Գործ
ԵԿԴ/0275/01/15

ՀԱՅԱՍՏԱՆԻ ՀԱՆՐԱՊԵՏՈՒԹՅՈՒՆ

ԵՐԵՎԱՆ ՔԱՂԱՔԻ ԿԵՆՏՐՈՆ ԵՎ ՆՈՐՔ-ՄԱՐԱՇ ՎԱՐՉԱԿԱՆ ՇՐՋԱՆՆԵՐԻ ԸՆԴՀԱՆՈՒՐ ԻՐԱՎԱՍՈՒԹՅԱՆ ԴԱՏԱՐԱՆ

Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

,,06,, ապրիլի 2016թ. ք.Երևան
Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը
/այսուհետև` դատարան/

Նախագահությամբ դատավոր Մ. Մակյանի
Քարտուղարությամբ Թ. Խաչատրյանի
Մասնակցությամբ՝
Մեղադրող Ա.Կոստանդյանի
Հանրային պաշտպաններ Մ. Ալավերդյանի
Ա.Ղազարյանի
Թարգմանիչ Գ.Միսակյանի

դռնբաց դատական նիստերում, Երևան քաղաքում քննեց քրեական գործն ըստ մեղադրանքի`
1.Ալիռեզա Մոսթաֆա Մելլաթի` ծնված` 02.07.1986թ.-ին ԻԻՀ-ում, ազգությամբ պարսիկ, ԻԻՀ քաղաքացի, չամուսնացած, հաշվառված` ԻԻՀ, ք. Թեհրան, Մաջիդիեջոնոբի պողոտա, Մասիլ Բախթար փողոց, 514 տուն հասցեում, մեղադրվում է` երկու դրվագներով` ՀՀ քրեական օրենսգրքի 215-րդ հոդվածի 2-րդ մասով, երկու դրվագներով` ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով` ՀՀ քրեական օրենսգրքի 34-215-րդ հոդվածի 2-րդ մասով, որպես խափանման միջոց է ընտրված կալանավորումը։

2.Մոսթաֆա Մոհամմադռեզա Մելլաթի` ծնված` 22.05.1962թ.-ին ԻԻՀ-ում, ազգությամբ պարսիկ, ԻԻՀ քաղաքացի, ամուսնացած, հաշվառված` ԻԻՀ, ք.Թեհրան, Մաջիդիեջոնոբի պողոտա, Մասիլ Բախթար փողոց, 514 տուն հասցեում, մեղադրվում է` երկու դրվագներով` ՀՀ քրեական օրենսգրքի 215-րդ հոդվածի 2-րդ մասով, երկու դրվագներով` ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով` ՀՀ քրեական օրենսգրքի 34-215-րդ հոդվածի 2-րդ մասով, որպես խափանման միջոց է ընտրված կալանավորումը։


1.Գործի դատավարական նախապատմությունը
Ըստ դատարան ուղարկված քրեական գործի նյութերի և մեղադրական եզրակացության՝
«Գործով կատարված նախաքննությամբ պարզվել է, որ ԻԻՀ քաղաքացիներ Ալիռեզա Մոսթաֆայի Մելլաթը, վերջինիս հայր` Մոսթաֆա Մոհհամադռեզայի Մելլաթը և ընկեր Միլադ Մոհհամադռեզայի Շարիֆին, զբաղվելով թմրամիջոցների ապօրինի շրջանառությամբ, 2015 թվականի սեպտեմբերի 17-ին, Թեհրան-Երևան չվերթով ժամանել են Հայաստան՝ մաքսանենգությամբ` մաքսային հսկողությունից թաքցնելու եղանակով իրենց հետ միասին ՀՀ տեղափոխելով 3014,281 գրամ ընդհանուր չոր քաշով ափիոն տեսակի թմրամիջոց։ Այնուհետև, իրականացնելով հանցավոր մտադրությանը, 2015 թվականի սեպտեմբերի 18-ին, Երևան քաղաքի «Հայփոստ» ՓԲ ընկերության թիվ 2 տեղամասից թիվ ЕЕ000035659 AM և ЕЕ000035588AM փոստային բեռնագրերով փորձել են ոմն Մոջթաբո Սալեհիի անունից նշված թմրամիջոցով երկու ծանրոցներն առաքել Կանադա` առաջինը 13-280 Վեստ Բիվեր Կրիկ, Ռիչմոնդհիլլ, Օնտարիո, Լ4Բ3Զ1, բնակարան 102, Կանադա հասցեով, հեռախոս` 0014165796164, Ֆ.Ֆաթահի անունով, իսկ երկրորդը՝ 95 Փաինս Վիկ ՍԿ Տորոնտո, Օնտարիո, Մ2ՋՅՄ5 Կանադա հասցեով, հեռախոս` 0014165796164, Ի.Ֆաթհի անունով։ Սակայն, նշված ծանրոցների 19.09.2015թ.-ի զննության արդյունքում դրանցում հայտնաբերվել են թվով 4 հատ «FOSTER CLARKS» գրառմամբ մետաղական տարաների մեջ թաքցված թմրամիջոցները և չեն առաքվել հասցեատերերին։ Հանցագործության կատարումից անմիջապես հետո չբացահայտվելով` 2015թ.-ի սեպտեմբերի 19-ին Մ.Շարիֆին, Ալիռեզա և Մոսթաֆա Մելլաթները Երևան-Թեհրան չվերթով վերադարձել են ԻԻՀ։
Այնուհետև, 2015 թվականի հոկտեմբերի 1-ին, Ալիռեզա և Սոսթաֆա Մելլաթները, Երևան չվերթով կրկին ժամանել են Հայաստան և նորից մաքսանենգությամբ՝ մաքսային հսկողությունից թաքցնելու եղանակով, ՀՀ են տեղափոխել 1220,29 գրամ ընդհանուր չոր քաշով ափիոն տեսակի թմրամիջոց։ Ժամանելով Հայաստան, հաջորդը օրը` 2015 թվականի հոկտեմբերի 2-ին, վերջիններս Երևան քաղաքի «Հայփոստ» ՓԲ ընկերության նույն թիվ 2 տեղամասից կրկին անգամ փորձել են թիվ EE000035866AM բեռնագրով թմրամիջոցներով ծանրոց առաքել Ֆրանսիա՝ Փարիզ, Ռոլանդ Գարրոսի փողոց 9500 Վիլիերս Լե Բել հասցեով, Ֆարիբա Ղելիշիի անվամբ, սակայն իրականացված զննման արդյունքում ծանրոցում առկա հատ «NAN» գրառմամբ մետաղական տարաների միջից հայտնաբերվել է ընդհանուր 1220.29 գրամ քաշով ափիոն տեսակի թմրամիջոց»։
Փաստի առթիվ ՀՀ ԿԱ Ազգային անվտանգության ծառայության քննչական վարչության կողմից 2015 թվականի սեպտեմբերի 29-ին հարուցվել է քրեական գործ։
03.10.2015թ.-ին ՀՀ ԿԱ Ազգային անվտանգության ծառայության քննչական վարչության կողմից կայացվել է որոշում` Ալիռեզա Մոսթաֆա Մելլաթին որպես մեղադրյալ ներգրավելու մասին և նրան մեղադրանքներ են առաջադրվել` երկու դրվագներով` ՀՀ քրեական օրենսգրքի 215-րդ հոդվածի 2-րդ մասով, երկու դրվագներով` ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով` ՀՀ քրեական օրենսգրքի 34-215-րդ հոդվածի 2-րդ մասով։

03.10.2015թ.-ին ՀՀ ԿԱ Ազգային անվտանգության ծառայության քննչական վարչության կողմից կայացվել է որոշում` Մոսթաֆա Մոհամմադռեզա Մելլաթին որպես մեղադրյալ ներգրավելու մասին և նրան մեղադրանքներ են առաջադրվել` երկու դրվագներով` ՀՀ քրեական օրենսգրքի 215-րդ հոդվածի 2-րդ մասով, երկու դրվագներով` ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով` ՀՀ քրեական օրենսգրքի 34-215-րդ հոդվածի 2-րդ մասով։

Քրեական գործը ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանի աշխատակազմի գրասենյակ է ստացվել և մուտքագրվել 18.11.2015թ.-ին։

