Դ Ա Տ Ա Վ Ճ Ի Ռ

ՀԱՆՈՒՆ ՀԱՅԱՍՏԱՆԻ ՀԱՆՐԱՊԵՏՈՒԹՅԱՆ

16 հոկտեմբերի 2014թ. ք. Երևան

ԵԿԴ-0161/01/14

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարանը հետևյալ կազմով.

նախագահող դատավոր` Մ. Մարտիրոսյան,
քարտուղար` Ա. Հովհաննիսյան,

մասնակցությամբ`

մեղադրող,
Երևանի Կենտրոն և Նորք-Մարաշ
վարչական շրջանների
դատախազության դատախազ Վ. Ասատրյանի,

տուժողներ Ս. Աղասարյանի,
Ռ. Շավալյանի,


դատարանում, դռնբաց դատական նիստում քննեց գործն ըստ մեղադրանքի Կամո Գվիդոնի Մանվելյանի
ծնված 1963թ. դեկտեմբերի 17-ին, Երևան քաղաքում, հայ, Հայաստանի Հանրապետության /այսուհետ ՀՀ/ քաղաքացի, միջնակարգ կրթությամբ, ամուսնալուծված, չի աշխատում, դատվածություն չունի, հաշվառված է և բնակվել է Երևանի Պռոշյան 1-ին նրբանցքի թիվ 70 տանը, կալանքի տակ է 2014թ. հուլիսի 23-ից, մեղադրվում է ՀՀ քրեական օրենսգրքի 112-րդ հոդվածի 1-ին մասով և 216-րդ հոդվածի 1-ին մասով։

