Ո Ր Ո Շ Ո Ւ Մ

Հ Ա Ն Ո Ւ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ Ո Ւ Թ Յ Ա Ն

01.06.2017թ. քաղաք Երևան
ԳՈՐԾ. Հ.-ԵԿԴ/0346/01/16

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ՝

ՆԱԽԱԳԱՀՈՂ ԴԱՏԱՎՈՐ՝ Մ.ԱՐՂԱՄԱՆՅԱՆ
ԴԱՏԱՎՈՐՆԵՐ` Ռ.ՄԽԻԹԱՐՅԱՆ
Ս.ՉԻՉՈՅԱՆ

ՔԱՐՏՈՒՂԱՐՈՒԹՅԱՄԲ` Հ.ՀԱԿՈԲՅԱՆԻ

ՄԱՍՆԱԿՑՈՒԹՅԱՄԲ`

ՄԵՂԱԴՐՈՂ` Գ.ՄԱՐԳԱՐՅԱՆԻ
ՊԱՇՏՊԱՆ` Հ.ԱՐՍԵՆՅԱՆԻ
ԱՄԲԱՍՏԱՆՅԱԼ` Վ.ՎԵՐԱՆՅԱՆԻ

դռնբաց դատական նիստում պաշտպան Հ.Արսենյանի վերաքննիչ բողոքի հիման վրա քննության առնելով քրեական գործն ըստ մեղադրանքի Վահրամ Վահանի Վերանյանի` ՀՀ քրեական օրենսգրքի 104-րդ հոդվածի 1-ին մասով

Պ Ա Ր Զ Ե Ց

Գործի փաստական հանգամանքներն ու դատավարական ընթացքը
Նախաքննական մարմնի կողմից 2016 թվականի դեկտեմբերի 8-ին Վահրամ Վերանյանին ՀՀ քրեական օրենսգրքի 104-րդ հոդվածի 1-ին մասով մեղադրանք է առաջադրվել այն բանի համար, որ նա 2012 թվականի ամռանը աշխատանքի է ընդունվել Երևանի Ավան վարչական տարածքում գործող «Ֆուտբոլ» տաքսի ծառայությունում, որի տնօրենը հանդիսացել է Արսեն Խանամիրյանը։ Տաքսի ծառայությունում աշխատելու ընթացքում Վահրամ Վերանյանի և Արսեն Խանամիրյանի կնոջ՝ Արաքսյա Ալավերդյանի միջև ձևավորվել է մտերիմ և ինտիմ փոխհարաբերություններ։
Վահրամ Վերանյանի և Արաքսյա Ալավերդյանի միջև եղած ինտիմ հարաբերությունների մասին տեղեկանալով, Արսեն Խանամիրյանի և Վահրամ Վերանյանի միջև լարվածություն է առաջացել։
2015 թվականի ամռանը Վահրամ Վերանյանը զանգահարել է Արսեն Խանամիրյանին, առաջարկել է հանդիպել, զրուցել ու վերջ դնել իրենց միջև վերը նշված հարցի կապակցությամբ առկա լարվածությանը։ Պայմանավորվածության համաձայն Վահրամ Վերանյանը միայնակ գնացել է Արսեն Խանամիրյանի տաքսի ծառայության գրասենյակ, զրուցել է վերջինիս հետ, որի ընթացքում Արսեն Խանամիրյանը մետաղյա ձողով հարվածել է Վահրամ Վերանյանի գլխին, որի հետևանքով վերջինս կորցրել է գիտակցությունը և ուշքի է եկել միայն «Սուրբ Գրիգոր Լուսավորիչ» բժշկական կենտրոնում։
Դրանից հետո ընկերական շրջապատում, ինչպես նաև ծանոթների շրջանում պտտվող խոսակցություններից Վահրամ Վերանյանը տեղեկացել է, որ Արսեն Խանամիրյանը լուրեր է տարածել այն մասին, թե տաքսի ծառայության գրասենյակում տեղի ունեցած միջադեպի ընթացքում, երբ ինքը կորցրել է գիտակցությունը, Արսեն Խանամիրյանը միզել է իր վրա և այդ կերպ «փչացրել»։
Նշված լուրերից զայրացած Վահրամ Վերանյանն ամեն կերպ փորձել է հանդիպել Արսեն Խանամիրյանին ու ստահոդ լուրեր տարածելու համար նրանից պարզաբանումներ պահանջել։
2016 թվական հունիսի 1-ին Վահրամ Վերանյանը ընկերոջը՝ Ռազմիկ Խաչատրյանին պատկանող «Նիվա» մակնիշի 10 XX 099 հաշվառման համարանիշի ավտոմեքենայով գնացել է ընկերոջը՝ Կառլեն Սաժինյանի աշխատավայր՝ Երևանի Նար-Դոս փողոցում գործող անվադողերի վաճառակետ, որտեղ գտնվելու ժամանակ նկատել է «Ֆորդ» մակնիշի 34 ZV 973 «Ֆուտբոլ» տաքսի ծառայության ավտոմեքենայի ղեկին նստած Արսեն Խանամիրյանին։ Այնուհետև Վահրամ Վերանյանը և Կառլեն Սաժինյանը նստել են «Նիվա» ավտոմեքենան և երթևեկել Նար-Դոս փողոցով, ապա Նար-Դոս և Վարդանանց փողոցների խաչմերուկում գտնվող լուսացույցի մոտ կրկին տեսել է տաքսի ծառայության ավտոմեքենայի ղեկին նստած Արսեն Խանամիրյանին, ապա իր կողմից վարվող «Նիվա» մակնիշի ավտոմեքենայով փակել է Արսեն Խանամիրյանի ավտոմեքենայի ճանապարհը և իրեն վարկաբեկելու համար վրեժ լուծելու նպատակով, ավտոմեքենայի սրահից վերցրել է իրեն պատկանող փայտե մահակը, ինչից հետո մոտենալով Արսեն Խանամիրյանի ավտոմեքենային, բաց պատուհանից մահակով մի քանի անգամ հարվածել է ղեկին նստած Արսեն Խանամիրյանին, իսկ երբ վերջինս Վահրամ Վերանյանի ձեռքից խլել է մահակը, հանել է գոտկատեղում պահվող դանակը և երկու հարված հասցրել Արսեն Խանամիրյանի կրծքավանդակի ձախ կեսին՝ պատճառելով կյանքի հետ անհամատեղելի մարմնական վնասվածքներ՝ կրծքավանդակի ձախ կեսի, ձախից ենթակողային շրջանների, կրծքավանդակի ձախ կեսի առաջային մակերեսի ծակած- կտրած թափանցող վերք, սրտապարկի, սրտի վնասում, հեմոպերիկարդիում, ձախից ենթակողային շրջանի ծակված չթափանցող վերք, ճարպաբջջանքի վնասումով միջկողային շրջանի և ձախ ենթակողային շրջանի կտրած-ծակած վերք, ինչից հետո Վահրամ Վերանյանը դիմել է փախուստի։
Այնուհետև, տեղի ունեցած իրադարձություններին ականատես Սամվել Ռեզյանը Արսեն Խանամիրյանին իրեն պատկանող «Նիսսան մարչ» մակնիշի ավտոմեքենայով տեղափոխել է Երևանի «Արմյանց» բժշկական կենտրոն, որտեղ Արսեն Խանամիրյանը գիտակցության չգալով, ժամը 14:55-ին մահացել է։
2016 թվականի դեկտեմբերի 28-ին քրեական գործը մեղադրական եզրակացությամբ ուղարկվել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարան` ըստ էության քննության:
Դատաքննությամբ և գործով ձեռք բերված ապացույցներով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը հաստատված է համարել հետևյալը:
Վահրամ Վերանյանը 2016 թվականի հունիսի 1-ին ժամը 14։30-ի սահմաններում, Երևանի Վարդանանց և Նար-Դոս փողոցների հատման մասում, անուղղակի դիտավորությամբ վրեժի շարժառիթով ապօրինաբար կյանքից զրկել է Արսեն Խանամիրյանին, որպիսի գործողություններն արտահայտվել են հետևյալում.
2016 թվականի հունիսի 1-ին Վահրամ Վերանյանը «Նիվա» մակնիշի 10 XX 099 հաշվառման համարանիշի ավտոմեքենայով ուղևորվել է ընկերոջ` Կառլեն Սաժինյանի աշխատավայր` Երևանի Նար-Դոս փողոցում գործող անվադողերի վաճառակետ, որտեղ գտնվելու ժամանակ նկատել է «Ֆորդ» մակնիշի 34 ZV 973 «Ֆուտբոլ» տաքսի ծառայության ավտոմեքենայի ղեկին նստած Արսեն Խանամիրյանին, ում կնոջ` Արաքսյա Ալավերդյանի հետ ինտիմ կապերի մեջ գտնվելու կապակցությամբ դեռևս 2015 թվականի ամռանից ուներ լարված փոխհարաբերություններ։
Այնուհետև Վահրամ Վերանյանը և Կառլեն Սաժինյանը նստել են «Նիվա» ավտոմեքենան և երթևեկել Նար-Դոս փողոցով, սակայն այդ և Վարդանանց փողոցների խաչմերուկում գտնվող լուսացույցի մոտ Վահրամ Վերանյանը կրկին նկատել է նույն ավտոմեքենան և ղեկի մոտ գտնվող Արսեն Խանամիրյանին։ Իր վարած «Նիվա» մակնիշի ավտոմեքենայով հանդիպակաց գոտով վազանց կատարելով` Վահրամ Վերանյանը արգելափակել է նույն ուղղությամբ շարժվող Արսեն Խանամիրյանի ավտոմեքենան և վերջինիս կողմից նախկինում ծեծի ենթարկվելու, այդ ընթացքում նաև իրեն ստորացնելու և արժանապատվությունը նսեմացնելու, շրջապատում նման լուրեր տարածելու համար վրեժ լուծելու շարժառիթով իր ավտոմեքենայի սրահից վերցրել է փայտե մահակը, մոտեցել է Արսեն Խանամիրյանի ավտոմեքենային, մահակով բաց պատուհանի միջոց մի քանի անգամ հարվածել է ղեկի մոտ գտնվող Արսեն Խանամիրյանին, իսկ երբ վերջինիս հաջողվել է Վահրամ Վերանյանի ձեռքից վերցնել մահակը, Վահրամ Վերանյանը գոտկատեղում պահած դանակը հանել և դրանով երկու անգամ հարվածել է Արսեն Խանամիրյանի կրծքավանդակի ձախ կեսին` նրան պատճառել կյանքի հետ անհամատեղելի, արյան սուր կորստի հանգեցրած մարմնական վնասվածքներ՝ կրծքավանդակի ձախ կեսի, ձախից ենթակողային շրջանների, կրծքավանդակի ձախ կեսի առաջային մակերեսի ծակած - կտրած թափանցող վերք` սրտապարկի և սրտի վնասում, հեմոպերիկարդիում, ձախից ենթակողային շրջանի ծակված չթափանցող վերք` ճարպաբջջանքի վնասումով, ապա դիմել է փախուստի։ Արսեն Խանամիրյանը տեղափոխել է Երևանի «Արամյանց» բժշկական կենտրոն, սակայն ստացված վերոնշյալ վնասվածքներից գիտակցության չգալով` ժամը 14։55-ին մահացել է։
Վերոգրյալ հանցանքի համար Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2017 թվականի ապրիլի 4-ի դատավճռով Վահրամ Վերանյանը մեղավոր է ճանաչվել ՀՀ քրեական օրենսգրքի 104-րդ հոդվածի 1-ին մասով և դատապարտվել ազատազրկման 9 տարի ժամկետով։
Նրա նկատմամբ խափանման միջոց ընտրված կալանավորումը թողնվել է անփոփոխ` մինչև դատավճիռն օրինական ուժի մեջ մտնելը` պատժի սկիզբը հաշվելով 2016 թվական հունիսի 1-ից:
Դատարանը որոշել է դատավճիռն օրինական ուժի մեջ մտնելուց հետո իրեղեն ապացույց ճանաչված տուժող Արսեն Խանամիրյանի հագուստները վերադարձնել վերջինիս իրավահաջորդ Արմենակ Խանամիրյանին, իսկ հանցագործության գործիք հանդիսացած դանակը և փայտե մահակը, տուժողի արյան հետքերը պարունակող բամբակյա խծուծները ոչնչացնել։

