլորտում պետության քրեական քաղաքականության ուղղվածությունը։ (…)»։
ՀՀ վճռաբեկ դատարանն Արարատ Ավագի Ավագյանի և Վահան Սերյոժայի Սահակյանի վերաբերյալ ԵԿԴ/0252/01/13 քրեական գործով 2014թ. հոկտեմբերի 31-ի որոշման մեջ արտահայտել է հետևյալ իրավական դիրքորոշումը.
«(…) պատժի անհատականացման սկզբունքի տեսանկյունից արարքի հանրային վտանգավորությունը որոշելիս դատարանը, ի թիվս այլնի, պետք է հաշվի առնի.
- թմրանյութի տեսակը (վտանգավորության աստիճանը, անձի օրգանիզմի վրա ազդեցության աստիճանը),
- դրա չափը («Թմրամիջոցների և հոգեմետ (հոգեներգործուն) նյութերի զգալի, խոշոր և առանձնապես խոշոր չափերը» սահմանող` ՀՀ քրեական օրենսգրքի թիվ 1 հավելվածում նշված կոնկրետ չափի նվազագույն կամ առավելագույն սահմանին մոտ լինելը),
- արարքի կատարման նպատակն ու շարժառիթը (օրինակ՝ հիվանդությամբ պայմանավորված ցավերը թեթևացնելու համար կատարելը)։
Վկայակոչված հանգամանքները, այլ հանգամանքների հետ համակցությամբ ազդում են արարքի հանրային վտանգավորության վրա և պետք է իրենց համապատասխան գնահատականը ստանան յուրաքանչյուր գործով պատիժ նշանակելիս։
Պատժի անհատականացման սկզբունքի բովանդակության հիմնական մասն է կազմում նաև հանցավորի անձը բնութագրող տվյալների գնահատումը, որոնք իրենց ամբողջության մեջ հնարավորություն են տալիս անձին դիտել ոչ միայն որպես հանցանք կատարող, որը պետք է պատասխանատվություն կրի, այլ նաև որպես կոնկրետ անձ՝ իր անհատական հատկանիշներով։ Ընդ որում` անձի այն հատկանիշները, որոնք գտնվում են հանցակազմից դուրս, նշանակություն են ունենում դատարանի կողմից պատժի տեսակը և չափը որոշելիս։ Որպես հանցավորի անձը բնութագրող հատկանիշներ՝ գնահատվում են նրա սոցիալ-հոգեբանական, սոցիալ-ժողովրդագրական հատկությունները՝ վարքագիծն ընտանիքում և կենցաղում, աշխատանքի նկատմամբ ունեցած վերաբերմունքը, կրթությունը, առողջական վիճակը, տարիքը, ծառայությունը պետության և հասարակության առջև և այլն։ (…)»։
Ամբաստանյալ Արմեն Հրաչյայի Մարտիրոսյանի նկատմամբ, նրա կատարած հանցագործություններից յուրաքանչյուրի համար պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Արմեն Մարտիրոսյանի անձը` նախկինում դատված չլինելը, նրա խնամքին մինչև տասնչորս տարեկան մեկ երեխայի առկայությունը, նրա կատարած՝ ՀՀ քրեական օրենսգրքի 268-րդ հոդվածի 1-ին մասով նախատեսված հանցագործության՝ ոչ մեծ ծանրության աստիճանը, ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 34-266-րդ հոդվածի 3-րդ մասի 2-րդ կետով նախատեսված հանցագործություններից յուրաքանչյուրի՝ առանձնապես ծանր հանցագործությունների շարքին դասվելը, հանցավոր մտադրության իրականացման աստիճանը, խախտված հասարակական հարաբերությունների սոցիալական նշանակությունը և այդ ոլորտում պետության քրեական քաղաքականության ուղղվածությունը, ինչպես նաև ամբաստանյալ Արմեն Մարտիրոսյանի կողմից իրացնելու նպատակով ձեռք բերված թմրամիջոցների չափը, այն, որ ամբաստանյալի կողմից ձեռք բերված «մետամֆետամին» տեսակի թմրամիջոցների՝ 233,432 գրամ չափը հանցանքը կատարելու պահին և պատիժ նշանակելու ժամանակ զգալիորեն գերազանցում է առանձնապես խոշոր չափի նվազագույն սահմանաչափը, սակայն մոտ է արդյոք միջին կամ առավելագույն սահմանաչափին՝ հնարավոր չէ որոշել՝ առավելագույն սահմանաչափի բացակայության պատճառով։