Գործի դատավարական նախապատմությունը

Թիվ 13143814 քրեական գործը ՀՀ ոստիկանության քննչական գլխավոր վարչության /այսուհետ ՔԳՎ/ Երևան քաղաքի քննչական վարչության Կենտրոնականի քննչական բաժնում հարուցվել է 2014թ. մայիսի 09-ին, ՀՀ քրեական օրենսգրքի 177-րդ հոդվածի 3-րդ մասի 1.1 կետով` անհայտ անձի կողմից բնակարան ապօրինի մուտք գործելու եղանակով Արաքսյա Վաղարշակի Ասատրյանի զգալի չափի գույքը գաղտնի հափշտակելու դեպքի առթիվ։
Թիվ 15100914 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2014թ. մայիսի 31-ին, ՀՀ քրեական օրենսգրքի 177-րդ հոդվածի 1-ին մասով և 216-րդ հոդվածի 1-ին մասով` Սուսաննա Մարտինի Աղասարյանի հաղորդման հիման վրա նախապատրաստված նյութերով։
2014թ. հունիսի 05-ին Կամո Մանվելյանը թիվ 15100914 քրեական գործով ներգրավվել է որպես մեղադրյալ և նրան մեղադրանք է առաջադրվել ՀՀ քրեական օրենսգրքի 216-րդ հոդվածի 1-ին մասով։
Թիվ 13143814 քրեական գործի նյութերով, ՀՀ քրեական օրենսգրքի 177-րդ հոդվածի 1-ին մասով, ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում, 2014թ. հուլիսի 22-ին հարուցվել է նոր` թիվ 15122714 քրեական գործը` Կամո Գվիդոնի Մանվելյանի կողմից Արմեն Վարդանի Տիրատուրյանին պատկանող զգալի չափի 250.000 ՀՀ դրամ արժողության «Ալկանո» տեսակի հեծանիվը հափշտակելու դեպքի առթիվ։
Թիվ 15123214 քրեական գործը ՀՀ ոստիկանության ՔԳՎ Երևան քաղաքի քննչական վարչության Կենտրոնականի քննչական բաժնում հարուցվել է 2014թ. հուլիսի 23-ին, ՀՀ քրեական օրենսգրքի 112-րդ հոդվածի 1-ին մասով` Ռուստամ Ռաֆիկի Շավալյանի առողջությանը դիտավորությամբ ծանր վնաս պատճառելու դեպքի առթիվ։ Նույն օրը Կամո Մանվելյանը ձերբակալվել է։
Քննիչի 2014թ. հուլիսի 24-ի որոշումներով թիվ 15100914 և 15122714 քրեական գործերը միացվել են թիվ 15123214 քրեական գործին և նախաքննությունը շարունակվել է մեկ վարույթում։
Թիվ 15123214 քրեական գործով քննիչի 2014թ. սեպտեմբերի 03-ի որոշումներով`
-Կամո Գվիդոնի Մանվելյանի կողմից Արմեն Տիրատուրյանի զգալի չափի գույքը գաղտնի հափշտակելու կապակցությամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդումը դադարեցվել է` հաշտության հիմքով։
-Կամո Գվիդոնի Մանվելյանի կողմից «Ալեքս Գրիգ» սահմանափակ պատասխանատվությամբ ընկերության զգալի չափի գույքը գաղտնի հափշտակելու կապակցությամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդում չի իրականացվել` բողոքի բացակայության պատճառաբանությամբ։
-Վահան Նորայրի Հովհաննիսյանի կողմից Սուսաննա Աղասարյանի զգալի չափի գույքը գաղտնի հափշտակելու կապակցությամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդում չի իրականացվել` բողոքի բացակայության պատճառաբանությամբ։
-Կամո Գվիդոնի Մանվելյանի կողմից 2014թ. հուլիսի 19-ին, ժամը 22։00-ի սահմաններում Երևան քաղաքի Թումանյան փողոցի թիվ 28/20 շենքի բակից հեծանիվ գողանալու կապակցությամբ ՀՀ քրեական օրենսգրքի 177-րդ հոդվածի 1-ին մասով քրեական հետապնդում չի իրականացվել` հանցագործության դեպքի բացակայության պատճառաբանությամբ։
-Ռուստամ Ռաֆայելի Շավալյանի կողմից Կամո Գվիդոնի Մանվելյանին ծեծի ենթարկելու կապակցությամբ ՀՀ քրեական օրենսգրքի 118-րդ հոդվածով քրեական հետապնդում չի իրականացվել` հանցակազմի բացակայության պատճառաբանությամբ։
Նախաքննության մարմնի կողմից Կամո Գվիդոնի Մանվելյանին մեղադրանք է առաջադրվել ՀՀ քրեական օրենսգրքի 112-րդ հոդվածի 1-ին մասով և 216-րդ հոդվածի 1-ին մասով հետևյալ արարքների համար. «որ նա 2014թ. մայիսի 25-ին, ժամը 23-ի սահմաններում Երևան քաղաքի Պռոշյան փողոցում Լևոն Գագիկի Թելոյանին վաճառելու միջոցով իրացրել է ակնհայտ հանցավոր ճանապարհով ձեռք բերված` 2014թ. մայիսի 25-ին, ժամը 22.00-ի սահմաններում Վահան Նորայրի Հովհաննիսյանի կողմից Երևան քաղաքի Արամի նրբանցքի թիվ 24 տան բակից գաղտնի հափշտակած` Սուսաննա Աղասարյանի թոռնիկին պատկանող զգալի չափի` 35.000 ՀՀ դրամ արժողության հեծանիվը։
Այսինքն` Կամո Գվիդոնի Մանվելյանը կատարել է ՀՀ քրեական օրենսգրքի 216 հոդվածի 1-ին մասով նախատեսված հանցագործություն։
Բացի այդ, 2014թ. հուլիսի 23-ին, ժամը 17-ի սահմաններում Կամո Գվիդոնի Մանվելյանը Երևան քաղաքի Մաշտոցի պողոտայի և Գ.Լուսավորիչ փողոցի հատման մասի գետնանցումում, գտնվելով ալկոհոլ օգտագործած վիճակում, իր ծանոթ Ռուստամ Ռաֆիկի Շավալյանին մեղադրել է իրավապահ մարմինների հետ համագործակցելու և իր իսկ կողմից կատարած հանցագործությունների բացահայտմանն օժանդակելու մեջ ու վիճաբանության մեջ մտել նրա հետ, որի ընթացքում իր մոտ եղած դանակով հարվածել է Ռ. Շավալյանի կրծքավանդակի շրջանին և նրա առողջությանը դիտավորությամբ պատճառել ծանր վնաս` զուգորդված կրծքավանդակի աջ կեսի 5-րդ կողոսկրի, թոքի վնասումներով և հեմոպնևմոթորաքսով։
Այսինքն` Կամո Գվիդոնի Մանվելյանը կատարել է ՀՀ քրեական օրենսգրքի 112 հոդվածի 1-ին մասով նախատեսված հանցագործություն։»։
2014թ. սեպտեմբերի 09-ին քրեական գործը մեղադրական եզրակացությամբ ուղարկվել է Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանի դատարան։


