Գործ ԵԿԴ/0139/01/16


Ո Ր Ո Շ ՈՒ Մ
քրեական գործի վարույթը կարճելու և քրեական հետապնդումը
դադարեցնելու մասին

«02» սեպտեմբերի 2016թ. ք. Երևան

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը (այսուհետ` Դատարան),

նախագահությամբ դատավոր` Արշակ Վարդանյանի,

քարտուղարությամբ` Գևորգ Պողոսյանի և
Վլադիմիր Շահինյանի,

մասնակցությամբ`

մեղադրող, Երևանի Մալաթիա-Սեբաստիա
վարչական շրջանի դատախազության
ավագ դատախազ` Հովհաննես Փիլիպոսյանի,

դատախազ` Արթուր Մելիքյանի,


նույն դատարանում` խորհրդակցական սենյակում, քննության առնելով քրեական գործն ըստ մեղադրանքի`
Ծովիկ Ժորժիկի Մելքոնյանի` (ծնված 1970թ. հոկտեմբերի 15-ին, Արագածոտնի մարզի Կարբի գյուղում, ազգությամբ հայուհի, ՀՀ քաղաքացի, միջնակարգ կրթությամբ, ամուսնալուծված, խնամքին` 3 երեխա, չի աշխատում, նախկինում չդատապարտված, հաշվառված է Արագածոտնի մարզի Կարբի գյուղի 3-րդ փողոցի 4-րղ տանը, փաստացի բնակվում է Երևանի Ծ.Իսակովի 1/3-րդ տանը, սույն գործով վերագրվել է ՀՀ քրեական օրենսգրքի 185-րդ հոդվածի 1-ին մասով նախատեսված արարքի կատարում, որպես խափանման միջոց է ընտրվել չհեռանալու վերաբերյալ ստորագրություն),
հաշվի առնելով քրեական գործի դա¬տական քննության ընթացքում գործի վարույթը բացառող հանգամանքի ի հայտ գալու փաստը,