Վերաքննիչ բողոքի հիմքերը, հիմնավորումներն ու պահանջները
Պաշտպան Հ.Արսենյանը վերաքննիչ բողոք է բերել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2017 թվականի ապրիլի 4-ի դատավճռի դեմ` միջնորդելով բեկանել այն և Վահրամ Վերանյանի գործողությունները որակել ՀՀ քրեական օրենսգրքի 112-րդ հոդվածի 2-րդ մասով և նրա նկատմամբ նշանակել համարժեք պատիժ:
Իր վերաքննիչ բողոքը պաշտպան Հ.Արսենյանը մասնավորապես պատճառաբանել է հետևյալով:
«(…)Պաշտպանական կողմը գտնում է, որ թե նախաքննական մարմինը, թե դատարանը ճիշտ քրեաիրավական գնահատական չեն տվել Վահրամ Վերանյանի գործողություններին, ինչի արդյունքում կայացված դատական ակտը հիմնավոր չէ, ենթակա է բեկանման, իսկ պաշտպանյալիս արարքին պետք է տրվի ճիշտ քրեաիրավական գնահատական։
Մասնավորապես, դեռևս նախաքննության ընթացքում պաշտպանական կողմը միջնորդություններով և բողոքներով է հանդես եկել, որով պահանջել է Վ. Վերանյանի գործողություններին տալ ճիշտ քրեաիրավական որակում։ Որպես հիմնավորում դրվել են հետևյալ փաստական և իրավական հիմքերը։
Այսպես՝ Առաջադրված մեղադրանքում Վ. Վերանյանը իրեն մասնակիորեն է մեղավոր ճանաչել և թե որպես կասկածյալ, թե որպես մեղադրյալ ցուցմունքներ է տվել տեղի ունեցածի հետ կապված՝ դրդապատճառների և շարժառիթների շուրջ։
2016թ. Հունիսի 1-ին տեղի ունեցած դեպքի վերաբերյալ հայտնել է, որ ինքը նպատակ չի ունեցել Արսեն Խանամիրյանին դիտավորությամբ կյանքից զրկել, այլ նկատելով որ Խանամիրյանը շարունակում է իրեն հետապնդել, մահակը ձեռքին իջել է ավտոմեքենայից և ցանկացել է վերջինիս պատժել, այն է՝ նրա նկատմամբ ֆիզիկական բռնություն գործադրել, վնաս պատճառել այնպես, ինչպես Խանամիրյանն է իր նկատմամբ վարվել 2015թ. ամռանը։
Երբևիցե իմ պաշտպանյալը մտադրություն չի ունեցել Ա.Խանամիրյանին կյանքից զրկել, որի վերաբերյալ հայտնել է իր շրջապատին։ Մասնավորապես՝ երբ զրույց է գնացել իր և Արսեն Խանամիրյանի ու վերջինիս կնոջ կողմից Վերանյանին զրպարտելու, սուտ մատնության, նրան մարմնական վնասվածքներ հասցնելու թեմայի շուրջ, Վահրամ Վերանյանը իր ընկեր Կառլեն Սաժինյանին ասել է, որ «քաչալը» Արսեն Խանամիրյանը, երեք երեխա ունի, ես նրան վարի չեմ տա, բայց եթե շարունակի ինձ հետապնդել, ես նրան այնպիսի վնաս կտամ, ինչպես որ նա ինձ է տվել։
Նույնպիսի արտահայտություն է արել նաև իր ընկերուհի Լենա Արմենի Աբրահամյանի մոտ և վերջինս 2013թ-ից ամբողջությամբ տիրապետում է Արսեն Խանամիրյանի կնոջ կողմից Վահրամ Վերանյանին սիրահետելու, նրան վարկաբեկելու, սուտ մատնություն կատարելու, Արսեն Խանամիրյանի կողմից շարունակաբար Վահրամ Վերանյանին հետամուտ լինելու, հետապնդելու, նրան վնասվածքներ պատճառելու, սպառնալիքներ տալու խնդիրների վերաբերյալ, ինչպես նաև այն որ Վերանյանը 2016թ. Հունիսի 1-ին դեպքից հետո հանդիպել է Լենա Աբրահամյանին և ասել, թե ինքը չգիտի, թե քանի անգամ է հարվածել Խանամիրյանին և մարմնի որ մասում։ Բայց արյուն է տեսել և հայտնել, որ գնում է հանձնվելու։
Պաշտպանական կողմը գտնում է, որ փոխադարձ քաշքշուկի ընթացքում Վ. Վերանյանը չէր կարող նշանառու հարված կատարել, որ կյանքից զրկեր Ա. Խանամիրյանին։ Այնքանով, որաքնով որ Վերանյանը հարձակվել է Խանամիրյանի վրա փայտյա մահակով, որը հենց խոսում է այն մասին, որ ցանկացել է Խանամիրյանին մարմնական վնասվածք պատճառել, բայց երբ Խանամիրյանի դիմադրության արդյունքում մահակը Վերանյանի ձեռքից խլել է, Վերանանը, քաջ գիտակցելով, որ Ա. Խանամիրյանը իրենից ֆիզիկապես ուժեղ է ստիպված է եղել իր մոտ եղած դանակը հանել և հնարավորինս թույլ չտալ, որպեսզի Խանամիրյանը մեքենայից դուրս գա և փոխադարձ քաշքշոցի ընթացքում դանակով հարվածել է Խանամիրյանի մարմնին։ Այն, որ դանակի երկրորդ հարվածը նույնիսկ թափանցող չի եղել, ցույց է տալիս, որ Վ. Վերանանը կյանքից զրկելու դիտավորությամբ հարվածներ չի հասցրել Ա.Խանամիրյանին, որի մասին նա հայտնել է իր ընկերուհուն՝ Լենա Աբրահամյանին։
Գտնում եմ, որ քրեական գործում առկա փաստական տվյալները ու ապացույցները միանշանակ մեկ եզրահանգման են բերում, որ Վահրամ Վերանյանին մեղսագրվող արարքը չի բխում քրեական գործի նյութերից և նրան առաջադրված մեղադրանքը պետք է փոփոխվեր և որակվեր ՀՀ քրեական օրենսգրքի 112-րդ հոդվածի 2-րդ մասով։ Ուստի բերելով վերաքննիչ բողոք, պաշտպանական կողմը պնդում է, որ Վ. Վերանյանի գործողություններին պետք է տրվի ճիշտ իրավական գնահատական և նրա նկատմամբ դատական ակտը պետք է կայացվեր ՀՀ քրեական օրենսգրքի 112-րդ հոդվածի երկրորդ մասով նախատեսված արաք կատարելու համար(…)»:
Վերաքննիչ դատարանի դատաքննության ընթացքում ամբաստանյալ Վ. Վերանյանը և պաշտպան Հ.Արսենյանը նույն հիմքերով ու հիմնավորումներով ներկայացված վերաքննիչ բողոքը պնդեցին, մեղադրող Գ.Մարգարյանը բողոքի դեմ առարկելով` միջնորդեց առաջին ատյանի դատարանի դատավճիռը թողնել անփոփոխ:

Վերաքննիչ դատարանի պատճառաբանություններն ու եզրահանգումները
Ստուգելով գործի փաստական հանգամանքների բացահայտման ու քրեական օրենքի կիրառման ճշտությունը, ինչպես նաև գործը քննելիս և լուծելիս քրեադատավարական օրենքի նորմերի պահպանումը, վերաքննիչ բողոքում նշված հիմքերի սահմաններում վերլուծելով քրեական գործի նյութերը, դատաքննության ընթացքում լսելով բողոքում ներկայացված իրենց հետևությունները հիմնավորելու մասին ամբաստանյալի և պաշտպանի պատճառաբանությունները, մեղադրողի առարկությունները, վերաքննիչ դատարանը հանգում է այն հետևության, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2017 թվականի ապրիլի 4-ի դատավճիռը պետք է թողնել անփոփոխ, իսկ ներկայացված վերաքննիչ բողոքը մերժել` հետևյալ պատճառաբանությամբ:
ՀՀ քրեական օրենսգրքի 104-րդ հոդվածի 1-ին մասով առաջադրված մեղադրանքում Վահրամ Վերանյանը նախաքննության և դատաքննության ընթացքում իրեն մեղավոր է ճանաչել մասնակիորեն` ընդունելով տուժողին մահակով, ապա դանակով հարվածելու փաստը, սակայն նշել է, որ նրան սպանելու դիտավորություն չի ունեցել, փորձել է միայն ծեծել, իսկ մահակն իր ձեռքից վերցնելուց հետո`դիմել է ինքնապաշտպանության:
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատաքննության ընթացքում Արսեն Խանամիրյանին սպանելու նպատակ չի ունեցել, ցանկացել էր կոտրել նրա ոտքերը կամ ողնաշարը, հաշմանդամ դարձնել, որ նա ապրեր ու տեսներ, թե ինքը որքան լավ է ապրում։ Իրեն ծեծելու օրն ինքը չափավոր ոգելից խմիչք օգտագործած վիճակում է եղել, Արսենի հետ ձեռք բերած պայմանավորվածության համաձայն գնացել է նրան պատկանող տաքսի ծառայության գրասենյակ, սակայն գրասենյակում թիկունքից իր գլխի հատվածում Արսենից անսպասելի հարված ստանալով` վայր է ընկել, կորցրել գիտակցությունը, որից հետո որևէ բան չի հիշում, աղոտ կերպով լսել է միայն որոշակի ձայներ։ Այդ միջադեպից հետո հայտնվել է հիվանդանոցում, սակայն Արսենը շարունակել է հետապնդել իրեն։ Ծեծից հետո Արսենը ինչպես անձամբ է հեռախոսով սպառնացել, այնպես էլ բազմաթիվ մարդիկ են իրեն այդ սպառնալիքները փոխանցել։ Միշտ սպասել է, որ Արսենն իրեն «թիկունքից» կհարվածի։
Արսենը վիրավորել էր իր ինքնասիրությունը ու նրան դեպքի օրը հարվածելը պայմանավորված էր իրեն վարկաբեկելու հանգամանքով, քանի որ շրջանառության մեջ էր դրել «իր վրա միզելու» զրույցը։ Մահանալը նրա փրկությունն էր։ Տուժող Արսեն Խանամիրյանին հարվածելու մեխանիզմի վերաբերյալ մանրամասնեց, որ նա իրենից ֆիզիկապես ուժեղ էր, նախ` նրան մեկ անգամ մահակով է հարվածել, փորձել է նաև երկրորդ անգամ հարվածել, սակայն մահակը դիպել է մեքենայի բաց պատուհանի «ստոյկային» ու Արսենն այն իրենից «խլել» է, որից հետո պաշտպանվելու նպատակով օգտագործել է գոտկատեղի հատվածում մշտապես կրած դանակը։ Արսենը, մեքենայի սրահում կռացած, անկանոն շարժվել է, դանակի առաջին հարվածն ուղղված չէր կոնկրետ նրա կրծքավանդակին, հարվածից հետո դանակը հետ քաշելիս է նկատել, որ Արսենի հագուստն անմիջապես արյունոտվել է։ Արսենը մի պահ ուղղվել է և ցանկացել է մեքենայից իջնել։ Այդ պահին արյունը տեսնելով` ինքը, դանակը ձեռքին, տեղում քարացել է, իսկ Արսենը «փորով մտել է դանակի մեջ»։ Եթե դանակով երկրորդ անգամ էլ հարվածելու նպատակ ունենար, դանակը նրա փորի մեջ ավելի խորը կմտներ։ Այնուհետև` թքել է Արսենի վրա, դանակը փակել ու առանց վազելու, քայլելով, ետ նայելով և տեսնելով, որ իր ետևից եկող չկա, հեռացել է։ Արսենին հարվածելու միջադեպի ժամանակ իր հետ եղած ընկերը` Կառլեն Սաժինյանը փորձել է միջամտել։ Տաքսի մեքենայով գնացել և երեխային հրաժեշտ է տվել, որից հետո ինքնակամ ներկայացել է ոստիկանության բաժին և հանձնել դանակը։
Վահրամ Վերանյանը ըստ էության նույնաբովանդակ ցուցմունքներ է տվել նաև նախաքննության ընթացքում:
Գործով ձեռք բերված ապացույցների համակցությամբ վերլուծելով ու գնահատելով Վահրամ Վերանյանի ցուցմունքները, վերաքննիչ քրեական դատարանը հանգում է այն հետևության, որ ինչպես դրանք, այնպես էլ պաշտպան Հ.Արսենյանի կողմից վերաքննիչ բողոքում բերված պատճառաբանությունները անհիմն են, նպատակ են հետապնդում նվազեցնելու նրա պատասխանատվությունը ու պատժը, դրանք հերքվում և ամբաստանյալին մեղսագրվող արարքը հիմնավորվում է առաջին ատյանի դատարանի դատաքննությամբ հետազոտված ու վերլուծված գործի փաստական տվյալների ու ապացույցների ներքոշարադրյալ ամբողջությամբ:
Տուժողի իրավահաջորդ Արմենակ Խանամիրյանը ցուցմունքներ է տվել այն մասին, որ եղբայրը՝ Արսեն Խանամիրյանը ամուսնացել է Արաքսյա Ալավերդյանի հետ և համատեղ կյանքում ունեցել են երեք երեխա։ 2012 թվականին Արսենը ստեղծել է «Ֆուտբոլ» տաքսի ծառայությունը, իսկ նրա կինը՝ Արաքսյան, կատարել է տաքսի ծառայության հեռախոսավարուհու պարտականություններ։ 2012 թվականի ամռանը տաքսի ծառայությունում աշխատանքի է անցել Վահրամ Վերանյանը և վարել է «Օպել Աստրա» մակնիշի ավտոմեքենա։ Վահրամ Վերանյանի աշխատելու ընթացքում Արաքսյան դրսևորել է տարօրինակ վարքագիծ և շատ հաճախ շփվել տաքսի ծառայության վարորդների, մասնավորապես` Վահրամ Վերանյանի հետ, ինչն իրեն դուր չի եկել, կասկածել է, որ Արաքսյան դավաճանում է Արսենին, ինչի մասին բազմիցս հայտնել է եղբորը։
2015 թվականի օգոստոսի 31-ին ժամը 22-ի սահմաններում, երբ տուն է վերադարձել, տաքսի ծառայության գրասենյակի բակային հատվածում տեսել է հավաքված մարդկանց, իսկ Վահրամը վնասվածքներով ընկած է եղել գետնին։ Եղբորից տեղեկացել է, որ տաքսի ծառայությունում աշխատելու ժամանակահատվածում Արաքսյայի հետ ինտիմ կապ ունենալու համար Վահրամին նա է ծեծի ենթարկել։ Եղբոր ընկերական շրջապատից տեղեկացել է նաև, որ Արսենը տվյալ օրը Վահրամին ծեծի ենթարկելուց հետո միզել է նրա վրա և այդ կերպ «փչացրել»։
