Ո Ր Ո Շ ՈՒ Մ

Քրեական գործի վարույթը կարճելու և քրեական հետապնդումը դադարեցնելու մասին

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`
մեղադրող
Երևանի Կենտրոն և Նորք-Մարաշ
վարչական շրջանների դատախազության
դատախազ Ա. Հովհաննիսյանի,


2014թ. նոյեմբերի 24-ին, դատարանում, դռնբաց դատական նիստում քննելով քրեական գործն ըստ մեղադրանքի
Արմենուհի Մաքսիմի Մանուկյանի`
ծնված 1980թ. մարտի 03-ին Երևանում, հայ, Հայաստանի Հանրապետության քաղաքացի, բարձրագույն կրթությամբ, ամուրի, չի աշխատում, նախկինում չդատված, հաշվառված և բնակվում է Երևան քաղաքի Ներքին Չարբախի թիվ 6 փողոցի թիվ 26 տանը, կալանքի տակ չէ, մեղադրվում է ՀՀ քրեական օրենսգրքի 177-րդ հոդվածի 1-ին մասով,


Պ Ա Ր Զ Ե Ց

Նախաքննության մարմինը Արմենուհի Մաքսիմի Մանուկյանին մեղադրանք է առաջադրել հետևյալ արարքի համար, որ նա` «2014թ. հուլիսի 18-ին` ժամը 15։30-ին սահմաններում, Երևան քաղաքի Հյուսիսային Պողոտա թիվ 1 հասցեում գործող «Օրանժ Արմենիա» ՓԲ ընկերության գրասենյակի վաճառասրահից, աշխատանքային ժամին, գաղտնի հափշտակել է զգալի չափի` 50.000 ՀՀ դրամ արժողությամբ «Սամսունգ» մոդելի բջջային հեռախոսը։
Այսինքն` Արմենուհի Մանուկյանը կատարել է հանցավոր արարք, որը նախատեսված է ՀՀ քրեական օրենսգրքի 177-րդ հոդվածի 1-ին մասով։»։
2014թ. նոյեմբերի 03-ին դատարան է ստացվել տուժող «Օրանժ Արմենիա» ՓԲ ընկերության նույն օրվա դիմումը` ստորագրված գլխավոր տնօրեն Ֆրանսիս Ժելիբտերի կողմից, այն մասին, որ ամբաստանյալ Արմենուհի Մաքսիմի Մանուկյանի կողմից «Օրանժ Արմենիա» ՓԲ ընկերությանը 50.000 /հիսուն հազար/ ՀՀ դրամ գումարի չափով հասցված վնասն ամբողջությամբ հատուցվել է, տուժող «Օրանժ Արմենիա» ՓԲ ընկերությունն ամբաստանյալ Ա. Մանուկյանի հետ հաշտվել է, խնդրում է կարճել քրեական գործի վարույթը։
Ամբաստանյալ Արմենուհի Մաքսիմի Մանուկյանը հայտարարել է, որ տուժող «Օրանժ Արմենիա» ՓԲ ընկերության հետ հաշտվել են։
ՀՀ քրեական օրենսգրքի 18-րդ հոդվածի համաձայն`
«1. Հանցագործություն է համարվում մեղավորությամբ կատարված՝ հանրության համար վտանգավոր այն արարքը, որը նախատեսված է սույն օրենսգրքով։
(…)»։
ՀՀ քրեական օրենսգրքի 177-րդ հոդվածի 1-ին մասի համաձայն`
«Գողությունը` ուրիշի գույքի զգալի չափերով գաղտնի հափշտակությունը`
պատժվում է տուգանքով` նվազագույն աշխատավարձի հարյուրապատիկից չորսհարյուրապատիկի չափով, կամ կալանքով` մեկից երկու ամիս ժամկետով, կամ ազատազրկմամբ` առավելագույնը երկու տարի ժամկետով։»։
ՀՀ քրեական դատավարության օրենսգրքի 35-րդ հոդվածի համաձայն`
«1. Քրեական գործ չի կարող հարուցվել և քրեական հետապնդում չի կարող իրականացվել, իսկ հարուցված քրեական գործի վարույթը ենթակա է կարճման, եթե`
(…)
5) սույն օրենսգրքով նախատեսված դեպքերում տուժողը հաշտվել է կասկածյալի կամ մեղադրյալի հետ.
(…)»։
ՀՀ քրեական դատավարության օրենսգրքի 183-րդ հոդվածի համաձայն`
«1. Հայաստանի Հանրապետության քրեական օրենսգրքի (...) 177-րդ հոդվածի 1-ին մասով, (...) նախատեսված հանցագործությունների վերաբերյալ գործերը հարուցվում են ոչ այլ կերպ, քան տուժողի բողոքի հիման վրա, և կասկածյալի կամ մեղադրյալի կամ ամբաստանյալի հետ նրա հաշտվելու դեպքում ենթակա են կարճման։ Հաշտությունը թույլատրվում է մինչև դատավճիռ կայացնելու համար դատարանի` խորհրդակցական սենյակ հեռանալը։
(…)»։
Սույն քրեական գործի դատական քննության ժամանակ, մինչև դատավճիռ կայացնելու համար դատարանի կողմից խորհրդակցական սենյակ հեռանալը դատարան է ստացվել տուժող «Օրանժ Արմենիա» ՓԲ ընկերության դիմումն այն մասին, որ տուժող «Օրանժ Արմենիա» ՓԲ ընկերությունն ամբաստանյալ Ա. Մանուկյանի հետ հաշտվել է և խնդրում է կարճել քրեական գործի վարույթը։
Ամբաստանյալ Ա. Մանուկյանը քրեական գործի դատական քննության ժամանակ, մինչև դատավճիռ կայացնելու համար դատարանի կողմից խորհրդակցական սենյակ հեռանալը դատարանին հայտնեց, որ տուժող «Օրանժ Արմենիա» ՓԲ ընկերության հետ հաշտվել են և խնդրեց կարճել քրեական գործի վարույթը։
Հաշվի առնելով, որ տուժողը հաշտվել է ամբաստանյալի հետ, որպիսի հանգամանքը սույն քրեական գործով քրեական հետապնդումը դադարեցնելու և քրեական գործի վարույթը բացառող հանգամանք է` դատարանը գտնում է, որ քրեական գործի վարույթը ենթակա է կարճման և ամբաստանյալ Արմենուհի Մանուկյանի նկատմամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը ենթակա է դադարեցման` ամբաստանյալի հետ տուժողի հաշտվելու պատճառաբանությամբ։
Քննարկելով իրեղեն ապացույցի հարցը` դատարանը գտնում է, որ որոշման օրինական ուժի մեջ մտնելուց հետո, 2014թ. հոկտեմբերի 03-ի որոշմամբ իրեղեն ապացույց ճանաչված, «Սամսունգ» տեսակի «GT-S6102» մոդելի 359828048323050 և 359829048323058 գործարանային համարներով բջջային հեռախոսը պետք է վերադարձնել Արմենուհի Մանուկյանին։
Քննարկելով խափանման միջոցի հարցը` դատարանը գտնում է, որ ամբաստանյալ Արմենուհի Մանուկյանի նկատմամբ ընտրված խափանման միջոց չհեռանալու մասին ստորագրությունը ենթակա է վերացման։
Վերոգրյալների հիման վրա և ղեկավարվելով ՀՀ քրեական դատավարության օրենսգրքի 35-րդ, 119-րդ, 183-րդ, 313-րդ հոդվածներով` դատարանը