2.Ապացույցների հետազոտում և գնահատում
Ամբաստանյալ Ալիռեզա Մոսթաֆա Մելլաթը, առաջադրված մեղադրանքներում իրեն մեղավոր է ճանաչել մասնակի և դատարանում ցուցմունք է տվել այն մասին, որ 2015թ.-ի սեպտեմբերի 18-ին հոր` Մոսթաֆա Մոհամմադռեզա Մելլաթի, հետ միասին երեք օրով ժամանել են Հայաստանի Հանրապետություն` զբոսաշրջության և թանկարժեք քարերի գործունեությամբ զբաղվելու նպատակով։
Օդանավակայանում իր ծանոթից` Միլադից, վերցրել է «NAN» գրառմամբ տարաներ` վերջինիս խնդրանքով Ֆրանսիայի Հանրապետություն ուղարկելու նպատակով։ Մասնավորապես, Միլադն ասել է, որ այն մանկական սնունդ է, որը պետք է ուղարկի նրա ընկերոջ որդու համար։ «Հայփոստ» ՓԲ ընկերությունում ծանրոց ուղարկելու ժամանակ, երբ լրացնելիս է եղել համապատասխան փաստաթղթերը, ոստիկանության աշխատակիցների կողմից ենթարկվել է բերման։
Ամբաստանյալը հավաստիացրել է, որ նախապես չի իմացել, որ Միլադի կողմից տրված տարան պարունակում է թմրամիջոց։
Միաժամանակ պնդել է, որ հայրը որևէ առնչություն չի ունեցել կատարված դեպքի հետ և տվյալ օրն ընդամենը ուղեկցել է իրեն «Հայփոստ» ՓԲԸ։ Ինչ վերաբերում է «NAN» գրառմամբ տարաներն իր բջջային հեռախոսով նկարահանելուն, հայտնել է, որ դրանք լուսանկարահանել է Միլադը, սակայն չգիտի, թե ինչ նպատակով։ Բացի այդ, իր հեռախոսից ուղարկված հաղորդագրությունը` ամփիոն տեսակի թմրամիջոցի վերաբերյալ, նույնպես ուղարկել է Միլադը, որի մասին ինքը տեղեկացված չի եղել։
Եղել է դեպք, երբ Միլադի հետ մեկ անգամ այցելել են «Հայփոստ» ՓԲ ընկերության 2-րդ տեղամաս, ինքը և հայրը սպասել են դրսում, սակայն չգիտի, թե նա ում է ծանրոց ուղարկել։ Մինչ «Հայփոստ» ՓԲԸ գնալը, Միլադի հետ գնացել են խանութ` տիկնիկներ և գրքույկներ գնելու նպատակով։
Միլադին ճանաչում է շուրջ 5-6 տարի։ Վերջինս ԻԻՀ-ում աշխատել է նախ որպես վարորդ, իսկ հետագայում զբաղվել է շինարարական քարերի՝ մարմարի և այլն, գործով։ ՀՀ-ում գտնվելու ընթացքում իրենց ծախսերի մի մասը հոգացել է Միլադը, այդ թվում նաև` հյուրանոցայինը։ Չգիտի, արդյոք վերջինս թմրամիջոց օգտագործում է, թե ոչ։ Քանի որ հայրը ունի առողջկան խնդիրներ, օգտագործում է տրամադոլ տեսակի դեղահաբ, որը նրան ցուցված է բյշկի կողմից։ Բացի այդ, վերջինիս ցավազրկելու համար ԻԻՀ-ում բժշկական տեղեկանքի հիման վրա թույլ են տվել օգտագործել դեղահաբ, որն իր մեջ պարունում է «մորֆին»։ Սրտի հանգստացման համար օգտագործել է բենզոդիազեպամ, որը ևս ԻԻՀ-ում տրամադրում են բժշկական տեղեկանքի հիման վրա։
Անբաստանյալը պնդել է, որ իրեն մեղավոր է ճանաչում այն մասով, որ Միլադից վերցրել է տարաները` առանց իմանալու, թե դրանք ինչ են պարունակում։
Դատարանից խնդրել է իր նկատմամբ վերաբերել մեղմ` հաշվի առնելով իր երիտասարդ տարիքը։

/տես՝ դատական նիստի արձանագրությունը/
Դատարանում, ամբաստանյալ Մոսթաֆա Մոհամմադռեզա Մելլաթն իրեն առաջադրված մեղադրանքներում մեղավոր չի ճանաչել և ցուցմունք է տվել այն մասին, որ ԻԻՀ-ում աշխատել է որպես վարորդ։
Առաջին անգամ Հայաստանի Հանրապետություն է ժամանել 2015թ.-ի սեպտեմբեր ամսին զբոսաշրջության նպատակով, բացի այդ, որդին երիտասարդ է և ՀՀ-ում ցանկացել է զբաղվել թանկարժեք քարերի առքուվաճառքի գործունեությամբ։ Այդ ժամանակ իրենց ծանոթ Միլադի խնդրանքով նրա հետ գնացել է «Հայփոստ» ՓԲ ընկերություն, որտեղից վերջինս ինչ-որ ծանրոց պետք է ուղարկեր արտասահման։ Մասնավորապես, պետք է ուղարկեր տիկնիկներ և գրքույկներ, իսկ «FOSTER CLARKS» գրառմամբ որևէ տարա այդ ծանրոցում չի տեսել։
Երկրորդ անգամ ՀՀ է ժամանել նույն թվականի հոկտեմբեր ամսին` որդու աշխատանքներին հետևելու և նրան հսկելու նպատակով։ Այդ ժամանակ որդու հետ միասին Միլադի խնդրանով գնացել են «Հայփոստ» ՓԲ ընկերություն` վերջինիս կողմից տրամադրված «NAN» գրառմամբ տարաները Ֆրանսիայի Հանրապետություն ուղարկելու համար։ Միլադը պատճառաբանել է, որ ՀՀ-ից արտերկիր ծանրոց ուղարկելը շատ ավելի մատչելի է, քան ԻԻՀ-ից։ Տեղյակ չի եղել, թե Միլադի տրամադրած ծանրոցը ինչ է պարունակել։ ՀՀ-ում գտնվելու ընթացքում Միլադը հիմնականում օգտագործել է իր կամ որդու հեռախոսը։ Նույնիսկ կարծում է, որ որդու հեռախոսահամարից ուղարկված հաղորդագրությունը` «հենց այն տիկնիկների նման» բովանդակությամբ, ուղարկել է Միլադը։
Ամբաստանյալը հայտնել է, որ ճանաչում է Ալիքար անունով անձնավորությանը, ով նույնպես զբաղվել է քարերի գործունեությամբ։ Ինչ վերաբերում է որդու՝ Ալիքարի հետ շփվելուն, ապա վերջինիս նրա հետ շփվել է միայն հեռախոսազանգերի միջոցով։
Ամբաստանյալը հայտնել է նաև, որ առողջական խնդիրների պատճառով ԻԻՀ-ում բժշկի թույլտվությամբ օգտագործում է դեղահամբեր, որոնք պարունակում են տրամադոլ տեսակի թմրանյութ։

/տես՝ դատական նիստի արձանագրությունը/

Վկա Մարինե Գալստյանը դատարանում ցուցմունք է տվել այն մասին, որ աշխատում է «Հայփոստ» ՓԲ ընկերությունում։
2015թ.-ի հոկտեմբեր ամսին /օրը կոնկրետ չի հիշում/ «Հայփոստ» ՓԲ ընկերություն են այցելել երկու ԻԻՀ քաղաքացիներ, որոնցից մեկը եղել է երիտասարդ, մյուսը` տարեց` սպիտակ մազերով և պոչիկով։ Վերջիններս հայտնել են, որ ցանկանում են Ֆրանսիայի Հանրապետություն ծանրոց առաքել։ Իրեն են տվել պոլիէթիլենային տոպրակ, որում առկա են եղել գործարանային փաթեթավորմամբ «NAN» գրառմամբ տարաներ և համեմունքներ։ Քանի որ համեմունքները չեն եղել գործարանային փաթեթավորմամբ և դրանց՝ այդ տեսքով առաքումն արգելված է, հանել է դրանք, իսկ ԻԻՀ քաղաքացիները չեն առարկել` դրանք հանելու և չուղարկելու դեմ։
Հայտնել է, որ «Հայփոստ» ՓԲ ընկերություն ժամանած ԻԻՀ քաղաքացիները չեն տիրապետել անգլերենին, ուստի օգնել է տարիքով երիտասարդին` լրացնելու համապատասխան տվյալները, որը նա նայել և արտագրել է բջջային հեռախոսից։ Փաստաթղթերը լրացնելու ժամանակ ընկերություն են եկել ոստիկանության աշխատակիցները և իր հետ միասին բերման ենթարկել վերջիններիս։ Հետագայում, ազգային անվտանգության ծառայությունում տեղեկացել է, որ իրականում տոպրակի մեջ եղել է թմրանյութ։
Դատարանում մատնացույց անելով ամբաստանյալներին, վկան նշել է, որ նրանք հանդիսանում են այն նույն ԻԻՀ քաղաքացիները, ովքեր այդ օրը փորձել են թմրանյութ առաքել արտերկիր։
Բացի այդ, հայտնել է, որ նախքան այդ դեպքը, մեկ անգամ էլ տեսել է ամբաստանյալ Մոհամմադռեզա Մելլաթին։ Մասնավորապես, նա «Հայփոստ» ՓԲ ընկերություն է եկել մեկ այլ երիտասարդ անձի հետ, երբ այդ անձը ցանկացել է փաթեթ ուղարկել Կանադա։ Ամբաստանյալի արտաքին տեսքը տպավորվել է վերջինիս` ալեհեր մազերի և պոչիկի պատճառով։ Տվյալ երիտասարդն ուղարկել է գործարանային փաթեթավորմամբ փափուկ խաղալիքներ և հյութի փոշի։ Վերջինիս անունը չի մտաբերում, սակայն կարող է ասել, որ ընկերություն է եկել միայն տվյալ օրը։