Դատարանի կողմից հաստատված փաստական հանգամանքները

Դատաքննությամբ, գործի տվյալներով, դատարանը հիմնավորված է համարում հետևյալը.
2014թ. մայիսի 25-ի երեկոյան, Երևանում, ամբաստանյալ Կամո Մանվելյանն իր ընկեր, վկա Վահան Նորայրի Հովհաննիսյանի հետ որոշ ժամանակ իր` Պռոշյան փողոցի 1-ին նրբանցքի թիվ 70 տանը գտնվելուց հետո, ժամը 22.00-ի սահմաններում, օղի գնելու և կրկին տուն վերադառնալու նպատակով գնացել են մոտակայքում գործող խանութ։ Հասնելով Երևան քաղաքի Արամի փողոցի մոտակայք` ամբաստանյալ Կամո Մանվելյանը նկատել է, որ մի պահ Վահան Հովհաննիսյանը բացակայել է իր տեսադաշտից, ապա վերադառնալով` իր հետ բերել է հեծանիվ և հայտնել, որ գողացել է մոտակա տան բակից։ Վահան Հովհաննիսյանը ամբաստանյալ Կամո Մանվելյանին առաջարկել է վաճառել հեծանիվը։ Կամո Մանվելյանը համաձայնվել է և նույն օրն ակնհայտ հանցավոր ճանապարհով ձեռք բերված հեծանիվը վաճառել է իրենց թաղամասի բնակիչ Լևոն Թելոյանին։
Ամբաստանյալ Կամո Գվիդոնի Մանվելյանը հաճախակի այցելել է Երևան քաղաքի Գր. Լուսավորիչ փողոցի և Մաշտոցի պողոտայի հատման խաչմերուկում գտնվող գետնանցում։ Այնտեղ ծանոթացել է թափառաշրջիկ կյանք վարող, տուժող Ռուստամ Շավալյանի հետ և հաճախ միասին ոգելից խմիչք են գործածել։ Ամբաստանյալ Կամո Մանվելյանն իր կողմից կատարված արարքների վերաբերյալ հայտնել է տուժող Ռուստամ Շավալյանին, իսկ երբ իրավապահ մարմինների կողմից բացահայտվել են նրա կողմից կատարված արարքները` նա Ռ. Շավալյանին մեղադրել է ոստիկանության աշխատակիցների հետ համագործակցելու մեջ և որոշել է վրեժխնդիր լինել։
Այդ նպատակով ամբաստանյալ Կամո Մանվելյանը 2014թ. հուլիսի 23-ին, ժամը 13.00-ի սահմաններում, տանից նախապես վերցնելով խոհանոցային դանակը և այն տեղավորելով սպորտային վերնազգեստի ծոցագրպանում` գնացել է Երևան քաղաքի Գր. Լուսավորիչ փողոցի և Մաշտոցի պողոտայի հատման խաչմերուկում գտնվող գետնանցում։ Այնտեղ նա հանդիպել է Ռ. Շավալյանին, Լ. Գրիգորյանին և ևս երկու թափառաշրջիկների, որոնց հետ ճաշել է և օղի գործածել։ Խոսակցության ընթացքում ամբաստանյալ Կամո Մանվելյանը տուժող Ռուստամ Շավալյանին մեղադրել է ոստիկանության աշխատակիցների հետ համագործակցելու և իր կատարած արարքների բացահայտմանն օժանդակելու մեջ։ Այդ կապակցությամբ նրանց միջև սկսվել է վիճաբանություն, որի ընթացքում ամբաստանյալ Կամո Մանվելյանն իր հետ նախապես վերցրած դանակով հարվածել է տուժող Ռուստամ Շավալյանի կրծքավանդակի աջ թիակի վերին դրսային հատվածին և դիտավորությամբ նրա առողջությանը պատճառել է կյանքին վտանգ սպառնացող ծանր վնաս` զուգորդված կրծքավանդակի աջ կեսի հինգերորդ կողոսկրի, թոքի վնասումներով և հեմոպնևմոթորաքսով։
Քրեական գործի նախաքննության ընթացքում, ՀՀ առողջապահության նախարարության հանրապետական դատական բժկության գիտագործնական կենտրոնի Երևան քաղաքի դատաբժշկական փորձագետ Ռ. Վարդանյանի կողմից «Արամյանց» բժշկական կենտրոնում կատարվել է դատաբժշկական փորձաքննություն, որի արժեքը կազմել է 8.000 /ութ հազար/ ՀՀ դրամ գումար։
Ամբաստանյալի անձը բնութագրող տվյալների, պատասխանատվությունը և պատիժը մեղմացնող ու ծանրացնող հանգամանքների ուսումնասիրման արդյունքում պարզվել է, որ ամբաստանյալ Կամո Մանվելյանն իրեն լիովին մեղավոր ճանաչելով և տալով ինքնախոստովանական ցուցմունքներ` անկեղծորեն զղջում է կատարածի համար, իրեն վերագրվող, ՀՀ քրեական օրենսգրքի 112-րդ հոդվածով նախատեսված արարքը կատարել է ալկոհոլի ազդեցության տակ։

