ԵԿԴ /0010/01/15
Ո Ր Ո Շ Ո Ւ Մ

ՔՐԵԱԿԱՆ ՊԱՏԱՍԽԱՆԱՏՎՈՒԹՅՈՒՆԻՑ ԱԶԱՏԵԼՈՒ, ՔՐԵԱԿԱՆ ՀԵՏԱՊՆԴՈՒՄԸ ԴԱԴԱՐԵՑՆԵԼՈՒ ԵՎ ՔՐԵԱԿԱՆ ԳՈՐԾԻ ՎԱՐՈՒՅԹԸ ԿԱՐՃԵԼՈՒ
ՄԱՍԻՆ

,,23,, մարտի 2015թ. ք. Երևան

ՀՀ Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանը`


Նախագահությամբ դատավոր Մ. Մակյանի

Քարտուղարությամբ` Թ. Խաչատրյանի

Մասնակցությամբ `

Մեղադրող Ա. Մանուկյանի

Ամբաստանյալ` Ա. Մաթևոսյանի

Հանրային պաշտպան Ա. Հակոբյանի


2015թ. մարտի 23-ին, դռնբաց դատական նիստում, Երևան քաղաքում, քննելով քրեական գործն ըստ մեղադրանքի`

Արամ Հայրապետի Մաթևոսյանի` ծնված 15.07.1935թ.,
Վրաստանում, ազգությամբ հայ, ՀՀ քաղաքացի,
ամուսնացած, նախկինում չդատված, չի աշխատում,
հաշվառված է ք. Երևան, Դ.Անհաղթ 23/1 շենք, 22
բնակարան, բնակվում է ք. Երևան, Դ.Մալյան նրբանցք
5 շենք, բնակարան 55, խափանման միջոց է ընտրվել
չհեռանալու մասին ստորագրությունը, մեղադրվում է ՀՀ
քր. օր-ի 333-րդ հոդվածի 1-ին մասով,



