ԵԿԴ/0105/01/16





ՈՐՈՇՈՒՄ
ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ ԵՎ
ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ՎԵՐԱԲԵՐՅԱԼ ՄԻՋՆՈՐԴՈՒԹՅՈՒՆԸ ՔՆՆՈՒԹՅԱՆ ԱՌՆԵԼՈՒ ՄԱՍԻՆ


«21» նոյեմբերի 2016թ. ք.Երևան

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը` նախագահող դատավոր Արմեն Բեկթաշյանի, քարտուղարությամբ Գեորգի Սարգսյանի մասնակցությամբ մեղադրող Աբգար Առաքելյանի, տուժող Մարինե Սարդարյանի, ամբաստանյալ Արմեն Հակոբյանի, դռնբաց դատական նիստում քննելով քրեական գործն ըստ մեղադրանքի Արմեն Հակոբյանի (ծնված 1976 թվականի հուլիսի 06-ին ԼՂՀ, ագությամբ հայ, ՀՀ քաղաքացի, նախկինում դատված, դատվածությունը չմարված)` ՀՀ քրեական օրենսգրքի 178-րդ հոդվածի 1-ին մասով, դռնբաց դատական նիստում քննության առնելով` թիվ ԵԿԴ/0105/01/16 քրեական գործի վարույթը կարճելու և քրեական հետապնդումը դադարեցնելու մասին տուժող Մարինե Սարդարյանի միջնորդությունը,