Ապացույցների հետազոտում և գնահատում

Դատարանի կողմից հաստատված հանգամանքներն հիմնավորվում են հետևյալ ապացույցներով.
Ամբաստանյալ Կամո Մանվելյանի ինքնախոստովանական ցուցմունքներով այն մասին, որ 2014թ. մայիսի 25-ին, երեկոյան, իր ընկեր Վահան Հովհանիսյանը եկել է իրենց տուն։ Միասին որոշել են դուրս գալ տնից` ոգելից խմիչք գնելու համար։ Հասնելով Երևան քաղաքի Արամի փողոցի մոտ` նկատել է, որ Վահանը մի պահ բացակայել է իր կողքից։ Քիչ անց Վահանը վերադարձել է և իր հետ բերել երկակնանի հեծանիվ։ Վահանը հայտնել է, որ հեծանիվը գողացել է մոտակա տան բակից և առաջարկել է այն վաճառել, իսկ այդ գումարով ոգելից խմիչք գնել։ Ինքը համաձայնվել է և այդ հեծանիվը` գումարը հետագայում վճարելու պայմանով, 10.000 ՀՀ դրամով վաճառել է իրենց փողոցի բնակիչ Լևոն Թելոյանին, որին չի տեղեկացրել հեծանիվը գողացված լինելու մասին։
Բացի այդ, 2014թ. մայիս-հուլիս ամիսների ընթացքում գողություն է կատարել «Երևան Սիթի» հանրախանութից, ինչպես նաև Երևան քաղաքի Թումանյան փողոցում գտնվող շենքերից մեկի բակից։ Դրանց մասին հայտնել է Երևան քաղաքի Գր. Լուսավորիչ փողոցի և Մաշտոցի պողոտայի հատման խաչմերուկում գտնվող գետնանցումում գիշերող, թափառաշրջիկ կյանք վարող, տուժող Ռուստամ Շավալյանին։
Հետագայում, երբ իր կատարած հանցագործությունները բացահայտվել են իրավապահ մարմինների կողմից և իր նկատմամբ գործ է քննվել` հասկացել է, որ Ռ. Շավալյանը համագործակցում է ոստիկանության աշխատակիցների հետ և իր կատարածների վերաբերյալ նրանց տեղեկատվություն է տրամադրում, ուստի որոշել է Ռ. Շավալյանից վրեժխնդիր լինել։
2014թ. հուլիսի 23-ին, ժամը 13.00-ի սահմաններում, տնից նախապես վերցրել է խոհանոցային դանակը, այն դրել է սպորտային վերնազգեստի ծոցագրպանը և գնացել Երևան քաղաքի Գր. Լուսավորիչ-Մաշտոցի պողոտայի հատման խաչմերուկում գտնվող գետնանցման կացարան։ Այնտեղ հանդիպել է իր ծանոթներ «Քիթ», «Հնդիկ» մականուններով անձանց, Ռ. Շավալյանին և նրա ընկերուհի Լիլիթ Գրիգորյանին։ Նշված կացարանում Ռ. Շավալյանի և մյուսների հետ ճաշել և օղի են խմել։ Խոսակցության ընթացքում Ռ. Շավալյանին մեղադրել է ոստիկանության աշխատակիցների հետ համագործակցելու մեջ։ Այդ կապակցությամբ իրենց միջև վիճաբանություն է սկսվել, որի ընթացքում իր մոտ եղած դանակով հարվածել է նրա մեջքի շրջանին։ Հարվածի հետևանքով դանակը խրվել է տուժող Ռ. Շավալյանի թիկունքում։ Դրանից հետո Լիլիթը և Ռուստամը հեռացել են գետնանցումից։
Քիչ անց գետնանցումի մոտակայքից ոստիկանության աշխատակիցներն իրեն բերման են ենթարկել ՀՀ ոստիկանության Կենտրոնականի բաժին, որտեղ խոստովանել է կատարած արարքը։
Առաջադրված մեղադրանքում իրեն լիովին մեղավոր է ճանաչում և անկեղծորեն զղջում է կատարածի համար։
/դատական նիստի արձանագրություն, գ.թ. 39-40, գ.թ. 83-84, գ.թ. 106, գ.թ. 117, 163-166, գ.թ. 185-186, գ.թ. 205-206, գ.թ. 236/
Տուժող Ռուստամ Ռաֆայելի Շավալյանի ցուցմունքներով այն մասին, որ վարում է թափառաշրջիկ կյանք և գիշերում է Երևան քաղաքի Գր. Լուսավորիչ փողոցի և Մաշտոցի պողոտայի հատման խաչմերուկում գտնվող գետնանցման կացարանում։
Կամո Մանվելյանը, «Քիթ»-ը և «Հնդիկ»-ը իր ծանոթներներն են։ Նրանց հետ հիշյալ կացարանում հաճախակի օգտագործել է ոգելից խմիչքներ։
2014թ. հուլիսի 23-ին, ժամը 12.00-ի սահմաններում, երբ իր ընկերուհի Լիլիթ Գրիգորյանի հետ գտնվել է կացարանում` իրենց են այցելել ամբաստանյալ Կամո Մանվելյանը, «Քիթ»-ը և «Հնդիկ»-ը։ Նրանք իրենց հետ մեկ շիշ օղի են բերել։ Միասին ճաշել են և ոգելից խմիչք են օգտագործել։ Երբ օղին և ուտելիքը վերջացել է` «Քիթ»-ը Կամոյին առաջարկել է իրենց տնից օղի և ուտելիք բերել։ Նրանք դուրս են եկել կացարանից և վերադառնալով` իրենց հետ բերել են մեկ շիշ օղի և ուտելիք։ Որոշ ժամանակ անց «Հնդիկ»-ը և Կամոն դուրս են եկել կացարանից։ Ինքը, «Քիթ»-ը և Լիլիթը մնացել են կացարանում։ Մոտ մեկ րոպե անց` Կամո Մանվելյանն ու «Հնդիկ»-ը վերադարձել են։ «Հնդիկ»-ը սպասել է դռան մոտ։ Նկատել է, որ Կամո Մանվելյանը շարժվում է իր ուղղությամբ։ Այդ պահին զգացել է, որ մարմնի մեջ ինչ-որ բան է մտել։ Գոռացել է և շրջվելով` տեսել, որ մեջքի հետևում կանգնած է ամբաստանյալ Կամո Մանվելյանը, իսկ դանակը խրված է թիկունքում։ Անմիջապես դանակը հանել է, գցել գետնին և հրելով Կամո Մանվելյանին` Լիլիթ Գրիգորյանի հետ դուրս է եկել կացարանից։ Պատահական տաքսի ավտոմեքենայով գնացել են «Արամյանց» բժշկական կենտրոն, որտեղ իրեն վիրահատել են և անհրաժեշտ բուժօգնություն ցուցաբերել։
/դատական նիստի արձանագրույուն, գ.թ.197-200/