Պ Ա Ր Զ Ե Ց

Ըստ նախաքննական մարմնի կողմից դատարան ներկայացրած նյութերի`

«Արամ Հայրապետի Մաթևոսյանը, 04.10.2014թ. ոստիկանության Կենտրոնականի բաժնում հաղորդում է տվել այն մասին, որ 2014թ. հոկտեմբերի 1-ին՝ ժամը 10։00-ի սահմաններում, Վ.Համբարձումյանը Երևան քաղաքի Պուշկին փողոցում գտնվող «Սուրբ Զորավոր» եկեղեցու մոտակայքում վիճաբանել է իր հետ, որի ընթացքում ձեռնափայտով մի քանի անգամ հարվածներ է հասցրել մարմնի տարբեր հատվածներին՝ պատճառելով ֆիզիկական ցավ։
Արամ Հայրապետի Մաթևոսյանի հաղորդման առթիվ 2014 թվականի ապրիլի 26-ին Կենտրոն և Նորք-Մարաշ վարչական շրջանների քննչական բաժնում ՀՀ քրեական օրենսգրքի 118-րդ հոդվածով հարուցված թիվ 13810014 քրեական գործի նախաքննության ընթացքում Արամ Մաթևոսյանը որպես տուժող ցուցմունք է տվել այն սասին, որ, 2014 թվականի հոկտեմբերի 1-ին Վարգես Համբարձումյանը Երևան քաղաքի «Սուրբ Զորավոր» եկեղեցու մոտակայքում իր հետ վիճաբանել է և այդ ընթացքում ձեռնափայտով հարվածել է իրեն, սակայն որպես վկա հարցաքննված Վարդգես Համբարձումյանը հերքել է իր կողմից Արամ Մաթևոսյանին հարվածելու հանգամանքը և պարզաբանել, որ 2014 թվականի սեպտեմբերի 15-ից մինչև հոկտեմբերի 4-ը գտնվել է ՀՀ-ից դուրս, ինչը հաստատվել է նաև կատարված համապատասխան «ՍԷԿՏ» հարցմամբ։ Այնուհետև, Արամ Մաթևոսյանը և Վարդգես Համբարձումյանը առերես հարցաքննվել են, որի ընթացքում Արամ Մաթևոսյանը պնդել է իր նախկինում հայտնածը և նաև հայտնել, որ Վարդգես Համբարձումյանի կողմից իրեն հարվածելու հետևանքով ունեցել է առողջականծ խնդիրներ, որի հետ կապված գնել է դեղամիջոցներ կրելով 550.000 ՀՀ դրամի գույքային վնաս, որը պահանջել է Վարդգես Համբարձումյանից։ Նախաքննության ընթացքում ստացված դատաբժշկական փորձաքննության թիվ 1740/հ եզրակացության համաձայն, Ա.Մաթևոսյանի ստացած մարմնական վնասվածքները կրծքավանդակի աջ կեսի սալջարդի, աջից որովայնի առաջնային պատի շրջանի արյունազեղման ձևով, պատճառվել են բութ առարկաներով, հնարավոր է որոշման մեջ նշված ժամկետում և հանգամանքերում, որոնք առողջության թեթև վնասի հատկանիշներ չեն պարունակում։ Ստացված եզրակացության շուրջ որպես փորձագետ հարցաքննված Կ.Ղարիբջանյանը հայտնել, որ փորձաքննության մեջ նշված վնասվածքները կարող էին առաջանալ ինչպես Ա.Մաթևոսյանի, այնպես էլ մեկ ուրիշ անձի կողմից բութ առարկայով հարվածելու հետևանքով։
Այսպիսով, թիվ 13810014 քրեական գործի կատարված նախաքննությամբ պարզվել է, առ Վարդգես Համբարձումյանը 2014 թվականի հոկտեմբերի 1-ին գտնվել է ՀՀ-ից դուրս, որպիսի պայմաններում բացառվում է, վերջինիս կողմից Ա.Մաթևոսյանին 2014 թվականի հոկտեմբերի 1-ին ծեծի ենթարկելու հանգամանքը, ուստի Երևան քաղաքի Դ.Անհաղթի փողոցի 23/1 շենքի 22 բնակարանում հաշվառված, Երևան քաղաքի Դ.Մալյան նրբանցքի 5 շենքի 55 բնակարանում փաստացի բնակվող, գործով մեղադրյալ Արամ Հայրապետի Մաթևոսյանը, գիտակցելով իր տրամադրած տեղեկատվության կեղծ լինելու հանգամանքը, մեղադրանքի արհեստական ապացույցներ ստեղծելով, այն Է իրեն՝ առողջության թեթև վնասի հատկանիշներ չպարունակող մարմնական վնաս պատճառելով և շահադիտական դրդումներով, այն Է դրամական օգուտ ստանալու ձգտմամբ, որը դրսևորվել Է Վարդգես Համբարձումյանից այն պահանջելով, 2014թ. հոկտեմբերի 4-ին ՀՀ ոստիկանության Կենտրոնական բաժնում իրականությանը չհամապատասխանող հաղորդում Է տվել այն այն մասին, որ 2014թ. հոկտեմբերի 1-ին՝ ժամը 10։00-ի սահմաններում, Վարդգես Համբարձումյանը Երևան քաղաքի Պուշկին փողոցում գտնվող «Սուրբ Զորավոր» եկեղեցու մոտակայքում վիճաբանել Է իր հետ, որի ընթացքում ձեռնափայտով մի քանի անգամ հարվածներ Է հասցրել մարմնի տարբեր հատվածներին՝ պատճառելով ֆիզիկական ցավ»։
2014 թվականի դեկտեմբերի 12-ին թիվ 13810014 քրեական գործի նյութերով Արամ Հայրապետի Մաթևոսյանի կողմից մեղադրանքի արհեստական ապացույցներ ստեղծելով, շահադիտական դրդումներով, հանցագործության մասին սուտ մատնություն կատարելու դեպքի առթիվ ՀՀ քրեական օրենսգրքի 333-րդ հոդվածի 2-րդ մասի 2-րդ և 3-րդ կետերի հատկանիշներով հարուցել թիվ 13827614 քրեական գործը, այն առանձնացվել է առանձին վարույթ և առանձին վարույթում շարունակվել Է նախաքննության կատարումը։

