Ո Ր Ո Շ ՈՒ Մ
Քրեական գործի վարույթը կարճելու և քրեական հետապնդումը դադարեցնելու մասին

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը,

նախագահությամբ` դատավոր Մ. Մարտիրոսյանի,
քարտուղարությամբ` Ա. Հովհաննիսյանի,

մասնակցությամբ`
մեղադրող,
Երևանի Կենտրոն և Նորք-Մարաշ
վարչական շրջանների դատախազության
դատախազ Մ. Գեղամյանի,

տուժող Ս. Մանուկյանի,


2016թ. սեպտեմբերի 05-ին, դատարանում, դռնբաց դատական նիստում քննելով քրեական գործն ըստ մեղադրանքի
Գագիկ Վլադիմիրի Վարդանյանի`
ծնված 1972թ. հունիսի 10-ին Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուսնացած, խնամքին մեկ անչափահաս զավակ, չի աշխատում, դատվածություն չունեցող, հաշվառված է Երևանի Նազարբեկյան փողոցի թիվ 14 շենքի թիվ 29 բնակարանում, բնակվում է Երևանի Հաղթանակ թաղամասի թիվ 18 փողոցի թիվ 2 տանը, կալանքի տակ չէ, մեղադրվում է ՀՀ քրեական օրենսգրքի 177-րդ հոդվածի 1-ին մասով,