Տուժող Սուսաննա Մարտինի Աղասարյանի ցուցմունքներով այն մասին, որ 2014թ. մայիսի 25-ի ժամը 18.00-ից մինչև մայիսի 26-ի ժամը 09.00-ն ընկած ժամանակահատվածում անհայտ անձն իրենց` Երևան քաղաքի Արամի նրբանցքի թիվ 24 տան բակից գողացել է իր անչափահաս թոռնիկի երկակնանի հեծանիվը։ Այդ մասին իրեն հայտնել է թոռնիկը։ Ինքն ահազանգել է ոստիկանություն և հայտնել կատարվածի մասին։ Այնուհետև ոստիկանության աշխատակիցներից տեղեկացել է, որ հեծանիվը գողացել է իրեն անծանոթ Վահան Հովհաննիսյանը։ Որևէ մեկի դեմ որևէ բողոք, պահանջ չունի, քանի որ հեծանիվը հայտնաբերվել և ի պահ է հանձնվել իրեն։
/դատական նիստի արձանագրություն, գ.թ. 93-94/
Վկա Վահան Նորայրի Հովհաննիսյանի ցուցմունքներով այն մասին, որ Կամո Մանվելյանն իր ընկերն է։ Նրա հետ ժամանակ առ ժամանակ օգտագործում են ոգելից խմիչք։ 2014թ. մայիսի 25-ի երեկոյան, Կամո Մանվելյանին տեսակցելու նպատակով գնացել է նրա տուն։ Ժամը 22.00-ի սահմաններում միասին որոշել են դուրս գալ տնից` ոգելից խմիչք գնելու համար։ Հասնելով Երևան քաղաքի Արամի փողոցի մոտ` նկատել է սեփական տուն։ Այդ տան դուռը բաց է եղել։ Բակում նկատել է երկակնանի հեծանիվ։ Այն գողացել է և Կամո Մանվելյանին առաջարկել է վաճառել, իսկ վաճառքից ստացված գումարով ոգելից խմիչք գնել։ Կամո Մանվելյանը չի մերժել իր առաջարկը և որոշել է վաճառել գողացված հեծանիվը։ Դրանից հետո ինքը գնացել է Կամո Մանվելյանի տուն։ 30-40 րոպե անց վերադարձել է Կամո Մանվելյանը և հայտնել, որ հեծանիվը վաճառել է իրենց փողոցի բնակիչներից մեկին։ Ժամը 23.30-ի սահմաններում գնացել է տուն։
Դեպքը բացահայտվել է ոստիկանության աշխատակիցների կողմից։ Իր և Կամոյի վերաբերյալ քննվել է քրեական գործ։
/դատական նիստի արձանագրություն, գ.թ. 76-77/
Վկա Լևոն Գագիկի Թելոյանի ցուցմունքներով այն մասին, որ ամբաստանյալ Կամո Մանվելյանն իր հարևանն է։ 2014թ. մայիսին Կ. Մանվելյանն իրեն առաջարկել է գնել թոռանը պատկանող հեծանիվը։ Ինքը համաձայնվել է և նշված հեծանիվը գնել է 10.000 ՀՀ դրամով` գումարը հետագայում վճարելու պայմանով։ Դրանից հետո Կամոն հեծանիվը հանձնել է իրեն և հեռացել։
2014թ. մայիսի 30-ին իրենց տուն այցելած ոստիկանության աշխատակիցներից տեղեկացել է, որ Կամոն իրեն հանցավոր ճանապարհով ձեռք բերված հեծանիվ է վաճառել։
/դատական նիստի արձանագրություն, գ.թ. 86-87/
Վկա Լիլիթ Գրիգորի Գրիգորյանի նախաքննական ցուցմունքով այն մասին, որ շուրջ հինգ ամիս իր ընկեր Ռուստամ Շավալյանի հետ բնակվում են Երևան քաղաքի Գր. Լուսավորիչ փողոցի և Մաշտոցի պողոտայի հատման խաչմերուկում գտնվող գետնանցման կացարանում։
2014թ. հուլիսի 23-ին, ժամը 16.00-ի սահմաններում, իրենց կացարան են այցելել Կամո Մանվելյանը, «Հնդիկ»-ը և «Քիթ»-ը։ Միասին ճաշել են, իսկ տղաները ոգելից խմիչք են օգտագործել։ Նրանց խոսակցությունից լսել է, որ մի քանի օր առաջ Կամո Մանվելյանին ոստիկանության բաժին բերման են ենթարկել։ Դրանից հետո Կամո Մանվելյանը և «Քիթ»-ը դուրս են եկել կացարանից և մոտ 40 րոպե հետո վերադարձել` իրենց հետ բերելով մեկ շիշ օղի և ուտելիք։ Դրանից հետո նկատել է, որ Կամո Մանվելյանը կանգնած է կացարանի դռան մոտ` Ռուստամ Շավալյանի հետևում։ Այնուհետև լսել է Ռուստամ Շավալյանի բղավոցը։ Շրջվելով նրա ուղղությամբ` տեսել է, որ Ռուստամ Շավալյանի մեջքի աջ կողմում դանակ է խրված, իսկ նրա հետևում կանգնած Կամո Մանվելյանի ձեռքերն ու դեմքն արյունոտ են։ Անմիջապես հասկացել է, որ Ռուստամ Շավալյանին Կամո Մանվելյանն է դանակով հարվածել։ Այնուհետև Ռուստամ Շավալյանը դանակը հանել է մեջքից։ Դրանից հետո դուրս են եկել կացարանից և պատահական տաքսի ավտոմեքենայով գնացել են «Արամյանց» բժկական կենտրոն, որտեղ Ռուստամ Շավալյանը բուժօգնության է դիմել։ Հիվանդանոցում հանդիպել է «Քիթ» մականունով անձին։ Նա իրեն ասել է. «Կամոն որոշ ժամանակ առաջ իրեն հայտնել է, որ Ռոստոմը գործ տվող է ոստիկանությունում և այդ պատճառով խփելու է Ռոստոմին»։
/գ.թ. 19-20/
Դատաբժշկական փորձաքննության 2014թ. օգոստոսի 02-ի թիվ 1237/հ եզրակացությամբ, որի համաձայն` «Ռ. Շավալյանի մարմնական վնասվածքները` կրծքավանդակի աջ կեսի, 5-րդ կողոսկրի, թոքի վնասումներով և հեմոպնևմոթորաքսով զուգորդված ծակված-կտրված, թափանցող վերքի ձևով, հասցվել են` սուր ծակող-կտրող գործիքով, այդ թվում նաև ներկայացված դանակով, հնարավոր է` նշված ժամկետում, և պատճառվել է առողջությանը ծանր վնաս` կյանքին վտանգ սպառնացող։»։
/գ. թ. 207-208/
Դատա-տեխնիկական փորձաքննության 2014թ. հոկտեմբերի 09-ի թիվ 2889-14 եզրակացությամբ, որի համաձայն` «1. Փորձաքննության ներկայացված դանակը գործարանային արտադրության խոհանոցային դանակ է, սառը զենք չի հանդիսանում։»։
/դատական նիստի արձանագրություն/
Մեղադրյալ Կամո Գվիդոնի Մանվելյանի մասնակցությամբ քննչական փորձարարություն կատարելու մասին 2014թ. հուլիսի 24-ի արձանագրությամբ, որի համաձայն` Կամո Մանվելյանը մատնացույց է արել իրեն վերագրվող արարքների կատարման վայրերը և մանրամասն նկարագրել է իր կատարած արաքները։
/գ.թ. 167-168/