/տես՝ դատական նիստի արձանագրությունը/

Վկա Ֆարզին Ասեֆզադեհին դատարանում ցուցմունք է տվել այն մասին, որ ամբաստանյալներ Ալիռեզա Մոսթաֆա Մելլաթի և Մոսթաֆա Մոհամմադռեզա Մելլաթի հետ ծանոթացել է Երևան քաղաքում, մասնավորապես` Ամիրյան փողոցում։ Հանդիպումը եղել է պատահական, երբ վերջիններս մոտեցել են իրեն և հարցրել, թե որտեղից կարող են գնել գրենական պիտույքներ, ինքը խորհուրդ է տվել գնալ «Երևան Սիթի» առևտրի կենտրոն։ Հաջորդ օրը Երևան քաղաքի Մաշտոցի պողոտայում կրկին հանդիպել է վերջիններիս, այս անգամ հարցրել են, թե որտեղից կարող են գնել հուշանվերներ։ Օգնել է կատարել գնումներ, որից հետո պայմանավորվել են երեկոյան հանդիպել` իրանական երաժշտություն լսելու։ Հանդիպումից հետո Մելլաթները մեկնել են Իրանի Իսլամական Հանրապետություն, սակայն որոշակի ժամանակ անց` կրկին վերադարձել են ՀՀ։
ՀՀ վերադառնալուց հետո զանգահարել են իրեն, ասել, որ ցանկանում են կարճ ժամանակով` 2-3 օրով, վարձակալել բնակարան, որից հետո պետք է վերադառնան ԻԻՀ։ Այդ նպատակով զանգահարել է իր ծանոթին` Սոհեյիլին, ով վարձակալած բնակարաններ է տրամադրել Երևան քաղաքում և ասել, որ իրենց վարձակալությամբ բնակարան է անհարժեշտ։ Վերջինս հետ հանդիպել են Երևան քաղաքի Զաքիյան փողոցում։ Հանդիպման ժամանակ ներկա են գտնվել նաև Մելաթները և բնակարանի տերը։ Այնուհետև, այդ հանդիպումից որոշ ժամանակ անց Մելլաթների հետ ընթրել է վարձակալած բնակարանում, որի ժամանակ նրանք իրեն ասել են, որ զբաղվում են թանկարժեք քարերի տեղադրման աշխատանքներով։ Տեղեկացել է նաև, որ հանդիսանում են հայր և որդի։ Այդ օրը նրանց ճամպրուկները եղել են նրանց մոտ։ Այդ օրվանից հետո այլևս նրանց չի տեսել։
Նշել է, որ առաջին անգամ, երբ Ամիրյան փողոցում հանդիպել է նրանց, վերջիններիս հետ է գտնվել է նաև մեկ այլ` 27-30 տարեկան երիտասարդ, ում անունը ներկա պահին չի մտաբերում։

/տես՝ դատական նիստի արձանագրությունը/

Վկա Սոհեյիլ Քերմանին դատարանում ցուցմունք է տվել այն մասին, որ հանդիսանում է անշարժ գույքի գործակալ` բրոքեր։
2015 թվականի հոկտեմբերի 1-ին կամ 2-ին Ֆարզին Ասեֆզադեհին զանգահարել է իրեն և հետաքրքրվել, կարող է արդյոք օգնել նրան` Երևան քաղաքում բնակարան վարձակալելու հարցում։ Հայտնել է, որ Արման անունով անձը վարձակալության է հանձնում իր` Զաքիյան փողոցի վրա գտնվող բմակարանը։ Այնուհետև, պայմանավորվածության համաձայն, ժամը 20։00-ի սահմաններում հանդիպել են տվյալ բնակարանում, որտեղ գտնվել են բնակարանատերը, Ասեֆզադեհին և ամբաստանյալներ Ալիռեզա Մոսթաֆա Մելլաթն ու Մոսթաֆա Մոհամմադռեզա Մելլաթը։ Հանդիպման ժամանակ տեղեկացել է, որ բնակարանը վարձակալելու են Մելլաթները` 2-3 օր ժամկետով։
Իր մտաբերմամբ` ամբաստանյալները հանդիպման ժամանակ ունեցել են պայուսակ։

/տես՝ դատական նիստի արձանագրությունը/


Վկա Արման Սեկոյանի նախաքննական ցուցմունքն այն մասին, որ՝

«Հիմնական աշխատանք չունի, որի պատճառով իրեն պատկանող՝ Երևան քաղաքի Զաքիան փողոցի 4-րդ շենքի առաջին հարկի բնակարանը տալիս է վարձով։ Որոշ կայքերում տեղադրված են իր բնակարանի վարձակալության մասին հայտարարությունները, բացի այդ, կան անշարժ գույքի գործակալներ, ովքեր ունեն իր հեռախոսահամարը և անհրաժեշտության դեպքում զանգահարում են իրեն։ Ավելին, եղել են դեպքեր, երբ մի քանի անգամ վարձակալելուց հետո իր տվյալները մնացել են վարձակալների մոտ և երբեմն հենց նրանց անուններից զանգահարում են անծանոթ անձինք և վարձակալում բնակարանը։ Մի քանի անգամ բնակարանը վարձով տվել է ԻԻՀ քաղացիներին և ներկայումս երբեմն զանահարում են նաև ԻԻՀ քաղաքացիներ և ցանկություն հայտնում վարձակալել բնակարանը։
2015թ.-ի հոկտմեբերի 1-ին /որքանով որ հիշում է/ իրեն զանգահարել է Սոհեյիլ անունով ԻԻՀ քաղաքացի, ում ճանաչում է որպես պարսիկ բրոքեր` անշարժ գույքի գործակալ /նա մի քանի անգամ տարբեր անձանց համար վարձակալել է իր բնակարանը/ և հարցրել, թե ազատ է արդյոք իր բնակարանը։ Տվել է դրական պատասխան։ Սոհեյիլը հայտնել է, որ երկու ԻԻՀ քաղաքացիներ` հայր ու որդի, ժամանել են Երևան, և ցանկանում են երկու օրով բնակարան վարձակալել։ Պայմանավորվել են գումարի չափի վերաբերյալ, ինչից հետո նրանց հետ եկել է բնակարան։ Սոհեյիլը եկել էր վերոնշյալ հայր և որդի պարսիկների հետ, ինչպես նաև նրանց հետ է եղել ևս մեկ ազգությամբ պարսիկ տղամարդ, որին տվյալ օրը տեսնում էր առաջին անգամ։ Որպես հայր ներկայացած պարսիկներից մեկն ունցել է երկար սպիտակ մազեր և կապած պոչիկ, ինչը գրավել է իր ուշադրությունը։ Այդ հանդիպման ժամանակ նրանց տվել է տան երկու բանալիները, ասել բնակարանի ինտերնետի կոդը և հեռացել։ Այնուհետև, հաջորդ օրը, ցանգահարել են ՀՀ ԱԱԾ աշխատակիցները և խնդրել մոտենալ իր բնակարանին։ Երբ մոտեցել և հանդիպել է նրանց, իրեն ասել են, որ նշված հայր և որդի պարսիկները ձերբակալվել են և ներկայացնելով դատարանի որոշումը՝ խուզարկել են բնակարանը։ Դրանից հետո ոչ այդ պարսիկների, ոչ էլ անշարժ գույքի գործակալի հետ չի խոսել։
Որքանով որ հասկացել է, հայր ու որդի պարսիկները ճանաչել են այն մյուս պարսիկին, ով նրանց հետ եկել էր այդ օրը` բնակարանը նայելու։ Այդ պարսիկներից ճանաչել է միայն Սոհեյիլին, մյուսներին տեսնում էր այդ օրն առաջին անգամ։ Չգիտի, թե Սոհեյիլը որտեղ է բնակվում, իր մոտ առկա է միայն նրա հեռախոսահամարը»։

/տես՝ դատական նիստի արձանագրությունը/

Դատարանը գտնում է, որ ամբաստանյալներ Ալիռեզա Մոսթաֆա Մելլաթի և Մոսթաֆա Մոհամմադռեզա Մելլաթի կողմից տրված դատաքննական ցուցմունքներն ան-արժանահավատ են և մտացածին, դրանցով նրանք հետապնդում քրեական պատասխանատվությունից և ակնկալվող խիստ պատիժներից խուսափելու նպատակ և արձանագրում, որ ի թիվս գործով վկա Մարինե Գալստյանի դատաքննական ցուցմունքի նրանց մեղսագրված հարնորեն վտանգավոր արարքների կատարումը հիմնավորվեցին իրավական պատշաճ ընթացակարգի պահպանմամբ դատարանում հետազոտված ներքոհիշյալ ապացույցների բավարար ամբողջությամբ։