Վերոգրյալ հանցավոր արարքի կատարման համար Արամ Հայրապետի Մաթևոսյանին մեղադրանք Է առաջադրվել ՀՀ քրեական օրենսգրքի 333-րդ հոդվածի 2-րդ մասի 2-րդ և 3-րդ կետերով»։

21.01.2015թ. որոշում է կայացվել Արամ Հայրապետի Մաթևոսյանին որպես մեղադրյալ ներգրավելու մասին և նրան մեղադրանք է առաջադրվել ՀՀ քրեական օրենսգրքի 333-րդ հոդվածի 2-րդ մասի 2-րդ և 3-րդ կետերով և որպես խափանման միջոց ընտրվել է չհեռանալու մասին ստորագրությունը։

09.02.2015թ.-ին, գործով մեղադրական եզրակացությունը հաստատելիս, դատավարական հսկողություն իրականացնող դատախազը, օգտվելով իր դատավարական լիազորություններից, որոշում է կայացրել Արամ Հայրապետի Մաթևոսյանին նախկինում առաջադրված մեղադրանքից՝ ՀՀ քրեական օրենսգրքի 333-րդ հոդվածի 2-րդ մասի 2-րդ և 3-րդ կետերով առաջադրված մեղադրանքը հանելու և վերջինիս մեղադրանքը ՀՀ քրեական օրենսգրքի 333-րդ հոդվածի 1-ին մասին համապատասխանեցնելու մասին։

Այդ մեղադրանքով հաստատելով մեղադրական եզրակացությունը, դատախազը գործն ուղարկել է դատարան, իսկ Արամ Հայրապետի Մաթևոսյանի նկատմամբ որպես խափանման միջոց ընտրված չհեռանալու մասին ստորագրությունը՝ թողել է անփոփոխ։

Քրեական գործը ՀՀ Երևան քաղաքի Կենտրոն և Նորք-Մարաշ Վարչական շրջանների ընդհանուր իրավասության դատարան է ստացվել և մուտքագրվել 10.02.2015թ.-ին, իսկ 11.02.2015թ.-ին կայացվել է որոշում` քրեական գործը վարույթ ընդունելու մասին։

ՀՀ քրեական օրենսգրքի 333-րդ հոդվածի 1-ին մասով առաջադրված մեղադրանքում ամբաստանյալ Արամ Մաթևոսյանն իրեն մեղավոր չի ճանաչել և ցուցմունք է տվել այն մասին, որ 2014 թվականի հոկտեմբերի 1-ին Երևան քաղաքի Պուշկին փողոցում գտնվող «Սուրբ Զորավոր» եկեղեցու մոտակայքում Վարդգես Համբարձումյանի կողմից իրեն մարմնական վնասվածք չի պատճառվել, նախաքննական մարմնին իրականությանը չհամապատասխանող հաղորդում չի տվել, այլ չի կարողացել ճիշտ կերպով բացատրել իրավիճակը։ Իրականում խոսքը վերաբերել է իրեն՝ նախկինում, նույն թվականի ապրիլ ամսին ծեծի ենթարկելու դեպքին։

Դատարանում հրապարակվել և հետազոտվել են՝

սույն քրեական գործով վկա Վարդգես Թաթոսի Համբարձումյանի նախաքննական ցուցմունքն այն մասին, որ երբևէ Արամ Մաթևոսյանին չի հարվածել, իսկ 2014 թվականի սեպտեմբերի 15-ից մինչև հոկտեմբերի 4-ը գտնվել է ՀՀ տարածքից դուրս, ուստի 2014 թվականի հոկտեմբերի 1-ին ֆիզիկապես չէր կարող լինել ամբաստանյալի մատնանշած վայրում, առավել ևս ծեծի ենթարկել Արամ Մաթոսյանին։