Իրեղեն ապացույցներ ճանաչված երկակնանի հեծանիվով և դանակով։
/գ.թ. 21-22, 209, 223/


Դատարանի իրավական վերլուծությունները.

Վերլուծելով ամբաստանյալ Կամո Գվիդոնի Մանվելյանին առաջադրված մեղադրանքը, նրա ցուցմունքները և գործով ձեռք բերված ապացույցները` դատարանը գտնում է, որ ամբաստանյալ Կամո Մանվելյանի կողմից, նրա մեղավորությամբ, դիտավորությամբ տուժող Ռուստամ Շավալյանի առողջությանը ծանր վնաս պատճառելն ապացուցված է, նրա արարքը ճիշտ է որակված և համապատասխանում է ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության հատկանիշներին։
Ապացուցված է նաև ակնհայտ հանցավոր ճանապարհով ձեռք բերված գույք իրացնելը, որը նախապես խոստացված չի եղել, նրա այդ արարքը նույնպես ճիշտ է որակված և համապատասխանում է ՀՀ քրեական օրենսգրքի 216-րդ հոդվածի 1-ին մասով նախատեսված հանցագործության հատկանիշներին։
Ուսումնասիրելով ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները, ամբաստանյալ Կամո Գվիդոնի Մանվելյանի նկատմամբ, նրա կատարած յուրաքանչյուր հանցագործության համար պատիժ նշանակելիս` դատարանը հաշվի է առնում հանցագործության բնույթն ու հանրության համար վտանգավորության աստիճանը, հանցավորի անձը, այն, որ նա իրեն լիովին մեղավոր ճանաչելով և տալով ինքնախոստովանական ցուցմունքներ` անկեղծորեն զղջում է կատարածի համար։
Ամբաստանյալ Կամո Գվիդոնի Մանվելյանի նկատմամբ, նրա կատարած հանցագործություններից յուրաքանչյուրի համար պատիժ նշանակելիս` ամբաստանյալի պատասխանատվությունը և պատիժը մեղմացնող հանգամանք դատարանը չի արձանագրում, իսկ ՀՀ քրեական օրենսգրքի 112-րդ հոդվածի 1-ին մասով նախատեսված հանցագործության կատարման համար ամբաստանյալ Կամո Մանվելյանի նկատմամբ պատիժ նշանակելիս` որպես նրա պատասխանատվությունը և պատիժը ծանրացնող հանգամանք դատարանը հաշվի է առնում հանցանքն ալկոհոլի ազդեցության տակ կատարելը։
Ամբաստանյալ Կամո Մանվելյանն իր կատարած յուրաքանչյուր հանցագործության համար ենթակա է պատժի, քանի որ դրան խոչընդոտող հանգամանքներ առկա չեն։
Քննարկելով այն հարցը, թե ինչ պատիժ պետք է նշանակվի ամբաստանյալ Կամո Մանվելյանի նկատմամբ` դատարանը գտնում է հետևյալը.
ՀՀ քրեական օրենսգրքի 216-րդ հոդվածի 1-ին մասով նախատեսված հանցագործության համար որպես պատիժ սահմանված է` տուգանք կամ կալանք։
ՀՀ քրեական օրենսգրքի 57-րդ հոդվածի համաձայն`
«1. Կալանքը ուղղիչ հիմնարկում անազատության մեջ պահելու ձևով հասարակությունից խիստ մեկուսացման պայմաններում դատապարտյալին պահելն է։ Կալանքը կարող է նշանակվել ոչ մեծ և միջին ծանրության հանցանքների համար սույն օրենսգրքի Հատուկ մասով նախատեսված դեպքերում` տասնհինգ օրից մինչև երեք ամիս ժամկետով և միայն այն դեպքում, երբ կալանավորումը որպես խափանման միջոց չի կիրառվել։
(…)»։
ՀՀ քրեական օրենսգրքի 61-րդ հոդվածի համաձայն`
«1. Հանցագործության համար մեղավոր ճանաչված անձի նկատմամբ նշանակվում է արդարացի պատիժ, որը որոշվում է սույն օրենսգրքի Հատուկ մասի համապատասխան հոդվածի սահմաններում` հաշվի առնելով սույն օրենսգրքի Ընդհանուր մասի դրույթները։
2. Պատժի տեսակը և չափը որոշվում են հանցագործության հանրության համար վտանգավորության աստիճանով և բնույթով, հանցավորի անձը բնութագրող տվյալներով, այդ թվում պատասխանատվությունը և պատիժը մեղմացնող կամ ծանրացնող հանգամանքներով։
(…)»։
ՀՀ քրեական օրենսգրքի 66-րդ հոդվածի համաձայն`
