ԵԿԴ/0078/01/16

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ

ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ


,,28,, ապրիլի 2016թ. ք. Երևան



Նախագահությամբ դատավոր Մ. Մակյանի

Քարտուղարությամբ` Թ. Խաչատրյանի

Մասնակցությամբ `

Մեղադրող Տ. Ուզոյանի

Տուժող Հ. Պալապանի


Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը` նախագահությամբ դատավոր Մ.Մակյանի, խորհրդակցական սենյակում, քննության առնելով թիվ ԵԿԴ/0078/01/16 քրեական գործի նյութերն ըստ մեղադրանքի`

Էդուարդ Ժորայի Պողոսյանի` ծնված 14.02.1976թ.
Երևան քաղաքում, ազգությամբ հայ, ՀՀ քաղաքացի,
ամուսնացած, չի աշխատում, միջնակարգ կրթությամբ,
չդատված, հաշվառված և բնակվող` ք.Երևան, Վարդանանց
փողոց, 5-րդ շենք, 42 բնակարան, մեղադրվում է
ՀՀ քրեական օրենսգրքի 177-րդ հոդվածի 1-ին մասով,



Պ Ա Ր Զ Ե Ց

Ըստ նախաքննական մարմնի կողմից դատարան ներկայացրած նյութերի`

«Երևան քաղաքի Վարդանանց փողոց 5-րդ շենք 42-րդ բնակարանի բնակիչ, սույն քրեական գործով մեղադրյալ էդուարդ ժորայի Պողոսյանը 2015 թվականի հուլիսի 29-ին ժամը 16։49-ի սահմաններում, ընկերոջ` Արթուր Կարապետյանի հետ հանդիպել և գնացել են Երևան քաղաքի «Ոոսիա Մոլ» ոսկերչական սրահ` վերջինիս մոր` Հասմիկ Գևորգյանի ծննդյան օրվա կապակցությամբ նվեր գնելու նպատակով։ Ա.Կարապետյանի հետ շրջել է ոսկերչական սրահում և մոտեցել է սրահի թիվ 24-25 տաղավարներին։ Օգտվելով այն հանգամանքից, որ տաղավարում առկա գույքի սեփականատեր Հարություն Պալապանը զրուցում է իր գործընկերոջ հետ և չի հետևում տաղավարի վրա դրված զարդերին, իսկ Արթուր Կարապետյանը գնելու նպատակով ուսումնասիրում է նշված ոսկյա զարդերը, իր մոտ ծագած հանցավոր դիտավորությունը իրականացնելով, տաղավարի վրայից գաղտնի հափշտակել է 12-ից 13 գրամ քաշով ոսկյա թևնոց։ Այնուհետև, ստելով Արթուր Կարապետյանին, որ սրահում նկատել է իր ծանոթներից ինչ-որ մեկին, որին գումար է պարտք, խնդրել է ընկերոջը դուրս գալ սրահից` քանի դեռ վերջինս իրեն չի նկատել և Ա.Կարապետյանի հետ անարգելք հեռացել է ոսկերչական սրահից` Հարություն Պալապանին պատճառելով զգալի չափերի` 300.000 ՀՀ դրամի գույքային վնաս։ Դրանից հետո Արթուր Կարապետյանին չտեղեկացնելով իր կատարած հանցագործության մասին, գործով անհայտ հանգամանքներում, գաղտնի հափշտակած թևնոցն իրացրել է»։

Փաստի առթիվ ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի կողմից 2015 թվականի օգոստոսի 11-ին հարուցվել է քրեական գործ։

26.02.2016թ. ՀՀ քննչական կոմիտեի Երևան քաղաքի քննչական վարչության Էրեբունի և Նուբարաշեն վարչական շրջանների քննչական բաժնի կողմից կայացվել է որոշում` Էդուարդ Ժորայի Պողոսյանին որպես մեղադրյալ ներգրավելու մասին և նրան մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով։

Քրեական գործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան է ստացվել և մուտքագրվել 01.04.2016թ.-ին, որը 02.04.2016թ.-ին ընդունվել է դատարանի վարույթ։

Գործի դատական քննության նախապատրաստական մասում տուժող Հարություն Պալապանը դատարանին ներկայացրել է գրավոր դիմում, որով հայտնել է, որ հաշտվում է ամբաստանյալ Էդուարդ Պողոսյանի հետ, վերջինս վերականգնել է իրեն պատճառած նյութական վնասը` 300.000 ՀՀ դրամը, որևէ բողոք չունի նրա նկատմամբ և խնդրել է ամբասատանյալի նկատմամբ քրեական հետապնդումը դադարեցնել։

Ամբաստանյալ Էդուարդ Պողոսյանը դատարանում նույնպես հայտարարել է, որ հաշտվել է տուժողի հետ և դեմ չէ, որպեսզի դադարեցվի իր նկատմամբ հարուցված քրեական հետապնդումը։