/տես` հատոր 1, գ.թ. 29-30, 102-103, դատական նիստի արձանագրությունը/

Թիվ 13810014 քրեական գործի շրջանակներում տուժող Արամ Հայրապետի Մաթևոսյանի և վկա Վարդգես Թաթոսի Համբարձումյանի առերես հարցաքննության արձանագրությունը, որում Արամ Մաթևոսյանը պնդում է իր հայտնած տեղեկությունները և հայտնում, որ Վարդգես Համբարձումյանի կողմից ծեծի ենթարկվելու արդյունքում ունեցել է առողջական խնդիրներ և օգտագործել դեղամիջոցներ, որոնց գնման համար ծախսել է 550.000 ՀՀ դրամ գումար և այդ գումարր պահանջել է առերեսվող Վարդգես Համբարձումյանից։

/տես` հատոր 1, գ.թ. 37-38, դատական նիստի արձանագրությունը/

Դատաբժշկական փորձաքննության թիվ 1740/հ եզրակացությունը, համաձայն որի՝ Արամ Մաթևոսյանի ստացած մարմնական վնասվածքները՝ կրծքավանդակի աջ կեսի սալջարդի, աջից որովայնի առաջնային պատին շրջանի արյունազեղման ձևով, պատճառվել են բութ առարկաներով, հնարավոր է որոշման մեջ նշված ժամկետում և հանգամանքրեում, որոնք առողջության թեթև վնասի հատկանիշներ չեն պարունակում։

/տես` հատոր 1, գ.թ. 25-26, դատական նիստի արձանագրությունը/

Ապացույց ճանաչված այլ փաստաթուղթ հանդիսացող Արամ Հայրապետի Մաթևոսյանի կողմից 04.10.2014թ. ոստիկանության Կենտրոնական բաժնում հաղորդում տալու մասին թիվ 017359 արձանագրությունը, ինչպես նաև ոստիկանության Քրեական հետախուզության գլխավոր վարչությունից թիվ 3/1-8259 գրությամբ ստացված Վարդգես Համբարձումյանի վերաբերյալ «ՍԷԿՏ» համակարգում առկա տեղեկությունները, որոնցով հաստատվում է Արամ Մաթևոսյանի կողմից սուտ մատնություն կատարելու և 2014 թվականի հոկտեմբերի 1-ին Վարդգես Համբարձումյանի ՀՀ-ից դուրս գտնվելու հանգամանքները։

/տես` հատոր 1, գ.թ. 110-111, դատական նիստի արձանագրությունը/

Դատարանում հրապարկվել են նաև ամբաստանյալի անձը բնութագրող, նրա սոցիալական և առողջական վիճակի մասին փաստաթղթերը։

