ԵԿԴ/0286/01/16

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ

ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ


,,25,, նոյեմբերի 2016թ. ք. Երևան



Նախագահությամբ դատավորՄ. Մակյանի

Քարտուղարությամբ` Թ. Խաչատրյանի

Մասնակցությամբ `

Մեղադրող Վ. Ասատրյանի

Տուժող Կ. Մուրադյանի


Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը` նախագահությամբ դատավոր Մ.Մակյանի, խորհրդակցական սենյակում, քննության առնելով թիվ ԵԿԴ/0286/01/16 քրեական գործի նյութերն ըստ մեղադրանքի`

Խորեն Էդուարդի Մխիթարյանի` ծնված 06.06.1990թ.
Երևան քաղաքում, ազգությամբ հայ, ՀՀ քաղաքացի,
իր խոսքերով՝ չամուսնացած, բարձրագույն կրթությամբ, չի
աշխատում, նախկինում դատված՝

- 07.09.2016թ.-ին Երևան քաղաքի Կենտրոն և Նորք-
Մարաշ վարչական շրջանների ընդհանուր
իրավասության դատարանի կողմից՝ ՀՀ քրեական
օրենսգրքի 118-րդ հոդվածով տուգանքի՝ 50.000
/հիսուն հազար/ ՀՀ դրամի չափով, hաշվառված և
բնակվող` ք.Երևան, Չարենցի 1-ին նրբանցք
8-րդ տանը, մեղադրվումէ ՀՀ քրեական օրենսգրքի 118-րդ
հոդվածով և ՀՀ քրեական օրենսգրքի 185-րդ հոդվածի
1-ին մասով,որպես խափանման միջոց է ընտրված`
չհեռանալու մասին ստորագրությունը։

Պ Ա Ր Զ Ե Ց

Ըստ նախաքննական մարմնի կողմից դատարան ներկայացրած նյութերի`

«Խորեն Էդուարդի Մխիթարյանը մեղադրվում է այն բանում, որ նա 2016 թվականի օգոստոսի 26-ին ժամը 23։30-ի սահմաններում Երևան քաղաքի Իսահակյան փողոցի 16-րդ շենքի դիմաց անձնական հարցերի շուրջ վիճաբանել է Կարինե Տիգրանի Մուրադյանի հետ, որի ընթացքում ձեռքերով 3 և ավելի անգամ հարվածել է վերջինիս ուսերին, ինչպես նաև 3 և ավելի անգամ ապտակել նրան՝ Կ. Մուրադյանին պատճառելով մարմնական վնասվածք՝ ձախ բազկի շրջանի արյունազեղման ձևով, որն առողջության թեթև վնասի հատկանիշներ չի պարունակում։

Բացի այդ, նույն վիճաբանության ընթացքում Խորեն Մխիթարյանը Կ. Մուրադյանից խլել է վերջինիս ձեռքին առկա «Սամսունգ Գալաքսի ԷՍ 5» տեսակի բջջային հեռախոսը և դիտավորյալ այն հարվածել է գետնին, որի հետևանքով նշված բջջային հեռախոսը վնասվել է և այդպիսով Կ. Մուրադյանին պատճառվել է զգալի չափի՝ 115.000 ՀՀ դրամի գույքային վնաս»։

Դեպքի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի կողմից 2016 թվականի սեպտեմբերի 05-ին հարուցվել է քրեական գործ։

23.09.2016թ. ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի կողմից կայացվել է որոշում` Խորեն Էդուարդի Մխիթարյանին որպես մեղադրյալ ներգրավելու մասին և նրան մեղադրանք է առաջադրվել ՀՀ քրեական օրենսգրքի 118-րդ հոդվածով և ՀՀ քրեական օրենսգրքի 185-րդ հոդվածի 1-ին մասով։

Վերջինիս նկատմամբ որպես խափանման միջոց ընտրվել է չհեռանալու մասին ստորագրությունը։


Քրեականգործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան է ստացվել և մուտքագրվել 01.11.2016թ.-ին, որը 02.11.2016թ.-ին ընդունվել է դատարանի վարույթ։

Գործի դատական քննության նախապատրաստական մասում տուժող Կարինե Տիգրանի Մուրադյանը հայտարարել է, որ հաշտվում է ամբաստանյալ Խորեն Էդուարդի Մխիթարյանի հետ, որևէ բողոք կամ պահանջ չունի նրա նկատմամբ և խնդրել է ամբասատանյալի նկատմամբ հարուցված քրեական հետապնդումը դադարեցնել։

Ամբաստանյալ Խորեն Էդուարդի Մխիթարյանը դատարանում նույնպես հայտարարել է, որ հաշտվել է տուժողի հետ և դեմ չէ, որպեսզի դադարեցվի իր նկատմամբ հարուցված քրեական հետապնդումը։

Գործով մեղադրող Վ.Ասատրյանը չի առարկել ամբաստանյալի և տուժողի կողմից ներկայացված միջնորդությունների դեմ, հայտարարելով, որ գործը մասնավոր մեղադրանքի է և կան օրենքով սահմանված հիմքեր՝ համապատասխան որոշում կայացնելու համար։

Դատարանը, խորհրդակցական սենյակում ուսումնասիրելով քրեական գործի նյութերը և վերլուծելով դատավարության մասնակիցներիդիրքորոշումը, հանգում է այն հետևության, որԽորեն Էդուարդի Մխիթարյանի նկատմամբ ՀՀ քրեական օրենսգրքի 118-րդ հոդվածով և ՀՀ քրեական օրենսգրքի 185-րդ հոդվածի 1-ին մասով` տուժող Կարինե Տիգրանի Մուրադյանին ենթադրաբար ծեծելու և նրա՝ զգալի չափերի գույքը ենթադրաբար դիտավորության վնասելու վերաբերյալ հարուցված քրեական հետապնդումը ենթակա է դադարեցման, իսկ քրեական գործի վարույթը՝ կարճման, հետևյալ պատճառաբանությամբ.