19.09.2015 թվականին թիվ EE000035588AM և EE0000356659AM փոստային բեռնագրերով արտահանվող ծանրոցների զննման արձանագրությամբ, համաձայն որի հայտնաբերվել է 3014,281 գրամ ափիոն տեսակի թմրամիջոց։

2015 թվականի հոկտեմրերի 2-ին Ալիռեզա Մելլաթի ձեռքում գտնվող ծանրոցի զննության մասին արձանագրությամբ, համաձայն որի՝ դրանում հայտնաբերվել է 1220,29 գրամ ափիոն տեսակի թմրամիջոց։

2015 թվականի սեպտեմբերի 19-ին թիվ EE000035588AM և ЕЕ000035659АМ փոստային բեռնագրերով արտահանվող ծանրոցներից հայտնաբերված «FOSTER CLARKS» գրառմամբ թվով 4 հատ մետաղական տարաներով, որոնցից հայտնարերվել են 3014,281 գրամ ափիոն տեսակի թմրամիջոցներ։

2015 թվականի հոկտեմբերի 2-ին Ալիռեզա Մելլաթի ձեռքում գտնվող ծանրոցից հայտնաբերված «NAN» գրառմամբ թվով 3 հատ մետաղական տարաներով, որոնցից հայտնաբերվել են 1220,29 գրամ ափիոն տեսակի թմրամիջոցներ։

Ալիռեզա Մելլաթի ձերբակալման ժամանակ վերջինիս կողմից ներկայացված «iPhone 5s» տեսակի 013846000934688 գործարանային համարով բջջային հեռախոսով, որի զննությամբ հիմնավորվել է Ա.Մելլաթի առնչությունը թմրամիջոցների ապօրինի շրջանառության հետ, ինչպես նաև թմրամիջոցներ մաքսանենգ եղանակով ՀՀ տեղափոխելու և արտահանելու փորձ կատարելու հանգամաքները։

Մոսթաֆա Մելլաթի ձերբակալման ժամանակ վերջինիս կողմից ներկայացված «Samsung» տեսակի 354202/07/268922/1 և 354202/07/268922/9 գործարանային համարով բջջային հեռախոսով և դրանում տեղադրված 16 գիգաբայտ հիշողության ծավալով կրիչով, որի զննությամբ հիմնավորվել է Մելլաթի առնչությունը թմրամիջոցների ապօրինի շրջանառության հետ կապը թմրամիջոցը ստացող անձանց հետ, ինչպես նաև` թմրամիջոցներ մաքսանենգ երանակով ՀՀ տեղափոխելու և արտահանելու փորձ կատարելու հանգամանքները։

«Հայփոստ» ՓԲԸ թիվ ЕЕ ООО 035 588 AM, ЕЕ ООО 035 659 AM և ЕЕ ООО 035 866 AM ձև CN23 փոստային առաքանու բեռնագրերով, որոնցով փորձել են առաքվել թմրամիջոցներով ծանրոցները։

Ալիռեզա Մելլաթի ձերբակալման ժամանակ վերջինիս կողմից ներկայացված «France paris; 18 rue roland garros 9500 viliers le bel» գրառմամբ սպիտակ գույնի թղթով, որի վրա գրված է եղել 02.10.2015թ.-ին Ալիռեզա և Մոսթաֆա Մելլաթների կողմից առաքել փորձած ծանրոցի հասցեն, որով փորձ է կատարվել 2015 թվականի հոկտեմբերի 2-ի ծանրոցը։
/տես՝ հատոր` 2, գ.թ. 114,
դատական նիստի արձանագրությունը/

Այլ փաստաթղթի կարգով որպես այլ ապացույց ճանաչված` ՀՀ ԱԱԾ ՀՀԳՎ-ից ստացված թիվ 2/8-9117 առ 05.10.2015թ.-ի գրություններով այն մասին, որ 2015 թվականի սեպտեմբերի 18-ին «Հայփոստ» ՓԲԸ-ից Կանադա հասցեագրված ծանրոցի ուղարկողներն են հանդիսացել ԻԻՀ քաղաքացիներ Միլադ Շարիֆին, Ալիռեզա և Մոսթաֆա Մելլաթները։

/տես՝ հատոր` 1, գ.թ. 129, հատոր` 2, գ.թ. 115
դատական նիստի արձանագրությունը/

Որպես ապացույց ճանաչված` ՀՀ ԱԱԾ ՀՀԳՎ-ից ստացված թիվ 2/8-9674 առ 20.10.2015թ. ի գրություներով և դրան կից լուսանկարներով այն մասին, որտեղ երևում է 18.09.2015 թվականին Միլադ Շարիֆի, Ալիռեզա և Մոսթաֆա Մելլաթների մուտք գործելը «Հայփոստ» ընկերության թիվ 2 տեղամաս։

/տես՝ հատոր` 2, գ.թ. 1-2, 145,
դատական նիստի արձանագրությունը/

Զննում կատարելու վերաբերյալ 19.09.2015 թվականի արձանագրությամբ, համաձայն որի՝ 2015 թվականի սեպտեմբերի 19-ին ժ.16.30-ին Փոստի փոխանակման կենտրոնում զննման ենթարկված թիվ EE000035588AM և ЕЕ000035659AМ փոստային բեռնագրերով ծանրոցներում տեղադրված «FOSTER CEARKS» գրառմամբ թվով 4 հատ մետաղական տարաներից հայտնաբերվել է ընդհանուր 3014,281 գրամ քաշով ափիոն տեսակի թմրամիջոց։

/տես՝ հատոր` 1, գ.թ. 5-6
դատական նիստի արձանագրությունը/

Ալիռեզա Մելլաթի ծանրոցի զննման մասին 02.10.2015 թվականին կազմված արձանագրությաբ, համաձայն որի` 2015 թվականի հոկտեմբերի 2-ին, «Հայփոստ» ընկերությունից Ալիռեզա Մելլաթի կողմից առաքվող ծանրոցից հայտնաբերվել է թվով 3 հատ «NAN» գրառմամբ մետաղական տարաներ, որոնցից հայտնաբերվել է ընդհանուր 1220,29 գրամ քաշով ափիոն տեսակի թմրամիջոց։
/տես՝ հատոր` 1, գ.թ. 40-41
դատական նիստի արձանագրությունը/

ՍԷԿՏ համակարգով Ա.Մելլաթի, Մ.Մելլաթի և Մ.Շարիֆիի սահմանահատումների ստուգմամբ ստացված տվյալներով այն մասին, որ Ա.Մելլաթը, Մ.Մելլաթը և Մ.Շարիֆին 2015 թվականի սեպտեմբերի 17-ին մուտք են գործել «Զվարթնոց» ՀԱԿ-ով Հայաստան, իսկ 2015 թվականի սեպտեմբերի 19-ին՝ նույն ՀԱԿ-ով ելք են կատարել ՀՀ-ից, ինչպես նաև Ալիռեզա և Մոսթաֆա Մելլաթների կողմից 2015 թվայանի հոկտեմբերի 1-ին «Զվարթնոց» ՀԱԿ-ով ՀՀ մուտք կատարելու վերաբերյալ։

/տես՝ հատոր` 1, գ.թ. 58-63,
դատական նիստի արձանագրությունը/

Փորձագետի թիվ 15-2571 առ 25.09.2015 թվականի եզրակացությամբ, համաձայն որի` փորձաքննությանը ներկայացված գանգվածը հանդիսանում է ափիոն տեսակի թմրամիջոց և կշռում է ընդհանուր 3014,281 գրամ։

/տես՝ հատոր` 1, գ.թ. 12-18,
դատական նիստի արձանագրությունը/

Փորձագետի թիվ 15-2694 առ 05.10.2015 թվականի եզրակացությամբ, համաձայն որի` փորձաքննությանը ներկայացված զանզվածը հանդիսանում է ափիոն տեսակի թմրամիջոց և կշռում է ընդհանուր 1220,29 գրամ։

/տես՝ հատոր` 1, գ.թ. 56-57, 146-151,
դատական նիստի արձանագրությունը/

Փորձագետի թիվ 15-2716 առ 07.10.2015 թվականի եզրակացությամբ, համաձայն որի` Մոսթաֆա Մելլաթից վերցված մազի և մեզի փորձանմուշներում հայտնաբերվել են ափիոնի շարքի թմրամիջոցի թմրալկալոիդներ և տրամադոլ տեսակի դեղամիջոցի հետքեր։ Մազի փորձանմուշի մեջ հայտնաբերվել է նաև բենզոդիազեպանների շարքի հոգեմետ դեղամիջոցներ։

/տես՝ հատոր` 1, գ.թ. 158-161,
դատական նիստի արձանագրությունը/

28.10.2015թ. ի Ալիռեզա Մելլաթի «Iphone 5s» տեսակի և Մոսթաֆա Մելլաթի «Samsung» տեսակի բջջային հեռախոսների և դրանց հիշողության կրիչի զննության արձանագրությամբ, որի համաձայն՝ նշված հեռախոսներում առկա տեղեկությունները և նամակագրությունները հաստատում են Ալիռեզա և Մոսթաֆա Մելլաթների կորմից թմրամիջոցների ապօրինի շրջանառությամբ զբաղվելու հանգամանքը, նրանց կապերը թմրամիջոցները ստանալ ցանկացող անձանց հետ, ինչպես նաև նրանց կողմից թմրամիջոցները մաքսանենգ եղանակով ՀՀ տեղափոխելու և արտահանելու փորձ կատարելու հանգամանքները։