Հիվանդության 3635 պատմագիրը, համաձայն որի՝

«Մաթևոսյան Արամ Հայրապետի 1935թ.. ծնված, ընդունվել է Սրտաբանության ԳՀԻ իշեմիկ հիվանդութության բաժանմունք՝ 29.12.2014թ.-ին՝ ծանր վիճակով, սուր սրտային անբավարարության երևույթներով։
ԳԱՆԳԱՏՆԵՐԸ՝ շնչահեղձություն, արտահայտված հևոց, ցավ կրծոսկրի հետևում, քրտինք, ընդհանուր թուլություն, Anamnezis morbi։ Սրտամկանի ինֆարկտ, Բուժվել է Սրտաբանության ԳՀԻ-ում։ Վերջին տարում նշում է զարկերակային ճնշման բարձրացում, կայուն, բարձր թվերի վրա։
ՕԲՅԵԿՏԻՎ ՔՆՆՈՒԹՈՒՆ` Ընդհանուր վիճակը ծանր, դիրքը՝ հարկադրական, կիսանստած. Մաշկը և տեսանելի լորձաթաղանթները, պաստոզ, ցիանոտիկ երանգավորումով, ակրոցիանոզ, սառը քրտինք։ Գիտակցությունը՝ պահպանված, ադինամիկ, անտրամադիր, հարցերին պատասխանում է դժվարությամբ։ Որովայնը փքված. Պերիֆերիկ այտուցներ թաթերի շրջանում։ Հասակը՝ 171, քաշը՝72կգ, ՄԶԻ 24,8
Սրտի տոները խլացած, հաճախ, առիթմիկ. Սիստոլիկ աղմուկ գագաթում և աորտայի վրա։ Պուլսը 90 զարկ/րոպե, առիթմիկ.՝ Զարկերակային ճնշումը 170/100 մմ սս
Թոքերում կանգային խզոցներ, աջից ավելի շատ։ Փեշերում շնչառությունը չի հաղորդվում։ Լյարդը մեծ 2-3 սմ, ցավոտ։ Ունեցել է դիզուրիկ գանգատներ, նիկաուրիա 1 -2 անգամ։
Արյան ընդհանուր քննություն Հեմոգլոբին 160 էրիթրոցիտներ 4,4 5.6 լեյկոցիտներ 7.6 ԷՆԱ 6 մմ/ժամ։ Մեզը՝ տեսակարար կշիռը 1018 սպիտ՝ հետքեր, էպիթել, լեյկոցիտ 1-2 տեսադաշտում, օքսալատներ աննշան քանակ. Արյան բիոքիմիական քննություն արյան գլյուկոզա 4.4
ԷՍԳ Սինուսային ռիթմ. Սպիական պատկեր ձախ փորոքի հետևի պատի վրա։ Սնուցման խանգարումներ հետին, կողմ-նային պատերի շրջանում։
ԷԽՈ-ՍԳ ստորին բազալ-բազալ ակինեզ. Արտամղման ֆրակցիան 40% փորոք. Ձախ փորոքի կոնցենտրիկ գերաճ։ Աորտալ ստենոզ 1,1 սմ 2 Միջին արտահայտված միտրալ ստենոզ։
ՌԵՆՏԳԵՆ Ստոծանու աջ գմբեթը բարձր դիրք ունի լյարդի մեծացման պատճառով։ Թոքային պատկերը ուժեղացած է, դեֆորմացված արմատների շրջանում և ստորին հատվածներում, ինտերստիցիալ փոփոխություններ, թոքի կանգի պատկեր։ Սիրտը՝ թեք դիրք, իրանը հարթված է։ Ձախ փորոքի գերաճ և լայնացում։ Աորտան պնդացած է, սկլերոտիկ փոփոխված։
ԱԽՏՈՐՈՇՈՒՄԸ Սրտի իշեմիկ հիվանդություն հանգստի և լարվածության ստենոկարդիա, (ֆունկցիոնալ դաս 4). Հետինֆարկտային կարդիոսկլերոզ, Սպիական փոփոխություններ ձախ փորոքի հետին պատի շրջանում։ Զարկերակային հիպերտոնիա երկրորդ աստիճան, չափավոր ձև, Միտրալ, հարաբերական անբավարարություն, Աորտալստենոզ մինիմալ Փորոքային էքստրասիստոլիկ առիթմիա ՍԱ-3 NYHA դասակարգմամբ։
Սիրտ-անոթային համակարգի բարդություններից վերջնակետերի զարգացման ռիսկը, ըստ «SKORE» -ի կազմում է 17 %։
ԲՈւժՈւՄ իզոդինիտ, էնալապրիլ, ամլոդիպին, էգիլոկ, ֆուրոսեմիդ, կարդիոլայֆ։
Դուրս գրում. 13.01.14թ. վիճակի հարաբերական կայունացումով, խորհուրդ է տրվում սրտաբանի հսկողություն, բուԺում

/ տես` դատական նիստի արձանագրությունը/

Դատարանում հրապարակվել և հետազոտվել են նաև Արամ Հայրապետի Մաթևոսյանի վերաբերյալ ՀՀ ոստիկանության ինֆորմացիոն կենտրոնի կողմից տրված պահանջագիրը, թիվ 60245 հաշմանդամության 2-րդ կարգի վերաբերյալ բժշկական տեղեկանքը և կենսաթոշակառուի վկայականը։

/տես` հատոր 1, գ.թ. 107, դատական նիստի արձանագրությունը/

Ամբաստանյալ Ա.Մաթևոսյանի շահերի պաշտպան Ա.Հակոբյանը 23.03.2015թ.-ին կայացած դատական նիստի ժամանակ միջնորդել է իր պաշտպանյալին մեղսագրված` ՀՀ քրեական օրենսգրքի 333-րդ հոդվածի 1-ն մասով արարքի կատարման վերաբերյալ հարուցված քրեական հետապնդումը դադարեցնել և քրեական գործի վարույթը կարճել` իրադրության փոփոխման հիմքով։