Համաձայն ՀՀ քրեական դատավարության օրենսգրքի 183-րդ հոդվածի 1-ին մասի`

«ՀՀ քրեական օրենսգրքի (…) 118-րդ հոդվածով և 185-րդ հոդվածի 1-ին մասով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է միչև դատավճիռ կայացնելու համար դատարանի խորդակցական սենյակ հեռանալը»։

Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի`

«Քրեական գործ չի կարող հարուցվել և, իսկ հարուցված քրեական գործի վարույթը ենթակա է կարճման, եթե. /.../

« 5. սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։

Դատարանում հաստատված համարվեց այն հանգամանքը, որ ամբաստանյալին մեղսագրված են արարքներ, որը նախատեսված է ՀՀ քրեական օրենսգրքի 118-րդ հոդվածով և ՀՀ քրեական օրենսգրքի 185-րդ հոդվածի 1-ին մասով։

Դատարանն արձանագրում է, որ տուժող Կարինե Տիգրանի Մուրադյանի և ամբաստանյալ Խորեն Էդուարդի Մխիթարյանի կողմից ներկայացված հայտարարություններով և դիրքորոշումներով հիմնավորվեց, որ տուժողը հաշտվել է ամբաստանյալի հետ, իսկ վերջինս` տուժողի հետ։

Այսպիսով, դատարանը գտնում է, որ առկա են իրավական հիմքեր՝ սույն քրեական գործով ամբաստանյալի նկատմամբ նախաքննական մարմնի կողմից հարուցված ՀՀ քրեական օրենսգրքի 118-րդ հոդվածով և ՀՀ քրեական օրենսգրքի 185-րդ հոդվածի 1-ին մասով, տուժող Կարինե Տիգրանի Մուրադյանին` ենթադրաբար ծեծելու և նրա՝ զգալի չափերի գույքը ենթադրաբար դիտավորության վնասելու առնչությամբ քրեական հետապնդումը դադարեցնելու և քրեական գործի վարույթը կարճելու համար` դատարանի վերը նշված պատճառաբանությամբ և հիմնավորումներով։

ՀՀ քրեական դատավարության օրենսգրքի 313-րդ հոդվածի 1-ին և 2-րդ մասերի համաձայն`

1. Այն բոլոր հարցերի առթիվ, որոնք լուծվում են դատարանի կողմից դատական քննության ժամանակ, դատարանը որոշումներ է կայացնում։

2. Գործը լրացուցիչ քննության ուղարկելու, կարճելու կամ կասեցնելու, խափանման միջոցը փոխելու կամ վերացնելու, բացարկների, փորձաքննություն նշանակելու մասին որոշումները դատարանը կայացնում է խորհրդակցական սենյակում և դրանք պետք է շարադրված լինեն առանձին փաստաթղթերի ձևով` ստորագրված դատարանի ամբողջ կազմի կողմից։

Նման պայմաններում անդրադառնալով Խորեն Էդուարդի Մխիթարյանի նկատմամբ ընտրված խափանման միջոցի` չհեռանալու մասին ստորագրության հարցին, դատարանը հանգում է այն հետևության, որ այն պետք է վերացվի։

Միաժամանակ, լուծելով իրեղեն ապացույցների տնօրինման հարցը և ղեկավարվելով ՀՀ քրեական դատավարության օրենսգրքի 119-րդ հոդվածով` դատարանը գտնում է, որ քրեական գործով որպես իրեղեն ապացույց ճանաչված «Սամսունգ Գալաքսի ԷՍ 5» մոդելի բջջային հեռախոսը պետք է վերադարձնել տուժող Կարինե Տիգրանի Մուրադյանին։

Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ և 313-րդ հոդվածներով, դատարանը


Ո Ր Ո Շ Ե Ց

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննվող ԵԿԴ/0286/01/16 քրեական գործով ամբաստանյալ Խորեն Էդուարդի Մխիթարյանի նկատմամբ՝ ՀՀ քրեական օրենսգրքի 118-րդ հոդվածով և 185-րդ հոդվածի 1-ին մասով հարուցված քրեական հետապնդումը դադարեցնել և քրեական գործի վարույթը կարճել` տուժող Կարինե Տիգրանի Մուրադյանի կողմից վերջինիս հետ հաշտվելու հիմքով։

Ամբաստանյալ Խորեն Էդուարդի Մխիթարյանի նկատմամբ ընտրված խափանման միջոցը՝ չհեռանալու մասին ստորագրությունը, վերացնել։

Քրեական գործով որպես իրեղեն ապացույց ճանաչված «Սամսունգ Գալաքսի ԷՍ 5» մոդելի բջջային հեռախոսը՝ վերադարձնել տուժող Կարինե Տիգրանի Մուրադյանին։

Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո` մեկամսյա ժամկետում։



Դ Ա Տ Ա Վ Ո Ր Մ. Մ Ա Կ Յ Ա Ն