2016 թվականի հունիսի 1-ին ժամը 13։15-ի սահմաններում տաքսի ծառայությունից զանգահարել և հայտնել են, որ վերադառնա տուն, տեղեկացրել են նաև, որ դեպք է պատահել։ Որոշ ժամանակ անց տաքսի ծառայությունից կրկին զանգահարել են և ասել, որ արագ ուղևորվի Երևանի Չարենցի փողոց, նշել, որ Արսենը վթարի է ենթարկվել։ Հասնելով Նար-Դոս և Վարդանանց փողոցների հատման մաս, նկատել է Արսենի վարած «Ֆորդ» մակնիշի տաքսի ավտոմեքենան և սև «Նիվա» մակնիշի ավտոմեքենա, դրանց շուրջ հավաքված մարդկանց ու ոստիկանության աշխատակիցների։ Արսենի վարած «Ֆորդ» մակնիշի ավտոմեքենայի վարորդի բաց դռան նստատեղի ներքևի հատվածում նկատել է արյան հետքեր ու փայտե մահակ, որից հետո հավաքված ոստիկանության աշխատակիցներից տեղեկացել է, որ Արսենին մարմնական վնասվածքներով տեղափոխել են «Արամյանց» բժշկական կենտրոն։ Անմիջապես մեկնել է բժշկական կենտրոն, որտեղ էլ տեղեկացել է, որ Արսենը մահացել է, ինչպես նաև, որ Արսենին դանակով հարվածել և սպանել է Վահրամ Վերանյանը։
Վկա Կառլեն Սաժինյանը ցուցմունքներ է տվել այն մասին, որ աշխատել է Երևանի Նար-Դոս փողոցում գործող անվադողերի վաճառքի խանութում։ Վահրամ Վերանյանին ճանաչել է մանկուց, իրենք ծնվել և մեծացել են Ալավերդի քաղաքում, իսկ Երևան տեղափոխվելուց հետո շարունակել են ընկերություն անել։ Վահրամը նախկինում աշխատել է «Ֆուտբոլ» տաքսի ծառայությունում որպես վարորդ։ Վահրամից տեղեկացել է, որ տաքսի ծառայությունում աշխատելու ընթացքում նա ինտիմ կապի մեջ է գտնվել ծառայության տնօրենի կնոջ՝ Արաքսյայի հետ, իսկ կապը դադարեցնելուց հետո Արաքսյան սուտ մատնություն է կատարել նրա վերաբերյալ։ Վահրամը պատմել է նաև, որ 2015 թվականի ամռանը տաքսի ծառայության գրասենյակում տնօրեն Արսենը նրան ծեծի է ենթարկել։ Վահրամին հանդիպել է հիվանդանոցում, Վահրամին դեմքից հնարավոր չէր ճանաչել, ճանաչել է միայն նրա ձեռքին առկա դաջվածքից։ Վահրամը պատմել է, որ գնացել էր տաքսի սերվիս, որտեղ վիճաբանություն է եղել Արաքսյայի ամուսին Արսենի հետ, ով նրան ծեծել է։ Հետագայում նաև լսել է, որ Արսենն այդ օրը նաև միզել է Վահրամի վրա։
2016 թվականի հունիսի 1-ի առավոտյան Վահրամը սև «Նիվա» մակնիշի ավտոմեքենայով եկել է իր հետևից և տեղափոխել աշխատավայր։ Մոտ երկու ժամ իր աշխատավայրում մնալուց հետո Վահրամը գնացել է, ապա ժամը 14-ին վերադառնալով՝ հայտնել է, թե Արաքսյայի ամուսինն իրեն հետապնդում է ու մատնացույց է արել քիչ հեռվում կայանված` «Ֆուտբոլ» տաքսի ծառայության ավտոմեքենան։ Վահրամին հորդորել է հանգիստ մնալ, ավելորդություններ թույլ չտալ։ Վահրամին առաջարկել է նրա «Նիվան» մեկ ուրիշ տեղ կանգնեցնել, որ նա քաշքշուկների մեջ չընկնի, հետո վերադառնան սուրճ խմելու։ Մեքենան ցանկացել են կանգնեցնել շենքի հետևի մասում, սակայն այդ տաքսին պտտվել և իրենց մեքենայի ետևից է շարժվել, իրենց անցել։ Վահրամին առաջարկել է այլ ուղղությամբ շարժվել, նկատել, որ նա ջղայնացած է։ Վահրամը անցել է այդ մեքենան, կանգնել լուսաֆորի տակ։ Վահրամը, «բիտան» ձեռքին, դուրս է եկել մեքենայից, մի քանի վայրկյան անց ինքն էլ է դուրս եկել և հետևել Վահրամին։ Տաքսին կանգնած է եղել իրենց «Նիվայի» հետևում, վարորդի կողմի ապակին իջեցված վիճակում։ Իրենց մեքենայի դուռը բացելով, Վահրամը, գոռացել է՝ թե նա ինչ է ուզում իրենից, գնացել է այդ մեքենայի կողմ, «բիտայով» հարվածել է մեքենայի դռանը, հետո նրա ձեռքին հայտնված դանակով աջ կողմից հարվածել է սրահում գտնվող Արսենին։ Առաջին հարվածը չի նկատել, հասել է այն պահին, երբ Վահրամը Արսենին դանակով երկրորդ հարվածն էր հասցնում, փորձել է կանխել այդ հարվածը՝ մտածելով, որ իրեն կտեսնի ու չի հարվածի, սակայն չի հասցրել, այդ ժամանակ Վահրամը հարվածել և իր ձեռքն էլ է վնասվել։ Դրանից հետո Վահրամը, դանակը ձեռքին, վազել է Նար-Դոս փողոցով դեպի ներքև՝ շուկայի ուղղությամբ։ Ինքը գնացել է իր աշխատավայր, իսկ թե վարորդին ինչ էր եղել, տեղյակ չէ։
Վկա Սամվել Ռեզյանը ցուցմունքներ է տվել այն մասին, որ Վահրամ Վերանյանին և Արսեն Խանամիրյանին չի ճանաչել։ Դեպքի օրը՝ 2016 թվականի հունիսի 1-ին ժամը 14-ի սահմաններում, իր «Մարչ» մակնիշի մեքենայով կայանած է եղել Երևանի Նար-Դոս փողոցի վրա՝ լուսացույցի կարմիր լույսի տակ։ Հանդիպակաց գոտի մտնելով` սև «Նիվա» մակնիշի մեքենա է անցել՝ ձայնային ազդանշան տալով և բոլորի ուշադրությունն այդ կերպ գրավելով։ Այդ «Նիվան» կայանել է իր դիմացի մեքենայի՝ տաքսիի առջև, «Նիվայի» վարորդը՝ չսափրված մի տղա, սրահից իջել և ձեռքին գտնվող մահակով կամ փայտով մոտեցել է տաքսիին և վարորդի կողմից հարվածել, որը տևել է մոտ 30 վայրկյան։ Դրանից հետո «Նիվայից» իջած այդ և ևս մեկ անձն էլ փախել են, որի ընթացքում նրանցից մեկի ձեռքին դանակ է նկատել։ Մտածել է, որ հավանաբար տաքսի մեքենայի վարորդը «Նիվայի» վրա է քշել կամ սխալ է արել, դրա համար է «Նիվայի» տերն այդպես վարվում, մտքով չի անցել, որ տաքսիստին դանակահարել են։ Լուսացույցի կարմիր լույսը փոխվել է կանաչի, որից հետո դիմացի տաքսիի վարորդը դուռը բացել և ընկել է գետնին։ Մոտեցել և նկատել է, որ տաքսու վարորդն արյունահոսում է։ Ոչ ոք օգնության ձեռք չի մեկնել, տաքսիստն իր օգնությամբ նստել է իր մեքենայի ետևի նստատեղին, որից հետո նրան տեղափոխել է հիվանդանոց՝ «Արամյանց» բժշկական կենտրոն։ Երկու ժամից զանգահարել է հիվանդանոց, սակայն տեղեկացել, որ նա մահացել է։
Վկա Արաքսյա Ալավերդյանը ցուցմունքներ է տվել այն մասին, որ 2008 թվականին ամուսնացել է Արսեն Խանամիրյանի հետ, համատեղ կյանքի ընթացքում ունեն երեք երեխա։ 2012 թվականին ամուսինը հիմնադրվել է «Ֆուտբոլ» տաքսի ծառայությունը, որտեղ որպես վարորդ աշխատանքի է ընդունվել նաև Վահրամ Վերանյանը։ Այդ ժամանակահատվածում ինքն ու Արսենն ունեցել են ընտանեկան կոնֆլիկտներ, հաճախակի են վիճաբանել։ Ժամանակի ընթացքում իր և Վահրամի միջև մտերիմ փոխհարաբերություններ են ստեղծվել ու մեկ անգամ սեռական հարաբերություն է ունեցել նրա հետ։ Վահրամի հետ շփվել է ընդամենը 15 օր, սակայն գիտակցելով, որ այդ կապը կարող է ընտանիքի կործանման պատճառ հանդիսանալ՝ հետագա շփումները դադարեցրել է։ Վահրամի հետ ունեցած կապի մասին հայտնել է ամուսնուն՝ Արսենին, ով զայրացել է։
Վահրամի հետ շփվելու ընթացքում նրա ընկերոջ ու վերջինիս ընկերուհու հետ գնացել են Մեղրի քաղաք ու ժամանակ անցկացրել, սակայն Երևան վերադառնալուց հետո իրականությանը չհամապատասխանող հաղորդում է տվել այն մասին, թե իբր Վահրամն իրեն առևանգել և բռնաբարել է։ Հիշյալ դեպքի առթիվ հարուցվել է քրեական գործ, իր նկատմամբ սուտ մատնություն կատարելու համար քրեական հետապնդում է իրականացվել, սակայն հետագայում գործի վարույթը կարճվել է։ Դրանից հետո Վահրամի հետ այլևս չի շփվել։