Գործով մեղադրող Ա.Մանուկյանն առարկել է ներկայացված միջնորդության դեմ և միջնորդել է ամբաստանյալին մեղավոր ճանաչել կատարած հանցավոր արարքի համար և նրա նկատմամբ պատիժ նշանակել տուգանք։

Դատարանը, խորհրդակցական սենյակում ուսումնասիրելով քրեական գործի նյութերը, համադրելով և վերլուծելով դրանք հանգում է այն հետևության, որ Արամ Մաթևոսյանը կատարել է արարք` նախատեսված ՀՀ քրեական օրենսգրքի 333-րդ հոդվածի 1-ին մասով, որի համար ենթակա է պատժի, սակայն դատարանը գտնում է, որ Արամ Հայրապետի Մաթևոսյանի նկատմամբ ՀՀ քրեական օրենսգրքի 333-րդ հոդվածի 1-ի մասով հարուցված քրեական հետապնդումը ենթակա է դադարեցման, իսկ քրեական գործի վարույթը՝ կարճման, հետևյալ պատճառաբանությամբ.

Ամբաստանյալ Ա.Մաթևոսյանին մեղադրանք է առաջադրվել ՀՀ քրեական օրենսգրքի 333-րդ հոդվածի 1-ին մասով նախատեսված արարքի` սուտ մատնություն` այն բանի համար, որ նա 04.10.2014թ.-ին ՀՀ ոստիկանության Կենտրոնականի բաժնում իրականությանը չհամապատասխանող հաղորդում է տվել։ Ըստ հաղորդման` 2014թ. հոկտեմբերի 1-ին՝ ժամը 10։00-ի սահմաններում, Վարդգես Համբարձումյանը Երևան քաղաքի Պուշկին փողոցում գտնվող «Սուրբ Զորավոր» եկեղեցու մոտակայքում վիճաբանել Է իր հետ, որի ընթացքում ձեռնափայտով մի քանի անգամ հարվածներ Է հասցրել մարմնի տարբեր հատվածներին՝ պատճառելով ֆիզիկական ցավ։

Դատարանը, ուսումնասիրելով քրեական գործի նյութերը, մասնավորապես այն, որ ամբաստանյալ Արամ Հայրապետի Մաթևոսյանը զառամյալ է՝ մոտ 80 /ութսուն/ տարեկան, թոշակառու է, հանդիսանում է 2-րդ կարգի հաշմանդամ, արարքը կատարելուց հետո հիվանդացել և ներկայումս տառապում է սրտի իշեմիկ հիվանդությամբ, նշված հանգամանքները գնահատում է որպես իրադրության այնպիսի փոփոխություն, որի արդյունքում ամբաստանյալի անձը դադարել է հանրության համար վտանգավոր լինելուց։

Ինչպես նշվեց վերևում՝ ամբաստանյալ Ա.Մաթևոսյանը մեղադրվում է ՀՀ քրեական օրենսգրքի 333-րդ հոդվածի 1-ին մասով, որը նույն օրենսգրքի 19-րդ հոդվածի համաձայն դասվում է ոչ մեծ ծանրության հանցագործությունների շարքին։

ՀՀ քրեական դատավարության օրենսգրքի 37-րդ հոդվածի 1-ին մասի համաձայն`

1. Դատարանը, դատախազը, ինչպես նաև դատախազի համաձայնությամբ՝ քննիչը կարող են հարուցված քրեական գործի վարույթը կարճել և քրեական հետապնդումը դադարեցնել Հայաստանի Հանրապետության քրեական օրենսգրքի 72-րդ, 73-րդ և 74-րդ հոդվածներով նախատեսված դեպքերում։


/../ 3. Հայաստանի Հանրապետության քրեական օրենսգրքի 72-րդ և 74-րդ հոդվածներով նախատեսված դեպքերում գործի վարույթի կարճում և քրեական հետապնդման դադարեցում չի թույլատրվում, եթե դրա դեմ առարկում է այն անձը, ում նկատմամբ իրականացվում է քրեական հետապնդումը։

