Թիվ. ԵԿԴ/0270/01/16/

Դ Ա Տ Ա Վ Ճ Ի Ռ

Հ Ա Ն ՈՒ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ ՈՒ Թ Յ Ա Ն

ԵՐԵՎԱՆԻ ԷՐԵԲՈՒՆԻ ԵՎ ՆՈՒԲԱՐԱՇԵՆ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԱՌԱՋԻՆ ԱՏՅԱՆԻ ԴԱՏԱՐԱՆԸ ՀԵՏԵՎՅԱԼ ԿԱԶՄՈՎ.

ՆԱԽԱԳԱՀՈՂ ԴԱՏԱՎՈՐ Վ.Ա.ԳՐԻԳՈՐՅԱՆ
ՔԱՐՏՈւՂԱՐՈւԹՅԱՄԲ Ս.ՀՈՎՀԱՆՆԻՍՅԱՆԻ
Ա.ԱԼԵՔՍԱՆՅԱՆԻ
Մ.ԳԵՎՈՐԳՅԱՆԻ
ՄԱՍՆԱԿՑՈւԹՅԱՄԲ`
ՄԵՂԱԴՐՈՂ Կ.ՊԵՏՐՈՍՅԱՆԻ
ՊԱՇՏՊԱՆ Ս.ՄՆԱՑԱԿԱՆՅԱՆԻ

2017թվականի փետրվարի 21–ին, Երևան քաղաքի Էրեբունի և Նուբարաշեն վարչական շրջանների ընդհանուր իրավասության առաջին ատյանի դատարանում, դռնբաց դատական նիստում, քննեց գործն ըստ մեղադրանքի
Քրիստինե Նիկոլի Բադալյանի, ծնված 18.05.1986թ. Երևան քաղաքում, ազգությամբ հայ, ՀՀ քաղաքացի, թերի բարձրագույն կրթությամբ, ամուսնալուծված, խնամքին ոչ մի անձ, նախկինում դատապարտված՝ 21.07.2016թ. Երևանի Արաբկիր և Քանաքեռ - Զեյթուն վարչական շրջանների ընդհանուր իրավասության առաջին ատյանի դատարանի կողմից ՀՀ քրեական օրենսգրքի 242 հոդվածի 2–րդ մասով դատապարտվել է ազատազրկման 1 /մեկ/ տարի 6 /վեց/ ամիս ժամկետով, որն օրինական ուժի մեջ է մտել 31.01.2017թվականին, ֆիզիկապես առողջ, չի աշխատում, հաշվառված է ք.Սևան, Նաիրյան փողոց 139 շենք բն. 11, փաստացի բնակվում է ք.Երևան Հ/Ա Բ2 թաղամաս, Բաբաջանյան փողոց 32 շենք բն. 1, որպես խափանման միջոց ընտրվել է ստորագրություն չհեռանալու մասին։

Մեղադրվում է ՀՀ քրեական օրենսգրքի 235 հոդվածի 4–րդ մասով։ Առաջադրված մեղադրանքում իրեն մեղավոր է ճանաչել։
Գործի դատավարական նախապատմությունը.
Նախաքննական մարմնի կողմից Քրիստինե Բադալյանին ՀՀ քրեական օրենսգրքի 235 հոդվածի 4–րդ մասով մեղադրանք է առաջադրվել այն բանի համար, որ նա շուրջ 4 տարի առաջ Ռուսաստանի Դաշնությունում բնակվելու ընթացքում նվեր ստանալով արհեստագործական եղանակով պատրաստված, կոմբինացված ծակող–կտրող, հարվածող-փշրող սառը զենք հանդիսացող դանակ–կռփազենք, այն որպես հուշանվեր մշտապես պահել է իր մոտ։ 2016թվականի սեպտեմբերի 13–ին,

