Ո Ր Ո Շ ՈՒ Մ
Քրեական գործի վարույթը կարճելու և քրեական հետապնդումը դադարեցնելու մասին

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը,

նախագահությամբ` դատավոր Մ. Մարտիրոսյանի,
քարտուղարությամբ` Ա. Հովհաննիսյանի,

մասնակցությամբ`

մեղադրող,
Երևանի Կենտրոն և Նորք-Մարաշ
վարչական շրջանների դատախազության
դատախազ Վ. Ասատրյանի,


տուժող Ա. Գալստյանի,


2015թ. դեկտեմբերի 24-ին, դատարանում, դռնբաց դատական նիստում քննելով քրեական գործն ըստ մեղադրանքի
Գագիկ Հովհաննեսի Չիլինգարյանի`
ծնված 1961թ. սեպտեմբերի 12-ին Երևանում, հայ, Հայաստանի Հանրապետության /այսուհետ ՀՀ/ քաղաքացի, բարձրագույն կրթությամբ, ամուսնացած, խնամքին երկու անձ, չի աշխատում, նախկինում չդատված, հաշվառված է և բնակվում է Երևանի Խորենացու փողոցի թիվ 17 շենքի թիվ 25 բնակարանում, կալանքի տակ չէ, մեղադրվում է ՀՀ քրեական օրենսգրքի 118-րդ հոդվածով,