/տես՝ հատոր` 2, գ.թ. 29-91,
դատական նիստի արձանագրությունը/

Բացի վերոգրյալ ապացույցներից դատարանում հրապարակվել ու հետազոտվել են նաև`

06.10.2015թ.-ին ՀՀ ԱԱԾ քննչական վարչության կողմից կազմված` զննության արձանագրությունը, Մոսթաֆա Մոհամմադռեզա Մելլաթի և Ալիռեզա Մոսթաֆա Մելլաթի վերաբերյալ ՀՀ ոստիկանության ինֆորմացիոն կենտրոնի կողմից տրված պահանջագրերը, Իրանի Իսլամական Հանրապետության կողմից ՀՀ արտաքին գործերի նախարարությանն ուղղված գրությունը և այլ փաստաթղթեր։

/տես` հատոր 1, գ.թ. 135, 1, գ.թ. 163/1, գ.թ. 46-47, դատական նիստի արձանագրությունը/

Այսպիսով, քրեական գործի դատական քննությամբ ձեռք բերված և ուսումնասիրված, սույն դատավճռի նկարագրական մասում բերված ապացույցների ընդհանուր զանգվածում ամբաստանյալների մեղքը հիմնավորող, վերը շարադրված ապացույցներն դատարանին բերում են այնպիսի հիմնավոր եզրահանգման, որ ամբաստանյալները կատարել են իրենց մեղսագրված հանցանքները։ Դատարանն անարժանահավատ ու մտացածին է համարում ամբաստանյալների այն ցուցմունքները, թե իբր տեղյակ չեն իրենց իսկ հեռախոսներում առկա, թմրամիջոցների ապօրինի շրջանառությանը վերաբերվող նամակագրություններից և դրանք իրականացրել է Միլադ Շարիֆը։
Դատարանն արձանագրում է, որ ամբաստանյալների կողմից իրականացված գործողությունների հաջորդականությունը և դրանց ընթացքի զարգացումը համադրելով վերջիններիս մոտից հայտնաբերված՝ վերը նշված իրեղեն և գործով ձեռք բերված մյուս ապացույցների հետ, ավելի քան հաստատավում են նրանց՝ մաքսանենգ ճանապարհով թմրամիջոցներ ՀՀ փոխադրելու, իրացման նպատակով դրանք ձեռք բերելու, փոխադրելու, ինչպես նաև նույն՝ մաքսանենգ ճանապարհով դրանք արտասահմանյան երկրներ առաքելու փորձ կատարելու հանգամանքները։
3.Դատարանի իրավական վերլուծությունները
Այսպիսով, քրեական գործի դատական քննությամբ ձեռք բերված և ուսումնասիրված, սույն դատավճռի նկարագրական-պատճառաբանական մասում բերված ապացույցների ընդհանուր զանգվածում ամբաստանյալների մեղքը հիմնավորող, վերը շարադրված ապացույցներն դատարանին բերում են այնպիսի հիմնավոր եզրահանգման, որ ամբաստանյալները կատարել են իրենց մեղսագրված հանցանքները։
Հետևաբար, քննվող քրեական գործով դատարանը, ՀՀ քրեական դատավարության օրենսգքրի 127-րդ հոդվածի դրույթներին համապատասխան, հետազոտելով և գնահատելով գործով ձեռք բերված ապացույցներն իրենց համակցությամբ` դրանց բազմակողմանի, լրիվ և օբյեկտիվ քննության վրա հիմնված ներքին համոզմամբ, ապացուցված է համարում այն, որ «Գործով կատարված նախաքննությամբ պարզվել է, որ ԻԻՀ քաղաքացիներ Ալիռեզա Մոսթաֆայի Մելլաթը, վերջինիս հայր` Մոսթաֆա Մոհհամադռեզայի Մելլաթը մեկ այլ անձի հետ, զբաղվելով թմրամիջոցների ապօրինի շրջանառությամբ, 2015 թվականի սեպտեմբերի 17-ին, Թեհրան-Երևան չվերթով ժամանել են Հայաստան՝ մաքսանենգությամբ` մաքսային հսկողությունից թաքցնելու եղանակով իրենց հետ միասին ՀՀ տեղափոխելով 3014,281 գրամ ընդհանուր չոր քաշով ափիոն տեսակի թմրամիջոց։ Այնուհետև, իրականացնելով հանցավոր մտադրությանը, 2015 թվականի սեպտեմբերի 18-ին, Երևան քաղաքի «Հայփոստ» ՓԲ ընկերության թիվ 2 տեղամասից թիվ ЕЕ000035659 AM և ЕЕ000035588AM փոստային բեռնագրերով փորձել են ոմն Մոջթաբո Սալեհիի անունից նշված թմրամիջոցով երկու ծանրոցներն առաքել Կանադա` առաջինը 13-280 Վեստ Բիվեր Կրիկ, Ռիչմոնդհիլլ, Օնտարիո, Լ4Բ3Զ1, բնակարան 102, Կանադա հասցեով, հեռախոս` 0014165796164, Ֆ.Ֆաթահի անունով, իսկ երկրորդը՝ 95 Փաինս Վիկ ՍԿ Տորոնտո, Օնտարիո, Մ2ՋՅՄ5 Կանադա հասցեով, հեռախոս` 0014165796164, Ի.Ֆաթհի անունով։ Սակայն, նշված ծանրոցների 19.09.2015թ.-ի զննության արդյունքում դրանցում հայտնաբերվել են թվով 4 հատ «FOSTER CLARKS» գրառմամբ մետաղական տարաների մեջ թաքցված թմրամիջոցները և չեն առաքվել հասցեատերերին։ Հանցագործության կատարումից անմիջապես հետո չբացահայտվելով` 2015թ.-ի սեպտեմբերի 19-ին Ալիռեզա և Մոսթաֆա Մելլաթները և հիշյալ այլ անձը Երևան-Թեհրան չվերթով վերադարձել են ԻԻՀ։
Այնուհետև, 2015 թվականի հոկտեմբերի 1-ին, Ալիռեզա և Սոսթաֆա Մելլաթները, Երևան չվերթով կրկին ժամանել են Հայաստան և նորից մաքսանենգությամբ՝ մաքսային հսկողությունից թաքցնելու եղանակով, ՀՀ են տեղափոխել 1220,29 գրամ ընդհանուր չոր քաշով ափիոն տեսակի թմրամիջոց։ Ժամանելով Հայաստան, հաջորդը օրը` 2015 թվականի հոկտեմբերի 2-ին, վերջիններս Երևան քաղաքի «Հայփոստ» ՓԲ ընկերության նույն թիվ 2 տեղամասից կրկին անգամ փորձել են թիվ EE000035866AM բեռնագրով թմրամիջոցներով ծանրոց առաքել Ֆրանսիա՝ Փարիզ, Ռոլանդ Գարրոսի փողոց 9500 Վիլիերս Լե Բել հասցեով, Ֆարիբա Ղելիշիի անվամբ, սակայն իրականացված զննման արդյունքում ծանրոցում առկա հատ «NAN» գրառմամբ մետաղական տարաների միջից հայտնաբերվել է ընդհանուր 1220.29 գրամ քաշով ափիոն տեսակի թմրամիջոց։
Այլ խոսքով, դատարանը գտնում է, որ Մոսթաֆա Մոհամմադռեզա Մելլաթը և Ալիռեզա Մոսթաֆա Մելլաթը կատարել են հանրորեն վտանգավոր արարքներ, որոնք նախատեսված են` համապատասխանաբար` Ալիռեզա Մոսթաֆա Մելլաթը` երկու դրվագներով՝ ՀՀ քրեական օրենսգրքի 215-րդ հոդվածի 2-րդ մասով, երկու դրվագներով՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով՝ ՀՀ քրեական օրենսգրքի 34-215-րդ հոդվածի 2-րդ մասով, իսկ Մոսթաֆա Մոհամմադռեզա Մելլաթը` երկու դրվագներով՝ ՀՀ քրեական օրենսգրքի 215-րդ հոդվածի 2-րդ մասով, երկու դրվագներով՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով՝ ՀՀ քրեական օրենսգրքի 34-215-րդ հոդվածի 2-րդ մասով։
Դատարանը գտնում է, որ կատարած հանցավոր արարքների համար ամբաստանյալները ենթակա են պատիժների։
Պատիժ նշանակելիս դատարանը հաշվի է առնում ինչպես ամբաստանյալների կողմից կատարած հանցագործության բնույթն ու դրանց հասարակական վտանգավորության աստիճանը, այնպես էլ նրանց անձը բնութագրող, նրանցից յուրաքանչյուրի պատասխանատվությունը և պատիժը մեղմացնող և ծանրացնող հանգամանքները։
Որպես ամբաստանյալ Ալիռեզա Մոսթաֆա Մելլաթի անձը դրականորեն բնութագրող հանգամանքներ դատարանը հաշվի է առնում այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում ՀՀ-ում դատված կամ որևէ այլ կերպ արատավորված չի եղել։
Դատարանն արձանագրում է, որ ամբաստանյալ Ալիռեզա Մոսթաֆա Մելլաթի արաքում նրա պատասխանատվությունը և պատիժը ինչպես մեղմացնող, այնպես էլ ծանրացնող հանգամանքներ չկան։
/տես` քրեական գործի նյութերը և դատական նիստի արձանագրությունը/
Որպես ամբաստանյալ Մոսթաֆա Մոհամմադռեզա Մելլաթի անձը դրականորեն բնութագրող հանգամանքներ դատարանը հաշվի է առնում այն, որ նա ՀՀ Ոստիկանության ինֆորմացիոն կենտրոնի հաշվառումներով չի անցնում, նախկինում ՀՀ-ում դատված կամ որևէ այլ կերպ արատավորված չի եղել։
Դատարանը, ՀՀ քրեական օրենսգրքի 62-րդ հոդվածի 2-րդ մասի համաձայն` որպես ամբաստանյալ Մոսթաֆա Մոհամմադռեզա Մելլաթի պատասխանատվությունը և պատիժը մեղմացնող հանգամանք է դիտում այն, որ նա ունի առողջական խնդիրներ և տառապում է սրտի սուր հիվանդությամբ։
Դատարանն արձանագրում է, որ ամբաստանյալ Մոսթաֆա Մոհամմադռեզա Մելլաթի պատասխանատվությունը և պատիժը ծանրացնող հանգամանքներ գործում առկա չեն։
/տես` քրեական գործի նյութերը և դատական նիստի արձանագրությունը/
Ելնելով գործի հանգամանքներից, հիմք ընդունելով ՀՀ Քրեական օրենսգրքի 10-րդ հոդվածի 1-ին կետի դրույթը, համաձայն որի` «Հանցանք կատարած անձի նկատմամբ կիրառվող պատիժը և քրեաիրավական ներգործության այլ միջոցները պետք է լինեն արդարացի` համապատաuխանեն հանցանքի ծանրությանը, դա կատարելու հանգամանքներին, հանցավորի անձնավորությանը, անհրաժեշտ և բավարար լինեն նրան ուղղելու և նոր հանցագործությունները կանխելու համար», ՀՀ քրեական օրենսգրքի 48-րդ հոդվածի 2-րդ կետի դրույթը, համաձայն որի` «Պատժի նպատակն է վերականգնել uոցիալական արդարությունը, ուղղել պատժի ենթարկված անձին, ինչպեu նաև կանխել հանցագործությունները» և ՀՀ քրեական օրենսգրքի 61-րդ հոդվածի 2-րդ մասը` համաձայն որի` «Պատժի տեսակը և չափը որոշվում են հանցագործության` հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում` պատասխանատվությունը և պատիժը մեղմացնող կամ ծանրացնող հանգամանքներով», դատարանը գտնում է, որ ամբաստանյալներ Մոսթաֆա Մոհամմադռեզա Մելլաթի և Ալիռեզա Մոսթաֆա Մելլաթի կողմից կատարված հանրորեն վտանգավոր արարքների համար նրանց նկատմամբ պետք է պատիժներ նշանակվեն ազատազրկման ձևով՝ առանց գույքի բռնագրավման, որպիսի պատիժները վերջիններս պետք է կրեն։