ՊԱՐԶԵՑ

2015 թվականի նոյեմբերի 06-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Պ.Աղաբաբյանի կողմից որոշում է կայացվել` ՀՀ քրեական օրենսգրքի 178-րդ հոդվածի 1-ին մասով թիվ 13838215 քրեական գործը հարուցելու մասին:
2015 թվականի նոյեմբերի 06-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Պ.Աղաբաբյանի կողմից որոշում է կայացվել թիվ 13838215 քրեական գործով Մարինե Սարդարյանին որպես տուժող ճանաչելու մասին:
2016 թվականի ապրիլի 20-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Պ.Աղաբաբյանի կողմից որոշում է կայացվել թիվ 13838215 քրեական գործով Արմեն Սուրենի Հակոբյանին որպես մեղադրյալ ներգրավելու մասին և նրան մեղադրանք է առաջադրվել` ՀՀ քրեական օրենսգրքի 178-րդ հոդվածի 1-ին մասով այն բանի համար, որ նա 2015թ. հոկտեմբերի 15-ից մինչև հոկտեմբերի 16-ն ընկած ժամանակահատվածում, ներկայանալով Ալեքս Առաքելյան անվամբ, Մարինե Լևոնի Սարդարյանից խաբեության և վստահությունը չարաշահելու միջոցով, նախնական միասնական դիտավորությամբ մաս-մաս հափշտակել է ընդհանուր զգալի չափի՝ 282.000 ՀՀ դրամ:
Այսպես.
Արմեն Հակոբյանը 2015թ. հոկտեմբերի 10-ից մինչև հոկտեմբերի 15-ն ընկած ժամանակահատվածում «Օդնոկլասսնիկի» սոցիալական ցանցի միջոցով ծանոթացել է Մարինե Սարդարյանի հետ, վերջինիս ներկայացել է Ալեքս Առաքելյան անվամբ և որոշ ժամանակ վերջինիս հետ շփվելուց հետո, նրանց միջև ձևավորվել են մտերիմ հարաբերություններ:
2015թ. հոկտեմբերի 13-ից մինչև հոկտեմբերի 14-ն ընկած ժամանակահատվածում Ա. Հակոբյանը Մ. Սարդարյանին նշված սոցիալական կայքի միջոցով հայտնել է, որ գտնվում է Վրաստանի Հանրապետության Փոթի քաղաքի նավահանգիստում, այնտեղից ապրանքներ բերելու հետ կապված գործարքներ է կատարում: Խարդախությամբ Մարինե Սարդարյանից գումար հափշտակելու նախնական դիտավորությամբ Ա.Հակոբյանը հիշյալ գործարքների համար վճարումներ կատարելու պատրվակով Մ. Սարդարյանից 147.000 ՀՀ դրամ գումար է խնդրել՝ միաժամանակ հայտնելով, որ «Անելիք» բանկային փոխանցման համակարգով վերջինիս հաշվեհամարին 1000 ԱՄՆ դոլար գումար է փոխանցել, որը հաշվեհամարին կնստի մեկ օր անց, սակայն հնարավոր է մի քիչ ուշ նստի, որի մի մասը կհաշվակցվի որպես իրեն ուղարկված գումար, իսկ մնացած մասը կմնա Մարինե Սարդարյանին:
Այնուհետև Արմեն Հակոբյանն իր հանցավոր մտադրությունն իրագործելու նպատակով Մ. Սարդարյանի մոտ է ուղարկել իր ծանոթ, տաքսու վարորդ Սևակ Մելքոնյանին՝ վերջինիս նշելով, որ որոշակի գումար պետք է վերցնի և հանձնի իր կնոջը, սակայն չհայտնելով գումարը վերցնելու իրական նպատակը։ Վերջինս Մ. Սարդարյանից 2015թ. հոկտեմբերի 13-ից մինչև հոկտեմբերի 14-ն ընկած ժամանակահատվածում Մաշտոցի պողոտայում վերցրել է 147.000 ՀՀ դրամ գումար, ապա գործով չպարզված ժամանակահատվածում այն հանձնել է Ա՜. Հակոբյանի կնոջը՝ Արմինե Սահակյանին, ով, նույնպես տեղյակ չլինելով Ա. Հակոբյանի հանցավոր մտադրության մասին, նշված գումարը գործով չպարզված ժամանակահատվածում փոխանցել է. Ա. Հակոբյանին, ով խարդախությամբ հափշտակել է հիշյալ գումարը։
2015թ. հոկտեմբերի 16-ին, ժամը 12:00-ից մինչև ժամը 12:30-ն ընկած ժամանակահատվածում Արմեն Հակոբյանը կրկին Մ. Սարդարյանի մոտ է ուղարկել իր ծանոթ, տաքսու վարորդ Սևակ Մելքոնյանին` վերջինիս նշելով, որ որոշակի գումար պետք է վերցնի և հանձնի իր կնոջը, սակայն չհայտնելով գումարը վերցնելու իրական նպատակը: Վերջինս նույն ժամանակահատվածում Մաշտոցի պողոտայում Մ.Սարդարյանից վերցրել է 135.000 ՀՀ դրամ գումար, ապա գորոծվ չպարզված ժամանակահատվածում այն հանձնել է Ա.Հակոբյանին հանցավոր մտադրության մասին, նշված գումարը գորոծվ չպարզված ժամանակահատվածում փոխանցել է Ա.Հակոբիանին, ով խարդախությամբ հափշտակել է հիշյալ գումարը:
2016 թվականի ապրիլի 21-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Պ.Աղաբաբյանի կողմից որոշում է կայացվել թիվ 13838215 քրեական գործով 28.11.2015 թվականին <<Ղ-Տելեկոմ>> ՓԲ ընկերությունից ստացված մուտքային և ելքային հեռախոսահամարների վերծանումները պարունակող լազերային սկավառակը ապացույց ճանաչելու մասին:
2016 թվականի ապրիլի 21-ին ՀՀ քննչական կոմիտեի Երևան քաղաքի քննչական վարչության Երևան քաղաքի Կենտրոն և Նորք-Մարաշ վարչական շրջանների քննչական բաժնի ավագ քննիչ Պ.Աղաբաբյանի կողմից որոշում է կայացվել թիվ 13838215 քրեական գործով այլ փաստաթուղթ հանդիսացող` թիվ 12804715 քրեական գործով Ա.Հակոբյանի կողմից որպես մեղադրյալ տրված 25.01.2016թ. ցուցմունքի պատճենը ապացույց ճանաչելու մասին:
2016 թվականի ապրիլի 27-ին Ա.Հակոբյանի վերաբերյալ թիվ 13838215 քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի Դատարան, որտեղ քրեական գործին շնորհվել է ԵԿԴ/0105/01/16 համարը:
2016 թվականի հուլիսի 19-ին Դատարան է ստացվել տուժող Մ.Սարդարյանի դիմումը, որով հայտնել է, որ հաշտվել է ամբաստանյալ Ա.Հակոբյանի հետ, բողոք և քաղաքացիական հայց չի ներկայացնում և խնդրել է քրեական գործի վարույթը կարճել:

Դատական քննության ժամանակ տուժող Մ.Սարդարյանը պնդեց իր կողմից դատարան ներկայացված դիմումը:
Դատական քննության ժամանակ ամբաստանյալ Արման Հակոբյանը հայտնեց, որ ինքը նույնպես հաշտվել է տուժող Մարինե Սարդարյանի հետ և գիտակցում է հաշտվելու հետևանքները:
Մեղադրող` Ա.Առաքելյանը չառարկեց ներկայացված միջնորդության դեմ:
ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի համաձայն` քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե ՀՀ քրեական դատավարության օրենսգրքով նախատեսված դեպքերում տուժողը հաշտվել է մեղադրյալի հետ:
ՀՀ քրեական դատավարության օրենսգրքի 183-րդ հոդվածի 1-ին մասի համաձայն` ՀՀ քրեական օրենսգրքի 178-րդ հոդվածի 1-ին մասով նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման: Հաշտությունը թույլատրվում է մինչև դատավճիռ կայացնելու համար դատարանի խորհրդակցական սենյակ հեռանալը:
Դատարանը, նկատի ունենալով, որ տուժող Մարինե Սարդարյանը և ամբաստանյալ Արմեն Հակոբյանը հաշտվել են միմյանց հետ, գտնում է, որ թիվ ԵԿԴ/0105/01/16 քրեական գործի վարույթը պետք է կարճել և ամբաստանյալ Արմեն Հակոբյանի նկատմամբ ՀՀ քրեական օրենսգրքի 178-րդ հոդվածի 1-ին մասով քրեական հետապնդումը պետք է դադարեցնել:
Ապացույց ճանաչված <<Ղ-Տելեկոմ>> ՓԲ ընկերությունից ստացված մուտքային և ելքային հեռախոսահամարների վերծանումները պարունակող լազերային սկավառակը պետք է թողնել քրեական գործի նյութերին կցված դրա պահելու ամբողջ ժամանակահատվածում:
Ապացույց ճանաչված թիվ 12804715 քրեական գործով Ա.Հակոբյանի կողմից որպես մեղադրյալ տրված 25.01.2016թ. ցուցմունքի պատճենը պետք է թողնել քրեական գործի նյութերին կցված դրա պահելու ամբողջ ժամանակահատվածում:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ, 41-րդ, 183-րդ և 313-րդ հոդվածներով` Դատարանը


ՈՐՈՇԵՑ

Թիվ ԵԿԴ/0105/01/16 քրեական գործի վարույթը կարճել և Արմեն Հակոբյանի նկատմամբ ՀՀ քրեական օրենսգրքի 178-րդ հոդվածի 1-ին մասով քրեական հետապնդումը դադարեցնել` տուժող Մարինե Սարդարյանի կողմից ամբաստանյալ Արմեն Հակոբյանի հետ հաշտվելու հիմքով:
Ապացույց ճանաչված <<Ղ-Տելեկոմ>> ՓԲ ընկերությունից ստացված մուտքային և ելքային հեռախոսահամարների վերծանումները պարունակող լազերային սկավառակը` թողնել քրեական գործի նյութերին կցված դրա պահելու ամբողջ ժամանակահատվածում:
Ապացույց ճանաչված թիվ 12804715 քրեական գործով Ա.Հակոբյանի կողմից որպես մեղադրյալ տրված 25.01.2016թ. ցուցմունքի պատճենը` թողնել քրեական գործի նյութերին կցված դրա պահելու ամբողջ ժամանակահատվածում:

Սույն որոշումը կարող է բողոքարկվել Հայաստանի Հանրապետության վերաքննիչ քրեական դատարան` հրապարակման օրվանից մեկամսյա ժամկետում:


ԴԱՏԱՎՈՐ Ա.ԲԵԿԹԱՇՅԱՆ