ամբաստանյալ Ք.Բադալյանն այցելել է Երևանի Մ.Խորենացու փողոցի թիվ. 28 հասցեում գտնվող «Վոյս» կարաոկե ակումբ։ Տվյալ օրը, ժամը 0845–ի սահմաններում, նույն վայրում ծառայություն իրականացնող, ՀՀ ոստիկանության ՊՊԾ գնդի 3–րդ հատուկ գումարտակի 2–րդ վաշտի 2–րդ դասակի ոստիկաններ, գործով վկաներ Գևորգ Ավագյանը և Գարիկ Մաթևոսյանը ակումբի մուտքի մոտ նկատել են ամբաստանյալ Ք.Բադալյանի հագուստին, այն է՝ տաբատի ձախակողմյան գոտկատեղի հատվածում ամրացված դանակի նմանությամբ առարկան, մոտեցել նրան, զրուցել և ապօրինի կերպով սառը զենք կրելու կասկածանքով նրան բերման են ենթարկել ՀՀ ոստիկանության Երևանի Էրեբունու բաժին, որտեղ կատարված անձնական խուզարկությամբ հայտնաբերվել է սառը զենք հանդիսացող դանակ–կռփազենքը։
Կատարած արարքի համար Քրիստինե Նիկոլի Բադալյանին մեղադրանք է առաջադրվել ՀՀ քրեական օրենսգրքի 235 հոդվածի 4–րդ մասով։
Առաջադրված մեղադրանքում ամբաստանյալ Ք.Բադալյանն իրեն մեղավոր ճանաչեց և դատարանին հայտնեց, որ շուրջ 4 տարի առաջ, երբ բնակվել է Ռուսաստանի Դաշնությունում, նվեր է ստացել նշված դանակը և այն որպես հուշանվեր մշտապես պահել է իր մոտ։ Նշված դանակով որևէ մեկի չի վնասել և որևէ այլ գործողություն չի կատարել։ 2016թվականի սեպտեմբերի 13–ին ինքը գտնվել է «Վոյս» կարաոկե ակումբում՝ ընկերուհու ծննդյան տարեդարձին, իսկ դանակը գտնվել է պայուսակում, սակայն մի պահ այն պայուսակին ընկել և ինքն այն դրել է տաբատի գրպանում և այդպես դուրս եկել ակումբից։ Դրանից հետո, իրեն են մոտեցել ոստիկանության աշխատակիցները, հարցրել արդյոք իր մոտ գտնվող իրը դանակ է, թե ոչ և դրական պատասխան լսելուց հետո իրեն բերման են ենթարկել ՀՀ ոստիկանության Էրեբունու բաժին։ Ինչ վերաբերվում է այն հանգամանքին, որ ինքը ոստիկանության աշխատակիցներին հայտնել է, որ իբրև իր պայուսակում զենք էլ կա, ապա դա ընդամենը կատակ է եղել՝ պայմանավորված իրավիճակով։ Միաժամանակ ամբաստանյալ Ք.Բադալյանը հայտնեց, որ չի իմացել սառը զենք կրելու համար նախատեսվող քրեական պատասխանատվության մասին և խնդրեց դատարանին՝ իր նկատմամբ հնարավորինս մեղմ պատիժ նշանակել (դատական նիստի արձանագրություն)։
Դատաքննությամբ ձեռք բերված և հետազոտված ապացույցները.
Վկա Գարիկ Վիրաբի Մաթևոսյանը դատարանին հայտնեց, որ աշխատում է ՀՀ ոստիկանության ՊՊԾ գնդի 3–րդ հատուկ գումարտակի 2–րդ վաշտի 2–րդ դասակում, կոչումով ավագ սերժանտ։ Ամբաստանյալ Ք.Բադալյանին ճանաչում է դեպքի հետ կապված, նրա հետ թշնամություն կամ բարեկամություն չունի։ 2016թվականի սեպտեմբերի 13–ին ինքը գործընկերոջ՝ Գևորգ Ավագյանի հետ միասին ծառայություն են իրականացրել Երևանի Մ.Խորենացու փողոցի թիվ. 28 շենքի հարակից տարածքում։ Ժամը 08–ի սահմաններում, այնտեղ գտնվող «Վոյս» կարաոկե ակումբի հարևանությամբ նկատել են ամբաստանյալ Ք.Բադալյանին, ում տաբատի գոտկատեղի հատվածում ամրացված է եղել պատյանով դանակի նմանությամբ առարկա։ Այդ պատճառով մոտեցել են նրան և հարցնելով տեղեկացել, որ դա իրոք դանակ է, սակայն նա հրաժարվել է ներկայացնել այն, ուստի սառը զենք կրելու կասկածանքով նրան բերման են ենթարկել ՀՀ ոստիկանության Երևանի Էրեբունու բաժին։ Ճանապարհին ամբաստանյալ Ք.Բադալյանը հայտնել է, որ պայուսակում զենք էլ ունի, սակայն իրենց ցույց չի տվել։ Հետագայում, ոստիկանությունում իրականացված խուզարկությունից հետո տեսել է կռփազենք-դանակը, սակայն անձամբ խուզարկությանը չի մասնակցել