ՀՀ քրեական օերնսգրքի 55-րդ հոդվածի համաձայն`
«1. Գույքի բռնագրավումը դատապարտյալի սեփականությունը համարվող գույքը կամ դրա մի մասը հարկադրաբար և անհատույց վերցնելն է` ի սեփականություն պետության։
2. Գույքի բռնագրավման չափը դատարանը որոշում է` նկատի ունենալով հանցագործությամբ հասցված գույքային վնասի, ինչպես նաև հանցավոր ճանապարհով ձեռք բերված գույքի չափը։ Գույքի բռնագրավման չափը չի կարող գերազանցել հանցագործությամբ հասցված վնասի կամ հանցավոր ճանապարհով ձեռք բերված օգուտի չափը։
3. Գույքի բռնագրավումը կարող է նշանակվել շահադիտական դրդումներով կատարված ծանր և առանձնապես ծանր հանցանքների համար սույն օրենսգրքի Հատուկ մասով նախատեսված դեպքերում։
6. Բռնագրավման ենթակա չէ դատապարտյալի կամ նրա խնամքի տակ գտնվող անձանց համար անհրաժեշտ գույքն այն ցանկին համապատասխան, որը սահմանված է օրենքով»։
ՀՀ քրեական օերնսգրքի 103.1-րդ հոդվածի 1-ին մասի համաձայն՝
«1. Հանցագործության կատարման արդյունքում ուղղակի կամ անուղղակի առաջացած կամ ստացված ցանկացած գույքը, այդ գույքի օգտագործումից ստացված եկամուտները կամ այլ տեսակի օգուտները, այնպիսի հանցագործության կատարման համար օգտագործված կամ օգտագործման համար նախատեսված գործիքները և միջոցները, որի կատարման արդյունքում ստացվել է գույք, ահաբեկչության ֆինանսավորմանն ուղղված գույքը, այդ գույքի օգտագործումից ստացված եկամուտները կամ այլ տեսակի օգուտները, սույն օրենսգրքի 215-րդ հոդվածով նախատեսված մաքսանենգության ճանապարհով Հայաստանի Հանրապետության սահմանով տեղափոխված մաքսանենգության առարկաները, իսկ դրանց բացակայության դեպքում դրանց համարժեք գույքը, բացառությամբ բարեխիղճ երրորդ անձի գույքի, տուժողին և քաղաքացիական հայցվորին հանցագործությամբ պատճառված վնասների հատուցման համար անհրաժեշտ գույքի, ենթակա է բռնագանձման՝ հօգուտ պետության»։
ՀՀ քրեական օերնսգրքի 215-րդ հոդվածի 2-րդ մասի համաձայն`
«...Թմրամիջոցների, հոգեմետ (հոգեներգործուն) նյութերի և դրանց պրեկուրսորների, խիստ ներգործող, թունավոր, թունավորող, ռադիոակտիվ նյութերի, ռազմական նշանակության արտադրանքի, նման արտադրանք չհամարվող պայթուցիկ նյութերի և սարքերի, զենքի, բացի ողորկափող որսորդական հրազենից և դրա փամփուշտներից, միջուկային, քիմիական, կենսաբանական կամ զանգվածային ոչնչացման այլ տեսակի զենքի, երկակի նշանակության ապրանքների ռազմավարական տեսակետից կարևոր հումքային ապրանքների կամ մշակութային արժեքների, որոնց տեղափոխման համար սահմանված են հատուկ կանոններ, մաքսանենգությունը՝ պատժվում է ազատազրկմամբ՝ չորսից ութ տարի ժամկետով՝ գույքի բռնագրավմամբ»։
Նույն հոդվածի 6-րդ մասի համաձայն`
«...Սույն հոդվածում գույք են համարվում մաքսանենգության առարկաները, իսկ վերջիններիս բացակայության դեպքում՝ դրանց արժեքը»։
Դատարանն, անդադառնալով ՀՀ քրեական օրենսգրքի 215-րդ հոդվածի դիսպոզիցիային, փաստում է, որ օրենսդիրը որպես հանրորեն վտանգավոր արարքի կատարման պատժատեսակ է սահմանում ազատազրկումը՝ չորսից ութ տարի ժամկետով` գույքի բռնագրավմամբ։ Այլ կերպ, դատարանն արձանագրում է, որ հանրորեն վտանգավոր վերը շարադրված արարքի համար գույքի բռնագրավման ձևով պատիժ նշանակելը համարվում է հոդվածի իմպերատիվ պահանջը։
Դատարանը հաստատված է համարում այն հանգամանքը, որ սույն գործով որպես մաքսանենգության գույք համարվող առարկա են հանդիսացել թմրամիջոցները։
Այսինքն, մաքսանենգության առարկա են հանդիսացել մաքսանենգության այնպիսի օբյեկտներ, որոնց շրջանառությունն արգելված է։
Դատարանը, հաշվի առնելով այն հանգամանքը, որ որպես մաքսանենգության գույք համարվող առարկա են հանդիսանում թմրամիջոցները և վերլուծելով ՀՀ քրեական օերնսգրքի 55-րդ և 103.1 հոդվածների դրույթները, արձանագրում է, որ ամբաստանյալների նկատմամբ ՀՀ քրեական օրենսգրքի 215-րդ հոդվածի իմաստով չեն կարող նշանակվել պատիժներ` գույքի բռնագրավման ձևով, քանի որ մաքսանենգության առարկաներ համարվող գույքը` թմրամիջոցը, հանված է շրջանառությունից և չի կարող անհատույց վերցվել` ի սեփականություն պետության։
Ավելին, շրջանառությունն արգելված լինելու պարագայում դատարանը զրկված է դրանք գնահատելու և այդ կերպ դրանց արժեքը որոշելու միջոցով այն ամբաստանյալներից բռնագանձելու իրավական հնարավորությունից։
Հետևաբար, ՀՀ քրեական օրենսգրքի 215-րդ հոդվածով ազատազրկման ձևով պատիժներ նշանակելու պայմաններում ամբաստանյալների նկատմամբ՝ գույքի բռնագրավում պատժատեսակը կիրառելի չէ վերը շարադրված, իսկ նույն օրենսգրքի 266-րդ հոդվածի 3-րդ մասի դեպքում՝ ոչ նպատակահարմար լինելու պատճառներով։
Անդրադառնալով ամբաստանյալների նկատմամբ նշանակվելիք պատժաչափերի հարցերին, դատարանն արձանագրում է հետևյալը.
ինչպես նշվեց վերևում, դատարանն անձի նկատմամբ պատիժ նշանակելիս պետք է ղեկավարվի ՀՀ քրեական օրենսգրքի 10-րդ, 48-րդ և 61-րդ հոդվածների պահանջներով` հաշվի առնելով ինչպես օրենսդրական, այնպես էլ ՀՀ Վճռաբեկ դատարանի կողմից ձևավորված նախադեպային մի շարք մոտեցումներ` մասնավորապես, իր ՎԲ-142/07, ՎԲ-50/07, ՎԲ-192/07, ՎԲ-201/07, ԱՎԴ2/0059/01/08 որոշումներում քննարկվող հարցի առումով ՀՀ Վճռաբեկ դատարանն արտահայտել է ներքոհիշյալ իրավական դիրքորոշումները.
«ՀՀ քրեական օրենսգրքի 10-րդ հոդվածն ամրագրել է արդարության և պատասխանատվության անհատականացման սկզբունքը։ Պատիժ նշանակելիս արդարության սկզբունքը դրսևորվում է օրենքով նախատեսված մի շարք պահանջներով։ ՀՀ քրեական օրենսգրքի 61-րդ հոդվածի 1-ին մասը սահմանում է, որ հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է քրեական օրենսգրքի Հատուկ մասի համապատասխան հոդվածի սահմաններում՝ հաշվի առնելով նույն օրենսգրքի Ընդհանուր մասի դրույթները։
ՀՀ քրեական օրենսգրքի 10-րդ հոդվածի համաձայն՝ հանցանք կատարած անձի նկատմամբ կիրառվող պատիժն արդարացի է, եթե համապատասխանում է հանցանքի ծանրությանը, դա կատարելու հանգամանքներին, հանցավորի անձնավորությանը անհրաժեշտ և բավարար է անձին ուղղելու և նրա կողմից նոր հանցանքի կատարումը կանխելու համար։
Միևնույն ժամանակ, ՀՀ քրեական օրենսգրքի 48-րդ հոդվածի 2-րդ մասի համաձայն՝ հանցագործության համար մեղավոր ճանաչված անձի նկատմամբ նշանակվող պատժի նպատակն է վերականգնել սոցիալական արդարությունը, ուղղել պատժի ենթարկված անձին, ինչպես նաև կանխել հանցագործությունները։
Պատիժ նշանակելիս հանցավորի նկատմամբ անհատական մոտեցումն անհրաժեշտ է, որպեսզի դատարանը պատժի տեսակն ու չափը ընտրելիս համոզվի, որ դրանով կհասնի պատժի վերը նշված նպատակներին, որոնք փոխկապակցված և փոխհամաձայնեցված են (մեկ նպատակը ենթադրում է մյուսները և յուրաքանչյուրի ինքնուրույն իրականացումն օժանդակում է մյուսներին)։ Այսինքն՝ պատժի նպատակներին հասնելու երաշխիք է հանցագործություն կատարած անձի նկատմամբ արդարացի, արարքի ծանրությանը և հասարակական վտանգավորությանը համապատասխան պատիժ նշանակելը։
ՀՀ քրեական օրենսգրքի 61-րդ հոդվածի 2-րդ մասի համաձայն՝ հանցագործության՝ հանրության համար վտանգավորության աստիճանը և բնույթը, հանցավորի անձը բնութագրող տվյալները, այդ թվում՝ պատասխանատվությունը և պատիժը մեղմացնող կամ ծանրացնող հանգամանքները, որոշիչ հանգամանքներ են պատժի տեսակը և չափը որոշելու հարցում։
Այլ կերպ` դատարանը պետք է բացահայտի կատարված կոնկրետ հանցանքի առանձնահատուկ հատկանիշները, որոնք կարող են ազդել հանրության համար վտանգավորության աստիճանի վրա (հանցագործության կատարման եղանակը, հանցավոր մտադրության իրականացման աստիճանը, վնասի չափը և այլն)։
Պատիժ նշանակելիս դատարանը հաշվի է առնում ինչպես ամբաստանյալների կողմից կատարած հանցագործությունների բնույթն ու դրանց հասարակական վտանգավորության աստիճանը, այնպես էլ նրանց անձը բնութագրող, պատասխանատվությունը և պատիժը մեղմացնող և ծանրացնող հանգամանքները, հանցանքների կատարման մեջ նրանցից յուրաքանչյուրի մասնակցության աստիճանն ու դերակատարությունը։
Դատարանն, անդրադառնալով Մոսթաֆա Մոհամմադռեզա Մելլաթի և Ալիռեզա Մոսթաֆա Մելլաթի նկատմամբ ընտրված խափանման միջոցների` կալանավորման, հարցերին, գտնում է, որ դրանք պետք է թողնել անփոփոխ մինչև դատավճռի օրինական ուժի մեջ մտնելը։