Պ Ա Ր Զ Ե Ց

Նախաքննության մարմինը Գագիկ Վլադիմիրի Վարդանյանին մեղադրանք է առաջադրել հետևյալ արարքի համար, որ նա` «2016 թվականի մարտի 05-ին ժամը 13։22-ին Երևան քաղաքի Պարոնյան թիվ 21 հասցեում գտնվող «Նաիրի» ԲԿ-ի 2-րդ հարկի թիվ 255-րդ աշխատասենյակից կատարել է ուրիշի գույքի զգալի չափերի գաղտնի հափշտակություն։
Այսպես.
2016 թվականի մարտի 05-ին ժամը 13-ի սահմաններում Գագիկ Վլադիմիրի Վարդանյանը բուժզննման նպատակով այցելել է «Նաիրի» ԲԿ, որի երկրորդ հարկի թիվ 255-րդ «Գաստրոէնտերոլոգ» աշխատասենյակի կիսաբաց վիճակում գտնվող դռնից մուտք է գործել աշխատասենյակ, որտեղ նկատել է աջ մասում գտնվող պահարանի կիսաբաց փեղկը և դրանում դրված կանացի պայուսակը, որն էլ նույն պահին նպատակադրվել է հափշտակել։
Հանցավոր մտադրությունն իրականացնելու համար, շուրջ երկու րոպե սպասել է թիվ 255-րդ աշխատասենյակի մոտ, որի ժամանակ տեսնելով, որ ոչ մեկ չի այցելել աշխատասենյակ, ի վերջո ժամը 13։22-ին բացել է աշխատասենյակի, ապա նաև կիսաբաց պահարանի դուռը և այնտեղ դրված պայուսակի միջից գաղտնի հափշտակել է նշված աշխատասենյակի բուժքույր Սաթենիկ Ռուստամի Մանուկյանին պատկանող դրամապանակը, որի մեջ եղել է զգալի չափերի՝ 50.000 ՀՀ դրամ գումար, 13.380 ՀՀ դրամին համարժեք 2.000 ՌԴ ռուբլի և 1990 ՀՀ դրամին համարժեք 10 վրացական լարի, իսկ դրամապանակն էլ այցեքարտերի հետ միասին նետել հիվանդանոցի հարևանությամբ գտնվող ձորը, որն էլ հայտնաբերվել է քննչական փորձարարության ընթացքում։
Այսինքն` Գագիկ Վլադիմիրի Վարդանյանին մեղսագրվում է հանցավոր արարք՝ նախատեսված ՀՀ քրեական օրենսգրքի 177-րդ հոդվածի 1-ին մասով։»։
2016թ. մարտի 29-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, 2016թ. մարտի 31-ին ընդունվել է դատարանի վարույթ, իսկ 2016թ. ապրիլի 05-ին որոշում է կայացվել քրեական գործի դատական քննությունը 2016թ. ապրիլի 13-ին նշանակելու մասին։
Ամբաստանյալ Գագիկ Վարդանյանի հասցեով պատշաճ կարգով ծանուցագիր է ուղարկվել` 2016թ. ապրիլի 13-ի ժամը 11.00-ին նշանակված դատական նիստին ներկայանալու անհրաժեշտության մասին, սակայն նա առանց որևէ պատճառաբանության նիստին չի ներկայացել։ Նրան բերման ենթարկելու մասին դատարանի կողմից նույն օրը որոշում է կայացվել` ամբաստանյալի ներկայությունը 2016թ. ապրիլի 25-ի ժամը 11.30-ին նշանակված դատական նիստին ապահովելու համար, որի կատարումը հանձնարարվել է ՀՀ ոստիկանության Երևան քաղաքի վարչության Մալաթիայի և Մաշտոցի բաժիններին։ Նշված որոշման պահանջը կատարել չի հաջողվել, քանի որ ամբաստանյալը բացակայել է հաշվառման և փաստացի բնակության վայրերից։
Քրեական գործի դատական քննության ընթացքում, 2016թ. ապրիլի 25-ի դատական նիստում, տուժող Ս. Մանուկյանը հայտարարել է, որ ամբաստանյալի նկատմամբ բողոք չունի, խնդրում է գործի վարույթը կարճել։
Այդ օրվա դատական նիստն ամբաստանյալի չներկայանալու պատճառով հետաձգվել է և դատարանի կողմից համապատասխան գրություններ են ուղարկվել ՀՀ ոստիկանության Երևան քաղաքի վարչության Մալաթիայի և Մաշտոցի բաժիններին` ամբաստանյալին բերման ենթարկելու և նրա ներկայությունը 2016թ. մայիսի 02-ի դատական նիստին ապահովելու համար։
Նույն օրը դատարան է ստացվել տուժող Ս. Մանուկյանի դիմումը, որով վերջինս հայտնել է, որ իրեն պատճառված վնասն ամբողջությամբ հատուցվել է, ամբաստանյալի նկատմամբ որևէ պահանջ չունի, հաշտվել է նրա հետ, խնդրում է քրեական գործի վարույթը կարճել։
2016թ. մայիսի 02-ի դատական նիստին նույնպես ամբաստանյալը չի ներկայացվել։ Դատարանի այդ օրվա որոշմամբ հայտարարվել է ամբաստանյալ Գագիկ Վլադիմիրի Վարդանյանի հետախուզումը` ամբաստանյալի թաքնվելու պատճառով։ Որոշման կատարումը հանձնարարվել է ՀՀ ոստիկանության Երևան քաղաքի վարչության Կենտրոնական բաժնի պետին։ Դատարանի նույն օրվա մեկ այլ որոշմամբ քրեական գործի վարույթը կասեցվել է մինչև ամբաստանյալին հայտնաբերելը։ Խափանման միջոց չհեռանալու մասին ստորագրությունը թողնվել է անփոփոխ։
2016թ. օգոստոսի 30-ին դատարան է ստացվել ՀՀ ոստիկանության Երևան քաղաքի վարչության Կենտրոնական բաժնի պետի նույն օրվա թիվ 30/14845 գրությունը, որի համաձայն` հետախուզման մեջ գտնվող Գագիկ Վլադիմիրի Վարդանյանը հայտնաբերվել է։ Դատարանի այդ օրվա որոշմամբ քրեական գործի վարույթը վերսկսվել է` դրա կասեցման հիմք ծառայած հանգամանքը վերանալու պատճառով և քրեական գործի դատական քննությունը նշանակվել է 2016թ. սեպտեմբերի 05-ին, ժամը 14։00-ին։
2016թ. սեպտեմբերի 05-ի դատական նիստում ամբաստանյալ Գ. Վարդանյանը հայտարարել է, որ չի առարկում իր նկատմամբ ՀՀ քրեական օրենսգրքի 177-րդ հոդվածի 1-ին մասով հարուցված քրեական հետապնդումը` տուժող Ս. Մանուկյանի հետ հաշտվելու պատճառաբանությամբ դադարեցնելու և քրեական գործի վարույթը կարճելու դեմ։