«1. Հանցանքների համակցությամբ յուրաքանչյուր հանցագործության համար առանձին պատիժ (հիմնական և լրացուցիչ) նշանակելով` դատարանը վերջնական պատիժը որոշում է նշանակված պատիժները լրիվ կամ մասնակիորեն գումարելու միջոցով։
(…)
4. Եթե հանցանքների համակցությունն ընդգրկում է ծանր կամ առանձնապես ծանր հանցանքներ, ապա վերջնական պատիժը նշանակվում է պատիժները լրիվ կամ մասնակիորեն գումարելու միջոցով։ Ընդ որում, ազատազրկման ձևով վերջնական պատիժը չի կարող գերազանցել քսանհինգ տարին։ Եթե համակցության մեջ մտնող հանցանքներից մեկի համար դատարանը նշանակում է ցմահ ազատազրկում, ապա վերջնական հիմնական պատիժը որոշվում է կլանելու միջոցով։
(…)»։
Նույն օրենսգրքի 68-րդ հոդվածի համաձայն`
«(…)
2. Տուգանքի, որոշակի պաշտոններ զբաղեցնելու կամ որոշակի գործունեությամբ զբաղվելու իրավունքից զրկելու, հատուկ կամ զինվորական կոչումից, կարգից, աստիճանից կամ որակավորման դասից զրկելու, ինչպես նաև գույքի բռնագրավման ձևով պատիժները կարգապահական գումարտակում պահելու, կալանքի, ազատազրկման հետ գումարելիս ի կատար են ածվում առանձին։»։
Ամբաստանյալ Կամո Մանվելյանի նկատմամբ ՀՀ քրեական օրենսգրքի 216-րդ հոդվածի 1-ին մասով նախատեսված արարքի կատարման համար կալանքը որպես պատիժ տվյալ դեպքում նշանակվել չի կարող, քանի որ նրա նկատմամբ որպես խափանման միջոց կիրառվել է կալանավորումը։
Այսպիսով, ամբաստանյալ Կամո Մանվելյանն իր կատարած` ՀՀ քրեական օրենսգրքի 216-րդ հոդվածի 1-ին մասով նախատեսված հանցագործության համար ենթակա է պատժի տուգանքի ձևով, իսկ ՀՀ քրեական օրենսգրքի 112-րդ հոդվածի 1-ին մասով` ենթակա է պատժի ազատազրկման ձևով։
Դատարանը գտնում է, որ իր նկատմամբ նշանակված պատիժն ամբաստանյալ Կամո Մանվելյանը պետք է կրի, քանի որ դրան խոչընդոտող հանգամանք առկա չէ։
Գործով քաղաքացիական հայց չի հարուցվել, գույքային վնասի հատուցման պահանջ չի ներկայացվել։
Քննարկելով գույքի վրա դրված կալանքի հարցը` դատարանը գտնում է, որ նախաքննության մարմնի` 2014թ. օգոստոսի 05-ի որոշմամբ ամբաստանյալ Կամո Գվիդոնի Մանվելյանի գույքի վրա դրված կալանքը պետք է վերացնել։
Քննարկելով իրեղեն ապացույցների հարցը` դատարանը գտնում է, որ դատավճռի օրինական ուժի մեջ մտնելուց հետո, 2014թ. օգոստոսի 15-ի որոշմամբ իրեղեն ապացույց ճանաչված դանակը պետք է ոչնչացնել, իսկ 2014թ. սեպտեմբերի 02-ի որոշմամբ իրեղեն ապացույց ճանաչված հեծանիվը պետք է թողնել տուժող Սուսաննա Աղասարյանի տնօրինմանը։
Քննարկելով խափանման միջոցի հարցը` դատարանը գտնում է, որ ամբաստանյալ Կամո Գվիդոնի Մանվելյանի նկատմամբ որպես խափանման միջոց ընտրված կալանավորումն ընտրված է ճիշտ և այն վերացվելու կամ փոփոխվելու ենթակա չէ` մինչև դատավճռի օրինական ուժի մեջ մտնելը, քանի որ ազատազրկման ձևով պատժի դատապարտվելու դեպքում, Կամո Մանվելյանի` քրեական պատասխանատվությունից և նշանակված պատիժը կրելուց խուսափելու հավանականությունը բարձր է։
Քննարկելով դատական ծախսերի հարցը` դատարանը գտնում է, որ ամբաստանյալ Կամո Գվիդոնի Մանվելյանից հօգուտ ՀՀ պետական բյուջեի բռնագանձման է ենթակա դատա-բժշկական փորձաքննության կատարման արժեք հանդիսացող 8.000 /ութ հազար/ ՀՀ դրամ գումարը` որպես դատական ծախսեր։
Վերոգրյալի հիման վրա և ղեկավարվելով ՀՀ քրեական դատավարության օրենսգրքի 119-րդ, 168-169-րդ, 236-238-րդ, 357-360-րդ, 364-365-րդ, 369-373-րդ հոդվածներով, դատարանը`
Վ Ճ Ռ Ե Ց