Լուծելով իրեղեն ապացույցի տնօրինման հարցը, դատարանը գտնում է` Քրեական գործով որպես իրեղեն ապացույց ճանաչված 2015 թվականի սեպտեմբերի 19-ին թիվ EE 000035588 AM և EE000035659AM փոստային բեռնագրերով արտահանվող ծանրոցների զննման արձանագրությամբ հայտնաբերված՝ 3014,281 գրամ ափիոն տեսակի թմրամիջոցները, 2015 թվականի սեպտեմբերի 19-ին թիվ EE000035588AM և EE000035659AM փոստային բեռնագրերով արտահանվող ծանրոցներից հայտնաբերված «FOSTER CLARKS» գրառմամբ թվով 4 հատ մետաղական տարաները, Ալիռեզա Մելլաթի ձերբակալման ժամանակ վերջինիս կողմից ներկայացված «iPhone 5s» տեսակի 013846000934688 գործարանային համարով բջջային հեռախոսը, Մոսթաֆա Մելլաթի ձերբակալման ժամանակ վերջինիս կողմից ներկայացված «Samsung» տեսակի 354202/07/268922/1 և 354202/07/268922/9 գործարանային համարով բջջային հեռախոսը և դրանում տեղադրված 16 գիգաբայտ հիշողության ծավալով կրիչը, որոնք պահվում են ՀՀ ԿԱ ԱԱԾ քննչական վարչությունում` պետք է թողնել հիշյալ մարմնի տնօրինությանը` Միլադ Մոհամմադռեզա Շարիֆի մասով անջատված թիվ 58216015 քրեական գործին կցելու և օրենքով սահմանված կարգով հետագա ընթացքը լուծելու համար։
«Հայփոստ» ՓԲԸ թիվ ЕЕ 000 035 588 AM, ЕЕ ООО 035 659 AM և EE 000 035866 AM ձև CN23 փոստային առաքանու բեռնագրերը, Ալիռեզա Մելլաթի ձերբակալման ժամանակ վերջինիս կողմից ներկայացված «France paris; 18 rue roland garros 9500 viliers le bel» գրառմամբ սպիտակ գույնի թուղթը և այլ փաստաթղթի կարգով ապացույց ճանաչված` ՀՀ ԱԱԾ ՀՀԳՎ-ից ստացված թիվ 2/8-9117 և 2/8-9674 գրությունները` պետք է թողնել քրեական գործում, իսկ 2015 թվականի հոկտեմբերի 2-ին Ալիռեզա Մելլաթի ձեռքում գտնվող ծանրոցի զննության արդյունքում հայտնաբերված՝ 1220,29 գրամ ափիոն տեսակի թմրամիջոցը և «NAN» գրառմամբ թվով 3 հատ մետաղական տարաները, պետք է ոչնչացնել։
Դատարանը գտնում է, որ ամբաստանյալներ Մոսթաֆա Մոհամմադռեզա Մելլաթից և Ալիռեզա Մոսթաֆա Մելլաթից հօգուտ ՀՀ պետական բյուջեի պետք է բռնագանձել 226.710 /երկու հարյուր քսանվեց հազար յոթ հարյուր տասը/ ՀՀ դրամ՝ որպես դատական ծախսեր։
Միաժամանակ, դատարանն արձանագրում է, որ հնարավոր դատական ծախսերի բռնագանձումն ապահովելու նպատակով պետք է կալանք դնել ՀՀ ԿԱ ԱԱԾ քննչական վարչության պետի 16.10.2015թ-ի թիվ 4558 և 4559 գրություններով ՀՀ ԱՆ «Նուբարաշեն» ՔԿՀ ուղարկված՝ Մոսթաֆա Մոհամմադռեզա Մելլաթի և Ալիռեզա Մոսթաֆա Մելլաթի անձնական իրերի ու դրամական միջոցների վրա։