Դատարանը հաշվի է առնում նաև, որ Ամբաստանյալ Արմեն Մարտիրոսյանի կողմից առանց իրացնելու նպատակի ձեռք բերված և պահված՝ 0,0638 գրամ քաշով «մետամֆետամին» տեսակի թմրամիջոցի քանակն առավել մոտ է «Թմրամիջոցների և հոգեմետ /հոգեներգործուն/ նյութերի մանր, զգալի, խոշոր և առանձնապես խոշոր չափերը» սահմանող ՀՀ կառավարության 2018թ. հունիսի 27-ի թիվ 707 որոշմամբ նշված, թմրամիջոցի այդ տեսակի համար սահմանված զգալի չափի /0.05-0.25 գրամ/ նվազագույն սահմանաչափին։
Ամբաստանյալ Արմեն Մարտիրոսյանի կատարած յուրաքանչյուր հանցագործության համար պատիժ նշանակելիս` որպես նրա պատասխանատվությունը և պատիժը մեղմացնող հանգամանք դատարանը հաշվի է առնում խնամքին մինչև տասնչորս տարեկան մեկ երեխայի առկայությունը, իսկ նրա պատասխանատվությունը և պատիժը ծանրացնող հանգամանքներ դատարանը չի արձանագրում։
Վերոգրյալը հաշվի առնելով` դատարանը գտնում է, որ ՀՀ քրեական օրենսգրքի 266-րդ հոդվածի 3-րդ մասի 2-րդ կետով, 34-266-րդ հոդվածի 3-րդ մասի 2-րդ կետով և 268-րդ հոդվածի 1-ին մասով նախատեսված հանցագործություններից յուրաքանչյուրի կատարման համար ամբաստանյալ Արմեն Մարտիրոսյանը ենթակա է պատժի ազատազրկման ձևով։
Դատարանը գտնում է նաև, որ նշանակված պատիժն ամբաստանյալ Արմեն Մարտիրոսյանը պետք է կրի, քանի որ դրան խոչընդոտող հանգամանքներ առկա չեն, պատժի կրումից նրան ազատելու վերաբերյալ բավարար հիմնավորումներ դատարանին չեն ներկայացվել։
Ամբաստանյալ Մոհսեն Խալիլի Սալմանի Ղարիչեհի նկատմամբ, նրա կատարած հանցագործություններից յուրաքանչյուրի համար պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Մոհսեն Խալիլի Սալմանի Ղարիչեհի անձը` նախկինում դատված չլինելը, նրա կատարած ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 267.1-րդ հոդվածի 4-րդ մասի 1-ին կետով նախատեսված հանցագործություններից յուրաքանչյուրի՝ առանձնապես ծանր հանցագործությունների շարքին դասվելը, հանցավոր մտադրության իրականացման աստիճանը, խախտված հասարակական հարաբերությունների սոցիալական նշանակությունը և այդ ոլորտում պետության քրեական քաղաքականության ուղղվածությունը, ինչպես նաև ամբաստանյալ Մոհսեն Խալիլի Սալմանի Ղարիչեհի կողմից իրացնելու նպատակով ձեռք բերված և մաքսանենգությամբ ՀՀ տեղափոխված թմրամիջոցների չափը, այն, որ ամբաստանյալի կողմից ձեռք բերված թմրամիջոցների՝ 233,432 գրամ չափը հանցանքը կատարելու պահին և պատիժ նշանակելու ժամանակ զգալիորեն գերազանցում է առանձնապես խոշոր չափի նվազագույն սահմանաչափը, սակայն մոտ է արդյոք միջին կամ առավելագույն սահմանաչափին՝ հաշվի առնել հնարավոր չէ՝ առավելագույն սահմանաչափի բացակայության պատճառով։
Ամբաստանյալ Մոհսեն Խալիլի Սալմանի Ղարիչեհի կատարած յուրաքանչյուր հանցագործության համար պատիժ նշանակելիս` նրա պատասխանատվությունը և պատիժը մեղմացնող և ծանրացնող հանգամանքներ դատարանը չի արձանագրում։
Վերոգրյալը հաշվի առնելով` դատարանը գտնում է, որ ՀՀ քրեական օրենսգրքի 266-րդ հոդվածի 3-րդ մասի 2-րդ կետով և 267.1-րդ հոդվածի 4-րդ մասի 1-ին կետով նախատեսված հանցագործություններից յուրաքանչյուրի կատարման համար ամբաստանյալ Մոհսեն Խալիլի Սալմանի Ղարիչեհը ենթակա է պատժի ազատազրկման ձևով, ՀՀ քրեական օրենսգրքի 267.1-րդ հոդվածի 4-րդ մասի 1-ին կետով նախատեսված հանցագործության համար՝ նաև գույքի կեսի բռնագրավմամբ, սակայն ոչ ավելի 1000 ԱՄՆ դոլար գումարին համարժեք ՀՀ դրամ գումարը։