2015 թվականի մարտի 13-ին Արսենն իրեն դանակով վնասվածք է պատճառել, դիմել է բուժօգնության, ապա Արսենի հորդորով ոստիկաններին հաղորդում է տվել այն մասին, թե իբր վնավածքն իրեն պատճառել է Վահրամը։ Հիշյալ գործի քննության ընթացքում իրականությունը բացահայտվել է, իրեն մեղադրանք են առաջադրել սուտ մատնություն կատարելու համար, որի համար էլ դատապարտվել է ազատազրկման, ինչն էլ փոխարինվել է հանրային աշխատանքներով։
Արսենն իմացել է իր և Վահրամի հարաբերությունների մասին և խանդի հողի վրա թշնամանքով է լցվել նրա հանդեպ, այդ կապակցությամբ պարզաբանումներ կատարելու համար 2015 թվականի օգոստոսին Վահրամն եկել է տաքսի ծառայության գրասենյակ և հանդիպել Արսենին։ Ինքը գտնվել է նույն սենյակում, Վահրամը ծեծի է ենթրակվել, իսկ ինքն ի վիճակի չէր որևէ բան անելու, միջամտողներ ևս չեն եղել։ Որոշ ժամանակ անց ինքը սենյակից դուրս է եկել, Արսենը դուռը փակել է և շարունակել է Վահրամին ծեծել։ Անգամ դանակ է վերցրել, որ Վահրամին հարվածի, սակայն ինքը, վերստին հայտնվելով սենյակում, միջամտել և կանխել է։ Արսենը ծեծելուց հետո միզել է Վահրամի վրա, որից հետո իրեն դուրս է արել այդտեղից, ինքը չի կարողացել հակառակվել, քանի որ նա իրեն նույնպես կվնասեր։ Վահրամը չի զգացել նրա վրա միզելու փաստը, քանի որ անգիտակից վիճակում էր, ջուր են ցանել նրա վրա, սակայն անգամ դրանից նա չի սթափվել։
Այդ միջադեպից հետո իր և Վահրամի հարաբերությունները չեն շարունակվել, իսկ Արսենի հետ շարունակել են միասին ապրել։ Նա իրեն ստիպել է հաշվեհարդար տեսնել Վահրամի հետ, ասել է, որ եթե ուզում է իրեն ների, պետք է Վահրամին այնպես վնասի, որ նա չկարողանա ոտքի կանգնել։ Արսենն է իրեն ստիպել, որ հաղորդում տա, թե իբր Վահրամն է իրեն դանակահարել, թեև իրականում Արսենն էր իրեն դանակահարել։ Բռնաբարության դրվագով նույնպես Արսենն է իրեն հարկադրաբար գրել տվել, թե իբր Մեղրի քաղաքում Վահրամն իրեն բռնաբարել է, այլապես սպառնացել է իրեն մայրական իրավունքներից զրկել։ Արսենի հարկադրանքի ազդեցությամբ նրա հետ մեքենայով գնացել են Վահրամի բնակության վայր և հետևել նրան, որ հետագայում Արսենը նրա հետ հաշվեհարդար լինի։ Նա ցանկանում էր կամ ինքնասպան լինել կամ Վահրամին սպանել։ Արսենը պարտքեր ուներ, այդ թվում` իր հոր հանդեպ և իրեն ստիպում էր, որ պարտատերերին ինքը պատասխաններ տար։
Արսենը տարածում էր Վահրամի վրա միզելու վերաբերյալ վարկաբեկող տեղեկությունը։ Ինքը որևէ մեկից չի լսել, որ Վահրամն այդ կապակցությամբ Արսենին փնտրեր, սակայն հնարավոր է, որ այդ ցանկությունը նա ունենար։
Դեպքի օրը` 2016 թվականի հունիսի 1-ին ինքը, Արսենը և երեխաները, գնացել են «երեխաների պաշտպանության» օրվա առթիվ ժամանակ անցկացնելու։ Նույն օրը ժամը 13-ի սահմաններում Արսենը պատվեր է ընդունել և պատվիրատուին Երևանի Ավանի թաղապետարանի մոտից տեղափոխել է Չարենց փողոց։ Դրանից հետո մեկ անգամ հեռախոսով խոսել է նրա հետ, պայմանավորվել են, որ «Մոնումենտի» մոտ հանդիպեն, սակայն Արսենը չի եկել։ Որոշ ժամանակ անց իրեն են զանգահարել տաքսի ծառայության գրասենյակից և հայտնել են որ Արսենին տեղափոխել են «Արամյանց» բժշկական կենտրոն։ Այդ մասին տեղեկանալով՝ անմիջապես ուղևորվել է հիվանդանոց, որտեղ տեղեկացել է, որ Արսենը մահացել է։ Հետագայում տեղեկացել է, որ Արսենին դանակով հարվածել ու սպանել է Վահրամ Վերանյանը։
Վկա Ռազմիկ Խաչատրյանը ցուցմունքներ է տվել այն մասին, որ 2016 թվականի փետրվարից ճանաչում է Վահրամ Վերանյանին ու նրա հետ գտնվել է մտերիմ փոխհարաբերությունների մեջ։ 2016 թվականի ապրիլի 27-ին ձեռք է բերել սև «Նիվա» մակնիշի 10 XX 099 հաշվառման համարանիշի ավտոմեքենա, որը 2016 թվականի մայիսից ընկերոջ՝ Վահրամի խնդրանքով` 5.000 ՀՀ դրամ օրավարձով շահագործելու համար տվել է նրան։
2016 թվականի հունիսի 1-ին իրեն զանգահարել և հայտնել են, որ իր ավտոմեքենայի հետ կապված ինչ-որ խնդիրներ կան։ Համացանցից տեղեկացել է, որ հիշյալ օրը Երևանի Վարդանանց և Նար-Դոս փողոցների հատման մասում Վահրամ Վերանյանը դանակով հարվածել ու սպանել է Արսեն Խանամիրյանին, իսկ դեպքի վայրում հայտնաբերվել է իր ավտոմեքենան։
Վկա Լենա Աբրահամյանը ցուցմունքներ է տվել այն մասին, որ 2010 թվականից ճանաչում է Վահրամ Վերանյանին, ում հետ գտնվել է փաստացի ամուսնական կապի մեջ։ 2011 թվականին համատեղ բնակվել են Երևանի Թոթովենց 94 շենքի թիվ 46 բնակարանում, համատեղ ամուսնական կյանքի ընթացքում ունեն մեկ փոքրահասակ զավակ։ Արսեն Խանամիրյանին և վերջինիս կնոջը՝ Արաքսյա Ալավերդյանին ճանաչել է 2012 թվականից, Արսեն Խանամիրյանը հանդիսացել է Երևանի Ավան թաղամասում գործող «Ֆուտբոլ» տաքսի ծառայության սեփականատերը, Վահրամը 2012 թվականի մայիս - հունիս ամիսներին աշխատել է հիշյալ տաքսի ծառայությունում և վարել «Օպել Աստրա» մակնիշի ավտոմեքենա։
2014 թվականի ընթացքում տեղեկացել է, որ Վահրամը մտերմացել է Արսենի կնոջ՝ Արաքսյա Ալավերդյանի հետ և նրանց միջև ձևավորվել է ինտիմ կապ, ինչի մասին տեղյակ էր նաև Արսենը։ Այնուհետև, Վահրամի որոշմամբ նրանց հարաբերությունները դադարել են։
2014-2015թթ. Արաքսյան փորձել է հանդիպել Վահրամին, միաժամանակ Վահրամին տեղեկացրել, որ Արսենը նույնպես ցանկանում է հանդիպել նրա հետ, սակայն Վահրամը խուսափել է հանդիպումներից։ Արսենը փորձել է իր հետ ևս հանդիպել` ասելով, թե ինչ-որ խոսակցության ձայնագրության սկավառակ պետք է հանձնի, սակայն ինքը հանդիպման չի գնացել։
Նույն այդ ժամանակահատվածում Արաքսյան մի քանի անգամ սուտ հաղորդում է տվել Վահրամի վերաբերյալ, թե իբր վերջինս դանակով հարվածել է նրան, ապա առևանգել և բռնաբարել, որոնց վերաբերյալ քննվել են քրեական գործեր, սակայն ճշմարտությունը բացահայտվել է, և Արաքսյան սուտ մատնություն կատարելու համար դատապարտվել է։ Արաքսյան և Արսենը ամեն կերպ փորձել են հանդիպել Վահրամի հետ, նույնիսկ բազմիցս իրեն են զանգահարել և առաջարկել հանդիպել, սակայն ինքը հրաժարվել է գնալ հանդիպման։
