ԵԿԴ/0007/01/16

Ո Ր Ո Շ ՈՒ Մ

ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ

ԳՈՐԾԻ ՎԱՐՈՒՅԹԸ ԿԱՐՃԵԼՈՒ ՄԱՍԻՆ


,,25,, մարտի 2016թ. ք. Երևան



Նախագահությամբ դատավոր Մ. Մակյանի

Քարտուղարությամբ` Թ. Խաչատրյանի

Մասնակցությամբ `

Մեղադրող Ս. Անդրեասյանի


Տուժող Հ. Պողոսյանի


ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը` նախագահությամբ դատավոր Մ.Մակյանի, խորհրդակցական սենյակում, քննության առնելով թիվ ԵԿԴ/0007/01/16 քրեական գործի նյութերն ըստ մեղադրանքի`

Սվետլանա Արմիկի Դանիելյանի` ծնված 18.03.1956թ.
Երևան քաղաքում, ազգությամբ հայ, ՀՀ քաղաքացի,
միջնակարգ կրթությամբ, չամուսնացած, չի աշխատում,
նախկինում չդատված, մշտական բնակության վայր չունի,
մեղադրվում է ՀՀ քրեական օրենսգրքի 177-րդ հոդվածի
1-ին մասով,





Պ Ա Ր Զ Ե Ց

Ըստ նախաքննական մարմնի կողմից դատարան ներկայացրած նյութերի`

«Երևան քաղաքի Ծարավ Աղբյուրի փողոցի թիվ 31 տանը հաշվառված, մշտական բնակության վայր չունեցող, սույն գործով մեղադրյալ Սվետլանա Արմիկի Դանիելյանը, չունենալով որևէ աշխատանք և զբաղմունք, վարել է թափառաշրջիկ կյանք և զբաղվել մուրացկանությամբ Երևան քաղաքի տարբեր վարչական շրջաններում։
Մեղադրյալ Ս.Դանիելյանը 2015թ. նոյեմբերի 20-ին գտնվել է Երևան քաղաքի Հանրապետության հրապարակում, որտեղ պատահական անցորդներից գումար և սնունդ է մուրացել։
Նույն օրը, ժամը 13։00-ի սահմաններում մեղադրյալ Ս.Դանիելյանը նկատելով «Մարիոթ Արմենիա» հյուրանոցի մոտակայքում տեղադրված նստարանին նստած Հասմիկ Շաքարի Պողոսյանին, նպատակադրվել է գաղտնի հափշտակել վերջինիս գրպանում եղած գումարները։
Մեղադրյալ Ս.Դանիելյանը հանցավոր մտադրությունն իրականացնելու նպատակով, քայլելով մոտեցել և նստել է Հ.Պողոսյանի մոտ, ապա մոտ երկու րոպե անց, օգտվելով Հ.Պողոսյանի անուշադրությունից, վերջինիս բաճկոնի ձախ գրպանից գաղտնի հափշտակելով դրամապանակը՝ գումարներով՝ Հ.Պողոսյանին պատճառելով զգալի չափի՝ 46.500 ՀՀ դրամի գույաքյին վնաս»։

Փաստի առթիվ ՀՀ քննչական կոմիտեի Երևան քաղաքի քննչական վարչության Կենտրոն և Նորք-Մարաշ վարչական շրջանների քննչական բաժնի կողմից 2015 թվականի դեկտեմբերի 01-ին հարուցվել է քրեական գործ։

15.12.2015թ. որոշում է կայացվել Սվետլանա Արմիկի Դանիելյանին որպես մեղադրյալ ներգրավելու մասին և նրան մեղադրանք է առաջադրվել ՀՀ քրեական օրենսգրքի 177-րդ հոդվածի 1-ին մասով։ Նույն օրը որպես խափանման միջոց ընտրվել է չհեռանալու մասին ստորագրությունը։

Քրեական գործը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարան է ստացվել և մուտքագրվել 19.01.2016թ.-ին, որը 20.01.2016թ.-ին ընդունվել է դատարանի վարույթ։

21.03.2016թ-ին կայացած դատական նիստի ժամանակ, ամբաստանյալի գտնվելու վայրը պարզված չլինելու հիմքով գործի մեղադրական եզրակացությունը հաստատած դատախազ Ս.Անդրեասյանն միջնորդել է ամբաստանյալ Սվետլանա Արմիկի Դանիելյանի նկատմամբ հայտարարել հետախուզում։

21.03.2015թ. Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից կայացվել է որոշում` Սվետլանա Արմիկի Դանիելյանի նկատմամբ հետախուզում հայտարարելու և քրեական գործի վարույթը կասեցնելու մասին։

25.03.2015թ.-ին Սվետլանա Դանիելյանը հայտնաբերվել է և նույն օրը Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից կայացվել է որոշում, համաձայն որի` քրեական գործով վարույթն ըստ մեղադրանքի Սվետլանա Արմիկի Դանիելյանի` ՀՀ քրեական օրենսգրքի 177-րդ հոդվածի 1-ին մասով վերսկսվել է և նրա նկատմամբ հայտարարված հետախուզումը դադարեցվել է։

Գործի դատական քննության նախապատրաստական մասում տուժող Հասմիկ Պողոսյանը դատարանին ներկայացրել է գրավոր դիմում, որով հայտնել է, որ հաշտվում է ամբաստանյալ Սվետլանա Դանիելյանի հետ, որևէ բողոք չունի նրա նկատմամբ և խնդրել է ամբասատանյալի նկատմամբ քրեական հետապնդումը դադարեցնել։