Պ Ա Ր Զ Ե Ց

Նախաքննության մարմինը Գագիկ Հովհաննեսի Չիլինգարյանին մեղադրանք է առաջադրել հետևյալ արարքի համար, որ նա` «2015թ. հուլիսի 29-ին` ժամը 23։30-ի սահմաններում, Երևան քաղաքի Խորենացի 17 շենքի թիվ 25 բնակարանում, կենցաղային հարցերի շուրջ վիճաբանել է իր կնոջ` Անահիտ Անուշավանի Գալստյանի հետ, որի ընթացքում վերջինիս նկատմամբ կատարել է բռնի գործողություններ, այն է` ձեռքերով և ոտքերով հարվածներ է հասցրել նրա մարմնի տարբեր մասերին` Ա. Գալստյանին դիտավորությամբ պատճառելով ֆիզիկական ցավ։
Այսինքն` Գ. Չիլինգարյանին մեղսագրվում է հանրորեն վտանգավոր արարք` նախատեսված ՀՀ քրեական օրենսգրքի 118-րդ հոդվածով»։
2015թ. նոյեմբերի 6-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան, 2015թ. նոյեմբերի 9-ին ստացվել, 2015թ. նոյեմբերի 10-ին ընդունվել է դատարանի վարույթ, իսկ 2015թ. նոյեմբերի 16-ին որոշում է կայացվել քրեական գործի դատական քննությունը 2015թ. նոյեմբերի 26-ին նշանակելու մասին։
2015թ. դեկտեմբերի 8-ին դատարան է ստացվել տուժող Ա. Գալստյանի նույն օրվա դիմումը` ամբաստանյալի հետ հաշտվելու պատճառաբանությամբ քրեական գործով վարույթը կարճելու խնդրանքի մասին։ Այդ դիմումով տուժող Ա. Գալստյանը հայտնել է նաև, որ ամբաստանյալի նկատմամբ որևէ պահանջ չի ներկայացնում, նրա դեմ բողոք չունի։
Այդ օրը դատարան է ստացվել նաև ամբաստանյալ Գ. Չիլինգարյանի նույն օրվա դիմումը` տուժողի հետ հաշտվելու պատճառաբանությամբ քրեական գործով վարույթը կարճելու խնդրանքի մասին։
2015թ. դեկտեմբերի 24-ի դատական նիստում տուժող Ա. Գալստյանը հայտարարեց, որ հաշտվել է ամբաստանյալի հետ, պնդում է այդ մասին իր 2015թ. դեկտեմբերի 8-ի դիմումը։
Նույն դատական նիստում ամբաստանյալ Գ. Չիլինգարյանը նույնպես հայտարարեց, որ հաշտվել է տուժողի հետ, չի առարկում իր նկատմամբ ՀՀ քրեական օրենսգրքի 118-րդ հոդվածով հարուցված քրեական հետապնդումը` տուժողի հետ հաշտվելու պատճառաբանությամբ դադարեցնելու դեմ։
Ուսումնասիրելով քրեական գործի նյութերը և վերոհիշյալ դիմումները, լսելով տուժողին և ամբաստանյալին` դատարանը գտնում է հետևյալը.
ՀՀ քրեական օրենսգրքի 18-րդ հոդվածի համաձայն` «1. Հանցագործություն է համարվում մեղավորությամբ կատարված` հանրության համար վտանգավոր այն արարքը, որը նախատեսված է սույն օրենսգրքով (…)»։
Նույն օրենսգրքի 118-րդ հոդվածի համաձայն` «Ծեծելը կամ այլ բռնի գործողություններ կատարելը, որը չի առաջացրել սույն օրենսգրքի 117-րդ հոդվածով նախատեսված հետևանքներ`
պատժվում է տուգանքով` նվազագույն աշխատավարձի առավելագույնը հարյուրապատիկի չափով, կամ կալանքով` առավելագույնը երկու ամիս ժամկետով»։
ՀՀ քրեական դատավարության օրենսգրքի 33-րդ հոդվածի համաձայն` «1. Կատարված հանցագործության ծանրությունից և բնույթից ելնելով` քրեական դատավարությունում հետապնդումն իրականացվում է հանրային և մասնավոր կարգով։
2. Մասնավոր հետապնդման գործեր են համարվում սույն օրենսգրքի 183 հոդվածով նախատեսված հանցագործությունների վերաբերյալ գործերը (…)»։
Նույն օրենսգրքի 35-րդ հոդվածի համաձայն` «1. Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե` (…)
5) սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ. (…)»։
Նույն օրենսգրքի 183-րդ հոդվածի համաձայն` «1. Հայաստանի Հանրապետության քրեական օրենսգրքի (...) 118-րդ հոդվածով (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի` խորհրդակցական սենյակ հեռանալը։ (…)»։
ՀՀ վճռաբեկ դատարանը Գևորգ Արամի Կլեկչյանի վերաբերյալ ԵԿԴ/0005/11/14 գործով 2014թ. հոկտեմբերի 31-ի որոշմամբ հայտնել է հետևյալ իրավական դիրքորոշումը.
«(…) Վճռաբեկ դատարանն արձանագրում է, որ ՀՀ քրեական դատավարության օրենսգրքի 35-րդ հոդվածի 1-ին մասի 4-րդ կետով նախատեսված նորմը կիրառելի է հետևյալ պայմանների միաժամանակյա առկայության դեպքում՝
ա) վարույթն իրականացնող մարմինը հաստատված է համարել, որ անձը ՀՀ քրեական դատավարության օրենսգրքի 183-րդ հոդվածի 1-ին մասով նախատեսված որևէ արարք է կատարել,
բ) բացակայում է դիմողի (տուժողի) բողոքը,
գ) ենթադրյալ հանցանք կատարած անձը չի առարկում ՀՀ քրեական դատավարության օրենսգրքի 35-րդ հոդվածի 1-ին մասի 4-րդ կետի հիմքով իր նկատմամբ քրեական հետապնդում չհարուցելու կամ հարուցված քրեական հետապնդումը դադարեցնելու դեմ։ (…)»։
Տվյալ քրեական գործի դատական քննության ժամանակ, մինչև դատավճիռ կայացնելու համար դատարանի կողմից խորհրդակցական սենյակ հեռանալը տուժող Ա. Գալստյանը հաշտվել է ամբաստանյալի հետ, հայտարարել է նրա նկատմամբ քրեական հետապնդումը դադարեցնելու խնդրանքի մասին։
Ամբաստանյալ Գ. Չիլինգարյանը չի առարկել իր նկատմամբ ՀՀ քրեական օրենսգրքի 118-րդ հոդվածով հարուցված քրեական հետապնդումը դադարեցնելու դեմ` տուժողի հետ հաշտվելու պատճառաբանությամբ։
Հաշվի առնելով, որ ամբաստանյալի կողմից, ՀՀ քրեական օրենսգրքի 118-րդ հոդվածով նախատեսված արարք կատարելը հաստատված է քրեական գործի նյութերով, տուժողը և ամբաստանյալը հաշտվել են միմյանց հետ, ամբաստանյալը չի առարկել իր նկատմամբ ՀՀ քրեական օրենսգրքի 118-րդ հոդվածով հարուցված քրեական հետապնդումը տուժողի հետ հաշտվելու պատճառաբանությամբ դադարեցնելու դեմ` դատարանը գտնում է, որ քրեական գործի վարույթը ենթակա է կարճման, ամբաստանյալ Գագիկ Չիլինգարյանի նկատմամբ ՀՀ քրեական օրենսգրքի 118-րդ հոդվածով քրեական հետապնդումը ենթակա է դադարեցման` ամբաստանյալի հետ տուժողի հաշտվելու պատճառաբանությամբ։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել, գույքի վրա կալանք դնելու մասին որոշում չի կայացվել, որևէ առարկա գործով իրեղեն ապացույց չի ճանաչվել։
Քննելով խափանման միջոցի հարցը` դատարանը գտնում է, որ ամբաստանյալ Գագիկ Չիլինգարյանի նկատմամբ ընտրված խափանման միջոց չհեռանալու մասին ստորագրությունը ենթակա է վերացման։
Դատական ծախսերի վերաբերյալ տեղեկություններ դատարանին չեն ներկայացվել։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 35-րդ, 183-րդ և 313-րդ հոդվածներով` դատարանը

Ո Ր Ո Շ Ե Ց

ԵԿԴ-0266/01/15 (15143415) քրեական գործով, ըստ մեղադրանքի Գագիկ Հովհաննեսի Չիլինգարյանի` ՀՀ քրեական օրենսգրքի 118-րդ հոդվածով, քրեական գործի վարույթը կարճել և ամբաստանյալ Գագիկ Հովհաննեսի Չիլինգարյանի նկատմամբ քրեական հետապնդումը դադարեցնել` ամբաստանյալի հետ տուժող Անահիտ Անուշավանի Գալստյանի հաշտվելու պատճառաբանությամբ։
Ամբաստանյալ Գագիկ Չիլինգարյանի նկատմամբ ընտրված խափանման միջոց չհեռանալու մասին ստորագրությունը` վերացնել։
Սույն որոշումը վերաքննության կարգով կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։


ԴԱՏԱՎՈՐ` Մ. ՄԱՐՏԻՐՈՍՅԱՆ