Մեղադրողը նույնպես հայտարարել է, որ չի առարկում տուժողի հետ հաշտվելու պատճառաբանությամբ Գ. Վարդանյանի նկատմամբ ՀՀ քրեական օրենսգրքի 177-րդ հոդվածի 1-ին մասով հարուցված քրեական հետապնդումը դադարեցնելու և այդ մասով քրեական գործի վարույթը կարճելու դեմ։
Քննելով ամբաստանյալի նկատմամբ քրեական հետապնդումը դադարեցնելու և քրեական գործի վարույթը կարճելու հիմնավորվածության հարցը` դատարանը գտնում է հետևյալը.
ՀՀ քրեական օրենսգրքի 18-րդ հոդվածի համաձայն`
«1. Հանցագործություն է համարվում մեղավորությամբ կատարված՝ հանրության համար վտանգավոր այն արարքը, որը նախատեսված է սույն օրենսգրքով։ (…)»։
Նույն օրենսգրքի 177-րդ հոդվածի 1-ին մասի համաձայն`
«1. Գողությունը` ուրիշի գույքի զգալի չափերով գաղտնիուղղ. հափշտակությունը`
պատժվում է տուգանքով՝ նվազագույն աշխատավարձի հարյուրապատիկից չորսհարյուրապատիկի չափով, կամ կալանքով` մեկից երկու ամիս ժամկետով, կամ ազատազրկմամբ` առավելագույնը երկու տարի ժամկետով։»։
ՀՀ քրեական դատավարության օրենսգրքի 33-րդ հոդվածի համաձայն`
«1. Կատարված հանցագործության ծանրությունից և բնույթից ելնելով` քրեական դատավարությունում հետապնդումն իրականացվում է հանրային և մասնավոր կարգով։
2. Մասնավոր հետապնդման գործեր են համարվում սույն օրենսգրքի 183 հոդվածով նախատեսված հանցագործությունների վերաբերյալ գործերը։ (…)»։
Նույն օրենսգրքի 35-րդ հոդվածի համաձայն`
«1. Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե` (…)
5) սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ. (…)»։
Նույն օրենսգրքի 183-րդ հոդվածի համաձայն`
«1. Հայաստանի Հանրապետության քրեական օրենսգրքի (...) 177-րդ հոդվածի 1-ին մասով, (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի` խորհրդակցական սենյակ հեռանալը։ (…)»։
ՀՀ վճռաբեկ դատարանը Գևորգ Արամի Կլեկչյանի վերաբերյալ ԵԿԴ/0005/11/14 գործով 2014թ. հոկտեմբերի 31-ի որոշմամբ հայտնել է հետևյալ իրավական դիրքորոշումը.
«(…) Վճռաբեկ դատարանն արձանագրում է, որ ՀՀ քրեական դատավարության օրենսգրքի 35-րդ հոդվածի 1-ին մասի 4-րդ կետով նախատեսված նորմը կիրառելի է հետևյալ պայմանների միաժամանակյա առկայության դեպքում՝
ա) վարույթն իրականացնող մարմինը հաստատված է համարել, որ անձը ՀՀ քրեական դատավարության օրենսգրքի 183-րդ հոդվածի 1-ին մասով նախատեսված որևէ արարք է կատարել,
բ) բացակայում է դիմողի (տուժողի) բողոքը,
գ) ենթադրյալ հանցանք կատարած անձը չի առարկում ՀՀ քրեական դատավարության օրենսգրքի 35-րդ հոդվածի 1-ին մասի 4-րդ կետի հիմքով իր նկատմամբ քրեական հետապնդում չհարուցելու կամ հարուցված քրեական հետապնդումը դադարեցնելու դեմ։ (…)»։
Դատարանը գտնում է, որ ամբաստանյալ Գ. Վարդանյանին վերագրվող արարքի կատարումը նրա կողմից` հաստատված է։
Քրեական գործի դատական քննության ժամանակ, մինչև դատավճիռ կայացնելու համար դատարանի կողմից խորհրդակցական սենյակ հեռանալը` տուժող Ս. Մանուկյանը հաշտվել է ամբաստանյալի հետ, հայտարարել է այդ մասին և խնդրել է նրա նկատմամբ քրեական հետապնդումը դադարեցնել, իսկ ամբաստանյալ Գ. Վարդանյանը հայտարարել է, որ դրա դեմ չի առարկում։
Հաշվի առնելով, որ հաստատված է ամբաստանյալին վերագրվող արարքի կատարումը նրա կողմից, տուժողը և ամբաստանյալը հաշտվել են միմյանց հետ, ամբաստանյալը չի առարկել իր նկատմամբ ՀՀ քրեական օրենսգրքի 177-րդ հոդվածի 1-ին մասով հարուցված քրեական հետապնդումը` տուժողի հետ հաշտվելու պատճառաբանությամբ դադարեցնելու դեմ` դատարանը գտնում է, որ քրեական գործի վարույթը ենթակա է կարճման, ամբաստանյալ Գագիկ Վարդանյանի նկատմամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը ենթակա է դադարեցման` ամբաստանյալի հետ տուժողի հաշտվելու պատճառաբանությամբ։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել, գույքի վրա կալանք դնելու մասին որոշում չի կայացվել։
Քննելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 2016թ. մարտի 24-ի որոշմամբ իրեղեն ապացույց ճանաչված և Սաթենիկ Մանուկյանի պատասխանատու պահպանությանը հանձնված, նրան պատկանող դրամանակը, թղթերը և քարտերը պետք է թողնել Սաթենիկ Մանուկյանի տնօրինմանը։
Քննելով խափանման միջոցի հարցը` դատարանը գտնում է, որ ամբաստանյալ Գագիկ Վարդանյանի նկատմամբ ընտրված խափանման միջոց չհեռանալու մասին ստորագրությունը ենթակա է վերացման։
Դատական ծախսերի վերաբերյալ տեղեկություններ դատարանին չեն ներկայացվել։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 35-րդ, 183-րդ և 313-րդ հոդվածներով` դատարանը