Ամբաստանյալ Կամո Գվիդոնի Մանվելյանին մեղավոր ճանաչել ՀՀ քրեական օրենսգրքի 112-րդ հոդվածի 1-ին մասով և 216-րդ հոդվածի 1-ին մասով նախատեսված հանցանքներում և դատապարտել.
ՀՀ քրեական օրենսգրքի 112-րդ հոդվածի 1-ին մասով` ազատազրկման 4 /չորս/ տարի ժամկետով,
ՀՀ քրեական օրենսգրքի 216-րդ հոդվածի 1-ին մասով` տուգանքի, նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամ գումարի չափով,
ՀՀ քրեական օրենսգրքի 66-րդ հոդվածով սահմանված` պատիժների լրիվ գումարման սկզբունքի կիրառմամբ, ամբաստանյալ Կամո Գվիդոնի Մանվելյանի նկատմամբ պատիժ նշանակել ազատազրկում` 4 /չորս/ տարի ժամկետով և տուգանք` նվազագույն աշխատավարձի երկուհարյուրապատիկի` 200.000 /երկու հարյուր հազար/ ՀՀ դրամ գումարի չափով։
Պատիժը պետք է կրի ՀՀ արդարադատության նախարարության համապատասխան քրեակատարողական հիմնարկում, ազատազրկման ձևով պատժի սկիզբը հաշվելով 2014թ. հուլիսի 23-ից։
Խափանման միջոց կալանավորումը թողնել անփոփոխ` մինչև դատավճռի օրինական ուժի մեջ մտնելը։
Նախաքննության մարմնի 2014թ. օգոստոսի 05-ի որոշմամբ ամբաստանյալ Կամո Գվիդոնի Մանվելյանի գույքի վրա դրված կալանքը վերացնել։
Դատավճռի օրինական ուժի մեջ մտնելուց հետո, 2014թ. օգոստոսի 15-ի որոշմամբ իրեղեն ապացույց ճանաչված դանակը ոչնչացնել, իսկ 2014թ. սեպտեմբերի 02-ի որոշմամբ իրեղեն ապացույց ճանաչված հեծանիվը թողնել տուժող Սուսաննա Աղասարյանի տնօրինմանը։
Ամբաստանյալ Կամո Գվիդոնի Մանվելյանից հօգուտ ՀՀ պետական բյուջեի բռնագանձել 8.000 /ութ հազար/ ՀՀ դրամ գումար` որպես դատական ծախսեր։
Դատավճիռը հրապարակվելու օրվանից հետո մեկամսյա ժամկետում կարող է բողոքարկվել ՀՀ վերաքննիչ քրեական դատարան։


ԴԱՏԱՎՈՐ` Մ. ՄԱՐՏԻՐՈՍՅԱՆ