Ո Ր Ո Շ Ո Ւ Մ

Հ Ա Ն Ո Ւ Ն Հ Ա Յ Ա Ս Տ Ա Ն Ի Հ Ա Ն Ր Ա Պ Ե Տ Ո Ւ Թ Յ Ա Ն

06.05.2016թ. քաղաք Երևան
ԳՈՐԾ. Հ.-ԵԿԴ/0140/01/15

ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ ՎԵՐԱՔՆՆԻՉ ՔՐԵԱԿԱՆ ԴԱՏԱՐԱՆԸ
ՀԵՏԵՎՅԱԼ ԿԱԶՄՈՎ՝


ՆԱԽԱԳԱՀՈՂ ԴԱՏԱՎՈՐ՝ Մ.ԱՐՂԱՄԱՆՅԱՆ
ԴԱՏԱՎՈՐՆԵՐ` Ս.ՉԻՉՈՅԱՆ
Մ.ՊԱՊՈՅԱՆ

ՔԱՐՏՈՒՂԱՐՈՒԹՅԱՄԲ` Հ.ՀԱԿՈԲՅԱՆԻ

ՄԱՍՆԱԿՑՈՒԹՅԱՄԲ`

ՄԵՂԱԴՐՈՂ` Ա.ԿՈՍՏԱՆԴՅԱՆԻ
ՊԱՇՏՊԱՆՆԵՐ` Կ.ՔԱՄԱԼՅԱՆԻ
Ա.ՀՈԲՈՍՅԱՆԻ
ԹԱՐԳՄԱՆՆԵՐ` Գ.ԱԲՈՎՅԱՆԻ
Ս.ՀԱԽՎԵՐԴՅԱՆԻ

դռնբաց դատական նիստում պաշտպաններ Կ.Քամալյանի, Հ.Իսրաելյանի, Հ.Ճարոյանի և ամբաստանյալներ Մալեկ Աբաս Ղարիբի, Հասան Աբդո Ալ Շահերի վերաքննիչ բողոքների հիման վրա քննության առնելով քրեական գործն ըստ մեղադրանքի Ֆիրաս Մալեկ Վեհբեինի` ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով, Մալեկ Աբաս Գարիբիի` ՀՀ քրեական օրենսգրքի 34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով և Հասան Աբդո Ալ-Շաերի` ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով

Պ Ա Ր Զ Ե Ց

Գործի փաստական հանգամանքներն ու դատավարական ընթացքը
Ֆիրաս Մալեկ Վեհբեն նախնական համաձայնության է եկել քննությամբ չպարզված, Թուրքիայի Հանրապետությունում բնակվող անձի հետ` վերջինիս ծանոթ, Հասան Աբդո Ալ-Շահերի կողմից իրացնելու նպատակով, Հայաստանի Հանրապետությունում ապօրինի պահված, առանձնապես խոշոր չափերի «կոկաին» տեսակի թմրամիջոցի ձեռք բերման, փոխադրման, ապօրինի իրացման և մաքսանենգությամբ Թուրքիայի Հանրապետություն տեղափոխելու շուրջ։ Այդ նպատակով, 2015 թվականի հունվարին, Բուլղարիայի Հանրապետության Սոֆիա քաղաքում, Ֆիրաս Մալեկ Վեհբեն նախնական համաձայնության է եկել շուրջ մեկ տարվա իր ծանոթ Մալեկ Ղարիբի հետ` 2.500 Եվրո գումարի դիմաց Հայաստանից` Երևան քաղաքից Թուրքիայի Ստամբուլ քաղաք թմրամիջոց տեղափոխելու վերաբերյալ։
Ապօրինի պահված, առանձնապես խոշոր չափերով «կոկաին» տեսակի թմրամիջոցի ձեռք բերման, փոխադրման, ապօրինի իրացման և մաքսանենգության նպատակով 2015 թվականի փետրվարի 9-ին Ստամբուլ-Երևան չվերթով Ֆիրաս Մալեկ Վեհբեն ժամանել է ՀՀ և բնակվել Երևանի Եզ. Կողբացու փողոցի թիվ 28 շենքի թիվ 30 բնակարանում։
Երևանում պահված առանձնապես խոշոր չափերի՝ 4717,31 գրամ քաշով «կոկաին» տեսակի թմրամիջոցը 2.500 Եվրո գումարի դիմաց մաքսանենգությամբ Թուրքիայի Հանրապետություն տեղափոխելու նպատակով Մալեկ Աբաս Գարիբը 2015 թվականի փետրվարի 10-ին Սոֆիա-Վարշավա-Երևան չվերթով ժամանել է Երևան և բնակվել «Շիրակ» հյուրանոցում։
Հասան Աբդո Ալ-Շաերը նախնական համաձայնության գալով Լիբանանում բնակվող, քննությամբ չպարզված անձի հետ, Երևանի Ամիրյան փողոցի թիվ 5 շենքի թիվ 7 բնակարանում ապօրինաբար պահված, առանձնապես խոշոր` 4717,31 գրամ չափի, «կոկաին» տեսակի թմրամիջոցն իրացնելու, այն է` իրացնելու նպատակով այդ թմրամիջոցի պահումը, տեղափոխումն ու մաքսանենգությամբ փոխադրումն ապահովելու համար, 2015 թվականի փետրվարի 10-ին Լիբանան-Աբու-Դաբի-Երևան չվերթով ժամանել է ՀՀ և բնակվել Երևանի Ամիրյան փողոցի թիվ 5 շենքի թիվ 7 բնակարանում, որտեղ ապօրինի կերպով պահված է եղել առանձնապես խոշոր չափերի՝ 4717,31 գրամ քաշով «կոկաին» տեսակի թմրամիջոցը։
Պայմանավորվածության համաձայն Հասան Աբդո Ալ-Շաերը Երևանում հանդիպել է Ֆիրաս Մալեկ Վեհբեի հետ՝ թմրամիջոցները ստանալու և Թուրքիա տեղափոխելու համար։ Հասան Ալ Շաերը վերը նշված բնակարանում թմրամիջոցները տեղավորել և քողարկել է` Մալեկ Գարիբի մոտ եղած, հագուստի և իրերի համար նախատեսված ճամպրուկի հետնամասում և իր կողմից նախապատրաստված հատուկ թաքստոցում, որից հետո այն 2015 թվականի փետրվարի 11-ին տվել է Ֆիրաս Մալեկ Վեհբեին, որպեսզի վերջինս Աբաս Գարիբի միջոցով իրականացնի դրա փոխադրումը Թուրքիա։
Ֆիրաս Մալեկ Վեհբեն ճամպրուկում թաքցված թմրամիջոցը նույն օրը տեղափոխել է Երևանի Շիրակ հյուրանոցի մոտակայք և տվել է իր ծանոթ Մալեկ Աբաս Գարիբին՝ ըստ նախնական պայմանավորվածության թմրամիջոցի տեղափոխումը Թուրքիայի Հանրապետություն իրականացնելու համար, պայմանավորվելով, որ վերջինս ձեռք բերի 2015 թվականի փետրվարի 12-ի` Երևան-Ստամբուլ չվերթի ավիատոմս և թմրամիջոցի փոխադրումը իրականացնի այդ օրը։
Միաժամանակ, Մալեկ Աբասի Գարիբին շահագրգռելու համար Ֆիրաս Մալեկ Վեհբեն նրան է փոխանցել խոստացված 2.500 Եվրո գումարից 1.500 Եվրոն` խոստանալով մնացած մասը փոխանցել թմրամիջոցը Ստամբուլ տեղափոխելուց հետո։ Բացի այդ նա տվել է նաև 200.000 ՀՀ դրամ՝ 2015 թվականի փետրվարի 12-ին Երևան-Ստամբուլ չվերթի ավիատոմս գնելու համար։
Հասան Աբդո Ալ-Շաերն իր անվամբ ձեռք է բերել նշված չվերթի ավիատոմս` այդ օրը նույնպես Ստամբուլ մեկնելու և Մալեկ Աբաս Գարիբին տեսադաշտում պահելու նպատակով։ Հասան Աբդո Ալ-Շաերը Երևանում նախապես տեսել է Մալեկ Աբաս Գարիբին` Ֆիրաս Մալեկ Վեհբեի կողմից թմրամիջոցը նրան փոխանցելու պահին, որպեսզի արտաքինից ճանաչի, թաքուն հետևի նրան և այդ կերպ նույնպես օժանդակի իրացման նպատակով թմրամիջոց պահելուն, տեղափոխմանն ու մաքսանենգությանը։
2015 թվականի փետրվարի 12-ին Հասան Աբդո Ալ-Շաերը Երևան-Ստամբուլ չվերթով, Մալեկ Աբաս Գարիբից թաքուն նրա հետ միասին նույն չվերթով մեկնելու նպատակով, առանձին մեկնել է «Զվարթնոց» օդանավակայան, անցել է սահմանային հսկողությունը և սպասել սպասասրահում` մինչ ինքնաթիռ նստելը, սակայն Երևանի «Զվարթնոց» օդանավակայանում, 2015 թվականի փետրվարի 12-ին, ՀՀ ԿԱ ԱԱԾ աշխատակիցների կողմից Մալեկ Աբաս Գարիբի ուղեբեռի զննությամբ առանձնապես խոշոր չափերի՝ 4717,31 գրամ ընդհանուր քաշով «կոկաին» տեսակի թմրամիջոցը հայտնաբերվել և առգրավվել է։
Վերոգրյալ հանցանքի համար Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճռով Ֆիրաս Մալեկ Վեհբեին (FIRAS MALEK WEHBE) մեղավոր է ճանաչվել և դատապարտվել` ՀՀ քրեական օրենսգրքի 38-34-215-րդ հոդվածի 2-րդ մասով ազատազրկման 5 տարի ժամկետով` առանց գույքի բռնագրավման և 266-րդ հոդվածի 3-րդ մասի 2-րդ կետով ազատազրկման 10 տարի ժամկետով` առանց գույքի բռնագրավման։
ՀՀ քրեական օրենսգրքի 66-րդ հոդվածի 4-րդ մասով սահմանված կարգով` պատիժները մասնակի գումարելու միջոցով` Ֆիրաս Վեհբեի նկատմամբ վերջնական պատիժ է նշանակվել ազատազրկում 13 տարի ժամկետով` առանց գույքի բռնագրավման։
Նրա նկատմամբ ընտրված խափանման միջոց կալանավորումը թողնվել է անփոփոխ` պատժի սկիզբը հաշվելով 2015 թբականի փետրվարի 12-ից։
Մալեկ Աբաս Գարիբին (MALEK ABAS GARIB) մեղավոր է ճանաչվել և դատապարտվել` ՀՀ քրեական օրենսգրքի 34-215-րդ հոդվածի 2-րդ մասով ազատազրկման 5 տարի ժամկետով` առանց գույքի բռնագրավման և 266-րդ հոդվածի 3-րդ մասի 2-րդ կետով ազատազրկման 11 տարի ժամկետով` գույքի կեսի բռնագրավմամբ, սակայն ոչ ավելի 1.500 Եվրոյին համարժեք ՀՀ դրամ գումարից։
ՀՀ քրեական օրենսգրքի 66-րդ հոդվածի 4-րդ մասով սահմանված կարգով` պատիժները մասնակի գումարելու միջոցով` Մալեկ Աբաս Գարիբի նկատմամբ վերջնական պատիժ է նշանակվել ազատազրկում 15 տարի ժամկետով` գույքի կեսի բռնագրավմամբ, սակայն ոչ ավելի 1.500 Եվրոյին համարժեք ՀՀ դրամ գումարից։
Նրա նկատմամբ ընտրված խափանման միջոց կալանավորումը թողնվել է անփոփոխ` պատժի սկիզբը հաշվելով 2015 թբականի փետրվարի 12-ից։
Հասան Աբդո Ալ-Շաերին (HASAN ABDO AL-SHAER) մեղավոր է ճանաչվել և դատապարտվել` ՀՀ քրեական օրենսգրքի 38-34-215-րդ հոդվածի 2-րդ մասով ազատազրկման 5 տարի ժամկետով` առանց գույքի բռնագրավման և 266-րդ հոդվածի 3-րդ մասի 2-րդ կետով ազատազրկման 13 տարի ժամկետով` առանց գույքի բռնագրավման։
ՀՀ քրեական օրենսգրքի 66-րդ հոդվածի 4-րդ մասով սահմանված կարգով` պատիժները մասնակի գումարելու միջոցով` Հասան Աբդո Ալ-Շաերի նկատմամբ վերջնական պատիժ է նշանակվել ազատազրկում 16 տարի ժամկետով` առանց գույքի բռնագրավման։
Նրա նկատմամբ ընտրված խափանման միջոց կալանավորումը թողնվել է անփոփոխ` պատժի սկիզբը հաշվելով 2015 թբականի փետրվարի 12-ից։
Դատարանը որոշել է իրեղեն ապացույցներ ճանաչված`
4717,31 գրամ մաքուր քաշով «կոկաին» տեսակի թմրամիջոցը, «ՍԱՄՍՈՆԻՏ» («SAMSONITE») գրառմամբ ճամպրուկը և «ՊՌՕՖԻ ՔՈՒՔ ՎԱՔՈՒՄ ՍԻԼԸՐ ՓԻՍԻ-ՎԿ 1015» («PROFI COOK Vacuum sealer PC-VK 1015») գրառմամբ վակումային սարքը թողնել թիվ 58206715 քրեական գործով վարույթն իրականացնող մարմնի տնօրինմանը։
Մալեկ Աբաս Գարիբի (MALEK ABAS GARIB) կողմից հանցագործության կատարման արդյունքում ստացած գույք հանդիսացող 1.500 Եվրո գումարը բռնագանձել հօգուտ պետության։
Ֆիրաս Մալեկ Վեհբեից (FIRAS WEHBE), Մալեկ Աբաս Գարիբից (MALEK ABAS GARIB), Հասան Աբդո Ալ-Շաերից (HASAN ABDO AL-SHAER) համապարտորեն հօգուտ ՀՀ պետական բյուջեի բռնագանձել 670.512 ՀՀ դրամ գումար` որպես դատական ծախսեր։