Ո Ր Ո Շ Ե Ց

ԵԿԴ/0073/01/16 (13128116) քրեական գործով ըստ մեղադրանքի Գագիկ Վլադիմիրի Վարդանյանի` ՀՀ քրեական օրենսգրքի 177-րդ հոդվածի 1-ին մասով, քրեական գործի վարույթը կարճել և ամբաստանյալ Գագիկ Վլադիմիրի Վարդանյանի նկատմամբ, ՀՀ քրեական օրենսգրքի 177-րդ հոդվածի 1-ին մասով քրեական հետապնդումը դադարեցնել` ամբաստանյալի հետ տուժող Սաթենիկ Մանուկյանի հաշտվելու պատճառաբանությամբ։
Ամբաստանյալ Գագիկ Վլադիմիրի Վարդանյանի նկատմամբ ընտրված խափանման միջոց չհեռանալու մասին ստորագրությունը` վերացնել։
Որոշման օրինական ուժի մեջ մտնելուց հետո, նախաքննության մարմնի 2016թ. մարտի 24-ի որոշմամբ իրեղեն ապացույց ճանաչված և Սաթենիկ Մանուկյանի պատասխանատու պահպանությանը հանձնված, նրան պատկանող դրամանակը, թղթերը և քարտերը թողնել Սաթենիկ Մանուկյանի տնօրինմանը։
Սույն որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։


ԴԱՏԱՎՈՐ` Մ. ՄԱՐՏԻՐՈՍՅԱՆ