Ամբաստանյալ Սվետլանա Դանիելյանը դատարանում նույնպես հայտարարել է, որ հաշտվել է տուժողի հետ և դեմ չէ, որպեսզի դադարեցվի իր նկատմամբ հարուցված քրեական հետապնդումը։

Գործով մեղադրող Ս.Անդրեասյանը չի առարկել ամբաստանյալի և տուժողի կողմից ներկայացված միջնորդությունների դեմ, հայտարելով, որ գործը մասնավոր մեղադրանքի է և կան օրենքով սահմանված հիմքեր՝ համապատասխան որոշում կայացնելու համար։

Դատարանը, խորհրդակցական սենյակում ուսումնասիրելով քրեական գործի նյութերը և վերլուծելով դատավարության մասնակիցների դիրքորոշումը, հանգում է այն հետևության, որ Սվետլանա Արմիկի Դանիելյանի նկատմամբ ՀՀ քրեական օրենսգրքի 177-րդ հոդվածի 1-ին մասով` տուժող Հասմիկ Պողոսյանի` զգալի չափերի գույքը ենթադրաբար գաղտնի հափշտակելու վերաբերյալ հարուցված քրեական հետապնդումը ենթակա է դադարեցման, իսկ քրեական գործի վարույթը՝ կարճման, հետևյալ պատճառաբանությամբ.

Համաձայն ՀՀ քրեական դատավարության օրենսգրքի 183-րդ հոդվածի 1-ին մասի`

«ՀՀ քրեական օրենսգրքի /…/ 177-րդ հոդվածի 1-ին մասով /.../ նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է միչև դատավճիռ կայացնելու համար դատարանի խորդակցական սենյակ հեռանալը»։

Համաձայն ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետի`

«Քրեական գործ չի կարող հարուցվել և, իսկ հարուցված քրեական գործի վարույթը ենթակա է կարճման, եթե. /.../

« 5. սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ»։

Դատարանում հաստատված համարվեց այն հանգամանքը, որ ամբաստանյալին մեղսագրված է արարք, որը նախատեսված է ՀՀ քրեական օրենսգրքի 177-րդ հոդվածի 1-ին մասով։

Դատարանն արձանագրում է, որ տուժող Հասմիկ Պողոսյանի և ամբաստանյալ Սվետլանա Դանիելյանի կողմից ներկայացված հայտարարություններով և դիրքորոշումներով հիմնավորվեց, որ տուժողը, իր զգալի չափերով գույքը գաղտնի հափշտակելու վերաբերյալ ենթադրաբար կատարված հանցավոր ոտնձգության առումով հաշտվել է ամբաստանյալի հետ, իսկ վերջինս` տուժողի հետ։

Այսպիսով, դատարանը գտնում է, որ առկա են իրավական հիմքեր սույն քրեական գործով ամբաստանյալի նկատմամբ նախաքննական մարմնի կողմից հարուցված ՀՀ քրեական օրենսգրքի 177-րդ հոդվածի 1-ին մասով, տուժող Հասմիկ Պողոսյանի զգալի չափերի գույքը ենթադրաբար գաղտնի հափշտակելու առնչությամբ քրեական հետապնդումը դադարեցնելու և քրեական գործի վարույթը կարճելու համար` դատարանի վերը նշված պատճառաբանությամբ և հիմնավորումներով։

ՀՀ քրեական դատավարության օրենսգրքի 313-րդ հոդվածի 1-ին և 2-րդ մասերի համաձայն`

1. Այն բոլոր հարցերի առթիվ, որոնք լուծվում են դատարանի կողմից դատական քննության ժամանակ, դատարանը որոշումներ է կայացնում։

2. Գործը լրացուցիչ քննության ուղարկելու, կարճելու կամ կասեցնելու, խափանման միջոցը փոխելու կամ վերացնելու, բացարկների, փորձաքննություն նշանակելու մասին որոշումները դատարանը կայացնում է խորհրդակցական սենյակում և դրանք պետք է շարադրված լինեն առանձին փաստաթղթերի ձևով` ստորագրված դատարանի ամբողջ կազմի կողմից։

Նման պայմաններում անդրադառնալով Սվետլանա Արմիկի Դանիելյանի նկատմամբ ընտրված խափանման միջոցի` չհեռանալու մասին ստորագրության հարցին, դատարանը, հանգում է այն հետևության, որ այն պետք է վերացվի։

Ելնելով վերոգրյալից և ղեկավարվելով ՀՀ քրեական դատավարության օրենսգրքի 35-րդ հոդվածի 1-ին մասի 5-րդ կետով, 183-րդ և 313-րդ հոդվածներով, դատարանը


Ո Ր Ո Շ Ե Ց

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննված ԵԿԴ/0007/01/16 քրեական գործով ամբաստանյալ Սվետլանա Արմիկի Դանիելյանի նկատմամբ՝ ՀՀ քրեական օրենսգրքի 177-րդ հոդվածի 1-ին մասով հարուցված քրեական հետապնդումը դադարեցնել և քրեական գործի վարույթը կարճել` տուժող Հասմիկ Պողոսյանի կողմից վերջինիս հետ հաշտվելու հիմքով։

Ամբաստանյալ Սվետլանա Արմիկի Դանիելյանի նկատմամբ ընտրված խափանման միջոցը՝ չհեռանալու մասին ստորագրությունը, վերացնել։

Որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո` մեկամսյա ժամկետում։


Դ Ա Տ Ա Վ Ո Ր Մ. Մ Ա Կ Յ Ա Ն