ՀՀ քրեական օրենսգրքի 74-րդ հոդվածի համաձայն`

«Առաջին անգամ ոչ մեծ կամ միջին ծանրության հանցանք կատարած անձը կարող է ազատվել քրեական պատասխանատվությունից, եթե պարզվի, որ իրադրության փոփոխման հետևանքով այդ անձը կամ նրա կատարած արարքը դադարել է հանրության համար վտանգավոր լինելուց»։

Այսպիսով, դատարանը գտնում է, որ ամբաստանյալ Ա.Մաթևոսյանի կյանքում, մասնավորապես առողջական վիճակի մեջ, տեղի ունեցած վերոհիշյալ փոփոխությունը զրկում է նրան հասարակական հարաբերություններին այնպիսի վնաս պատճառելու հնարավորությունից, ինչպիսին նա պատճառել է նախքան այդ փոփոխությունը, այսինքն՝ կատարված փոփոխությունը էականորեն նվազեցնում է նոր հանցանք կատարելու` ամբաստանյալի օբյեկտիվ հնարավորությունը և իջեցնում անձի՝ հասարակության համար վտանգավորության աստիճանը, ինչը հիմք է նրան քրեական պատասխանատվությունից ազատելու համար։

Դատարանը փաստում է, որ ամբաստանյալի շահերի պաշտպան Ա.Հակոբյանի կողմից ներկայացված միջնորդությունը բխում է վերոհիշյալ օրենսդրական ակտերի բովանդակությունից, ենթակա է բավարարման` ուստի Արամ Հայրապետի Մաթևոսյանի վերաբերյալ` ՀՀ քրեական օրենսգրքի 333-րդ հոդվածի 1-ին մասով քրեական գործի վարույթը ենթակա է կարճման, վերջինս՝ քրեական պատասխանատվությունից՝ ազատման, իսկ նրա նկատմամբ հարուցված քրեական հետապնդումը` դադարեցման։

Նման պայմաններում անդրադառնալով Արամ Հայրապետի Մաթևոսյանի նկատմամբ ընտրված խափանման միջոցի` չհեռանալու մասին ստորագրության հարցին, դատարանը, հանգում է այն հետևության, որ այն պետք է վերացվի։

Միաժամանակ, լուծելով իրեղեն ապացույցների տնօրինման հարցը և ղեկավարվելով ՀՀ քրեական դատավարության օրենսգրքի 119-րդ հոդվածով` դատարանը գտնում է, որ գործով այլ փաստաթղթի կարգով ապացույց հանդիսացող փաստաթղթերը պետք է պահվեն քրեական գործի հետ միասին։

Ղեկավարվելով ՀՀ քրեական դատավարության օրենսգրքի 37-րդ հոդվածի 1-ին մասով և ՀՀ քրեական օրենսգրքի 74-րդ հոդվածով, դատարանը`


Ո Ր Ո Շ Ե Ց

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության դատարանում քննված ԵԿԴ/0010/01/15 քրեական գործով ամբաստանյալ Արամ Հայրապետի Մաթևոսյանին ազատել քրեական պատասխանատվությունից, նրա նկատմամբ ՀՀ քրեական օրենսգրքի 333-րդ 1-ին մասով հարուցված քրեական հետապնդումը դադարեցնել և քրեական գործի վարույթը կարճել` իրադրության փոփոխման հիմքով։

Ամբաստանյալ Արամ Հայրապետի Մաթևոսյանի նկատմամբ ընտրված խափանման միջոցը՝ չհեռանալու մասին ստորագրությունը, վերացնել։

Քրեական գործով այլ փաստաթղթի կարգով ապացույց ճանաչված փաստաթղթերը՝ թողնել քրեական գործում։

Որոշումը կարող է բողոքարկվել ՀՀ քրեական վերաքննիչ դատարան` հրապարակվելու օրվանից հետո` մեկամսյա ժամկետում։



Դ Ա Տ Ա Վ Ո Ր Մ. Մ Ա Կ Յ Ա Ն