(դատական նիստի արձանագրություն)։
Վկա Գևորգ Նվերի Ավագյանը դատարանին հայտնեց, որ աշխատում է ՀՀ ոստիկանության ՊՊԾ գնդի 3–րդ հատուկ գումարտակի 2–րդ վաշտի 2–րդ դասակում, կոչումով ավագ։ Ամբաստանյալ Ք.Բադալյանին ճանաչում է դեպքի հետ կապված, նրա հետ թշնամություն կամ բարեկամություն չունի։ 2016թվականի սեպտեմբերի 13–ին ինքը գործընկերոջ՝ Գարիկ Մաթևոսյանի հետ միասին ծառայություն են իրականացրել Երևանի Մ.Խորենացու փողոցի թիվ. 28 շենքի հարակից տարածքում։ Ժամը 08–ի սահմաններում, այնտեղ գտնվող «Վոյս» կարաոկե ակումբի հարևանությամբ նկատել են ամբաստանյալ Ք.Բադալյանին, ում տաբատի գոտկատեղի հատվածում ամրացված է եղել պատյանով դանակի նմանությամբ առարկա։ Այդ պատճառով մոտեցել են նրան և հարցնելով տեղեկացել, որ դա իրոք դանակ է, սակայն նա հրաժարվել է ներկայացնել այն, ուստի սառը զենք կրելու կասկածանքով նրան բերման են ենթարկել ՀՀ ոստիկանության Երևանի Էրեբունու բաժին (դատական նիստի արձանագրություն)։
Դատարանի կողմից հետազոտվեց դատաքրեագիտական փորձաքննության 19.09.2016թվ. թիվ. 2355–15 եզրակացությունն այն մասին, որ փորձաքննությանը ներկայացված սևեռվող շեղբով ծալովի դանակ – կռփազենքը արհեստագործական եղանակով կոմբինացված սառը զենքերի նմանողությամբ, հանդիսանում է ծակող-կտրող-հարվածող-փշրող սառը զենք։

Գ.Թ. 11 – 12։

Դատարանի կողմից հետազոտվեց Ք.Բադալյանին խուզարկության ենթարկելու մասին հետաքննական մարմնի 13.09.2016թ. արձանագրությունը, հայտնաբերված սառը զենք հանդիսացող դանակ-կռփազենքը իրեղեն ապացույց ճանաչելու մասին նախաքննական մարմնի 03.10.2016թ. որոշումը, ինչպես նաև գործում եղած այլ փաստացի տվյալները։
Գ.Թ. 5, 27։

Դատարանի իրավական վերլուծությունը.
Գնահատելով դատաքննությամբ հետազոտված բոլոր ապացույցները, դրանք համադրելով իրենց համակցության մեջ` դրանց բազմակողմանի, լրիվ և օբյեկտիվ քննության վրա հիմնված, ինչպես նաև ներքին համոզմամբ, դատարանն ապացուցված համարեց ամբաստանյալ Քրիստինե Նիկոլի Բադալյանի կատարած արարքը, գտավ, որ նախաքննական մարմնի կողմից արարքին տրվել է քրեաիրավական ճիշտ որակում և այն համապատասխանում է ՀՀ քրեական օրենսգրքի 235 հոդվածի 4–րդ մասով նախատեսված հանցագործության հատկանիշներին։
Պատժի տեսակ և չափ նշանակելիս, դատարանը հաշվի է առնում կատարված հանցագործության բնույթն ու հանրության համար վտանգավորության աստիճանը, հանցավորի անձն, այն որ ամբաստանյալ Ք.Բադալյանը նախկինում արատավորված և դատապարտված է եղել, այն է՝ Երևանի Արաբկիր և Քանաքեռ - Զեյթուն վարչական շրջանների ընդհանուր իրավասության առաջին ատյանի դատարանի 21.07.2016թվ. թիվ. ԵԱՔԳ/0055/01/15/ դատավճռով, ՀՀ քրեական օրենսգրքի 242 հոդվածի 2–րդ