Վերաքննիչ բողոքների հիմքերը, հիմնավորումներն ու պահանջները
Պաշտպան Կ.Քամալյանը վերաքննիչ բողոք է բերել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճռի դեմ` միջնորդելով իր պաշտպանյալ Ֆիրազ Վեհբեին առաջադրված մեղադրանքը ՀՀ քրեական օրենսգրքի 266-րդ հոդվածի 3-րդ մասով վերավորակել ՀՀ քրեական օրենսգրքի 38-34-268-րդ հոդվածի 3-րդ մասով, իսկ հիշյալ և ՀՀ քրեական օրենսգրքի 38-34-215-րդ հոդվածի 2-րդ մասով առաջադրված մեղադրանքներով դատապարտել մեղմ պատժի` ընդհուպ մինչև ՀՀ քրեական օրենսգրքի 64-րդ հոդվածի կիրառմամբ կամ սահմանված պատիժը պայմանականորեն չկիրառել` սահմանելով փորձաշրջան:
Իր վերաքննիչ բողոքը պաշտպան Կ.Քամալյանը մասնավորապես պատճառաբանել է հետևյալով:
«(...)Գտնում եմ, որ դատարանի սույն դատավճիռը անհիմն է, թույլ է տրվել նյութական իրավունքի հիմնարար խախտումներ, որոնց արդյունքում խաթարվել է արդարադատության բուն էությունը և դատարանի կողմից պաշտպանյալիս արարքը սխալ որակելու, ինչպես նաև պատասխանատվությունը և պատիժը մեղմացնող հանգամանքները արժանվույն գնահատականի չարժանացնելու արդյունքում խախտվել է քրեաիրավական գրեթե բոլոր սկզբունքների պահանջները, այդ թվում պաշտպանյալիս նկատմամբ թեև դատարանը ճանաչելով որոշ պատասխանատվությունը և պատիժը մեղմացնող հանգամանքներ և անտեսելով մյուս մեղմացնող հանգամանքները, որոնք կազմում են գերակշռող մաս՝ դատապարաել է ազատազրկման տասներեք տարի ժամանակով, սակայն քրեական գործում առկա պատասխանատվությունը և պատիժը մեղմացնող մի շարք էական հանգամանքները հաշվի առնելու արդյունքում, անհրաժեշտ էր պաշտպանյալիս նկատմամբ սահմանել անհամեմատ ավելի մեղմ պատիժ։
Այսպես՝ մանրակրկիտ ուսումնասիրելով քրեական գործով ինչպես նախաքննությամբ, այնպես էլ դատաքննությամբ ձեռք բերված ու դատաքննությամբ հետազոտված ապացույցները հանգել եմ այն հետևության, որ պաշտպանյալիս առաջադրված մեղադրանքր ՀՀ քր. օր-ի 266 հոդվածի 3-րդ մասով անհիմն է և նրա նկատմամբ պետք է դադարեցվի քրեական հետապնդումը ՀՀ քրեական օրենսգրքի 266 հոդվածի 3-րդ մասով, որը ենթակա է վերաորակման ՀՀ քրեական օրենսգրքի 34- 38-268-րդ հոդվածի 3-րդ մասով, որպես թմրամիջոցը տեղափոխելուն օժանդակելու փորձ։ Քրեական գործի ողջ քննության ընթացքում ավելի քան հիմնավորված է, որ գործով չպարզված հանգամանքներում Հասան Աբդոյի Ալ Շահերը ՀՀ-ից ցանկանալով իր վարձակալած բնակարանում պահվող թմրամիջոցը տեղափոխել Թուրքիա, դիմում է իմ պաշտպանյալ Ֆիրազ Մալեկ վեհբեի օգնությանը, որն էլ իր հերթին դիմում է Մալեկ Աբասի Ղարիբին, առաջարկում է դրանք տեղափոխել Թուրքիա և դա հանձնել արդեն Թուրքիա գտնվելու ժամանակ այն անձին ում որ ինքր կասի լրացուցիչ։ Ակնառու է, որ այդ անձը նույն Հասան Աբդոյի Ալ Շահերն է, քանի որ նախ թմրամիջոցը ինքն է տեղավորել ճամպրուկի մեջ Երևանում, ինքն է պաշտպանյալիս առաջարկել դրանք տեղափոխել Թուրքիա, նա է պաշտպանյալիցս պահանջել, որ Մալեկ Ղարիբը չպետք է չճանաչի իրեն և այդ հաշվով արել է ամեն ինչ, որ թմրամիջոց տեղափոխողը իրեն չճանաչի և այդ նկատառումով՝ հեռվից պաշտպանյալիս ու Մալեկի հանդիպման ժամանակ թաքստոցից տեսել Մալեկին, նրան դեմքով ճանաչելու և վերջինիս գործողությունները Երևանից մինչև Թուրքիա վերահսկելու համար, ինչպես ինքնաթիռում, այնպես էլ այնուհետև Թուրքիայում իր թմրամիջոցը նրանից ապահով ստանալու նպատակով։ Հարց է առաջանում, թե ինչու Հասան Ալ Շահերը անձամբ չի տեղափոխել թմրամիջոցը, այլ դիմել է պաշտպանյալիս, որն էլ իր հերթին Մալեկ Ղարիբի օգնությանը և նրանից նախապես թաքցվել է, թե Թուրքիայում ում պիտի տար թմրամիջոցը։ Փաստ է, որ այդ ամենը կատարվել է այդ ձևով Հասանի անվտանգության նկատառումներից ելնելով, որպեսզի Մալեկ Ղարիբի կողմից թմրամիջոցները ՀՀ-ի սահմանի վրայով անցկացնելու ժամանակ նրան ՀՀ իրավապահ մարմինների կողմից հայտնաբերելու դեպքում՝ նա մնա անպատիժ և հեռու քրեական պատասխանատվությունից ու պատժից։ Իսկ եթե հանկարծ հանցագործությունը բացահայտվեր՝ Մալեկ Ղարիբը բնականաբար չէր կարող իր անունը տալ, քանի որ իրեն չէր ճանաչում։
Հարգելի ՀՀ Քրեական վերաքննիչ դատարան այսքանով հանդերձ ակնառու է, որ պաշտպանյալիս արարքը այս պայմաններում թողնելը որակված մնալը ՀՀ քր. օր-ի 266 հոդվածի 3-րդ մասով որքանով տարօրինակ, այնքանով էլ անհասկանալի է։
Արարքի այս որակումը չունի որևէ գիտական հիմնավորում և միանշանակ ենթակա է վերաորակման։
Իսկ անկախ ամեն ինչից խնդրում եմ պատիժ նշանակելիս հաշվի առնել պաշտպանյալիս նկատմամբ առկա պատասխանատվությունը և պատիժը մեղմացնող ներքոհիշյալ հանգամանքները, որոնցից դատարանը ճանաչեց միայն այն, որ պաշտպանյալս բնութագրվում է դրականորեն, վատառողջ է, խնամքին ունի վատառողջ ծնողներ, նախաքննության ընթացքում տվել է ինքնախոստովանական ցուցմունքներ, որոնք պնդել է հանցակիցներին առերես։ Այս հանգամանքները, որպես այդպիսին իրենց համակցության մեջ ենթակա էին ճանաչման որպես բացառիկ և մեղմ պատիժ սահմանելու հիմք հանդիսանային, սակայն դատարանը արժանվույն չգնահատելով դրանք պատիժ նշանակեց տասներեք տարի ժամկետով ազատազրկումը։ Դատարանը անտեսեց նաև ներքոհիշյալ պատասխանատվությունը և պատիժը մեղմացնող հանգամանքները, որոնք ևս մեղմ պատժի գրավական էին հանդիսանում և որոնք նույնպես ենթակա էին դատարանի կողմից հաշվի առնման մեղմ պատիժ սահմանելու համար, որոնք ՀՀ Քրեական Վերաքննիչ դատարանի ուշադրությանն ու համապատասխան գնահատականին եմ արժանացնում պատիժ սահմանելիս(...):
(...)Հարգելի ՀՀ Քրեակաև վերաքննիչ դատարան անտեսվել է նաև, որ պաշտպանյալս ողջ կյանքի ընթացքում իրեն որևէ հակահասարակական, անվայել արարք թույլ չի տվել։ Ավարտելով դպրոցը ծառայել է բանակում, ստացել է բարձրագույն կրթություն, լիովին գիտակցել է կատարածը, կամովին քավել է մեղքը, որով և լիովին դադարել է հասարակության համար վտանգավոր լինելուց։ Ինչ որ տեղ խնդրում եմ պատիժ նշանակելուց հաշվի առնել նաև, որ ՀՀ-ում ոչ մի կերպ թմրամիջոց չէր իրացվում և այն ընդհամենը տեղափոխվում էր Թուրքիա։
Պաշտպանյալիս հաջորդ պատասխանատվությանը և պատիժը մեղմացնող հանգամանքը, որը հարգելի դատարանի ուշադրությանն ու համապատասխան գնահատականին եմ արժանացնում այն է, որ նա արարքը կատարել է հանգամանքների պատահական բերումով:
Այս ամենը առկա են քրեական գործում դեռևս նախաքննությունից, որոնք անտեսվել են դատարանի կողմից, որոնք և հարգելի ՀՀ Քրեական վերաքննիչ դատարանի ուշադրությանն ու համապատասխան գնահատականի եմ արժանացնում պատիժ նշանակելիս։
Այսինքն պատասխանատվությունը և պատիժը մեղմացնող հանգամանքները նախատեսված ՀՀ քր. օր-ի 62 հոդվածի առաջին մասի 4-րդ և 9-րդ կետերով, ինչպես նաև պատասխանատվությունը և պատիժը մեղմացնող բազմաթիվ հանգամանքներ, որոնք ենթակա են հաշվի առնման ՀՀ քր. օր-ի 62 հոդվածի 2-րդ մասով, իսկ պատասխանատվությունը և պատիժը գեթ մեկ խստացնող հանգամանք չկա քրեական գործում(...):
(...)Վերոգրյալ իրավադրութների, դրանց վերլուծության արդյունքում հիշատակված դատողությունների և ՀՀ վճռաբեկ դատարանի արտահայտած իրավական դիրքորոշումների լույսի ներքո գնահատելով ամբաստանյալի կատարած հանցագործություններից յուրաքանչյուրի բնույթն ու վտանգավորության աստիճանը, դրանց կատարմանը նպաստած պայմանները, դրսևորման ու կատարման կոնկրետ հանգամանքները և վնասի բացակայությունը, ամբաստանյալի դրսևորած հետհանցավոր վարքագիծը, խախտված հասարակական հարաբերությունների սոցիալական նշանակությունը և այդ ոլորտներում պետության քրեական քաղաքականության ուղղվածությունը, դրանք համադրելով ամբաստանյալի պատասխանատվությունն ու պատիժը մեղմացնող հանգամանքների, նրա անձի բնութագրի, պատասխանատվությունն ու պատիժը ծանրացնող հանգամանքների բացակայության փաստի հետ, միջնորդում եմ պաշտպանյալիս նկատմամբ սահմանել անհամեմատ մեղմ պատիժ, քան սահմանել է ընդհանուր իրավասության դատարանը(...):
(...)Վերոգրյալ իրավադրութների, դրանց վերլուծության արդյունքում հիշատակված դատողությունների և ՀՀ վճռաբեկ դատարանի արտահայտած իրավական դիրքորոշումների լույսի ներքո գնահատելով ամբաստանյալի կատարած հանցագործություններից յուրաքանչյուրի բնույթն ու վտանգավորության աստիճանը, դրանց կատարմանը նպաստած պայմանները, դրսևորման ու կատարման կոնկրետ հանգամանքները և վնասի բացակայությունը, ամբաստանյալի դրսևորած հետհանցավոր վարքագիծը, խախտված հասարակական հարաբերությունների սոցիալական նշանակությունը և այդ ոլորտներում պետության քրեական քաղաքականության ուղղվածությունը, դրանք համադրելով ամբաստանյալի պատասխանատվությունն ու պատիժը մեղմացնող հանգամանքների, նրա անձի բնութագրի, պատասխանատվությունն ու պատիժը ծանրացնող հանգամանքների բացակայության փաստի հետ, միջնորդում եմ պաշտպանյալիս նկատմամբ սահմանել անհամեմատ ավելի մեղմ պատիժ, քան սահմանել է ընդհանուր իրավասության դատարանը։
Իսկ անդրադառնալով պաշտպանյալիս նկատմամբ նշանակվող պատիժը նրա կողմից կրելու նպատակահարմարության հարցին գանում և դատարանի ուշադրությունը հրավիրում եմ հետևյալի վրա.
ՀՀ քրեական օրենսգրքի 70-րդ հոդվածի 1-ին մասի համաձայն «Եթե դատարանը, կալանքի, ազատազրկման կամ կարգապահական գումարտակում պահելու ձևով պատիժ նշանակելով, հանգում է հետևության, որ դատապարտյալի ուղղվելը հնարավոր է առանց պատիժը կրելու, ապա կարող է որոշում կայացնել այդ պատիժը պայմանականորեն չկիրառելու մասին»։ Նույն հոդվածի 2-րդ մասի համաձայն «Պատիժը պայմանականորեն չկիրառելիս դատարանը հաշվի է առնում հանցավորի անձը բնութագրող տվյալներր, պատասխանատվությունն ու պատիժը մեղմացնող և ծանրացնող հանգամանքները»։
ՀՀ քրեական օրենսգրքի 70-րդ հոդվածի կիրառման կապակցությամբ ՀՀ վճռաբեկ դատարանն իրավական դիրքորոշում է արտահայտել Հ. Բաղդասարյանի վերաբերյալ որոշման մեջ, համաձայն որի. «/.../պատիժը կարող է պայմանականորեն չկիրառվել, եթե առկա է դատարանի համոզվածությունը, վստահությունն առանց իրական պատիժ նշանակելու ամբաստանյալի ուղղվելու հնարավորության մասին։
Դատարանը նման հետևության հանգում է միայն օբյեկտիվ գոյություն ունեցող տվյալների վերլուծության հիման վրա, որոնք բնութագրում են արարքը, հանցավորի անձը և վկայում են պատիժը պայմանականորեն չկիրառելու հիմքերի առկայության մասին /.../» /տես Հուսիկ Բաղդասարյանի վերաբերյալ գործով Վճռաբեկ դատարանի 2008թ. նոյեմբերի 28-ի թիվ ԱՎԴ2/0059/01/08 որոշումը/։ Նմանօրինակ դիրքորոշում Վճռաբեկ դատարանն արտահայտել է նաև ՎԲ-50/07, ՎԲ-192/07, ՎԲ-01/08 ն մի շարք այլ որոշումներում(...)»:
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճռի դեմ վերաքննիչ բողոք է բերել պաշտպան Հ.Իսրաելյանը` միջնորդելով բեկանել, փոփոխել այն և իր պաշտպանյալ Մալեկ Աբաս Գարիբիին արդարացնել, եթե դատարանը գտնի որ մեղքը հիմնավորված է, պատժի մասով բեկանել և փոփոխել այն` նշանակելով հնարավորինս մեղմ պատիժ:
Իր վերաքննիչ բողոքը պաշտպան Հ.Իսրաելյանը մասնավորապես պատճառաբանել է հետևյալով:
«(...)03.12.15թ. Կենտրոն և Նորք Մարաշ վարչական շրջանների ընդհանուր իրավասության առաջին ատյանի դատարանի դատավճռի համաձայն ,,Ամբաստանյալ Մալեկ Աբաս Գարիբին (MALEK ABAS GARIB) մեղավոր ճանաչել ՀՀ քրեական օրենսգրքի 34-215-րդ հոդվածի 2-րդ մասով և 266-րդ հոդվածի 3-րդ մասի 2-րդ կետով նախատեսված հանցանքներում և դատապարտել.
1/ ՀՀ քրեական օրենսգրքի 34-215-րդ հոդվածի 2-րդ մասով` ազատազրկման 5 /հինգ/ տարի ժամկետով՝ առանց գույքի բռնագրավման,
2/ ՀՀ քրեական օրենսգրքի 266-րդ հոդվածի 3-րդ մասի 2-րդ կետով՝ ազատազրկման 11 /տասնմեկ/ տարի ժամկետով՝ գույքի կեսի բռնագրավմամբ, սակայն ոչ ավելի 1.500 Եվրոյին համարժեք ՀՀ դրամ գումարից։
ՀՀ քրեական օրենսգրքի 66-րդ հոդվածի 4-րդ մասով սահմանված՝ պատիժների մասնակի գումարման սկզբունքի կիրառմամբ՝ ամբաստանյալ Մալեկ Աբաս Գարիբի (MALEK ABAS GARIB) նկատմամբ վերջնական պատիժ նշանակել ազատազրկում 15 /տասնհինգ/ տարի ժամկետով՝ գույքի կեսի բռնագրավմամբ, սակայն ոչ ավելի 1.500 Եվրոյին համարժեք ՀՀ դրամ գումարից։ Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, պատժի կրման սկիզբը հաշվելով 2015թ. փետրվարի 12-ից։
Խափանման միջոց կալանավորումը թողնել անփոփոխ՝ մինչև դատավճռի օրինական ուժի մեջ մտնելր,,։
Գտնում եմ, որ դատավճիռը պատճառաբանված և հիմնավորված չէ։ Դատական ակտը կայացվել է նյութական և դատավարական իրավունքի խախտումներով։
Մասնավորապես պաշտպանյալս հայտնել է, որ տեղեկություն չի ունեցել ուղեբեռի պարունակության մասին, բացի այդ կարծում եմ այլ ապացույցներ չկան պաշտպանյալիս մեղքը հիմնավորող։
Գտնում եմ, որ պատժի մասով նույնպես դատական ակտը պատճառաբանված և հիմնավորված չէ(...)»:
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճռի դեմ վերաքննիչ բողոք է բերել պաշտպան Հ.Ճարոյանը` միջնորդելով բեկանել այն և իր պաշտպանյալ Հասան Աբդո Ալ-Շաերին ճանաչել անպարտ և արդարացնել:
Իր վերաքննիչ բողոքը պաշտպան Հ.Ճարոյանը մասնավորապես պատճառաբանել է հետևյալով:
«(...)Հասան Ալ Շահերիին մեղադրանք է առաջադրվել ՀՀ քրեական օրենսգրքի 38-34-215-րդ հոդվածի 2-րդ մասով և 266-րդ հոդվածի 3-րդ մասի 2-րդ կետով։
Նախ նկատենք, որ Հասան Աբդո Ալ-Շաերիին առաջադրված մեղադրանքի հիմքում դրված է գոր¬ծով ամբաստանյալ Ֆիրազ Մալեկ Վեհբեիի կողմից նախաքննության ընթացքում տրված ցուցմունքները, ով հրաժարվեց դատաքննության ընթացքում ցուցմունք տալ և պատասխանել իմ հարցերին, որից էլ հետևում է, որ նա վախենում էր, որ դատաքննության ընթացքում, եթե պատասխանի իմ հարցերին, ապա կբացահայտվի ճշմարտությունը, այն է՝ կապացուցվի, որ նախաքննության ընթացքում Ֆիրազ Մալեկ Վեհբեիին Հասան Աբդո Ալ-Շաերիի վերաբերյալ տվել է ակնհայտ սուտ ցուցմունքներ։
Նկատենք նաև, որ նախաքննության ընթացքում Հասան Աբդո Ալ-Շաերիի ցուցմունք չի տվել իմ խորհրդով՝ ցանկացած գործով իմ պաշտպանյալներին ես խորհուրդ եմ տալիս ցուցմունք տալ դատարա¬նում, որը և կատարվել է (...):
(...)Նախաքննական մարմինը չի հստակեցրել, թե Հասան Աբդո Ալ-Շաերիի թմրամիջոցի մաքսանենգություն կատարելու դեպքում ի՞նչ կարգավիճակում (կատարողի, կազմակերպիչի, դրդիչի, օժանդակո¬ղի) է հանդես եկել։
Քանի որ թմրանյութը Հայաստանից Թուրքիա ցանկացել է տեղափոխել Մալեկ Աբասի Ղարիբիին, ապա նշված փաստից հետևում է, որ Հասան Աբղո Ալ-Շահերիի թմրանյութի մաքսանենգության մեջ կատարող չի հանդիսացել կատարողը հանդիսացել է Մալեկ Աբասի Ղարիբիին։
Քանի որ թմրանյութը Հայաստանից Թուրքիա տեղափոխելու առաջարկը Մալեկ Աբասի Ղարիբիին կատարել, նշված հանցագործությունը կատարելու համար նրա հյուրանոցի և ավիատոմսերի ծախ¬սերը հոգացել, թմրանյութը Հայաստանից Թուրքիա տեղափոխելու համար նրան 2.500 Եվրո գումար խոստացել և այդ գումարից 1.500 Եվրո գումար կանխավճարը տվել է Ֆիրազ Մալեկ Վեհբեին, ապա նշված փաստերից հետևում է, որ Հասան Աբդո Ալ-Շաերին թմրանաւթի մաթսանենգության մեջ կազմակերպիչ և/կամ դրդիչ չի հանդսացել, կազմակերպիչը և դրդիչը հանդիսացել է Մալեկ Աբասի Ղարիբիին։
Քանի որ թմրանյութը Հայաստանից Թուրքիա տեղափոխելու համար Մալեկ Աբասի Ղարիբիին օգնել է Ֆիրազ Մալեկ Վեհբեին՝ նրան է հանձնել իր ճամպրուկը և հոգացել է ավիատոմսերի ծախսերը ապա նշված փաստերից հետևում է, որ Հասան Աբդո Ալ-Շաերին թմրանյութի մաքսանենգության մեջ օժանդակող չի հանդիսացել օժանդակողը հանդիսացել է Մալեկ Աբասի Ղարիբիին։
Քանի որ Հասան Աբդո Ալ-Շաերին Հայաստանի մաքսային սահմանով չի փորձել Թուրքիա թմրա¬նյութ տեղափոխել, Մալեկ Աբասի Ղարիբիի կողմից Հայաստանի մաքսայիև սահմանով Թուրքիա թմրանյութ տեղափոխելու գործում որպես կատարող, կազմակերպիչ, դրդիչ և օժաևդակող հանդես չի եկել, ապա նշված փաստերից հետևում է, որ Հասան Աբդո Ալ-Շահերին ՀՀ քրեական օրենսգրքի 38-34-215-րդ հոդվածի 2-րդ մասով ակնհայտ անհիմև մեղադրանք է առաջադրվել(...):
(...)«Իրավական ակտերի մասին» ՀՀ օրենքի 86-րդ հոդվածի 1-ին մասի համաձայն՝ «Իրավական ակտը մեկնաբանվում է դրանում պարունակվող բառերի և արտահայտությունների տառացի նշանակու¬թյամբ՝ հաշվի առնելով օրենքի պահանջները:
Հայկական օնլայն բառարանի համաձայև՝ «Իրացնել - 1. Իրականացնել, իրողություն դարձնել, կենսագործել, գործի վերածել, 2. վաճառել փողի վեր ածել: Իրացնել ապրանքներ։ 3. Յուրացնել, օգ¬տագործելի դարձնել։ Իրացնել խոպանը։ 4. Գործադրել, կիրառել»։
Հայոց լեզվի բացատրական բառարանի համաձայն՝ «Իրացնել - 2. Տես՝ Վաճառել, Վաճառել - 1. Ծախել, վաճառահանել, առևտուր անել, վաճառքի հանել (վաճառք կատարել)»։
Քանի որ գործում չկա որևէ ապացույց, որ Հասան Աբդո Ալ-Շաերին իրացնելու (վաճառելու) նպատակով ձեռք է բերել, պահել, փոխադրել կամ առաքել թմրանյութ, ինչպես նաև չկա որևէ ապա¬ցույց, որ իրացրել (վաճառել) է թմրանյութ, ապա նշված փաստերից հետևում է, որ Հասան Աբդո Ալ-Շահերին ՀՀ քրեական օրենսգրքի 266-րդ հողվածի 3-րդ մասի 2-րդ կետով ակնհայտ անհիմն մեղադրանք է առաջադրվել(...):
(...)Գործով Նախաքննական մարմինը և Դատարանը խախտել են ՀՀ քրեական դատավարության օրենսգրքի 17-րդ (3-րդ և 4-րդ մասեր) հոդվածի պահանջները՝ Գործով բազմակողմանի, լրիվ և օբյեկ¬տիվ քննություն չեն իրականացրել, մեղադրյալ Հասան Աբդո Ալ-Շաենի և նրա պաշտպանի (իմ) հայտա¬րարությունները Հասան Աբդո Ալ-Շաենի անմեղության վերաբերյալ չեն ստուգել։
ՀՀ քրեական դատավարության օրենսգրքի 106-րդ հոդվածի 2-րդ մասի համաձայն՝ «Ապացույցի թույլատրելիությունը հիմնավորելու պարտականությունն ընկած է այն ձեռք բերող կողմի վրա։ Եթե ապացույցը ձեռք բերելիս պահպանվել են սույն օրենսգրքի բոլոր պահանջները, ապացույցի անթույլա¬տրելիությունը հիմնավորելու պարտականությունը կրում է դրա թույլատրելիությունը վիճարկող կողմը»։
Դատարանը խախտել է ՀՀ քրեական դատավարության օրենսգրքի 106-րդ (2-րդ մաս) հոդվածի պահանջները, Գործով մեղադրողից չի պահանջել հիմնավորել Վերաքննիչ բողոքի 4.29 և 4.31 կետերում նշված փաստերը, դրանք ճանաչել է ապացույց և դրանց միջոցով է հիմնավորել Հասան Աբդո Ալ-Շաենին առաջադրված մեղադրանքը՝ կայացրել Դատավճիռը(...):
(...)Վերաքննիչ բողոքում ներկայացված փաստերից և դրանց հիման վրա կատարված մեկնաբանություններից հետևում է, որ Դատարանը խախտել է ՀՀ քրեական դատավարության օրենսգրքի 124-րդ (1-ին մաս), 126-րդ և 127-րդ (1-ին մաս) հոդվածների պահանջները՝ Գործով ձեռք բերված ապացույցները բազմակողմանի և օբյեկտիվ ստուգման չի ենթարկել, ապացույցները չի վերլուծել և այլ ապացույցների հետ չի համադրել, ապացույցները վերաբերելիության, թույլատրելիության, իսկ ամբողջ ապացույցներն իրենց համակցությամբ՝ գործի լուծման համար բավարարության տեսանկյունից չի գնահատել (...)»:
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճռի դեմ նույնաբովանդակ վերաքննիչ բողոքներ են բերել նաև ամբաստանյալներ Հասան Աբդո Ալ-Շաերինին, Մալեկ Աբաս Գարիբին և հայտնելով, որ համաձայն չեն դատարանի դատավճռի հետ` միջնորդել են վերանայել այն:
Վերաքննիչ դատարանի դատաքննության ընթացքում պաշտպաններ Կ.Քամալյանը, Ա.Հոբոսյանը, ամբաստանյալներ Հասան Աբդո Ալ-Շաերին, Մալեկ Աբաս Գարիբին և Ֆիրաս Մալեկ Վեհբեին ներկայացված վերաքննիչ բողոքները նույն հիմքերով ու հիմնավորումներով պնդեցին, մեղադրող Ա.Կոստանդյանը բողոքի դեմ առարկելով` միջնորդեց առաջին ատյանի դատարանի դատավճիռը թողնել անփոփոխ:

Վերաքննիչ դատարանի պատճառաբանություններն ու եզրահանգումները
Ստուգելով գործի փաստական հանգամանքների բացահայտման ու քրեական օրենքի կիրառման ճշտությունը, ինչպես նաև գործը քննելիս և լուծելիս քրեադատավարական օրենքի նորմերի պահպանումը, վերաքննիչ բողոքում նշված հիմքերի սահմաններում վերլուծելով քրեական գործի նյութերը, դատաքննության ընթացքում լսելով բողոքում ներկայացված իրենց հետևությունները հիմնավորելու մասին ամբաստանյալների և պաշտպանների պատճառաբանությունները, մեղադրողի առարկությունները, վերաքննիչ դատարանը հանգում է այն հետևության, որ Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճիռը պետք է թողնել անփոփոխ, իսկ ներկայացված վերաքննիչ բողոքները մերժել` հետևյալ պատճառաբանությամբ:
Ֆիրաս Մալեկ Վեհբեին նախաքննության ընթացքում ցուցմունքներ է տվել այն մասին, որ առաջադրված մեղադրանքում իրեն մեղավոր է ճանաչում։ Զբաղվել է ավտոմեքենաների վաճառքով, մասնավորապես` եվրոպական երեկրներից գնել է ավտոմեքենաներ և դրանք վաճառել է Ադրբեջանում և Սիրիայում։ Ավտոմեքենաները նախատեսված են եղել բարձրաստիճան պաշտոնյաների համար, քանի որ եղել են զրահապատ։ Այդ գործունեությամբ զբաղվելու ժամանակ 2014 թվականի կեսերին Սոֆիայում ավտոմեքենաների աքսեսուարների խանութում ծանոթացել է Մալեկ Գարիբի հետ։ Մալեկն ազգությամբ արաբ է, շուրջ 20 տարի առաջ տեղափոխվել է Բուլղարիա` մշտական բնակության։ Նրա օգնությամբ այցելել է տարբեր վայրեր։
Ավտոմեքենաների վաճառքով զբաղվելու ժամանակ ծանոթացել է ազգությամբ թուրք անձանց հետ։ Վերջիններս նույնպես զբաղվել են նույն գործունեությամբ։ Եվրոպայից գնված ավտոմեքենաներն ուղարկվել են Թուրքիայի Մերսի քաղաքի նավահանգիստ, որի հետ կապված հաճախակի մեկնել է Մերսի քաղաք։ Նշված քաղաքում վարձակալել է բնակարան և այնտեղ գտնվելիս բնակվել է վարձակալած բնակարանում։ Լիբանանցի ընկեր Ալիի միջոցով ծանոթացել է ազգությամբ թուրք Մոհամեդի հետ և քանի որ Թուրքիայում ընկերներ չի ունեցել` շփվել է նրա հետ։
Թուրքիայում գտնվելու ժամանակ, այդտեղի դիսկոտեկներից մեկում իրեն «կոկաին» տեսակի թմրամիջոց են հյուրասիրել, որն ինքը գործածել է։ Ստամբուլում գտնվելու ժամանակ Մալեկը զանգահարել է իրեն, հայտնել, որ ցանկանում է ժամանել Թուրքիա` ավտոմեքենաների գործով և 2015 թվականի հունվարին եկել Ստամբուլ։ Այդտեղ որոշել են միասին մեկնել Թբիլիսի` զբոսաշրջության: Ինքնաթիռով ժամանել են Թբիլիսի, որտեղ երկու օր են անցկացրել, որից հետո զբոսնելու նպատակով որոշել են ժամանել Երևան։ Տաքսի ավտոմեքենայով եկել են Երևան և տեղավորվել «Շիրակ» հյուրանոցում։ Երևանում երկու օր զբոսնելուց հետո Մալեկը մեկնել է Ստամբուլ։ Հաջորդ օրն ինքը նույնպես մեկնել է Ստամբուլ։ Մինչ Երևան ժամանելը` իր ընտանիքի ծանոթ, ազգությամբ հայ Զավենի հետ շփվելու ժամանակ տեղեկացել է, որ վերջինս պատրաստվում է գալ Երևան` անձնագիր ստանալու համար։ Այդ պատճառով մեկ օր ավել է մնացել Երևանում` նրան սպասելու համար, սակայն տեղեկանալով, որ Զավենն ավելի ուշ է ժամանելու` ինքը մեկնել է։
Ստամբուլ քաղաքից մեկնել է Կիպրոս` Զավենի մոտ։ Այդտեղ տեղեկացել է, որ Զավենը մոտակա ժամանակ պատրաստվում է մեկնել Երևան, որից հետո ինքը վերադարձել է Ստամբուլ։ Այնուհետև տեղեկանալով, որ Զավենը լինելու է Երևանում փետրվարի 7-ին կամ 8-ին` որոշել է ժամանել Երևան։ Ստամբուլում ինքը Մուհամեդին հայտնել է, որ պատրաստվում է մեկնել Երևան, որի ժամանակ վերջինս հայտնել է, որ երբ լինի Երևանում` ինքը կզանգի։
2015 թվականի փետրվարի 9-ին ժամանել է Երևան և զանգահարել է Զավենին։ Նրանից ճշտել է գտնվելու վայրը և գնացել նրա բնակարան։
Երևանում գտնվելու ժամանակ Մուհամեդը զանգահարել է իրեն և հայտնել, որ ընկերը` Հասանը, գտնվում է Երևանում և բնակարանում ունի «կոկաին» տեսակի թմրամիջոց։ Նույն օրը կրկին զանգել է Մուհամեդը և ասել, որ եթե այդ թմրամիջոցը կարողանա տեղափոխել կամ ուղարկել Ստամբուլ, ապա դրանից որոշ քանակություն կտա իրեն, ինչպես նաև կհոգա բոլոր ծախսերը։
Ինքը շահագրգռված լինելով այդ առաջարկից` Մալեկին ասել է, որ թմրամիջոցը տեղափոխի Թուրքիա։ Դրա համար առաջարկել է 2.500 Եվրո գումար և խոստացել է կատարել բոլոր անհրաժեշտ ծախսերը` հայտնելով, որ դա իրագործելու համար անհարժեշտ է ժամանել Երևան։
Հաջորդ օրը Մուհամեդը զանգել է իրեն և հայտնել, որ անհրաժեշտ է հանդիպել Հասանի հետ։ Նույն օրը գնացել է «Մարիոթ» հյուրանոցի մոտ, հանդիպել է Մաուհամեդի ընկեր Հասանին, ում նախկինում չի ճանաչել։
Հասանն ասել է, որ ինքը Մուհամեդի մարդն է, ում հետ պետք է հանդիպել։ Հանդիպումից հետո միասին գնացել են Հասանի բնակարան։ Բնակարանում, մահճակալի վրա նկատել է թմրամիջոցը, վակումային սարքը և պոլիէթիլենային տոպրակները։ Որոշ ժամանակ բնակարանում մնալուց հետո գնացել են մոտակա ռեստորան` ճաշելու։ Այդտեղ իրենց է միացել նաև իր ընկեր Զավենը։ Քանի որ ատամը ցավել է` խնդրել է Զավենին ատամի ցավը հանգստացնող դեղ բերել։
Ռեստորանում ճաշելուց հետո միասին գնացել են «Շանգրիլա» խաղատուն։ Խաղատանը Հասանի հետ փոխանակվել են հեռախոսահամարներով։ Մինչև լուսադեմ ինքը և Զավենը միասին մնացել են խաղատանը, իսկ Հասանը միայնակ վերադարձել է տուն։
2015 թվականի փետրվարի 11-ի առավոտյան Մալեկը զանգահարել է իրեն և հայտնել, որ ժամանել է Երևան և գտնվում է «Շիրակ» հյուրանոցում։ Մինչև ժամանելը` ինքը Մալեկին տեղեկացրել է, որ իր ճամպրուկը, որը թողել է նրա մոտ` իր հետ բերի Հայաստան։ Զավենին և Վարդանին խնդրել է մինչև ատամնաբուժարան գնալը, իրեն տանել «Շիրակ» հյուրանոց։ Հասնելով «Շիրակ» հյուրանոց` միայնակ բարձրացել և հանդիպել է Մալեկի հետ։
Պայմանավորվածության համաձայն` հանդիպման ժամանակ Մալեկին փոխանցել է խոստացված 2.500 Եվրոյից` 1.500 Եվրո գումար, ինչպես նաև 200.000 ՀՀ դրամ գումար` հյուրանոցի ծախսերի և Երևան-Ստամբուլ չվերթի 2015 թվականի փետրվարի 12-ի ավիատոմսը գնելու համար։ Այդ ժամանակ նրան ասել է նաև, որ Ստամբուլ մեկնելը հետաձգվում է հաջորդ օրը, որի մասին լրացուցիչ կտեղեկացնի։ Մուհամեդն իրեն տեղեկացրել է նաև, որ ծախսերի համար հետագայում կվճարի։ Նույն օրը Հասանի հետ գնացել է նրա բնակարան, որտեղ Հասանը հայտնել է, որ «կոկաին» տեսակի թմրամիջոցը տեղադրելու համար հարմար ճամպրուկ չունի և իրեն ճամպրուկ է անհրաժեշտ։ Ինքը «Շիրակ» հյուրանոցում գտնվող Մալեկ Գարիբից վերցրել է ճամպրուկը և տեղափոխելով բնակարան` տվել է Հասանին։ Տեսնելով, որ ճամպրուկի հետնապատը թափանցիկ է, Հասանն ասել է, որ դա փակելու համար անհարժեշտ է գնել պատճենահանման թղթեր, որպեսզի ճամպրուկի ներսից թմրամիջոցը չթափանցի։ Ինքը մնացել է բնակարանում, իսկ Հասանը մոտակա գրախանութից գնել է պատճենահանման թղթեր և բերել բնակարան։ Այդտեղ պատճենահանման թղթերը փակցրել է ճամպրուկի հետնապատին, որից հետո «կոկաին» տեսակի թմրամիջոցը տեղադրել է պոլիէթիլենային տոպրակներում և տեղադրել ճամպրուկի hետնամասում։ Դրանից հետո իրենք դուրս են եկել բնակարանից` թմրամիջոցով ճամպրուկը Մալեկին փոխանցելու համար։ Այդ ժամանակ Հասանն ասել է, որ ցանկանում է տեսնել այն անձին, ով պետք է թմրամիջոցը տեղափոխի Թուրքիա` ավելացնելով, որ չի ցանկանում, որպեսզի նա իրեն տեսնի, քանի որ պատրաստվում է նույն չվերթով մեկնել և եթե օդանավակայանում այդ անձը բռնվի` չասի, որ իրենք միասին են։
Նույն օրը, երեկոյան, ինքը թմրամիջոցներով ճամպրուկը տեղափոխել է «Շիրակ» հյուրանոցի մոտ և փոխանցել Մալեկին` հայտնելով, որ թմրամիջոցները թաքցված են ճամպրուկում։ Ճամպրուկը Մալեկին փոխանցելուց հետո ինքը շրջվել է` Հասանին տեսնելու համար, սակայն չնկատելով նրան` զանգահարել է և միասին գնացել են ճաշելու։ Ճաշելու ժամանակ Մուհամեդը հաճախակի զանգահարել է Հասանին։ Ինքը մտածել է, որ նրանք վաղեմի ծանոթներ են։
Բուլղարացի ընկերների միջոցով Մուհամեդը ճանաչում է նաև Մալեկին, սակայն տեղյակ չէ, թե կոնկրետ ում միջոցով։
Հասանի հետ զրույցի ընթացքում տեղեկացել է, որ նշված բնակարանը, որտեղ պահված է եղել թմրամիջոցը` 600 ԱՄՆ դոլարով երկարատև վարձակալված է եղել։
Ֆիրազ Վեհբեն իր ցուցմունքը պնդել է նաև Հասան Աբդո Ալ-Շաերի հետ` 2015 թվականի փետրվարի 14-ին և 2015 թվականի ապրիլի 15-ին կատարված առերես հարցաքննությունների ժամանակ։
Առաջին ատյանի դատարանում ամբաստանյալ Ֆիրաս Վեհբեն օգտվելով իր դատավարական իրավունքներից` հրաժարվել է ցուցմունք տալուց և հարցերին պատասխանելուց` հայտարարելով, որ ցուցմունքներ տալուց հրաժարվելը պայմանավորված չէ որևէ մեկից վախենալով։
Մալեկ Աբաս Գարիբին նախաքննության ընթացքում հարցաքննվելով որպես կասկածյալ, հայտնել է, որ Լիբանանում միջնակարգ դպրոցն ավարտելուց հետո տեղափոխվել է Բուլղարիա` մշտական բնակության։ Աշխատել է Սոֆիա քաղաքում, ավտոտեխսպասարկման կետում։ Ամուսնալուծված է, սակայն Դիմկա Անտոնովա Գարիբից ունի աղջիկ երեխա։ Սոֆիա քաղաքում բնակվել է միայնակ և վարձով։ Ստացված աշխատավարձն իրեն չի բավականացրել` կենցաղային պայմանները բարելավելու համար։
2014 թվականի կեսերին, Սոֆիայի «Նարգիլա Ստեյշոն» սրճարանում ծանոթացել է Ֆիրաս Վեհբեի հետ, որից հետո հաճախակի նշված սրճարան այցելելով` մտերմացել է նրա հետ։ Ֆիրասը նկատել է, որ ինքն ունի ֆինանսական խնդիրներ և 2015 թվականի հունվարին` հերթական հանդիպման ժամանակ իրեն առաջարկել է լրացուցիչ գումար վաստակելու համար թմրանյութ տեղափոխել Թուրքիայի Հանրապետության Ստամբուլ քաղաք։ Նա ասել է, որ այդ թմրանյութը պետք է վերցնել Երևանից և տեղափոխել Թուրքիա։ Նշված գործողությունը կատարելու համար Ֆիրասն իրեն առաջարկել է 2.500 Եվրո գումար և քանի որ ֆինանսկան խնդիրներ է ունեցել, նրա առաջարկին համաձայնել է։
Պայմանավորվածության համաձայն` 2015 թվականի փետրվարին Ֆիրասը զանգահարել է իրեն և հայտել, որ պետք է գա Երևան և տեղավորվի «Շիրակ» հյուրանոցում` ասելով, որ իր հետ բերի նաև մոտը թողնված ճամպրուկը։ Իր հագուստները տեղավորելով Ֆիրասի ճամպրուկում, 2015 թվականի փետրվարի 10-ին Սոֆիա-Վարշավա-Երևան չվերթով ժամանել է Երևան և տեղավորվել «Շիրակ» հյուրանոցում։ Նույն օրը Ֆիրասը զանգել է և տեղեկանալով, որ ինքն արդեն հասել է «Շիրակ» հյուրանոց, եկել է տեսակցելու։ Մինչ այդ ինքը Ֆիրասի հետ Երևանում եղել է 2015 թվականի հունվարին` 2-3 օրով, զբոսաշրջության նպատակով։ Իրենք Թբիլիսի քաղաքից միասին Երևան են ժամանել տաքսի ավտոմեքենայով և բնակվել «Շիրակ» հյուրանոցում, որից հետո ինքը մեկնել է Սոֆիա, իսկ մի քանի օր անց մեկնել է նաև Ֆիրասը։ Շիրակ հյուրանոցում Ֆիրասի հետ տեսակցելուց հետո` վերջինս իր ճամպրուկից վերցրել է մի քանի հագուստ և հայտնել, որ Ստամբուլ մեկնելը հետաձգվում է մինչև հաջորդ օրը։ Նա հյուրանոցի ծախսերը հոգալու և Երևան-Ստամբուլ չվերթի ավիատոմս գնելու համար իրեն տվել է 200.000 ՀՀ դրամ գումար, ինչպես նաև խոստացված 2.500 Եվրո գումարից 1.500 Եվրոն։ Այդ օրը զբոսնել է Երևանում և այլևս Ֆիրասին չի տեսել։
2015 թվականի փետրվարի 11-ին Ֆիրասը եկել է հյուրանոց, վերցրել է իր ճամպրուկը, որն ինքն առանց դատարկելու տվել է նրան։ Դրանից հետո, նույն օրը, Ֆիրասը զանգահարել է և ասել, որ անհրաժեշտ է գնել Երևան-Ստամբուլ չվերթի ավիատոմս` փետրվարի 12-ի ժամը 05։20-ի չվերթի համար։
Մոտակա ավիատոմսերի վաճառքի գրասենյակից գնել է նշված չվերթի համար ավիատոմսը և վերադարձել հյուրանոց։ Նույն օրը երեկոյան Ֆիրասը զանգահարել է և պայմանավորվել են հանդիպել «Շիրակ» հյուրանոցի հետևի մասում՝ թմրամիջոցներով ճամպրուկն իրեն փոխանցելու համար։
Երեկոյան ժամը 23-ի սահմաններում հյուրանոցի մոտակայքում, դեպի Կենտրոն գնացող հատվածում հանդիպել է Ֆիրասի հետ։ Այդտեղ Ֆիրասն իրեն փոխանցել է սև ճամպրուկը և ասել, որ թմրանյութը ճամպրուկի մեջ է, բայց թե ինչ քանակությամբ, ինչ տեսակի է և որտեղ է թաքցված` չի ասել։
Ֆիրասը հայտնել է, որ Ստամբուլ հասնելիս կզանգի և կհայտնի, թե ինչ պետք է անել ճամպրուկը։ Չբացելով ճամպրուկը, վերցրել և գնացել է հյուրանոցում գտնվող սրճարան, որտեղ սպասել է շուրջ մեկ ժամ և ժամը 24-ին դուրս գալով հյուրանոցից` պատահական տաքսի ավտոմեքենայով ուղևորվել է «Զվարթնոց» օդանավակայան։ Ֆիրասի կողմից ճամպրուկն իրեն փոխանցելու ժամանակ փողոցի մյուս մայթին այլ անձ չի նկատել։ Հասնելով օդանավակայան, շուրջ երկու ժամ նստել է «Լավազա» սրճարանում, այնուհետև հանձնել է ուղեբեռը։ Ստանալով ուղեբեռի և ինքնաթիռ նստելու կտրոնները, անցել է սպասասրահ։ Ժամը 04-ի սահմաններում իրեն են մոտեցել ՀՀ ԱԱԾ աշխատակիցները և ուղեկեցել առանձին աշխատասենյակ։ Այդտեղ աշխատակիցների հարցին պատասխանել է, որ ճամպրուկն իրենն է։ Աշխատասենյակում իր ներկայությամբ բացել են իր ճամպրուկը և զննել դրա պարունակությունը։ Ճամպրուկից հայտնաբերել են սև պոլիէթիլենային տոպրակում փաթեթավորված մեկ փաթեթ, որը բացելուց հետո պարզվել է, որ դրանում առկա է հինգ հատ սպիտակ կարծր պոլիէթիլենային թաղանթով փաթեթավորված փաթեթներ, որոնց մեջ եղել է սպիտակ ալյուրանման զանգված։ Իր ներկայությամբ այդ հինգ փաթեթները կշռվել են և կազմվել է համապատասխան արձանագրություն։
Ինքը նկատել է, որ ճամպրուկի հետնապատը, որում թաքցված են եղել թմարմիջոցները` պատված է եղել պատճենահանման սև թղթով։ Դրանից հետո աշխատակիցների կողմից ինքը բերման է ենթարկվել ՀՀ ԱԱԾ վարչական շենք։