Դատարանը գտնում է նաև, որ նշանակված պատիժն ամբաստանյալ Մոհսեն Խալիլի Սալմանի Ղարիչեհը պետք է կրի, քանի որ դրան խոչընդոտող հանգամանքներ առկա չեն, պատժի կրումից նրան ազատելու վերաբերյալ բավարար հիմնավորումներ դատարանին չեն ներկայացվել։
Ամբաստանյալ Արտուշ Էդուարդի Այվազյանի նկատմամբ, նրա կատարած հանցագործության համար պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Արտուշ Այվազյանի անձը` նախկինում դատված չլինելը, նրա խնամքին մինչև տասնչորս տարեկան մեկ երեխայի առկայությունը, նրա կատարած՝ ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով նախատեսված հանցագործության՝ առանձնապես ծանր հանցագործությունների շարքին դասվելը, հանցավոր մտադրության իրականացման աստիճանը, խախտված հասարակական հարաբերությունների սոցիալական նշանակությունը և այդ ոլորտում պետության քրեական քաղաքականության ուղղվածությունը։
Ամբաստանյալ Արտուշ Այվազյանի կատարած հանցագործության համար պատիժ նշանակելիս` որպես նրա պատասխանատվությունը և պատիժը մեղմացնող հանգամանք դատարանը հաշվի է առնում խնամքին մինչև տասնչորս տարեկան մեկ երեխայի առկայությունը, իսկ նրա պատասխանատվությունը և պատիժը ծանրացնող հանգամանքներ դատարանը չի արձանագրում։
Վերոգրյալը հաշվի առնելով` դատարանը գտնում է, որ ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով նախատեսված հանցագործության կատարման համար ամբաստանյալ Արտուշ Այվազյանը ենթակա է պատժի ազատազրկման ձևով։
Դատարանը գտնում է նաև, որ նշանակված պատիժն ամբաստանյալ Արտուշ Այվազյանը պետք է կրի, քանի որ դրան խոչընդոտող հանգամանքներ առկա չեն, պատժի կրումից նրան ազատելու վերաբերյալ բավարար հիմնավորումներ դատարանին չեն ներկայացվել։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել, գույքի վրա կալանք դնելու մասին որոշում չի կայացվել։
Քննելով իրեղեն ապացույցի հարցը` դատարանը հաշվի է առնում, որ դեռևս 2017թ. հունվարի 20-ի՝ «քրեական գործի նյութերով քրեական գործ անջատելու մասին» որոշմամբ, նախաքննության մարմինն արձանագրել է հետևյալը. «Նկատի ունենալով, որ գործի հանգամանքներից ելնելով՝ անհրաժեշտություն է առաջացել սույն քրեական գործի նյութերով նոր գործ անջատել՝ Արմեն Հրաչյայի Մարտիրոսյանի, Արտուշ Էդուարդի Այվազյանի և Մոհսեն Խալիլի Սալմանի Ղարիչեհի վերաբերյալ, որը մեղադրական եզրակացությամբ փոխանցել նախաքննության նկատմամբ հսկողություն իրականացնող դատախազին՝ դատարան ուղարկելու համար, ինչը չի անդրադառնա թիվ 10110116 քրեական գործի վարույթի լրիվության և օբյեկտիվության վրա»։ Այդ պատճառով դատարանը գտնում է, որ գործով իրեղեն ապացույց ճանաչված իրերը պետք է թողնել թիվ 10110116 քրեական գործով և դրանից անջատված մասով վարույթն իրականացնող մարմինների տնօրինմանը։
Քննելով խափանման միջոցների հարցը` դատարանը գտնում է, որ ամբաստանյալ Արմեն Հրաչյայի Մարտիրոսյանի նկատմամբ որպես խափանման միջոց՝ կալանավորումն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը, քանի որ ազատազրկման ձևով պատժի դատապարտվելու դեպքում, Արմեն Մարտիրոսյանի` քրեական պատասխանատվությունից և նշանակված պատիժը կրելուց խուսափելու հավանականությունը շարունակում է մնալ բարձր։