մասով դատապարտվել է ազատազրկման 1 /մեկ/ տարի 6 /վեց/ ամիս ժամկետով, ՀՀ Վերաքննիչ քրեական դատարանի 26.10.2016թ. որոշմամբ ամբաստանյալի պաշտպանի վերաքննիչ բողոքը մերժվել և առաջին ատյանի դատական ակտը թողնվել է անփոփոխ, ՀՀ Վճռաբեկ դատարանի 31.01.2017թ. որոշմամբ ամբաստանյալի պաշտպանի վճռաբեկ բողոքն վարույթ ընդունելը մերժվել և դատական ակտը մտել է օրինական ուժի մեջ, ամուսնալուծված է, խնամքին ոչ մի անձ չունի, անկեղծորեն զղջում է կատարածի համար։ Պատասխանատվությունը մեղմացնող հանգամանքներ դատարանը դատաքննությամբ չհայտնաբերեց։ Պատասխանատվությունը ծանրացնող հանգամանքներ դատարանը դատաքննությամբ նույնպես չհայտնաբերեց, քանի որ ամբաստանյալ Ք.Բադալյանը նախկինում դատապարտված է եղել անզգուշությամբ կատարված հանցագործության համար, որպիսին պայմաններում բացակայում է ՀՀ քրեական օրենսգրքի 22 հոդվածով նախատեսված ռեցիդիվի առկայությունը։
ՀՀ քրեական օրենսգրքի 10 հոդվածի 1–ին կետի համաձայն, հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի՝ համապատասխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար։
ՀՀ քրեական օրենսգրքի 48 հոդվածի 2–րդ կետի համաձայն, պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները։
ՀՀ քրեական օրենսգրքի 61 հոդվածի 1–ին մասը սահմանում է. «Հանցագործության համար մեղավոր ճանաչված անձի նկատմամբ նշանակվում է արդարացի պատիժ...»։
Հաշվի առնելով կատարված հանցագործության բնույթն ու հանրության համար վտանգավորության աստիճանը, հանցավորի անձը բնութագրող տվյալները, գործի փաստական հանգամանքները, պատասխանատվությունը ծանրացնող հանգամանքների բացակայությունը, դատարանը գտնում է, որ ՀՀ քրեական օրենսգրքի 235 հոդվածի 4–րդ մասի սանկցիայով նախատեսված պատժատեսակներից ամբաստանյալ Ք.Բադալյանի նկատմամբ պետք է նշանակել առավել մեղմ պատժատեսակ, այն է՝ տուգանքի ձևով, համոզված լինելով, որ կոնկրետ տվյալ պատժատեսակը կարող է լինել արդարացի և համապատասխանել կատարած հանցանքի ծանրությանը, որով կվերականգնվի սոցիալական արդարությունը, հնարավոր կլինի ուղղել պատժի ենթարկված անձին և կանխել նրա կողմից հնարավոր նոր հանցագործությունների կատարումը։
Քննարկելով խափանման միջոցի հարցը, դատարանը գտնում է, որ ամբաստանյալ Ք.Բադալյանի նկատմամբ ընտրված ստորագրություն չհեռանալու մասին խափանման միջոցը պետք է թողնել անփոփոխ` մինչև դատավճռի օրինական ուժի մեջ մտնելը։
Անդրադառնալով իրեղեն ապացույցների տնօրինման հարցին, դատարանը գտնում է, որ գործով իրեղեն ապացույց հանդիսացող սևեռվող շեղբով ծալովի դանակ – կռփազենքը պետք է ոչնչացնել։
Քննարկելով դատավճիռների համակցությամբ պատիժ նշանակելու հարցը, դատարանը գտնում է, որ ՀՀ քրեական օրենսգրքի 67 հոդվածի 1–ին կետի համաձայն, ամբաստանյալ Ք.Բադալյանի նկատմամբ նշանակվող պատժին պետք է լրիվ գումարել

Երևանի Արաբկիր և Քանաքեռ - Զեյթուն վարչական շրջանների ընդհանուր իրավասության առաջին ատյանի դատարանի 21.07.2016թ. թիվ. ԵԱՔԴ/0055/01/15/ դատավճռով ազատազրկման ձևով նշանակված պատիժը։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 357–360, 365, 369–373 հոդվածներով, դատարանը.

Վ Ճ Ռ Ե Ց

Քրիստինե Նիկոլի Բադալյանին ճանաչել մեղավոր ՀՀ քրեական օրենսգրքի 235 հոդվածի 4–րդ մասով նախատեսված հանցանքում և դատապարտել տուգանքի նվազագույն աշխատավարձի երկուհարյուրապատիկի՝ 200.000 /երկու հարյուր հազար/ ՀՀ դրամի չափով։ ՀՀ քրեական օրենսգրքի 67 հոդվածի 1–ին կետի համաձայն, նշանակված պատժին լրիվ գումարել Երևանի Արաբկիր և Քանաքեռ - Զեյթուն վարչական շրջանների ընդհանուր իրավասության առաջին ատյանի դատարանի 21.07.2016թ. թիվ. ԵԱՔԴ/0055/01/15/ դատավճռով նշանակված 1 /մեկ/ տարի 6 /վեց/ ամիս ժամկետով ազատազրկումը և Քրիստինե Նիկոլի Բադալյանի նկատմամբ վերջնական պատիժ նշանակել ազատազրկում 1 /մեկ/ տարի 6 /վեց/ ամիս ժամկետով և տուգանք նվազագույն աշխատավարձի երկուհարյուրապատիկի՝ 200.000 /երկու հարյուր հազար/ ՀՀ դրամի չափով։
Քրիստինե Նիկոլի Բադալյանի նկատմամբ ընտրված ստորագրություն չհեռանալու մասին խափանման միջոցը թողնել անփոփոխ՝ մինչև դատավճռի օրինական ուժի մեջ մտնելը։
Իրեղեն ապացույց հանդիսացող սևեռվող շեղբով ծալովի դանակ – կռփազենքը ոչնչացնել։
Դատավարության մասնակիցների կողմից դատավճիռը կարող է բողոքարկվել հրապարակման պահից մեկամսյա ժամկետում՝ ՀՀ վերաքննիչ քրեական դատարան։

ԴԱՏԱՎՈՐ ԳՐԻԳՈՐՅԱՆ Վ.Ա.