Ո Ր Ո Շ Ե Ց


ԵԿԴ-0178/01/14 (15031014) քրեական գործով ըստ մեղադրանքի Արմենուհի Մաքսիմի Մանուկյանի` ՀՀ քրեական օրենսգրքի 177-րդ հոդվածի 1-ին մասով, քրեական գործի վարույթը կարճել և Արմենուհի Մաքսիմի Մանուկյանի նկատմամբ քրեական հետապնդումը դադարեցնել` ամբաստանյալի հետ տուժողի հաշտվելու պատճառաբանությամբ։
Արմենուհի Մաքսիմի Մանուկյանի նկատմամբ ընտրված խափանման միջոց չհեռանալու մասին ստորագրությունը` վերացնել։
Որոշման օրինական ուժի մեջ մտնելուց հետո 2014թ. հոկտեմբերի 03-ի որոշմամբ իրեղեն ապացույց ճանաչված, «Սամսունգ» տեսակի «GT-S6102» մոդելի 359828048323050 և 359829048323058 գործարանային համարներով բջջային հեռախոսը վերադարձնել Արմենուհի Մանուկյանին։
Սույն որոշումը կարող է բողոքարկվել ՀՀ վերաքննիչ քրեական դատարան` հրապարակվելու օրվանից հետո մեկամսյա ժամկետում։

ԴԱՏԱՎՈՐ՝ Մ. ՄԱՐՏԻՐՈՍՅԱՆ