Ամբաստանյալ Մոհսեն Խալիլի Սալմանի Ղարիչեհի նկատմամբ որպես խափանման միջոց՝ կալանավորումն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը, քանի որ ազատազրկման ձևով պատժի դատապարտվելու դեպքում, Մոհսեն Խալիլի Սալմանի Ղարիչեհի` քրեական պատասխանատվությունից և նշանակված պատիժը կրելուց խուսափելու հավանականությունը շարունակում է մնալ բարձր։
Ամբաստանյալ Արտուշ Էդուարդի Այվազյանի նկատմամբ որպես խափանման միջոց՝ կալանավորումն ընտրված է ճիշտ և վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը, քանի որ ազատազրկման ձևով պատժի դատապարտվելու դեպքում, Արտուշ Այվազյանի` քրեական պատասխանատվությունից և նշանակված պատիժը կրելուց խուսափելու հավանականությունը շարունակում է մնալ բարձր։
Համաձայն քրեական գործի նյութերի, նախաքննության ընթացքում նշանակված դատաքիմիական փորձաքննություններից` 2016թ. հունիսի 27-ի թիվ 16-1439 եզրակացությամբ ներկայացված փորձաքննության կատարման արժեքը կազմել է 48.090 /քառասունութ հազար իննսուն/ ՀՀ դրամ գումար, իսկ 2016թ. հունիսի 27-ի թիվ 16-1440 եզրակացությամբ ներկայացված փորձաքննության կատարման արժեքը՝ 19.236 /տասնինը հազար երկու հարյուր երեսունվեց/ ՀՀ դրամ գումար։ Հետևաբար ամբաստանյալներ Արմեն Հրաչիկի Մարտիրոսյանից, Մոհսեն Խալիլի Սալմանի Ղարիչեհից և Արտուշ Էդուարդի Այվազյանից համապարտորեն, հօգուտ ՀՀ պետական բյուջեի պետք է բռնագանձել այդ արժեքների հանրագումարը կազմող՝ 67.326 /վաթսունյոթ հազար երեք հարյուր քսանվեց/ ՀՀ դրամ գումար` որպես դատական ծախս։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 357-360-րդ, 364-365-րդ և 369-373-րդ հոդվածներով` դատարանը

Վ Ճ Ռ Ե Ց

Ամբաստանյալ Արմեն Հրաչիկի Մարտիրոսյանին մեղավոր ճանաչել ՀՀ քրեական օրենսգրքի 266-րդ հոդվածի 3-րդ մասի 2-րդ կետով, 34-266-րդ հոդվածի 3-րդ մասի 2-րդ կետով և 268-րդ հոդվածի 1-ին մասով նախատեսված հանցանքներում և դատապարտել՝
ՀՀ քրեական օրենսգրքի 266-րդ հոդվածի 3-րդ մասի 2-րդ կետով` ազատազրկման 8 /ութ/ տարի ժամկետով՝ առանց գույքի բռնագրավման,
ՀՀ քրեական օրենսգրքի 34-266-րդ հոդվածի 3-րդ մասի 2-րդ կետով` ազատազրկման 7 /յոթ/ տարի ժամկետով՝ առանց գույքի բռնագրավման,
ՀՀ քրեական օրենսգրքի 268-րդ հոդվածի 1-ին մասով` ազատազրկման 6 /վեց/ ամիս ժամկետով,
ՀՀ քրեական օրենսգրքի 66-րդ հոդվածի 4-րդ մասով սահմանված` պատիժները մասնակիորեն գումարելու սկզբունքի կիրառմամբ, ամբաստանյալ Արմեն Հրաչիկի Մարտիրոսյանի նկատմամբ ՀՀ քրեական օրենսգրքի 266-րդ հոդվածի 3-րդ մասի 2-րդ նշանակված պատժին՝ 8 /ութ/ տարի ժամկետով ազատազրկմանը, մասնակիորեն գումարել ՀՀ քրեական օրենսգրքի 34-266-րդ հոդվածի 3-րդ մասի 2-րդ նշանակված պատժից՝ 2 /երկու/ տարի ժամկետով ազատազրկումը, ՀՀ քրեական օրենսգրքի 268-րդ հոդվածի 1-ին մասով նշանակված պատժից՝ 2 /երկու/ ամիս ժամկետով ազատազրկումը և ամբաստանյալ Արմեն Հրաչիկի Մարտիրոսյանի նկատմամբ վերջնական պատիժ նշանակել ազատազրկում՝ 10 /տասը/ տարի 2 /երկու/ ամիս ժամկետով՝ առանց գույքի բռնագրավման։