Մալեկ Աբաս Գարիբն իր ցուցմունքը պնդել է նաև Ֆիրաս Վեհբեի հետ 2015 թվականի փետրվարի 13-ի առերես հարցաքննության ժամանակ։
Մալեկ Աբաս Գարիբը 2015 թվականի փետրվարի 13-ին և 2015 թվականի մարտի 24-ին որպես մեղադրյալ լրացուցիչ հարցաքննվելիս` ՀՀ քրեական օրենսգրքի 34-215-րդ հոդվածի 2-րդ մասով և 266-րդ հոդվածի 3-րդ մասի 2-րդ կետով առաջադրված մեղադրանքում իրեն մեղավոր է ճանաչել և պնդել է որպես կասկածյալ տված ցուցմունքը։
Մալեկ Աբաս Գարիբը 2015 թվականի մայիսի 20-ին որպես մեղադրյալ լրացուցիչ հարցաքննվելիս` ՀՀ քրեական օրենսգրքի 34-215-րդ հոդվածի 2-րդ մասով և 266-րդ հոդվածի 3-րդ մասի 2-րդ կետով առաջադրված մեղադրանքում իրեն մեղավոր չի ճանաչել և հայտնել է, որ ՀՀ է ժամանել Ֆիրասի կանչով` ավտոմեքենաների առուվաճառքով զբաղվելու համար։ Տեղյակ չի եղել, որ Ֆիրասը զբաղվում է թմրամիջոցների իրացմամբ։ Տեղյակ չի եղել նաև, որ ճամպրուկում թմրամիջոց է եղել, եթե այդ մասին իմանար` նման քայլ չէր անի։
Առաջին ատյանի դատարանում ամբաստանյալ Մալեկ Աբաս Գարիբը ցուցմունք է տվել այն մասին, որ թմրամիջոցի հետ երբևէ առնչություն չի ունեցել, այն չի կարող տարբերել ալյուրից։ Չի իմացել, որ ճամպրուկում թմրամիջոց է։ Ինքը Հայաստան է եկել ավտոմեքենաներ զննելու համար, քանի որ աշխատում է Ֆիրասի հետ և եկել է նրա կանչով։ Իր դեմ ցուցմունքներ է գրել` հույս ունենալով, որ բաց կթողնեն կալանքից։ Իրեն ասել են, որ «եթե ուզում ես քեզ օգնենք` ուրեմն մեր ասած ցուցմունքը տուր»։
Հայաստանից ավտոմեքենա երբևէ չի արտահանել, պետք է նոր սկսեր արտահանել։ Մինչ այդ Հայաստան եկել է որպես զբոսաշրջիկ։ Փողոցով քայլելիս նայել է ավտոմեքենաներին, հետաքրքրվել է ճապոնական ավտոմեքենաներով։ Գներից տեղյակ չէ։ Դա Ֆիրասի գործն է եղել։ Հայաստան եկել է նրա առաջարկով։
Ֆիրասը ճամպրուկը փոխանցել է «Շիրակ» հյուրանոցի մոտ` նախնական պայմանավորվածության համաձայն։ Երևանում ինքն ապրել է «Շիրակ» հյուրանոցում, իսկ թե որտեղ է ապրել Ֆիրասը` չգիտի։ ։
Ճամպրուկը եղել է Ֆիրասինը, որը նա Սոֆիայում թողել է իր մոտ։ Այդ պատճառով բերել է իր հետ։ Ցերեկվա ժամը 11-ի սահմաններում ճամպրուկը տվել է Ֆիրասին։ Հետո նա հրաժարվել է իր հետ Ստամբուլ գնալ և տվել է ճամպրուկը, որպեսզի ինքը տանի Ստամբուլ և որ գան վերցնեն։ Ֆիրասը տալով 1.500 Եվրո` իր պարտքն է վերադարձրել։ Ինքը մտածել է, որ եթե ասի թմրամիջոցի հետ առնչություն ունի` երկու ամսից բաց կթողնեն։ Ինքը դա մտածել-ենթադրել է, իրեն չեն ստիպել այդպես ասել։
Հասան Աբդո Ալ-Շաերը նախաքննության ընթացքում իրեն մեղավոր չի ճանաչել, հրաժարվել է առաջադրված մեղադրանքի էության վերաբերյալ ցուցմունքներ տալուց, սակայն 2015 թվականի մարտի 3-ին ցուցմունք է տվել այն մասին, որ 2015 թվականի փետրվարի 10-ին ժամանել է Երևան` Լիբանան-Աբու-Դաբի-Երևան չվերթով։ Հասնելով Երևանի «Զվարթնոց» օդանավակայան, «Աերոտաքսի» ավտոմեքենայով մեկնել է իր մոտ եղած` Երևանի Ամիրյան փողոցի թիվ 5 շենքի թիվ 7 բնակարան հասցեով։ Նշված հասցեն և բնակարանի բանալին իրեն փոխանցել է Լիաբանանում իրեն անծանոթ մարդ։ Հայաստան մեկնելուց շուրջ 2-3 օր առաջ, սրճարանում, երբ խոսելիս է եղել հեռախոսով, զրույցի ընթացքում ասել է, որ պատրաստվում է մեկնել Հայաստան։ Կողքի սեղանից իրեն անծանոթ մի մարդ մոտեցել և խնդրել է, որպեսզի իր կողմից Երևանում վարձակալած բնակարանի բանալին հանձնի սեփականատիրոջը, քանի որ պայմանագրի ժամկետը լրանում է և ավելացրել է, որ կարող է անձամբ մի քանի օր ապրել այդ բնակարանում։ Այդ անձն ասել է նաև, որ Երևանում գտնվելու ժամանակ իրեն կմոտենա իր ծանոթներից և բնակարանից ինչ-որ բան կվերցնի։ Ինքը համաձայնել է այդ անձի հետ, վերցրել է բնակարանի բանալին, իմացել շենքի մուտքի կոդը, որը եղել «2233» և ժամանել է Երևան։ «Զվարթնոց» օդանավակայանում նստել է տաքսի ավտոմեքենա և վարորդին ցույց է տվել «ք. Երևան, Ամիրյան 5 շենք, բն. 7» հասցեն` խնդրելով իրեն տանել այնտեղ։ Հասնելով շենքի մոտ, իր մոտ գտնվող բանալիով բացել է շենքի մուտքի դուռը, վարորդի հետ բարձրացել 3-րդ հարկ, կանգնել 7 բնակարանի մուտքի դիմաց։ Մի քանի անգամ փորձել է բացել բնակարանի դուռը, սակայն վարորդը տեսնելով, որ չի բացվում, թողել է իր հեռախոսահամարը և հեռացել։ Այդ պահին վերհիշել է, որ շենքի մուտքի դուռը պետք է լինի կոդով, ուստի դուրս է եկել այդ շենքից և մոտեցել մյուս շենքի մուտքին, որը եղել է կոդով։ Մուտքի դուռը բացել է, հավաքելով իր մոտ գտնվող կոդը, որից հետո բարձրացել է 3-րդ հարկի 7-րդ բնակարան։ Բնակարանի դուռը չկարողանալով բացել, զանգահարել է տաքսու վարորդին և խնդրել գտնել դուռ բացող մասնագետի, սակայն վարորդը հայտնել է, որ չի կարող գտնել։
Չկարողանալով բացել բնակարանի դուռը, գնացել է «Ռեփուբլիկա» հյուրանոց և գիշերել այնտեղ։ Հաջորդ օրը կեսօրին հյուրանոցի աշխատկիցների միջոցով գտել է դուռ բացող մասնագետի և ուղեկցել բնակարան։ Փականագործի օգնությամբ բացել է դուռը և մուտք գործել։ Այնուհետև դուրս է եկել բնակարանից և գնացել հյուրանոց` ապուր ուտելու։ Այդ ժամանակ «Վայբըր» («Viber») ծարգրի միջոցով զանգահարել է Լիբանանում բնակարանի բանալին իրեն փոխանցած անձը և ասել, որ իր ծանոթը, ով երկար մազերով է, գտնվում է «Մարիոթ» հյուրանոցի մոտ տեղակայված հեծանիվների մոտ։ Դուրս գալով հյուրանոցից, ոտքով գնացել է դեպի «Մարիոթ» հյուրանոց, որտեղ և նկատել է երկար մազերով մի անձի։ Մոտենալով նրան, հարցրել է, թե արդյո՞ք իրեն պետք է հանդիպեր։ Նա արաբերենով պատասխանել է` այո։ Դրանից հետո միասին գնացել են բնակարան, որտեղ ինքը մնացել է հյուրասենյակում, իսկ այդ անձը մտել է մեկ այլ սենյակ` տեսնելու, թե ինչ պետք է վերցնի։ Որոշ ժամանակ անց իրենք դուրս են եկել բնակարանից, որտեղ այդ մարդն ասել է, որ պետք է գնա և վերցնի իր ճամպրուկը` բնակարանում գտնվող իրերը հավաքելու համար։ Դուրս գալով շենքի մուտքից, իրենք բաժանվել են և ինքը գնացել է զբոսնելու։ Այդ ժամանակ Լիբանանից կրկին զանգել է բանալին փոխանցած անձը և ասել, որ այդ մարդը բնակարանի շենքի մուտքի մոտ սպասում է։ Ինքը գնացել է շենքի մոտ, որտեղ նկատել է այդ տղային` ձեռքին սև գույնի ճամպրուկ։ Միասին բարձրացել են բնակարան, սակայն այդ տղան հայտնել է, որ չի կարող հավաքել իրերը, քանի որ ատամը ցավում է։ Մի քանի րոպե անց դուրս են եկել բնակարանից և գնացել են ընթրելու, որի ժամանակ իրենց է մոտեցել այդ տղայի ծանոթը և որոշել են միասին գնալ «Շանգրիլա» խաղատուն։ Այնտեղ այդ տղան իրեն տվել է 200 ԱՄՆ դոլար։ Խաղալուց հետո փոխանակվել են հեռախոսահամարներով և ինքը տաքսի ավտոմեքենայով վերադարձել է բնակարան։ Հաջորդ օրը կեսօրին այդ անձը եկել է բնակարան` իրերը հավաքելու, սակայն ինքը նրան չի տեսել, քանի որ դուրս է եկել զբոսնելու։ Այդ անձը զանգահարել է իր հայկական հեռախոսահամարին և ասել, որ անհարժեշտ է գնել պատճենահանման թուղթ։ Ինքը մոտակա գրախանութից գնել է մոտ 40 հատ պատճենահանման թղթեր և բերել բնակարան։ Մտնելով բնակարան` նկատել է, որ այդ տղան նստած է սենյակում, իսկ խոհանոցում գտնվում է վակումային սարք և վակումային պոլիէթիլենային տոպրակներ։ Մինչև այդ ինքը չի նկատել վակումային սարքը, քանի որ խոհանոց չի մտել։ Ճամպրուկը գտնվել է հյուրասենյակում, փակ վիճակում։ Այդ ժամանակ Լիբանանից զանգահարել են իրեն և հայտնել, որ բնակարանը, որը ցանկացել է գնել` պատրաստ է։
Հետագա հարցաքննությունների և Ֆիրազ Վեհբեի հետ առերես հարցաքննության ժամանակ Հասան Աբդու Ալ-Շաերը առանց պատճառաբանությունների հրաժարվել է հարցերին պատասխանելուց։
Առաջին ատյանի դատարանում ամբաստանյալ Հասան Աբդո Ալ-Շաերը ցուցմունք է տվել այն մասին, որ զբաղվել է կենցաղային իրերի առևտրով, ուստի պարբերաբար Հայաստան է եկել` շուկայի ուսումնասիրության համար։ Վերջին անգամ եկել է, որպեսզի Հայաստանում ֆիրմա բացի։ Ինքը տաքսիստին չի ասել, որ եկել է ապրանքի որակ ստուգելու։ Նրան ասել է, որ շուկան ուսումնասիրելու համար է եկել։ Սկզբում իջևանել է «Ռեպուբլիկա» հյուրանոցում։ Մինչ այդ տաքսու վարորդին տվել է հասցե և նա իրեն բերել է մի բնակարան։ Դրա գոյության մասին իրեն ասել են Լիբանանի իր ընկերները, տվել են բանալին և հասցեն։ Գալով Երևան` վարորդի հետ չի կարողացել բացել բնակարանի դուռը։ Այդ բնակարանի մասին իրեն ասել է Բիլալ Ֆադելը, որի հետ միասին պետք է բիզնես սկսեին։
Երբ հյուրանոցում է եղել, Բիլալ Ֆադելի անունից զանգել և ասել են, որ մեկ այլ մարդ է ուզում վարձակալել Բիլալի բնակարանը։ Ինքն ասել է` թող նա զանգի։ Նա զանգել է, որից հետո գնացել և հանդիպել է անծանոթի հետ։ Դա Ֆիրաս Վեհբեն է եղել։ Նա ճամպրուկը վերցրել է իր հետ։ Նստել են բնակարանի հյուրասենյակում և զրուցել։ Նա ասել է, որ չի հավանում բնակարանը։ Ասել է, նաև որ այդտեղ ուղեբեռ ունի։ Դա նրա ընկերոջ իրերն են եղել, բայց իր ներկայությամբ չի հավաքել։ Հետո ինքն ու Ֆիրասը միասին դուրս են եկել և գնացել նույն փողոցի վրա գտնվող ռեստորան։ Դրանից հետո Ֆիրասը կանչել է իր ընկեր Զավենին։ Այնուհետև Ֆիրասը և Զավենը միասին դուրս են եկել, գնացել են զուգարան, որտեղից շուրջ տաս րոպե հետո վերադարձել են։ Դրանից հետո Ֆիրասի առաջարկով գնացել են խաղատուն, որտեղ Ֆիրասի խնդրանքով երկար են մնացել։ Վաղ առավոտյան միայնակ խաղատնից գնացել է բնակարան և 5-6 ժամ քնել։ Հետո եկել է Ֆիրասը, պատմել է խաղատնից, խոհանոցից բերել է հետագայում դատարանում ցուցադրված սարքը, մի քանի առարկաներ փորձել է վակումացնել` հեռախոս, կրակայրիչ, բայց չի կարողացել։
Ինքը գրախանութից գնել է պատճենահանման թղթեր և բերել է բանալին` Ֆիրասի պահանջով։ Հաջորդ օրը գնացել է ինքնաթիռի տոմս գնելու, որպեսզի մեկնի Ստամբուլ։ Երբ վերադարձել է, նորից անծանոթը զանգել և խնդրել է նույն թղթերից վերցնել։ Երեկոյան Զավենի և Ֆիրասի հետ ընթրել են չինական ռեստորանում։ Այնուհետև վերցրել է բնակարանից իր ճամպրուկը, բնակարանի բանալին թողել է Անիի մոտ և գնացել օդանավակայան։ Վերահսկողությունն անցնելիս, իրեն ստուգել են և բերման ենթարկել։ Այդ սենյակում տեսել է Ֆիրասի ճամպրուկը, որը նա վերցրել էր իր հետ։ Թմրամիջոցի մասին տեղյակ չի եղել, այդ մասին իմացել է ազգային անվտանգության ծառայությունում։ Ֆիրասին չի խնդրել թմրամիջոց տեղափոխել, քանի որ նրան չի ճանաչել և անձնական որևէ կապ իրենց միջև չի եղել։
Նախաքննության ընթացքում այդ մասին չի ասել, որովհետև ընդհանրապես ցուցմունք չի տվել։ Ֆիրասի հետ առերես հարցաքննվել է, սակայն ոչինչ չի ասել, քանի որ հետևել է իր պաշտպանի խորհուրդներին և հիասթափված է եղել։ Բացի այդ իր իրավունքներից է օգտվել։
Մալեկ Գարիբի հետ ծանոթացել է միևնույն սենյակում` ազգային անվտանգության ծառայությունում պահվելու ժամանակ։ Ֆիրասին նույնպես չի ճանաչել։ Բիլալ Ֆադելին և եղբորը ճանաչում է։ Ֆադելի ընտանիքը Բուլղարիայում կոշիկների խանութ ունի։ Բիլալ Ֆադելի հետ նախկինում եկել է Հայաստան` կրկին իր գործը կատարելու համար։ Թմրանյութ չի տեսել։ Ճամպրուկն իրենը չէ, այն երբեք չի տեսել։
Գործով ձեռք բերված ապացույցների համակցությամբ վերլուծելով ու գնահատելով Հասան Աբդո Ալ-Շաերի, Մալեկ Աբաս Գարիբի և Ֆիրաս Մալեկ Վեհբեի ցուցմունքները, վերաքննիչ քրեական դատարանը հանգում է այն հետևության, որ ինչպես դրանք, այնպես էլ պաշտպանների կողմից վերաքննիչ բողոքներում բերված պատճառաբանություններն մի դեպքում նպատակ են հետապնդում ազատելու նրանց պատասխանատվությունից ու պատժից, մյուս դեպքում նվազեցնելու այդ պատասխանատվությունը, իսկ ամբաստանյալներին մեղսագրվող արարքները հիմնավորվում են առաջին ատյանի դատարանի դատաքննությամբ հետազոտված ու վերլուծված գործի փաստական տվյալների ու ապացույցների ներքոշարադրյալ ամբողջությամբ:
Վկա, «Հոթել-Ֆորում» ՍՊ ընկերության աշխատակից Անի Գևորգյանը ցուցմունքներ է տվել այն մասին, որ 2014 թվականից աշխատում է նշված հյուրանոցային համալիրում որպես ադմինիստրատոր։ 2014 թվականին հյուրանոց է ժամանել Լիբանանի քաղաքացի Բիլալ Ֆադելը։ Վերջինս ընկերոջ հետ շուրջ տաս օր բնակվել է նշված հյուրանոցում։ Այդ ընթացքում Բիլալ Ֆադելն իրենից հարցրել է «Ֆեյսբուք» սոցիալական ցանցում գրանցված լինելու մասին, որին ինքը դրական է պատասախնել։ Տաս օր բնակվելուց հետո նա մեկնել է Լիբանան։ Որոշ ժամանակ անց Բիլալ Ֆադելը «Ֆեյսբուքի» միջոցով գտել է իրեն և սկսել են հաճախակի շփվել, որի ընթացքում տվել է իր հեռախոսահամարը և որով Բիլալը զանգահարել է։ Հիմնականում շփվել են առօրյա թեմաների շուրջ։ Այնուհետև զանգահարելով իրեն, Բիլալը հայտնել է, որ ընկերոջ հետ ժամանելու է Երևան և խնդրել է հյուրանոց ամրագրել։ Ինքն ամրարգել է «Ռեպուբլիկա» հյուրանոցը, որից հետո 2014 թվականի հոկտեմբերին դիմավորել է նրանց։ Բիլալը ժամանել է իր տասնամյա որդու և Հասան անունով ընկերոջ հետ։ Հյուրանոցում տեղավորելու ժամանակ Հասանին դիմավորել է Ֆադի անունով մի տղամարդ, ով Հասանի համար հյուրանոցում սենյակ է ամրագրել։ Հաջորդ օրը Բիլալի խնդրանքով «Ռեպուբլիկա» հյուրանոցում հանդիպել է նրանց, Հասանի հետ գնացել է մոտակա «Օրանժ Արմենիա» ընկերություն և գնել է 041-041-013 հեռախոսահամարը։ Բիլալը վերադառանալով, հայտնել է, որ երեկոյան պատրաստվում են մեկնել Թբիլիսի, այնտեղից էլ Ստամբուլ, սակայն չի ասել, թե ինչ նպատակով։ 2014 թվականի դեկտեմբերին Բիլալը զանգահարել է և ասել, որ իր եղբայր Մալեկը կնոջ հետ պատրաստվում է ժամանել Երևան և քաղաքի կենտրոնում հարկավոր է բնակարան վարձակալել։ Ինքը համացանցի միջոցով փնտրել է մի քանի բնակարան և դրանց լուսանկարներն ուղարկել Բիլալին։ Դրանց թվում եղել է նաև Երևանի Ամիրյան փողոցի թիվ 5 շենքի թիվ 7 բնակարանը։ Բիլալը համաձայնվել է վարձակալել նշված բնակարանը։ Ինքը զանգահարել է բնակարանի սեփականատեր Քրիստինային և պայմանավորվել են նշված բնակարանը վարձակալել ամսեկան 600 ԱՄՆ դոլարով։