Պ Ա Ր Զ Ե Ց`

Մասնավոր մեղադրանքի վերաբերյալ թիվ 16116816 քրեական գործն հարուցվել է 2016թ. ապրիլի 11-ին` ՀՀ քրեական օրենսգրքի 185-րդ հոդվածի 1-ին մասի հատկանիշներով ՀՀ քննչական կոմիտեի Երևան քաղաքի քննչական վարչության Մալաթիա-Սեբաստիա վարչական շրջանի քննչական բաժնում` տուժող Սամվել Հարությունյանի հաղորդման հիման վրա նախապատրաստված նյութերի քննարկ¬ման արդյունքներով։
2016թ. ապրիլի 27-ին Ծովիկ Մելքոնյանի նկատմամբ որպես խափանման միջոց է ընտրվել չհեռանալու վերաբերյալ ստորագրություն։
2016թ. մայիսի 3-ին Ծովիկ Մելքոնյանին մեղադրանք է առաջադրվել ՀՀ քրեական օրենսգրքի 185-րդ հոդվածի 1-ին մասով։
2016թ. մայիսի 16-ին նախաքննական մարմինը որոշում է կայացրել Ծովիկ Մելքոնյանի նկատմամբ ՀՀ քրեական օրենսգրքի 177-րդ հոդվածի 2-րդ մասի 3-րդ կետով և 137-րդ հոդվածի 1-ին մասով քրեական հետապնդում չիրականացնելու մասին` հանցակազմի բացակայության հիմքով։
2016թ. մայիսի 27-ին սույն քրեական գործը Ծովիկ Ժորժիկի Մելքոնյանի նկատմամբ ՀՀ քրեական օրենսգրքի 185-րդ հոդվածի 1-ին մասով հաստատված մեղադրական եզրակացությամբ ուղարկվել է Երևանի Կենտրոն և Նորք-Մարաշ վարչական շրջանների ընդհանուր իրավասության դատարան, 2016թ. մայիսի 30-ին ընդունվել է Դատարանի վարույթ, իսկ 2016թ. հունիսի 14-ին նշանակվել դատական քննության։
Համաձայն Ծովիկ Մելքոնյանին որպես մեղադրյալ ներգրավելու որոշման, ինչպես նաև մեղադրական եզրակացության` վերջինիս ՀՀ քրեական օրենսգրքի 185-րդ հոդվածի 1-ին մասով մեղադրանք է առաջադրվել այն բանի համար, որ նա «2016թ. փետրվարի 16-ից մինչև ապրիլի 5-ն ընկած ժամանակահատվածում, ուրիշի գույքը վնասելու դիտավորությամբ, տարբեր օրերին վնասել է Երևան քաղաքի Ծովակալ Իսակով 1/4-րդ հասցեի բնակիչ Սամվել Հարությունյանի հողամասի քարե պարիսպի որոշ հատվածը, վերջինիս պատկանող հայելին, փայտյա սեղանը, նստարանները, ջահը, ծաղկամանը և այլ առարկաներ` պատճառելով զգալի չափերի` 283.000 ՀՀ դրամի գույքային վնաս.
Այսպես` Ծովիկ Մելքոնյանը, բնակվելով Երևան քաղաքի Ծովակալ Իսակով 1/3-րդ տանը և վատ հարաբերությունների մեջ գտնվելով Ծովակալ Իսակով 1/4 հասցեի բնակիչ Սամվել Հարությունյանի հետ, 2016թ. փետրվարի 16-ին, Սամվել Հարությունյանին գույքային վնաս պատճառելու դիտավորությամբ մի քանի անգամ մուրճով հարվածել է իր և վերջինիս տարածքը բաժանող քարե պարսպին, վնասել պարսպի մի հատվածը` պատճառելով 12.000 ՀՀ դրամի գույքային վնաս։
Այնուհետև` 2016թ. փետրվարի 20-ից մինչև 21-ն ընկած ժամանակահատվածում, շարունակելով իր հանցավոր գործունեությունը` Սամվել Հարությունյանին նորից գույքային վնաս պատճառելու դիտավորությամբ քանդել է նշված պարսպի ևս մի հատված, մտել Սամվել Հարությունյանի տարածք և կոտրել վերջինիս պատկանող հայելին, փայտյա սեղանն ու նստարանները, ջա¬հը և ծաղկամանը` պատճառելով 40.000 ՀՀ դրամի գույքային վնաս։
Ապա` 2016թ. մարտի 5-ից մինչև 6-ն ընկած ժամանակահատվածում, շարունակելով իր հան¬ցավոր գործունեությունը` Սամվել Հարությունյանին նորից գույքային վնաս պատճառելու դիտա¬վորությամբ մտել է նրա տարածք և արմատախիլ արել թվով 12 տնկիներ` պատճառելով 30.000 ՀՀ դրամի գույքային վնաս։
Դրանից հետո` 2016թ. մարտի 24-ին, շարունակելով իր հանցավոր գործունեությունը` Սամ¬վել Հարությունյանին կրկին գույքային վնաս պատճառելու դիտավորությամբ, մտել է վեր¬ջինիս տարածք, կոտրել փայտյա սեղանն ու աթոռները, թվով 8 վազերը, ծորակը, 2 փայտյա աս¬տի¬ճան¬ները, մետրը, շինության պատուհանը, շինության մուտքի դուռը ու փականը, շինության մուտքի դռան վերևի հատվածում առկա լուսամփոփը և վնասել դարպասի փականը` պատճառելով 186.000 ՀՀ դրամի գույքային վնաս։
Բացի այդ` 2016թ. ապրիլի 5-ին, Սամվել Հարությունյանին նորից գույքային վնաս պատճառելու դիտավորությամբ, քանդել է վերջինիս կողմից կառուցած պարսպի մի հատվածը` պատ¬ճառելով 15.000 ՀՀ դրամի գույքային վնաս»։
2016թ. հունիսի 21-ին Դատարանի գրասենյակ է մուտք եղել գործով տուժողներ Սամվել Հարությունյանի և Ինգա Նիկողոսյանի դիմումները, որոնցով վերջիններս խնդրել են Ծովիկ Մել¬քոն¬յանի նկատմամբ հարուցված քրեական հետապնդումը դադարեցնել և քրեական գործի վա¬րույթը կարճել` պատճառաբանելով, որ նրա հետ հաշտվել են, բողոք չունեն։