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում` պատժի սկիզբը հաշվելով 2016թ. փետրվարի 23-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Մոհսեն Խալիլի Սալմանի Ղարիչեհին մեղավոր ճանաչել ՀՀ քրեական օրենսգրքի 266-րդ հոդվածի 3-րդ մասի 2-րդ կետով, 267.1-րդ հոդվածի 4-րդ մասի 1-ին կետով նախատեսված հանցանքներում և դատապարտել՝
ՀՀ քրեական օրենսգրքի 266-րդ հոդվածի 3-րդ մասի 2-րդ մասով` ազատազրկման 8 /ութ/ տարի ժամկետով՝ առանց գույքի բռնագրավման,
ՀՀ քրեական օրենսգրքի 267.1-րդ հոդվածի 4-րդ մասի 1-ին մասով` ազատազրկման 9 /ինը/ տարի ժամկետով՝ գույքի կեսի բռնագրավմամբ, սակայն ոչ ավելի 1000 ԱՄՆ դոլար գումարին համարժեք ՀՀ դրամ գումարը։
ՀՀ քրեական օրենսգրքի 66-րդ հոդվածի 4-րդ մասերով սահմանված` պատիժները մասնակիորեն գումարելու սկզբունքի կիրառմամբ, ամբաստանյալ Մոհսեն Խալիլի Սալմանի Ղարիչեհի նկատմամբ վերջնական պատիժ նշանակել ազատազրկում՝ 10 /տասը/ տարի ժամկետով՝ գույքի կեսի բռնագրավմամբ, սակայն ոչ ավելի 1000 ԱՄՆ դոլար գումարին համարժեք ՀՀ դրամ գումարը։
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում` պատժի սկիզբը հաշվելով 2016թ. փետրվարի 23-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Ամբաստանյալ Արտուշ Էդուարդի Այվազյանին մեղավոր ճանաչել ՀՀ քրեական օրենսգրքի 34-266-րդ հոդվածի 3-րդ մասի 2-րդ մասով նախատեսված հանցանքներում և դատապարտել ազատազրկման՝ 7 /յոթ/ տարի ժամկետով՝ առանց գույքի բռնագրավման։
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում` պատժի սկիզբը հաշվելով 2016թ. փետրվարի 23-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Դատավճռի օրինական ուժի մեջ մտնելուց հետո, նախաքննության մարմնի 2017թ. հունվարի 20-ի որոշմամբ իրեղեն ապացույց ճանաչված իրերը /Արտուշ Էդուարդի Այվազյանի մեքենայից առգրավված` 2.047 գրամ քաշով, Մոհսեն Խալիլի Սալմանի Ղարիչեհի անձնական խուզարկությամբ հայտնաբերված և առգրավված` 110.657 գրամ քաշով, «Բելլա» հյուրանոցային համալիրի թիվ 7 սենյակի բաճկոնի գրպանից հայտնաբերված և առգրավված` 118.275 գրամ քաշով, «Բելլա» հյուրանոցային համալիրի «Քենթ» տեսակի ծխախոտի տուփից հայտնաբերված և առգրավված` 2.453 գրամ քաշով, «Տոյոտա Քեմրի» մակնիշի 20 PP 009 հաշվառման համարանիշի ավտոմեքենայում եղած, Արմեն Հրաչյայի Մարտիրոսյանի «Nokia 1035» մոդելի բջջային հեռախոսի մեջ հայտնաբերված և առգրավված` 0.0638 գրամ քաշով, Աշոտ Արայի Ադամյանի անձնական խուզարկությամբ հայտնաբերված` 4.592 գրամ քաշով «մեթամֆետամին» տեսակի թմրամիջոցները, 0.0475 գրամ քաշով «մարիխուանա» տեսակի թմրամիջոցը, «Nokia 1035» մոդելի բջջային հեռախոսը, Աշոտ Ադամյանի անձնական խուզարկությամբ հայտնաբերված և առգրավված «Capacity։300gX0.01g» ֆիրմայի ձեռքի կշեռքը և 213.000 ՀՀ դրամ գումարը/ թողնել թիվ 10110116 քրեական գործով և դրանից անջատված մասով վարույթն իրականացնող մարմինների տնօրինմանը։
Ամբաստանյալներ Արմեն Հրաչիկի Մարտիրոսյանից, Մոհսեն Խալիլի Սալմանի Ղարիչեհից և Արտուշ Էդուարդի Այվազյանից համապարտորեն, հօգուտ ՀՀ պետական բյուջեի բռնագանձել 67.326 /վաթսունյոթ հազար երեք հարյուր քսանվեց/ ՀՀ դրամ գումար` որպես դատական ծախսեր։
Դատավճիռը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։


ԴԱՏԱՎՈՐ` Մ. ՄԱՐՏԻՐՈՍՅԱՆ