2015 թվականի օգոստոսի 31-ին Վահրամը միայնակ գնացել է Արսենին պատկանող տաքսի ծառայության գրասենյակ` նրանց միջև եղած լարված հարաբերությանը վերջ տալու համար, սակայն Արսենը Վահրամին ծեծի է ենթարկել, ինչի հետևանքով Վահրամը մի քանի օրով հայտնվել է հիվանդանոցի վերակենդանացման բաժանմունքում։ Հետագայում, երբ Վահրամը հիվանդանոցից դուրս է գրվել, Վահրամի ընկերական շրջապատում պտտվող խոսակցություններից տեղեկացել է, որ Արսենը լուրեր է տարածել այն մասին, որ Վահրամին ծեծի ենթարկելուց հետո Արաքսյայի և նրանց երեք երեխաների ներկայությամբ միզել է նրա վրա։
2016 թվականի մայիսի 13-ին Վահրամն իրեն է զանգահարել Կառլենի հեռախոսահամարից և ասել, որ հեռախոսն անջատում է, տուն գալուց առաջ կզանգի, պատճառը չի հայտնել, քիչ անց ինքը Կառլենից տեղեկացել է, որ Արսենը Ավանից մինչև Զեյթուն մեքենայով հետապնդել է Վահրամին ու Կառլենին։ Դրանից հետո Վահրամի մեքենայի մեջ նկատել է մահակ, որի առկայությունը հիմնավորելիս Վահրամը հայտնել է, որ Արսենը հետապնդում է նրան։
Հետագայում ինքը զանգահարել է Արսենին ու պայմանավորվածության համաձայն՝ գնացել տաքսի ծառայության գրասենյակ, որտեղ Արսենին խնդրել է Վահրամի վրա միզելու հետ կապված տեղեկությունները չտարածել ու իրենց հանգիստ թողնել։ Արսենը հայտնել է, որ այս պատմությունը կարող է ավարտվել երբ Վահրամը հանդիպի և պատմի իր ու Արաքսյայի ինտիմ փոխհարաբերությունների մասին, ինչպես նաև տեղեկություններ տրամադրի այն մասին, թե բացի իրենից ում հետ է Արաքսյան ինտիմ փոխհարաբերությունների մեջ գտնվել։ Արսենն ասել է, թե իր դեմ որևէ բան չունի, սակայն ամուսնուն փոխանցի, որ եթե նա այդ օրը տաքսի ծառայության գրասենյակ չգա, նրան գտնելու է և «իր դեմ Վահրամը խռխռալու է, եթե ինքը ապրի, Վահրամը չի ապրելու»։ Իր և Արսեն Խանամիրյանի միջև տեղի ունեցած հիշյալ խոսակցության մասին հայտնել է Վահրամին, ով իր վրա զայրացել է։ Բոլոր դեպքերում Վահրամին խնդրել է Արսենին չհանդիպել ու զգույշ մնալ։
2016 թվականի հունիսի 1-ին Վահրամն իրեն և որդուն ավտոմեքենայով տեղափոխել է ծնողների տուն, ապա հայտնել, որ գնում է Նար-Դոս փողոց` ավտոմեքենայի անվադողը նորոգելու։ Ժամը 13-ի սահմաններում Վահրամին հանդիպել է «Երիտասարդական» մետրոյի մոտ, վերցրել տան բանալիները, որից հետո Վահրամը հեռացել է։ Նույն օրը՝ ժամը 14-ի սահմաններում, զանգահարել է Վահրամի կողմից շահագործվող բջջային հեռախոսահամարներին, սակայն Վահրամն իր զանգերին չի պատասխանել։ Որոշ ժամանակ անց, երբ կրկին զանգահարել է Վահրամին, վերջինս պատասխանել է իր զանգին ու հայտնել է, որ Նար-Դոս փողոցում «քաչալին է խփել»` ի նկատի ունենալով Արսենին։
Անմիջապես նստել է պատահական տաքսի ավտոմեքենա և ուղևորվել Նար-Դոս փողոց, որտեղ տեսել է հավաքված քաղաքացիների, ոստիկանության աշխատակիցների, Վահրամի վարած «Նիվա» մակնիշի ավտոմեքենան և Արսենի վարած տաքսի ավտոմեքենան։ Այդ ամենը տեսնելուց հետո հասկացել է, որ Վահրամն իրեն չի խաբել, ապա կրկին զանգահարել է Վահրամին, ով իրեն հայտնել է, որ գտնվում է Երևանի Մամիկոնյանց փողոցում գտնվող իրենց տանը։ Տանը Վահրամն իրեն հայտնել է, որ Արսենին մահակով հարվածել է, դանակով մի քանի անգամ հարվածել է, սակայն թե մարմնի որ հատվածներին չի հիշում, ապա հայտնել է, որ գնում է ոստիկանություն` հանձնվելու։ Այնուհետև, տեղեկացել է, որ Վահրամի հասցրած հարվածների հետևանքով Արսենը մահացել է։
Առաջին ատյանի դատարանում հրապարակվել և հետազոտվել է վկա Աշոտ Կարապետյանի նախաքննական ցուցմունքն այն մասին, որ 2016 թվականի հունիսի 1-ին ժամը 14-ի սահմաններում, երբ գտնվել է Երևանի Նար-Դոս փողոցում՝ «Նոր Տուն» խանութի մոտակայքում, ճանապարհի երթևեկելի մասում նկատել է սև «Նիվա» մակնիշի և «Ֆորդ» մակնիշի տաքսի ավտոմեքենաներ, որոնցից «Նիվան» կանգնած է եղել տաքսի ավտոմեքենայի դիմացը։ Տաքսի ավտոմեքենայի վարորդը գտնվել է սրահում, իսկ վարորդի բաց պատուհանի մոտ գտնվել են երկու երիտասարդներ։ Նրանցից մեկը ձեռքով կտրուկ շարժում է կատարել դեպի տաքսու ղեկին նստած վարորդի կողմը, ինչից հետո վարորդը բղավել է, ապա երկու երիտասարդները դիմել են փախուստի։ Երիտասարդներից մեկի ձեռքում նկատել է դանակ, որից հետո տաքսու վարորդը, բացելով դուռը, վայր է ընկել` ձեռքով սեղմելով սրտի հատվածը։
Համաձայն անձին ճանաչման ներկայացնելու մասին 2016 թվականի հունիսի 1-ի արձանագրության` վկա Աշոտ Կարապետյանը նրան ճանաչման ներկայացված անձանց կազմում ճանաչել է Վահրամ Վերանյանին և հայտարարել, որ վերջինս է 2016 թվականի հունիսի 1-ին ժամը 14-ի սահմաններում, Երևանի Նար-Դոս և Վարդանանց փողոցների հատման մասում դանակով հարվածել տաքսու վարորդին։
Համաձայն դեպքի վայրի զննության 2016 թվականի հունիսի 1-ի արձանագրության` դեպքի վայր է հանդիսանում Երևանի Նար-Դոս և Վարդանանց փողոցների հատման մասը, որտեղ հաջորդաբար կայանված են սև «Նիվա» մակնիշի 10 XX 099 հաշվառման համարանիշի և «Ֆորդ» մակնիշի տաքսի ավտոմեքենաներ։ Զննությամբ «Ֆորդ» մակնիշի ավտոմեքենայի վարորդի բաց դռան ներքևի հատվածում հայտնաբերվել են արնանման հետքեր, որոնցից բինտե խծուծների վրա վերցվել են նմուշներ։ Նույն հատվածում հայտնաբերվել և վերցվել է նաև արյան հետքերով փայտե մահակ։
Համաձայն քննչական փորձարարության 2016 թվականի հունիսի 2-ի արձանագրության` Վահրամ Վերանյանը մատնացույց է արել Երևանի Նար-Դոս և Վարդանանց փողոցների հատման մասն ու հայտարարել, որ 2016 թվականի հունիսի 1-ին ժամը 14-ի սահմաններում, «Նիվա» մակնիշի սև 10 XX 099 հաշվառման համարանիշի ավտոմեքենայով փակել է Արսեն Խանամիրյանի «Ֆորդ» մակնիշի տաքսի ավտոմեքենայի դիմացը, ապա ավտոմեքենայի սրահից վերցնելով փայտե մահակը` մոտեցել է նրան ու մահակով բաց պատուհանից հարվածներ հասցրել վերջինիս, այնուհետև հանել գոտկատեղում ամրացված դանակը և երկու հարված հասցրել նրա կրծքավանդակի ձախ կեսին։
Համաձայն հագուստների զննության 2016 թվականի հունիսի 1-ի արձանագրության` տուժող Արսեն Խանամիրյանի վերնազգեստի վրա, ձախ վերին ուսակարից 8 սմ և թևային ուսակարից 2 սմ լայնությամբ հայտնաբերվել են հարթ եզրերով կտրած-ծակած վնասվածքներ, որոնց շուրջ հայտնաբերվել են արնանման հեղուկի հետքեր։