4. Եզրափակիչ մաս
Վերոգրյալի հիման վրա և ղեկավարվելով ՀՀ Քրեական դատավարության օրենսգրքի 357-360, 365, 369-373-րդ հոդվածներով, դատարանը

Վ Ճ Ռ Ե Ց

1.Ալիռեզա Մոսթաֆա Մելլաթին մեղավոր ճանաչել երկու դրվագներով՝ ՀՀ քրեական օրենսգրքի 215-րդ հոդվածի 2-րդ մասով, երկու դրվագներով՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով՝ ՀՀ քրեական օրենսգրքի 34-215-րդ հոդվածի 2-րդ մասով նախատեսված հանցագործությունների կատարման մեջ։
Երկու դրվագներով՝ ՀՀ քրեական օրենսգրքի 215-րդ հոդվածի 2-րդ մասով Ալիռեզա Մոսթաֆա Մելլաթի նկատմամբ յուրաքանչյուր դրվագի համար պատիժ նշանակել՝ ազատազրկում` 4 /չորս/ տարի 6 /վեց/ ամիս ժամկետով՝ առանց գույքի բռնագրավման։ Երկու դրվագներով՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով յուրաքանչյուր դրվագի համար պատիժ նշանակել՝ ազատազրկում` 7 /յոթ/ տարի 6/վեց/ ամիս ժամկետով՝ առանց գույքի բռնագրավման։ Երկու դրվագներով՝ ՀՀ քրեական օրենսգրքի 34-215-րդ հոդվածի 2-րդ մասով յուրաքանչյուր դրվագի համար պատիժ նշանակել՝ ազատազրկում` 4 /չորս/ տարի ժամկետով՝ առանց գույքի բռնագրավման։
ՀՀ քրեական օրենսգրքի 66-րդ հոդվածի կարգով, հանցանքների համակցությամբ՝ նշանակված պատիժները մասնակիորեն գումարելու միջոցով՝ Ալիռեզա Մոսթաֆա Մելլաթի նկատմամբ վերջնական պատիժ նշանակել ազատազրկում` 13 /տասներեք/ տարի ժամկետով՝ առանց գույքի բռնագրավման։
Ալիռեզա Մոսթաֆա Մելլաթի նկատմամբ ընտրված խափանման միջոցը՝ կալանավորումը, թողնել անփոփոխ մինչև դատավճիռն օրինական ուժի մեջ մտնելը, նշանակված պատժի կրման սկիզբը հաշվել 2015թ. հոկտեմբերի 2-ից։
2.Մոսթաֆա Մոհամմադռեզա Մելլաթին մեղավոր ճանաչել երկու դրվագներով՝ ՀՀ քրեական օրենսգրքի 215-րդ հոդվածի 2-րդ մասով, երկու դրվագներով՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով և երկու դրվագներով՝ ՀՀ քրեական օրենսգրքի 34-215-րդ հոդվածի 2-րդ մասով նախատեսված հանցագործությունների կատարման մեջ։
Երկու դրվագներով՝ ՀՀ քրեական օրենսգրքի 215-րդ հոդվածի 2-րդ մասով Մոսթաֆա Մոհամմադռեզա Մելլաթի նկատմամբ յուրաքանչյուր դրվագի համար պատիժ նշանակել՝ ազատազրկում` 4 /չորս/ տարի ժամկետով՝ առանց գույքի բռնագրավման։ Երկու դրվագներով՝ ՀՀ քրեական օրենսգրքի 266-րդ հոդվածի 3-րդ մասի 2-րդ կետով յուրաքանչյուր դրվագի համար պատիժ նշանակել՝ ազատազրկում` 7 /յոթ/ տարի ժամկետով՝ առանց գույքի բռնագրավման։ Երկու դրվագներով՝ ՀՀ քրեական օրենսգրքի 34-215-րդ հոդվածի 2-րդ մասով յուրաքանչյուր դրվագի համար պատիժ նշանակել՝ ազատազրկում` 4 /չորս/ տարի ժամկետով՝ առանց գույքի բռնագրավման։
ՀՀ քրեական օրենսգրքի 66-րդ հոդվածի կարգով, հանցանքների համակցությամբ՝ նշանակված պատիժները մասնակիորեն գումարելու միջոցով՝ Մոսթաֆա Մոհամմադռեզա Մելլաթի նկատմամբ վերջնական պատիժ նշանակել ազատազրկում` 11 /տասնմեկ/ տարի ժամկետով՝ առանց գույքի բռնագրավման։
Մոսթաֆա Մոհամմադռեզա Մելլաթի նկատմամբ ընտրված խափանման միջոցը՝ կալանավորումը, թողնել անփոփոխ մինչև դատավճիռն օրինական ուժի մեջ մտնելը, նշանակված պատժի կրման սկիզբը հաշվել 2015թ. հոկտեմբերի 2-ից։
Քրեական գործով իրեղեն ապացույց ճանաչված՝ 2015 թվականի սեպտեմբերի 19-ին թիվ EE 000035588 AM և EE000035659AM փոստային բեռնագրերով արտահանվող ծանրոցների զննման արձանագրությամբ հայտնաբերված` 3014,281 գրամ ափիոն տեսակի թմրամիջոցները, 2015 թվականի սեպտեմբերի 19-ին թիվ EE000035588AM և EE000035659AM փոստային բեռնագրերով արտահանվող ծանրոցներից հայտնաբերված «FOSTER CLARKS» գրառմամբ թվով 4 հատ մետաղական տարաները, Ալիռեզա Մելլաթի ձերբակալման ժամանակ վերջինիս կողմից ներկայացված «Iphone 5s» տեսակի 013846000934688 գործարանային համարով բջջային հեռախոսը, Մոսթաֆա Մելլաթի ձերբակալման ժամանակ վերջինիս կողմից ներկայացված «Samsung» տեսակի 354202/07/268922/1 և 354202/07/268922/9 գործարանային համարով բջջային հեռախոսը և դրանում տեղադրված 16 գիգաբայտ հիշողության ծավալով կրիչը, որոնք պահվում են ՀՀ ԿԱ ԱԱԾ քննչական վարչությունում՝ թողնել հիշյալ մարմնի տնօրինությանը՝ Միլադ Մոհամմադռեզա Շարիֆի մասով անջատված թիվ 58216015 քրեական գործին կցելու և օրենքով սահմանված կարգով հետագա ընթացքը լուծելու համար։
«Հայփոստ» ՓԲԸ թիվ ЕЕ 000 035 588 AM, ЕЕ 000 035 659 AM և ЕЕ 000 035 866 AM ձև CN23 փոստային առաքանու բեռնագրերը, Ալիռեզա Մելլաթի ձերբակալման ժամանակ վերջինիս կողմից ներկայացված «France paris; 18 rue roland garros 9500 viliers le bel» գրառմամբ սպիտակ գույնի թուղթը և այլ փաստաթղթի կարգով ապացույց ճանաչված՝ ՀՀ ԱԱԾ ՀՀԳՎ-ից ստացված թիվ 2/8-9117 և 2/8-9674 գրությունները՝ թողնել քրեական գործում, իսկ 2015 թվականի հոկտեմբերի 2-ին Ալիռեզա Մելլաթի ձեռքում գտնվող ծանրոցի զննության արդյունքում հայտնաբերված` 1220,29 գրամ ափիոն տեսակի թմրամիջոցը և «NAN» գրառմամբ թվով 3 հատ մետաղական տարաները, ոչնչացնել։
Մոսթաֆա Մոհամմադռեզա Մելլաթից և Ալիռեզա Մոսթաֆա Մելլաթից հօգուտ ՀՀ պետական բյուջեի բռնագանձել 226.710 /երկու հարյուր քսանվեց հազար յոթ հարյուր տասը/ ՀՀ դրամ՝ որպես դատական ծախսեր։
Դատական ծախսերի բռնագանձումն ապահովելու նպատակով կալանք դնել ՀՀ ԿԱ ԱԱԾ քննչական վարչության պետի 16.10.2015թ-ի թիվ 4558 և 4559 գրություններով ՀՀ ԱՆ «Նուբարաշեն» ՔԿՀ ուղարկված՝ Մոսթաֆա Մոհամմադռեզա Մելլաթի և Ալիռեզա Մոսթաֆա Մելլաթի անձնական իրերի ու դրամական միջոցների վրա։
Դատավճիռը կարող է բողոքարկվել ՀՀ Վերաքննիչ քրեական դատարան հրապարակվելու օրվանից հետո` մեկամսյա ժամկետում։


Դ Ա Տ Ա Վ Ո Ր Մ.Մ Ա Կ Յ Ա Ն