Գործի դատական քննության ընթացքում ամբաստանյալ Ծովիկ Մելքոնյանը հայտնեց, որ իրեն առաջադրված մեղադրանքի հետ հա¬մաձայն է, տուժողների հետ հաշտվել է, չի առարկում, որ իր նկատմամբ հարուցված քրեական հե¬տապնդումը դադա¬րեցվի ոչ արդարացնող այդ հիմքով։
Գործով մեղադրող Արթուր Մելիքյանը չառարկեց քրեական գործի վարույթը կար¬ճելու և ամբաստանյալ Ծովիկ Մելքոնյանի նկատ¬մամբ և հետապնդումը հաշ¬տության հիմքով դադա¬րեցնելու դեմ։
Դատարանը, հաշվի առնելով ամբաստանյալի և տուժողների վե¬րոնշյալ դիր¬քո¬րոշումները, գտնում է, որ ի հայտ է եկել քրեական գործի վարույթը բացառող հանգամանք (հիմք), որի պայ¬մաններում քրեական գործի վարույթն ենթակա է կարճման, իսկ ամբաստանյալ Ծ.Մելքոն¬յանի նկատմամբ հարուցված քրեա¬կան հետապնդումը` դադա¬րեցման, որպիսի հետևութ¬յան հանգում է հետևյալ իրա¬վական վերլու¬ծութ¬յունների արդյունքներով.
ՀՀ քրեական դատավարական օրենսգրքի 33-րդ հոդվածի համաձայն` մասնավոր մե¬ղադրան¬¬քի գործեր են համարվում նույն օրենսգրքի 183-րդ հոդվածում նախատեսված հան¬ցագոր¬ծություն¬ների վերաբերյալ գործերը։
Ի թիվս ՀՀ քրեական դատավարական օրենսգրքի 183-րդ հոդվածում թվարկվածների` ՀՀ քրեական օրենսգրքի (…) 185-րդ հոդվածի 1-ին մասով նախատեսված հանցա¬գործության վերաբերյալ գործերը ևս հարուցվում են ոչ այլ կերպ, քան տուժողի բողոքի հիման վրա, և կաս¬կած¬յալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը։
ՀՀ քրեական դատավարական օրենսգրքի 35-րդ հոդվածի 1-ին մասի 5-րդ կետի համա¬ձայն` քրեական հետապնդում չի կարող իրականացվել, իսկ հարուցված քրեական գործի վա¬րույ¬թը ենթակա է կարճման, եթե ՀՀ քրեական դատավարական օրենսգրքով հատկապես նախատեսված դեպքերում տուժողը հաշտվել է կասկածյալի կամ մեղադրյալի հետ։ Նույն հոդվածի 5-րդ մասի համաձայն` Դատարանը, հայտնաբերելով քրեական հետապնդումը բացառող հանգամանքներ, լուծում է ամբաստանյալի նկատմամբ քրեական հետապնդումը դադարեցնելու հարցը։
ՀՀ քրեական դատավարական օրենսգրքի 36-րդ հոդվածի համաձայն` մասնավոր հետապնդման գործերի վարույթը կարճվում է և փաստվում է քրեական հետապնդում իրականացնելու հրաժարում, երբ տուժողն հաշտվում է մեղադրյալի հետ։
ՀՀ քրեական դատավարական օրենսգրքի 64-րդ հոդվածի 2-րդ մասի համաձայն` մեղադրյալը, ում վերաբերյալ գործը նշանակված է դատական քննության, կոչվում է ամբաստանյալ, հետևաբար` ՀՀ քրեական դատավարական օրենսգրքի 35-րդ և 36-րդ հոդվածների վերոնշյալ մեկնաբանությունները վերաբերելի են նաև սույն գործով ամբաստանյալի կարգավիճակ ունեցող Ծովիկ Մելքոնյանին։
ՀՀ քրեական դատավարական օրենսգրքի 294-րդ հոդվածի 2-րդ մասի համաձայն` գործով վարույթը կարճելու և/կամ քրեական հետապնդումը դադարեցնելու մասին որոշումն ընդգրկում է նախնական քննության փուլում ընտրված խափանման և վնասի հատուցման ապահովման միջոց¬ները, քրեադատավարական հարկադրանքի այլ միջոցները վերացնելու մասին որոշում, ինչպես նաև որոշում` իրեղեն ապացույցների ճակատագրի վերաբերյալ։ Տվյալ հարցին անդրադառնալով` Դատարանն արձանագրում է, որ քրեական գործով իրեղեն ապացույցներ չկան, վնասի հատուց¬ման պահանջ չի ներկայացվել, ամբաստանյալի գույքի նկատմամբ արգելանք չի կիրառվել։
ՀՀ քրեական դատավարական օրենսգրքի 151-րդ հոդվածի 2-րդ մասի համաձայն` խափանման միջոցը վերացվում է, երբ վերանում է դրա անհրաժեշտությունը։ Դատարանը վերոնշյալ տրամաբանությամբ փաստում է, որ ամբաստանյալ Ծովիկ Մելքոնյանի նկատմամբ ընտրված խափանման միջոց չհեռանալու մասին ստորագրությունն ենթակա է անհապաղ վերացման։
Վերոգրյալի հիման վրա, ղեկավարվելով ՀՀ քրեական դատավարական օրենսգրքի 35-րդ հոդվածի 1-ին մասի 5-րդ կետով, 41-րդ հոդվածի 2-րդ մասի 8-րդ կետով, 183-րդ, 294-րդ և 313-րդ հոդվածներով, ինչպես նաև 379-րդ հոդվածի 1-ին մասի 1-ին կետով, Դատարանը

Ո Ր Ո Շ Ե Ց `

1. Ծովիկ Ժորժիկի Մելքոնյանի նկատմամբ ՀՀ քրեական օրենսգրքի 185-րդ հոդվածի 1-ին մասով հարուցված քրեական հետապնդումը դադարեցնել, թիվ ԵԿԴ/0139/01/16 քրեական գործի վարույթը կարճել` վերջինիս հետ տուժողներ Սամվել Հարությունյանի և Ինգա Նիկողոսյանի հաշտության հիմքով։
2. Ծովիկ Մելքոնյանի նկատմամբ որպես խափանման միջոց ընտրված չհեռանալու մասին ստորագրությունն անհապաղ վերացնել։
3. Սույն որոշման օրինակներն հանձնել կողմերին` պարզաբանելով, որ այն կարող է բողոքարկվել ՀՀ վերաքննիչ քրեական դատարան` ստացման օրվանից մեկամսյա ժամկետում։



ԴԱՏԱՎՈՐ` Ա.ՎԱՐԴԱՆՅԱՆ