2014 թվականի դեկտեմբերի 20-ին կամ 21-ին Բիլալը հայտնել է, որ իր եղբայրն արդեն Երևանում է, ժամանակավոր տեղավորվել է «Ռեպուբլիկա» հյուրանոցում։ Նա խնդրել է այցելել Մալեկին և ցույց տալ վարձակալած բնակարանի տեղը։ Հաջորդ օրը Մալեկը ինտերնետային «Վայբըր» («Viber») ծրագրով զանգահարել է իրեն և ասել, որ հաջորդ օրը պատրաստվում է բնակարան տեղափոխվել։ Ինքը զանգահարել է բնակարանի տիրոջը և պայմանավորվել հանդիպել «Ռեպուբլիկա» հյուրանոցի մոտ` Մալեկին բնակարան ուղեկցելու համար։ Բնակարանում Մալեկը վճարել է մեկ ամսվա համար 700 ԱՄՆ դոլար գումար, որի մեջ են մտել նաև կոմունալ ծախսերը։ Դրանից հետո ինքը երբեմն զանգահարել է Մալեկին` տեղեկանալու, թե ինչ խնդիրներ ունի, որի ժամանակ իմացել է նաև, որ նրա կինը նույնպես ժամանել է Երևան։ 2015 թվականի հունվարին Մալեկը հրավիրել է իրեն «Տաշիր» առևտրի կենտրոնում գործող «Տաշիր պիցցա», որտեղ ծանոթացրել է իր կին Ամառի հետ։ Այդ ժամանակ Մալեկը խնդրել է, որպեսզի բնակարանի վարձակալության ժամկետը ևս մեկ ամսով երկարացնի։ Ինքը պատասխել է, որ այդ հարցով կխոսի Քրիստինայի հետ, որից հետո պայմանավորվածության համաձայն վճարել է երկրորդ ամսվա վարձավճարը Քրիստինային։ Դրանից մի քանի օր անց Բիլալը տեղեկացրել է, որ Մալեկը և Ամառը մեկնել են Հայաստանից և բնակարանի բանալին իրենց հետ տարել են` միաժամանակ հայտնելով, որ բնակարանի վարձավճարը ինքը հետ չի պահանջում։ Քանի որ բնակարանի վարձավճարը վճարված է եղել, ինքը չի մտածել բնակարանի բանալու հարցով և կարծել է, որ հետ են վերադառնալու։ 2015 թվականի փետրվարի 10-ին կամ 11-ին Բիլալից տեղեկացել է, որ բնակարանի բանալին գտնվում է նրա ընկեր Հասանի մոտ և վերջինս այն փոխանցելու է իրեն` այցելելով «Ֆորում» հյուրանոց։ Բիլալը խնդրել է հիշեցնել բնակարանի հասցեն և ինքն ինտերնետային «Վայբըր» («Viber») ծրագրով այն ուղարկել է։ 2015 թվականի փետրվարի 11-ի լույս 12-ի գիշերը, ժամը 1-2-ի սահմաններում Հասանը տաքսի ավտոմեքենայով եկել է հյուրանոց և բնակարանի բանալին հանձնել իրեն։
Վկա, «Աերոտաքսի» սահմանափակ պատասխանատվությամբ ընկերության վարորդ Հրաչյա Հովհաննիսյանը ցուցմունքներ է տվել այն մասին, որ 2014 թվականի սեպտեմբերից աշխատում է «Աերոտաքսի» ՍՊ ընկերությունում որպես վարորդ, իրեն ամրակցված է «2684» պետհամարանիշի ավտոմեքենան։ Տաքսի ծառայությունը իրականացնում է ուղևորների փոխադրում օդանավակայանից դեպի ցանկացած վայր։ Իր կողմից օգտագործվում է 099-44-44-26 հեռախոսահամարը, որը գրանցված է եղբոր` Գագիկ Հովհաննիսյանի անվամբ։
2015 թվականի փետրվարի 9-ի լույս 10-ի գիշերը գտնվել է աշխատանքի վայրում և առաջինն իր ավտոմեքենան է եղել, որը պետք է ուղևոր տեղափոխեր։ Գիշերվա ժամը 2-3-ի սահմաններում գտնվել է սպասասրահում և հաճախորդ է փնտրել։ Նշված ժամին վայրէջք է կատարել Աբու-Դաբի-Երևան չվերթը։ Ինքը նկատել է օտարերկրացու և մոտեցել նրան` առաջարկելով տաքսի ծառայություն։ Նստելով ավտոմեքենան, հարցրել է, թե որ հասցեով պետք է շարժվել։ Այդ տղամարդն իր բջջային հեռախոսում ցույց է տվել կարճ հաղորդագրություն, որտեղ նշված է եղել «Ամիրյան 5 բն 7» գրառումը և անգլերենով հայտնել է, որ իրեն տանի այնտեղ։ Ճանապարհին հարցրել է, թե ինչ նպատակով է ժամանել Հայաստան, նա էլ պատասխանել է, որ իրեն ուղարկել են «մատերյալի» որակը ստուգելու համար և պարզելու, թե «մատերյալը» տեղում է, թե` ոչ։ Քանի որ անգլերեն վատ է խոսել, մտածել է, որ խոսքը շինարարական ապրանքի մասին է։ Ասելով, որ այդ բնակարանն ինքը չի վարձել, այլ տնօրենն է վարձել և բնակարանի բանալին իրեն է փոխանցել, որպեսզի հյուրանոցում չբնակվի, այդ մարդը խնդրել է, որպեսզի նշված հասեցի բնակարանը գտնի։ Որոշ ժամանակ հետո հասել են Ամիրյան փողոցի թիվ 5 շենքի մոտ։ Այդ տղամարդու խնդրանքով նրա հետ միասին բարձրացել է` բնակարանը գտնելու։ Մի քանի բնակարանի դռներ փորձելով և տեսնելով, որ չի բացվում, ասել է, որ չի կարող սպասել։ Երբ փորձել է հեռանալ, այդ մարդը խնդրել է տալ հեռախոսահամարը` հարկ եղած դեպքում զանգահարելու համար։ Նրան տվել է իր` 099-44-44-26 հեռախոսահամարը, որից հետո ստանալով գումարը, հեռացել է։ Որոշ ժամանակ հետո 041-041-013 հեռախոսահամարից զանգ է ստացել և պատասխանելով զանգին` տեղեկացել է, որ զանգողը նույն տղամարդն է, ով չի կարողացել բնակարանի դուռը բացել։ Նա խնդրել է դուռը բացելու համար մասնագետ գտնել։ Չկարողանալով մասնագետ գտնել, զանգահարել է նույն հեռախոսահամարով, ասել, որ ներկա պահին չի կարող մասնագետ գտնել և ավելացրել, որ մոտակայքում գտնվում է «Ռեպուբլիկա» հյուրանոցը, որտեղ կարող է բնակվել։ Այնուհետև ինքը կարճ հաղորդագրություն է ուղարկել այդ անձին և հայտնել, որ առավոտյան կփորձի մասնագետ գտնել։
Վկա Հայկ Կալպակչյանը ցուցմունքներ է տվել այն մասին, որ իր ընկեր Վահե Միրզոյանին պատկանող, «Օպել» մակնիշի 34 UM 313 պետհամարանիշի ավտոմեքենայով մատուցում է տաքսի ծառայություններ։ 2015 թվականի փետրվարի 11-ի լույս 12-ի գիշերը ժամը 03-ի սահմաններում Երևանի Ամիրյան-Զաքյան փողոցների խաչմերուկում նկատել է մի տղամարդու, որի ձեռքին սև ճամպրուկ է եղել։ Մտածելով, որ այդ անձը ցանկանում է տաքսի նստել, մոտեցել է նրան։ Վերջինս կանգնեցրել է իր ավտոմեքենան, մոտը եղած ճամպրուկը տեղադրել մեքենայի բեռնախցիկում և հասկացրել, որ շարժվի դեպի «Զվարթնոց» օդանավակայան։ Ավտոմեքենայում այդ անձն իր հեռախոսում ցույց է տվել, որ սկզբում անհրաժեշտ է գնալ Պռոշյան փողոցի վրա գտնվող «Ֆորում» հյուրանոցային համալիր։ Ինքը ուղևորվել է դեպի «Ֆորում» հյուրանոց։ Հասնելով այնտեղ, նա դուրս է եկել ավտոմեքենայից, մտել հյուրանոց և շուրջ հինգ րոպե անց վերադարձել, որից հետո ուղևորվել են դեպի «Զվարթնոց» օդանավակայան։
Վկա Դավիթ Սահակյանը ցուցմունքներ է տվել այն մասին, որ 1988-2002թթ. սովորել է Կիպրոսում գտնվող «Մելքոնյան» կրթական հաստատությունում։ Այդ ժամանակահատվածում ծանոթացել է հարևանությամբ գտնվող շենքերից մեկի բնակիչ, ազգությամբ հայ Զավեն Գոճիկյանի հետ։ Վերջինիս կարճ անվանել են Ալեքս։ Ուսումն ավարտելուց հետո ժամանել է Հայաստան, սակայն Զավենի հետ կապը պահպանել է։ 2015 թվականի Զավենը զանգահարել է իր հետ նույն կրթական հաստատությունում սովորած ըներոջը` Արտաշես Մաթևոսյանին և հայտնել, որ պատրաստվում է ժամանել Հայասատան՝ անձնագիր ստանալու հարցով։ Նույն ժամանակ խնդրել է Երևանում բնակարան վարձակալել։ Այդ հանգամանքն իմանալով` Արտաշեսի հետ վարձակալել են Երևան քաղաքի Եզ. Կողբացու փողոցի թիվ 28 շենքի թիվ 30 բնակարանը։ Զավենը ժամանելով Հայաստան, բնակվել է այնտեղ։ Երկու օր անց Զավենն ասել է, որ իր ծանոթներից Ֆիրաս Վեհբեն ժամանել է Երևան և ապրում է իր բնակարանում։ Զավենի խնդրանքով Ֆիրասին տարել է ատամնաբուժարան՝ իմպլանտ դնելու համար։ Ճանապարհին Ֆիրասը խնդրել է կանգնել «Շիրակ» հյուրանոցի մոտ, որտեղ մնալով տաս րոպե, վերադարձել է։ Զավենից տեղեկացել է, որ Ֆիրասին ճանաչում է Լիբանանից, քանի որ Ֆիրասի հորեղբոր կինը հայ է և ընտանիքի հետ վաղեմի ծանոթ է։ Զավենը հայտնել է նաև, որ Երևանում են Ֆիրասի` ազգությամբ բուլղարացի ընկերները։
Համաձայն նյութագիտական փորձաքննության 2015 թվականի փետրվարի 13-ի թիվ 15-0333 եզրակացության` «Փորձաքննության ներկայացված փաթեթի մեջ առկա 5 հատ, պոլիմերային, անգույն, թափանցիկ փաթեթների մեջ գտնվող, համապատասխանաբար 737,45 գրամ; 1022,13 գրամ; 788,84 գրամ; 1217,05 գրամ և 951,84 գրամ մաքուր քաշերով սպիտակ գույնի փոշենման զանգվածները հանդիսանում են ընդհանուր 4717,31 գրամ մաքուր քաշով «կոկաին» տեսակի թմրամիջոց։
Կոկաինը ներառված է «ՀՀ հսկման ենթակա թմրամիջոցների, հոգեմետ նյութերի և դրանց պրեկուրսորների» կազմում (Երևան 2003)»։
Տոքսիկոքիմիական փորձաքննության 2015 թվականի մարտի 10-ի թիվ 15-0355 եզրակացության համաձայն` 2015 թվականի փետրվարի 13-ին Հասան Աբդո Ալ-Շաերից (սկզբնական փաստաթղթերում նշվել է որպես Ալի-Շաեր Հասան Աբգար) վերցված մեզի փորձանմուշի մեջ հայտնաբերվել են «կոկաին» տեսակի թմրամիջոցի ակտիվ թմրալկալոիդները։ Մազի փորձանմուշի մեջ թմրամիջոցներ չեն հայտնաբերվել Մեզի փորձանմուշի մեջ հայտնաբերված էկգոնինի առկայությունը վկայում է այն մասին, որ անձը գործածել է «կոկաին» տեսակի թմրամիջոց, որի օգտագործման ժամանակահատվածը համապատասխանում է մոտավորապես 1-3 օրվա վաղեմության, ինչը պայմանավորված է անձի օրգանիզմի առանձնահատկություններով »։
Համաձայն տոքսիկոքիմիական փորձաքննության 2015 թվականի մարտի 10-ի թիվ 15-0354 եզրակացության` 2015 թվականի փետրվարի 13-ին Մալեկ Աբաս Գարիբից (սկզբնական փաստաթղթերում նշվել է որպես Ղարիբ Մալեկի Աբաս) վերցված մեզի և մազի փորձանմուշի մեջ թմրամիջոցներ չեն հայտնաբերվել։
Համաձայն տոքսիկոքիմիական փորձաքննության 2015 թվականի մարտի 10-ի թիվ 15-0353 եզրակացության` 2015 թվականի փետրվարի 13-ին Ֆիրաս Մալեկ Վեհբեից (սկզբնական փաստաթղթերում նշվել է որպես Ֆիրազ Մալեկ Վեհբե, Ֆիրաս Վիհբի) վերցված մեզի փորձանմուշի մեջ հայտնաբերվել են կոկաին տեսակի թմրամիջոցի ակտիվ թմրալկալոիդները։ Մազի փորձանմուշի մեջ թմրամիջոցներ չեն հայտնաբերվել։ Մեզի փորձանմուշի մեջ հայտնաբերված էկգոնինի առկայությունը վկայում է այն մասին, որ անձը գործածել է կոկաին տեսակի թմրամիջոց, որի օգտագործման ժամանակահատվածը համապատասխանում է մոտավորապես 1-3 օրվա վաղեմության, ինչը պայմանավորված է անձի օրգանիզմի առանձնահատկություններով»։
Համաձայն նյութագիտական փորձաքննության 2015 թվականի մարտի 5-ի թիվ 15-0392 եզրակացության` «Փորձաքննության ներկայացված`
-1 հատ «PROFI COOK; Vacuum sealer PC-VK 1015» տպատառ գրառմամբ ստվարաթղթե տուփի մեջ գտնվող, սև գույնի, պոլիմերային, արծաթագույն մետաղական մակերեսով «PROFI COOK; TURBO VAKUUM» տպատառ գրառմամբ, առանց տեսանելի հետքերի սարքի (օբյեկտ 1) արտաքին և ներքին մակերեսների վրա հայտնաբերվեցին կոկաին տեսակի թմրամիջոցի հետքեր, որոնց քանակական հաշվարկը հնարավոր չէ կատարել` վերջիններիս աննշան, չնչին քանակության պատճառով:
- 7 հատ միանման, ուղղանկյունաձև, թափանցիկ, առանց տեսանելի հետքերի պոլիէթիլենյային տոպրակների (օբյեկտ 2) և 1 հատ սև գույնի պոլիէթիլենային տոպրակի մեջ գտնվող 20 հատ միանման, ուղղանկյունաձև, թափանցիկ, առանց տեսանելի հետքերի, պոլիթէթիլենային տոպրակների (օբյեկտ 3) վրա «ՀՀ հսկման ենթակա թմրամիջոցների, հոգեմետ նյութերի և դրանց պրեկուրսորների» կազմում ընդգրկված որևէ թմրամիջոց, հոգեմետ նյութ, պրեկուրսոր, ինչպես նաև «ՀՀ թունավոր նյութերի և «Ռոտերդամի կոնվենցիայով կարգավորման ենթակա` Հայաստանի Հանրապետությունում արգելված քիմիական նյութերի և թունաքիմիկատների» ցանկերում ընդգրկված որևէ թունավոր նյութ չի պարունակվում։
Համաձայն նյութագիտական և հետքաբանական փորձաքննության 2015 թվականի ապրիլի 11-ի թիվ 15-0772 եզրակացության` «Փորձաքննության ներկայացված`
- դիմերեսին արծաթագույն և սև գույնի «Kore» տպատառ գրառմամբ, իսկ դարձերեսը` սև գույնի, առանց տեսանելի հետքերի պոլիմերային նյութի կտորի (ըստ որոշման նկարագրվածի` սև գույնի թղթե կտոր) (օբյեկտ 2) մակերեսների վրա հայտնաբերվեցին կոկաին տեսակի թմրամիջոցի հետքեր, որոնց քանակական հաշվարկը հնարավոր չէ կատարել` վերջիններիս աննշան, չնչին քանակության պատճառով:
«Sams nite» տպատառ զրառմամբ, սև գույնի ճամպրուկի ետևի հատվածի ողջ երկայնքով տեղադրված, տեղ-տեղ սև գույնի նյութի հետքերով, սպիտակ գույնի, պլաստմասե դետալի արտաքին և ներքին մակերեսների վրա (օբյեկտ 1) «ՀՀ հսկման ենթակա թմրամիջոցների, հոգեմետ նյութերի և դրանց պրեկուրսորների» կազմում ընդգրկված որևէ թմրամիջոցներ և հոգեմետ նյութեր չհայտնաբերվեցին:
-Ճամպրուկի որպես ետնապատ հանդիսացող սպիտակ գույնի պլաստմասե դետալի վրա առկա տեղ-տեղ սև գույնի նյութի հետքերը (օբյեկտ 1) ունեն ընդհանուր սեռային պատկանելիության փորձաքննությանը ներկայացված «Kores» տպատառ գրառմամբ, առանց տեսանելի հետքերի հավանաբար տպիչ թղթի կտորի դարձերեսի սև գույնի նյութի հետ (օբյեկտ 2)։
(...)
Փորձաքննությանը ներկայացված սև ճամպրուկի ետնապատ հանդիսացող սպիտակ գույնի պոլիմերային դետալի (մանրամասն նկարագրությունները տես սույն եզրակացության «արտաքին զննության» մասում) վրա առկա են սև գույնի, շփմանը բնորոշ հետքեր, որոնք կարող էին առաջանալ համեմատաբար հեշտությամբ փոխանցվող գուներանգ ունեցող առարկայի հետ շփման մեջ մտնելու արդյունքում, ինչը կարող է հանդիսանալ նաև տպիչ թղթերի մակերեսները»։