Գործով մեղադրող Տ.Ուզոյանը չի առարկել ամբաստանյալի և տուժողի կողմից ներկայացված միջնորդությունների դեմ, հայտարարելով, որ գործը մասնավոր մեղադրանքի է և կան օրենքով սահմանված հիմքեր՝ համապատասխան որոշում կայացնելու համար։

Դատարանը, խորհրդակցական սենյակում ուսումնասիրելով քրեական գործի նյութերը և վերլուծելով դատավարության մասնակիցների դիրքորոշումը, հանգում է այն հետևության, որ Էդուարդ Ժորայի Պողոսյանի նկատմամբ ՀՀ քրեական օրենսգրքի 177-րդ հոդվածի 1-ին մասով` տուժող Հարություն Հակոբի Պալապանի` զգալի չափերի գույքը ենթադրաբար գաղտնի հափշտակելու վերաբերյալ հարուցված քրեական հետապնդումը ենթակա է դադարեցման, իսկ քրեական գործի վարույթը՝ կարճման, հետևյալ պատճառաբանությամբ.

Համաձայն ՀՀ քրեական դատավարության օրենսգրքի 183-րդ հոդվածի 1-ին մասի`

«ՀՀ քրեական օրենսգրքի /…/ 177-րդ հոդվածի 1-ին մասով /.../ նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է միչև դատավճիռ կայացնելու համար դատարանի խորդակցական սենյակ հեռանալը»։

Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի`

«Քրեական գործ չի կարող հարուցվել և, իսկ հարուցված քրեական գործի վարույթը ենթակա է կարճման, եթե. /.../

« 5. սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։

Դատարանում հաստատված համարվեց այն հանգամանքը, որ ամբաստանյալին մեղսագրված է արարք, որը նախատեսված է ՀՀ քրեական օրենսգրքի 177-րդ հոդվածի 1-ին մասով։

Դատարանն արձանագրում է, որ տուժող Հարություն Հակոբի Պալապանի և ամբաստանյալ Էդուարդ Ժորայի Պողոսյանի կողմից ներկայացված հայտարարություններով և դիրքորոշումներով հիմնավորվեց, որ տուժողն իր` զգալի չափերով գույքը գաղտնի հափշտակելու վերաբերյալ ենթադրաբար կատարված հանցավոր ոտնձգության առումով հաշտվել է ամբաստանյալի հետ, իսկ վերջինս` տուժողի հետ։

Այսպիսով, դատարանը գտնում է, որ առկա են իրավական հիմքեր սույն քրեական գործով ամբաստանյալի նկատմամբ նախաքննական մարմնի կողմից հարուցված ՀՀ քրեական օրենսգրքի 177-րդ հոդվածի 1-ին մասով, տուժող Հարություն Պալապանի` զգալի չափերի գույքը ենթադրաբար գաղտնի հափշտակելու առնչությամբ քրեական հետապնդումը դադարեցնելու և քրեական գործի վարույթը կարճելու համար` դատարանի վերը նշված պատճառաբանությամբ և հիմնավորումներով։

ՀՀ քրեական դատավարության օրենսգրքի 313-րդ հոդվածի 1-ին և 2-րդ մասերի համաձայն`

1. Այն բոլոր հարցերի առթիվ, որոնք լուծվում են դատարանի կողմից դատական քննության ժամանակ, դատարանը որոշումներ է կայացնում։

2. Գործը լրացուցիչ քննության ուղարկելու, կարճելու կամ կասեցնելու, խափանման միջոցը փոխելու կամ վերացնելու, բացարկների, փորձաքննություն նշանակելու մասին որոշումները դատարանը կայացնում է խորհրդակցական սենյակում և դրանք պետք է շարադրված լինեն առանձին փաստաթղթերի ձևով` ստորագրված դատարանի ամբողջ կազմի կողմից։

Նման պայմաններում անդրադառնալով Էդուարդ Ժորայի Պողոսյանի նկատմամբ ընտրված խափանման միջոցի` չհեռանալու մասին ստորագրության հարցին, դատարանը, հանգում է այն հետևության, որ այն պետք է վերացվի։

Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ և 313-րդ հոդվածներով, դատարանը


Ո Ր Ո Շ Ե Ց

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննվող ԵԿԴ/0078/01/16 քրեական գործով ամբաստանյալ Էդուարդ Ժորայի Պողոսյանի նկատմամբ՝ ՀՀ քրեական օրենսգրքի 177-րդ հոդվածի 1-ին մասով հարուցված քրեական հետապնդումը դադարեցնել և քրեական գործի վարույթը կարճել` տուժող Հարություն Հակոբի Պալապանի կողմից վերջինիս հետ հաշտվելու հիմքով։

Ամբաստանյալ Էդուարդ Ժորայի Պողոսյանի նկատմամբ ընտրված խափանման միջոցը՝ չհեռանալու մասին ստորագրությունը, վերացնել։

Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո` մեկամսյա ժամկետում։




Դ Ա Տ Ա Վ Ո Ր Մ. Մ Ա Կ Յ Ա Ն