Համաձայն դիակի դատաբժշկական փորձաքննության 2016 թվականի հուլիսի 8-ի թիվ 0652 եզրակացության՝ տուժող Արսեն Խանամիրյանի մահը վրա է հասել արյան սուր կորստից՝ կրծքավանդակի ձախ կեսի, ծախից ենթակողային շրջանների ծակված-կտրված վիրավորումներ ստանալու հետևանքով։ Տվյալ հետևությունը հիմնավորվում է դիակի դատաբժշկական փորձաքննությամբ հայտնաբերված հետևյալ վնասվածքների առկայությամբ՝ 1. կրծքավանդակի ծախ կեսի առաջային մակերեսի ծակած - կտրած թափանցող վերք՝ սրտապարկի, սրտի վնասումով, հեմոպերիկարդիում՝ 250.0մլ հեղուկ արյուն սրտապարկի խոռոչում, 2500 մլ հեղուկ արյուն ձախ պլևրալ խոռոչում, 2. ձախից ենթակողային շրջանի ծակված թափանցող վերք՝ ճարպաբջջանքի վնասումով, ներքին օրգանների սուր սակավարյունություն։ Վերը նշված վնասվածքները պատճառվել են կենդանության օրոք, կտրած - ծակած վերքերը միակողմանի սուր կտրող եզր ունեցող սուր ծակող-կտրող գործիքով /գործիքներով/, այդպիսիք ունեն առողջությանը ծանր վնասի պատճառման հատկանիշներ, որոնք և տվյալ դեպքում՝ կարճ ժամանակահատվածում բերել են մահվան։ Ձախից կրծքավանդակի առաջային մակերեսի ծակած - կտրած թափանցող վիրավորման վերքային խողովակը ունի մոտ 12-15 սմ երկարություն, առաջից հետ, վերևից ներքև և ձախից աջ ուղղություն, ձախից ենթակողային շրջանի ծակված չթափանցող վերքի վերքային խողովակն ունի 2-ից 3 սմ երկարություն, վերևից ներքև, ձախից աջ ուղղություն։ Վերը շարադրված վնասվածքներն ունեն որոշակի կարճ ժամանակահատվածում պատճառվելու հատկանիշներ, ուստի վնասվածքների պատճառման հաջորդականությունը որոշելն անհնար է։ Հաշվի առնելով դիակային երևույթների զարգացման աստիճանը՝ կարելի է ենթադրել, որ մահը վրա է հասել դիակի դատաբժշկական փորձաքննությունը կատարելուց մոտ 20-24 ժամ առաջ։
Համաձայն լրացուցիչ դատաբժշկական փորձաքննության 2016 թվականի հոկտեմբերի 14-ի թիվ 198/հձ/լ եզրակացության` հաշվի առնելով դիակի դատաբժշկական 0652 փորձաքննությամբ հայտնաբերված ծակված-կտրած վերքերի չափային տվյալները, չի բացառվում նշված վնասվածքների առաջանալը Վահրամ Վերանյանի ներկայացրած դանակով։
Համաձայն դատահետքաբանական փորձաքննության 2016 թվականի սեպտեմբերի 28-ի թիվ 1909-16 եզրակացության` քննվող դեպքի պահին Արսեն Խանամիրյանի կրած հագուստի՝ սպորտային կարճաթև շապիկի առաջամասի վերին ձախ հատվածում առկա վնասվածքը ծակած-կտրած է, կարող էր առաջանալ ինչպես Վահրամ Վերանյանի ներկայացված դանակի շեղբի, այնպես էլ նմանատիպ՝ միասայր ծակող-կտրող շեղբ ունեցող այլ գործիքի, հնարավոր է՝ դանակի շեղբի ներգործության արդյունքում։ Արսեն Խանամիրյանի սպորտային անդրավարտիքի աջ փողքի վերին հատվածում առկա վնասվածքները պատռվածքներ են, որոնք կարող էին առաջանալ սուր, արտացցված եզր ունեցող առարկայի կամ գործիքի հետ փոխազդեցության մեջ մտնելու և դրա արդյունքում հետագա կառչել-ձգվելու հետևանքով։ Արսեն Խանամիրյանի հագուստների՝ սպորտային կարճաթև շապիկի առաջամասի վերին ձախ հատվածում առկա ծակած-կտրած բնույթի վնասվածքը իր տեղակայությամբ համապատասխանում է համապատասխանում է վերջինիս վերաբերյալ դատաբժշկական փորձաքննության 2016 թվականի հուլիսի 8-ի թիվ 0652 եզրակացության մեջ նշված կրծքավանդակի ձախ կեսի առաջային մակերեսին առկա ծակած-կտրած թափանցող վերքի հետ, իսկ Արսեն Խանամիրյանի կարճաթև շապիկի համապատասխան հատվածի վրա ձախից ենթակողային շրջանի ծակած - կտրած չթափանցող վերքի բացակայությունը պայմանավորված է հագուստի կտորը մարմնի տվյալ հատվածում դեպի վեր բարձրացված լինելու հանգամանքով։
Համաձայն դատակենսաբանական փորձաքննության 2016 թվականի հուլիսի 8-ի թիվ 194 եզրակացության` փորձաքննության ներկայացված 4 թանզիֆե խծուծների, դանակի, մահակի, սպորտային վերնազգեստի, անդրավարտիքի և սպորտային կոշիկների վրա առկա կասկածելի հետքերում հաստատվել է մարդկային ծագման արյան առկայություն, որը կարող էր առաջանար տուժող Արսեն Խանամիրյանից։
Ապացույց են ճանաչվել և գործին կցվել` ՀՀ ոստիկանության օպերատիվ կառավարման կենտրոնի կողմից ահազանգի վերաբերյալ արձանագրած և նախաքննական մարմնին տրամադրած լազերային սկավառակը, ինչպես նաև այն զննության ենթարկելու մասին 2016 թվականի սեպտեմբերի 12-ին կազմված արձանագրությունը։
Իրեղեն ապացույց են ճանաչվել ամբաստանյալ Վահրամ Վերանյանի ներկայացրած հանցագործության գործիք հանդիսացող դանակը և դեպքի վայրից առգրավված փայտե մահակը, տուժող Արսեն Խանամիրյանի հագուստները, դեպքի վայրից վերցված արնանման հետքեր պարունակող բամբակյա խծուծները:
Գործով ձեռք բերված ապացույցների վերլուծությամբ ու գնահատմամբ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը մասնավորապես կատարել է հետևյալ իրավական վերլուծությունները:
«(…)Դատարանը փաստում է, վրեժ լուծելու շարժառիթով տուժողի հետ ծեծկռտուք նախաձեռնելու և այդ ընթացքում նրան կյանքից ապօրինաբար զրկելու անուղղակի դիտավորության առկայության մասին են վկայում դատաքննությամբ հաստատված հետևյալ հանգամանքների համակցությունը՝ հանցագործության դեպքի հանգամանքները, մասնավորապես՝ ամբաստանյալի և տուժողի փոխադարձ դիրքերը մահացու վնասվածքներ պատճառելու պահին (տուժողը գտնվել է իր վարած ավտոմեքենայի սրահում՝ ղեկի մոտ և ամբաստանյալն է արգելափակել նրա մեքենան, ապա մոտեցել և մահացու վնասվածքներ պատճառել դեռևս ղեկի մոտ գտնվող տուժողին), ամբաստանյալի կողմից մահակից զատ մարմնական վնասվածք պատճառելու գործիքի՝ դանակի գործադրումը, դրանով կատարված հարվածների քանակը (երկու հարված), հարվածների ուղղություններն ու ուժգնությունը (վերքային խողովակներից մեկի երկարությունը կազմել է 12-15 սմ), մասնավորապես՝ տուժողի նաև կրծքավանդակի շրջանին հարվածելը, տուժողին պատճառված մարմնական վնասվածքների բնույթը, որոնց կազմում առկա է կյանքին վտանգ սպառնացող, ծանր մարմնական վնասվածքը (կրծքավանդակի ծախ կեսի առաջային մակերեսի ծակած-կտրած թափանցող վերքը՝ սրտապարկի և սրտի վնասումով), ինչպես նաև քննվող դեպքին անմիջապես հաջորդած՝ ամբաստանյալ Վ.Վերանյանի հետհանցավոր վարքագիծը, այն է՝ դանակի հարվածներից տուժած և արյունահոսող Արսեն Խանամիրյանին անօգնական վիճակում թողելն ու դեպքի վայրից հեռանալը (հետևանքի` տուժողի մահվան վրա հասնելը գիտակցաբար թույլ տալը), ստացված վնասվածքների հետևանքով ընդամենը րոպեներ անց տուժողի մահանալը(…)»:
Այսպիսով, վերաքննիչ դատարանը յուրաքանչյուր ապացույց գնահատելով վերաբերելիության, թույլատրելիության, իսկ ամբողջ ապացույցներն իրենց համակցության մեջ` գործի լուծման համար բավարարության տեսանկյունից, գտնում է, Վահրամ Վերանյանը 2016 թվականի հունիսի 1-ին ժամը 14։30-ի սահմաններում, Երևանի Վարդանանց և Նար-Դոս փողոցների հատման մասում, անուղղակի դիտավորությամբ վրեժի շարժառիթով ապօրինաբար կյանքից զրկել է Արսեն Խանամիրյանին և նրա արարքը համապատասխանում է ՀՀ քրեական օրենսգրքի 104-րդ հոդվածի 1- 1-ին մասի հանցակազմին, այդ հոդվածով նրան առաջադրված մեղադրանքը հիմնավորված է և այն ՀՀ քրեական օրենսգրքի 112-րդ հոդվածի 2-րդ մասով վերաորակելու հիմքերը բացակայում են:
Այս առումով ՀՀ Վճռաբեկ դատարանը Արարատ Վազգենի Բաղդասարյանի վերաբերյալ 2011 թվականի դեկտեմբերի 22-ի թիվ ԵԷԴ/0168/01/10 որոշմամբ արտահայտել է հետևյալ իրավական դիրքորոշումը:
«(…)17. Վճռաբեկ դատարանն արձանագրում է, որ սպանության փորձը դիտավորությամբ առողջությանը ծանր վնաս պատճառելուց սահմանազատելու համար առաջնային նշանակություն ունի վնասվածքներ հասցնելու պահին հանցավորի դիտավորության ուղղվածության բացահայտումը: Մասնավորապես, եթե սպանության փորձի ժամանակ հանցավորի դիտավորությունն ուղղված է տուժողին կյանքից զրկելուն, ապա ՀՀ քրեական օրենսգրքի 112-րդ հոդվածով նախատեսված հանցանք կատարելիս դիտավորությունն ուղղված է տուժողի առողջությանը ծանր վնաս պատճառելուն:
Ս. Հունիկյանի վերաբերյալ որոշման մեջ Վճռաբեկ դատարանը նշել է, որ հանցավորի դիտավորության ուղղվածության հարցը լուծելիս անհրաժեշտ է ելնել հանցագործության բոլոր հանգամանքների համակցությունից և հաշվի առնել, մասնավորապես, հանցավոր արարքի կատարման եղանակը, վնասվածքներ հասցնելիս օգտագործվող գործիքները (զենքը), մարմնական վնասվածքների քանակը, բնույթը և տեղակայումը (օրինակ` մարդու կենսականորեն կարևոր օրգանների վնասումը), ինչպես նաև հանցավորի և տուժողի վարքագիծը հանցագործությանը նախորդող և հաջորդող պահերին, նրանց փոխհարաբերությունները, հանցավորի կողմից հանցավոր գործողությունների դադարեցման պատճառները և այլն: Կատարված հանցանքին քրեաիրավական ճիշտ գնահատական տալու համար կարևոր նշանակություն ունի այնպիսի հատկանիշների բացահայտումը, ինչպիսիք են հանցանքի կատարման շարժառիթներն ու նպատակը (տե՛ս Սամվել Գրիգորի Հունիկյանի վերաբերյալ Վճռաբեկ դատարանի 2008 թվականի փետրվարի 29-ի թիվ ՎԲ-11/08 որոշումը):
Վերը նշված հանգամանքների համադրման և վերլուծության հիման վրա է հնարավոր միայն բացահայտել դիտավորության ուղղվածությունը և դրա տեսակները, ինչն էլ իր հերթին կհանգեցնի կատարված արարքին քրեաիրավական ճիշտ գնահատական տալուն և տարբեր հանցակազմերը, մասնավորապես՝ սպանության փորձը տուժողի առողջությանը դիտավորությամբ ծանր վնաս պատճառելուց սահմանազատելուն(…)»:
Հաշվի առնելով ինչպես ՀՀ Վճռաբեկ դատարանի 2011 թվականի դեկտեմբերի 22-ի թիվ ԵԷԴ/0168/01/10 որոշմամբ արտահայտած իրավական դիրքորոշումները, այնպես էլ հանցավոր արարքի կատարման եղանակը, վնասվածքներ հասցնելիս օգտագործվող գործիքները (ամբաստանյալի կողմից մահակից զատ նաև դանակի գործադրումը), մարմնական վնասվածքների քանակը և տեղակայումը, մասնավորապես՝ տուժողի նաև կրծքավանդակի շրջանին հարվածելը, տուժողին պատճառված մարմնական վնասվածքների բնույթը, որոնց թվում առկա է կյանքին վտանգ սպառնացող, ծանր մարմնական վնասվածք` կրծքավանդակի ծախ կեսի առաջային մակերեսի ծակած-կտրած թափանցող վերք՝ սրտապարկի և սրտի վնասումով, հանցավորի և տուժողի փոխհարաբերությունների բնույթը, ամբաստանյալ Վահրամ Վերանյանի հետհանցավոր վարքագիծը, այն է՝ դանակի հարվածներից արյունահոսող տուժողին անօգնական վիճակում թողնելն ու դեպքի վայրից հեռանալը, ինքնին վկայում են Արսեն Խանամիրյանին կյանքից զրկելու` Վահրամ Վերանյանի դիտավորության մասին, ինչը վերջինս իր ցուցմունքներով ըստ էության ընդունել է, իսկ դրանց բովանդակային վերլուծությունը հաստատում է, որ Վ.Վերանյանը առնվազն գիտակցաբար թույլ է տվել Ա.Խանամիրյանի մահվան վրա հասնելը:
Վերոգրյալ հիմքերի առկայության պայմաններում վերլուծելով գործի փաստական տվյալները, վերաքննիչ դատարանը հանգում է հետևության այն մասին, որ Վահրամ Վերանյանի կողմից կատարված հանցանքը հիմնավորված և նրա մեղավորությունը հաստատված է գործին վերաբերող փոխկապակցված հավաստի ապացույցների բավարար ամբողջությամբ, առաջին ատյանի դատարանն ամբաստանյալի արարքի քրեաիրավական որակման հարցում հանգել է ճիշտ հետևության և ղեկավարվելով օրենքով, դատաքննությամբ հետազոտված ապացույցների` գործի լուծման համար բավարարության տեսանկյունից գնահատման արդյունքում, հաստատված է համարել ամբաստանյալ Վահրամ Վերանյանի մեղքը մեղսագրվող արարքում
Գործը քննելիս և լուծելիս Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից պահպանվել են ՀՀ Սահմանադրության, ՀՀ քրեադատավարական օրենսդրության, Մարդու իրավունքների և հիմնարար ազատություների պաշտպանության մասին Եվրոպական կոնվենցիայի, ինչպես նաև ՀՀ Վճռաբեկ դատարանի նախադեպային որոշումների պահանջները:
Այսպիսով, հիմք ընդունելով նաև առաջին ատյանի դատարանի պատճառաբանություններն ու իրավական վերլուծությունները, գործով ձեռք բերված ապացույցների գնահատմամբ վերաքննիչ դատարանը հանգում է այն հետևության, որ ամբաստանյալ Վահրամ Վերանյանի վերաբերյալ ՀՀ քրեական օրենսգրքի 104-րդ հոդվածի 1-ին մասով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2017 թվականի ապրիլի 4-ի դատավճիռն օրինական է ու հիմնավորված, այն բեկանելու և փոփոխելու հիմքեր չկան, ուստի վիճարկվող դատական ակտը պետք է թողնել անփոփոխ, իսկ պաշտպանի վերաքննիչ բողոքը` մերժել:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-394-րդ հոդվածներով վերաքննիչ քրեական դատարանը

Ո Ր Ո Շ Ե Ց

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2017 թվականի ապրիլի 4-ի դատավճիռը քրեական գործով ըստ մեղադրանքի Վահրամ Վահանի Վերանյանի` ՀՀ քրեական օրենսգրքի 104-րդ հոդվածի 1-ին մասով, թողնել անփոփոխ, պաշտպան Հ.Արսենյանի վերաքննիչ բողոքը` մերժել:

Որոշումը կարող է բողոքարկվել ՀՀ Վճռաբեկ դատարանին` հրապարակումից մեկամսյա ժամկետում:


ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ
Իսկականի հետ ճիշտ է

ՆԱԽԱԳԱՀՈՂ ԴԱՏԱՎՈՐ` Մ.ԱՐՂԱՄԱՆՅԱՆ