Որպես այլ փաստաթուղթ ապացույց ճանաչված Հասան Աբդո Ալ-Շաերի կողմից օգտագործված 041-04-10-13 և Ֆիրաս Մալեկ Վեհբեի կողմից օգտագործված 095-82-79-73 հեռախոսահամարների վերծանումներով և դրանք զննելու մասին 2015 թվականի մայիսի 14-ի արձանագրության համաձայն` զննության է ենթարկվել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի մարտի 31-ի որոշմամբ ստացված, Հասան Աբդո Ալ-Շաերի կողմից օգտագործված 041-04-10-13 և Ֆիրաս Մալեկ Վեհբեի կողմից օգտագործված 095-82-79-73 հեռախոսահամարների վերծանումները և զննության ընթացքում պարզվել է, որ Ֆիրազ Վեհբեի կողմից օգտագործված 095-82-79-73 հեռախոսահամարից, որը գրանցված է Ֆիրազ Վեհբեի անվամբ, 2015 թվականի փետրվարի 11-ին ժամը 13։08-ին եքային զանգ է կատարվել Հասան Ալ Շահերի 041-04-10-13 հեռախոսահամարին, որը տևել է 30 վարկյան։ Նշված զանգը սպասարկվել է Կենտրոն` Բյուզանդի փողոց, տուն 47 հասցեում տեղակայված ալեհավաք կայանի կողմից։ Հաջորդ զանգը եղել է նույն օրը ժամը 17։10-ին` 42 վարկյան տևողությամբ, որը սպասարկվել է Արամի փողոց` տուն 1 հասցեում տեղակայված կայանի կողմից։ Հաջորդ զանգը կայացել է նույն օրը ժամը 21։14-ին` 54 վարկյան տևողությամբ, որը սպասարկվել է Կենտրոն` Բյուզանդի փողոց տուն 47 հասցեում տեղակայված ալեհավաք կայանի կողմից։ Հաջորդ զանգը եղել է նույն օրը ժամը 21։29-ին` 5 վարկյան տևողությամբ, որը կրկին սպասարկվել է Կենտրոն` Բյուզանդի փողոց տուն 47 հասցեում տեղակայված ալեհավաք կայանի կողմից։
Հասան Ալ Շահերի կողմից օգտագործված 041-04-10-13 հեռախոսահամարից, որը գրանցված է Հասան Ալ Շահերի անվամբ, 2015 թվականի փետրվարի 11-ին ժամը 13։08-ին ելքային զանգ է կատարվել Ֆիրազ Վեհբեի 095-82-79-73 հեռախոսահամարին, որը տևել է 30 վարկյան։ Նշված զանգը սպասարկվել է Արամի փողոց` տուն 1 հասցեում տեղակայված ալեհավաք կայանի կողմից։ Հաջորդ զանգը եղել է նույն օրը ժամը 17։10-ին` 41 վարկյան տևողությամբ, որը սպասարկվել է Կենտրոն` Բյուզանդի փողոց, տուն 47 հասցեում տեղակայված ալեհավաք կայանի կողմից։ Հաջորդ զանգը կայացել է նույն օրը ժամը 21։14-ին, 54 վարկյան տևողությամբ, որը սպասարկվել է Արամի փողոց` տուն 1 հասցեում տեղակայված ալեհավաք կայանի կողմից։ Հաջորդ զանգը եղել է նույն օրը ժամը 21։29-ին` 6 վարկյան տևողության, որը սպասարկվել է Կենտրոն` Բյուզանդի փողոց, տուն 47 հասցեում տեղակայված ալեհավաք կայանի կողմից։
Համաձայն որպես այլ փաստաթուղթ` ապացույց ճանաչված, 2015 թվականի մայիսի 14-ի զննման մասին արձանագրության` զննության է ենթարկվել Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի մարտի 31-ի որոշմամբ ստացված, Հասան Ալ-Շաերի, Ֆիրաս Վեհբեի և Մալեկ Ղարիբի սահմանահատումների վերաբերյալ սահմանային էլեկտրոնային կառավարման տեղեկատվական համակարգում առկա տվյալները և պարզվել է, որ` «Մալեկ Ղարիբը` անձնագիր 380480830, ՀՀ է ժամանել ընդհանուր առմամբ 2 անգամ, որը եղել է 2015 թվականին։ Առաջին անգամ 2015 թվականի հունվարի 24-ին «Մերսեդես-Բենց» մակնիշի 34 SF 370 պ/հ ավտոմեքենայով ժամը 14։16-ին Ֆիրազ Վեհբեի հետ «Բագրատաշեն» հսկչ-անցագրային կետով և մեկնել է 2015 թվականի հունվարի 26-ին Երևան-Ստամբուլ թիվ KK 651 չվերթով։ Հաջորդ անգամ ՀՀ է ժամանել 2015 թվականի փետրվարի 10-ին ժամը 05։16-ին Սոֆիա-Երևան թիվ ԼՕ 727 չվերթով և ցանկացել է մեկնել 2015 թվականի փետրվարի 12-ին ժամը 03։18-ին Երևան-Ստամբուլ թիվ KK 651 չվերթով Հասան Ալ Շահերի հետ։
Ֆիրազ Վեհբեն` անձնագիր 1214149, ՀՀ է ժամանել է ընդհանուր առմամբ 2 անգամ, որը եղել է 2015 թվականին։ Առաջին անգամ 2015 թվականի հունվարի 24-ին «Մերսեդես-Բենց» մակնիշի 34 SF 370 պ/հ ավտոմեքենայով ժամը 14։21-ին Մալեկ Ղարիբի հետ «Բագրատաշեն» հսկչ-անցագրային կետով և մեկնել է 2015 թվականի հունվարի 27-ին Երևան-Մոսկվա թիվ UN 262 չվերթով։ Հաջորդ անգամ ՀՀ է ժամանել 2015 թվականի փետրվարի 09-ին ժամը 03։50-ին Ստամբուլ-Երևան թիվ KK 650 չվերթով։
Հասան Ալ Շահերը` անձնագիր 382057960, ՀՀ է ժամանել 2014 թվականին 4 անգամ։ 2015 թվականի փետրվարի 02-ին Մոսկվա-Երևան թիվ UN 261 չվերթով ժամը 02։14-ին ժամանել է ՀՀ: 2015 թվականի փետրվարի 12-ին ժամը 04։23-ին Երևան-Ստամբուլ թիվ KK 651 չվերթով Մալեկ Ղարիբի հետ նույն չվերթով ցանկացել է մեկնել»։
Որպես այլ փաստաթուղթ` ապացույց ճանաչված, 2015 թվականի փետրվարի 24-ի և 2015 թվականի մայիսի 14-ի զննման մասին արձանագրությունների համաձան` զննվել են Հասան Ալ Շահերի անձնական խուզարկությամբ հայտնաբերված «iphone 5» մոդելի բջջային հեռախոսը և պարզվել է, որ «Հասան Ալ Շահերի մոտից հայտնաբերված «iphone 5» մոդելի հեռախոսի գործարանային համարն է' 013409003586318, որում տեղադրված է «Orange» գրառմամբ 140706680 գործարանային համարով բջջային քարտը, որի հեռախոսահամարն է 041-041-013 (…)»։ Նշված հեռախոսի համարների հիշողության համար նախատեսված նոթատետրում 095-82-79-73 հեռախոսահամարի ներքո գրանցված է «Abu Shaar Firas» անվամբ բաժանորդ։
Զննվել է նաև Ֆիրազ Վեհբեի անձնական խուզարկությամբ հայտնաբերված «iphone 5» մոդելի բջջային հեռախոսը և պարզվել է, որ «Ֆիրաս Վեհբեի մոտից հայտնաբերված «iphone 5» մոդելի հեռախոսի գործարանային համարն է' 013429000363438, որում տեղադրված է «Orange» գրառմամբ 1408033596699 գործարանային համարով բջջային քարտը, որի հեռախոսահամարն է 095-82-79-73 (…)»։
Ըստ 2015 թվականի մայիսի 14-ի զննման մասին արձանագրության` «3. Ֆիրազ Վեհբեի բնակարանից հայտնաբերվել և առգրավել են Ֆիրազ Վեհբեի անվամբ «Օրանժ» ընկերության բաժանորդային պայմանագիր, որով հիմանավորվում է, որ վերջինս ձեռք է բերել և օգտագործել 095-82-79-73 հեռախոսահամարը, իսկ մնացած փաստաթղթերը քննության համար հետաքրքրություն չեն ներկայացնում։
4. Մալեկ Ղարիբի անձնական խուզարկությամբ հայտնաբերվել է 1500 Եվրո գումարը, որը ստացել է Ֆիրազ Վեհբեից` թմրամիջոցները Ստամբուլ տեղափոխելու համար, Երևան-Ստամբուլ չվերթի ավիատոմսը, (…)։
5. Հասան Ալ Շահերի անձնական խուզարկությամբ հայտնաբերվել են 2015 թվականի փետրվարի 10-ին Ռեպուբլիկա հյուրանոցում մեկ օրով բնակվելու փաստաթուղթը, Երեան-Ստամբուլ չվերթի ավիատոմսը, իսկ մնացած փաստաթղթերը քննության համար հետաքրքրություն չեն ներկայացնում (…)»։
Զննված փաստաթղթերը կցվել են արձանագրությանը։
Որպես այլ փաստաթուղթ` ապացույց ճանաչված, ՀՀ ազգային անվտանգության ծառայության հակահետախուզության գլխավոր վարչության 2015 թվականի փետրվարի 12-ի թիվ 2/8-967 գրության համաձայն` «Ի լրումն 2015 թվականի փետրվարի 12-ի թիվ 2/8-966 գրության հայտնում ենք, որ ս.թ. փետրվարի 12-ին ձեռնարկված օպերատիվ-հետախուզական միջոցառումների արդյունքում «Զվարթնոց» օդանավակայանում Բուլղարիայի քաղաքացիներ Մալեկ Աբաս Ղարիբի /Malek Abas Garibi/ և Ալ Շահեր Հասան Աբդոյի /Al Shaer Hasan Abdo/ մոտ հայտնաբերվել է մոտ 4,8 կգ կոկաին տեսակի թմրանյութ, որը վերջիններս փորձում էին արտահանել Թուրքիա` Երևան-Ստամբուլ չվերթով։
Ձեռնարկված միջոցառումների արդյունքում պարզվել է, որ թմրանյութը վերջինիս փոխանցել է «Շիրակ» հյուրանոցում Լիբանանի քաղաքացի, 1980թ. ծնվ. Ֆիրաս Վեհբեն /Firas Wehbe/, որը բնակվում է ք.Երևանում, Եզ.Կողբացու շ.28 բն. 30 հասցեում /անձը պարզաբանվում է/։
Նույն տվյալների համաձայն, Ալ Շահեր Հասան Աբդոն Երևանում բնակվել է Ամիրյան փ. շ.5 բն. 7 հասցեում։
Ըստ նախնական տեղեկությունների` չի բացառվում, որ նշված հասցեներում հնարավոր է առկա են թմրանյութի որոշ խմբաքանակներ»։
Որպես այլ փաստաթուղթ` ապացույց ճանաչված, ՀՀ ԿԱ ԱԱԾ հակահետախուզության գլխավոր վարչության 2015 թվականի փետրվարի 13-ի թիվ 2/8-1073 գրության համաձայն` «Ի լրումն 2015 թվականի փետրվարի 12-ի թիվ 2/8-966 գրության հայտնում ենք, որ ձեռնարկված օպերատիվ-հետախուզական միջոցառումների արդյունքում պարզվել է, որ ս.թ. փետրվարի 10-ին Աբու-Դաբի-Երևան չվերթով ՀՀ ժամանած Բուլղարիայի քաղաքացի Հասան Աբդո Ալ Շաերը /Hasan Abdo Al Shaer/ իր անվամբ գրանցված 041-041013 բջջային հեռախոսահամարով անմիջապես կապնվել է 095-827973 հեռախոսահամարի բաժանորդ, Լիբանանի քադաքացի Ֆիրաս Վեհբեի /Firas Wehbe\ հետ, որը ՀՀ է ժամանել ս.թ. փետրվարի 9-ին Ստամբուլ-Երևան չվերթով։
Նույն տվյալների համաձայն` Երևանում գտնվելու ընթացքում Հասան Աբդո Ալ Շաերը բնակվել է Ամիրյան 5-7 հասցեում։ 2015 թվականի փետրվարի 10-ին Ֆիրաս Վեհբեն այցելել է նշված հասցե, որից հետո նրանք միասին գնացել են Ամիրյան փողոցի վրա գտնվող «Кавказcкая пленница” ռեստորան, այնուհետև տաքսիով մեկնել են «Շանգրի Լա» խաղատուն։
2015 թվականի փետրվարի 11-ի ցերեկը Ֆիրաս Վեհբեն այցելելով Ամիրյան 5-7 հասցե` իր հետ բերել է սև գույնի ճամպրուկ։ Նույն օրը երեկոյան 23-ի սահմաններում Հասան Աբդո Ալ Շաերը և Ֆիրաս Վեհբեն /տվյալ ճամպրուկը գտնվել Է Ֆիրաս Վեհբեի մոտ/ նշված հասցեից ոտքով փողոցի տարբեր մայթերով այցելել են «Շիրակ» հյուրանոց, որտեղ բակում Ֆիրաս Վեհբեն ճամպրուկը փոխանցել Է հյուրանոցից դուրս եկած Բուլղարիայի քաղաքացի Մալեկ Աբաս Ղարիբին /Malek Abas Garib/։ ճամպրուկի փոխանցման պահը դիմացի մայթից վերահսկել Հասան Աբդո Ալ Շաերը։ Այնուհետև Հասան Աբդո Ալ Շաերը և Ֆիրաս ՎԵհբեն միասին վերադարձել են Ամիրյան 5 հասցե, Հասան Աբդո Ալ Շաերը մնացել Է տվյալ հասցեում, իսկ Ֆիրաս Վեհբեն ոտքով գնացել է Եզ. Կողբացի 28 բն. 30 հասցե(…)»։
Որպես այլ փաստաթուղթ` ապացույց ճանաչված, ՀՀ ԿԱ ԱԱԾ քննչական վարչության պետին հասցեագրված, ՀՀ ԿԱ ԱԱԾ հակահետախուզության գլխավոր վարչության 2015 թվականի մարտի 20-ի թիվ 2/8-2372 գրության համաձայն` «Ի պատասխան Ձեր 2015 թվականի մարտի 12-ի թիվ 8/1012 գրության հայտնում ենք, որ տրամադրված տեղեկություններով` ձեռնարկված օպերատիվ-հետախուզական միջոցառումների արդյունքում պարզվել է, որ 2015 թվականի փետրվարի 02-ի կեսօրին Ֆիրաս Վեհբեն այցելել է Ամիրյան 5 բն. 7 հասցե, որտեղ բնակվել է Հասան Ալ-Շահերը։ Որոշ ժամանակ հետո, Հասան Ալ-Շահերը միայնակ դուրս է եկել բնակարանից և Ամիրյան 7 հասցեում տեղակայված գրախանութից գնել սև գույնի պատճենահանման թղթեր, որն իր հետ բերել է նույն բնակարան։
Բացի այդ հայտնում ենք, որ ուղեբեռի զննության ժամանակ Մալեկ Ղարիբի ճամպրուկի թաքստոցում հայտնաբերված թմրամիջոցները գտնվել են ճամպրուկի ներսում, ետնամասում առկա սպիտակ գույնի պլաստմասե պատնեշի հետևի մասում։ Նշված սպիտակ գույնի պլաստմասե պատնեշին փակցված են եղել պատճենահանման թղթեր, որոնք առանց վնասելու հնարավոր չի եղել թմրամիջոցները դուրս հանել թաքստոցից։»։
Նախաքննության մարմնի 2015 թվականի մայիսի 14-ի որոշմամբ իրեղեն ապացույցներ ճանաչված և դատարանում հետազոտված, 4717,31 գրամ մաքուր քաշով «կոկաին» տեսակի թմրամիջոցով, «ՍԱՄՍՈՆԻՏ» («SAMSONITE») գրառմամբ ճամպրուկով, «ՊՌՕՖԻ ՔՈՒՔ ՎԱՔՈՒՄ ՍԻԼԸՐ ՓԻՍԻ-ՎԿ 1015» («PROFI COOK Vacuum sealer PC-VK 1015») գրառմամբ վակումային սարքով և 1.500 Եվրո գումարով։
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանը վերլուծելով ամբաստանյալներ Ֆիրաս Մալեկ Վեհբեի, Մալեկ Աբաս Գարիբի, Հասան Աբդո Ալ-Շաերի ցուցմունքները, կատարել է հետևյալ եզրահանգումները:
«Ամբաստանյալ Մալեկ Աբաս Գարիբի 2015թ. մայիսի 20-ի նախաքննական ցուցմունքը և դատաքննական ցուցմունքը` ավտոմեքենաների առուվաճառքով զբաղվելու համար Ֆիրաս Վեհբեի կանչով ՀՀ ժամանելու, Ֆիրաս Վեհբեի` թմրամիջոցների հետ առնչվող գործունեությամբ զբաղվելու և ճամպրուկում թմրամիջոց լինելու մասին տեղյակ չլինելու, թմրամիջոցի հետ երբևէ առնչություն չունենալու, Ֆիրաս Վեհբեի կողմից տրված 1.500 Եվրոն որպես պարտքի գումար նրա կողմից վերադարձնելու մասին, ինչպես նաև առաջադրված մեղադրանքներն այլ պատճառաբանություններով հերքելու վերաբերյալ` իրականությանը չեն համապատասխանում, արժանահավատ չեն, քրեական պատասխանատվությունից և պատժից խուսափելու նպատակ են հետապնդում և հերքվում են վերոհիշյալ ապացույցներով։ Այդ պատճառով դատարանը որպես արժանահավատ ապացույց է գնահատում նրա նախաքննական ինքնախոստովանական ցուցմունքները։
Ամբաստանյալ Հասան Աբդո Ալ-Շաերի նախաքննական և դատաքննական ցուցմունքները` կենցաղային իրերի առևտրով զբաղվելու, շուկայի ուսումնասիրության, Հայաստանում ֆիրմա բացելու նպատակով Հայաստան ժամանելու, թմրամիջոցի մասին տեղյակ չլինելու, այդ մասին ազգային անվտանգության ծառայությունում իմանալու, թմրամիջոց տեղափոխելու խնդրանքով Ֆիրաս Վեհբեին չդիմելու վերաբերյալ` իրականությանը չեն համապատասխանում, արժանահավատ չեն, քրեական պատասխանատվությունից, պատժից խուսափելու նպատակ են հետապնդում և հերքվում են վերոհիշյալ ապացույցներով»։
Վերոգրյալ հիմքերի առկայության պայմաններում վերլուծելով գործի փաստական տվյալները, վերաքննիչ դատարանը հանգում է այն հետևության, որ ամբաստանյալներ Ֆիրաս Մալեկ Վեհբեի, Մալեկ Աբաս Գարիբի և Հասան Աբդո Ալ-Շաերի կողմից կատարված հանցանքները հիմնավորված և նրանց մեղավորությունը հաստատված է գործին վերաբերող փոխկապակցված հավաստի ապացույցների բավարար ամբողջությամբ, առաջին ատյանի դատարանն ամբաստանյալների արարքների քրեաիրավական որակման հարցում հանգել է ճիշտ հետևության և ղեկավարվելով օրենքով, դատաքննությամբ հետազոտված ապացույցների` գործի լուծման համար բավարարության տեսանկյունից գնահատման արդյունքում, հաստատված է համարել ամբաստանյալների մեղքը մեղսագրվող արարքներում, իսկ վերաքննիչ բողոքներում բերված պատճառաբանությունները հերքվում են նաև հետևյալով:
-Առաջին ատյանի դատարանի դատաքննությամբ հետազոտված ապացույցներով ըստ էության հաստատվում է Ֆիրաս Մալեկ Վեհբեի, Մալեկ Աբաս Գարիբի և Հասան Աբդո Ալ-Շաերի կողմից նախաքննության ընթացքում տված ցուցմունքների հավաստիությունը, որոնք փոխկապակցված են, լրացնում են մեկը մյուսին և հիմնավորում նրանցից յուրաքանչյուրի դերակատարությունը կատարված հանցանքում:
-ՀՀ քրեական օրենսգրքի 266-րդ հոդվածը պատասխանատվություն է նախատեսում ինչպես թմրամիջոցների իրացման, այնպես էլ իրացնելու նպատակով դրանք ձեռք բերելու, պահելու և փոխադրելու համար: Քրեական գործով ձեռք բերված ապացույցներով հիմնավորվել է, որ Ֆիրաս Մալեկ Վեհբեին 2015 թվականի փոետրվարի 11-ին Հասան Աբդո Ալ-Շաերիից իրացնելու նպատակով ապօրինաբար ձեռք է բերել, պահել և փոխադրել առանձնապես խոշոր չափերի՝ 4717,31 գրամ քաշով «կոկաին» տեսակի թմրամիջոց և այն ապօրինաբար իրացրել Մալեկ Աբաս Գարիբին, այսինքն կատարել նաև հանցանք, որ նախատեսված է ՀՀ քրեական օրենսգրքի 266-րդ հոդվածի 3-րդ մասով և այն ՀՀ քրեական օրենսգրքի 38-34-268-րդ հոդվածի 3-րդ մասի վերավորակելու հիմքերը բացակայում են:
-Հասան Աբդո Ալ-Շաերին ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով մեղադրանք առաջադրելիս նախաքննական մարմնի կողմից պահպանվել են ՀՀ քրեական դատավարության օրենսգրքի 202-րդ հոդվածի պահանջները, մեղադրանք առաջադրելու որոշման մեջ հստակորեն մատնանշված են նրա կողմից կատարված գործողությունները, մասնավորապես, որ նա առանձնապես խոշոր չափերի՝ 4717,31 գրամ քաշով «կոկաին» տեսակի թմրամիջոցը թաքցրել է ճամպրուկում և 2015 թվականի փետրվարի 11-ին այն տվել Ֆիրազ Վեհբեին, այդպիսով իրացնելով առանձնապես խոշոր չափերի այդ թմրամիջոցը և օժանդակելով թմրամիջոցը Հայաստանից մաքսանենգությամբ՝ մաքսային հսկողությունից թաքցնելու եղանակով, Թուրքիա տեղափոխելու փորձ կատարելուն։
-Գործը քննելիս և լուծելիս Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի կողմից պահպանվել են ՀՀ Սահմանադրության, ՀՀ քրեադատավարական օրենսդրության, Մարդու իրավունքների և հիմնարար ազատություների պաշտպանության մասին Եվրոպական կոնվենցիայի, ինչպես նաև ՀՀ Վճռաբեկ դատարանի նախադեպային որոշումների պահանջները:
Ամբաստանյալներ Հասան Աբդո Ալ-Շաերի, Մալեկ Աբաս Գարիբի և Ֆիրաս Մալեկ Վեհբեի նկատմամբ պատժի նշանակումն ու նրանց կողմից դրա կրման անհրաժեշտությունն առաջին ատյանի դատարանը մասնավորապես պատճառաբանել է հետևյալով:
<<(...) ՀՀ քրեական օրենսգրքի 66-րդ հոդվածի համաձայն` «1. Հանցանքների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով(…)։
4. Եթե հանցանքների համակցությունն ընդգրկում է ծանր կամ առանձնապես ծանր հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով։ Ընդ որում, ազատազրկման ձևով վերջնական պատիժը չի կարող գերազանցել քսանհինգ տարին։(…)»։
Ամբաստանյալ Ֆիրաս Մալեկ Վեհբեի նկատմամբ, իրեն վերագրվող յուրաքանչյուր հանցագործության կատարման համար պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Ֆիրաս Մալեկ Վեհբեի անձը` դրական բնութագրվելը, վատառողջ լինելը, խնամքին վատառողջ ծնողներ ունենալը, կատարված հանցագործությունների հանրային վտանգավորության աստիճանը` ամբաստանյալի կատարած արարքները ծանր և առանձնապես ծանր հանցագործությունների շարքին դասվելը, այն որ ապօրինի իրացվող և մաքսանենգությամբ փոխադրվող թմրամիջոցի քանակն ավելի քան չորս հազար յոթ հարյուր տասնյոթ անգամ գերազանցում է թմրամիջոցի այդ տեսակի համար սահմանված առանձնապես խոշոր չափի նվազագույն սահման հանդիսացող մեկ գրամը, ինչպես նաև հանցագործության կատարման եղանակը, հանցավոր մտադրության իրականացման աստիճանը, հանցագործությունը կատարելուց հետո ամբաստանյալի դրսևորած վարքագիծը` նախաքննության ընթացքում, առաջադրված մեղադրանքներում լիովին մեղավոր ճանաչելով` ինքնախոստովանական ցուցմունքներ տալը և հանցակիցներին առերես դրանք պնդելը։
Որպես ամբաստանյալ Ֆիրաս Մալեկ Վեհբեի պատասխանատվությունը և պատիժը մեղմացնող հանգամանք դատարանը հաշվի է առնում խնամքի տակ մինչև տասնչորս տարեկան երեք երեխաների առկայությունը, իսկ նրա պատասխանատվությունը և պատիժը ծանրացնող հանգամանք դատարանը չի արձանագրում։
Վերոգրյալը հաշվի առնելով` դատարանը գտնում է, որ ամբաստանյալ Ֆիրաս Մալեկ Վեհբեն ՀՀ քրեական օրենսգրքի 38-34-215-րդ հոդվածի 2-րդ մասով և ՀՀ քրեական օրենսգքրի 266-րդ հոդվածի 3-րդ մասի 2-րդ կետով նախատեսված հանցագործություններից յուրաքանչյուրի կատարման համար ենթակա է պատժի ազատազրկման ձևով` առանց գույքի բռնագրավման, քանի որ այդ պատիժն է անհրաժեշտ ու բավարար Ֆիրաս Մալեկ Վեհբեին ուղղելու և նրա կողմից նոր հանցանքի կատարումը կանխելու համար։
Դատարանը գտնում է, որ ՀՀ քրեական օրենսգրքի 66-րդ հոդվածի 4-րդ մասի կիրառմամբ, Ֆիրաս Մալեկ Վեհբեի նկատմամբ ՀՀ քրեական օրենսգրքի 266-րդ հոդվածի 3-րդ մասի 2-րդ կետով նշանակված պատժին մասնակիորեն գումարման է ենթակա ՀՀ քրեական օրենսգրքի 38-34-215-րդ հոդվածի 2-րդ մասով նախատեսված արարքի համար նշանակվող պատիժը։
Դատարանը գտնում է նաև, որ նշանակված պատիժն ամբաստանյալ Ֆիրաս Մալեկ Վեհբեն պետք է կրի, քանի որ դրան խոչընդոտող հանգամանքներ առկա չեն, պատժի կրումից նրան ազատելու վերաբերյալ բավարար հիմնավորումներ դատարանին չեն ներկայացվել։
Ամբաստանյալ Մալեկ Աբաս Գարիբի նկատմամբ, իրեն վերագրվող յուրաքանչյուր հանցագործության կատարման համար պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Մալեկ Աբաս Գարիբի անձը, կատարված հանցագործությունների հանրային վտանգավորության աստիճանը` ամբաստանյալի կատարած արարքները ծանր և առանձնապես ծանր հանցագործությունների շարքին դասվելը, այն որ ապօրինի իրացվող և մաքսանենգությամբ փոխադրվող թմրամիջոցի քանակն ավելի քան չորս հազար յոթ հարյուր տասնյոթ անգամ գերազանցում է թմրամիջոցի այդ տեսակի համար սահմանված առանձնապես խոշոր չափի նվազագույն սահման հանդիսացող մեկ գրամը, ինպես նաև հանցագործության կատարման եղանակը, հանցավոր մտադրության իրականացման աստիճանը։
Ամբաստանյալ Մալեկ Աբաս Գարիբի պատասխանատվությունը և պատիժը մեղմացնող և ծանրացնող հանգամանքներ դատարանը չի արձանագրում։
Վերոգրյալը հաշվի առնելով` դատարանը գտնում է, որ ամբաստանյալ Մալեկ Աբաս Գարիբը ՀՀ քրեական օրենսգրքի 34-215-րդ հոդվածի 2-րդ մասով և ՀՀ քրեական օրենսգքրի 266-րդ հոդվածի 3-րդ մասի 2-րդ կետով նախատեսված հանցագործություններից յուրաքանչյուրի կատարման համար ենթակա է պատժի ազատազրկման ձևով` առանց գույքի բռնագրավման, քանի որ այդ պատիժն է անհրաժեշտ ու բավարար Մալեկ Աբաս Գարիբին ուղղելու և նրա կողմից նոր հանցանքի կատարումը կանխելու համար։
Դատարանը գտնում է, որ ՀՀ քրեական օրենսգրքի 66-րդ հոդվածի 4-րդ մասի կիրառմամբ, Մալեկ Աբաս Գարիբի նկատմամբ ՀՀ քրեական օրենսգրքի 266-րդ հոդվածի 3-րդ մասի 2-րդ կետով նշանակված պատժին մասնակիորեն գումարման է ենթակա ՀՀ քրեական օրենսգրքի 34-215-րդ հոդվածի 2-րդ մասով նախատեսված արարքի համար նշանակվող պատիժը։
Դատարանը գտնում է նաև, որ նշանակված պատիժն ամբաստանյալ Մալեկ Աբաս Գարիբը պետք է կրի, քանի որ դրան խոչընդոտող հանգամանքներ առկա չեն, պատժի կրումից նրան ազատելու վերաբերյալ բավարար հիմնավորումներ դատարանին չեն ներկայացվել։
Ամբաստանյալ Հասան Աբդո Ալ-Շաերի նկատմամբ պատիժ նշանակելիս` դատարանը հաշվի է առնում վերոհիշյալ իրավական ակտերում և նախադեպային որոշումներում արտահայտված իրավական դիրքորոշումները, ամբաստանյալ Հասան Աբդո Ալ-Շաերի անձը, կատարված հանցագործությունների հանրային վտանգավորության աստիճանը` ամբաստանյալի կատարած արարքները ծանր և առանձնապես ծանր հանցագործությունների շարքին դասվելը, այն որ ապօրինի իրացվող և մաքսանենգությամբ փոխադրվող թմրամիջոցի քանակն ավելի քան չորս հազար յոթ հարյուր տասնյոթ անգամ գերազանցում է թմրամիջոցի այդ տեսակի համար սահմանված առանձնապես խոշոր չափի նվազագույն սահման հանդիսացող մեկ գրամը, ինչպես նաև հանցագործության կատարման եղանակը, հանցավոր մտադրության իրականացման աստիճանը։
Ամբաստանյալ Հասան Աբդո Ալ-Շաերի պատասխանատվությունը և պատիժը մեղմացնող և ծանրացնող հանգամանքներ դատարանը չի արձանագրում։
Վերոգրյալը հաշվի առնելով` դատարանը գտնում է, որ ամբաստանյալ Հասան Աբդո Ալ-Շաերը ՀՀ քրեական օրենսգրքի 38-34-215-րդ հոդվածի 2-րդ մասով և ՀՀ քրեական օրենսգքրի 266-րդ հոդվածի 3-րդ մասի 2-րդ կետով նախատեսված հանցագործություններից յուրաքանչյուրի կատարման համար ենթակա է պատժի ազատազրկման ձևով` առանց գույքի բռնագրավման, քանի որ այդ պատիժն է անհրաժեշտ ու բավարար Հասան Աբդո Ալ-Շաերին ուղղելու և նրա կողմից նոր հանցանքի կատարումը կանխելու համար։
Դատարանը գտնում է, որ ՀՀ քրեական օրենսգրքի 66-րդ հոդվածի 4-րդ մասի կիրառմամբ, Հասան Աբդո Ալ-Շաերի նկատմամբ ՀՀ քրեական օրենսգրքի 266-րդ հոդվածի 3-րդ մասի 2-րդ կետով նշանակված պատժին մասնակիորեն գումարման է ենթակա ՀՀ քրեական օրենսգրքի 38-34-215-րդ հոդվածի 2-րդ մասով նախատեսված արարքի համար նշանակվող պատիժը։
Դատարանը գտնում է նաև, որ նշանակված պատիժն ամբաստանյալ Հասան Աբդո Ալ-Շաերը պետք է կրի, քանի որ դրան խոչընդոտող հանգամանքներ առկա չեն, պատժի կրումից նրան ազատելու վերաբերյալ բավարար հիմնավորումներ դատարանին չեն ներկայացվել(...)>>:
Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի դատավճիռը պատճառաբանված ու հիմնավորված է գործի փաստական հանգամանքներով, ամբաստանյալների պատիժն ու պատախանատվությունը մեղմացնող հանգամանքներով, այդպիսիք ծանրացնող հանգամանքների բացակայությամբ, որոնց պայմաններում դատարանը պահպանելով ՀՀ քրեական օրենսգրքի 10-րդ, 48-րդ, 61-րդ հոդվածների պահանջները, Մալեկ Աբաս Գարիբիի, Ֆիրաս Մալեկ Վեհբեինի և Հասան Աբդո Ալ-Շաերի նկատմամբ նշանակել է պատիժ, որը համապատասխանում է կատարված հանցանքների բնույթին ու ամբաստանյալների անձնավորությանը:
Առաջին ատյանի դատարանի կողմից ճիշտ են կիրառվել նաև ՀՀ քրեական օրենսգրքի 66-րդ հոդվածի պահանջները:
ՀՀ քրեական օրենսգրքի 70-րդ հոդվածի կիրառման առնչությամբ ՀՀ Վճռաբեկ դատարանը Սարգիս Մարգարյանի վերաբերյալ գործով 2008թ-ի հոկտեմբերի 31-ի որոշմամբ արտահայտել է հետևյալ իրավական դիրքորոշումը.
<<(...)Պատիժը կարող է պայմանականորեն չկիրառվել, եթե առկա է դատարանի համոզվածությունը, վստահությունն առանց ռեալ (իրական) պատիժ նշանակելու դատապարտյալի ուղղվելու հնարավորության մասին: Դատարանը նման հետևության հանգում է միայն օբյեկտիվ գոյություն ունեցող տվյալների վերլուծության հիման վրա, որոնք բնութագրում են արարքը, հանցավորի անձը և վկայում են պատիժը պայմանականորեն չկիրառելու հիմքերի առկայության մասին>>:
ՀՀ Վճռաբեկ դատարանն իր իրավական դիրքորոշումը վերահաստատել է Հասմիկ Պետրոսյանի վերաբերյալ գործով 2009թ-ի հունիսի 29-ի ԱՐԱԴ/0050/01/08 որոշմամբ, համաձայն որի, օրենսդիրը պատիժը պայմանականորեն չկիրառելու հիմք է համարում դատարանի համոզվածությունը, որ դատապարտյալի ուղղվելը հնարավոր է առանց որոշակի պատժատեսակները ռեալ կրելու:
<<Հանցագործության համար մեղավոր ճանաչված անձի նկատմամբ ինչպես պատժատեսակի և պատժաչափի, այնպես էլ նշանակված պատիժը կրելու նպատակահարմարության վերաբերյալ դատարանի որոշումը պետք է հիմնված լինի կատարած հանցագործության, դրա առանձնահատկությունների, գործի կոնկրետ հանգամանքների, հանցավորի անձի, պատասխանատվությունը և պատիժը մեղմացնող կամ ծանրացնող հանգամանքների բազմակողմանի գնահատման վրա՝ օրինականության, արդարության, պատասխանատվության անհատականացման և մարդասիրության սկզբունքներին համապատասխան, նպատակ ունենալով ապահովել ՀՀ քրեական օրենսգրքի 48-րդ հոդվածի 2-րդ մասում նշված պատժի նպատակների իրագործման հնարավորությունը>>. (տե´ս Արթուր Անտոնյանի վերաբերյալ գործով ՀՀ Վճռաբեկ դատարանի՝ 2010թ. մարտի 26-ի ՍԴ/0226/01/09 որոշումը):
Հաշվի առնելով վերոնշյալ հանգամանքները, արարքների բնույթն ու վտանգավորության աստիճանը, գործի կոնկրետ հանգամանքները, վերաքննիչ դատարանը հանգում է այն հետևության, որ ուղղվելու համար առաջին ատյանի դատարանի կողմից նշանակված պատիժը ամբաստանյալներ Մալեկ Աբաս Գարիբին և Ֆիրաս Մալեկ Վեհբեին պետք է կրեն, և վերաքննիչ բողոքներում մատնանշված հանգամանքները, որոնք արդեն իսկ հաշվի են առնվել պատիժ նշանակելիս, հիմք չեն կարող հանդիսանալ Ֆիրաս Մալեկ Վեհբեիին ՀՀ քրեական օրենսգրքի 70-րդ հոդվածի կիրառմամբ պայմանականորեն դատապարտելու կամ ՀՀ քրեական օրենսգրքի 64-րդ հոդվածի հիման վրա նրա նկատմամբ օրենքով նախատեսվածից ավելի մեղմ պատիժ նշանակելու, ինչպես նաև Մալեկ Աբաս Գարիբիի նկատմամբ ավելի մեղմ պատիժ նշանկելու համար:
Այսպիսով, հիմք ընդունելով նաև առաջին ատյանի դատարանի պատճառաբանությունները, գործով ձեռք բերված ապացույցների գնահատմամբ վերաքննիչ դատարանը հանգում է այն հետևության, որ ամբաստանյալներ Ֆիրաս Մալեկ Վեհբեինի վերաբերյալ ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով, Մալեկ Աբաս Գարիբիի վերաբերյալ ՀՀ քրեական օրենսգրքի 34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով և Հասան Աբդո Ալ-Շաերի վերաբերյալ ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճիռն օրինական է ու հիմնավորված, այն բեկանելու և փոփոխելու հիմքեր չկան, հետևաբար վիճարկվող դատական ակտը պետք է թողնել անփոփոխ, իսկ պաշտպանների և ամբաստանյալների վերաքննիչ բողոքները` մերժել:

Ելնելով վերոգրյալից և ղեկավարվելով ՀՀ քրեական դատավարության օրենսգրքի 393-394-րդ, հոդվածներով վերաքննիչ քրեական դատարանը

Ո Ր Ո Շ Ե Ց

Երևանի Կենտրոն և Նորք-Մարաշ վարչական շրջանների ընդհանուր իրավասության դատարանի 2015 թվականի դեկտեմբերի 03-ի դատավճիռը քրեական գործով ըստ մեղադրանքի Ֆիրաս Մալեկ Վեհբեինի` ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով, Մալեկ Աբաս Գարիբիի` ՀՀ քրեական օրենսգրքի 34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով և Հասան Աբդո Ալ-Շաերի` ՀՀ քրեական օրենսգրքի 38-34-215-րդ հոդվածի 2-րդ մասով, 266-րդ հոդվածի 3-րդ մասի 2-րդ կետով թողնել անփոփոխ, պաշտպաններ Կ.Քամալյանի, Հ.Իսրաելյանի, Հ.Ճարոյանի և ամբաստանյալներ Մալեկ Աբաս Ղարիբի, Հասան Աբդո Ալ Շահերի վերաքննիչ բողոքները` մերժել:
Որոշումը կարող է բողոքարկվել ՀՀ Վճռաբեկ դատարանին` հրապարակումից մեկամսյա ժամկետում:



ՆԱԽԱԳԱՀՈՂ ԴԱՏԱՎՈՐ` ստորագրություն
ԴԱՏԱՎՈՐՆԵՐ` ստորագրություններ
Իսկականի հետ ճիշտ է

ՆԱԽԱԳԱՀՈՂ ԴԱՏԱՎՈՐ` Մ.ԱՐՂԱՄԱՆՅԱՆ